NKHANI YAKUSAMBIRA 18
SUMU 1 Makhaliro gha Yehova
Gomezgani ‘Mweruzgi Walusungu wa Charu Chose Chapasi’!
“Asi Mweruzgi wa charu chose chapasi wachitenge icho ntchakunyoloka?”—GEN. 18:25.
FUNDO YIKURU
Kuti tipulikiske makora lusungu lwa Yehova kweniso urunji wake pa nkhani ya chiwuka cha ŵanthu ŵambura urunji.
1. Kasi ni fundo wuli yakupembuzga iyo Yehova wakasambizga Abrahamu?
CHIKAŴA chidumbirano icho Abrahamu wakaluwa yayi. Kwizira mwa mungelo, Chiuta wakaphalira Abrahamu kuti waparanyenge misumba ya Sodomu na Gomora. Mwanalume wakugomezgeka uyu wakakweŵeka chomene. Wakafumba kuti: “Kasi mwamuparanya ŵarunji pamoza na ŵaheni? . . . Asi Mweruzgi wa charu chose chapasi wachitenge icho ntchakunyoloka?” Mwakuzikira, Yehova wakamusambizga mubwezi wake wakutemweka uyu, fundo yakuzirwa chomene iyo nase yikutipembuzga kweniso tikusanga nayo chandulo. Fundo yake njakuti Chiuta wazamuparanyapo yayi ŵanthu ŵarunji.—Gen. 18:23-33.
2. Kasi ntchivichi chikutisimikizgira kuti nyengo zose Yehova wakweruzga mwaurunji kweniso mwalusungu?
2 Chifukwa wuli tingasimikizga kuti nyengo zose Yehova wakuchita vinthu mwaurunji kweniso mwalusungu para wakweruzga ŵanthu? Chifukwa tikumanya kuti “Yehova wakuwona mu mtima” wa munthu. (1 Sam. 16:7) Nakuti wakumanya “mtima wa munthu waliyose.” (1 Mathe. 8:39; 1 Mid. 28:9) Fundo iyi njakuzizika chomene. Vyeruzgo vya Yehova ni vyakuti ise tingavipulikiska yayi. Lekani pakuyowoya vya Yehova, mpositole Paulosi wakayowoya kuti: “Vyeruzgo vyake ni vyambura mapenjeko.”—Rom. 11:33.
3-4. Kasi nyengo zinyake tingajifumba vichi, ndipo tidumbiskanenge vichi mu nkhani iyi? (Yohane 5:28, 29)
3 Ndipouli, nyengo zinyake tingaŵa na mafumbo nga agho Abrahamu wakaŵa nagho. Tingajifumba kuti: ‘Kasi pali chilindizga chilichose chamunthazi, ku ŵanthu nga ni awo ŵakeruzgika mu Sodomu na Gomora? Kasi ŵanyake mwa iwo ŵangaŵa mu gulu la ŵanthu awo ŵazamuwuskika pa “chiwuka cha . . . ŵambura urunji”?’—Mil. 24:15.
4 Tiyeni tiwoneso ivyo tikumanya vyakukhwaskana na chiwuka. Sonosono apa, tikasintha umo tikapulikiskiranga kale fundo yakukhwaskana na awo “ŵazamuwukira ku umoyo” kweniso awo “ŵazamuwukira ku cheruzgo.” a (Ŵazgani Yohane 5:28, 29.) Kusintha uku kwapangiskaso kuti tisintheso vinyake, ndipo ivi ndivyo tidumbiskanenge mu nkhani iyi na yakulondezgapo. Pa nkhani yakuti Yehova wakweruzga mwaurunji, chakwamba tiwonenge ivyo tikumanya yayi ndipo pamanyuma tiwonenge ivyo tikumanya.
IVYO TIKUMANYA YAYI
5. Kasi mabuku ghithu ghali kuyowoyapo vichi kumasinda vyakukhwaskana na ŵanthu awo ŵakaparanyika mu Sodomu na Gomora?
5 Kumasinda uku, mabuku ghithu ghali kulongosorapo fumbo lakukhwaskana na icho chikuchitikira awo Yehova waŵeruzga kuti mbambura urunji. Tikayowoya kuti ŵanthu nga ŵa mu Sodomu na Gomora, ŵalije chilindizga chilichose cha kuzakawuskika. Kweni tati talomba na kusanda mwakupwelelera, vyapangiska kuti paŵe fumbo linyake lakuti, Kasi tingasimikizga nadi kuti ndimo viliri nadi?
6. Yowoyani viyelezgero vya ŵanthu ŵambura urunji awo Yehova wakaŵeruzga, kweniso ivyo ise tikuleka kumanya.
6 Wonani mafumbo ghanyake ghakukoleranako na fumbo ili. Mu Baibolo muli nkhani zinandi izo zikulongosora vya ŵanthu ŵambura urunji awo Yehova wakaŵeruzga. Ŵanyake mwa ŵanthu aŵa ni awo ŵakafwa pa Chigumula, mitundu 7 iyo yikaŵa mu Charu cha Layizgano iyo Yehova wakalangura ŵanthu ŵake kuti ŵayiparanye, kweniso ŵankhondo 185,000 ŵa Asiriya awo ŵakakomeka na mungelo wa Yehova pa usiku umoza. (Gen. 7:23; Doto. 7:1-3; Yes. 37:36, 37) Pa vyeruzgo ivi, kasi Baibolo likutiphalira fundo zakukwana kuti tidumure kuti Yehova wakeruzga ŵanthu aŵa kuti mbakwenelera pharanyiko lamuyirayira, ndipo palije chigomezgo chakuti ŵazamuwuskika? Yayi. Chifukwa wuli tikuyowoya nthena?
7. Kasi ni vichi ivyo tikumanya yayi vyakukhwaskana na ŵanthu awo ŵakaparanyika pa Chigumula panji ŵanthu awo ŵakathereskeka na kukomeka mu Kenani? (Wonani chithuzi.)
7 Tikumanya yayi umo Yehova wakeruzgira waliyose payekha, kweniso tikumanya yayi usange awo ŵakakomeka ŵakaŵa na mwaŵi wakusambira vya Yehova na kupera. Pa nkhani ya nyengo ya Chigumula, Baibolo likuyowoya kuti Nowa wakaŵa “mupharazgi wa urunji.” (2 Pet. 2:5) Kweni likuyowoyapo yayi kuti apo wakapanganga chingalaŵa, wakayezgayezga kupharazgira munthu waliyose pa charu chapasi uyo wakumanenge na pharanyiko ili. Mwakuyana waka, pa nkhani ya mitundu ya mu Kenani, tikumanya yayi kuti ŵanthu wose ŵaheni aŵa ŵakaŵa na mwaŵi wakusambira vya Yehova kuti ŵasinthe nkharo zawo.
Nowa na mbumba yake ŵakupanga chingalaŵa. Vikumanyikwa yayi usange pa nyengo iyo wakazenganga chingalaŵa Nowa wakayezgayezga kupharazgira munthu waliyose pa charu chapasi pambere Chigumula chindize (Wonani ndime 7)
8. Kasi ni vichi ivyo tikumanya yayi vyakukhwaskana na ŵanthu ŵa mu Sodomu na Gomora?
8 Wuli pakuyowoya vya ŵanthu ŵa mu Sodomu na Gomora? Munthu wakunyoloka Loti, wakakhalanga pakati pawo. Kweni kasi tikumanya kuti Loti wakaŵapharazgira ŵanthu wose aŵa? Yayi. Mbunenesko kuti ŵakaŵa ŵaheni, kweni kasi ŵakamanyanga kupambaniska pakati pa chiwemi na chiheni? Kumbukani kuti gulu linyake la ŵanalume mu msumba uwu likakhumbanga kukolelera ŵalendo ŵa Loti. Baibolo likuti pa gulu ili pakaŵa “ŵasepuka na ŵalara wuwo.” (Gen. 19:4; 2 Pet. 2:7) Kasi tingati tikumanya nadi kuti Yehova, Chiuta walusungu wakaŵeruzga kuti ŵaparanyike na kudumura kuti ŵalije chigomezgo chakuti ŵazamuwuskika? Yayi. Yehova wakasimikizgira Abrahamu kuti mu msumba uwu mukaŵavya ŵanthu ŵarunji ŵakukwana nanga ni 10. (Gen. 18:32) Ntheura ŵakaŵa ŵambura urunji, ndipo Yehova wakaŵeruzga chifukwa cha vyakuchita vyawo. Kweni kasi tingasimikizga nadi kuti palije uyo wazamuwuka pa “chiwuka cha . . . ŵambura urunji”? Yayi!
9. Kasi ni vichi ivyo tikumanya yayi vyakukhwaskana na Solomoni?
9 Kweniso mu Baibolo tikuŵazgaso vya ŵanthu ŵarunji awo ŵakazgoka ŵambura urunji. Mwachiyelezgero, Themba Solomoni. Wakasambizgika makora nthowa za Yehova ndipo wakatumbikika chomene, kweni pamanyuma wakamba kusopa ŵachiuta ŵatesi. Kwananga kwake kukapangiska kuti Yehova wakwiye ndipo kukiziska masuzgo kwa vyaka vinandi. Mbunenesko kuti Malemba ghakuyowoya kuti Solomoni “wakagona na ŵasekuru ŵake,” kusazgapo ŵanalume ŵakugomezgeka nga ni Themba Davide. (1 Mathe. 11:5-9, 43; 2 Mathe. 23:13) Kweni kasi pakuti ŵakamusunga nthena, mbwenu tingasimikizga kuti wazamuwuskika? Baibolo likuyowoyapo yayi. Ndipouli, ŵanyake ŵangayowoya kuti “uyo wafwa wafwatuka ku kwananga kwake.” (Rom. 6:7) Mbunenesko nadi, kweni kasi ivi vikung’anamura kuti wose awo ŵali kufwa ndikuti ŵazamuwuskika? Yayi. Viŵenge nthena mphanyi tikuti waliyose uyo wafwa ndikuti wazamusanga umoyo wamuyirayira. Chiwuka ntchawanangwa chakufuma kwa Chiuta withu wachitemwa. Wakupeleka ku awo wakukhumba kuti ŵamuteŵetere kwamuyirayira. (Yobu 14:13, 14; Yoh. 6:44) Kasi Solomoni nayo wazamupokera chawanangwa ichi? Yehova ndiyo wakumanya; ise tikumanya yayi. Ndipouli, tikumanya kuti Yehova wazamuchita icho ntchakunyoloka.
IVYO TIKUMANYA
10. Kasi Yehova wakujipulika wuli pa nkhani ya kuparanya ŵanthu? (Ezekiyeli 33:11) (Wonaniso chithuzi.)
10 Ŵazgani Ezekiyeli 33:11. Pa nkhani ya umo wakweruzgira ŵanthu, Yehova wakutiphalira umo wakujipulikira. Mpositole Petrosi wakakhuŵilizgika kulemba ivyo ntchimi Ezekiyeli yikalemba, iyo wakati “Yehova . . . wakukhumba yayi kuti munyake waparanyike.” (2 Pet. 3:9) Mazgu agha ngakukhozga chomene ndipo ghakutovwira kumanya kuti Yehova wangaparanya munthu kwamuyirayira yayi, pekha usange pali vifukwa vyakupulikikwa vyakuchitira nthena. Iyo ngwakuzura na lusungu, ndipo wakulongora lusungu apo mphakwenelera.
Pa chiwuka cha ŵanthu ŵambura urunji, ŵanandi ŵazamupika mwaŵi wakusambira vyakukhwaskana na Yehova (Wonani ndime 10)
11. Kasi mbanjani awo ŵazamuwuskika yayi, ndipo tikumanya wuli?
11 Kasi tikumanya vichi vyakukhwaskana na ŵanthu awo ŵazamuwuskika yayi? Baibolo likuyowoya viyelezgero vichoko waka. b Yesu wakalongora kuti Yudasi Isikariyoti wazamuwuskika yayi. (Mrk. 14:21; wonaniso Yohane 17:12 c.) Yudasi wakachitira dala vinthu ivyo vikasuskananga na Yehova kweniso Mwana wake. (Wonani Mariko 3:29 d.) Mwakuyana waka, Yesu wakayowoya kuti ŵalongozgi ŵanyake ŵa chisopa awo ŵakamususkanga, para ŵafwa ŵazamuŵavya chilindizga cha chiwuka. (Mat. 23:33) Ndipo mpositole Paulosi wakachenjezga kuti ŵakugaluka ŵambura kupera, ŵazamuwuskika yayi.—Heb. 6:4-8; 10:29.
12. Kasi tikumanya vichi vyakukhwaskana na lusungu lwa Yehova? Yowoyani viyelezgero.
12 Kweni kasi tikumanya vichi vyakukhwaskana na lusungu lwa Yehova? Kasi walongora wuli kuti “wakukhumba yayi kuti munyake waparanyike”? Wonani umo wakalongolera lusungu ŵanthu ŵanyake awo ŵakachita kwananga kukuru. Themba Davide likachita zakwananga zikuru chomene, kusazgapo uleŵi na kukoma munthu. Kweni Davide wakalapa, ndipo Yehova wakamuchitira lusungu na kumugowokera. (2 Sam. 12:1-13) Themba Manase likachita vinthu viheni vinandi chomene pafupifupi umoyo wake wose. Nangauli vikaŵa nthena, kweni Yehova wakamulongora lusungu na kumugowokera Manase chifukwa wakapera. (2 Mid. 33:9-16) Viyelezgero ivi vikutikumbuska kuti Yehova wakulongora lusungu usange wawona kuti pali chifukwa chakwenelera chakuchitira nthena. Wazamuŵawuska ŵanthu aŵa chifukwa chakuti ŵakajinyumwa kuti ŵakachita kwananga kukuru ndipo paumaliro ŵakapera.
13. (a) Chifukwa wuli Yehova wakalongora lusungu ku Ŵanineve? (b) Kasi pamanyuma Yesu wakayowoya vichi vyakukhwaskana na Ŵanineve?
13 Tikumanyaso umo Yehova wakalongolera lusungu Ŵanineve. Chiuta wakaphalira Yona kuti: “Uheni wawo wafika pamaso pane.” Kweni ŵati ŵalapa zakwananga zawo, mwalusungu Yehova wakaŵagowokera. Yehova wakaŵa na lusungu chomene kuluska Yona. Nangauli Yona wakakwiya chomene, kweni Chiuta wakamukumbuska kuti Ŵanineve ŵakamanyanga “chara kupambaniska pakati pa chiwemi na chiheni.” (Yona 1:1, 2; 3:10; 4:9-11) Pamanyuma, Yesu wakagwiliskira ntchito chiyelezgero ichi kuti wasambizge vyakukhwaskana na urunji na lusungu lwa Yehova. Yesu wakati Ŵanineve ŵakupera aŵa “ŵazamuwuka pa nyengo ya cheruzgo.”—Mat. 12:41.
14. Kasi ntchivichi chizamuchitika para ŵanthu ŵa ku Nineve ‘ŵazakawukira ku cheruzgo’?
14 Kasi “nyengo ya cheruzgo” iyo Ŵanineve “ŵazamuwuka” ni nji? Yesu wakayowoya kuti kunthazi ŵanthu ŵanyake ‘ŵazamuwukira ku cheruzgo.’ (Yoh. 5:29) Apa Yesu wakayowoyanga vya Muwuso wake wa Vyaka 1,000, apo ŵanthu “ŵarunji na ŵambura urunji” ŵazamuwuskika. (Mil. 24:15) Ŵanthu ŵambura urunji “ŵazamuwukira ku cheruzgo.” Ichi chikung’anamura kuti Yehova na Yesu ŵazamuwonanga na kusanda usange ŵakupulikira na kulondezga ivyo ŵakusambizgika. Usange Munineve uyo wawuskika wakana kusopa Yehova, cheruzgo chake chizamuŵa cha nyifwa yamuyirayira. (Yes. 65:20) Kweni wose awo ŵasankha kusopa Yehova mwakugomezgeka, ŵazamuŵa na mwaŵi wakukhala kwamuyirayira!—Dan. 12:2.
15. (a) Chifukwa wuli tikwenera yayi kudumura kuti ŵanthu wose awo ŵakaparanyika mu Sodomu na Gomora, ŵazamuwuskika yayi? (b) Kasi mazgu agho ghali mu Yuda 7 ghakung’anamurachi? (Wonani bokosi lakuti “Kasi Yuda Wakang’anamurangachi?”)
15 Pakuyowoya za ŵanthu ŵa mu Sodomu na Gomora, Yesu wakati “pa Zuŵa la Cheruzgo” vizamuŵa makora kwa iwo, kuluska ŵanthu awo ŵakakana iyo na visambizgo vyake. (Mat. 10:14, 15; 11:23, 24; Luka 10:12) Kasi wakang’anamurangachi? Nyengo zinyake tingawona nga apa Yesu wakayowoyanga waka mu ntharika. Kweni ndimo viliri yayi para tingaghanaghaniraso ivyo Yesu wakayowoya vyakukhwaskana na ŵanthu ŵa ku Nineve. e Vikuwoneka kuti ivyo Yesu wakayowoyanga apa yikaŵa ntharika yayi kweni vyanadi. “Zuŵa la Cheruzgo” ilo wakayowoyanga apa likuyana waka na ilo wakayowoyanga lakukhwaskana na Ŵanineve. Nga Mbanineve, ŵanthu ŵa mu Sodomu na Gomora nawo ŵakachita vinthu viheni chomene. Kweni Ŵanineve ŵakaŵa na mwaŵi wakupera. Kweniso kumbukani ivyo Yesu wakayowoya vyakukhwaskana na ‘awo ŵazamuwukira ku cheruzgo.’ Ŵakusazgapo “awo ŵakachitanga vinthu viheni.” (Yoh. 5:29) Ntheura vikulongora kuti ŵanthu ŵa mu Sodomu na Gomora nawo mwaŵi ungaŵapo wakuti ŵangazakawuskika. Vingazakachitika kuti ŵanyake mwa ŵanthu aŵa ŵangazakawuskika nadi, ndipo tingazakaŵa na mwaŵi wakuŵasambizga vyakukhwaskana na Yehova na Yesu Khristu.
16. Kasi tikumanya vichi pa nkhani ya umo Yehova wazamusankhira awo wazamuŵawuska? (Yeremiya 17:10)
16 Ŵazgani Yeremiya 17:10. Lemba ili likutovwira kuti tiyowoye mwakudumura ivyo tikumanya vyakukhwaskana na umo Yehova wakweruzgira. Nyengo zose Yehova ‘wakusanda mtima, wakupima mukati mu maghanoghano.’ Pa nkhani yakukhwaskana na chiwuka icho chikwiza, nga umo wakuchitira nyengo zose, wazamweruzga “waliyose kuyana na nthowa zake.” Yehova wazamulongora lusungu apo mphakwenelera kweniso kuleka kulongora lusungu apo ntchakukhumbikwa kuchita nthena. Ntheura tikwenera yayi kudumura kuti munthu uyu walije chilindizga cha kuzakawuskika, pekha usange tamanya kuti ndivyo Baibolo likuyowoya!
“MWERUZGI WA CHARU CHOSE CHAPASI WACHITENGE ICHO NTCHAKUNYOLOKA”
17. Kasi ntchivichi chizamuchitikira awo ŵali kufwa?
17 Kufuma waka apo Adamu na Eva ŵakakolerana na Satana pa kugalukira Yehova Chiuta, ŵanthu mabiliyoni ghanandi ŵali kufwa. Nyifwa ni “mulwani” wakofya chomene! (1 Kor. 15:26) Kasi ntchivichi chizamuchitikira ŵanthu wose aŵa? Ŵanthu ŵachoko waka ŵakukwana 144,000 pa ŵalondezgi ŵakugomezgeka ŵa Khristu, ŵazamuwuskikira ku umoyo wambura kufwa kuchanya. (Chivu. 14:1) Kweni ŵanthu ŵanandi ŵakugomezgeka awo ŵakumutemwa Yehova ŵazamuwuka pa “chiwuka cha ŵarunji.” Ŵanthu aŵa ŵazamukhala kwamuyirayira pa charu chapasi usange ŵazamulutilira kuŵa ŵakugomezgeka mu nyengo ya Muwuso wa Khristu wa Vyaka 1,000 kweniso pa chiyezgo chaumaliro. (Dan. 12:13; Heb. 12:1) Kweniso mu nyengo ya muwuso wa vyaka 1,000, “ŵambura urunji” kusazgapo awo ŵakateŵeterapo yayi Yehova panji nanga ni awo “ŵakachitanga vinthu viheni,” ŵazamupika mwaŵi wakuti ŵasinthe nkharo zawo na kuŵa ŵakugomezgeka. (Luka 23:42, 43) Ndipouli, ŵanthu ŵanyake ŵakaŵa ŵaheni chomene, mwakuti ŵakaŵikapo mtima kugalukira Yehova na khumbo lake, ndipo Yehova wali kudumura kuti ŵanthu aŵa ŵazamuwuskika yayi.—Luka 12:4, 5.
18-19. (a) Chifukwa wuli tikusimikizga kuti Yehova wazamweruzga mwaurunji awo ŵali kufwa? (Yesaya 55:8, 9) (b) Kasi mu nkhani yakulondezgapo tizamuwona vichi?
18 Kasi tili na vifukwa viwemi vyakugomezgera kuti vyeruzgo vyose vya Yehova ni vyakufikapo, vilije kanthu kuti tikukolerana navyo panji yayi? Enya! Abrahamu wakapulikiska makora kuti Yehova ni “Mweruzgi wa charu chose chapasi” uyo ngwakufikapo, ngwavinjeru, kweniso walusungu. Iyo wali kusambizga Mwana wake na kumupa ntchito yose yakweruzga. (Yoh. 5:22) Yehova na Yesu, wose ŵakumanya ivyo vili mu mitima ya ŵanthu. (Mat. 9:4) Ntheura nyengo zose para ŵakweruzga munthu waliyose, ŵazamuchita “icho ntchakunyoloka”!
19 Tiyeni tiŵikepo mtima kugomezga kuti Yehova ndiyo wakumanya makora icho ntchiwemi. Tikumanya kuti iyo ndiyo ngwakwenelera kweruzga, ise yayi! (Ŵazgani Yesaya 55:8, 9.) Ntheura pa nkhani iyi, vyose tikuvileka mu mawoko ghake na gha Mwana wake, Themba ilo ndakufikapo ndipo likuyezga lusungu na urunji wa Awiske. (Yes. 11:3, 4) Kweni wuli pakuyowoya vya umo Yehova na Yesu ŵazamweruzgira ŵanthu pa suzgo yikuru? Kasi ni vichi ivyo tikumanya yayi? Ndipo kasi ni vichi ivyo tikumanya? Nkhani yakulondezgapo yizamuzgora mafumbo agha.
SUMU 57 Kupharazgira Ŵanthu ŵa Mitundu Yose
b Pakuyowoya vya Adamu, Eva, na Kayini, wonani Gongwe la Mulinda la Janyuwale 1, 2013, peji 12, mazgu ghamusi.
c Mazgu ghakuti “mwana wa pharanyiko” agho ghali kugwiliskirika ntchito pa Yohane 17:12, ghakung’anamura kuti para Yudasi wafwa, wazamuŵavya chilindizga cha chiwuka.
d Wonani nkhani pa jw.org ya mutu wakuti, “Kasi Kwananga Kwambura Kugowokereka Ni Vichi?” panji w07 8/1 peji 8.
e Para munthu wakuyowoya mu ntharika, kanandi wakuyowoya mwakutalulira na chilato chakuti wadidimizge fundo, ndipo ivyo wakuyowoya vikuŵanga na ng’anamuro linyake. Kweni ivyo Yesu wakayowoya vyakukhwaskana na ŵanthu ŵa mu Sodomu na Gomora vikaŵa vyanadi, ni ntharika waka yayi.
