1. Kasi taŵanandi takumanapo na suzgo wuli?

 KASI muli kujiŵikirapo chilato chauzimu kweni vikamusuzgani kuchifiska? b Usange ni nthena, muli mwekha yayi. Mwachiyelezgero, Philip wakakhumbanga kuti walombenge malurombo ghakupulikikwa makora chomene kweniso kuti walombenge pafupipafupi, kweni vikamusuzganga kusanga nyengo yakulombera. Erika wakajiŵikira chilato chakuti wafikenge mwakutendekera ku maungano ghakunozgekera uteŵeti, kweni wakafikanga mwakuchedwa pafupifupi waka ungano uliwose. Tomáš wakayezgapo kanandi waka kuti waŵerenge Baibolo lose. Iyo wakuti: “Unenesko ngwakuti kuŵerenga Baibolo vikaninozgeranga yayi. Nkhayezgapo katatu kose, kweni nkhalekeranga waka pa buku la Levitiko.”

2. Chifukwa wuli tikwenera yayi kugongowa para tindafiske chilato chithu chauzimu?

² Usange pasono muli na chilato icho mundafiske, kugongowa yayi. Manyani kuti nanga chilato chingaŵa chipusu waka, kweni kuti muchifiske, kanandi pakukhumbikwira nyengo kweniso chitatata. Kweni pakuti muchali nawo mtima wakukhumba kufiska chilato chinu, ntchilongolero chakuti mukuzirwiska ubwezi winu na Yehova kweniso kuti mukukhumba kumupa viwemi chomene. Yehova wakuwonga chomene kuyezgayezga kwinu. Nakuti iyo wakukhazga kuti mumupenge vinandi kuluska ivyo mungakwaniska yayi. (Sal. 103:14; Mika 6:8) Ntheura jiŵikirani chilato icho mukuwona kuti mungafiska nadi. Para  mwajiŵikira chilato, kasi mungachita wuli kuti muchifiske? Tiyeni tidumbiskane masachizgo ghanyake.

3. Chifukwa wuli ntchakuzirwa chomene kuŵa na khumbo?

³ Kuti munthu wafiske vilato vyake vyauzimu wakwenera kuŵa na khumbo panji kuti kuŵa wakukhumbisiska chomene kuti wavifiske. Munthu uyo wali na khumbo, wakulimbikira chomene kuti wafiske chilato chake. Khumbo tingaliyaniska na mphepo iyo yikututuzga boti ilo likwendera mphepo kuti likafike uko likuluta. Pekha para mphepo yikulutilira kuputa ndipo boti lingakafika uko likuluta. Nakuti para mphepo yikuputa mwankhongono, boti likufika luŵiro chomene. Mwakuyana waka, para tili ŵakukhumbisiska chomene, ndipo tingafiskaso vilato vithu. Mubali munyake wa ku El Salvador, zina lake David, wakuti: “Para uli wakukhumbisiska, ukuyezgayezga chomene. Ukuzomerezga chilichose yayi kukutondeska kufiska chilato chako.” Ntheura kasi mungachita wuli kuti muŵe na khumbo kuti mufiske chilato chinu?

4. Kasi tingalomba vichi kwa Yehova? (Ŵafilipi 2:13) (Wonaniso chithuzi.)

⁴ Lombani Yehova kuti wamupani khumbo. Kwizira mwa mzimu wake utuŵa, Yehova wangamupani khumbo lakuti mufiske chilato chinu. (Ŵazgani Ŵafilipi 2:13.) Nyengo zinyake tikujiŵikira chilato chifukwa chakuti waka tikumanya kuti ndivyo tikwenera kuchita. Ntchiwemi waka kuchita nthena. Kweni pasi pa mtima tingaŵavya khumbo lakuti tifiske nadi chilato icho. Ivi ndivyo vikachitikira mudumbu munyake wa ku Uganda zina lake Norina. Iyo wakajiŵikira chilato chakuti waŵe na sambiro la Baibolo, kweni wakatondekanga kuŵikapo mtima chifukwa chakuti wakajiwonanga kuti wakusambizga makora yayi. Kasi ntchivichi chikamovwira? Iyo wakuti: “Nkhamba kulomba Yehova zuŵa lililose kuti wasazgireko khumbo lane lakuti nambiske sambiro la Baibolo. Mwakukolerana na ivyo nkhalombanga, nkhalimbikira chomene kuti nisazgireko luso lwane pakusambizga. Pati pajumpha myezi yichoko waka nkhawona kuti khumbo lane lakuti niŵe na sambiro la Baibolo likaŵa likuru chomene. Mu chaka chenechicho nkhambiska masambiro gha Baibolo ghaŵiri.”

5. Kasi tingaghanaghanirapo vichi kuti tiŵe ŵakukhumbisiska chomene kufiska chilato chithu?

⁵ Mughanaghanirengepo pa ivyo Yehova wamuchitirani. (Sal. 143:5) Mpositole Paulosi wakaghanaghanirangapo chomene pa lusungu lukuru ulo Yehova wakamulongora, ndipo ivi vikamuchiska kuti waŵikepo mtima kuteŵetera Yehova. (1 Kor. 15:9, 10; 1 Tim. 1:12-14) Mwakuyana waka, para mukughanaghanirapo chomene pa ivyo Yehova wamuchitirani, muŵenge ŵakukhumbisiska chomene kufiska chilato chinu. (Sal. 116:12) Wonani ivyo vikawovwira mudumbu munyake wa ku Honduras kuti wafiske chilato chake cha kuŵa mupayiniya. Iyo wakuti: “Nkhaghanaghanirangapo chomene pa ivyo Yehova wakunichitira. Wali kuniguzira ku ŵanthu ŵake. Wakunipwelelera kweniso kunivikilira. Chifukwa cha kughanaghanirapo pa vinthu ivi, vikanovwira kuti nimutemwe chomene Yehova, kweniso khumbo lane la kuchita upayiniya likakura chomene.”

6. Kasi ntchivichi chinyake icho chingatovwira kuti tiŵe ŵakukhumbisiska kufiska chilato chithu?

⁶ Ghanaghaniranipo pa vitumbiko ivyo musangenge para mwafiska chilato chinu. Wonani ivyo  vikawovwira Erika, uyo tangumuzunura kukwambilira kuti wakajiŵikira chilato chakuti wafikenge mwakutendekera pa maungano ghakunozgekera uteŵeti. Iyo wakuti: “Nkhawona kuti vinandi vikanijumphanga chifukwa cha kufika mwakuchedwa. Ndipo nkhawona kuti para ningamba kufika mwakutendekera, viwovwirenge kuti nitawuzganenge na ŵabali na ŵadumbu kweniso kuchezga nawo. Niŵengeso na mwaŵi wakutegherezga masachizgo ghakovwira agho ghanovwirenge kuti niŵe na luso mu uteŵeti kweniso kuti nikondwenge na uteŵeti.” Erika wakaghanaghanirapo chomene pa vitumbiko ivyo wasangenge para wafiska chilato chake, ndipo wakafiska nadi chilato chake. Kasi imwe ni vitumbiko wuli ivyo mungaghanaghanirapo? Usange chilato chinu ntchakukhwaskana na kuŵerenga Baibolo panji kulomba, ghanaghaniranipo umo vinthu ivi vingakhozgera ubwezi winu na Yehova. (Sal. 145:18, 19) Usange chilato chinu ntchakuti muŵe na mukhaliro unyake Wachikhristu, ghanaghanirani umo vimovwiliraninge kuti muŵe paubwezi uwemi na ŵanyinu. (Kol. 3:14) Mungachita makora chomene kulemba vifukwa ivyo mukukhumbira kufiskira chilato chinu. Ndipo nyengo na nyengo muwonengepo apo mwalemba. Tomáš, uyo tangumuzunura kukwambilira, wakuti: “Para nili na vifukwa vinandi vyakuti nifiskire chilato chane, chikuŵa chakusuzga kuti nigongowe.”

7. Kasi ntchivichi chikawovwira Julio na muwoli wake kufiska chilato chawo?

⁷ Muchezgenge na awo ŵangamuchiskani. (Zinth. 13:20) Wonani ivyo vikawovwira Julio na muwoli wake kuti ŵafiske chilato chawo chakuti ŵasazgireko uteŵeti wawo. Iyo wakuti: “Tikasankha ŵabwezi awo ŵangatichiska kuti tifiske chilato chithu, ndipo tikadumbiskananga nawo vya chilato chithu. Ŵanandi mwa iwo ŵakaŵa kuti ŵali kufiska kale chilato chakuyana na chithu, ntheura ŵakatipako masachizgo ghakovwira. Ŵabwezi ŵithu aŵa ŵakatifumbangaso umo vinthu vikenderanga pa nkhani ya kufiska chilato chithu, ndipo ŵakatikhozganga panyengo iyo tikakhumbikwiranga kukhozgeka.”

8. Kasi chingachitika ntchivichi usange tikulimbikira kufiska chilato chithu pekha para khumbo lizamo? (Wonaniso chithuzi.)

⁸ Pafupifupi waliyose wa ise, yikuŵapo nyengo iyo wakuwona kuti wangafiska yayi chilato chake. Kasi para vyaŵa nthena ndikuti tingafiska nadi yayi? Yayi. Kuti tipulikiske makora fundo iyi, tiyeni tiwone chiyelezgero ichi: Mphepo yankhongono yikovwira chomene kuti boti ilo likuthemba mphepo likafike uko likuluta. Kweni ni nyengo zose yayi apo kukuŵa mphepo yankhongono. Ndipo mazuŵa ghanyake kukuŵavyirathu mphepo. Kasi ichi chikung’anamura kuti awo ŵakwendeska maboti agha ŵangenda yayi para mphepo kulije? Yayi. Vili nthena chifukwa chakuti maboti ghanyake ghakuŵaso na injini panji nkhafi. Ŵangagwiliskira ntchito vinthu ivi kuti ŵakafike uko ŵakuluta. Khumbo lakuti tifiske chilato chithu, tingaliyaniska na mphepo. Mazuŵa ghanyake lingaŵa likuru apo ghanyake yayi. Ndipo mazuŵa ghanyake, tingaŵavyirathu khumbo lakuti tichitepo kanthu kuti tifiske chilato chithu. Ntheura usange tichitengepo kanthu pekha para khumbo laŵa likuru, nyengo zinyake tingafiska yayi chilato chithu. Kweni nga umo wakuchitira wakwendeska boti, kuti wakuŵaso na nthowa zinyake kuti m’paka wakafike uko wakuluta, nase tingalutilira kuchitapo kanthu kuti tifiske chilato chithu nanga ni apo tikuwona kuti khumbo lamba kuchepa. Nangauli ntchipusu yayi  kuchita nthena, kweni para mwafiska chilato chinu muŵenge ŵakukondwa. Tidumbiskanenge umo mungachitira nthena. Kweni pambere tindadumbiskane umo tingachitira kuti tifiske chilato chithu, tiyeni tizgore dankha fumbo ilo tingajifumba.

9. Kasi tikwenera kulutilira kuchitapo kanthu kuti tifiske chilato chithu nanga mphanyengo iyo khumbo lakuti tifiske chilato icho lamba kuchepa? Longosorani.

⁹ Yehova wakukhumba kuti timuteŵeterenge mwakukondwa kweniso mwambura kuchichizgika. (Sal. 100:2; 2 Kor. 9:7) Ipo kasi tikwenera kulutilira kuchitapo kanthu kuti tifiske chilato chithu uku tilije khumbo? Ghanaghanirani ivyo vikachitikira mpositole Paulosi. Iyo wakayowoya kuti: “Nkhutchaya thupi lane ndipo nkhulilongozga nga ni muzga.” (1 Kor. 9:25-27) Paulosi wakajichichizganga kuchita icho ntchiwemi kwa Yehova nanga mphanyengo iyo mtima wake ukukhumba kuchita vyakupambanako. Kasi Yehova wakakondwanga navyo ivyo Paulosi wakachitanga? Enya. Nakuti Yehova wakamupa njombe chifukwa cha kulimbikira kwake.—2 Tim. 4:7, 8.

10. Kasi pakuŵa uwemi wuli usange taŵikapo mtima kufiska chilato chinyake nangauli tilije khumbo lakuti tifiske chilato icho?

¹⁰ Mwakuyana waka, Yehova wakukondwa chomene para wakuwona kuti tikuyezgayezga kufiska chilato chinyake nanga vingaŵa kuti khumbo lakuti tifiske chilato icho lachepa. Iyo wakukondwa chifukwa wakumanya kuti nangauli chilato icho tajiŵikira tikuchitemwa viŵi yayi, kweni tikuchita chifukwa chakuti tikumutemwa. Nga umo Yehova wakatumbikira Paulosi, nase watitumbikenge chifukwa cha kuyezgayezga kwithu. (Sal. 126:5) Para tamba kuwona kuti Yehova wakutitumbika, tambenge kutemwa ivyo tikuchita. Mudumbu munyake wa ku Poland zina lake Lucyna wakuti: “Nyengo zinyake nkhukhumba yayi kunjira mu upharazgi, chomenechomene para navuka. Kweni para naluta mu upharazgi, chimwemwe icho nkhuŵa nacho para nkhuwerako chikuŵa chikuru chomene.” Pasono tiyeni tiwone ivyo tingachita para tilije khumbo lakuti tifiske chilato chinyake.

11. Kasi Yehova wangatovwira wuli kuti tiŵe ŵakujikora?

¹¹ Lombani Yehova kuti wamovwirani kuti muŵe ŵakujikora. Kujikora ni para munthu wakulongozga makora maghanoghano ghake, kweniso vyakuchita vyake. Mazgu ghakuti kujikora, kanandi ghakung’anamura fundo yakuti tijikanizgenge kuchita icho ntchiheni. Ndipouli, kujikora kukukhumbikwaso apo tikukhumba kuchita icho ntchiwemi, chomenechomene para mulimo uwo tikukhumba kuchita ngunonono, panji para tikuwutemwa viŵi yayi. Kumbukani kuti kujikora ntchimoza mwa vipambi vya mzimu, ntheura lombani Yehova kuti wamupani mzimu wake kuti umovwirani kuti muŵe na mukhaliro uwu. (Luka 11:13; Gal. 5:22, 23) David uyo tamuzunura kukwambilira, wakalongosora umo lurombo lukamovwilira. Iyo wakakhumbanga kuti wachitenge mwakukhazikika sambiro la iyomwene. Iyo wakuti: “Nkhalomba Yehova kuti wanovwire kuŵa wakujikora. Na wovwiri wake, nkhaŵa na ndondomeko yiwemi yakusambilira kweniso nkhamba kusambira mwambura kudukaduka.”

12. Kasi fundo ya pa Mupharazgi 11:4 yingatovwira wuli kuti tifiske vilato vithu?

¹² Lekani kulindilira kuti vinthu viŵe dankha makora. Mu charu ichi, vingachitika yayi kuti vinthu viŵirethu makora. Para tilindilirenge kuti vinthu viŵe dankha makora, tifiskenge yayi chilato chithu. (Ŵazgani Mupharazgi 11:4.) Mubali munyake zina lake Dayniel wakuti: “Palije nyengo iyo vinthu vyose vikuŵa makora waka. Ntheura tikwenera yayi kulindilira kuti vinthu viŵe makora dankha, kweni tikwenera kwambapo waka.” Mubali munyake ku Uganda zina lake Paul wakayowoya chifukwa chinyake icho tikwenera yayi kulindilira kuti vinthu viŵe dankha makora. Iyo wakati: “Nanga ni para chingaŵa chakusuzga kufiska chilato chinyake, chikuru tambapo Yehova wangatovwira.”—Mal. 3:10.

13. Chifukwa wuli ntchakovwira kwamba na vilato vichokovichoko?

¹³ Yambani na vilato vichokovichoko. Nyengo zinyake tingagongowa chifukwa chakuti chilato icho tajiŵikira chikuwoneka chakusuzga kuti tichifiske. Usange ndimo viliri kwa imwe, mungachita makora kuchigaŵa kuti mufiskengeko pachokopachoko. Mwachiyelezgero, usange chilato chinu ntchakuti muŵe na mukhaliro unyake, mungamba  kuwulongora mwapachokopachoko. Usange chilato chinu ntchakuti muŵazge Baibolo lose, mungamba kuŵazga dankha kwa nyengo yichoko waka. Tomáš, uyo tamuzunura kukwambilira, vikamusuzganga kuti wamalizge kuŵazga Baibolo lose pa chaka. Iyo wakuti: “Nkhamanya kuti vikanitondanga chifukwa nkhaŵerenganga mavesi ghanandi chomene panyengo yimoza. Ntheura nkhawona kuti niyezgeso, kweni ulendo uwu nkhasankha kuti niŵerengenge waka mavesi ghachoko waka zuŵa lililose na kughanaghanirapo. Pamanyuma nkhamba kukondwa pakuŵerenga.” Tomáš’ wati wamba kukondwa pakuŵerenga Baibolo, wakamba kuŵerenga nyengo yitaliko. Paumaliro, wakamalizga kuŵerenga Baibolo lose. c

14. Kasi ni vinthu wuli ivyo vingatichitikira ivyo vingatitimbanizga kufiska chilato chithu?

¹⁴ Nanga tingakhuka wuli, panji kuyezgayezga kuŵa ŵakujikora, kweni m’paka paŵenge vinyake vyakutimbanizga. Mwachiyelezgero, “vinthu vyamabuchi” vingatiwira ivyo vingatimalira nyengo iyo mphanyi tagwilirangapo ntchito pa chilato chithu. (Muph. 9:11) Nyengo zinyake tingasangana na suzgo iyo yingatigulura nkhongono panji kutigongoweska. (Zinth. 24:10) Pakuti ndise ŵanthu ŵambura kufikapo, nyengo zinyake tingabudiska vinthu vinyake ivyo vingapangiska kuti chiŵe chakusuzga kufiska chilato chithu. (Rom. 7:23) Panji tingajipulika ŵakuvuka. (Mat. 26:43) Kasi tingachita wuli para vinthu vili nthena?

15. Kasi para tasangana na masuzgo ghanyake agho ghapangiska kuti tileke kufiska chilato chithu, ndikuti chikung’anamura kuti tatondeka? Longosorani. (Salimo 145:14)

¹⁵ Kumbukani kuti para vinthu vinyake vyapangiska kuti muleke kufiska chilato chinu, chikung’anamura kuti mwatondeka yayi. Baibolo likuyowoya kuti nyengo zinyake tingasangana na masuzgo mwakuwerezgawerezga. Kweni likuyowoyaso mwakupulikikwa makora kuti tingawukaso, chomenechomene para Yehova watovwira. (Ŵazgani Salimo 145:14.) Mubali Philip, uyo tamuzunura kukwambilira, wakuti: “Nkhuŵika chomene mahara pa nyengo izo natondeka kufiska chilato chane  yayi. Kweni nkhuŵika chomene mahara pa nyengo izo nambiraso kuchitapo kanthu kuti nifiske chilato chane.” David, uyo nayo tamuzunura kukwambilira, wakayowoya kuti: “Nkhuyezgayezga kuti vyakugongoweska na mazuŵa ghaheni, nileke kuviwona nga ni vyakujandizga, kweni niviwonenge kuŵa mwaŵi wakulongolera Yehova umo nkhumutemwera.” Nadi, para mukulutilira kuŵikapo mtima kuti mufiske chilato chinu nanga mungasangana na masuzgo, mukulongora Yehova kuti mukukhumba kumukondweska. Yehova wakukondwa chomene para wakuwona kuti mukuyezgayezga kufiska chilato chinu.

16. Kasi tingasambirapo vichi para tatondeka kufiska chilato chithu?

¹⁶ Sambiranipo kanthu para mwasangana na vyakugongoweska. Ghanaghaniranipo icho chikapangiska suzgo ilo, na kujifumba kuti, ‘Kasi ningachita wuli kuti vyanthena vileke kuchitikaso?’ (Zinth. 27:12) Nyengo zinyake para tatondeka kufiska chilato chithu, vingavumbura waka kuti chilato icho chindakolerane na umo vinthu viliri kwa ise. Para mukuwona kuti ndicho chingaŵa chifukwa, sandaniso makora chilato chinu nakuwona usange mungafiska nadi. d Yehova wawonenge kuti muli ŵakutondeka yayi para mwatondeka kufiska chilato icho ntchinonono kwa imwe.—2 Kor. 8:12.

17. Chifukwa wuli tikwenera kuluwa yayi vilato ivyo tili kufiska kale?

¹⁷ Kuluwa yayi ivyo mwafiskapo kale. Baibolo likuyowoya kuti “Chiuta ngwambura urunji yayi kuti waluwe mulimo winu.” (Heb. 6:10) Ntheura namwe mukwenera yayi kuluwa ivyo mwafiskapo kale. Mughanaghanirenge vilato ivyo mwafiskapo kale, nga kuŵa paubwezi uwemi na Yehova, kupharazga, kweniso kubatizika. Nga umo mukafiskira vilato vinyake ivi, mungalutilira kuŵikapo mtima na kufiskaso vilato vinyake ivyo muli navyo sono.—Fil. 3:16.

18. Kasi tikwenera kukumbuka vichi apo tikuyezgayezga kuti tifiske chilato chithu? (Wonaniso chithuzi.)

¹⁸ Na wovwiri wa Yehova, mungafiska chilato chinu, nga umo wakwendeska boti wangakafikira uko wakuluta. Kweni kumbukani kuti ŵanthu ŵanandi para ŵali mu boti ŵakukondwaso na ulendo uwu. Mwakuyana waka, namwe apo muli mu nthowa kuti mufiske chilato chinu, mukumbukenge kuwona umo Yehova wakumovwilirani ndipo ivi vimovwiraninge kuti mukondwenge apo mukuyezgayezga kuti mufiske chilato chinu. (2 Kor. 4:7) Ndipo para mugongowenge yayi, mutumbikikenge chomene.—Gal. 6:9.