1-3. Kasi chikwenera kuti chikachitika ntchivichi kuti Yuwodiya na Sintike ŵapambane maghanoghano? Kasi tingagega wuli masuzgo ghanthena? (Wonani chithuzi chakwamba.)

ŴATEŴETI ŵa Yehova ŵakuzirwiska chomene Baibolo, ilo ni Buku la Yehova. Pakuti ndise ŵakwananga, nyengo zinyake tikubudiska ndipo tikupokera ulongozgi wa mu Malemba. Kasi tikuchita wuli para tapokera ulongozgi? Ghanaghanirani ivyo vikachitikira Yuwodiya na Sintike, awo ŵakaŵa mu mpingo wakwambilira Wachikhristu. Ŵanakazi ŵakuphakazgika aŵa ŵakapambana maghanoghano. Kasi suzgo likaŵa vichi? Baibolo likuyowoya yayi. Kweni tiyeni tiwone ivyo vikwenera kuti vikachitika.

² Tiyelezgere kuti Mudumbu Yuwodiya wakachema ŵabali na ŵadumbu kuti ŵakachezge ku nyumba yake ndipo wose awo ŵakaluta ŵakakondwa chomene na chiphikiro ichi. Kweni Sintike wakachemeka yayi ku chiphikiro ichi. Sintike wakwenera kuti wakayowoya kuti: ‘Nkhugomezga yayi, nadi Yuwodiya wangaleka kunichemerako ku nyumba yake! Ine nkhatenge panji tikutemwana.’ Chifukwa chakuti wakakhuŵara chomene na ivyo vikachitika, Sintike wakaleka kumugomezga Yuwodiya. Ntheura Mudumbu Sintike nayo wakanozga chiphikiro  na kuchemerako ŵabali na ŵadumbu ku nyumba kwake awo Yuwodiya wakaŵachema. Kweni nayo wakamuchemerako yayi Yuwodiya. Suzgo ilo likaŵa pakati pa ŵadumbu ŵaŵiri aŵa likate litimbanizgenge mtende mu mpingo wose. Baibolo likuyowoya yayi umo ŵakamazgira suzgo lawo, kweni ŵadumbu aŵa ŵakwenera kuti ŵakagwiliskira ntchito ulongozgi wachitemwa uwo mpositole Paulosi wakaŵapa.—Fil. 4:2, 3.

³ Mwakuyana waka, vinthu vyanthena ivi vikuchitika pakati pa Ŵakhristu mazuŵa ghano. Kweni tingamazga masuzgo ghanthena panji kughagega usange tikulondezga ulongozgi wa mu Mazgu gha Chiuta. Nakuti para tikuzirwiska chomene Buku la Yehova, Baibolo, nyengo zose tigwiliskirenge ntchito ulongozgi wake.—Sal. 27:11.

4, 5. Kasi Baibolo likutipa ulongozgi wuli pa nkhani ya kukhuŵara luŵiro?

⁴ Ntchipusu yayi kujikora para tikuwona kuti ŵanyake ŵandatichitire vinthu mwaurunji. Vingatipweteka chomene para ŵanyake ŵakutichitira vinthu mwambura urunji chifukwa cha mtundu withu, panji chifukwa cha umo tikuwonekera. Nakuti vikutiŵinya chomene usange uyo watichitira nthena ni Mkhristu munyithu. Kasi Baibolo lingatovwira wuli usange vinthu vyanthena vyatichitikira?

⁵ Kufuma waka apo ŵanthu ŵakalengekera, Yehova wakumanya makora umo ŵanthu ŵakukhalira na ŵanyawo. Wakumanya ivyo tikughanaghana kweniso ivyo tikuchita. Nyengo zinyake ivyo tikughanaghana para takhuŵara vingatipangiska kuyowoya na kuchita vinthu vinyake ivyo tingadandawura navyo paumaliro. Ntheura ntchakuzirwa chomene kulondezga ulongozgi wa mu Baibolo wakuti tileke kukwiya na kukhuŵara luŵiro. (Ŵerengani Zintharika 16:32; Mupharazgi 7:9.) Kuyowoya unenesko, tose tikwenera kuchitapo kanthu kuti tileke kukhuŵara luŵiro, m’malo mwake tikwenera kuŵa na mtima wakugowokera. Yehova na Yesu ŵakukhumba kuti nyengo zose tigowokerenge ŵanyithu. (Mat. 6:14, 15) Kasi imwe vikumusuzgani kugowokera ŵanyinu? Panji kasi vikumusuzgani kujikora para munyinu wamukhuŵazgani?

6. Chifukwa wuli ntchiwemi yayi kusunga ukali?

⁶ Munthu uyo wakutemwa kukhuŵara luŵiro kanandi wakuŵa mukali. Ntheura ŵanthu ŵanandi ŵakukhumba yayi kukhala pafupi na munthu wanthena. Munthu uyo wakutemwa kukwiyakwiya panji kukalipa, wangapangiska nthimbanizgo mu mpingo. Iyo wangayezga kujibisa kuti ŵanthu ŵaleke kumumanya kuti wakwiya, kweni maghanoghano ghaheni agho ghali mu mtima mwake ‘ghakuvumbulika mu mpingo.’ (Zinth. 26:24-26) Ŵalara ŵakuyezga kovwira munthu waliyose uyo wakutemwa kukwiya luŵiro na kusunga vyakusingo kuti wasinthe nkharo yake. Waliyose uyo wali na nkharo yanthena wangalutilira yayi kuŵa mu gulu la Yehova. Baibolo likubisa kalikose yayi pa nkhani iyi. (Lev. 19:17, 18; Rom. 3:11-18) Ntheura kasi nyengo zose tikupulikira ulongozgi uwo Baibolo likutipa?

7, 8. (a) Kasi Yehova wakulongozga wuli gulu lake la pa charu chapasi? (b) Kasi ni ulongozgi wuli unyake uwo Baibolo likutipa, ndipo chifukwa wuli tikwenera kupulikira ulongozgi uwu?

⁷ Yehova wakulongozga na kulyeska ŵateŵeti ŵake ŵa pa charu chapasi kwizira mwa “muzga wakugomezgeka na wavinjeru” uyo wali pasi pa Khristu, “mutu wa mpingo.” (Mat. 24:45-47; Efe. 5:23) Nga ni wupu wakulongozga mu nyengo ya Ŵakhristu ŵakwambilira, muzga wa mazuŵa ghano nayo wakupulikira ulongozgi wakufuma kwa Chiuta ndipo wakuwuzirwiska chomene. (Ŵerengani 1 Ŵatesalonika 2:13.) Kasi ni ulongozgi wuli unyake wakovwira uwo Baibolo likutipa?

⁸ Baibolo likutichiska kuti nyengo zose tiwunganenge. (Heb. 10:24, 25) Likutichiska kuti tiyowoyenge na kusambizga unenesko wa mu Baibolo. (1 Kor. 1:10) Mazgu gha Chiuta ghakutiphalira kuti tikwenera kuŵika vinthu vyauzimu  pakwamba mu umoyo withu. (Mat. 6:33) Malemba ghakutichiskaso kuti tikwenera kupharazga ku nyumba na nyumba, kulikose uko kukusangika ŵanthu ŵanandi, kweniso kupharazga mwamwaŵi. (Mat. 28:19, 20; Mil. 5:42; 17:17; 20:20) Baibolo likuphalira ŵalara kuti ŵakwenera kuwoneseska kuti mpingo ngutuŵa. (1 Kor. 5:1-5, 13; 1 Tim. 5:19-21) Nakuti Yehova wakukhumba kuti waliyose mu gulu lake waŵenge mutuŵa mwakuthupi kweniso mwauzimu.—2 Kor. 7:1.

9. Zunurani nthowa yimoza pera iyo Yesu wakugwiliskira ntchito kuti watovwire kupulikiska Baibolo.

⁹ Ŵanthu ŵanyake ŵakujipusika kuti ŵangaŵerenga na kulipulikiska makora Baibolo paŵekha. Kweni Yesu wali kusankha “muzga wakugomezgeka” kuŵa nthowa yakupelekera chakurya chauzimu. Kwamba mu 1919, Yesu Khristu wakugwiliskira ntchito muzga uyu pakovwira ŵalondezgi ŵake ŵa pa charu chapasi kupulikiska ivyo Baibolo likuyowoya na kulondezga fundo zake. Para tikulondezga ulongozgi wa mu Baibolo, tikovwira kuti mpingo ulutilire kuŵa pa mtende, utuŵa, kweniso wakukolerana. Ntheura waliyose wakwenera kujifumba kuti, ‘Kasi nkhupulikira muzga wakugomezgeka na wavinjeru uyo Yesu wakugwiliskira ntchito mazuŵa ghano?’

10. Kasi buku la Ezekiyeli likulongosora wuli chigaŵa chakuchanya cha gulu la Yehova?

¹⁰ Baibolo likutovwira kumanya makora chigaŵa chakuchanya cha gulu la Yehova. Mwachiyelezgero, ntchimi Ezekiyeli yikawona mboniwoni iyo yikalongoranga chigaŵa chakuchanya cha gulu la Chiuta. Gulu la kuchanya la Chiuta likuyelezgereka na gileta. (Ezek. 1:4-28) Yehova ndiyo wakwendeska gileta ili ndipo likuluta kulikose uko mzimu wake walilongozgera. Umo chigaŵa chakuchanya chikwendera vikukhwaska chomene chigaŵa chapacharu chapasi cha gulu la Yehova. Tili na ukaboni wakukwana wakuti chigaŵa chakuchanya cha gulu la Yehova chikwenda luŵiro chomene. Ghanaghanirani waka umo vinthu vyasinthira mu gulu la Yehova mu vyaka 10 ivyo vyajumpha. Kuluwa yayi kuti Yehova ndiyo wakusintha vinthu mu gulu lake. Gileta la Yehova lili pa sipidi yakofya kuthuwuska muwuso wa Chiuta na kutuŵiska zina lake. Khristu na ŵangelo ŵazamuparanya charu chiheni ichi.

11, 12. Kasi ni vinthu wuli vinyake ivyo gulu la Yehova lafiska?

¹¹ Wonani ivyo chigaŵa chapacharu chapasi cha gulu la Yehova chikufiska mu mazuŵa ghaumaliro agha. Ntchito yakuzenga. Ŵabali na ŵadumbu ŵanandi ŵakaŵikapo mtima pa ntchito yakuzenga likuru liphya la Ŵakaboni ŵa Yehova ku Warwick, New York, U.S.A. Dipatimenti Yakulemba Mapulani na Kuzenga Yapacharu Chose, yikupeleka ulongozgi ku ŵabali na ŵadumbu ŵanandi ŵakujipeleka awo ŵakovwira pa ntchito yakuzenga Nyumba za Ufumu na kukuzga maofesi ghaminthavi. Tikuwonga chomene ŵateŵeti ŵakujipeleka aŵa chifukwa ŵakulimbikira chomene ntchito yakuzenga iyi. Manyani kuti Yehova wakutumbika ŵapharazgi wose ŵa Ufumu awo mbakujichepeska kweniso mbakugomezgeka ndipo ŵakovwirapo na ndalama zawo kuti ntchito yakuzenga yilute panthazi.—Luka 21:1-4.

¹² Masukulu. Mu gulu la Yehova muli masukulu  ghanandi agho ghakutovwira kumanya makora Chiuta. (Yes. 2:2, 3) Tili na Sukulu ya Uteŵeti wa Upayiniya, Sukulu ya Ŵapharazgi ŵa Ufumu, Sukulu ya Giliyadi, Sukulu ya Awo Ŵiza Sono pa Beteli, Sukulu ya Ŵalaŵiliri ŵa Dera na Ŵawoli Ŵawo, Sukulu ya Ŵalara ŵa Mpingo, Sukulu ya Uteŵeti wa Ufumu, na Sukulu ya Awo Ŵali mu Komiti ya Munthavi na Ŵawoli Ŵawo. Uwu mbukaboni wakuti Yehova wakukhumba nadi kusambizga ŵanthu ŵake. Webusayiti yithu ya jw.org nayo yikovwira chomene ŵanthu kuti ŵamanye unenesko wa mu Baibolo. Pa webusayiti iyi pali mabuku ghakulongosora Baibolo mu viyowoyero vinandi chomene. Paliso chigaŵa chiwemi chomene chakukhwaskana na ŵana, mabanja, kweniso nkhani izo zachitika. Kasi mukugwiliskira ntchito webusayiti iyi para mukupharazga kweniso pa nyengo yakusopa kwa mbumba?

13. Kasi ŵateŵeti ŵakugomezgeka ŵa Yehova ŵali na udindo wuli?

¹³ Ni mwaŵi ukuru chomene kuŵa mu gulu la Yehova. Tili na udindo wakuchita icho ntchakwenelera na kuthuwuska muwuso wake chifukwa tikumanya makora fundo za Chiuta na ivyo wakukhumba kuti tichitenge. Charu chikulutilira kuhenipirahenipira, lekani tikwenera ‘kutinkha icho ntchiheni’ nga umo Yehova wakuchitira. (Sal. 97:10) Ntheura tikukana maghanoghano gha charu cha Satana ghakuti: “Uwemi ndiwo uheni, uheni ndiwo uwemi.” (Yes. 5:20) Pakuti tikukhumba kukondweska Chiuta, tikuyezgayezga kulutilira kuŵa ŵatuŵa mwakuthupi, mu maghanoghano, kweniso mwauzimu. (1 Kor. 6:9-11) Tikutemwa na kugomezga chomene Yehova. Tingalongora kuti tikumupulikira para nyengo zose tikulondezga malango ghake agho ghali mu Buku lake, Baibolo. Ntheura nyengo zose tikwenera kuyezgayezga kulondezga malango ghake para tili ku maungano, ku ntchito, ku nyumba, kweniso ku sukulu. (Zinth. 15:3) Tiyeni tiwone nthowa zinyake izo tingalongolera kuti ndise ŵakugomezgeka kwa Yehova.

14. Kasi ŵapapi Ŵachikhristu ŵangalongora wuli kuti mbakugomezgeka kwa Yehova?

¹⁴ Kulera ŵana. Para ŵapapi ŵakusambizga ŵana ŵawo unenesko wa mu Baibolo, ŵakulongora kuti mbakugomezgeka kwa Yehova. Ŵapapi Ŵachikhristu ŵakuchichizgika yayi kulondezga mitheto ya uko ŵakukhala pa nkhani ya kulera ŵana ŵawo. Vili nthena chifukwa Mkhristu wakwenera yayi kulongozgeka na mzimu wa charu. (Efe. 2:2) Ntchiwemi yayi kuti dada uyo ni Mkhristu wakubatizika wajipusikenge kughanaghana kuti, ‘Kwithu kuno, mwanakazi ndiyo wali na udindo wakusambizga ŵana.’ Uwu mbutesi chifukwa Baibolo likuyowoya mwambura kubisa pa nkhani iyi. Likuti: “Ŵawiskewo, . . . lutilirani kuŵalera makora [ŵana ŵinu] pa kuŵalanga na kuŵasambizga maghanoghano gha Yehova.” (Efe. 6:3, 4) Ŵapapi awo ŵakopa Yehova ŵakukhumba kuti ŵana ŵawo ŵakure makora nga ni Samuyeli uyo wakathembanga Yehova umoyo wake wose.—1 Sam. 3:19.

15. Kasi tikulongora wuli kuti tikugomezga Yehova para tikupanga vyakusankha?

¹⁵ Kupanga vyakusankha. Para tikusankha vyakuchita vikuruvikuru pa umoyo withu, tikulongora kuti tikugomezga chomene Yehova para nyengo zose tikupenjerezga ulongozgi wa Yehova mu Baibolo na gulu lake. Kuti tipulikiske makora uwemi wakuchita nthena, tiyeni tiwone ivyo ŵapapi ŵanyake ŵakusankha pa nkhani yakulera ŵana ŵawo. Ŵapapi ŵanyake awo ŵakukhala mu vyaru vinyake, ŵakutemwa kutumizga kukaya ŵana ŵawo awo ŵababika waka kuti ŵakalereke na ŵabali ŵawo. Iwo ŵakuchita nthena kuti ŵalutilire kugwira ntchito na kupanga ndalama. Kweni waliyose wakwenera kupanga yekha chakusankha. Waliyose wakwenera kukumbuka kuti Chiuta wazamuteruzga kuyana na umo tikupangira vyakusankha. (Ŵerengani Ŵaroma 14:12.) Kasi mukuwona kuti ntchiwemi waka kupanga  vyakusankha vyakukhwaskana na umoyo panji mbumba yithu kwambura kuwona dankha ivyo Baibolo likuyowoya? Napachoko pose! Nyengo zose tikwenera kuthemba Yehova kuti ndiyo watovwire chifukwa patekha tingakwaniska yayi kulongozga mendero ghithu.—Yer. 10:23.

16. Kasi mwanakazi munyake wakasankha kuchita vichi wati wababa mwana? Kasi ntchivichi chikamovwira kusankha makora?

¹⁶ Mama munyake wakati waŵa na bonda apo wakakhalanga mu charu chachilendo, wakaghanaghana kuti mwana wake wamutume waka kukaya kuti wakalereke na agogo ŵake. Panyengo iyo kakaŵa kachali kachoko, Kaboni wa Yehova munyake wakamba kusambira Baibolo na mwanakazi uyu. Wakachitanga makora chomene mwauzimu ndipo wakasambira kuti Chiuta wali kumupa udindo wakulera mwana na kumusambizga kusopa Yehova. (Sal. 127:3; Zinth. 22:6) Mwanakazi uyu wakalomba kwa Yehova kuti wamovwire nga umo Baibolo likutichiskira. (Sal. 62:7, 8) Kweniso wakapulikiranga ivyo msambizgi wake wa Baibolo wakamuphaliranga ndipo wakapemphaso wovwiri ku ŵabali na ŵadumbu mu mpingo. Nangauli ŵabali ŵake ŵakuthupi na ŵabwezi ŵake ŵakamuchichizganga kuti watume mwana wake kukaya, kweni wakawona kuti ntchiwemi kulutilira kukhala nayo. Mfumu wake wakakondwa chomene na umo mpingo ukawovwilira mwanakazi wake pamoza na mwana wake pa nyengo yakusuzga iyi. Nakuti mwanalume wake nayo wakazomera kwamba kusambira Baibolo na kwamba kuwungana na Ŵakaboni ŵa Yehova. Kasi Yehova wakazgora lurombo lwakufumira pasi pamtima lwa mwanakazi uyu? Enya.

17. Kasi gulu latipa ulongozgi wuli wakukhwaskana na ŵasambiri ŵa Baibolo?

¹⁷ Kulondezga ulongozgi. Nthowa yinyake yakuzirwa iyo tingalongolera kuti ndise ŵakugomezgeka kwa Yehova ni para tikulondezga ulongozgi wakufuma ku gulu lake. Ghanaghanirani waka za ulongozgi uwo tili kupokera wakukhwaskana na ŵasambiri ŵithu ŵa Baibolo. Gulu la Yehova likutichiska kuti ntchiwemi chomene kuti para tamara kusambira na munthu buku la Kasi Baibolo Likusambizgachi Chomenechomene?, tikwenera kovwira msambiri withu kuti wambe kuwungana nase. Tingachita ivi mwakugwiliskira ntchito vidiyo yakuti Kasi pa Nyumba ya Ufumu Pakuchitika Vichi? na burosha la Kasi Mbanjani Ŵakuchita Khumbo la Chiuta Mazuŵa Ghano? Para tamara kusambira na munthu buku la Baibolo Likusambizgachi, gulu lili kutiphalira kuti tikwenera kwamba kusambira nayo buku la “Mujisungilire mu Chitemwa cha Chiuta” nanga ni para wangaŵa kuti wali kubatizika kale. Gulu la Yehova likuchita ivi na chilato chakuti ŵasambiri ŵaphya ‘ŵakhazikike mu chipulikano.’ (Kol. 2:7) Kasi imwe mukulondezga ulongozgi wakufuma ku gulu la Yehova uwu para mukusambira na munthu?

18, 19. Chifukwa wuli tikuwonga Yehova?

¹⁸ Nadi, tili na vifukwa vinandi vyakumuwongera Yehova. Wali kutipa umoyo, ndipo tikumanya makora kuti kwambura iyo tati tiŵengeko yayi. (Mil. 17:27, 28) Wali kutipa chawanangwa chiwemi chomene, Buku lake ilo ni Baibolo. Tikuwona kuti Baibolo ni Uthenga nadi wa Chiuta. Nakuti Ŵakhristu ŵa ku Tesalonika nawo ŵakazomera Mazgu gha Chiuta.—1 Tes. 2:13.

¹⁹ Mazgu gha Chiuta ghatovwira kuti tisendelere kwa Yehova, ndipo nayo wasendelera kwa ise. (Yak. 4:8) Dada withu wakuchanya watipa mwaŵi ukuru wakuŵa chigaŵa cha gulu lake. Ntheura tikwenera kumuwonga chomene. Wamasalimo nayo wakakondwa chomene na ivyo Yehova wakamuchitira, ndipo wakimba kuti: “Wongani Yehova, chifukwa ni muwemi, lusungu lwake lukukhalilira muyirayira.” (Sal. 136:1) Mazgu ghakuti “lusungu lwake lukukhalilira muyirayira,” ghakusangika maulendo ghakukwana 26 mu Salimo 136. Usange nase tilutilirenge kuŵa ŵakugomezgeka kwa Yehova na gulu lake, tiwonenge ng’anamuro la mazgu agha pa umoyo withu chifukwa nase tikhalilirenge muyirayira.