NKHANI YAKUSAMBIRA 45
Umo Yehova Wakutovwilira Kufiska Uteŵeti Withu
“Ŵazamumanya nadi kuti ntchimi yikaŵa pakati pawo.” —EZEK. 2:5.
SUMU 67 “Pharazga Mazgu”
IVYO VILI MU NKHANI IYI a
1. Kasi tikwenera kukhazga vichi, ndipo tili na chigomezgo wuli?
TIKWENERA kukhazga kuti ŵanthu ŵatisuskenge apo tikuchita uteŵeti withu. Nakuti munthazi umu panji ndipo tisuskikenge chomene. (Dan. 11:44; 2 Tim. 3:12; Chivu. 16:21) Kweni tili na chigomezgo chose kuti Yehova watipenge wovwiri uwo tikukhumbikwira. Chifukwa wuli? Chifukwa ntchakuti kwamba kale, nyengo zose Yehova wakovwira ŵateŵeti ŵake kufiska uteŵeti wawo, nanga ungaŵa wakusuzga wuli. Chiyelezgero ni ntchimi Ezekiyeli. Tiyeni tiwone ivyo vikachitikira ntchimi iyi, iyo yikapharazgiranga Ŵayuda awo ŵakaŵa ku wuzga ku Babuloni.
2. Kasi Yehova wakati ŵanthu awo Ezekiyeli wamuŵapharazgira ŵali wuli, ndipo kasi tisambirenge vichi mu nkhani iyi? (Ezekiyeli 2:3-6)
2 Kasi ŵanthu awo Ezekiyeli wakeneranga kuŵapharazgira ŵakaŵa wuli? Yehova wakati mbanthu “ŵamtafu,” “ŵanonono mtima,” na “ŵakugaluka.” Ŵakaŵa ŵawemi yayi ŵanthu aŵa. Ŵakaŵa nga ni minga kweniso ŵakofya nga mbakalizga. Lekani mwakuwerezgawerezga Yehova wakaphalira Ezekiyeli kuti: “Ungopanga yayi.” (Ŵazgani Ezekiyeli 2:3-6.) Ezekiyeli wakafiska mulimo wakupharazga chifukwa (1) wakatumika na Yehova, (2) mzimu wa Chiuta ukamovwiranga, kweniso (3) Mazgu gha Chiuta ghakakhozganga chipulikano chake. Kasi vinthu vitatu ivi vikamovwira wuli Ezekiyeli? Ndipo ise vingatovwira wuli mazuŵa ghano?
EZEKIYELI WAKATUMIKA NA YEHOVA
3. Kasi ni mazgu wuli agho ghakwenera kuti ghakamukhozga Ezekiyeli, ndipo kasi Yehova wakamusimikizgira wuli kuti wamovwirenge?
3 Yehova wakaphalira Ezekiyeli kuti: “Nkhukutuma iwe.” (Ezek. 2:3, 4) Mazgu agha ghakwenera kuti ghakamukhozga Ezekiyeli. Chifukwa wuli? Tikukayika yayi kuti Ezekiyeli wakwenera kuti wakakumbuka kuti Yehova wakayowoyapo mazgu agha kwa Mozesi na Yesaya apo wakaŵasoranga kuŵa ntchimi zake. (Eks. 3:10; Yes. 6:8) Kweniso Ezekiyeli wakamanyanga umo Yehova wakawovwilira ntchimi ziŵiri izi, kufiska uteŵeti wawo nangauli ukaŵa wakusuzga. Ntheura apo Yehova wakaphalira Ezekiyeli kaŵiri kose kuti: “Nkhukutuma iwe,” ntchimi iyi yikaŵa na vifukwa vyakukwana vyakugomezgera kuti Yehova wayiwovwirenge. Kweniso Ezekiyeli wakalembaso kanandi waka mazgu ghakuti: “Mazgu gha Yehova ghakiza kwa ine.” (Ezek. 3:16) Ndiposo kanandi waka wakalemba kuti: “Mazgu gha Yehova ghakizaso kwa ine.” (Ezek. 6:1) Nadi, Ezekiyeli wakakhorwa kuti wakatumika na Yehova. Kweniso pakuŵa mwana wa wasembe, Ezekiyeli wakwenera kuti wakasambizgika na adada ŵake kuti kwamba kale, Yehova wakuziphalira ntchimi zake kuti waziwovwirenge. Mwachiyelezgero, Yehova wakaphalira Yisake, Yakhobe na Yeremiya kuti: “Ine nili nawe.”—Gen. 26:24; 28:15; Yer. 1:8.
4. Kasi ni mazgu wuli agho Ezekiyeli ghakwenera kuti ghakamupa nkhongono?
4 Kasi Yehova wakati Ŵaisrayeli ŵanandi ŵamuchita wuli na uthenga uwo Ezekiyeli wamuŵapharazgira? Yehova wakati: “Ŵa nyumba ya Israyeli ŵamukana kukupulikira, pakuti ŵakukhumba yayi kunipulikira.” (Ezek. 3:7) Ŵanthu pakukana kupulikira Ezekiyeli, ndikuti ŵakakananga Yehova. Ntheura mazgu agha ghakamusimikizgira Ezekiyeli kuti para ŵanthu ŵamumukana, chikung’anamura kuti iyo watondeka yayi pakuŵa ntchimi. Yehova wakamusimikizgiraso Ezekiyeli kuti para vyeruzgo ivyo wakupharazga vyafiskika, ŵanthu “ŵazamumanya nadi kuti ntchimi yikaŵa pakati pawo.” (Ezek. 2:5; 33:33) Tikukayika yayi kuti mazgu ghakupembuzga agha, ghakamupa Ezekiyeli nkhongono izo wakakhumbikwiranga kuti wafiske uteŵeti wake.
NASE MAZUŴA GHANO TILI KUTUMIKA NA YEHOVA
Nga ni Ezekiyeli, nase tingakumana na masuzgo ghakupambanapambana nga nkhususkika, kweni tikumanya kuti Yehova wali nase (Wonani ndime 5-6)
5. Kuyana na Yesaya 44:8, kasi ntchivichi chikutipa nkhongono?
5 Nase tikukhozgeka chomene pakumanya kuti tili kutumika na Yehova. Tikuwona kuti wakutichindika chomene pakutichema kuŵa “ŵakaboni” ŵake. (Yes. 43:10) Uwu ni mwaŵi wapadera chomene. Nga umo Yehova wakaphalilira Ezekiyeli kuti: “Ungopanga yayi,” nase wakutiphalira kuti: “Tingachitanga wofi chara.” Chifukwa wuli tikwenera yayi kopa ŵalwani ŵithu? Chifukwa ntchakuti nga umo vikaŵira kwa Ezekiyeli, nase tili kutumika na Yehova ndipo wakutovwira.—Ŵazgani Yesaya 44:8.
6. (a) Kasi Yehova wakutisimikizgira wuli kuti watovwirenge? (b) Kasi tikukhozgeka na kupembuzgika pakumanya vichi?
6 Yehova wakutisimikizgira kuti watovwirenge. Mwachiyelezgero, pambere Yehova wandayowoye kuti ndimwe ŵakaboni ŵane, iyo wakati: “Para ukwenda mu maji, niŵenge nawe, para ukwambuka milonga, yikubizgenge yayi. Para ukwenda pa moto, uphyenge chara, ndipo dimi la moto likuŵawurenge yayi.” (Yes. 43:2) Para tikupharazga, nyengo zinyake tikusangana na vyakujandizga vinandi ivyo tingaviyaniska na kututuka kwa maji, kweniso tikusangana na viyezgo vinonono ivyo tingaviyaniska na moto. Nangauli vili nthena, na wovwiri wa Yehova tikulutilira kupharazga. (Yes. 41:13) Nga umo vikaŵira mu mazuŵa gha Ezekiyeli, ŵanthu ŵanandi mazuŵa ghano ŵakukana uthenga uwemi. Kweni tikukumbuka kuti para iwo ŵakana uthenga withu, chikung’anamura kuti ise tatondeka yayi pakuŵa Ŵakaboni ŵa Chiuta. Tikupembuzgika na kukhozgeka, pakumanya kuti Yehova wakukondwa nase para tikulutilira kupharazga uthenga wake mwakugomezgeka. Mpositole Paulosi wakati: “Munthu waliyose wazamupoka njombe yake kuyana na mulimo wake.” (1 Kor. 3:8; 4:1, 2) Mudumbu munyake uyo wachita upayiniya kwanyengo yitali wakuti: “Nkhukondwa chomene kumanya kuti Yehova wakutumbika ivyo tikuyezgayezga kuchita.”
MZIMU WA CHIUTA UKAMUPA NKHONGONO EZEKIYELI IZO WAKAKHUMBIKWIRANGA
Ezekiyeli wakuwona mboniwoni ya gileta la Yehova, ndipo mboniwoni iyi yakhozga chigomezgo chake chakuti Yehova wamovwirenge kufiska uteŵeti wake (Wonani ndime 7)
7. Kasi mboniwoni iyi yikwenera kuti yikamovwira wuli Ezekiyeli wati waghanaghanirapo? (Wonani chithuzi cha pa chikopi.)
7 Ezekiyeli wakawona umo mzimu wa Chiuta uliri wa nkhongono. Mu mboniwoni, wakawona mzimu utuŵa ukovwira ŵangelo ŵankhongono, kweniso kovwira kwendeska makhwiro ghakuru gha gileta. (Ezek. 1:20, 21) Kasi Ezekiyeli wakajipulika wuli? Iyo wakalemba ivyo vikachitika, wakati: “Nkhati nawona, nkhasindamira pasi chisko chane.” Ezekiyeli wakazizwa chomene mwakuti wakawa pasi. (Ezek. 1:28) Pamanyuma, Ezekiyeli wati waghanaghanirapo pa mboniwoni yakuzizwiska iyi, yikwenera kuti yikakhozga chigomezgo chake kuti mzimu wa Chiuta umovwirenge kufiska uteŵeti wake.
8-9. (a) Kasi ntchivichi chikachitikira Ezekiyeli Yehova wakati wamuphalira kuti ‘wimilire’? (b) Kasi Yehova wakamukhozgaso wuli Ezekiyeli pakuti chigaŵa chake chakupharazgako chikaŵa chinonono?
8 Yehova wakaphalira Ezekiyeli kuti: “Mwana wa munthu, yimilira kuti niyowoye nawe.” Fundo iyi yikamupa nkhongono izo wakakhumbikwiranga kuti wawuke pasi apo wakawa. Ezekiyeli wakalemba kuti: “Mzimu ukanjira mwa ine na kuniyimika.” (Ezek. 2:1, 2) Kufuma panyengo iyi kweniso nyengo yose iyo wakachitiranga uteŵeti wake, Ezekiyeli wakalongozgekanga na “woko” la Chiuta, kung’anamura mzimu utuŵa wa Chiuta. (Ezek. 3:22; 8:1; 33:22; 37:1; 40:1) Mzimu wa Chiuta ukamupa nkhongono Ezekiyeli pa mulimo uwo wakapika, wakupharazgira ŵanthu ‘ŵamtafu’ ndiposo ‘ŵanonono mtima’ mu chigaŵa chake. (Ezek. 3:7) Yehova wakaphalira Ezekiyeli kuti: “Nazgora chisko chako kuŵa chinonono nga ni visko vyawo, ndiposo nkhope yako kuŵa yinonono nga ni nkhope zawo. Nazgora nkhope yako kuŵa nga ni libwe la dayamondi, kuŵa yinonono chomene kuluska libwe la sangalawe. Ungaŵawopanga chara panji kutenthema na visko vyawo.” (Ezek. 3:8, 9) Apa vikaŵa nga kuti Yehova wakuphalira Ezekiyeli kuti: ‘Ungazomerezganga yayi kuti vyakuchita vya ŵanthu ŵawakawaka vikuwezgere nyuma. Ine nikukhozgenge.’
9 Pamanyuma, mzimu wa Chiuta ukamunyamura Ezekiyeli na kuluta nayo ku chigaŵa chake chakupharazgako. Ezekiyeli wakalemba kuti: “Woko la Yehova likakhala mwankhongono pa ine.” Ntchimi iyi vikayitolera sabata kuti yimanye na kupulikiska uthenga uwo yikwenera kupharazga mwakuti yikapharazge mwachikanga. (Ezek. 3:14, 15) Kufuma apo, Yehova wakaphalira ntchimi yake iyi kuti yilute ku vidika. Ndipo kwenekuko, “mzimu ukanjira mwa iyo.” (Ezek. 3:23, 24) Apa sono Ezekiyeli wakanozgeka kwamba uteŵeti wake.
NASE MZIMU WA CHIUTA UKUTIPA NKHONGONO IZO TIKUKHUMBIKWIRA MAZUŴA GHANO
Nga umo vikaŵira kwa Ezekiyeli, kasi ntchivichi chikutovwira mazuŵa ghano kufiska uteŵeti withu? (Wonani ndime 10)
10. Kasi tikukhumbikwira wovwiri wuli kuti tifiske mulimo withu wakupharazga, ndipo chifukwa wuli?
10 Kasi ni wovwiri wuli uwo tikukhumbikwira kuti tifiske uteŵeti withu? Kuti tizgore fumbo ili, ghanaghanirani ivyo vikachitikira Ezekiyeli. Pambere wandambe mulimo wake wakupharazga, mzimu utuŵa ukamupa nkhongono izo wakakhumbikwiranga. Nga umo vikaŵira kwa Ezekiyeli, mazuŵa ghano napo, tingalutilira kuchita mulimo wakupharazga pekha para mzimu wa Chiuta ungatovwira. Chifukwa wuli? Chifukwa ntchakuti Satana wakurwa nase nkhondo mwakuti watondeske mulimo withu wakupharazga. (Chivu. 12:17) Mukawonero ka wunthu, tingawona nga tingafiska yayi kumutonda Satana. Kweni tikumutonda Satana kwizira mu mulimo wakupharazga. (Chivu. 12:9-11) Kasi tikumutonda wuli? Para tikupharazga tikulongora kuti tikumopa yayi Satana, ndipo nyengo yiliyose para tikupharazga Satana tikumutonda. Ipo tikusambirapo vichi pa fundo yakuti tikulutilira kupharazga nangauli tikususkika? Tikusambirapo kuti Yehova wakutipa nkhongono kwizira mwa mzimu wake utuŵa ndipo wakukondwa nase.—Mat. 5:10-12; 1 Pet. 4:14.
11. Kasi mzimu wa Chiuta utichitirenge vichi, ndipo tingachita wuli kuti tilutilire kuwupokera?
11 Kasi tikusambiraposo vichi para tikughanaghanira umo Yehova wakapira Ezekiyeli nkhongono izo wakakhumbikwiranga kuti wakapharazge? Tikusambirapo kuti mzimu wa Chiuta ungatipa nkhongono izo tikukhumbikwira kuti titonde suzgo lililose ilo tingakumana nalo mu uteŵeti. (2 Kor. 4:7-9) Ipo kasi tingachita wuli kuti tilutilire kupokera mzimu wa Chiuta? Tikwenera kufwilirapo kulomba, uku tikugomezga kuti Yehova wapulikenge malurombo ghithu. Yesu wakasambizga ŵasambiri ŵake kuti: “Lutilirani kulomba, . . . Lutilirani kupenja, . . . [Kweniso] lutilirani kukhung’uska.” Para tachita nthena, Yehova “wapelekenge mzimu utuŵa ku awo ŵakuwulomba.”—Luka 11:9, 13; Mil. 1:14; 2:4.
MAZGU GHA CHIUTA GHAKAKHOZGA CHIPULIKANO CHA EZEKIYELI
12. Kuyana na Ezekiyeli 2:9–3:3, kasi mpukutu ukafuma nkhu ndipo ukaŵa na vichi?
12 Mzimu wa Chiuta ukamupa Ezekiyeli chikanga icho wakakhumbikwiranga kuti wapharazge. Kweni padera pa mzimu wa Chiuta, mazgu gha Chiuta ghakamovwiraso kukhozga chipulikano chake. Mu mboniwoni, Ezekiyeli wakawona woko lakolera mpukutu. (Ŵazgani Ezekiel 2:9–3:3.) Kasi mpukutu ukafuma nkhu? Kasi ukaŵa na vichi? Kasi ukamovwira wuli Ezekiyeli? Tiyeni tiwone. Mpukutu ukafuma ku chitengo cha Chiuta. Yehova wakwenera kuti wakagwiliskira ntchito yumoza wa ŵangelo ŵanayi awo Ezekiyeli wakawona pakwamba, kuti wamupe mpukutu uwu. (Ezek. 1:8; 10:7, 20) Mpukutu uwu ukaŵa na uthenga wa Chiuta, ndipo ukasazgapo uthenga wa cheruzgo uwo Ezekiyeli wakeneranga kupharazgira ŵanthu ŵakugaluka awo ŵakaŵa ku wuzga. (Ezek. 2:7) Uthenga uwu ukalembeka kuseri na kuseri kwa mpukutu.
13. Kasi Yehova wakamuphalira Ezekiyeli kuti wachite vichi na mpukutu, ndipo chifukwa wuli ukaŵa wakunong’omera?
13 Yehova wakaphalira ntchimi yake kuti yirye mpukutu na “kuzuzga nthumbo yake.” Ezekiyeli wakapulikira, ndipo wakarya mpukutu wose. Kasi chigaŵa ichi cha mboniwoni chikang’anamurangachi? Ezekiyeli wakakhumbikwiranga kuwupulikiska makora uthenga uwo wamupharazga. Wakeneranga kuwugomezga uthenga uwo, mwakuti wakawupharazge mwakukhuka. Pamanyuma, chinthu chinyake chakuzizwiska chikachitika. Ezekiyeli wakawona kuti mpukutu “ukaŵa wakunong’omera nga ni uchi.” (Ezek. 3:3) Chifukwa wuli? Chifukwa kwa Ezekiyeli, mwaŵi wakwimira Yehova ukaŵa wakunong’omera, panji kuti wakukondweska chomene. (Sal. 19:8-11) Wakawonga chomene kuti Yehova wakamuzomerezga kumuteŵetera kuŵa ntchimi yake.
14. Kasi ntchivichi chikawovwira Ezekiyeli kuŵa wakunozgeka kuchita mulimo wake?
14 Pamanyuma, Yehova wakaphalira Ezekiyeli kuti: “Pulika mazgu ghane ghose agho nkhukuphalira, ndipo ughasunge mu mtima wako.” (Ezek. 3:10) Na ulongozgi uwu, Yehova wakaphalira Ezekiyeli kusunga mu mtima mazgu agho ghakalembeka mu mpukutu, na kughanaghanirapo chomene. Kuchita nthena kukakhozga chipulikano chake, kweniso kukamovwira kuti waŵe na uthenga wankhongono wakuti wakapharazgire ŵanthu. (Ezek. 3:11) Chifukwa chakuti uthenga wa Chiuta ukaŵa mu mtima wake kweniso pa mulomo wake, sono Ezekiyeli wakaŵa wakunozgeka kuchita mulimo wake na kuwufiska.—Yaniskani na Salimo 19:14.
MAZGU GHA CHIUTA GHAKUKHOZGA CHIPULIKANO CHITHU MAZUŴA GHANO
15. Kuti tilutilire kuzizipizga apo tikuchita uteŵeti withu, kasi tikwenera kusunga vichi mu mtima withu?
15 Kuti tilutilire kuzizipizga apo tikuchita uteŵeti withu, nase tikwenera kulutilira kukhozga chipulikano chithu na mazgu gha Chiuta. Tikwenera ‘kusunga mu mtima withu’ vyose ivyo Yehova wakutiphalira. Mazuŵa ghano Yehova wakuyowoya nase kwizira mu Mazgu ghake, Baibolo. Kasi tingachita wuli kuti Mazgu gha Chiuta ghalutilire kusintha maghanoghano ghithu, umo tikujipulikira kweniso kutikhukiska kuchita mulimo withu?
16. Kasi tikwenera kuchita vichi na Mazgu gha Chiuta, ndipo tingachita wuli kuti ghakhazikike mu mtima withu?
16 Nga umo vikuŵira kuti para tikurya chakurya na kusumba vikovwira kuti thupi lithu liŵe lankhongono, mwakuyana waka, para tikusambira Mazgu gha Chiuta na kughanaghanirapo, tikukhozga chipulikano chithu. Tikukumbuka sambiro ilo tikusambirapo lakukhwaskana na mpukutu. Yehova wakukhumba kuti tizuzge nthumbo zithu na Mazgu ghake, icho chikung’anamura kughapulikiska makora. Ndipo tingachita nthena para tikulomba, kughaŵerenga na kughanaghanirapo. Chakwamba, tikulomba kuti tinozgekereske mtima withu kuti tipokere maghanoghano gha Chiuta. Pamanyuma, tikuŵazga Baibolo. Kufuma apo, tikuyima dankha na kughanaghanirapo chomene pa ivyo taŵazga. Kasi para tachita nthena chichitikenge ntchivichi? Para tikughanaghanirapo chomene, tipulikiskengeso makora chomene Mazgu gha Chiuta ndipo tikhozgenge chipulikano chithu.
17. Chifukwa wuli ntchakuzirwa kughanaghanirapo pa ivyo tikuŵazga mu Baibolo?
17 Chifukwa wuli ntchakuzirwa kuŵazga Baibolo na kughanaghanirapo? Chifukwa ntchakuti kukutovwira kuŵa na nkhongono izo tikukhumbikwira, kuti tipharazge uthenga wa Ufumu sono, kweniso uthenga wa cheruzgo uwo uli nga ni vula ya malibwe, uwo tipharazgenge panthazi apa. Kweniso para tikughanaghanirapo pa mikhaliro yakukondweska ya Yehova, ubwezi withu na iyo ukukhora chomene kuluska kumasinda kose. Ndipo ivi vikutovwira kuti tiŵe na chinthu chiwemi chomene panji kuti chakukondweska icho ni mtende wa mu mtima kweniso kuŵa wakukhorwa.—Sal. 119:103.
TILUTILIRENGE KUZIZIPIZGA APO TIKUCHITA UTEŴETI WITHU
18. Kasi ŵanthu mu chigaŵa chithu ŵazamumanya vichi, ndipo chifukwa wuli?
18 Mwakupambana na Ezekiyeli, ise ndise ntchimi yayi. Ndipouli, taŵikapo mtima kulutilira kupharazga uthenga wa Yehova uwo uli mu Mazgu ghake, m’paka apo mulimo uwu uzamumalira panji kuti apo Yehova wazamukhorwera. Para nyengo ya cheruzgo yakwana, ŵanthu ŵa mu chigaŵa chithu ŵazamuŵavya pakugwenthera kuti ŵakachenjezgeka yayi, kweniso kuti Chiuta wakaŵaghanaghaniranga yayi. (Ezek. 3:19; 18:23) M’malo mwake, ŵazamumanya kuti uthenga uwo tikapharazganga ukafumanga kwa Chiuta.
19. Kasi ntchivichi chitipenge nkhongono zakufiskira uteŵeti withu?
19 Kasi ntchivichi chitipenge nkhongono zakufiskira uteŵeti withu? Ni vinthu vitatu ivyo vikawovwira Ezekiyeli kuŵa na nkhongono. Tikulutilira kupharazga chifukwa tikumanya kuti tili kutumika na Yehova, mzimu wa Chiuta ukutipa nkhongono izo tikukhumbikwira, kweniso tikukhozgeka na Mazgu gha Chiuta. Nadi, na wovwiri wa Yehova, tilutilirenge kufiska uteŵeti withu na kuzizipizga “m’paka kuumaliro.”—Mat. 24:13.
SUMU 65 Limbikirani!
a Mu nkhani iyi tiwonenge vinthu vitatu ivyo vikawovwira ntchimi Ezekiyeli kufiska mulimo wake wakupharazga. Apo tikuwona umo Yehova wakawovwilira ntchimi yake iyi, tikhozgenge chigomezgo chithu chakuti nase Yehova watovwirenge kufiska uteŵeti withu.