1. Kasi Yehova wakuŵapempha vichi ŵateŵeti ŵake? (Wonaniso chithuzi.)

 KASI ni nkhu uko tingalomba wovwiri, para tikukhumba kupembuzgika panji kukhozgeka? Zgoro ndakumanyikwirathu. Tingamufikira Yehova Chiuta mu lurombo. Yehova wakutipempha kuti ndimo tichitirenge. Wakukhumba kuti tilombenge kanandi waka panji kuti “nyengo zose.” (1 Tes. 5:17) Tingafwatuka kulomba kwa iyo na kumupempha ulongozgi pa chilichose chakukhwaskana na umoyo withu. (Zinth. 3:5, 6) Pakuti Yehova ni Chiuta wakupa, wandatiŵikire mphaka yayi pa unandi wa nyengo izo tingalombera kwa iyo.

2. Kasi tidumbiskanenge vichi mu nkhani iyi?

² Tikuwona mwaŵi wa lurombo kuŵa chawanangwa chakuzirwa chomene. Ndipouli, chifukwa chakuti tikutangwanika chomene, chingatiŵira chakusuzga kusanga nyengo yakulombera. Kweniso tingawona kuti tikukhumbikwira kusintha umo tikulombera, mwakuti malurombo ghithu ghaŵenge ghakupulikikwa makora chomene. Chakukondweska ntchakuti, tingasanga fundo zakukhozga kweniso ulongozgi wakovwira kufuma mu Malemba. Mu nkhani iyi, tiwonenge umo tingachitira kuti tipaturenge nyengo yakulombera, ndipo tisambirengeko kwa Yesu umo wakachitiranga. Tidumbiskanengeso umo tingachitira kuti malurombo ghithu ghaŵenge ghawemi chomene, ndipo tiwonenge fundo zinkhondi izo zingatovwira pa nkhani iyi.

3. Kasi Yesu wakamanyanga vichi vyakukhwaskana na lurombo?

³ Yesu wakamanyanga makora kuti Yehova wakuzirwiska  chomene lurombo. Kale chomene pambere wandize pa charu chapasi, wakawonanga Adada ŵake ŵakuzgora malurombo gha ŵanalume na ŵanakazi ŵakugomezgeka. Mwachiyelezgero, Yesu wakaŵa pafupi na Adada ŵake apo ŵakazgoranga malurombo ghakufumira pasi pamtima gha Hana, Davide, Eliya, na ŵateŵeti ŵanyake ŵakugomezgeka. (1 Sam. 1:10, 11, 20; 1 Mathe. 19:4-6; Sal. 32:5) Lekani tikuzizwa yayi kuti Yesu wakasambizga ŵasambiri ŵake kuti ŵalombenge kanandi waka kweniso kuti ŵaŵe na chigomezgo chose kuti malurombo ghawo ghazgolekenge.—Mat. 7:7-11.

4. Kasi tikusambirako vichi ku malurombo agho Yesu wakalombanga?

⁴ Kwizira mu malurombo agho wakalombanga kwa Yehova, Yesu wakalongora chiyelezgero chiwemi ku ŵasambiri ŵake icho ŵangatolerako. Nyengo yose iyo wakachitiranga uteŵeti wake pa charu chapasi, Yesu wakalombanga kanandi waka. Ndipouli, wakakhumbikwiranga kuchita kupatura nyengo yakulombera chifukwa kanandi wakaŵanga wakutangwanika chomene kweniso wakaŵanga na ŵanthu ŵanandi. (Mrk. 6:31, 45, 46) Wakawukanga mulenjilenji mwakuti waŵe na nyengo yakulombera. (Mrk. 1:35) Nakuti zuŵa linyake, wakalomba usiku wose pambere wandasankhe pa nkhani yinyake yakuzirwa. (Luka 6:12, 13) Kweniso Yesu wakalomba mwakuwerezgawerezga pa usiku wakuti namachero ghake wafwenge apo wakaŵa pafupi chomene kumalizga chigaŵa chakusuzga chomene cha uteŵeti wake wa pa charu chapasi.—Mat. 26:39, 42, 44.

5. Kasi tingamuyezga wuli Yesu para tikulomba?

⁵ Chiyelezgero cha Yesu chikutisambizga kuti nanga tingaŵa ŵakutangwanika wuli, tikwenera kupatura nyengo yakulombera. Nga ni Yesu, nase tingakhumbikwira kupatura nyengo yakulombera. Tingasankha kuwuka mulenjilenji, panji mise tingachedwerako kugona mwakuti tilombe dankha. Para tichitenge nthena, tilongorenge Yehova kuti tikuwonga chomene chawanangwa chapadera ichi. Mudumbu munyake zina lake Lynne wakukumbuka umo wakajipulikira wati wasambira vyakukhwaskana na mwaŵi wapadera wa lurombo. Iyo wakuti, “Nati nasambira kuti ningalomba nyengo yiliyose kwa Yehova, vikanovwira kuti nimuwonenge kuŵa Mubwezi wane wapamtima kweniso kuwona apo ningasintha kuti malurombo ghane ghaŵenge ghawemi chomene.” Tikukayika yayi kuti taŵanandi ndimo tikujipulikira. Ntheura tiyeni tiwone vinthu vinkhondi ivyo tingaŵikamo mu malurombo ghithu.

6. Kuyana na Chivumbuzi 4:10, 11, kasi Yehova ngwakwenelera kupokera vichi?

⁶ Mumulumbenge Yehova. Mu mboniwoni yinyake yakuzizwiska, mpositole Yohane wakawona ŵalara 24 kuchanya kuti ŵakusopa Yehova. Ŵakalumbanga Yehova, ndipo ŵakayowoyanga kuti ngwakwenelera kupokera “uchindami, ntchindi na nkhongono.” (Ŵazgani Chivumbuzi 4:10, 11.) Ŵangelo ŵakugomezgeka nawo ŵali na vifukwa vinandi vyakulumbira Yehova na kumuchindika. Iwo ŵakukhala nayo lumoza kuchanya ndipo ŵali kumumanya makora. Ŵakumanya mikhaliro yake para ŵakuwona ivyo wakuchita. Para ŵakuwona umo Yehova wakuchitira vinthu, ŵakuchiskika kumulumba.—Yobu 38:4-7.

7. Kasi Yehova tingamulumba pa vifukwa wuli?

⁷ Nase tikwenera kumulumba Yehova mu malurombo ghithu, tingayowoya ivyo tikumutemwera na kumuwongera. Apo mukuŵazga na kusambira Baibolo, yezgani kuwona mikhaliro iyo Yehova wakulongora iyo yikumukondweskani chomene. (Yobu 37:23; Rom. 11:33) Kufuma apo muphalirani Yehova umo mukujipulikira chifukwa cha mikhaliro iyo. Tingamulumbaso Yehova chifukwa chakuti wakutovwira ise kweniso Ŵakhristu ŵanyithu wose. Iyo wakulutilira kutipwelelera na kutivikilira.—1 Sam. 1:27; 2:1, 2.

8. Kasi ni vifukwa wuli vinyake ivyo tingamuwongera Yehova? (1 Ŵatesalonika 5:18)

⁸ Mumuwongenge Yehova. Tili na vifukwa vinandi chomene vyakuwongera Yehova mu malurombo ghithu. (Ŵazgani 1 Ŵatesalonika 5:18.) Tingamuwonga chifukwa cha vinthu ivyo tili navyo, nakuti kuchita nthena ntchakwenelera nadi chifukwa chawanangwa chilichose chiwemi chikufuma kwa iyo. (Yak. 1:17) Mwachiyelezgero, tingamuwonga chifukwa cha kutowa kwa charu chapasi na vilengiwa ivyo vilimo. Tingamuwongaso chifukwa cha kutipa umoyo, mbumba, ŵabwezi kweniso chigomezgo chiwemi cha munthazi. Kweniso tikwenera kumuwonga Yehova chifukwa cha kutizomerezga kuŵa nayo paubwezi uwemi chomene.

9. Chifukwa wuli tikwenera kuŵa na mzimu wakuwonga Yehova?

⁹ Tingakhumbikwira kuyezgayezga kuti tighanaghanirepo vifukwa ivyo ise patekha tili navyo vyakumuwongera Yehova. Tikukhala mu charu icho ŵanthu ŵanandi mbambura kuwonga. Kanandi ŵanthu ŵakuŵika mtima pa ivyo ŵakukhumba m’malo mwa kuŵika mtima pa ivyo ŵangachita kuti ŵalongore kuwonga pa ivyo ŵali navyo. Usange nase tingaŵalondezga, malurombo ghithu ghaŵenge waka na mundandanda wa vinthu ivyo tikukhumba pera. Kuti ivi vileke kutichitikira, tikwenera kulutilira kuŵa na mzimu wakuwonga, ndipo timuwongenge Yehova pa vyose ivyo wakutichitira.—Luka 6:45.

10. Kasi kuŵa na mtima wakuwonga kukamovwira wuli mudumbu munyake kuti wazizipizge? (Wonaniso chithuzi.)

¹⁰ Kuŵa na mzimu wakuwonga kungatovwira kuzizipizga masuzgo ghanonono. Wonani chiyelezgero cha mudumbu munyake zina lake  Kyung-sook, icho chili mu Gongwe la Mulinda la Janyuwale 15, 2015. Iyo wakakoleka na kansa ya mu maphapu. Iyo wakati: “Nthenda iyi yikanipweteka chomene. Nkhajipulikanga nga nataya waka chilichose, ndipo nkhaŵa na wofi chomene.” Kasi ntchivichi chikamovwira kuti wazizipizge? Iyo wakati usiku uliwose pambere wandalute kukagona, wakalutanga pachanya pa nyumba yake na kulomba mwakukwezga mazgu, vyakukhwaskana na vinthu 5 ivyo wakamuwongeranga Yehova pa zuŵa ilo. Ivi vikamovwira kuti waleke kwenjerwa chomene kweniso kumuchiska kuti walongore chitemwa chake pa Yehova. Wakajiwonera yekha umo Yehova wakovwilira ŵateŵeti ŵake ŵakugomezgeka para ŵasangana na suzgo likuru chomene, ndipo wakamanya kuti pali vinthu vinandi viwemi ivyo tili navyo pa umoyo withu kuluska masuzgo ghithu. Nga ni Kyung-sook, nase tili na vifukwa vinandi vyakumuwongera Yehova, nanga ni para tikusangana na masuzgo. Kumuwonga Yehova mu lurombo kungatovwira kuzizipizga na kulutilira kuŵa ŵakukondwa.

11. Chifukwa wuli ŵasambiri ŵa Yesu ŵakakhumbikwiranga chikanga Yesu wati wawelera kuchanya?

¹¹ Mulombenge Yehova kuti wamupani chikanga para mukupharazga. Kukati kwakhala nyengo yichoko waka kuti wawelere kuchanya, Yesu wakakumbuska ŵasambiri ŵake vya mulimo uwo ŵakapika, wakuti ŵapharazge vya iyo “mu Yerusalemu, mu Yudeya mose na Samariya, na ku vigaŵa vyakutali chomene vya charu chapasi.” (Mil. 1:8; Luka 24:46-48) Nyengo yichoko waka yati yajumphapo, ŵalongozgi Ŵachiyuda ŵakakora mpositole Petrosi na Yohane na kwiza nawo panthazi pa Sanihedirini, ndipo ŵakati ŵanalume ŵakugomezgeka aŵa ŵaleke kupharazga kweniso ŵakaŵawofya. (Mil. 4:18, 21) Kasi Petrosi na Yohane ŵakachita wuli?

12. Kuyana na Milimo 4:29, 31, kasi ŵasambiri ŵakachita wuli?

¹² Pakuzgora ŵalongozgi ŵa Ŵayuda awo ŵakaŵawofyanga, Petrosi na Yohane ŵakati: “Yeruzgani mwekha usange ntchakwenelera pamaso pa Chiuta kuti tipulikire imwe panji Chiuta. Kweni ise tingaleka yayi kuyowoya vinthu ivyo tili kuwona na kupulika.” (Mil. 4:19, 20) Petrosi na Yohane ŵakati ŵafumiskika, ŵasambiri ŵakalomba kwa Yehova pa nkhani ya kuchita khumbo lake. Iwo ŵakalomba kuti: “Zomerezgani ŵazga ŵinu kuti ŵalutilire kuyowoya mazgu ghinu na chikanga.” Yehova wakazgora lurombo lwakufumira pasi pamtima ulu.—Ŵazgani Milimo 4:29, 31.

13. Kasi tingasambirako vichi kwa Jin-hyuk?

¹³ Tingaŵayezga ŵasambiri aŵa mwa kulutilira kupharazga nanga ŵalara ŵaboma ŵangatikanizga kupharazga. Wonani chiyelezgero cha mubali munyake zina lake Jin-hyuk, uyo wakajalirika mu jele chifukwa cha kuleka kunjilirapo pa ndyali. Mu jele, wakapika mulimo wakuwonelera ŵakayidi ŵanyake, kweni wakazomerezgekanga yayi kuyowoya nawo chilichose icho chikuleka kukolerana na mulimo uwo wakapika, kusazgapo kuyowoya vya mu Baibolo. Wakalomba kuti Chiuta wamupe chikanga na luso kuti wapharazgenge pa m’pata uliwose uwo wasangika. (Mil. 5:29) Iyo wakuti: “Yehova wakazgora malurombo ghane pakunipa chikanga na vinjeru kuti nambiske masambiro ghanandi mu maselo, ndipo sambiro lililose nkhachitiskanga kwa maminiti ghankhondi uku nayimilira waka pa mulyango wa selo. Nausiku nkhalembanga makalata agho nkhapelekanga ku ŵakayidi ŵanyake zuŵa lakulondezgapo.” Nase tingaŵa na chigomezgo chose kuti Yehova watovwirenge kufiska uteŵeti withu. Nga ni Jin-hyuk, tingalomba chikanga na vinjeru.

14. Kasi ntchivichi chingatovwira para tasangana na masuzgo? (Salimo 37:3, 5)

¹⁴ Mulombenge Yehova kuti wamovwirani kulimbana na masuzgo ghinu. Taŵanandi ŵa ise tikusuzgika chifukwa cha ulwari panji kusuzgika maghanoghano, kutayika kwa ŵakutemweka ŵithu,  masuzgo ghakuru gha mu mbumba, kutambuzgika, panji masuzgo ghanyake. Vinthu nga ni miliri na nkhondo vyapangiska kuti chiŵe chakusuzga chomene kuzizipizga masuzgo agha. Ntheura muphalirani Yehova umo mukujipulikira nadi. Muphalirani suzgo linu nga umo mungachitira para mukuphalira mubwezi winu wapamtima. Manyani kuti Yehova ‘wamovwiraninge.’—Ŵazgani Salimo 37:3, 5.

15. Kasi lurombo lungatovwira wuli ‘kuzizipizga mu suzgo’? Yowoyani chiyelezgero.

¹⁵ Kukosera mu lurombo kumovwiraninge ‘kuzizipizga mu suzgo.’ (Rom. 12:12) Yehova wakumanya ivyo ŵateŵeti ŵake ŵakuzizipizga, ndipo “wakupulika para ŵakulira kuti waŵavwire.” (Sal. 145:18, 19) Mupayiniya munyake wa vyaka 29 zina lake Kristie wakawona kuti fundo iyi njaunenesko. Mwamabuchi iyo wakamba kulwaralwara. Ivi vikapangiska kuti wambe kusuzgika chomene maghanoghano. Pamanyuma, amama ŵake ŵakasangika na nthenda yakofya chomene. Kristie wakuti: “Nkhalomba chomene kwa Yehova kuti wanipe nkhongono izo nkhakhumbikwiranga zuŵa lililose. Nkhayezgayezganga kulondezga ndondomeko yakukhwaskana na vinthu vyauzimu, nga nkhuwungana na kuchita sambiro la namwene.” Iyo wakutiso: “Lurombo lukanovwira kuzizipizga mu nyengo yakusuzga iyi. Nkhamanya kuti Yehova nyengo zose walipo, ndipo ivi vikanovwira kuti mtima uŵe mu malo. Nangauli masuzgo ghane gha mu thupi ghakamara nyengo yeneyiyo yayi, kweni Yehova wakazgora malurombo ghane pakunipa mtende wa mumtima.” Ntheura tingaluwanga yayi kuti “Yehova wakumanya kuŵathaska ku chiyezgo ŵanthu awo ŵakumusopa mwakujipeleka.”—2 Pet. 2:9.

16. Chifukwa wuli tikukhumbikwira wovwiri wa Yehova kuti tilimbane na makhumbiro ghaheni?

¹⁶ Mulombenge Yehova kuti wamovwirani kugega viyezgo. Pakuŵa ŵanthu ŵambura kufikapo, nyengo zose tikukhumbikwira kulimbana na makhumbiro ghakuchita icho ntchiheni. Satana wakuchita chilichose kuti wapangiske kuŵa chakusuzga kulimbana na suzgo ili. Nthowa yimoza njakuti wakuyezgayezga kunanga  maghanoghano ghithu na vyakusanguluska vyawakawaka. Vyakusanguluska vyanthena vingapangiska kuti tiŵe na maghanoghano ghaheni, ndipo maghanoghano agha ghangapangiska kuti tichite kwananga kukuru.—Mrk. 7:21-23; Yak. 1:14, 15.

17. Kasi tingachita wuli mwakuyana na ivyo talomba kuti tigege kuyezgeka? (Wonaniso chithuzi.)

¹⁷ Tikukhumbikwira wovwiri wa Yehova para tikukhumba kuti tigege chiyezgo cha kuchita icho ntchiheni. Yesu wakasazgamo fundo iyi mu lurombo lwake lwa chiyelezgero. Iyo wakati: “Mungatitoleranga mu kuyezgeka chara, kweni mutiwombore kwa muheni.” (Mat. 6:13) Yehova ngwakunozgeka kutovwira, kweni tikwenera kumulomba. Tikweneraso kuchita vinthu mwakuyana na malurombo ghithu. Tiyezgeyezgenge kuchita vyose ivyo tingafiska kuti tigege kuŵazga na kutegherezga vinthu vyawakawaka ivyo vyazara mu charu cha Satana ichi. (Sal. 97:10) Tingazuzga maghanoghano ghithu na vinthu viwemi para tikuŵazga na kusambira Baibolo. Kuwungana kweniso kupharazga kungatovwiraso kuvikilira maghanoghano ghithu. Ndipo Yehova wakutilayizga kuti wazomerezgenge yayi kuti tiyezgeke kujumpha icho tingazizipizga.—1 Kor. 10:12, 13.

18. Pa nkhani ya lurombo, kasi tose tikukhumbikwira kuchita vichi?

¹⁸ Waliyose wa ise wakukhumbikwira kulomba chomene kuluska kumasinda kose kuti walutilire kugomezgeka kwa Yehova mu mazuŵa ghaumaliro agha. Ntheura patulani nyengo yakulombera kufumira pasi pamtima zuŵa lililose. Yehova wakukhumba kuti ‘tipungulirenge mitima yithu’ kwa iyo mu lurombo. (Sal. 62:8) Mulumbani Yehova na kumuwonga pa vyose ivyo wakuchita. Mulombani kuti wamovwirani kuŵa na chikanga mu uteŵeti. Muŵeyelerani kuti wamovwirani kulimbana na suzgo lililose na kugega chiyezgo chilichose icho mungakumana nacho. Mungazomerezganga chilichose yayi panji waliyose kumutondeskani kulomba kwa Yehova nyengo zose. Kweni kasi Yehova wakuzgora wuli malurombo ghithu? Tizamudumbiskana fumbo ili mu nkhani yakulondezgapo.