NYENGO yinyake Yesu wakati: “Uyo wakupeleka wakukondwa chomene kuluska uyo wakupokera.” (Mil. 20:35) Fundo iyi yikukhwaska ubwezi withu na Yehova. Chifukwa wuli? Yehova watipa vyawanangwa vinandi ivyo vikutipangiska kuŵa ŵakukondwa, kweni tingaŵa ŵakukondwa chomene usange tingapeleka chawanangwa kwa Yehova. Kasi ntchawanangwa wuli icho tingapeleka kwa Yehova? Lemba la Zintharika 3:9 likuti: “Chindika Yehova na vinthu vyako vyakuzirwa.” Vinyake mwa “vinthu [vithu] vyakuzirwa” ni nyengo yithu, maluso ghithu, nkhongono zithu, na katundu withu. Para tikukhozgera kusopa kwaunenesko na vinthu ivi, ndikuti tikumupa chawanangwa Yehova, ndipo tikuŵa ŵakukondwa chomene para tachita nthena.

Pa nkhani ya ivyo tili navyo, ntchivichi chingatovwira kuti tileke kusulako kupeleka chawanangwa chithu kwa Yehova? Mpositole Paulosi wakaphalira Ŵakorinte kuti ‘ŵaŵikenge kanthu padera’ kuŵa chakupeleka. (1 Kor. 16:2) Kasi mungachita wuli usange mukukhumba kumanya makora nthowa zinyake zakupelekera vyawanangwa izo zilipo ku chigaŵa chinu? Chonde wonani bokosi pasi apa.

Ni mu vyaru vyose yayi umo ŵanthu ŵangapeleka vyawanangwa pa intaneti. Kweni nthowa zinyake izo tingapelekera vyawanangwa zikusangika pa webusayiti ya vyawanangwa. Mu vyaru vinyake, pa webusayiti iyi pakusangika kabuku ako kakuzgora mafumbo ghakupambanapambana ghakukhwaskana na vyawanangwa.