1-2. Kasi ni masuzgo wuli agho Ŵakaboni ŵanandi ŵakusangana nagho?

MPOSITOLE Paulosi wakachiska Timote kweniso Ŵakhristu wose kuti ŵachitenge vyose ivyo ŵangafiska pa mulimo wakupharazga. (2 Tim. 4:5) Ntheura tose tikulondezga mazgu gha Paulosi agha, ndipo tikuchita vyose ivyo tingafiska pakuteŵetera Chiuta. Kweni nyengo zinyake tikukumana na masuzgo. Ŵabali na ŵadumbu ŵithu ŵanandi ŵakwenera kuchita chikanga kuti ŵapharazge. (2 Tim. 4:2) Mwachiyelezgero, ghanaghanirani za ŵabali ŵithu awo ŵakukhala mu vyaru ivyo milimo yithu yinyake njakukanizgika panji muli bani. Ŵakulutilira kupharazga nangauli ŵakumanya kuti para ŵasangika ŵaŵajalirenge mu jele.

² Ŵanthu ŵa Yehova ŵakusangana na masuzgo ghanandi ghakuti ghangaŵagongoweska. Mwachiyelezgero, ŵanandi ŵakugwira ntchito kwa maora ghanandi kuti ŵasangire mbumba zawo vinthu vyakukhumbikwa pa umoyo. Ŵakukhumba kuchita vinandi mu uteŵeti, kweni ŵakuŵa kuti ŵavuka chomene kuumaliro wa sabata. Ŵanyake ŵakuchita vichoko waka pakuteŵetera Yehova chifukwa mbalwari chomene, mbachekuru ndipo panji ŵanyake ŵangafumapo yayi panyumba. Kweniso ŵanyake ŵakujiwona kuti mbakuzirwa yayi kwa Yehova. Mary, * mudumbu uyo wakukhala ku Middle East wakuti: “Nkhuchita kuyezgayezga chomene kuti nikanizge maghanoghano ghaheni ghakujikayikira, ndipo ivi vikunipangiska kuti nkhongono zinimalirenge. Paumaliro nkhujiyimba mulandu chifukwa vikunimalira nyengo na nkhongono zakuchitira uteŵeti.”

3. Kasi tisambirenge vichi mu nkhani iyi?

³ Nanga tingaŵa na masuzgo wuli, Yehova wangatipa nkhongono izo tikukhumbikwira kuti tilutilire kumuteŵetera mulimose umo tingafiskira. Pambere tindasambire umo Yehova wangatovwilira, tiyeni tiwone umo wakakhozgera Paulosi na Timote kuti  ŵafiske uteŵeti wawo nangauli ŵakasangananga na masuzgo.

4. Kasi Paulosi wakasangana na masuzgo wuli?

⁴ Paulosi wakasangana na masuzgo ghanandi. Wakakhumbikwiranga wovwiri wa Yehova pa nyengo iyo ŵalwani ŵake ŵakamutimbanga, kumudinya na malibwe, kumuŵika mu jele kweniso nanga nkhukhumba kumukoma. (2 Kor. 11:23-25) Paulosi wakayowoya mwambura kubisa kuti nyengo zinyake nayo wakasuzgikanga kuchita icho ntchiwemi ndipo wakajikayikiranga. (Rom. 7:18, 19, 24) Kweniso wakalwaranga ndipo ulwari uwu ukaŵa nga ni “munga mu thupi,” ndipo wakakhumbanga chomene kuti Chiuta wawuwuskemo.​—2 Kor. 12:7, 8.

5. Kasi Paulosi wakafiska kuchita vichi nangauli wakasangananga na masuzgo?

⁵ Yehova wakamupa nkhongono Paulosi kuti walutilire kuchita uteŵeti wake nangauli wakasangananga na masuzgo ghanandi. Wonani ivyo Paulosi wakafiska kuchita. Mwachiyelezgero, apo wakaŵa pa jele la panyumba ku Romu, wakalimbikiranga kupharazgira ŵalongozgi Ŵachiyuda kweniso panji kusazgapo ŵalara ŵa boma. (Mil. 28:17; Fil. 4:21, 22) Kweniso wakapharazgira ŵasilikari ŵanandi ŵa Themba na ŵanthu ŵanandi awo ŵakizanga kuzakamuwona. (Mil. 28:30, 31; Fil. 1:13) Ndipo panyengo yeneyiyi, Yehova wakawovwiraso Paulosi kulemba makalata agho ghakawovwira Ŵakhristu ŵaunenesko mu nyengo yakale, ndipo ghakutovwiraso ise mazuŵa ghano. Mwakusazgirapo, ivyo wakachita Paulosi vikakhozga mpingo ku Romu ndipo ivi vikawovwira ŵabali ‘kulongora chikanga chomene na kuyowoya mazgu gha Chiuta kwambura wofi.’ (Fil. 1:14) Nangauli Paulosi wakatondekanga kuchita vinandi nga umo wakakhumbiranga, kweni wakachita vyose ivyo wangafiska, ndipo ivi ‘vikawovwira kuthandazga makani ghawemi.’​—Fil. 1:12.

6. Kuyana na 2 Ŵakorinte 12:9, 10, kasi ntchivichi chikawovwira Paulosi kuti wafiske uteŵeti uwo wakachitanga?

⁶ Paulosi wakamanyanga kuti chilichose icho wakachitanga pakuteŵetera Yehova, wakafiskanga chifukwa cha nkhongono za Yehova, zake yayi. Wakalemba kuti para ‘walopwa ndipo nkhongono za Chiuta zikaŵanga zakufikapo.’ (Ŵazgani 2 Ŵakorinte 12:9, 10.) Mwakugwiliskira ntchito Mzimu wake utuŵa, Yehova wakamupa nkhongono Paulosi kuti wachite uteŵeti wake mwakukwana nangauli wakatambuzgikanga, kujalirika mu jele, kweniso kusangana na masuzgo ghanyake.

7. Kasi ni masuzgo wuli agho Timote wakasangana nagho agho mphanyi ghakapangiska kuti chiŵe chakusuzga kufiska uteŵeti wake?

 ⁷ Timote mubali wachinyamata uyo wakateŵeteranga lumoza na Paulosi, nayo wakeneranga kugomezga nkhongono za Chiuta kuti wachite uteŵeti wake. Timote wakalutanga lumoza na Paulosi ku maulendo ghatalighatali gha umishonale. Kweniso Paulosi wakamutumanga kuti wendere mipingo na kuyikhozga. (1 Kor. 4:17) Panji nyengo zinyake Timote wakajiwonanga kuti wangafiska yayi kuchita vyose ivi. Lekani panji Paulosi wakamuphalira kuti: “Munthu waleke kudelera uwukirano wako.” (1 Tim. 4:12) Ndipo panyengo iyi, Timote nayo wakaŵa na munga mu thupi, panji kuti ‘ulwari uwo ukamusuzganga nyengo zinandi.’ (1 Tim. 5:23) Kweni Timote wakamanyanga kuti mzimu utuŵa wa Yehova uwo ngwankhongono chomene umupenge nkhongono kuti wapharazge makani ghawemi na kuteŵetera ŵabali.​—2 Tim. 1:7.

8. Kasi Yehova wapeleka vinthu wuli kuti viwovwire ŵanthu ŵake mazuŵa ghano?

⁸ Mazuŵa ghano napo, Yehova wakupa ŵanthu ŵake “nkhongono zakuluska zakawiro” kuti ŵalutilire kumuteŵetera mwakugomezgeka. (2 Kor. 4:7) Tiyeni tiwone vinthu 4 ivyo Yehova watipa kuti vitovwire kuŵa na nkhongono na kulutilira kuŵa ŵakugomezgeka kwa iyo. Vinthu ivi ni lurombo, Baibolo, ŵabali na ŵadumbu mu mpingo na upharazgi.

9. Kasi lurombo lungatovwira wuli?

⁹ Wakutipa nkhongono kwizira mu lurombo. Pa Ŵaefeso 6:18, Paulosi wakutichiska kuti tilombenge kwa Chiuta pa “chakuchitika chilichose.” Chiuta wazgorenge malurombo ghithu na kutovwira. Jonnie uyo wakukhala ku Bolivia wakawona umo Yehova wakamovwilira panyengo iyo wakaŵa na masuzgo ghanandi. Ŵapapi ŵake na muwoli wake, wose ŵakalwara chomene panyengo yimoza. Chikaŵa chakusuzga chomene kwa Jonnie kuchita yekha chilichose chakukhumbikwira kuti waŵapwelelere wose ŵatatu. Amama ŵake ŵakatayika, ndipo pakatora nyengo yitali kuti muwoli wake kweniso adada ŵake ŵachire. Pakuyowoyapo za nyengo yakusuzga iyi, Jonnie wakuti: “Apo nkhenjerwanga chomene, icho chikanovwira nkhulomba kwa Yehova na kumuphalira umo nkhujipulikira.” Yehova wakamupa nkhongono Jonnie kuti wafiske kuzizipizga. Ronald, mubali mulara ku Bolivia, amama ŵake ŵakasangika na kansa. Pati pajumpha mwezi umoza, ŵakatayika. Kasi ntchivichi chikamovwira panyengo yakusuzga iyi? Iyo wakuti: “Para nkhulomba kwa Yehova, nkhumuphalira umo nkhujipulikira. Nkhumanya kuti ndiyo wakunimanya makora kujumpha waliyose, kusazgapo na namweneko wuwo.” Nyengo zinyake masuzgo ghangatiŵira ghanandi chomene ndipo tingamanya yayi icho tingalomba. Kweni Yehova wakukhumba kuti timulombenge nanga chingaŵa chakusuzga kumuphalira umo tikujipulikira panyengo iyo.​—Rom. 8:26, 27.

10. Nga umo pakulongolera pa Ŵahebere 4:12, chifukwa wuli ntchakuzirwa chomene kuŵazga Baibolo na kughanaghanirapo?

¹⁰ Wakutipa nkhongono kwizira mu Baibolo. Paulosi wakaŵazganga Malemba kuti wakhozgeke na kupembuzgika. Nase ndimo tikwenera kuchitira. (Rom. 15:4) Usange tikuŵazga Mazgu gha Chiuta na kughanaghanirapo, Yehova watovwirenge kumanya umo tingagwiliskira ntchito fundo izo taŵazga kuti zitovwire. (Ŵazgani Ŵahebere 4:12.) Ronald uyo tamuzunura kale wakuti: “Ndine wakukondwa kuti nkhalimbikiranga kuŵazgapo Baibolo usiku uliwose. Nkhaghanaghanirangapo chomene pa mikhaliro ya Yehova kweniso umo wakupwelelera ŵanthu ŵake. Ivi vikanikhozganga chomene.”

11. Kasi Baibolo likakhozga wuli mudumbu munyake uyo wakaŵa na chitima chomene?

¹¹ Para tikughanaghanirapo pa Mazgu gha Chiuta, vikutovwira kuti tiwonenge vinthu  mwakwenelera para tasangana na masuzgo. Wonani umo Baibolo likawovwilira mudumbu munyake uyo wakaŵa na chitima chomene chifukwa cha nyifwa ya mfumu wake. Mulara munyake wakamuphalira kuti wangasambira fundo zakuzirwa chomene para wangaŵazga buku la Yobu. Ndipo apo wakambanga kuŵazga, wakamba kumususka Yobu chifukwa cha maghanoghano ghaheni agho wakaŵa nagho. Mu maghanoghano ghake wakaŵa nga wakumuphalira Yobu kuti: “Yobu! Leka kughanaghanira waka za masuzgo ghako!” Kweni pamanyuma, wakawamo kuti ndimo nayo wakachitiranga. Ivi vikamovwira kuti wasinthe umo wakaghanaghaniranga ndipo vikamukhozga na kumovwira kuzizipizga nyifwa ya mfumu wake.

12. Kasi Yehova wakutikhozga wuli kwizira mu ŵabali na ŵadumbu?

¹² Wakutipa nkhongono kwizira mu ŵabali na ŵadumbu. Nthowa yinyake iyo Yehova wakutikhozgera, nkhwizira mu ŵasopi ŵanyithu. Paulosi wakalemba kuti wakakhumbanga chomene kuti ‘wakhwimiskanenge’ na ŵabali na ŵadumbu ŵake ŵauzimu. (Rom. 1:11, 12) Mary uyo tamuzunura kale, wakutemwa chomene kuŵa pamoza na ŵabali na ŵadumbu. Iyo wakuti: “Yehova wakagwiliskira ntchito ŵabali na ŵadumbu awo ŵakamanyangapo yayi za masuzgo ghane. Ŵakayowoyanga mazgu ghakukhozga panji kunitumira makalata, ndipo mukaŵanga mazgu agho nkhakhumbikwiranga nadi kupulika. Ivi vikanovwiraso kuti nifwatuke kudumbiskana na ŵadumbu awo nawo ŵakaŵapo na masuzgo ghakuyana na ghane ndipo nkhasambirapo pa umo ŵakachitira. Kweniso ŵalara, nyengo zose ŵakanovwiranga kujipulika kuti nane nili wakuzirwa mu mpingo, ndipo ŵabali na ŵadumbu ŵakunitemwa chomene.”

13. Kasi tingakhozgana wuli ku maungano gha mpingo?

¹³ Malo ghawemi chomene agho tingakhozgeranako nkhu maungano gha mpingo. Para mwaluta ku maungano, yezgani kukhozga ŵanji mwakuŵaphalira kuti mukuŵatemwa ndipo mukuwonga ivyo ŵakuchita. Mwachiyelezgero, zuŵa linyake pambere maungano ghandambe, mubali mulara munyake zina lake Peter wakaphalira mudumbu munyake uyo mfumu wake ni Kaboni yayi, kuti: “Tikukhozgeka chomene para tikumuwonani ku maungano kuno. Nyengo zose mukwiza na ŵana ŵinu 6 ndipo ŵakuŵa kuti ŵanozgekera kuzakazgorapo.” Mudumbu uyu wakathiska masozi ndipo wakazgora kuti: “Nakhumbikwiranga kupulika nadi mazgu agha muhanya uno.”

14. Kasi mulimo wakupharazga ukutovwira wuli?

¹⁴ Wakutipa nkhongono kwizira mu upharazgi. Para tikuphalirako ŵanji uthenga wa mu Baibolo, tikujipulika makora nanga ŵanthu ŵangaŵa kuti ŵakutegherezga panji yayi. (Zinth. 11:25) Mudumbu munyake zina lake Stacy wali kuwona umo upharazgi ukutikhozgera. Munyake mu mbumba yakwawo wati wasezgeka, chitima chikamukora chomene ndipo nyengo zose mu mtima wakatenge, ‘Panji mphanyi nkhachita vinandi kuti nimovwire.’ Nyengo zose Stacy wakaghanaghaniranga za suzgo ili. Kasi ntchivichi chikamovwira kuti wambe kujipulika makora? Ni upharazgi! Para wapharazga, wakaghanaghaniranga chomene za ŵanthu awo ŵakakhumbikwiranga wovwiri mu chigaŵa chawo. Iyo wakuti: “Panyengo iyo, Yehova wakanipa msambiri wa Baibolo uyo wakamba kuluta panthazi mwaluŵiro chomene. Ichi chikanikhozga chomene. Chinthu icho chanovwira chomene pa umoyo wane, ni mulimo wakupharazga.”

15. Kasi mwasambirako vichi ku ivyo Mary wakayowoya?

¹⁵ Chifukwa cha umo vinthu viliri pa umoyo wawo, ŵanyake ŵakujipulika kuti ŵakuchita vinandi yayi pa mulimo wa kupharazga. Usange ndimo namwe mukujipulikira, kumbukani kuti Yehova wakukondwa usange mukuchita ivyo mungafiska. Ghanaghaniraniso umo vinthu vikaŵira kwa Mary. Wati wasamira mu chigaŵa cha chiyowoyero chinyake, wakawonanga kuti wangachita vinandi yayi. Iyo wakuti, “Kwa kanyengo, nkhazgorangapo waka mafumbo ghapusu  pera pa maungano, panji kuŵazga waka lemba, panji kugaŵirako waka kathirakiti mu upharazgi.” Ntheura wakamba kujiwona kuti palije icho wakuchitapo para wakujiyaniska na ŵanthu awo ŵakayowoyanga makora chiyowoyero icho. Kweni pamanyuma, wakasintha kaghanaghaniro kake. Wakamba kuwamo kuti Yehova wangamugwiliskira ntchito nangauli wakayowoyanga makora yayi chiyowoyero icho. Iyo wakuti, “Ivyo Baibolo likuyowoya ni vipusu ndipo vingasintha umoyo wa ŵanthu.”

16. Kasi ntchivichi chingawovwira awo ŵakukhala waka panyumba kweni ŵakukhumba kupharazga?

¹⁶ Yehova wakumanya kuti taŵanyake tikukhumbisiska kupharazga nangauli tikwenda yayi, tikukhala waka panyumba. Ntheura wangatovwira kupharazgira awo ŵakutipwelelera, madokotala kweniso manesi. Para tikuyaniska ivyo tikachitanga kumanyuma na ivyo tikuchita sono, mbwenu tigongowenge. Kweni para tikughanaghanira umo Yehova wakutovwilira sono, tisangenge nkhongono zakuzizipizgira masuzgo uku tikukondwa.

17. Kuyana na Mupharazgi 11:6, chifukwa wuli tikwenera kulutilira kupharazga nanga ŵanthu ŵangaŵa kuti ŵakuchitapo kanthu nyengo yeneyiyo yayi?

¹⁷ Tikumanya yayi kuti ni mbuto wuli zaunenesko izo tapanda, izo zimelenge na kwamba kukura. (Ŵazgani Mupharazgi 11:6.) Mwachiyelezgero, Barbara, mudumbu uyo wali na vyaka vyakujumpha 80, nyengo zose wakupharazga kwizira pa telefoni na makalata. Mu kalata yake yinyake, wakaŵikamo Gongwe la Mulinda la Malichi 1, 2014, ilo mukaŵa nkhani ya mutu wakuti “Kasi Chiuta Wali Kumuchitirani Vichi?” Iyo wakamanya yayi kuti kalata iyi, wakatumizga kwa mfumu na muwoli awo ŵakaŵa ŵakusezgeka. Ŵanthu aŵa ŵakaŵazga magazini iyi mwakuwerezgawerezga. Ndipo mfumu wakajipulika nga kuti Yehova wakuyowoya waka na iyo. Ŵanthu aŵa ŵakamba kwiza ku maungano pati pajumpha vyaka vyakujumpha 27 kufuma apo wakasezgekera, ndipo pamanyuma ŵakaŵaso Ŵakaboni ŵakulimbikira. Ghanaghanirani waka umo Barbara wakakhozgekera kuwona ivyo vikachitika chifukwa cha kalata yimoza iyo wakalemba!

18. Kasi tikwenera kuchita vichi kuti Chiuta watipe nkhongono?

¹⁸ Yehova watipa vinthu vinandi kuti watipe nkhongono, nga ni lurombo, Baibolo, ŵabali na ŵadumbu kweniso mulimo wakupharazga. Para tikugwiliskira ntchito vinthu ivi, tikulongora kuti tikugomezga kuti wangatovwira ndipo ngwakukhumbisiska kutovwira. Tiyeni nyengo zose tigomezgenge Dada withu wakuchanya uyo ngwakukhumbisiska kuti “walongore nkhongono zake pa awo mitima yawo njakufikapo kwa iyo.”​—2 Mid. 16:9.