1-2. Kasi munthu wakusanga vitumbiko wuli para wabatizika?

 NTCHAKUKONDWESKA chomene kubatizika na kuŵa mu mbumba ya Yehova. Ni mwaŵi ukuru chomene kuŵa paubwezi wakukhora nthena na Yehova. Nase tikukolerana na wamasalimo Davide, uyo wakati: “Wakukondwa ni munthu uyo mwamusora na kumusendezga pafupi, kuti wakhale mu maluŵaza ghinu.”—Sal. 65:4.

² Yehova wakuzomerezga waka waliyose yayi kuti wize mu maluŵaza ghake. Nga umo tikasambilira mu nkhani iyo yajumpha, iyo wakusankha kusendelera kwa ŵekha awo ŵakukhumba kuŵa nayo paubwezi wakukhora. (Yak. 4:8) Ntheura usange mwajipeleka kwa Yehova na kubatizika, mukusendelera kwa iyo munthowa yapadera. Manyani kuti para mwabatizika, iyo ‘wazamumupungulirani vitumbiko m’paka musoŵe pakusunga.’—Mal. 3:10; Yer. 17:​7, 8.

3. Kasi Ŵakhristu awo ŵajipeleka na kubatizika ŵali na udindo wuli ukuru? (Mupharazgi 5:​4, 5)

³ Ntheura ubatizo nkhwamba waka. Para mwabatizika, mukwenera kuchita vyose ivyo mungafiska kuti musungilire layizgo linu lakuti muteŵeterenge Yehova, kweniso kugomezgeka kwa iyo nanga mungasangana na viyezgo wuli. (Ŵazgani Mupharazgi 5:​4, 5.) Pakuŵa msambiri wa Yesu, mukwenera kulutilira kulondezga Yesu na kusungilira malango ghake. (Mat. 28:​19, 20; 1 Pet. 2:21) Nkhani iyi yimovwiraninge kuchita nthena.

‘LUTILIRANI KULONDEZGA’ YESU NANGA MUNGASANGANA NA VIYEZGO KWENISO MASUZGO

4. Kasi ŵasambiri ŵa Yesu ŵakunyamura wuli ‘khuni lakusuzgikirapo’? (Luka 9:23)

⁴ Lekani kughanaghana kuti para mwabatizika, ndikuti mbwenu mwaleka kusangana na masuzgo. Nakuti Yesu wakayowoya mwakupulikikwa  makora kuti ŵasambiri ŵake ŵanyamurenge ‘khuni lawo lakusuzgikirapo.’ Ndipo ŵanyamurenge khuni ili “zuŵa na zuŵa.” (Ŵazgani Luka 9:23.) Kasi apa ndikuti Yesu wakang’anamuranga kuti ŵalondezgi ŵake ŵazamukhaliranga waka kusuzgika? Yayi. M’malo mwake wakadidimizganga fundo yakuti padera pa vitumbiko ivyo ŵazamusanga, ŵasanganengeso na masuzgo. Ndipo ghanyake mwa masuzgo agha, ghazamuŵa ghakuŵinya chomene.—2 Tim. 3:12.

5. Kasi Yesu wakuŵalayizga vitumbiko wuli awo ŵasankha kujinora vinthu vinyake?

⁵ Vingachitika kuti mukususkika na ŵamumbumba yakwinu, panyake muli kujinora vinthu vinyake na chilato chakuti mudangizge vinthu vya Ufumu pa umoyo winu. (Mat. 6:33) Usange ni nthena, manyani kuti Yehova wakumanya vyose ivyo mukuchita kuti mumuteŵetere. (Heb. 6:10) Ndipo panji namwe mwajiwonera mwekha kuti mazgu gha Yesu agha ngaunenesko, agho ghakuti: “Palije uyo wasida nyumba panji ŵakuru panji ŵanung’una panji ŵadumbu panji nyina panji wiske panji ŵana panji minda chifukwa cha ine na chifukwa cha makani ghawemi uyo walekenge kusanga vyakusazgikira 100 mu nyengo yino, nyumba, ŵakuru panji ŵanung’una, ŵadumbu, anyina, ŵana, na minda, pamoza na nthambuzgo, ndipo mu nyengo iyo yikwiza umoyo wamuyirayira.” (Mrk. 10:​29, 30) Nakuti vitumbiko ivyo mwasanga ni vinandi chomene kujumpha vinthu vyose ivyo muli kujinora.—Sal. 37:4.

6. Chifukwa wuli mukhumbikwirenge kulutilira kulimbana na “makhumbiro gha thupi” pamanyuma pa kubatizika?

⁶ Mukwenera kulutilira kulimbana na “makhumbiro gha thupi,” pamanyuma pa kubatizika. (1 Yoh. 2:16) Vili nthena chifukwa chakuti muchali ŵambura kufikapo. Nyengo zinyake namwe mungajipulika nga umo wakajipulikiranga mpositole Paulosi. Iyo wakalemba kuti: “Mu mtima wane nkhukondwa na dango la Chiuta. Kweni nkhuwona dango linyake mu thupi lane ilo likulimbana na dango la maghanoghano ghane, ndipo likunizgora muzga wa dango la kwananga ilo lili mu thupi lane.” (Rom. 7:​22, 23) Nyengo zinyake mungamba kugongowa chifukwa chakuti mukulimbana na makhumbiro ghaheni. Ndipouli, kughanaghanirapo layizgo ilo mukalayizga Yehova apo mukajipelekanga kwa iyo, kungamovwirani kulimbana na makhumbiro ghaheni. Unenesko ngwakuti, ivyo mukamulayizga Yehova pa kujipeleka kwa iyo, vingamovwirani para mwayezgeka. Mwawuli?

7. Kasi kujipeleka kwa Yehova kumovwiraninge wuli kuti mulutilire kugomezgeka kwa iyo?

⁷ Para mwajipeleka kwa Yehova, ndikuti mwajipata. Ichi chikung’anamura kuti mwakana kuchita chilichose icho chikuleka kukondweska Yehova. (Mat. 16:24) Ntheura para mwayezgeka panji kukumana na suzgo lililose, musoŵenge chakuchita yayi. Vili nthena, chifukwa muŵenge kuti muli kusankha kale ivyo vingamovwirani kuti mulutilire kugomezgeka kwa Yehova. Nyengo zose muŵikengepo mtima kukondweska Yehova. Ndipo namwe muŵenge nga ni Yobu. Nangauli wakakumana na masuzgo ghakuru chomene, kweni iyo wakayowoya mwakusimikizga kuti: “Nitayengepo chara kunyoloka kwane.”—Yobu 27:5.

8. Kasi kughanaghanirapo pa lurombo ulo mukalomba pakujipeleka kungamovwirani wuli kuti mutonde chiyezgo?

⁸ Para mukughanaghanirapo pa lurombo ulo mukalomba apo mukajipelekanga kwa Yehova, vizamumovwirani kuti musange nkhongono zakutondera chiyezgo chilichose. Mwachiyelezgero, kasi mungamba kuphotokerana na munthu munyake uyo ni mwanalume panji mwanakazi winu yayi? Yayi! Chifukwa muli kumulayizga kale Yehova kuti mungachita yayi nthena. Ntheura usange mwaleka kuzomerezga kuti makhumbiro ghaheni ghajinthe misisi mu mtima winu, chiŵenge chipusu kughamazga nyengo yeneyiyo. ‘Muzamupatukako’ ku ‘nthowa ya ŵaheni.’—Zinth. 4:​14, 15.

9. Kasi kughanaghanirapo pa lurombo ulo mukalomba pakujipeleka kungamovwirani wuli kuti muŵikenge pakwamba vinthu vyauzimu?

 ⁹ Wuli usange mwasanga ntchito iyo yimutondeskaninge kuwungana nyengo zose? Usange vili nthena, mukumanya kale icho mungachita. Pambere ntchito iyi yindasangike, mukuŵa kuti mwasankha kale kuti mungagwira yayi ntchito iyo yikuleka kumupani m’pata wakuti muwunganenge nyengo zose. Ntheura muzamuyezgeka yayi kuti muzomere dankha ntchito, paumaliro na kwamba kusanga nthowa izo zingamovwirani kuti muŵike Yehova pakwamba. Kughanaghanirapo pa umo Yesu wakaŵikirapo mtima kukondweska Adada ŵake, namwe kungamovwirani kuti muŵikepo mtima kukana luŵiro chilichose icho chingakwiyiska Chiuta, uyo mukamulayizga kuti mumuteŵeterenge.—Mat. 4:10; Yoh. 8:29.

10. Kasi Yehova wamovwiraninge wuli kuti ‘mulutilire kulondezga’ Yesu pamanyuma pa kubatizika?

¹⁰ Unenesko ngwakuti masuzgo kweniso viyezgo ivyo mukukumana navyo vikumupani mwaŵi wakuti mulongore kuti mwaŵikapo mtima ‘kulutilira kulondezga’ Yesu. Manyani kuti Yehova wamovwiraninge kuchita nthena. Baibolo likuti: “Chiuta ngwakugomezgeka, ndipo wazomerenge yayi kuti imwe muyezgeke na kutondeka kuzizipizga. Kweni para chiyezgo chiza, wapelekenge nthowa yakumovwirani kuti muzizipizge.”—1 Kor. 10:13.

UMO MUNGACHITIRA KUTI MULUTILIRE KULONDEZGA YESU

11. Kasi ni nthowa wuli yiwemi chomene iyo yingamovwirani kuti mulutilire kulondezga Yesu? (Wonaniso chithuzi.)

¹¹ Yesu wakateŵetera Yehova na mtima wake wose, ndipo wakalutilira kusendelera kwa iyo kwizira mu lurombo. (Luka 6:12) Nakuti nthowa yimoza yiwemi chomene iyo yingamovwirani kuti mulutilire kulondezga Yesu pamanyuma pa kubatizika, nkhulutilira kuchita vinthu ivyo vingamovwirani kusendelera kwa Yehova. Baibolo  likuti: “Mulimose umo talutira panthazi, tiyeni tilutilire kwenda mwakwenelera munthowa yeneyiyi.” (Fil. 3:16) Nyengo na nyengo mupulikenge nkhani za ŵabali na ŵadumbu awo ŵakasankha kusazgirako uteŵeti wawo. Panji ŵanyake ŵakanjira Sukulu ya Ŵapharazgi ŵa Ufumu panji kusamira ku malo uko kukukhumbikwira wovwiri. Para namwe mungafiska kujiŵikira chilato chanthena ichi, mungachita makora chomene. Ŵateŵeti ŵa Yehova mbakukhumbisiska kusazgirako uteŵeti wawo. (Mil. 16:9) Kweni wuli usange mukuwona kuti pasono mungafiska yayi? Mukwenera yayi kujiwona kuti ndimwe ŵakutondeka pakuyaniska na awo ŵakufiska. Chakuzirwa chomene nkhulutilira kuzizipizga. (Mat. 10:22) Kudelera yayi vichoko ivyo mukuchita na mtima wose pa kuteŵetera Yehova kuyana na nkhongono zinu kweniso maluso ghinu. Iyi ni nthowa yiwemi iyo mungalondezgera Yesu pamanyuma pa kubatizika.—Sal. 26:1.

12-13. Kasi mungachita wuli para mwamphu winu wamba kuchepa? (1 Ŵakorinte 9:​16, 17) (Wonaniso bokosi lakuti “ Khalilirani pa Chiphalizgano.”)

¹² Wuli usange mukuwona kuti mukulomba mwa dango waka panji mukukondwa nayo yayi ntchito ya kupharazga? Wuli usange mukuwona kuti kuŵerenga Baibolo kukumunozgerani yayi nga umo vikaŵira kale? Para ndimo mukujipulikira pamanyuma pa kubatizika, lekani kughanaghana kuti Yehova waleka kumovwirani na mzimu wake. Ndimwe munthu wambura kufikapo, ndipo kaghanaghaniro kinu kangasintha nyengo na nyengo. Usange mwamphu winu wamba kuchepa, ghanaghanirani chiyelezgero cha mpositole Paulosi. Nangauli wakafwilirapo kumuyezga Yesu, kweni wakamanyanga kuti nyengo zinyake waŵavyenge khumbo likuru lakuchitira chinthu chinyake. (Ŵazgani 1 Ŵakorinte 9:​16, 17.) Iyo wakati: “Kweni usange nkhuchichizgika waka, vilije kanthu, uteŵeti uli kuŵikizgika kwa ine.” Paulosi wakaŵikapo mtima kufiska uteŵeti wake, nangauli nyengo zinyake wakaŵavyanga khumbo lakuchita nthena.

 ¹³ Mwakuyana waka, lekani kusankha waka vinthu kuyana na umo mukujipulikira. Ŵikanipo mtima kuchita icho ntchiwemi nanga vingaŵa kuti mukukhumba yayi kuchita chinthu icho. Para nyengo yajumphapo, kaghanaghaniro kinu nako kasinthenge usange mukulutilira kuyezgayezga kuchita icho ntchiwemi. Kuŵa na ndondomeko yiwemi yakuchitira vinthu vyauzimu, kumovwiraninge kuti mulutilire kulondezga Yesu pamanyuma pa kubatizika. Ndipo para ŵabali na ŵadumbu ŵakuwona kuti mukulutilira kuzizipizga apo mukuteŵetera Yehova, nawoso ŵakukhozgeka.—1 Tes. 5:11.

“LUTILIRANI KUPIMA . . . LUTILIRANI KUYEZGA”

14. Kasi nyengo na nyengo mukwenera kujisanda vichi, ndipo chifukwa wuli? (2 Ŵakorinte 13:5)

¹⁴ Ntchakuzirwa chomene kujisanda nyengo zose pamanyuma pa kubatizika. (Ŵazgani 2 Ŵakorinte 13:5.) Nyengo na nyengo mujisandenge na kuwona usange mukulomba zuŵa lililose, kuŵazga na kusambira Baibolo pamwekha, kuwungana nyengo zose, kweniso kuchitako mulimo wakupharazga. Yezgani kusanga nthowa izo zingamovwirani kuti mulutilire kukondwa na kusanga chandulo apo mukuchita vinthu ivi. Mwachiyelezgero, mungajifumba mafumbo nga ghakuti: ‘Kasi ningafiska kulongosolera ŵanji visambizgo vyakwambilira vya Baibolo? Kasi pali vinyake ivyo ningachita kuti nikondwenge chomene na uteŵeti wane? Kasi malurombo ghane ghakuŵa ghakudunjika, ndipo ghakulongora kuti nkhumugomezga chomene Yehova? Kasi nkhuwungana nyengo zose? Kasi ningachita wuli kuti nitegherezgenge chomene pa maungano na kuzgorapo?’

15-16. Kasi mukusambirapo vichi pa ivyo wakachita mubali munyake pa nkhani ya kutonda chiyezgo?

¹⁵ Ntchakuzirwaso kujimanya apo mukutondeka kuchita makora. Mubali munyake zina lake Robert wakayowoya ivyo vikamuchitikira, ivyo vikulongora kuti fundo iyi njaunenesko. Iyo wakati: “Apo nkhaŵa na vyaka pafupifupi 20, nkhamba ntchito iyo nkhagwiranga kwa mazuŵa ghachoko waka. Zuŵa linyake nati naŵeruka ku ntchito, mwanakazi munyake uyo tikagwiliranga lumoza ntchito wakanichemera kunyumba kwake. Iyo wakati tamuŵako tekha ndipo tamuŵa na ‘nyengo yiwemi.’ Pakwamba, nkhamugwenthagwenthanga waka, kweni paumaliro nkhakana na kumulongosolera chifukwa chake.” Robert wakakwaniska kutonda chiyezgo ichi, ndipo apa wakachita makora. Kweni pamanyuma wakaghanaghanirapo pa ivyo vikachitika ndipo wakasanga kuti pali vinyake ivyo wakatondeka kuchita makora. Ndipo wakuzomerezga kuti: “Nkhatondeka kukana nyengo yeneyiyo nga umo wakachitira Yosefe apo mwanakazi wa Potifara wakamunyengeleranga. (Gen. 39:​7-9) Nakuti nkhupulikiska yayi chifukwa icho chikaniŵira  chakusuzga kuti nikane nyengo yeneyiyo. Kweni chakuchitika ichi chikanovwira kumanya kuti nkhukhumbikwira kukhozga ubwezi wane na Yehova.”

¹⁶ Namwe mungasanga chandulo para mungajisanda nga umo wakachitira Robert. Nanga mungaŵa kuti mwakwaniska kutonda chiyezgo chinyake, jifumbani kuti, ‘Kasi vikanitolera nyengo yitali wuli kuti nichitepo kanthu?’ Usange mukuwona kuti pali panyake apo mukukhumbikwira kugwilirapo ntchito, kugongowa yayi. Kondwani waka kuti sono mukumanya suzgo linu. Muphalirani Yehova suzgo linu, na kuchitapo kanthu kuti mulutilire kulondezga fundo za Yehova.—Sal. 139:​23, 24.

17. Kasi ivyo vikachitikira Robert vikakhwaska wuli zina la Yehova?

¹⁷ Paliso chinyake icho tikusambirako pa ivyo vikamuchitikira Robert. Iyo wakulutizga kuti: “Nati namukanira, mwanakazi yura wakayowoya kuti, ‘Wakwera mayeso!’ Nkhamufumba icho wakang’anamuranga. Iyo wakalongosora kuti mubwezi wake uyo wakaŵapo Kaboni, wakamuphalira kuti Ŵakaboni wose ŵachinyamata ŵakuŵa na umoyo wapaŵiri, ndipo ŵangachita vinthu viheni para m’pata wasangika. Ntheura wakamuphalira mubwezi wake uyu kuti wazamuniyezga kuti wawone usange naneso ndimo niliri nadi. Paumaliro nkhakondwa pakumanya kuti ivyo nkhachita vikachindika zina la Yehova.”

18. Kasi mwaŵikapo mtima kuchita vichi pamanyuma pa kubatizika? (Wonaniso bokosi lakuti “ Nkhani Izo Zingamovwirani.”)

¹⁸ Para mwajipeleka kwa Yehova na kubatizika, mukulongora kuti mukukhumba kutuŵiska zina lake nanga mungakumana na viyezgo wuli. Ndipo manyani kuti Yehova wakumanya masuzgo agho mukusangana nagho kweniso viyezgo ivyo mukutonda. Iyo watumbikenge kuyezgayezga kwinu uko mukuchita kuti mulutilire kuŵa ŵakugomezgeka. Gomezgani kuti na mzimu wake utuŵa, wamupaninge nkhongono zakuchitira nthena. (Luka 11:​11-13) Na wovwiri wa Yehova, mulutilirenge kulondezga Yesu pamanyuma pa kubatizika.