1. Kasi kusungilira maghanoghano ghithu chikung’anamurachi? (2 Timote 4:5)

 PARA tasangana na vinthu vinyake mu mpingo ivyo vyatikhuŵazga, vingatisuzga kuti tilutilire kugomezgeka kwa Yehova na gulu lake. Kasi tingatonda wuli masuzgo agha? Tikwenera kusungilira maghanoghano ghithu na kuŵa maso, kwimilira nganganga mu chipulikano. (Ŵazgani 2 Timote 4:5.) Tikusungilira maghanoghano ghithu para tikukhala dankha phee, kughanaghana makora, na kuyezga kuwona vinthu umo Yehova wakuviwonera. Para tachita nthena, maghanoghano ghithu ghenderenge waka ivyo vyatikwiyiska yayi.

2. Kasi tidumbiskanenge vichi mu nkhani iyi?

² Mu nkhani iyo yajumpha, tikawona masuzgo ghatatu ghakufuma kuwaro kwa mpingo agho ghangayezga kugomezgeka kwithu. Mu nkhani iyi, tiwonenge vinthu vitatu vyakufuma mu mpingo ivyo vingayezga kugomezgeka kwithu kwa Yehova. Vinthu ivi ni (1) para tikuwona nga Mkhristu munyithu wandatichitire makora, (2) para tapokera chilango, kweniso (3) para vikutisuzga kuzomerezga usange vinthu vyasintha mu gulu. Kasi tingasungilira wuli maghanoghano ghithu na kudemelera kwa Yehova na gulu lake para vyanthena ivi vyatichitikira?

3. Kasi nyengo zinyake tingajipulika wuli usange tikuwona nga Mkhristu munyithu wandatichitire makora?

³ Kasi muli kujipulikapo kuti Mkhristu munyinu, panyake uyo wali na udindo, wandamuchitirani makora? Ntchakumanyamanya kuti mubali wakaŵa na chilato chakuti watikhuŵazge yayi.  (Rom. 3:23; Yak. 3:2) Ndipouli, ivyo wali kuchita, imwe vili kumukwiyiskani. Panji mukutondeka na kugona wuwo chifukwa cha nkhani iyi. Panji mungajifumbaso kuti, ‘Usange mubali ndiyo wakuchita nthena, kasi ndikuti ili ni gulu la Chiuta nadi?’ Ivi ndivyo Satana wakukhumba kuti tighanaghanenge. (2 Kor. 2:11) Maghanoghano ghaheni agha ghangatipatuska kwa Yehova na gulu lake. Ipo kasi ntchivichi chingatovwira kuti tisungilire maghanoghano ghithu na kukana maghanoghano ghaheni usange mubali panji mudumbu wandatichitire makora?

4. Kasi Yosefe wakasungilira wuli maghanoghano ghake apo ŵakuru ŵake ŵakamuchitira makora yayi vinthu, ndipo tikusambirako vichi kwa iyo? (Genizesi 50:19-21)

⁴ Kusunga vyakusingo yayi. Apo Yosefe wakaŵa munyamata, ŵakuru ŵake ŵakamuchitira makora yayi. Ŵakamutinkhanga, ndipo ŵanyake ŵakakhumbanga na kumukoma wuwo. (Gen. 37:4, 18-22) Paumaliro, ŵakamuguliska ku wuzga. Pa chifukwa ichi, Yosefe wakakumana na masuzgo ghakuru agho ghakatora vyaka pafupifupi 13. Yosefe panji wakajifumbanga usange Yehova wakamutemwanga nadi. Panji wakajifumbangaso usange Yehova wamutaya apo iyo wakakhumbikwiranga wovwiri. Kweni Yosefe wakavisunga ku mtima yayi. M’malo mwake, wakasungilira maghanoghano ghake pakukhala waka phee. Mwaŵi ukati wamusangikira wakuti waŵawezgere nduzga ŵakuru ŵake, wakawezgera yayi, m’malo mwake wakaŵalongora waka chitemwa na kuŵagowokera. (Gen. 45:4, 5) Yosefe wakachita nthena chifukwa chakuti wakaghanaghananga makora. M’malo mwa kulaŵiska chomene pa masuzgo ghake, iyo wakaŵika mtima pa khumbo la Yehova. (Ŵazgani Genizesi 50:19-21.) Kasi tikusambirapo vichi? Usange munthu munyake wandamuchitirani makora, mungakwiyiranga Yehova yayi panji kughanaghana kuti wamujoworani. Kweni ghanaghanirani umo Yehova wakumovwilirani kuzizipizga chiyezgo icho. Chinyake ntchakuti, para ŵanji ŵandamuchitirani makora, yezgani kubenekelera ivyo ŵamuchitirani na chitemwa.—1 Pet. 4:8.

5. Kasi Miqueas wakasungilira wuli maghanoghano ghake apo wakawonanga kuti ŵakamuchitiranga vinthu mwambura urunji?

⁵ Wonani chiyelezgero cha mazuŵa ghano cha mulara munyake wa ku South America zina lake Miqueas. b Iyo wakukumbuka nyengo yinyake apo wakawonanga nga kuti ŵabali ŵanyake ŵa maudindo ŵakamuchitiranga vinthu mwambura urunji. Iyo wakati: “Aka kakaŵa kakwamba kuti nisuzgike nthena mu mtima. Nkhenjerwanga chomene. Usiku nkhagonanga yayi, ndipo nkhaliranga waka pakughanaghana kuti palije icho ningachitapo.” Ndipouli, Miqueas wakasungilira maghanoghano ghake ndipo wakayezgayezga kujikora. Wakalombanga pafupipafupi, kupempha Yehova kuti wamupe mzimu utuŵa na nkhongono kuti wazizipizge. Wakapenjaso fundo mu mabuku ghithu izo zingamovwira. Kasi tikusambirapo vichi? Usange mubali panji mudumbu wandamuchitirani makora, khalani dankha phee ndipo yezgani kukanizga maghanoghano ghaheni agho mungaŵa nagho. Mungamanya yayi icho chachitiska munthu uyo kuyowoya panji kuchita ivyo vyamukhuŵazgani. Ntheura phalirani Yehova mu lurombo, ndipo mupemphani kuti wamovwirani kuwona vinthu nga umo munthu uyo wamukhuŵazgani wakuviwonera. Ivi vimovwiraninge kuwona kuti mubali panji mudumbu winu wandachitire dala ivyo wamuchitirani. (Zinth. 19:11) Kumbukani kuti Yehova wakumanya ivyo vyachitika ndipo wamupaninge nkhongono izo mukukhumbikwira kuti muzizipizge.—2 Mid. 16:9; Muph. 5:8.

6. Chifukwa wuli ntchakuzirwa kuwona chilango chakufuma kwa Yehova kuti ntchilongolero cha chitemwa chake? (Ŵahebere 12:5, 6, 11)

⁶ Vikuŵinya para tapika chilango. Kweni para  tikuŵika waka mtima pa vyakuŵinya, tingamba kupepura chilango, kughanaghana kuti chikwenelera ise yayi panji kuti ntchikuru chomene. Ivi vingatitondeska kumanya chinthu chakuzirwa chomene chakuti Yehova wakutilanga chifukwa wakutitemwa. (Ŵazgani Ŵahebere 12:5, 6, 11.) Usange tikukhalira waka kudandawura, tikumujulira mulyango Satana. Iyo wakukhumba kuti tikanenge chilango, ndipo chiheni chomene ntchakuti wakukhumba kutipatuska kwa Yehova na gulu lake. Usange mwapika chilango, kasi mungachita wuli kuti musungilire maghanoghano ghinu?

7. (a) Kuyana na ivyo tikuwona pa chithuzi, kasi Yehova wakamugwiliskira wuli ntchito Petrosi pamanyuma pakuti wazomera ntchenyo? (b) Kasi tikusambirako vichi kwa Petrosi?

⁷ Zomerani ntchenyo panji chilango, ndipo sinthani apo mphakukhumbikwa. Kaŵiri kose, Yesu wakachenya Petrosi pamaso pa ŵapositole ŵanyake. (Mrk. 8:33; Luka 22:31-34) Ichi chikaŵa chakukhozga soni! Ndipouli, Petrosi wakalutilira kuŵa wakugomezgeka kwa Yesu. Wakapokelera ntchenyo ndipo wakasambirapo pa ivyo wakabudiska. Ntheura, Yehova wakamutumbika Petrosi chifukwa cha kugomezgeka, ndipo wakamupa milimo yikuru mu mpingo. (Yoh. 21:15-17; Mil. 10:24-33; 1 Pet. 1:1) Kasi tikusambirako vichi kwa Petrosi? Para tikuzomera ntchenyo na kusintha apo mphakukhumbikwa tikusanga chandulo ndise kweniso tikovwira ŵanyithu, m’malo mwa kughanaghanira waka umo soni zatikolera. Para ndivyo tachita, tikuŵa ŵachandulo chomene kwa Yehova kweniso ku ŵabali ŵithu.

8-9. Kasi pakwamba Bernardo wakajipulika wuli wati wapika chilango, kweni ntchivichi chikamovwira kusintha maghanoghano ghake?

⁸ Wonani ivyo vikachitikira Bernardo, mubali wa ku Mozambique. Iyo wakalekeskeka ulara. Kasi Bernardo pakwamba wakajipulika wuli? Iyo wakuti, “Nkhakhuŵara chifukwa nkhakolerana nacho yayi chilango icho nkhapokera.” Iyo wakafipanga mtima na umo ŵanji mu mpingo ŵamuwonerenge. Iyo wakuzomerezga kuti, “Vikanitolera tumyezi kuti nambe kuchipokelera chilango kweniso kuti nambeso kugomezga Yehova na gulu lake.” Kasi ntchivichi chikamovwira Bernardo kuŵa na maghanoghano ghakwenelera?

⁹ Bernardo wakasintha kaghanaghaniro kake. Iyo wakuti: “Apo nkhaŵa mulara, nkhagwiliskiranga ntchito lemba la Ŵahebere 12:7 pakovwira ŵanji kuti ŵawonenge mwakwenelera chilango chakufuma kwa Yehova. Sono nkhajifumba  kuti: ‘Ni njani wakwenera kulondezga fundo ya pa lemba ili?’ Nkhajizgora kuti, ŵateŵeti wose ŵa Yehova, kusazgapo na ine wuwo.” Kufuma apo, Bernardo wakachitapo kanthu kuti wambeso kugomezga Yehova na gulu lake. Wakambaso kulimbikira chomene kuŵazga Baibolo na kughanaghanirapo. Nangauli wakafipanga mtima na umo ŵabali kweniso ŵadumbu ŵakamuwoneranga, kweni wakapharazganga nawo mu uteŵeti kweniso wakazgorangapo pa maungano gha mpingo. Pati pajumpha nyengo, Bernardo wakaŵaso mulara. Usange namwe mwapika chilango nga ni Bernardo, lekani kuŵika mtima pa umo soni zamukolerani, pokelerani ulongozgi, ndipo sinthani apo mphakukhumbikwa. c (Zinth. 8:33; 22:4) Para ndimo muchitirenge, Yehova wamutumbikaninge chifukwa cha kulutilira kugomezgeka na kudemelera kwa iyo na gulu lake.

10. Kasi nkhusintha wuli uko panji kukayezga kugomezgeka kwa ŵanalume ŵanyake ŵa Israyeli?

¹⁰ Para vinthu vyasintha mu gulu chingatiŵira chakusuzga kugomezgeka. Usange tingapusa, tingapatukako kwa Yehova. Mwachiyelezgero, wonani umo vinthu vikasinthira ku Ŵaisrayeli. Pambere Dango la Mozesi lindapelekeke, mitu ya mbumba ndiyo yikachitanga milimo yausembe. Ŵakazenganga majotchero na kupelekerapo sembe kwa Yehova m’malo mwa mbumba zawo. (Gen. 8:20, 21; 12:7; 26:25; 35:1, 6, 7; Yobu 1:5) Kweni Dango lati lapelekeka, mitu ya mbumba yikakanizgika kuchita milimo iyi. Yehova wakimika ŵasembe kufuma mu mbumba ya Aroni kuti ndiwo ŵapelekenge sembe. Vinthu vyati vyasintha nthena, usange mutu wa mbumba uyo ngwa mphapu ya Aroni yayi wachita milimo yausembe, wakakomekanga. d (Lev. 17:3-6, 8, 9) Kasi vingaŵa kuti kusintha uku ndiko kukachitiska Kora, Datani, Abiramu, kweniso ŵalongozgi 250 kugalukira Mozesi na Aroni? (Maŵa. 16:1-3) Tingasimikizga yayi. Mulimose umo vikaŵira, kweni Kora na ŵanyake ŵakatondeka kulutilira kugomezgeka kwa Yehova. Kasi mungachita wuli usange vikumusuzgani kuzomerezga para gulu lasintha vinthu vinyake?

11. Kasi tikusambirako vichi ku Ŵakohati?

¹¹ Koleranani na ivyo gulu lasintha. Apo Ŵaisrayeli ŵakendanga mu mapopa, Ŵakohati ŵakaŵa na mulimo wapadera chomene. Nyengo yiliyose para Ŵaisrayeli ŵakusama pa msasa, Ŵakohati ŵanyake ŵakanyamuranga likasa la phangano na kwenda panthazi pa ŵanthu wose. (Maŵa. 3:29, 31; 10:33; Josh. 3:2-4) Uwu ukaŵa mwaŵi wapadera! Kweni vinthu vikasintha Ŵaisrayeli ŵati ŵakhazikika mu Charu cha Layizgano. Likasa likanyamulikangaso kaŵirikaŵiri yayi. Ntheura kufika mu nyengo ya Themba Solomoni, Ŵakohati ŵanyake ŵakapika mulimo wakwimba, ŵanyake ŵakalindanga pa vipata, ndipo ŵanyake ŵakapweleleranga nyumba zakusungamo vinthu. (1 Mid. 6:31-33; 26:1, 24) Palije mu Baibolo apo pali kulembeka kuti Ŵakohati ŵakadandawuranga panji kukhumba milimo yapachanya chifukwa chakuti kumanyuma ŵakachitapo mulimo wapadera uwu. Kasi tikusambirapo vichi apa? Tikoleranenge navyo na mtima wose vinthu ivyo gulu lasintha, kusazgapo chilichose icho chingakhwaska uteŵeti withu. Kondwani na uteŵeti uliwose uwo mungapika. Kumbukani kuti muli ŵakuzirwa kwa Yehova chifukwa cha uteŵeti yayi. Yehova wakuzirwiska kugomezgeka na kupulikira  kwinu kuluska uteŵeti uliwose uwo mungachita.—1 Sam. 15:22.

12. Kasi Zaina wakajipulika wuli uteŵeti wake wati wasintha na kufumapo pa Beteli?

¹² Wonani ivyo vikachitikira Zaina, mudumbu wa ku Middle East, uyo uteŵeti wake ukasintha ndipo uteŵeti uwo wakakondwanga nawo chomene ukamara. Mudumbu uyu wakateŵetera pa Beteli vyaka vyakujumpha 23 kweni wakaphalirika kuti wakateŵeterenge waka ku mpingo. Iyo wakuti: “Nkhachiluka chomene nati naphalirika kuti uteŵeti wane wasintha. Nkhajiwona wawakawaka ndipo kanandi nkhajifumbanga kuti, ‘Kasi nili kubuda vichi?’” Chachitima ntchakuti ŵabali na ŵadumbu ŵanyake mu mpingo ŵakamuthirangaso mchere pa chilonda pakumuphalira kuti: “Uŵenge kuti ukachitanga makora mphanyi gulu lakuyimiska yayi uteŵeti.” Kwa kanyengo, Zaina wakasweka chomene mtima mwakuti usiku uliwose wakakhaliranga waka kulira. Kweni iyo wakuti: “Nkhazomerezga yayi kuti nambe kukayikira gulu panji chitemwa cha Yehova.” Kasi ntchivichi chikamovwira Zaina kusungilira maghanoghano ghake?

13. Kasi Zaina wakachita vichi kuti watonde maghanoghano ghake ghambura kwenelera?

¹³ Zaina wakatonda maghanoghano ghambura kwenelera agho wakaŵa nagho. Kasi ntchivichi chikamovwira? Wakaŵazga nkhani zinyake mu mabuku ghithu izo zikakolerananga chomene na suzgo lake ndipo zikamovwira kuzizipizga. Nkhani yakuti “Mungathe Kupitirizabe Polefulidwa!” iyo yili mu Gongwe la Mulinda la Chichewa la Febuluwale 1, 2001, yikamovwira chomene. Nkhani iyi yikulongosora umo Mariko uyo wakalembako Baibolo wakasuzgikira mu mtima uteŵeti wake wati wasintha. Zaina wakuti, “Nkhani ya Mariko ndiwo ukaŵa munkhwala wane wakutondera suzgo la kugongoweskeka.” Kweniso Zaina wakalutilira kukolerana na ŵabwezi ŵake mu mpingo. Wakajipatura yayi; nesi kujilengera lusungu. Iyo wakamanya kuti mzimu utuŵa ndiwo ukulongozga pa ivyo gulu la Yehova ladumura kweniso kuti awo ŵakulongozga ŵakumutemwa chomene. Wakamanyaso kuti gulu la Chiuta likwenera kuchita icho ntchakovwira panyengo iyo kuti mulimo wa Yehova uchitike.

14. Kasi Vlado wakasuzgika na kusintha wuli, ndipo chikamovwira ntchivichi?

¹⁴ Vlado, mulara wa vyaka 73 ku Slovenia, vikamusuzga kugomezga apo mpingo wake ukasazgika na mpingo unyake ndipo Nyumba ya  Ufumu iyo wakawunganangamo yikajalika. Iyo wakuti: “Nkhapulikiska yayi chifukwa icho Nyumba ya Ufumu yakutowa nthena yingajalikira. Vikaniŵinya chifukwa chakuti tikaŵa kuti tayinozga waka nyumba iyi. Ndine kalipentara, ndipo nkhakhomako vinyake mwa vinthu viphya ivyo vikaŵamo. Chinyake ntchakuti, pakusazga uku pakaŵa vinthu vinandi ivyo tikakhumbikwiranga kusintha, chinthu icho chikaŵa chipusu yayi ku taŵapharazgi ŵalara msinkhu.” Kasi ntchivichi chikamovwira Vlado kukolerana na ulongozgi uwu? Iyo wakuti: “Para nyengo zose tikukolerana na ivyo vyasintha mu gulu la Yehova tikusanga vitumbiko. Vinthu ivi vikutovwira kunozgekera kusintha kukuru uko kuzamuchitika munthazi.” Kasi vikumusuzgani kuzomerezga para mpingo winu wasazgika panji para uteŵeti winu wasintha? Manyani kuti Yehova wakumanya umo mukujipulikira. Para mukukolerana na ivyo vyasintha kweniso kulutilira kugomezgeka kwa Yehova na kudemelera ku gulu lake, mutumbikikenge chomene.—Sal. 18:25.

15. Kasi tingasungilira wuli maghanoghano ghithu para takumana na masuzgo mu mpingo?

¹⁵ Apo tikusendelera kuumaliro chomene wa mgonezi uwu, tikwenera kumanya kuti tingakumana na masuzgo mukati mu mpingo. Masuzgo agha ghangayezga kugomezgeka kwithu kwa Yehova. Ntheura tikwenera kusungilira maghanoghano ghithu. Usange mukuwona nga Mkhristu munyinu wandamuchitirani makora, kuchimbilira kukwiya yayi. Usange mwapika chilango, kughanaghanira umo soni zimukoleraninge yayi, pokelerani ulongozgi, ndipo sinthani apo mphakukhumbikwa. Ndipo para vinthu vyasintha mu gulu la Yehova ivyo vyamukhwaskani, zomerezgani waka na mtima wose ndipo pulikirani ulongozgi.

16. Kasi mungachita wuli kuti mulutilire kugomezga Yehova na gulu lake?

¹⁶ Mungalutilira kugomezga Yehova na gulu lake nanga ni para mwayezgeka. Kweni kuti muchite nthena, mukwenera kusungilira maghanoghano ghinu, kung’anamura kuti, mukhazike mtima winu pasi, mughanaghane makora, na kuwona vinthu umo Yehova wakuviwonera. Ŵikanipo mtima kusambira nkhani za ŵanthu awo ŵakuzunulika mu Baibolo awo ŵakatonda masuzgo ghakuyana waka na ghinu ndipo ghanaghanirani ivyo mungasambirako kwa iwo. Lombani Yehova kuti wamovwirani. Ndipo mungajipaturanga yayi ku mpingo. Para mwachita nthena, Satana wangamupatuskani yayi kwa Yehova na gulu lake, visuzge viti wuli.—Yak. 4:7.