1-2. (a) Kasi ni mafumbo wuli agho tidumbiskanenge? (b) Kasi ntchivichi chikulongora kuti Yehova ngwakukhumbisiska chomene kutovwira?

 YEHOVA wangatovwira kuzizipizga masuzgo agho tikusangana nagho pa umoyo withu kweniso kuŵa na chimwemwe apo tikuchita uteŵeti withu. Kasi Yehova wakutovwira wuli? Ndipo kasi tingachita wuli kuti tipindurenge chomene na wovwiri uwo Yehova wakutipa? Mafumbo agha ghazgorekenge mu nkhani iyi. Ndipouli, pambere tindasande mafumbo agha, tiyeni tiwone dankha fumbo ili, lakuti: Kasi Yehova ngwakukhumbisiska nadi kutovwira?

² Lizgu ilo mpositole Paulosi wakagwiliskira ntchito mu kalata yake yakuluta ku Ŵahebere, lingatovwira kuzgora fumbo ili. Paulosi wakalemba kuti: “Yehova ni movwiri wane, nopenge chara. Kasi munthu wangachitachi kwa ine?” (Heb. 13:6) Buku linyake lakulongosora Baibolo likuti lizgu lakuti “movwiri,” nga umo lagwiliskikira ntchito pa vesi ili, likuyowoya za munthu uyo wakuchimbira mwaluŵiro kuti wakawovwire munthu uyo wakukhumbikwira wovwiri. Ghanaghanirani fundo iyi, Yehova wakuchita kuchimbira kuti waponoske munthu munyake uyo wali mu suzgo. Namwe mungazomerezga kuti fundo iyi yikulongora kuti Yehova ngwakukhumbisiska chomene kuti watovwire. Pakuti Yehova wali ku chigaŵa chithu, tingazizipizga masuzgo ghithu na chimwemwe.

3. Kasi ni nthowa wuli zitatu izo Yehova wakutovwilira kuzizipizga masuzgo ghithu na chimwemwe?

³ Kasi ni nthowa wuli zinyake izo Yehova wakutovwilira kuzizipizga masuzgo ghithu na chimwemwe? Kuti tizgore fumbo ili, tiyeni tiŵazge chigaŵa chinyake cha buku la Yesaya. Chifukwa wuli? Chifukwa ntchakuti mauchimi ghanandi agho Yesaya wakalemba mwakovwirika na mzimu, ghakukhwaska ŵateŵeti ŵa Chiuta mazuŵa ghano. Kweniso kanandi Yesaya  wakulongosora Yehova na mazgu ghakuti tingaghapulikiska mwambura kusuzga. Mwachiyelezgero, Yesaya chaputara 30. Mu chaputara ichi, Yesaya wakayowoya viyelezgero vyakukondweska chomene kuti walongosore umo Yehova wakovwilira ŵanthu ŵake. Wakalemba kuti Yehova wakutovwira (1) pakutitegherezga chomene na kuzgora malurombo ghithu, (2) pakutilongozga, ndiposo (3) pakutitumbika sono kweniso munthazi. Tiyeni tidumbiskane nthowa zitatu izi izo Yehova wakutovwilira.

4. (a) Kasi Yehova wakati Ŵayuda ŵa mu nyengo ya Yesaya ŵakaŵa wuli? (b) Kasi awo ŵakaŵa ŵakugomezgeka Yehova wakaŵapa chigomezgo wuli? (Yesaya 30:18, 19)

⁴ Kukwambilira kwa Yesaya chaputara 30, Yehova wakulongosora Ŵayuda kuti “mbana ŵamtafu,” awo “ŵakusazga kwananga pa kwananga.” Iyo wakuyowoyaso kuti: “Mbanthu ŵakugaluka awo ŵakukhumba chara kupulika dango la Yehova.” (Yes. 30:1, 9) Chifukwa chakuti ŵanthu ŵakakana kupulikira, Yesaya wakayowoyerathu kuti Yehova wazamuzomerezga kuti ŵasangane na suzgo. (Yes. 30:5, 17; Yer. 25:8-11) Ndipo ŵakasangana nadi nalo suzgo, iwo ŵakatolekera ku wuzga na Ŵababuloni. Ndipouli, pakaŵa ŵanyake awo ŵakaŵa ŵakugomezgeka pakati pa Ŵayuda ndipo Yesaya wakaŵa na uthenga wa chigomezgo kwa iwo. Wakaŵaphalira kuti zuŵa linyake Yehova wazamuŵazomerezga kuti ŵawelereso ku Yerusalemu. (Ŵazgani Yesaya 30:18, 19.) Ndipo ivi ndivyo vikachitika nadi. Yehova wakaŵafwatura ku wuzga ku Babuloni. Ndipouli, pakajumpha vyaka vinandi pambere wandaŵafwature. Fundo yakuti “Yehova wakulindilira waka kuti wamulongorani uwemi,” yikulongora kuti nyengo yikeneranga kujumphapo pambere awo ŵakaŵa ŵakugomezgeka wandaŵafwature. Nakuti Ŵaisrayeli ŵakakhala vyaka 70 ku wuzga ku Babuloni, pambere ŵanyake ŵa iwo ŵandazomerezgeke kuwelera ku Yerusalemu. (Yes. 10:21; Yer. 29:10) Ŵati ŵawelera ku charu chawo, ŵakaŵaso ŵa chitima yayi nga umo ŵakaŵira ku wuzga. Kweniso sono ŵakaŵa ŵakukondwa chomene mwakuti ŵakathiska na masozi wuwo.

5. Kasi lemba la Yesaya 30:19 likutisimikizgira vichi?

⁵ Mazuŵa ghano tingakhozgeka na mazgu ghakuti: ‘Wazamukuchitira nadi lusungu pakupulika kulira kwako kuti wakovwire.’ (Yes. 30:19) Yesaya wakutisimikizgira kuti Yehova watitegherezgenge mwakupwelelera para tikulilira kwa iyo ndipo wazgorenge mwaluŵiro malurombo ghithu. Yesaya wakasazgiraposo kuti: ‘Para wapulika waka, wazamukuzgora.’ Mazgu ghakukhozga agha ghakutikumbuska kuti Adada ŵithu mbakukhumbisiska chomene kovwira awo ŵakuŵalomba wovwiri. Kumanya fundo iyi kukutovwira kuti tizizipizgenge masuzgo na chimwemwe.

6. Kasi mazgu gha Yesaya ghakulongora wuli kuti Yehova wakupulika lurombo lwa muteŵeti wake waliyose?

⁶ Kasi vesi ili likutisimikizgiraso vichi pa nkhani ya malurombo ghithu? Yehova wakutegherezga mwakupwelelera lurombo lwa waliyose payekha. Chifukwa wuli tikuyowoya nthena? Mu chiyowoyero chakwambilira icho Baibolo likalembekeramo, mavesi ghakwambilira mu Yesaya chaputara 30, ŵali kugwiliskira ntchito mazgu ghakulongora kuti ŵanthu mbanandi chifukwa Yehova wakayowoyanga na ŵanthu ŵake nga ni gulu. Kweni pa vesi 19 ŵali kugwiliskira ntchito mazgu agho ghakulongora kuti Yehova wakuyowoya na munthu waliyose payekha. Pakuŵa dada wachitemwa, wakumuphalira yayi mwana wake munyamata panji msungwana uyo wagongowa, kuti uŵenge wakukhora nga umo waliri mukuru wako panji mudumbu wako. M’malo mwake, wakupwelelera waliyose wa ise payekha kweniso kupulika lurombo lwa waliyose payekha.—Sal. 116:1; Yes. 57:15.

7. Kasi Yesaya na Yesu ŵakalongora wuli kuti ntchakukhumbikwa kukosera kulomba?

⁷ Para tamulomba Chiuta na kumuphalira suzgo lithu, nyengo zinyake Yehova wangatipa  waka nkhongono kuti tizizipizge suzgo lithu. Ndipo para suzgo lithu likumara yayi nga umo takhazgiranga, tingakhumbikwira kumuphaliraso Yehova kanandi waka kuti watipe nkhongono zakuzizipizgira. Nakuti iyo wakutipempha kuti ndimo tichitirenge. Ndipo fundo iyi yikukolerana na mazgu gha Yesaya agha ghakuti: “Mungamupumuzganga yayi [Yehova].” (Yes. 62:7) Kasi fundo iyi yikung’anamurachi? Yikung’anamura kuti tikwenera kukosera kulomba kwa Yehova, ndipo para tachita nthena viŵenge nga tikumuzomerezga yayi Yehova kupumura. Mazgu gha Yesaya agha ghakutikumbuska ntharika ya Yesu yakukhwaskana na lurombo iyo yili pa lemba la Luka 11:8-10, 13. Pa lemba ili Yesu wakutichiska kuti tikwenera “kukosera” kulomba kweniso ‘kulutilira kulomba’ mzimu utuŵa. Tingamulombaso Yehova kuti watipe ulongozgi uwo tikukhumbikwira, mwakuti tisankhe makora vinthu.

8. Mu nyengo yakale, kasi mazgu gha pa Yesaya 30:20, 21 ghakafiskika wuli?

⁸ Ŵazgani Yesaya 30:20, 21. Apo Ŵababuloni ŵakazingilizga Yerusalemu kwa chaka na hafu, ŵanthu ŵakasangana na masuzgo ghanandi mwakuti ghakafika pakuzgoŵereka nga umo tikuzgoŵelera chakurya na maji. Kweni mwakuyana na vesi 20 na 21, Yehova wakalayizga Ŵayuda kuti usange ŵapera na kusintha nkharo yawo, waŵaponoskenge. Yesaya wakati Yehova ni ‘Msambizgi wawo Mukuru,’ ndipo wakalayizga ŵanthu kuti Yehova waŵasambizgenge umo ŵangamusopera mwakuzomerezgeka. Mazgu agha ghakafiskika apo Ŵayuda ŵakafwatulika ku wuzga. Yehova wakalongora nadi kuti ni Msambizgi wawo Mukuru, ndipo pasi pa ulongozgi wake ŵanthu ŵakafiska kuwezgerapo kusopa kwaunenesko. Ndise ŵakutumbikika chomene kuti Yehova ndiyo ni Msambizgi withu Mukuru mazuŵa ghano.

9. Kasi ni nthowa wuli yimoza iyo mazuŵa ghano tikupokelera ulongozgi kufuma kwa Yehova?

⁹ Mu mavesi agha, Yesaya wakuyowoya kuti tili nga ŵasambiri awo ŵakusambizgika na Yehova mu nthowa ziŵiri. Chakwamba, Yesaya wakuti: “Namaso ghinu, muzamuwona Msambizgi winu Mukuru.” Mu chiyelezgero ichi, Yesaya wakuyowoya kuti Msambizgi wimilira kunthazi ku ŵasambiri ŵake. Tili na mwaŵi wapadera kuti Yehova wakutisambizga mazuŵa ghano. Kasi Yehova wakutisambizga wuli? Wakutisambizga kwizira mu gulu lake. Tikuwonga chomene chifukwa cha ulongozgi wakupulikikwa makora uwo tikupokera kufuma ku gulu la Yehova. Ulongozgi uwo tikupokera pa maungano gha mpingo, gha dera, gha chigaŵa, mu mabuku ghithu, kweniso pulogiramu ya mwezi na mwezi ya JW Broadcasting, na nthowa zinyake, ukutovwira kuzizipizga masuzgo na chimwemwe.

10. Kasi tikupulika ‘lizgu la Chiuta kumasinda kwithu’ munthowa wuli?

 ¹⁰ Yesaya wakuzunuraso nthowa yachiŵiri iyo Yehova wakutisambizgira, wakuti: “Makutu ghinu ghazamupulika lizgu kumasinda kwinu.” Apa ntchimi yikulongosora kuti Yehova wali nga ni msambizgi uyo wali maso chomene, ndipo wakwenda kumasinda kwa ŵasambiri ŵake kuŵalongora nthowa iyo ŵakwenera kwendamo. Mazuŵa ghano tikupulika lizgu la Chiuta kufuma kumasinda kwithu. Kasi tikupulika wuli? Mazgu gha Chiuta ghali kulembeka mu Baibolo nikale chomene, panji kuti nyengo yakumasinda chomene. Ntheura para tikuŵazga Baibolo, vikuŵa nga ni para tikupulika lizgu la Chiuta kufuma kumasinda kwithu.—Yes. 51:4.

11. Kuti tizizipizge masuzgo na chimwemwe, kasi tikwenera kuchita wuli, ndipo chifukwa wuli?

¹¹ Kasi tingachita wuli kuti tipindurenge mwakukwana na ulongozgi uwo Yehova wakupeleka kwizira mu gulu lake na Mazgu ghake? Wonani kuti Yesaya wakayowoya vinthu viŵiri. Chakwamba, “nthowa ni iyi.” Chachiŵiri, “endaninge mwenemumo.” (Yes. 30:21) Ntchakukwana yayi kumanya waka “nthowa.” Kweni tikweneraso ‘kwenda mwenemumo.’ Kwizira mu Mazgu gha Yehova kweniso ivyo gulu lithu likulongosora, tikusambira ivyo Yehova wakukhumba. Kweniso tikusambira umo tingalondezgera ivyo tasambira. Kuti tizizipizge na chimwemwe apo tikuchita uteŵeti withu kwa Yehova, tikwenera kuchita vinthu viŵiri ivyo Yesaya wakayowoya. Pekha para tachita nthena, ndipo tingaŵa na chigomezgo chose kuti Yehova watitumbikenge.

12. Kuyana na Yesaya 30:23-26, kasi Yehova wakaŵatumbika wuli ŵanthu ŵake?

¹² Ŵazgani Yesaya 30:23-26. Kasi uchimi uwu ukafiskika wuli ku Ŵayuda awo ŵakawelera ku Israyeli ŵati ŵafwatulika ku wuzga ku Babuloni? Ŵakatumbikika chomene mwakuthupi na mwauzimu wuwo. Yehova wakaŵapa vyakurya vinandi ŵanthu ŵake. Kweni chakuzirwa chomene ntchakuti wakaŵapa chakurya chinandi chauzimu, ndipo mwapachokopachoko kusopa kutuŵa kukawezgekerapo. Ŵanthu ŵa Chiuta ŵa mu nyengo iyi, ŵakaŵa kuti ŵandatumbikikepo nthena kufuma kwa Chiuta. Vesi 26 likulongora kuti Yehova wakaŵapa ungweru ukuru, kung’anamura kuti wakaŵawovwira kupulikiska Mazgu ghake. (Yes. 60:2) Vitumbiko ivyo Yehova wakapa ŵateŵeti ŵake, vikaŵawovwira kulutilira kumuteŵetera na chimwemwe, kweniso na chikanga “chifukwa cha kukondwa mu mtima.”—Yes. 65:14.

13. Kasi uchimi wakuwezgerapo kusopa kutuŵa ukufiskika wuli mazuŵa ghano?

¹³ Kasi uchimi wakukhwaskana na kuwezgerapo kusopa kutuŵa nase ukutikhwaska mazuŵa  ghano? Enya. Munthowa wuli? Kwambira mu 1919 C.E., ŵanthu mamiliyoni ghanandi ŵali kufwatuka ku wuzga wa Babuloni Mukuru uyo ntchinyina cha chisopa chautesi. Ndipo ŵali kunjira mu malo ghawemi chomene ghakuluska Charu cha Layizgano icho Ŵaisrayeli ŵakapokera. Ŵali kunjira mu paradiso wauzimu. (Yes. 51:3; 66:8) Kasi paradiso wauzimu uyu ni vichi?

14. Kasi paradiso wauzimu ni vichi, ndipo mbanjani awo ŵali mu paradiso uyu mazuŵa ghano? (Wonani Mazgu Ghalongosoreka.)

¹⁴ Kwambira mu 1919 C.E., ŵakuphakazgika ŵakusangwa kuŵa mu paradiso wauzimu. b Awo ŵali na chilindizga cha kuzakakhala pa charu chapasi, awo mba “mberere zinyake,” nawo ŵali kunjira mu paradiso wauzimu uyu ndipo ŵakusangwa na vitumbiko vinandi.—Yoh. 10:16; Yes. 25:6; 65:13.

15. Kasi paradiso wauzimu wali nkhu?

¹⁵ Kasi paradiso wauzimu wali nkhu mazuŵa ghano? Ŵateŵeti ŵa Yehova ŵakusangika mu vigaŵa vyose vya pa charu chapasi. Ntheura paradiso wauzimu uyo ŵalimo, waliso pa charu chose. Sono kwali tikukhala nkhu, nase tingaŵa mu paradiso wauzimu chikuru tikukhozgera kusopa kwaunenesko.

16. Kasi tingachita wuli kuti tilutilire kuwona kutowa kwa paradiso wauzimu?

¹⁶ Kuti tilutilire kuŵa mu paradiso wauzimu, tikweneraso kulutilira kuwonga chifukwa chakuŵa mu mpingo wa Ŵakhristu ŵaunenesko uwo uli pa charu chose. Kasi tingachita wuli? Tikwenera kuŵika mtima pa viwemi ivyo ŵabali na ŵadumbu ŵakuchita, pa maubudi ghawo yayi. (Yoh. 17:20, 21) Chifukwa wuli ntchakuzirwa kuchita nthena? Ghanaghanirani chiyelezgero ichi. Mu paki panji kuti mu nkhorongo yakutowa mukuŵa makuni gha mitundu yakupambanapambana. Mwakuyana waka, mu paradiso wauzimu uyo wali mu mipingo mazuŵa ghano, muliso ŵanthu ŵakupambanapambana awo ŵaliso nga ni mitundu yakupambanapambana ya makuni. (Yes. 44:4; 61:3) Ntheura tikwenera kuwoneseska kuti tikulutilira kuŵika mtima pa kutowa kwa “paki,” panji  kuti pa viwemi ivyo ŵabali na ŵadumbu ŵakuchita, pa maubudi ghawo yayi. Tingazomerezganga yayi kuti maubudi ghithu panji gha ŵanji mu mpingo ghatitondeske kuwona kutowa, panji kuti kukolerana uko kulipo pakati pa mpingo wa Ŵakhristu ŵaunenesko pa charu chose.

17. Kasi waliyose wa ise wakwenera kuchita vichi kuti mpingo ulutilire kuŵa wakukolerana?

¹⁷ Kasi waliyose wakwenera kuchita vichi kuti mpingo ulutilire kuŵa wakukolerana? Waliyose wakwenera kukhuŵilizga mtende. (Mat. 5:9; Rom. 12:18) Nyengo yiliyose para tachitapo kanthu kuti tikhuŵilizge mtende na ŵanji mu mpingo, tikovwira kuti paradiso wauzimu walutilire kuŵa wakutowa. Tikukumbuka kuti Yehova ndiyo wali kuguzira waliyose mu paradiso wauzimu kuti wachite kusopa kutuŵa. (Yoh. 6:44) Ghanaghanirani umo Yehova wakukondwera para wakuwona kuti tikuŵikapo mtima kukhozgera mtende na umoza pakati pa ŵateŵeti ŵake awo mbakuzirwa chomene kwa iyo.—Yes. 26:3; Hag. 2:7.

18. Kasi kanandi tikwenera kughanaghanirapo vichi, ndipo chifukwa wuli?

¹⁸ Kasi tingachita wuli kuti tipindurenge mwakukwana na vitumbiko ivyo tikupokera kufuma kwa Chiuta? Tikwenera kughanaghanirapo chomene pa ivyo tikusambira mu Mazgu gha Chiuta na mabuku ghithu ghakulongosora Baibolo. Para tichitenge nthena, vitovwirenge kuti tiŵe na mikhaliro Yachikhristu iyo yitichiskenge kutemwa ŵabali na ŵadumbu na mtima wose “nga umo ŵanthu ŵakutemwerana paubali.” (Rom. 12:10) Para tikughanaghanirapo pa vitumbiko ivyo tikusanga sono, tikukhozga ubwezi withu na Yehova. Ndipo para tikughanaghanirapo pa vitumbiko ivyo Yehova watisungira munthazi, tisungilirenge chigomezgo chithu chakumuteŵetera kwamuyirayira kuŵa chanadi. Vyose ivi vitovwirenge kuti titeŵetere Yehova na chimwemwe sono.

19. (a) Kuyana na Yesaya 30:18, kasi tili na chigomezgo wuli? (b) Kasi ntchivichi chitovwirenge kuti tizizipizge na chimwemwe?

¹⁹ Yehova ‘wazamuwuka’ chifukwa cha ise apo wazamuparanya charu chiheni ichi. (Yes. 30:18) Tili na chigomezgo chose kuti Yehova—“Chiuta waurunji”—wazomerezgenge yayi kuti charu cha Satana ichi chijumphe pa zuŵa ilo wali kutema. (Yes. 25:9) Tikulindilira mwakuzikira apo zuŵa la Yehova ili, ilo wazamuponoskera taŵanthu lizirenge. Panyengo yasono taŵikapo mtima kulutilira kuzirwiska mwaŵi wa lurombo, kusambira Mazgu gha Chiuta na kughalondezga, kweniso kughanaghanirapo pa vitumbiko ivyo tikusanga. Para tichitenge nthena, Yehova watovwirenge kuzizipizga masuzgo na chimwemwe apo tikumusopa.