NKHANI YAKUSAMBIRA 46
SUMU 49 Kukondweska Mtima wa Yehova
Kasi Ŵabali Mukunwekera Kuŵa Muteŵeti Wakovwira?
“Uyo wakupeleka wakukondwa chomene kuluska uyo wakupokera.”—MIL. 20:35.
FUNDO YIKURU
Nkhani iyi yichiskenge ŵabali ŵakubatizika kuti ŵanwekere na kufiska ivyo vikukhumbikwa kuti ŵaŵe ŵateŵeti ŵakovwira.
1. Kasi mpositole Paulosi wakaŵawonanga wuli ŵateŵeti ŵakovwira?
ŴATEŴETI ŵakovwira ŵakuchita milimo yakuzirwa mu mipingo. Lekani mpositole Paulosi wakaŵawonga ŵabali ŵakugomezgeka aŵa. Mwachiyelezgero, apo wakalembera kalata Ŵakhristu ŵa ku Filipi, wakatawuzga ŵateŵeti ŵakovwira pamoza na ŵalara.—Fil. 1:1.
2. Kasi mubali munyake zina lake Luis wakujipulika wuli na mulimo wake pakuŵa muteŵeti wakovwira?
2 Ŵabali ŵanandi ŵakubatizika kwali mbalara panji ŵawukirano, ŵakukondwa chomene kuteŵetera nga mbateŵeti ŵakovwira. Mwachiyelezgero, Devan wakaŵa na vyaka 18 apo wakimikikanga kuŵa muteŵeti wakovwira. Apo mubali munyake zina lake Luis, wakimikika kuŵa muteŵeti wakovwira uku wali na vyaka vya m’ma 50. Nayo wakujipulika nga umo ŵakujipulikira ŵanandi ndipo wakayowoya kuti: “Nkhuwona kuti ni mwaŵi ukuru kuteŵetera nga muteŵeti wakovwira, chomenechomene para nkhughanaghanira umo mpingo ukunilongolera chitemwa.”
3. Kasi tiwonenge mafumbo wuli mu nkhani iyi?
3 Usange ndimwe mubali wakubatizika ndipo mundaŵe muteŵeti wakovwira, kasi mungajiŵikira chilato ichi? Kasi ntchivichi icho chikwenera kumuchiskani kuti muchite nthena? Ndipo kasi ni vinthu wuli vya mu Malemba ivyo mukwenera kufiska? Mu nkhani iyi, tidumbiskanenge mazgoro gha mafumbo agha. Kweni chakwamba, tiyeni tidumbiskane mulimo wa muteŵeti wakovwira.
KASI MUTEŴETI WAKOVWIRA WAKUCHITA MULIMO WULI?
4. Kasi mulimo wa muteŵeti wakovwira ngwakuti wuli? (Wonaniso chithuzi.)
4 Muteŵeti wakovwira ni mubali wakubatizika uyo wakwimikika na mzimu utuŵa kuti wawovwire ŵalara kuchita milimo yakupambanapambana mu mpingo. Ŵateŵeti ŵanyake ŵakovwira ŵakuwoneseska kuti ŵapharazgi ŵali na chigaŵa chakukwana chakupharazgako kweniso mabuku ghakupharazgira. Ŵanyake ŵakovwirapo pa mulimo wakutozga na kunozga Nyumba ya Ufumu. Ŵateŵeti ŵakovwira ŵakuchitaso ulinda kweniso kupwelelera vyakukuzgira mazgu pa maungano gha mpingo. Milimo iyi njakuzirwa chomene. Kweni chakuluska vyose ntchakuti ŵateŵeti ŵakovwira mbanalume ŵakukhwima mwauzimu kweniso awo ŵakulondezga fundo za mu Baibolo pa umoyo wawo. Ndipo ŵakuŵatemwa chomene ŵabali na ŵadumbu. (Mat. 22:37-39) Kasi mubali wakubatizika wangachita wuli kuti waŵe wakwenelera kuŵa muteŵeti wakovwira?
Ŵateŵeti ŵakovwira ŵakuyezga Yesu pakujipeleka na mtima wose kuteŵetera ŵanji (Wonani ndime 4)
5. Kasi kunwekera chikung’anamurachi?
5 Baibolo likulongosora ivyo vikukhumbikwa kuti munthu wimikike kuŵa muteŵeti wakovwira. (1 Tim. 3:8-10, 12, 13) Mungaŵa wakwenelera kuŵa muteŵeti wakovwira para mungasambira vinthu ivi ndipo pamanyuma na kuyezgayezga kuvifiska. Kweni chakwamba, mukwenera kumanya dankha chilato icho mukukhumbira kuŵira muteŵeti wakovwira.
KASI NTCHIVICHI ICHO CHIKWENERA KUMUCHISKANI KUTI MUŴE MUTEŴETI WAKOVWIRA?
6. Kasi ntchivichi chikwenera kumuchiskani kuchita uteŵeti uliwose kuti movwire ŵabali na ŵadumbu? (Mateyu 20:28; wonaniso chithuzi.)
6 Ghanaghanirani Yesu Khristu uyo ntchiyelezgero chithu chiwemi chomene. Chilichose icho wakachitanga, wakachitanga chifukwa cha kutemwa Adada ŵake kweniso ŵanthu. Chitemwa ichi ndicho chikamuchiska kuti walimbikirenge na kuchita milimo iyo yikawonekanga yapasi mwakuti wawovwire ŵanji. (Ŵazgani Mateyu 20:28; Yoh. 13:5, 14, 15) Usange namwe chitemwa ndicho chimuchiskaninge, Yehova wamutumbikaninge na kumovwirani kuti mufiske chilato chinu chakuŵa muteŵeti wakovwira.—1 Kor. 16:14; 1 Pet. 5:5.
Kwizira mu chiyelezgero chake, Yesu wakusambizga ŵapositole kuteŵetera ŵanji mwakujiyuyura m’malo mwakukhumba maudindo ghapachanya (Wonani ndime 6)
7. Chifukwa wuli mubali wakwenera kugega kukhumba uteŵeti na chilato cha kujiwoneska waka?
7 Mu charu ichi, kanandi ŵanthu ŵakukhumba kuti ŵawonekenge ŵapachanya kuluska ŵanyawo. Kweni ndimo viliri yayi mu gulu la Yehova. Mubali uyo wakutemwa ŵanji nga umo Yesu wakachitiranga wakujiwona kuti ngwapachanya yayi kuluska ŵanji. Usange mubali wanthena wangimikika mu mpingo, ntchakuwonekerathu kuti wangachita yayi milimo iyo yikuwoneka yapasi mwakuti wapwelelere mberere zakuzirwa za Yehova. Wangawona kuti milimo iyo yikumwenelera iyo yayi. (Yoh. 10:12) Yehova watumbikengepo yayi waliyose uyo wakukhumba uteŵeti unyake chifukwa cha kujighanaghanira yekha panji wakukhumba kuwoneka kuti ngwakuzirwa kuluska ŵanji.—1 Kor. 10:24, 33; 13:4, 5.
8. Kasi Yesu wakaŵapa ulongozgi wuli ŵapositole ŵake?
8 Nanga mbasambiri ŵanyake ŵa Yesu, nyengo yinyake ŵakanwekerapo mauteŵeti ghanyake pa chifukwa chambura kwenelera. Ghanaghanirani ivyo mpositole Yakobe na Yohane ŵakachita. Ŵakapempha Yesu kuti wazakaŵape malo ghapachanya mu Ufumu wake. Yasu wakaŵalumbapo yayi pa ivyo ŵakapempha. M’malo mwake, wakaŵaphalira ŵapositole wose 12 kuti: “Waliyose uyo wakukhumba kuŵa mukuru pakati pinu waŵe muteŵeti winu. Ndipo uyo wakukhumba kuŵa wakwamba pakati pinu waŵe muzga wa mose.” (Mrk. 10:35-37, 43, 44) Ŵabali awo ŵakunwekera na chilato chiwemi kuti ŵateŵetere ŵanji ŵakuŵa thumbiko ku mpingo.—1 Tes. 2:8.
KASI NTCHIVICHI CHINGAMOVWIRANI KUTI MUNWEKERE CHOMENE?
9. Kasi mungachita wuli kuti munwekerenge chomene?
9 Tikukayika yayi kuti mukumutemwa Yehova ndipo mukukhumba kuteŵetera ŵanji. Kweni nyengo zinyake mungaŵavya khumbo lakuti muŵe ŵateŵeti ŵakovwira. Kasi ntchivichi chingamovwirani? Ghanaghanirani chimwemwe icho mungasanga chifukwa cha kuteŵetera ŵabali na ŵadumbu. Yesu wakati: “Uyo wakupeleka wakukondwa chomene kuluska uyo wakupokera.” (Mil. 20:35) Ndivyo Yesu wakachitanga ivyo vikuyowoyeka apa. Wakasanga chimwemwe chifukwa cha kuteŵetera ŵanji, ndipo namwe mungachisanga chimwemwe chanthena ichi.
10. Kasi Yesu wakalongora wuli kuti wakakondwanga kuteŵetera ŵanji? (Mariko 6:31-34)
10 Wonani chiyelezgero cha Yesu pa umo wakalongolera kuti wakakondwanga kuteŵetera ŵanji. (Ŵazgani Mariko 6:31-34.) Nyengo yinyake Yesu na ŵapositole ŵake ŵakavuka. Ŵakalutanga ku malo ghaŵekha kuti ŵakapumurepo. Kweni mzinda ukafika luŵiro pambere iwo ŵandafike ku malo agha, ndipo ukagomezganga kuti Yesu wawusambizgenge. Yesu wakatenge wakanenge chifukwa iyo na ŵapositole ŵake “ŵakaŵavya nyengo yakupumulira nanga njakulyera.” Panji wakatenge waŵawezgenge ŵanthu pamanyuma pakuŵasambizga vinthu vichoko waka. Kweni chifukwa cha chitemwa, “wakamba kuŵasambizga vinthu vinandi.” Ndipo wakalutilira kuŵasambizga m’paka ‘mise kwati kwazgelera.’ (Mrk. 6:35) Wakachita nthena, chifukwa chakuti wakakhumbikwiranga kuchita nthena yayi, kweni chifukwa chakuti ‘wakaŵalengera chitima.’ Wakakhumbanga kuŵasambizga chifukwa wakaŵatemwanga. Ndipo Yesu wakaŵa wakukondwa chomene chifukwa cha kuteŵetera ŵanji.
11. Kasi Yesu wakateŵetera wuli ŵanji? (Wonaniso chithuzi.)
11 Apo Yesu wakapharazgira mzinda, wakachita vinandi padera pa kuŵasambizga waka. Wakaŵapweleleraso mwakuthupi. Mwamunthondwe wakapangiska kuti pasangike chakurya chinandi ndipo pamanyuma wakaphalira ŵasambiri ŵake kuti ŵachigaŵe. (Mrk. 6:41) Pakuchita nthena wakasambizga ŵasambiri ŵake umo ŵangateŵetelera ŵanji. Wakalongoraso kuti milimo yakuteŵetera ŵanji, nga iyo ŵateŵeti ŵakovwira ŵakuchita, njakuzirwa. Ghanaghanirani umo ŵapositole ŵakwenera kuti ŵakakondwera kuteŵetera lumoza na Yesu pakuŵapa ŵanthu chakurya mwamunthondwe m’paka “wose ŵakarya na kukhuta.” (Mrk. 6:42) Ichi ntchiyelezgero chimoza cha umo Yesu wakalongolera kuti wakudangizga vyakukhumba vya ŵanji m’malo mwa vyake. Umoyo wake wose pa charu chapasi wakateŵetera ŵanji. (Mat. 4:23; 8:16) Yesu wakakondwanga chomene chifukwa cha kusambizga ŵanji na kuŵapwelelera pa ivyo ŵakakhumbikwiranga. Tikukayika yayi kuti namwe muŵenge ŵakukondwa chomene usange mujipelekenge na mtima wose kuteŵetera ŵanji nga muteŵeti wakovwira.
Kutemwa Yehova kweniso kuŵa na khumbo la kuteŵetera ŵanji kumuchiskaninge kuti mujipeleke kuchita mulimo uliwose mu mpingo (Wonani ndime 11) a
12. Chifukwa wuli waliyose wa ise wakwenera yayi kughanaghana kuti walije luso lulilose ulo wangawovwilira mpingo?
12 Usange mukuwona kuti mulije luso lulilose, kugongowa yayi. Tikukayika yayi kuti muli nayo mikhaliro iyo mungawovwilira ŵanji mu mpingo. Ghanaghanirani ivyo Paulosi wakalemba pa 1 Ŵakorinte 12:12-30 ndipo pamanyuma mulombani Yehova kuti wamovwirani kuwona umo fundo za pa lemba ili namwe zikumukhwaskirani. Mazgu gha Paulosi ghakulongora pakweru kuti nga umo viliri na muteŵeti waliyose wa Yehova, namwe ndimwe ŵakukhumbikwa ndipo muli ŵakuzirwa mu mpingo. Usange pasono mukufiska yayi ivyo vikukhumbikwa kuti muŵe muteŵeti wakovwira, kuwelera nyuma yayi. M’malo mwake, chitani vyose ivyo mungafiska kuti muteŵetere Yehova kweniso ŵanji. Manyani kuti ŵalara ŵakumughanaghanirani ndipo ŵamupaninge milimo mu mpingo mwakuyana na maluso ghinu.—Rom. 12:4-8.
13. Chifukwa wuli vinandi ivyo vikukhumbikwa kuti munthu waŵe wakwenelera kwimikika ni vyakuti munthu wangatondeka kufiska yayi?
13 Wonani chifukwa chinyake icho mukwenera kunwekera kuti muŵe ŵakwenelera kuŵa muteŵeti wakovwira: Vinandi ivyo vikukhumbikwa kuti munthu waŵe muteŵeti wakovwira vikukhwaskaso Ŵakhristu wose. Vili nthena chifukwa chakuti Ŵakhristu wose ŵakwenera kuŵa paubwezi na Yehova, ŵakwenera kuŵa ŵakupa, kweniso kuŵa chiyelezgero chiwemi. Kweni kasi mubali wakwenera kufiska vichi chomene kuti waŵe muteŵeti wakovwira?
IVYO MUBALI WAKWENERA KUFISKA
14. Kasi chikung’anamurachi kuŵa “ŵambura mawara”? (1 Timote 3:8-10, 12)
14 Tiyeni sono tiwone vinyake ivyo vikukhumbikwa kuti munthu waŵe wakwenelera kuŵa muteŵeti wakovwira ivyo vikuzunulika pa 1 Timote 3:8-10, 12. (Ŵazgani.) Muteŵeti wakovwira wakwenera kuŵa ‘wambura mawara.’ Mazgu agha ghangang’anamulikaso kuti “wakuti wangapika ntchindi” panji “wakuchindikika.” Ichi chikung’anamura kuti muleke kuseka yayi panji kuchita milangwe yakusekeska. (Muph. 3:1, 4) Ndipouli, para mwapika milimo kuyichita mwamaseŵera waka yayi. Usange ndimwe wakugomezgeka ndipo nyengo zose mukumalizga panyengo yake milimo iyo mwapika, ŵabali na ŵadumbu ŵamuchindikaninge mu mpingo.
15. Kasi chikung’anamurachi kuleka kuŵa “ŵa lulimi lwa paŵiri” kweniso kuleka ‘kusanga chandulo munthowa yauryarya’?
15 Kuŵa “ŵa lulimi lwa paŵiri yayi” chikung’anamura kuŵa ŵanenesko, kweniso ŵakugomezgeka. Mukuchita ivyo mwayowoya ndipo mukupusika ŵanji yayi. (Zinth. 3:32) ‘Kusanga chandulo munthowa yauryarya yayi’ chikung’anamura kuŵa ŵanenesko pa nkhani ya bizinesi kweniso umo mukuchitira pa nkhani ya ndalama. Ndipo mungasangirapo mwaŵi yayi pa ubwezi uwo muli nawo na Ŵakhristu ŵanyinu pakuchita vinthu mwauryarya na chilato chakuti musange ndalama.
16. (a) Kasi chikung’anamurachi kuŵa “ŵambura kutemwa vinyo linandi”? (b) Kasi chikung’anamurachi kuŵa na “njuŵi yituŵa”?
16 Kuŵa “ŵambura kutemwa vinyo linandi” chikung’anamura kuleka kumwa vinyo panji moŵa unandi panji kuŵa na lumbiri lwakuti ndimwe ŵaloŵevu. Kuŵa na “njuŵi yituŵa” chikung’anamura kulondezga fundo za mu Baibolo zuŵa na zuŵa. Nangauli muli ŵambura kufikapo, kweni muli na mtende wa mu mtima chifukwa cha kuŵa paubwezi uwemi na Chiuta.
17. Kasi mubali wangalongora wuli kuti ngwakugomezgeka apo ‘wakuyezgeka dankha usange ngwakwenelera’? (1 Timote 3:10; wonaniso chithuzi.)
17 ‘Kuyezgeka dankha usange muli ŵakwenelera’ chikung’anamura kuti mwalongora kale kuti mungachita makora milimo ndipo ŵangamugomezgani. Ntheura usange ŵalara ŵakumupani mulimo, londezgani mwakupwelelera ulongozgi wawo kweniso ulongozgi uwo gulu likupeleka. Woneseskani kuti mwapulikiska ivyo mukukhumbikwira kuchita kweniso apo mukwenera kumalizgira mulimo uwo. Apo mukufwilirapo kuchita makora mulimo uwo mwapika, ŵanji mu mpingo ŵawonenge ndipo ŵamuwonganinge chifukwa chakuti mukuluta panthazi. Ŵalara woneseskani kuti mukusambizga ŵabali ŵakubatizika. (Ŵazgani 1 Timote 3:10.) Kasi ŵalimo ŵabali ŵakubatizika mu mpingo winu awo ŵali na vyaka vya pakati pa 13 na 19 panji kukhilira apa? Kasi ŵakuchita sambiro lapaŵekha kweniso kunozgekera makora maungano? Kasi nyengo zose ŵakuzgorapo pa maungano kweniso kupharazga? Usange ni nthena, ŵapani mulimo wakuyana na msinkhu wawo kweniso umo vinthu viliri kwa iwo. Para muchitenge nthena, ŵabali ŵawukirano aŵa ‘ŵayezgekenge dankha usange mbakwenelera.’ Ivi viwovwirenge kuti para ŵakufika vyaka vyapakati pa 17 na 19 ŵaŵe ŵakwenelera kuŵa ŵateŵeti ŵakovwira.
Para ŵalara ŵakuŵapa milimo ŵabali ŵakubatizika, ndipo ‘ŵangaŵayezga usange mbakwenelera’ (Wonani ndime 17)
18. Kasi chikung’anamurachi kuŵa ‘ŵambura kafukwa’?
18 Kuŵa ‘ŵambura kafukwa’ chikung’anamura kuti palije waliyose uyo wangatipanikizgira kuti tachita kwananga kukuru. Mbunenesko kuti nyengo zinyake Ŵakhristu ŵangaŵapusikira kuti ŵachita chinthu chinyake chiheni. Yesu ŵakamupusikizgira vinthu vyautesi, ndipo wakayowoyerathu kuti ŵalondezgi ŵake nawo ŵazamupusikizgirika. (Yoh. 15:20) Ndipouli, usange muli na makhaliro ghakutowa nga ni Yesu, muŵenge na lumbiri luwemi mu mpingo.—Mat. 11:19.
19. Kasi kuŵa “mfumu wa muwoli yumoza” kukusazgapo vichi?
19 “Mfumu wa muwoli yumoza.” Usange ndimwe ŵakutora, mukwenera kulondezga umo Yehova wakanozgera pakwamba pa nkhani ya nthengwa, kuti nthengwa nja pakati pa mwanalume yumoza na mwanakazi yumoza. (Mat. 19:3-9) Mwanalume Wachikhristu wakwenera kuchita uzaghali yayi. (Heb. 13:4) Kweni ichi chikusazgaposo vinandi. Mukwenera kuŵa ŵakugomezgeka kwa muwoli winu, kuphotokerana na mwanakazi munyake yayi.—Yobu 31:1.
20. Kasi mubali wakulongozga wuli makora ŵamunyumba yake?
20 “Wakulongozga makora ŵana ŵake na ŵamunyumba yake.” Usange ndimwe mutu wa mbumba, udindo winu mukwenera kuwuwona mwakupepuka yayi. Muchitiskenge kusopa kwa mbumba nyengo zose. Mupharazgenge lumoza na waliyose wa mu mbumba yinu umo mungafiskira. Movwirenge ŵana ŵinu kuŵa paubwezi wakukhora na Yehova. (Efe. 6:4) Mwanalume uyo wakupwelelera makora mbumba yake wakulongora kuti wangapweleleraso mpingo.—Yaniskani na 1 Timote 3:5.
21. Usange pasono ndimwe muteŵeti wakovwira yayi, kasi mukwenera kuchita vichi?
21 Ŵabali usange pasono ndimwe muteŵeti wakovwira yayi, chonde ŵazgani mwakupwelelera nkhani iyi na kulomba kwa Yehova kuti wamovwirani. Sambirani ivyo vikukhumbikwa kuti munthu waŵe muteŵeti wakovwira na kuyezgayezga kufiska vinthu ivi. Ghanaghanirani umo mukumutemwera Yehova kweniso ŵabali na ŵadumbu. Kuzgani khumbo linu la kuteŵetera ŵanji. (1 Pet. 4:8, 10) Namwe sangani chimwemwe icho munthu wakuŵa nacho chifukwa cha kuteŵetera ŵabali na ŵadumbu mu mpingo. Mphanyi Yehova watumbika kuyezgayezga kwinu kuti mufiske ivyo vikukhumbikwa kuti muŵe muteŵeti wakovwira.—Fil. 2:13.
SUMU 17 “Nkhukhumba”
a MAZGU GHAKULONGOSORA CHITHUZI: Kumazere, Yesu wakuteŵetera ŵasambiri ŵake mwakujiyuyura; kumalyero, muteŵeti wakovwira wakumovwira mubali muchekuru mu mpingo.
