PANYENGO iyo nkhasambiranga sukulu, vinthu vikasintha viŵi yayi mu tawuni yithu. Pa sukulu yithu, ŵanthu awo wambira nawo lumoza sukulu ndiwo ukamalizgangaso nawo. Kanandi munthu wakamanyanga mazina gha ŵanthu pafupifupi wose mu tawuni iyo tikakhalanga, ndipo nawo ŵakamanyanga zina lako.

Tawuni ya Liberty yikazingilizgika na mafamu ghachokoghachoko, ndipo ŵanthu ŵakatemwanga kulima ngoma. Apo ine nkhababikanga, adada ŵakaŵa kuti ŵakugwira kale ntchito kwa mulimi munyake. Nkhasambira kwendeska thilakitara apo nkhaŵa na vyaka vyapakati pa 13 na 19, ndipo nkhasambira maluso ghanyake ghakukhwaskana na vyaulimi.

Apo nkhababikanga, adada ŵakaŵa kuti mbamudara kale. Ŵakaŵa na vyaka 56. Amama ŵakaŵa na vyaka 35. Nangauli adada ŵakaŵa ŵalara, kweni ŵakaŵa ŵakuchepa thupi, ŵathupi liwemi ndiposo ŵankhongono. Ŵakalimbikiranga chomene ntchito, ndipo ŵakatisambizga taŵana kuti ndimo nase tichitirenge. Adada ŵakasanganga ndalama zinandi yayi, kweni tikaŵa na pakugona, vyakuvwara, na chakurya. Kweniso nyengo zose ŵakachezganga nase. Adada ŵakafwa ŵali na vyaka 93. Amama ŵakafwa ŵali na vyaka 86. Wose ŵakateŵeteranga Yehova yayi. Pa ŵamunyumba yakwithu, munung’una wane yumoza pera ndiyo wateŵetera mwakugomezgeka. Wateŵetera nga ni mulara kufuma waka cha m’ma 1970.

Amama ŵakatemwanga chomene vya chisopa. Ŵakalutanga nase ku tchalitchi la Baptist zuŵa lililose la Sabata. Apo nkhaŵa na vyaka 12, kakaŵa kakwamba kupulika chisambizgo cha Utatu. Ntheura nkhafumba amama kuti: “Kasi Yesu wangaŵa wuli Mwana, yekha pera Dada?” Nkhukumbuka ŵakanizgora kuti: “Wamwana, ntchakusuzga kupulikiska. Ni vyakuti tingavipulikiska yayi.” Vikanisuzga nadi kupulikiska. Apo nkhaŵa na vyaka 14 nkhabatizika mu kamlonga. Ŵakanibizga katatu mu maji kuyana na chisambizgo cha Utatu.

Apo nkhaŵa ku sukulu, nkhaŵa na munyane uyo wakachitanga maseŵero gha mafayiti kuti wasange ndalama, ndipo wakaninyengeleranga kuti nane nambe. Nkhamba kunozgekera ndipo nkhanjira gulu la Golden Gloves, ilo likasambizganga mafayiti. Nkhamanyanga viŵi yayi kutimba ndipo nati nachitako kwa nyengo yichoko, nkhaleka. Pamanyuma, ŵa U.S. Army ŵakanichema, ndipo ŵakanituma ku Germany. Apo nkhaŵa ku Germany, awo ŵakanilaŵiliranga ŵakanituma ku sukulu chifukwa ŵakaghanaghananga kuti nkhababika na mahara ghakulongozga. Ŵakakhumbanga kuti niŵe msilikari umoyo wane wose. Nkhakhumbanga yayi kulutilizga usilikari ndipo mu 1956 nati nagwira ntchito vyaka viŵiri, nkhaleka usilikari. Pakati pajumpha nyengo yichoko waka, nkhaŵaso msilikari kweni wakupambanako na wakwamba.

Pambere nindasambire unenesko, nkhaŵa na maghanoghano ghakubudika ghakukhwaskana na umo mwanalume wanadi wakwenera kuŵira. Ivyo nkhawoneleranga mu mafilimu kweniso umo ŵanthu ŵakachitiranga vinthu uko nkhakhalanga, ndivyo vikaninanga. Nkhawonanga kuti ŵanalume awo ŵakapharazganga, ŵakaŵa ŵanalume tondo. Nkhamba kusambira vinthu vinyake ivyo vikasintha chomene umoyo wane. Zuŵa linyake apo nkhendeskanga galimoto yane mu tawuni, ŵasungwana ŵaŵiri ŵakanibayibiska. Ŵakaŵa ŵadumbu ŵa mwanalume uyo wakatora mudumbu wane mulara. Ŵasungwana aŵa, ŵakaŵa Ŵakaboni ŵa Yehova. Nyengo yinyake nkhapokerapo magazini gha Gongwe la Mulinda na Wukani! ku ŵasungwana aŵa. Kweni nkhawona kuti Gongwe la Mulinda likaŵa lakusuzga chomene kulipulikiska. Zuŵa linyake, ŵakanichemera ku Sambiro la Buku la Mpingo. Panyengo iyo, ungano uwu ŵakachitiranga mu nyumba za ŵabali ndipo ŵakasambiranga Baibolo nyengo yichoko waka. Nkhaŵazgora kuti nkhaghanaghanirepo dankha. Ŵasungwana aŵa uku ŵakumwemwetera ŵakanifumba kuti, “Mukulayizga kuti mwizenge nadi?” Nkhazgora kuti, “Enya nkhulayizga.”

Pamanyuma nkhamba kudandawura kuti nabudiska kulayizga ŵasungwana ŵara, kweni nkhawona kuti ntchiwemi kufiska ivyo nalayizga. Ntheura usiku wura nkhaluta ku Sambiro la Buku. Ŵana ŵakanikondweska chomene. Nkhazizwa chomene kuwona unandi wa vinthu vya mu Baibolo ivyo ŵakavimanyanga. Nkhamanyanga tuchoko chomene twakukhwaskana na Baibolo nangauli zuŵa lililose la Sabata nkhalutanga ku tchalitchi na amama. Nkhakhumba chomene kusambira vinandi vya mu Baibolo. Nkhazomera kwamba kusambira Baibolo. Nkhasambira kuti zina leneko la Chiuta Mwenenkhongonozose ni Yehova. Pambere nindambe kusambira Baibolo, nkhafumba amama vyakukhwaskana na Ŵakaboni ŵa Yehova, ndipo ŵakaniphalira kuti: “Aa, ŵakusopa muchekuru munyake, zina lake Yehova.” Kweni nkhajulika kumaso nati namba kusambira Baibolo.

Nkhamba kulimbikira chomene chifukwa nkhamanya kuti nasanga unenesko. Nkhabatizika mu Malichi, 1957,  pambere myezi 9 yindajumphe kufuma apo nkhalutira kakwamba ku Sambiro la Buku. Nkhasintha umo nkhawoneranga vinthu. Ndine wakukondwa chomene kuti nkhasambira ivyo Baibolo likuyowoya za umo mwanalume wanadi wakuŵira, chifukwa kale nkhawonanga nthena yayi. Yesu wakaŵa munthu wakufikapo. Wakaŵa wankhongono chomene kuluska mwanalume waliyose. Iyo wakachitanga mbembe yayi, kweni “wakazomera kuti wasuzgike,” nga umo uchimi ukayowoyera. (Yes. 53:2, 7) Nkhasambira kuti msambiri wanadi wa Yesu “wakwenera kuŵa wakuzika ku wose.”—2 Tim. 2:24.

Chaka chakulondezgapo mu 1958, nkhamba upayiniya. Pakati pajumpha nyengo yichoko waka, nkhaleka dankha kwa nyengo yichoko. Chifukwa wuli? Nkhakhumbanga kutora Gloria, yumoza mwa ŵasungwana ŵaŵiri ŵara, awo ŵakanichema ku Sambiro la Buku. Nkhudandawurapo yayi kuti nkhatora Gloria. Gloria wakaŵa swenga apo nkhamutoranga ndipo mpaka sono wachali swenga. Kwa ine, ngwakuzirwa chomene kuluska malibwe ghakudura chomene, ndipo ndine wakukondwa chomene kuti nkhamutora. Lekani wamuphaliraniko pachoko waka mbiri yake:

“Tikababika 17 mu banja lakwithu. Amama ŵakaŵa Kaboni wakugomezgeka. Ŵakafwa apo nkhaŵa na vyaka 14. Apa ndipo adada ŵakambira kusambira Baibolo. Amama ŵakati ŵafwa, Adada ŵakadumbiskana na ahedi usange ŵangazomerezga kuti ine na mukuru wane tipambanenge mazuŵa ghakulutira ku sukulu. Panyengo iyo, mukuru wane wakaŵa mu chaka chaumaliro kuti wamalizge sukulu. Ivi vikawovwira kuti yumoza wa ise waŵenge ku nyumba na kupwelelera ŵana, kweniso kuti waphikirengethu chakurya cha namise kuti para Adada ŵawera ku ntchito tiryenge waka. Ahedi ŵakazomerezga, ndipo tikalutilira kuchita nthena m’paka apo mukuru wane wakamalizgira sukulu. Mabanja ghaŵiri gha Ŵakaboni, ghakasambiranga nase ndipo taŵana 11, tikazgoka Ŵakaboni ŵa Yehova. Nkhatemwanga chomene kupharazga nangauli mwakawiro nili wasoni. Sam wanovwira chomene pa nkhani iyi kwa vyaka vinandi.”

Ine na Gloria tikatorana mu Febuluwale 1959. Upayiniya ukatinozgeranga chomene. Mu Julayi 1959, tikapempha uteŵeti wa pa Beteli chifukwa tikakhumbanga chomene kukateŵetera ku likuru lithu. Mubali wakutemweka, Simon Kraker, wakachezga nase. Wakatiphalira kuti panyengo iyo, pa Beteli ŵakatoranga yayi ŵanthu ŵakutorana kale. Tikaleka yayi kuŵa na khumbo la kuteŵetera pa Beteli, kweni pakatora vyaka vinandi kuti tilute.

Tikalemba kalata ku likuru kupempha kuti ŵatizomerezge kukateŵetera ku malo uko ŵapharazgi ŵakaŵa ŵachoko. Ŵakatiphalira malo ghamoza pera ghakuti tiluteko. Kukaŵa ku Pine Bluff, Arkansas. Panyengo iyo, ku Pine Bluff kukaŵa waka mipingo yiŵiri. Umoza ukaŵa wa ŵazungu pera ndipo unyake ukaŵa wa “ŵakaladi” na ŵafipa. Ise ŵakatituma ku mpingo wa “ŵakaladi,” uwo ukaŵa waka na ŵapharazgi 14.

Mungazizwa kuti chifukwa wuli mu mipingo ya Ŵakaboni ŵa Yehova mukaŵanga sankho. Chifukwa ntchakuti panyengo iyi munthu wakasankhanga yayi chakuchita pa nkhani iyi. Malango gha boma ghakakanizganga kuti ŵanthu ŵa mitundu yakupambana ŵaŵenge pamoza, kweniso pakaŵanga mbembe usange ŵali pamoza. Mu vigaŵa vinandi, ŵabali ŵakawopanga kuti para ŵanthu ŵa mitundu yakupambana ŵangawungananga pamoza, mbwenu ŵanthu ŵangaswa Nyumba ya Ufumu. Vinthu ivi vikachitikanga. Para Ŵakaboni ŵafipa ŵakupharazga ku nyumba za ŵazungu, ŵakakakikanga ndiposo panji kuŵatimba. Ntheura kuti ntchito yakupharazga yende makora, tikapulikiranga malango gha boma, uku tikugomezga kuti vinthu visinthenge munthazi.

Pakaŵa masuzgo ghanyake apo tikachitanga uteŵeti withu. Nyengo zinyake para tikupharazga ku malo gha ŵafipa pera, mwangozi tikagogodanga pa chijaro cha ŵazungu. Tikeneranga kuwona chakuchita mwaluŵiro usange tikwenera kumupharazgira nyengo yichoko panji kuphepiska waka na kuluta. Ivi ndivyo vikachitikanga mu vigaŵa vinyake panyengo iyo.

Tikalimbikiranga kugwira ntchito kuti tisange ndalama yakuti yitovwire pakuchita upayiniya. Ntchito zinandi izo tikagwiranga, ŵakatipanga tundalama tuchoko chomene pa zuŵa. Gloria wakagwiranga ntchito zakupwelelera mu nyumba. Panyumba yinyake, ŵeneko ŵa nyumba ŵakanizomerezganga kuti nimovwirenge kuti wamare luŵiro. Pambere ine na Gloria tindawere, ŵakatipanga chakurya chamuhanya. Sabata yiliyose, Gloria wakasitiranga malaya banja linyake. Ine nkhapweleleranga maluŵa, kupuputa mawindo, na ntchito zinyake zabwekabweka. Ku nyumba ya muzungu munyake tikapuputanga mawindo. Gloria wakapuputanga mukati apo ine nkhapuputanga kuwaro. Tikatandaranga kuko zuŵa lose, ndipo ŵakatipanga chakurya chamuhanya. Gloria wakalyeranga munyumba kweni payekha,  apo ine nkhalyeranga kuwaro mu garaja. Ine nkhaŵavya navyo ntchito. Chikaŵa chakurya chiwemi chomene. Likaŵa banja liwemi chomene, kweni ŵanthu awo ŵakakhalanga nawo pafupi ndiwo ŵakaŵatimbanizga maghanoghano. Nkhukumbuka ivyo vikachitika nyengo yinyake apo tikayima pakumweskera mafuta. Tikati tamweska mafuta galimoto yithu, nkhapempha muzungu uyo wakagwiranga ntchito pa malo agha usange Gloria wangalutako ku chimbuzi chawo. Iyo wakanilaŵiska waka mwaukali, na kuyowoya kuti, “Nkhwakujara.”

Nangauli pakaŵa masuzgo, kweni tikakondwanga kuteŵetera na ŵabali, ndipo tikawutemwanga chomene uteŵeti withu. Tikati tafika waka ku Pine Bluff, tikakhalanga mu nyumba ya mubali uyo panyengo iyo wakaŵa muteŵeti wa mpingo. Muwoli wake wakaŵa Kaboni yayi, ndipo Gloria wakamba kusambira nayo Baibolo. Ine nkhamba kusambira Baibolo na mwana wawo mwanakazi ndiposo mfumu wake. Mama na mwana wake msungwana wose ŵakasankha kuteŵetera Yehova ndipo ŵakabatizika.

Tikaŵa na ŵabwezi mu mpingo wa ŵazungu. Ŵakatichemanga ku chakurya chanamise, kweni ŵanthu ŵakeneranga kutiwona yayi. Gulu lakuchemeka Ku Klux Klan (KKK), ilo likakhuŵilizganga kusankhana mitundu, likaŵanga maso chomene pa nkhani iyi ndipo likaŵa lankhaza chomene. Nkhukumbuka kuti usiku unyake pa chikondwelero cha Halowini, mwanalume munyake wakakhala pa khonde uku wavwara chikhoti chituŵa na chilaya icho chikaŵa na chipewa ku mutu nga umo ŵakavwaliranga ŵa KKK. Kweni ivi vikatondeskanga yayi ŵabali kuti ŵalongoranenge lusungu. Nyengo yinyake, tikakhumbikwiranga ndalama kuti tiyendere kuluta ku ungano wa chigaŵa, ndipo mubali wakazomera kugura galimoto yithu. Pakati pajumpha mwezi, zuŵa linyake mu nyengo yakotcha tikavuka chomene kupharazga nyumba na nyumba na kupangiska masambiro gha Baibolo. Tikati tafika ku nyumba tikazizwa chomene na ivyo tikawona. Tikasanga galimoto yithu, yili pa luŵaza. Pa gilasi la panthazi pakaŵa kapepara ako pakaŵa mazgu ghakuti: “Mungatora galimoto yinu nga ntchawanangwa kufuma kwa ine. Ndine mubali winu.”

Pakachitikaso chinthu chinyake icho chikanikhwaska chomene. Mu 1962, ŵakanichema ku Sukulu ya Uteŵeti wa Ufumu ku South Lansing, New York. Sukulu iyi yikaŵa ya mwezi umoza, ndipo ŵakasambizganga ŵalara, ŵalaŵiliri ŵa dera, na ŵalaŵiliri ŵa chigaŵa. Apo ŵakanichemanga ku sukulu iyi, ulova ukaŵa kuti wakomerathu ndipo nkhasuzgikiranga kusanga ndalama. Kweni kumanyuma nkhaŵa kuti nafumbirapo ntchito ku kamupani yinyake ya mafoni ku Pine Bluff. Ŵanitorenge mphanyi nkhaŵa munthu wakwamba mufipa kugwira ntchito ku kamupani iyi. Paumaliro ŵakanichema kuti nkhambe ntchito. Kasi nkhachita wuli? Nkhaŵavya ndalama zakuti nendere kuluta ku New York. Nkhati naghanaghanirapo chomene, nkhaghanaghana kuti nizomere ntchito na kukhala ku sukulu. Apo nkhanozgekanga kulemba kalata yakuti niŵaphalire kuti nizenge yayi ku sukulu, pakachitika chinthu chinyake icho nizamuluwa yayi.

Mudumbu munyake mu mpingo withu uyo mfumu wake wakaŵa Kaboni yayi, wakagogoda pa chijaro chithu mulenjilenji na kunipa nevulupu. Mu nevulupu iyi  mukazura ndalama. Iyo na ŵana ŵake ŵakacheleranga mulenjilenji kuluta ku munda kukatonthora (kusapa) thonje kweniso kuwuskako viswaswa mwakuti ŵasange ndalama zakuti nendere kuluta ku sukulu ku New York. Iyo wakati, “Lutani ku sukulu na kukasambira vinandi, ndipo para mwawerako muzakatisambizge.” Ntheura nkhapempha kamupani ya mafoni yira usange yinganizomerezga kuti nizakambe ntchito para pajumpha masabata ghankhondi. Ŵakanizgora kuti, “Takana!” Kweni nkhafipa mtima yayi. Nkhaŵa kuti nasankha kale chakuchita. Ndine wakukondwa chomene kuti nkhamba yayi ntchito yira.

Gloria wakukumbuka umo vinthu vikaŵira ku Pine Bluff. Iyo wakulongosora kuti: “Nkhatemwangako chomene ku Pine Bluff. Nkhaŵa na masambiro pakati pa 15 na 20. Kumulenji tikapharazganga nyumba na nyumba ndipo cha ku muhanya tikachitiskanga masambiro gha Baibolo m’paka mise, nyengo zinyake m’paka 11 koloko usiku. Uteŵeti ukanozganga chomene. Tilutilirenge kukhala kwenekura mphanyi vili makora waka. Kuyowoya unenesko nkhakhumbanga yayi kuleka uteŵeti uwo tikachitanga na kwamba kwendera dera na mfumu wane. Kweni Yehova wakaŵa na maghanoghano ghanyake.” Ndivyo vikachitika nadi.

Apo tikachitanga upayiniya ku Pine Bluff, tikapempha upayiniya wapadera. Tikaŵa na chigomezgo chose kuti ŵatitorenge chifukwa mulaŵiliri withu wa dera wakakhumbanga kuti tikawovwire mpingo ku Texas, ndipo wakakhumbanga kuti tilute nga mbapayiniya ŵapadera. Tikawona kuti ivyo wakayowoya ni viwemi. Ntheura tikalindilira nyengo yitali, kugomezga kuti Sosayite yitizgorenge, kweni tikasanganga mu bokosi la makalata muli twee. Paumaliro, tikapokera kalata yakuti tikambe kwendera dera. Mukaŵa mu Janyuwale 1965. Uteŵeti uwu tikambira nyengo yimoza na mubali Leon Weaver, uyo sono wakuteŵetera nga ni mulaŵiliri wa milimo ya Komiti ya Munthavi wa United States.

Ŵati ŵaniphalira kuti niŵenge mulaŵiliri wa dera nkhafipa mtima. Chaka chimoza kumanyuma, mulaŵiliri wa chigaŵa, James A. Thompson, Jr., wakasanda umo nkhuchitira. Wakaniphalira mwalusungu vinthu ivyo nkhwenera kuyezgayezga kuchita makora, ndipo wakayowoyaso maluso agho mulaŵiliri wa dera wakwenera kuŵa nagho. Nkhati nendera dera nyengo yichoko waka, nkhawona kuti ulongozgi uwo wakanipa ukaŵa wakwenelera nadi. Nati naŵa waka mulaŵiliri wa dera, Mubali Thompson wakaŵa mulaŵiliri wa chigaŵa wakwamba kuteŵetera nayo. Nkhasambira vinandi kwa mubali wakukhwima mwauzimu uyu.

Panyengo iyo, mulaŵiliri wa dera wakasambizgikanga vinandi yayi. Kwa sabata yimoza, nkhawonanga umo mulaŵiliri wa dera wakuchitira pakuchezgera mpingo. Ndipo sabata yakulondezgapo, mulaŵiliri wa dera wakawonanga umo ine nkhuchitira pakuchezgera mpingo unyake. Wakanipa masachizgo na ulongozgi. Kufuma apo, tikamba kwendera tekha. Nkhukumbuka kuti  nkhaphalira Gloria kuti: “Nkhuwona kuti watileka luŵiro.” Kweni nyengo yikati yajumphapo, nkhasambirapo kanthu kanyake. Nkhasambira kuti usange wajiyuyura nyengo zose pakuŵa ŵabali awo ŵangakovwira. Nichali kuwonga wovwiri uwo ŵabali aŵa ŵakanipa: Mubali J. R. Brown, uyo panyengo iyo wakaŵa mulaŵiliri wa dera, na Fred Rusk uyo wakaŵa pa Beteli.

Panyengo iyo, kusankhana mitundu kukatora malo. Nyengo yinyake, gulu la KKK likendanga mu tawuni ya Tennessee iyo tikenderanga. Nkhukumbuka zuŵa linyake apo gulu lithu la uteŵeti likayima dankha pa resitiranti yinyake kuti tigure chakurya. Apo nkhalutanga ku chimbuzi kuti nkhajovwire nkhawona mwanalume munyake wakofya kweniso wajilembalemba mu thupi nga mbazungu awo ŵakakhozgeranga sankho. Wakatomoka kwiza kwa ine. Kweni mubali munyake muzungu, uyo wakawonekanga wavinkhongono kuluska ine na muzungu yura wakatilondezga. Wakafumba kuti: “Kasi vyose vili makora Mubali Herd?” Mwanalume yura wakafuma luŵiro mu chimbuzi kwambura kujovwira. Vyaka vyose ivi, nasambira kuti ŵanthu ŵakuŵa na sankho chifukwa cha mtundu wawo yayi, kweni chifukwa cha kwananga uko tose tili kuhara kufuma kwa Adamu. Kweniso nasambira kuti mubali wako wauzimu ndiyo ni mubali wako, nanga mungapambana mtundu. Iyo ngwakunozgeka kukufwira para ntchakwenelera.

Tikendera dera vyaka 12, ndipo vyaka 21 tikendera chigaŵa. Vikaŵa vyaka viwemi chomene, vyakuzura na vinthu vyakukondweska. Thumbiko linyake likaŵa munthowa. Mu Ogasiti 1997, chinthu icho tikakhumbanga nyengo yitali chikafiskika. Tikachemeka kuti tikateŵetere ku Beteli ya United States. Ivi vikachitika pati pajumpha vyaka 38 kufuma apo tikapemphera uteŵeti uwu. Mwezi wakulondezgapo, tikamba uteŵeti withu pa Beteli. Nkhaghanaghananga kuti ŵabali pa Beteli ŵanichema kuti novwirepo pa tumilimo tunyake kwa nyengo yichoko waka. Kweni ndimo vikaŵira yayi.

Pakwamba ŵakaniŵika ku Dipatimenti ya Uteŵeti. Nkhasambira vinandi. Ŵabali awo ŵakagwiranga ku dipatimenti iyi, ŵakazgoranga mafumbo ghakusuzga kufuma ku mawupu gha ŵalara na ŵalaŵiliri ŵa dera mu charu chose cha United States. Nkhuwonga chomene kuti ŵabali ŵakanisambizga mwakuzikira. Kweni nkhuwona kuti para ŵangati niwelereso ku Dipatimenti ya Uteŵeti, mbwenu namuŵaso nga nkhusambira sono.

Ine na Gloria tikuwutemwa chomene umoyo wa pa Beteli. Kwamba kale, tili kuzgoŵera kuwuka mulenjilenji, ndipo ivi vikutovwira chomene pa Beteli. Pakati pajumpha chaka, nkhamba kuteŵetera nga ni movwiri wa Komiti ya Uteŵeti ya Wupu Wakulongozga wa Ŵakaboni ŵa Yehova. Ndipo mu 1999, nkhimikika kuŵa yumoza wa mu Wupu Wakulongozga. Nasambira vinandi chomene pa uteŵeti uwu. Kweni sambiro likuru chomene ndakuti Yesu Khristu ndiyo ni mutu wa mpingo waunenesko, munthu waliyose yayi.

Para nkhughanaghanira umo umoyo wane ukaŵira kumanyuma, nyengo zinyake nkhujipulika nga ni ntchimi Amosi. Yehova wakawona muliska wapasi uyu, uyo wakagwiranga ntchito yakutondora vikuyu, chakurya icho ŵakavu pera ndiwo ŵakaryanga. Chiuta wakasankha Amosi kuti waŵe ntchimi, uwo ukaŵa uteŵeti wapadera chomene. (Am. 7:14, 15, mazgu ghamusi.) Mwakuyana waka, Yehova wakawona ine, mwana wa mulimi mukavu ku Liberty, Indiana, na kunitumbika chomene. Nkhusoŵa na chakuyowoya wuwo umo wanitumbikira. (Zinth. 10:22) Pakwamba nkhaŵa mukavu mwakuthupi, kweni sono ndine musambazi chomene mwauzimu. Nkhaghanaghanangako yayi kuti nizamuŵa musambazi nthena.