1, 2. (a) Kasi mazgu gha Yesu gha pa Mateyu 24:12, ghakafiskika pa anjani? (b) Kasi buku la Milimo likulongora wuli kuti Ŵakhristu ŵakwambilira ŵanandi ŵakalutilira kulongora chitemwa? (Wonani chithuzithuzi chakwamba.)

CHINTHU chimoza icho Yesu wakati tizamumanyira kuti “umaliro wa charu” uli pafupi ntchakuti “chitemwa cha ŵanandi chizamuzizima.” (Mat. 24:3, 12) Mu nyengo ya Ŵakhristu ŵakwambilira, Ŵayuda awo ŵakajiwonanga kuti mbateŵeti ŵa Chiuta, ŵakaleka kutemwa Chiuta. Chitemwa chawo chikazizima.

² Kweni Ŵakhristu ŵanandi ŵakatangwanikanga na “kupharazga makani ghawemi ghakuyowoya vya Khristu.” Kweniso ŵakatemwanga Chiuta, Ŵakhristu ŵanyawo na ŵanthu waka. (Mil. 2:44-47; 5:42) Kweni Ŵakhristu ŵanyake ŵakazomerezga kuti chitemwa chawo chizizime.

3. Ni vinthu wuli ivyo vikapangiska kuti chitemwa cha Ŵakhristu ŵanyake chizizime?

³ Yesu Khristu wakaphalira Ŵakhristu awo ŵakhalanga mu Efeso, kuti: “Nkhukususka pa fundo yakuti wasida chitemwa icho  ukaŵa nacho pakwamba.” (Chivu. 2:4) Chifukwa wuli Yesu wakayowoya nthena? Ŵakhristu ŵakwambilira aŵa ŵakwenera kuti ŵakanangika na maghanoghano gha charu. (Efe. 2:2, 3) Mu msumba wa Efeso mukachitikanga vinthu viheni chomene nga umo viliri mu misumba yinandi mazuŵa ghano. Msumba uwu ukaŵa usambazi chomene ndipo ŵanthu ŵakatemwanga chomene vinthu vyapachanya, vyakusanguluska, na umoyo wa wofuwofu. Ŵanthu ŵakapenjenga vyakukhumba vyawo m’malo mwa kutemwa Chiuta na ŵanyawo. Kweniso ŵakachitanga uzaghali na nkharo zinyake zaukazuzi. Vinthu ivi vikaŵa palipose.

4. (a) Kasi chitemwa mazuŵa ghano chazizima wuli? (b) Chitemwa chithu chingayezgeka wuli?

⁴ Yesu wakayowoya kuti chitemwa cha ŵanthu chizamuzizima. Ivi vikuchitikaso mazuŵa ghano. Mazuŵa ghano ŵanthu ŵakumutemwa yayi Chiuta. Chitemwa chawo chikulutilira kuzizima. M’malo mwa kugomezga Chiuta kuti ndiyo wangaŵawovwira pa masuzgo ghawo, ŵanthu ŵanandi ŵakugomezga mawupu gha ŵanthu. Lekani chitemwa chikulutilira kuzizima pakati pa ŵanthu awo ŵakusopa yayi Yehova Chiuta. Nga umo vikaŵira na Ŵakhristu ŵakwambilira mu mpingo wa Efeso, Ŵakhristu mazuŵa ghano ŵangatolera nkharo ya charu na kuzomerezga kuti chitemwa chawo chizizime. Tiwonenge vigaŵa vitatu vya chitemwa chithu ivyo vingayezgeka: (1) Kutemwa Yehova, (2) Kutemwa unenesko uwo tikusambira mu Baibolo, (3) Kutemwa ŵabali ŵithu.

5. Chifukwa wuli tikwenera kutemwa Chiuta?

⁵ Pa zuŵa ilo Yesu wakachenjezgera kuti chitemwa cha ŵanthu chizamuzizima, wakayowoyaso munthu wakuzirwa uyo tose tikwenera kumutemwa. Wakati: “‘Utemwenge Yehova Chiuta wako na mtima wako wose na umoyo wako wose na maghanoghano ghako ghose.’ Ili ndilo ni dango likuru chomene na lakwamba.” (Mat. 22:37, 38) Para tikumutemwa chomene Yehova, vitovwirenge kuti tipulikirenge malango ghake, kuzizipizga masuzgo, na kutinkha viheni. (Ŵerengani Salimo 97:10.) Kweni Satana wakukhumba kuti tileke kutemwa Chiuta.

6. Ntchivichi chachitika chifukwa cha kuleka kutemwa Chiuta?

⁶ Ŵanthu pa charu chose ŵakuwona chitemwa mwakubudika. M’malo mwa kutemwa Mlengi, ŵanthu “ŵakujitemwa” ŵekha. (2 Tim. 3:2) Pakuti Satana ndiyo wakulamulira charu, “makhumbiro gha thupi, makhumbiro gha maso na kujilongora chifukwa cha ivyo uli navyo” vyazara chomene. (1 Yoh. 2:16) Mpositole Paulosi wakachenjezga Ŵakhristu ŵanyake kuti ŵaleke kukondweska mathupi ghawo, wakati: “Kughanaghanira vya thupi ni nyifwa, . . . chifukwa kughanaghanira vya thupi mbulwani na Chiuta.” (Rom. 8:6, 7) Uwu mbunenesko nadi. Awo ŵakatangwanikanga kupenja vinthu vya thupi, panji kukhorweska makhumbiro ghawo gha uzaghali, ŵali kukhuŵara na kujipweteka chomene.—1 Kor. 6:18; 1 Tim. 6:9, 10.

7. Kasi awo ŵakulondezga Khristu mazuŵa ghano ŵakusangana na masuzgo wuli?

⁷ Mu vyaru vinyake, ŵanthu awo ŵakugomezga kuti Chiuta kulije, awo ŵakuti ntchakusuzga kumanya usange waliko panji yayi, na awo ŵakuti vinthu vikachita kusintha, ŵapangiska ŵanthu kuti ŵaleke kutemwa Chiuta na kumugomezga. Ŵapangiska ŵanthu kuwona kuti awo ŵakugomezga mwa Mlengi mbakukhalira kweniso ŵalije mahara. Pakuti ŵanthu ŵakuchindika chomene ŵasayansi, ivyo ŵakuyowoya vyapangiska ŵanthu kuti ŵaŵe kutali na Mlengi withu. (Rom. 1:25) Para tikutegherezga ivyo ŵanthu aŵa ŵakuyowoya, tingaŵa kutali na Yehova, ndipo chitemwa chithu chingazizima.—Heb. 3:12.

8. (a) Kasi ŵateŵeti ŵa Yehova ŵanandi ŵali na masuzgo wuli? (b) Kasi mu Salimo 136 muli fundo wuli yakukhozga?

 ⁸ Para tingatondeka kuzizipizga masuzgo agho tingakumana nagho, chipulikano chithu chingalopwa ndipo chitemwa chithu chingazizima. Pakuti Satana ndiyo wakulamulira charu chose chapasi, tose nyengo zinyake tikukumana na masuzgo. (1 Yoh. 5:19) Panyake pasono tikusuzgika chifukwa cha uchekuru, matenda, panji ukavu. Panji tikusuzgika maghanoghano chifukwa tikujiwona ŵambura kwenelera, ivyo tikukhumba vikuchitika yayi, panji chifukwa tikutondeka kuchita vinyake. Kweni tileke kuwona kuti Yehova watitaya chifukwa cha masuzgo agha. Tikwenera kughanaghanira Mazgu gha Chiuta agho ghakulongora kuti Yehova wakutitemwa. Mazgu agha ghali pa Salimo 136:23, ndipo ghakuti: “Wakatikumbuka apo tikaŵa ŵakuyuyulika, pakuti lusungu lwake lukukhalilira muyirayira.” Mbunenesko nadi. Lusungu lwa Yehova lukukhalilira muyirayira. Lekani tikwenera kugomezga kuti wakupulika para ‘tikuŵeya kuti watovwire,’ ndipo wakutizgora.—Sal. 116:1; 136:24-26.

9. Ntchivichi chikawovwira Paulosi kuti walutilire kutemwa Chiuta?

⁹ Paulosi wakasanga nkhongono zakuzizipizgira chifukwa cha kumanya kuti Yehova wamovwirenge, nga umo wakawovwilira wamasalimo. Paulosi wakalemba kuti: “Yehova ni movwiri wane, nopenge chara. Kasi munthu wangachitachi kwa ine?” (Heb. 13:6) Chifukwa chakuti wakaŵa na chigomezgo kuti Yehova wamupwelelerenge, vikamovwira kuzizipizga masuzgo. Iyo wakazomerezga yayi kuti chitemwa chake chizizime chifukwa cha masuzgo agho wakakumana nagho. Lekani apo wakaŵa mu jele, wakalemba makalata ghakukhozga. (Efe. 4:1; Fil. 1:7; Filim. 1) Paulosi wakalutilira kutemwa Chiuta nanga mpha nyengo iyo wakayezgekanga. Ntchivichi chikamovwira kuti wachite nthena? Wakalutilira kugomezga “Chiuta wa chisangulusko chose, uyo wakutisanguluska mu suzgo yithu yose.” (2 Kor. 1:3, 4) Kasi tingamuyezga wuli Paulosi, na kulutilira kumutemwa chomene Yehova?

10. Kasi tingachita wuli kuti tilutilire kutemwa chomene Yehova?

¹⁰ Paulosi wakayowoyaso fundo yinyake iyo yingatovwira kuti tilutilire kutemwa chomene Yehova. Iyo wakalembera Ŵakhristu ŵanyake kuti: “Nyengo zose mulombenge.” Pamanyuma wakalemba kuti: “Koserani kulomba.” (1 Tes. 5:17; Rom. 12:12) Tingaŵa paubwezi wakukhora na Chiuta para tikuyowoya nayo mu lurombo. (Sal. 86:3) Para tikusanga nyengo yakuphalira Yehova vyakusingo vithu vyose na umo tikujipulikira, tisendelerenge chomene kwa Adada ŵithu ŵakuchanya awo “ŵakupulika malurombo.” (Sal. 65:2) Kweniso timutemwenge chomene Yehova para tamanya kuti wakuzgora malurombo ghithu. Tigomezgenge nadi kuti “Yehova wali pafupi na wose awo ŵakumuchema.” (Sal. 145:18) Para tamugomezga chomene Yehova tizizipizgenge masuzgo agho ghangayezga chipulikano chithu.

11, 12. Kasi tingachita wuli kuti tambe kutemwa unenesko uwo tikusambira mu Baibolo?

¹¹ Pakuŵa Ŵakaboni ŵa Yehova, tikutemwa chomene unenesko na kuwukhozgera. Unenesko tikuwusanga mu Mazgu gha Chiuta. Apo Yesu wakalombanga kwa Adada ŵake, wakati: “Mazgu ghinu mbunenesko.” (Yoh. 17:17) Ntheura kuti titemwe unenesko, tikwenera dankha kumanya makora Mazgu gha Chiuta. (Kol. 1:10) Kweni kumanya waka Mazgu gha Chiuta nkhwakukwana yayi. Uyo wakalemba Salimo 119 wakutovwira kupulikiska ng’anamuro la kutemwa unenesko wa mu Baibolo. Wonani ivyo wakayowoya. (Ŵerengani Salimo 119:97-100.) Para taŵerenga Baibolo, kasi tikusanga nyengo yakughanaghanirapo  zuŵa lose? Tilitemwenge chomene Baibolo para tikughanaghanira maphindu agho tikusanga para tikulondezga ivyo tikuŵerenga.

¹² Wamasalimo wakalembaso kuti: “Ivyo mukuyowoya vikunong’omera para nkhuvicheta, vikuluska uchi mu mulomo wane.” (Sal. 119:103) Nase tingakondwa na chakurya chauzimu cha mu Baibolo icho gulu la Chiuta likutipa. M’malo mwa kumira luŵiroluŵiro chakurya ichi, tikwenera kusumba. Ivi vitovwirenge kuti tikumbukirenge “mazgu ghakukondweska” ghaunenesko, na kovwira nagho ŵanyithu.—Muph. 12:10.

13. Ntchivichi chikawovwira Yeremiya kutemwa unenesko wa mu Malemba, ndipo vikamukhwaska wuli?

¹³ Ntchimi Yeremiya yikatemwanga chomene unenesko wa mu Malemba. Wonani umo Mazgu gha Chiuta ghakamufikira pamtima. “Mazgu ghinu ghakasangika, ndipo nkhagharya, mazgu ghinu ghakazgoka kwa ine chimwemwe na kusekelera mu mtima wane, pakuti nkhuchemeka na zina linu, a Yehova Chiuta wa mawumba.” (Yer. 15:16) Pakuti Yeremiya wakaghanaghanirangapo pa Mazgu gha Chiuta, tingati wakaryanga na kusumba Mazgu gha Chiuta. Chifukwa chakuchita nthena, wakawona kuti ni mwaŵi ukuru chomene kumanyikwa na zina la Chiuta. Unenesko wa mu Baibolo watovwira kumanya kuti ni mwaŵi ukuru chomene kumanyikwa na zina la Chiuta. Kweniso watovwira kuti tilutilire kupharazga Ufumu wake m’paka mu mazuŵa ghaumaliro agha.

14. Kasi tingachita wuli kuti titemwenge chomene unenesko uwo tikusambira mu Baibolo?

¹⁴ Padera pa kusambira Baibolo na kuŵerenga mabuku ghithu, ni vinthu wuli vinyake ivyo vingatovwira kuti titemwenge chomene unenesko wa mu Baibolo? Tingatemwa chomene unenesko wa mu Baibolo para tikuwungana nyengo zose. Sabata yiliyose tikusambira Baibolo kwizira mu Sambiro la Gongwe la Mulinda. Iyi ndiyo ni nthowa yikuru iyo tikusambizgikira. Kuti tipulikiskenge makora nkhani iyo tamusambira mu Gongwe la Mulinda, sabata yiliyose tikwenera kunozgekera makora. Tikwenera kuŵerenga Malemba ghose gha mu nkhani agho mazgu ghake ghandakoleke. Mazuŵa ghano, tingachita dawunilodi Gongwe la Mulinda pa webusayiti yithu ya jw.org, panji tingawona pa JW Library app mu viyowoyero vinandi.  Mafomati ghanyake gha pa webusayiti yithu ngakuti lemba ilo lili mu nkhani iyo tamusambira likujulika mwaluŵiro. Kwali Malemba tikuŵerengera mu Baibolo panji pa chinthu chinyake, titemwenge chomene unenesko wa mu Baibolo para tikuŵerenga Malemba ghose na kughanaghanirapo.—Ŵerengani Salimo 1:2.

15, 16. (a) Kuyana na Yohane 13:34, 35, kasi tikwenera kuchita vichi? (b) Chifukwa wuli para tikutemwa ŵabali ŵithu ndikuti tikutemwaso Chiuta na Baibolo?

¹⁵ Pa usiku waumaliro wa umoyo wake pa charu chapasi, Yesu wakaphalira ŵasambiri ŵake kuti: “Nkhumupani dango liphya, lakuti mutemwanenge, nga umo ine namutemwerani, ndimo namwe mutemweranenge. Usange mukutemwana, wose ŵamanyenge kuti ndimwe ŵasambiri ŵane.”—Yoh. 13:34, 35.

¹⁶ Para tikutemwa ŵabali na ŵadumbu ŵithu, ndikuti tikutemwaso Yehova. Tingamutemwa yayi Yehova para tikutinkha ŵabali ŵithu. Mpositole Yohane wakalemba kuti: “Uyo wakuleka kutemwa mubali wake uyo wakumuwona, wangamutemwa yayi Chiuta uyo wandamuwonepo.” (1 Yoh. 4:20) Kweniso para tikutemwa Yehova na ŵabali ŵithu ndikuti tikutemwaso Baibolo. Chifukwa wuli? Chifukwa para tikutemwa unenesko uwo tikusambira mu Baibolo, mbwenu tipulikirenge kufumira pasi pa mtima malango gha mu Baibolo, ghakuti titemwenge Chiuta na ŵabali ŵithu.—1 Pet. 1:22; 1 Yoh. 4:21.

17. Ni nthowa wuli zinyake izo tingalongolera chitemwa?

¹⁷ Ŵerengani 1 Ŵatesalonika 4:9, 10. Kasi tingachita wuli kuti tilongore usange tikutemwa nadi ŵabali na ŵadumbu mu mpingo? Mubali panji mudumbu muchekuru wangakhumbikwira wovwiri kuti walute ku maungano. Chokoro chingakhumbikwira wovwiri wa kunozga nyumba yake. (Yak. 1:27) Ŵachekuru, ŵana, mubali, mudumbu uyo wakhuŵara panji wakusuzgika maghanoghano panji wali na viyezgo vinyake, ŵakukhumbikwira wovwiri. Tikwenera kuŵakhozga na kuŵapembuzga. (Zinth. 12:25; Kol. 4:11) Tingalongora kuti tikutemwa nadi ŵabali ŵithu para ivyo tikuyowoya na kuchita, vikulongora kuti tikufipira mtima “awo mbamoza na ise mu chipulikano.”—Gal. 6:10.

18. Ntchivichi chitovwirenge kuwezgerapo mtende mu mpingo?

¹⁸ Baibolo likayowoyerathu kuti “mu mazuŵa ghaumaliro” gha charu chiheni ichi, ŵanthu ŵazamuŵa ŵakujighanaghanira ŵekha ndiposo ŵanonono. (2 Tim. 3:1, 2) Pakuŵa Ŵakaboni ŵa Yehova, tikwenera kuŵikapo mtima kuti tilutilire kutemwa Chiuta, unenesko uwo tikusambira mu Baibolo, na ŵabali ŵithu. Mbunenesko kuti nyengo zinyake tingapambana maghanoghano na ŵabali mu mpingo. Kweni tose mu mpingo tikuŵa ŵakukondwa para chitemwa chikutituma kuti tiwezgerengepo luŵiro mtende para tapambana maghanoghano na ŵabali ŵithu. (Efe. 4:32; Kol. 3:14) Tingazomerezganga yayi kuti chitemwa chithu chizizime. Kweni tilutilire kutemwa chomene Yehova, Mazgu ghake, kweniso ŵabali ŵithu.