1. Kasi tikumanya wuli kuti Yehova wakukhumba kuti waŵe nase pafupi?

 YEHOVA wakutipempha kuti tisendelere kwa iyo. (Yak. 4:8) Iyo wakukhumba kuŵa Chiuta withu, Dada withu, na Mubwezi withu. Wakuzgora malurombo ghithu na kutovwira mu nyengo zakusuzga. Ndipo wakugwiliskira ntchito gulu lake kutisambizga na kutivikilira. Kweni kasi tingachita wuli kuti tisendelere kwa Yehova?

2. Kasi tingasendelera wuli kwa Yehova?

² Tingasendelera kwa Yehova para tikulomba kwa iyo kweniso para tikuŵazga Mazgu ghake na kughanaghanirapo. Para tichitenge nthena, timutemwenge na kumuwonga chomene. Kweniso tikhukenge kumupulikira na kumulumba chifukwa ndivyo vikumwenelera. (Chivu. 4:11) Para tikulutilira kumumanya makora Yehova, ndipo timugomezgengeso chomene iyo, na gulu ilo watipa kuti litovwire.

3. Kasi Dyabulosi wakuchita wuli kuti watipature kwa Yehova, kweni ntchivichi chingatovwira kuti tileke kusida Chiuta withu na gulu lake? (Salimo 31:13, 14)

³ Kweni Dyabulosi wakuyezgayezga kuti watipature kwa Yehova, chomenechomene para takumana na masuzgo. Kasi wakuchita wuli? Iyo wakuyezga kutipangiska kuti pachoko na pachoko tileke kugomezga Yehova na gulu lake. Kweni tingatonda njomba zake. Para chipulikano chithu ntchakukhora kweniso chigomezgo chithu mwa Yehova ntchambura kusunkhunyika, tingamusida yayi Chiuta withu na gulu lake.—Ŵazgani Salimo 31:13, 14.

4. Kasi tidumbiskanenge vichi mu nkhani iyi?

⁴ Mu nkhani iyi, tidumbiskanenge masuzgo ghatatu ghakufuma  kuwaro kwa mpingo. Ndipo suzgo lililose lingatitondeska kugomezga Yehova na gulu lake. Kasi vinthu vitatu ivi vingatipatura wuli kwa Yehova? Ndipo kasi tingachita wuli kuti timutonde Satana?

5. Kasi masuzgo ghangatitondeska wuli kugomezga Yehova na gulu lake?

⁵ Nyengo zinyake, tikukumana na masuzgo nga nkhususkika na ŵabali ŵithu panji ntchito yingatimalira. Kasi masuzgo agha ghangatitondeska wuli kugomezga gulu la Yehova na kutipatura kwa iyo? Para suzgo latora nyengo yitali, tingataya chigomezgo ndipo tingasuzgika mu mtima. Para vyaŵa nthena, Satana wakusangirapo mwaŵi ndipo wakuyezga kutipangiska kuti tambe kukayikira usange Yehova wakutitemwa nadi. Dyabulosi wakukhumba kuti tighanaghanenge kuti masuzgo agho tikukumana nagho ntchifukwa cha Yehova panji gulu lake. Vyanthena ivi ndivyo vikachitikira Ŵaisrayeli ŵanyake ku Eguputo. Pakwamba iwo ŵakagomezganga kuti Yehova wakatuma Mozesi na Aroni kuti waŵawombore ku wuzga. (Eks. 4:29-31) Kweni pamanyuma Farawo wati waŵinyiska umoyo wawo, ŵakapa mulandu Mozesi na Aroni kuti ndiwo ŵapangiska masuzgo ghawo, ŵakati: “[Imwe] mwatitinkhiska kwa Farawo na ŵateŵeti ŵake, ndipo [imwe] mwaŵika lupanga mu woko lawo kuti ŵatikome.” (Eks. 5:19-21) Iwo ŵakapa mulandu ŵateŵeti ŵakugomezgeka ŵa Chiuta. Ichi chikaŵa chachitima chomene! Usange namwe mwasangana na suzgo ilo latora nyengo yitali, kasi mungachita wuli kuti mulutilire kugomezga Yehova na gulu lake?

6. Kasi tikusambirako vichi kwa ntchimi Habakuku pa nkhani ya umo tingachitira kuti tizizipizge masuzgo ghithu? (Habakuku 3:17-19)

⁶ Pungulirani mtima winu kwa Yehova mu lurombo, ndipo laŵiskani kwa iyo kuti wamovwirani. Ntchimi Habakuku yikakumana na masuzgo ghanandi. Vikuwoneka kuti nyengo yinyake iyo wakakayikira usange Yehova wakaŵa nayo na ntchito. Ntheura wakapungulira Yehova vyose ivyo vikaŵa mu mtima wake kwizira mu lurombo. Iyo wakati: “A Yehova, nililirenge wovwiri m’paka pawuli, kwambura imwe kupulika? . . . Chifukwa wuli mukulekelera kuyuzgana?” (Hab. 1:2, 3) Yehova wakazgora lurombo lwakufumira pasi pa mtima lwa muteŵeti wake wakugomezgeka uyu. (Hab. 2:2, 3) Habakuku wati waghanaghanirapo umo Yehova wakaponoskera ŵanthu ŵake kumasinda, wakaŵaso wakukondwa. Wakakhorwa kuti Yehova wamutaya yayi ndipo wamovwirenge kuzizipizga chiyezgo chilichose. (Ŵazgani Habakuku 3:17-19.) Kasi tikusambirapo vichi? Para muli mu suzgo, lombani Yehova na kumuphalira vyose ivyo vili mu mtima winu. Kufumapo apo, lindilirani na kuwona umo wamovwiliraninge. Para mwachita nthena, muŵenge na chigomezgo chose kuti Yehova wamupaninge nkhongono izo mukukhumbikwira kuti muzizipizge. Ndipo para mwawona umo wakumovwilirani, chipulikano chinu chikhorenge chomene.

7. Kasi ŵabali ŵa Shirley ŵakayezga wuli kumugongoweska, ndipo ntchivichi chikamovwira kuti waleke kutaya chipulikano mwa Yehova?

⁷ Lutilirani kuchita vinthu vyauzimu. Wonani umo ivi vikawovwilira Shirley, mudumbu wa ku Papua New Guinea, apo wakakumana na masuzgo. b Mbumba ya kwa Shirley yikaŵa yikavu, ndipo nyengo zinyake vikaŵasuzganga kusanga chakurya chakukwana. Mubali wake munyake wakayezga kumugongoweska kuti waleke kuthemba Yehova. Iyo wakati: “Iwe ukuti mzimu utuŵa wa Chiuta ukukovwira, so wovwiri uli nkhu pera? Apa muchali ŵakavu  ke! Ukutaya waka nyengo yako na kupharazga.” Shirley wakuti: “Nkhajifumba kuti: ‘Kasi ndikuti Chiuta wakutiwona panji yayi?’ So nyengo yeneyiyo nkhalomba kwa Yehova, nkhamuphalira vyose ivyo vikaŵa mu mtima wane. Nkhalutilira kuŵazga Baibolo na mabuku ghithu, kweniso nkhalutilira kupharazga na kuluta ku maungano.” Pati pajumpha nyengo yichoko waka, wakamba kumanya kuti Yehova wakayipweleleranga mbumba yake. Mbumba yake yikagonapo na njara yayi, ndipo yikaŵa yakukondwa. Shirley wakuti: “Nkhawona kuti Yehova wakuzgora malurombo ghane.” (1 Tim. 6:6-8) Usange mukulutilira kuchita vinthu vyauzimu, namwe muzamuzomerezga yayi masuzgo panji kukayika kuti vimupaturani kwa Yehova.

8. Kasi ntchivichi chingachitikira ŵabali awo ŵakulongozga mu gulu la Yehova?

⁸ Ŵalwani ŵithu ŵakuthandazga mautesi panji nkhani zambura ukaboni za ŵabali awo ŵakulongozga mu gulu la Yehova kwizira mu mawayilesi panji nyuzipepara kweniso pa malo ghakuchezgerapo gha pa Intaneti. (Sal. 31:13) Ŵabali ŵanyake ŵakukakika ndipo ŵakupika milandu yakuti ni vigeŵenga. Vyanthena ivi vikachitikaso ku Ŵakhristu ŵakwambilira apo mpositole Paulosi ŵakamupusikizgira na kumukaka. Kasi iwo ŵakachita wuli?

9. Kasi Ŵakhristu ŵanyake ŵakachita wuli mpositole Paulosi wati wajalirika mu jele?

⁹ Ŵakhristu ŵanyake ŵakwambilira ŵakaleka kumovwira mpositole Paulosi apo wakaŵa mu jele ku Romu. (2 Tim. 1:8, 15) Chifukwa wuli? Kasi ŵakachitanga soni na Paulosi pakuti ŵanthu ŵakatenge ntchigeŵenga? (2 Tim. 2:8, 9) Panji kasi ŵakachitanga wofi kuti nawo ŵangatambuzgika? Mulimose umo vikaŵira, kweni ghanaghanirani waka umo Paulosi wakwenera kuti wakajipulikira. Wakajumpha mu visuzgo vinandi ndipo wakafika na pakuŵika umoyo wake pangozi chifukwa cha iwo. (Mil. 20:18-21; 2 Kor. 1:8) Ise tingaŵanga yayi, nga awo ŵakamusida Paulosi mu nyengo ya suzgo! Kasi tikwenera kukumbuka vichi para ŵabali awo ŵakulongozga ŵakutambuzgika?

10. Kasi tikwenera kukumbuka vichi para ŵabali awo ŵakulongozga ŵakutambuzgika, ndipo chifukwa wuli?

 ¹⁰ Kumbukani chifukwa icho tikutambuzgikira kweniso uyo wakuchitiska. Lemba la 2 Timote 3:12 likuti: “Wose awo ŵakukhumba kusopa Chiuta mwakujipeleka mwakulondezga Khristu Yesu, nawo ŵatambuzgikenge.” Ntheura tingazizwanga yayi para Satana wakuwukira ŵabali awo ŵakulongozga. Iyo wakukhumba kuti waŵatondeske kugomezgeka kweniso wakukhumba kutiwofya ise.—1 Pet. 5:8.

11. Kasi tikusambirako vichi kwa Onesiforo? (2 Timote 1:16-18)

¹¹ Lutilirani kovwira ŵabali ŵinu ndipo mungaŵasidanga yayi. (Ŵazgani 2 Timote 1:16-18.) Mkhristu munyake mu nyengo yakale zina lake Onesiforo wakachita vyakupambanako Paulosi wati wakakika. Iyo “wakakhozgeka soni yayi na simbi za [Paulosi].” M’malo mwake, Onesiforo wakamupenja Paulosi, ndipo wati wamusanga wakayezgayezga kumovwira pa ivyo wakakhumbikwiranga. Pakuchita ivi, Onesiforo wakaŵika umoyo wake pangozi. Kasi tikusambirapo vichi? Tingatenthemanga yayi chifukwa cha kopa ŵanthu panji kuleka kovwira ŵabali ŵithu awo ŵakutambuzgika. M’malo mwake, tiyeni tiŵavikilire na kuŵawovwira. (Zinth. 17:17) Iwo ŵakukhumbikwira chitemwa na wovwiri withu.

12. Kasi tikusambirako vichi ku ŵabali na ŵadumbu ŵithu ŵa ku Russia?

¹² Wonani umo ŵabali na ŵadumbu ŵithu ku Russia ŵakovwilira Ŵakhristu ŵanyawo awo ŵali mu jele. Para ŵanyake ŵatolekera ku khoti, ŵabali na ŵadumbu ŵanandi ŵakwiza ku khoti kuzakaŵa nawo. Kasi tikusambirapo vichi? Para ŵabali awo ŵakulongozga ŵakuneneka, kukakika, panji kutambuzgika, mungatenthemanga yayi. Ŵalomberani, wovwirani mbumba zawo, kweniso sangani nthowa zinyake izo mungalongolera kuti muli nawo lumoza.—Mil. 12:5; 2 Kor. 1:10, 11.

13. Kasi mazgu ghakunyoza ghangatipangiska wuli kuti tileke kugomezga Yehova na gulu lake?

¹³ Ŵabali ŵithu awo mbakaboni yayi, ŵanyithu ku ntchito panji ku sukulu ŵangatinyoza chifukwa cha ntchito yithu ya kupharazga kweniso chifukwa cha kulondezga fundo za makhaliro ghawemi za Yehova. (1 Pet. 4:4) Iwo ŵangati: “Iwe uli munthu muwemi waka, kweni suzgo ntchisopa chako, chikukhwimiska chomene vinthu ndipo chikwendera vyakale.” Ŵanyake ŵangatisuska umo tikuchitira na munthu uyo wasezgeka, ŵangati: “So chitemwa chili nkhu apa nthena?” Mazgu ghanthena ghangapangiska kuti tambe kukayikira. Tingamba kujifumba kuti: ‘Kasi Yehova wakukhazga vinthu ivyo ningakwaniska yayi? Kasi ndikuti gulu lake likukhwimiska nadi vinthu?’ Usange vyanthena ivi vyamuchitikirani, kasi mungachita wuli kuti mudemelere kwa Yehova na gulu lake?

14. Kasi tikwenera kuchita wuli para ŵanji ŵakutinyoza chifukwa chakuti tikulondezga fundo za Yehova? (Salimo 119:50-52)

¹⁴ Ŵikanipo mtima kulondezga fundo za Yehova. Yobu wakaŵa munthu uyo wakalutilira kukoleska fundo za Yehova nangauli ŵanji ŵakamunyozanga. Yumoza wa awo ŵakatenge mbabwezi ŵa Yobu wakafika na pakuyowoya kuti Chiuta walije navyo ntchito kwali munthu wakulondezga fundo zake panji yayi. (Yobu 4:17, 18; 22:3) Kweni Yobu wakakana kugomezga mautesi agha. Iyo wakamanyanga kuti fundo za Yehova pa nkhani ya chiwemi na chiheni ni zaunenesko, ndipo wakaŵikapo mtima kuzilondezga. Wakazomerezga yayi kuti ŵanji ŵamutondeske kugomezgeka. (Yobu 27:5, 6) Kasi tikusambirapo vichi? Tileke kukayikira fundo za Yehova chifukwa chakuti ŵanji  ŵakutinyozerapo. Ghanaghanirani ivyo vyachitika pa umoyo winu. Asi namwe mwawona kuti nyengo zose fundo za Yehova ni ziwemi ndipo zikumovwirani? Ipo nyengo zose ŵikanipo mtima kukolerana na gulu ilo likukhozgera fundo izi. Para mwachita nthena, mupatukengeko yayi kwa Yehova nanga ŵanthu ŵangamunyozani wuli.—Ŵazgani Salimo 119:50-52.

15. Chifukwa wuli ŵanthu ŵakamunyozanga Brizit?

¹⁵ Wonani ivyo vikachitikira Brizit, mudumbu wa ku India. Mudumbu uyu ŵamumbumba yake ŵakamunyozanga chifukwa cha chipulikano chake. Nyengo yichoko waka wati wabatizika mu 1997, mfumu wake uyo wakaŵa Kaboni yayi ntchito yikamumalira. Ntheura mfumu wake wakaghanaghana kuti iwo pamoza na ŵana ŵawo ŵasungwana ŵasame ŵalute kukakhala na ŵapapi ŵakuchanalume, awo ŵakakhalanga mu msumba unyake. Kweni uku Brizit wakasangana na masuzgo ghanandi chomene. Pakuti mfumu wake wakaŵa lova, Brizit ndiyo wakagwiranga ntchito nyengo zose kuti wawovwire mbumba yake. Chinyake ntchakuti, mpingo wapafupi ukaŵa pamtunda wa makilomita pafupifupi 350. Chachitima ntchakuti ŵabali ŵa mfumu wake ŵakamunenanga chifukwa cha chipulikano chake. Ŵakamususkanga chomene mwakuti mbumba ya Brizit yikasamaso. Kufuma apo, mfumu wake wakafwa mwamabuchi. Pamanyuma, yumoza mwa ŵana ŵake wakafwa na nthenda ya kansa wali waka na vyaka 12. Chakupweteka chomene ntchakuti ŵabali ŵake ŵakatenge vyose ivi vyachitika chifukwa cha iyo. Ŵakatenge vyose ivi mphanyi vindachitike kuŵenge kuti iyo ni Kaboni wa Yehova yayi. Kweni iyo wakalutilira kuthemba Yehova na kudemelera ku gulu lake.

16. Kasi Brizit wakatumbika wuli chifukwa cha kudemelera kwa Yehova na gulu lake?

¹⁶ Pakuti Brizit wakakhalanga kutali chomene na mpingo, mulaŵiliri wa dera wakamuchiska kuti wapharazgenge waka uko wakukhala na kuchita maungano pa nyumba yake. Pakwamba, iyo wakawonanga kuti ntchakusuzga kuchita nthena. Kweni wakalondezga ulongozgi uwo wakapika. Wakapharazgiranga ŵanthu, wakachitanga maungano mu nyumba yake,  kweniso nyengo zose wakachitanga kusopa kwa mbumba na ŵana ŵake. Kasi chikachitika ntchivichi? Brizit wakamba kusambira Baibolo na ŵanthu ŵanandi, ndipo ŵanandi ŵa iwo ŵakabatizika. Mu 2005 wakamba upayiniya wanyengozose. Wakatumbikika chifukwa cha kugomezga Yehova na gulu lake. Ŵana ŵake ŵakuteŵetera Yehova mwakugomezgeka, ndipo mu chigaŵa ichi sono muli mipingo yiŵiri! Brizit wakukhorwa kuti Yehova ndiyo wakamupa nkhongono kulimbana na visuzgo kweniso kuzizipizga apo ŵamumbumba yake ŵakamunyozanga.

17. Kasi tikwenera kuŵikapo mtima kuchita vichi?

¹⁷ Satana wakukhumba kuti tigomezgenge kuti Yehova wangatijowora para tili mu suzgo kweniso vinthu vinganangika chomene para tikudemelera ku gulu la Yehova. Satana wakukhumba kuti titenthemenge para ŵabali awo ŵakulongozga ŵakuneneka, kutambuzgika, panji kujalirika mu jele. Ndipo kwizira mu ŵanthu awo ŵakutinyoza, Satana wakukhumbaso kuti tileke kugomezga Yehova na gulu lake. Kweni ise tikuzimanya makora njomba zake ndipo tikupusikika yayi. (2 Kor. 2:11) Ŵikanipo mtima kukana mautesi gha Satana na kulutilira kugomezgeka kwa Yehova na gulu lake. Kumbukani kuti Yehova wamusidaninge yayi. (Sal. 28:7) Ntheura, mungazomerezganga yayi kuti chinthu chinyake chimupaturani kwa Yehova!—Rom. 8:35-39.

18. Kasi tizamudumbiskana vichi mu nkhani yakulondezgapo?

¹⁸ Mu nkhani iyi tadumbiskana masuzgo agho tingakumana nagho ghakufuma kuwaro kwa mpingo. Kweni chigomezgo chithu mwa Yehova na gulu lake chingayezgekaso na masuzgo ghakufuma mukati mu mpingo. Kasi tingatonda wuli masuzgo agha? Ivi ndivyo tizamudumbiskana mu nkhani yakulondezgapo.