TIKWENERA kuyezgayezga kupenja mtende chifukwa tikukhala mu charu chakuzura na masuzgo. Nangauli tingaŵa na mtende, kweni kanandi vikutisuzga kuti tiwusungilire. Kasi Mazgu gha Chiuta ghakuti ntchivichi chingatovwira kuti tisange mtende wenecho ndiposo wambura kumara? Ndipo kasi tingawovwira wuli ŵanyithu kuti nawo ŵasange mtende wenecho?

Kuti tiŵe na mtende wenecho, tikwenera kuŵa ŵakuvikilirika na kukhazikika maghanoghano. Kweniso tikwenera kuŵa paubwezi na ŵanyithu. Kuti tiŵe na mtende wambura kumara, chakuzirwa chomene ntchakuti tiŵe paubwezi na Chiuta. Kasi tingachita wuli nthena?

Para tikupulikira malango gha Yehova na fundo zake, tikulongora kuti tikumugomezga ndipo tikukhumba kuŵa nayo paubwezi. (Yer. 17:7, 8; Yak. 2:22, 23) Para tachita nthena, wakusendelera nase pafupi ndipo wakutipa mtende wa mu mtima. Lemba la Yesaya 32:17 likuti: “Mu urunji wenecho muzamufuma mtende, ndipo chipambi cha urunji wenecho ni bata na chimango muyirayira.” Tikuŵa na mtende wa mu mtima para tikupulikira Yehova kufumira pasi pamtima.—Yes. 48:18, 19.

Adada ŵithu ŵakuchanya ŵakutipa chawanangwa chapadera kuti chitovwire kuti tiŵe na mtende wambura kumara. Chawanangwa ichi ni mzimu utuŵa.—Mil. 9:31.

Apo mpositole Paulosi wakazunuranga “vipambi vya mzimu,” mtende ukaŵa pa nambara 3. (Gal. 5:22, 23) Pakuti mzimu wa Chiuta ndiwo ukupeleka mtende wenecho, ntheura tikwenera kulongozgeka na mzimu utuŵa kuti tiŵe na mtende wenecho. Mzimu wa Chiuta ungatovwira kuti tiŵe na mtende. Tiyeni tiwone umo ungatovwilira. Tiwonenge nthowa ziŵiri.

 Yakwamba, tikuŵa na mtende para nyengo zose tikuŵerenga Mazgu gha Chiuta. (Sal. 1:2, 3) Para tikughanaghanirapo ivyo tikuŵerenga mu Baibolo, mzimu wa Chiuta ukutovwira kupulikiska maghanoghano gha Yehova pa nkhani zinandi. Mwachiyelezgero, tikumanya umo Yehova wakulutilira kuŵa pamtende na ŵanthu, kweniso chifukwa icho wakuwonera mtende kuti ngwakuzirwa. Tikuŵa na mtende ukuru para tikuchita ivyo tikusambira mu Mazgu gha Chiuta.—Zinth. 3:1, 2.

Yachiŵiri, tikwenera kulomba mzimu utuŵa wa Chiuta. (Luka 11:13) Yehova wakulayizga kuti para tikumulomba kuti watovwire, watipenge “mtende wa Chiuta uwo ukuluska maghanoghano ghose, uvikilirenge mitima [yithu] na maghanoghano [ghithu] kwizira mwa Khristu Yesu.” (Fil. 4:6, 7) Para nyengo zose tikulomba na kupempha mzimu wa Yehova, iyo wakutipa mtende wa mu mtima uwo ukuŵa na ŵanthu ŵekha awo ŵali nayo paubwezi.—Rom. 15:13.

Kasi ŵanyake ŵachita wuli kuti ŵalondezge ulongozgi wa mu Baibolo uwu, na kusintha vinthu vinyake kuti ŵaŵe pamtende na Yehova, iwo paŵekha, kweniso na ŵanyawo?

Mazuŵa ghano, mu mpingo Wachikhristu muli ŵanthu ŵanyake awo kale ‘ŵakatemwanga kukalipa,’ kweni sono mbakuzika, ŵalusungu, ŵakuzikira, ndipo mbamtende pakuchita vinthu na ŵanyawo. * (Zinth. 29:22) Wonani umo mubali na mudumbu ŵakawovwilikira kuti ŵaleke ukali na kwamba kuŵa pamtende na ŵanyawo.

Nkharo yiheni iyo David wakaŵa nayo yikakhwaskangaso ivyo wakayowoyanga. Pambere wandasambire unenesko, wakatemwanga kusanga ŵanyake tuvifukwa, ndipo wakayowoyanga mazgu ghaukali ku banja lake. Pakati pajumpha nyengo, David wakawona kuti wakwenera kusintha na kuŵa wamtende. Kasi wakachita wuli kuti wambe kuŵa wamtende? Iyo wakati: “Nkhamba kulondezga fundo za mu Baibolo, ntheura tikamba kuchindikana chomene na ŵa mu banja lane.”

Rachel wakaŵa na nkharo yiheni chifukwa cha umo wakakulira. Iyo wakati: “Nanga ni sono nichali kusuzgika na ukali chifukwa nkhakulira  mu banja ilo waliyose wakaŵa mukali.” Kasi ntchivichi chikamovwira kuti waŵe wamtende? Iyo wakati, “Nyengo zose nkhalombanga Yehova kuti wanovwire.”

Ivyo vikachitikira David na Rachel vikulongora kuti tingaŵa ŵamtende para tikulondezga fundo za mu Malemba na kupempha Chiuta kuti watipe mzimu wake. Nangauli tili mu charu chiheni, tingaŵa na mtende wa mu mtima uwo ungatovwira kuti tikhalenge makora na ŵa mu banja lithu ndiposo Ŵakhristu ŵanyithu. Kweni Yehova wakutiphalira kuti tiŵe “pamtende na ŵanthu wose.” (Rom. 12:18) Kasi ivi vingachitika nadi? Kasi pakuŵa vyandulo wuli usange tikuyezgayezga kuŵa ŵamtende?

Para tikupharazga, tikovwira ŵanthu kuti ŵapulike uthenga wamtende wakuyowoya za Ufumu wa Chiuta. (Yes. 9:6, 7; Mat. 24:14) Chakukondweska ntchakuti ŵanandi ŵapulikira uthenga uwu. Chifukwa cha kuchita nthena, iwo ŵaleka kusuzgika maghanoghano panji kuŵa ŵakali na ivyo vikuchitika mu charu. Sono ŵakulindilira viwemi munthazi ndipo ‘ŵakupenja mtende na kuwulondezga.’—Sal. 34:14.

Kweni mbanandi yayi awo ŵakuzomera uthenga withu kakwamba. (Yoh. 3:19) Nangauli vili nthena, mzimu wa Chiuta ukutovwira kuti tiŵapharazgirenge makani ghawemi mwamtende kweniso mwantchindi. Para tachita nthena, ndikuti tikulondezga ulongozgi wa Yesu wakukhwaskana na uteŵeti. Ulongozgi uwu uli pa Mateyu 10:11-13, apo pakuti: “Para mukunjira mu nyumba, tawuzgani mweneko wa nyumba. Usange nyumba iyo njakwenelera, mtende uwo mukuyikhumbira wize pa iyo. Kweni usange njambura kwenelera, mtende winu uwelere pa imwe.” Para tikulondezga ulongozgi uwu, tiŵenge na mtende nyengo zose ndipo vingawovwira munthu uyo tikumupharazgira kuti wazakategherezge uthenga withu kunthazi.

Kweniso tikuŵa na mtende para tikuyowoya mwantchindi na ŵalara ŵa boma, nanga ni awo ŵakususka ntchito yithu. Mwachiyelezgero, mu charu chinyake ku Africa, boma likatitinkhanga, ntheura likakananga kuzomerezga kuti tizengenge Nyumba za Ufumu. Kuti ŵamazge suzgo ili mwamtende, mubali munyake uyo wakachitanga umishonale mu charu cha ku Africa ichi wakatumika kuti wakakumane na Kazembe wa charu ichi ku London, England. Mubali uyu wakenera kukaphalira mulara wa boma uyu umo Ŵakaboni ŵa Yehova ŵakugwilira ntchito yawo mwamtende ku charu chake. Kasi vikenda wuli?

Mubali uyu wakuti: “Nkhati nafika pa malo ghakufikira ŵalendo, ivyo wakavwara uyo wakapokeleranga ŵalendo vikalongora kuti wakaŵa wa fuko ilo ine nkhasambira chiyowoyero chawo. Ntheura nkhamutawuzga mu chiyowoyero chake. Iyo wakazizwa chomene, ndipo wakanifumba kuti, ‘Kuno mwendera vichi?’ Nkhamuzgora mwantchindi kuti nkhukhumba kuwonana na Kazembe. Ntheura wakamuyimbira foni, ndipo kazembe yura wakiza na kunitawuzga mu chiyowoyero chake. Pamanyuma wakategherezga mwakuzikira apo nkhamulongosoleranga milimo iyo Ŵakaboni ŵakuchita mu charu chake.”

Chifukwa chakuti mubali wakalongosora mwantchindi, vikawovwira kuti mulara wa boma wapulikiske vinthu vinyake ivyo ŵaboma ŵakavipulikiskanga uheni. Pakati pajumpha nyengo, boma la mu charu cha ku Africa ichi, likawuskapo malango ghanyake ghakukhwaskana na kuzenga Nyumba za Ufumu. Ŵabali ŵakakondwa chomene na ivyo vikachitika. Nadi, pakuŵa viwemi vinandi kweniso mtende para tikuchindika ŵanthu.

Mazuŵa ghano, ŵanthu ŵa Yehova ŵakukondwa na paradiso wauzimu chifukwa pakati pawo pali mtende. Para mukuyezgayezga kuti muŵe na chipambi chauzimu ichi, muwovwirenge kuti mu paradiso wauzimu mulutilire kuŵa mtende. Chakuzirwa chomene ntchakuti, Yehova wamutemwaninge ndipo muzamusanga mtende wambura kumara mu charu chiphya cha Chiuta.—2 Pet. 3:13, 14.