Nkhani Yakusambira 33
“Awo Ŵakukupulika” Ŵazamuponoskeka
“Nyengo zose, uŵe maso na ivyo ukuchita na kusambizga. Ukhalilire mu vinthu ivi, chifukwa usange ukuchita vinthu ivi, ujiponoskenge wekha na awo ŵakukupulika.”—1 TIM. 4:16.
SUMU 67 “Pharazga Mazgu”
CHILATO CHA NKHANI IYI *
1. Kasi tose tikuŵakhumbira vichi ŵabali ŵithu awo Mbakaboni yayi?
MUDUMBU munyake zina lake Pauline * wakati: “Kufuma waka apo nkhasambilira unenesko, nkhakhumbisiskanga chomene kuti waliyose mu banja lane tizakaŵire lumoza mu Paradiso. Chomenechomene nkhakhumbanga mfumu wane, Wayne, na mwana withu msepuka kuti nawo ŵambe kuteŵetera Yehova.” Kasi muli na ŵabali ŵinu awo ŵakumumanya yayi Yehova? Nga ni Pauline, namwe mukwenera mukukhumba kuti ŵabali ŵinu ŵateŵetere Yehova.
2. Kasi tidumbiskanenge mafumbo wuli mu nkhani iyi?
2 Tingaŵachichizga yayi ŵabali ŵithu kuti ŵazomere makani ghawemi, kweni tingaŵawovwira kuti ŵaghanaghanirengepo na kuzomera uthenga wa mu Baibolo. (2 Tim. 3:14, 15) Chifukwa wuli tikwenera kupharazgira ŵabali ŵithu? Chifukwa wuli tikwenera kuŵapulikiska? Kasi tingawovwira wuli ŵabali ŵithu kuti ŵambe kutemwa Yehova nga umo ise tikuchitira? Ndipo kasi mpingo ungawovwirapo wuli?
CHIFUKWA WULI TIKWENERA KUPHARAZGIRA ŴABALI ŴITHU?
3. Kuyana na lemba la 2 Petrosi 3:9, chifukwa wuli tikwenera kupharazgira ŵabali ŵithu?
3 Sonosono apa, Yehova waparanyenge charu ichi. Ŵekha awo ŵali na “maghanoghano ghakwenelera umoyo wamuyirayira” ndiwo ŵazamupona. (Mil. 13:48) Tikumalira nyengo yinandi na nkhongono kupharazgira ŵanthu awo tikuŵamanya yayi. Ntheura ntchakawiro kuti tikukhumba ŵabali ŵithu nawo ŵateŵetere Yehova. Dada withu wachitemwa Yehova, “wakukhumba yayi kuti munyake waparanyike, kweni wakukhumba kuti wose ŵang’anamuke mtima.”—Ŵazgani 2 Petrosi 3:9.
4. Kasi tingaŵa na suzgo wuli para tikupharazgira ŵabali ŵithu?
4 Tikwenera kumanya kuti pali nthowa yakwenelera na yambura kwenelera yakupharazgira uthenga withu. Nangauli tingaŵa ŵaluso para tikupharazgira ŵanthu awo tikuŵamanya yayi, kweni nyengo zinyake ŵabali ŵithu tingaŵapharazgira mwakulasa.
5. Kasi tikwenera kukumbuka vichi pambere tindaŵapharazgire ŵabali ŵithu?
5 Taŵanandi para tingakumbuka umo tikapharazgira ŵabali ŵithu kakwamba, tingajipa mulandu, ndipo tikuwona kuti mphanyi tikachita munthowa yinyake. Mpositole Paulosi wakaphalira Ŵakhristu kuti: “Ivyo mukuyowoya viŵenge vyakukondweska nyengo zose, vyakulungika na mchere, mwakuti mumanye umo mukwenera kuzgolera waliyose.” (Kol. 4:5, 6) Ntchakuzirwa chomene kukumbuka ulongozgi uwu para tikuyowoya na ŵabali ŵithu. Para tingatondeka, tingaŵakhuŵazga m’malo mwa kuŵawovwira kuti ŵatitegherezge.
KASI TINGACHITA WULI KUTI TOVWIRE ŴABALI ŴITHU?
Para mukuŵapulikiska ŵabali ŵinu na kuŵalongora nkharo yiwemi mungaŵawovwira chomene (Wonani ndime 6-8) *
6-7. Chifukwa wuli tikwenera kumupulikiska munyithu wa mu nthengwa uyo ngwambura kugomezga? Yowoyani chiyelezgero.
6 Ŵapulikiskani. Pauline uyo tamuzunura kukwambilira wakati: “Pakwamba, nkhakhumbanga kuti para nkhuyowoyeskana na mfumu wane, viŵenge vyakukhwaskana na Chiuta na Baibolo pera. Tikachezgangapo yayi nkhani ‘zinyake.’” Ndipouli, mfumu wa Pauline, Wayne, wakamanyanga vinandi yayi vya mu Baibolo ndipo wakapulikiskanga yayi ivyo Pauline wakayowoyanga. Iyo wakawonanga kuti muwoli wake wakaghanaghananga waka vya chisopa chake. Wakafipanga mtima kuti muwoli wake wakanjira kagulu kakofya ndipo kakamupusikanga.
7 Pauline wakazomerezga kuti kanandi nyengo yakumise panji mazuŵa gha Chisulo na Sabata, wakaŵanga na ŵabali na ŵadumbu ku maungano, mu upharazgi, panji ku ntchezgo za mpingo. Pauline wakati: “Nyengo zinyake mfumu wane Wayne wakasanganga kuti panyumba palije waliyose, ndipo wakaŵanga na phukwa.” Ntchakuwonekerathu kuti Wayne wakamusoŵanga chomene muwoli wake na mwana wake. Wakamanyanga yayi kuti ŵali na njani, ndipo wakawonanga kuti wakutemwa chomene ŵabwezi ŵake kujumpha iyo. Wayne wakamofya Pauline kuti wamazgenge nthengwa. Kasi mphanyi Pauline wakachita wuli kuti walongore kuti wakamupulikiskanga mfumu wake?
8. Kuyana na 1 Petrosi 3:1, 2, kasi ni vichi ivyo vingawovwira ŵabali ŵithu kukopeka na uthenga wa mu Baibolo?
8 Muŵe chiyelezgero chiwemi. Kanandi ŵabali ŵithu ŵakuwona chomene ivyo tikuchita m’malo mwa ivyo tikuyowoya. (Ŵazgani 1 Petrosi 3:1, 2.) Pamanyuma Pauline wakamanya fundo iyi. Iyo wakati: “Nkhamanya kuti Wayne wakutitemwa ndipo wakakhumbanga kumazga nadi nthengwa yayi. Kweni wati wanofya nkhamanya kuti nkhwenera kuchita ivyo Yehova wakuyowoya pa nkhani ya nthengwa. Nkhawona kuti chingaŵa makora kuti nisinthe m’malo mwa kumupharazgira waka.” Pauline wakaleka kumuchichizga mfumu wake vya kusambira Baibolo, ndipo wakamba kuchezga nayo nkhani zinyake waka. Wayne wakawona kuti muwoli wake wamba kuŵa na nkharo yiwemi kweniso mwana wawo wamba kupulikira. (Zinth. 31:18, 27, 28) Wayne wati wawona umo uthenga wa mu Baibolo wawovwilira banja lake, wakamba kunweka na uthenga wa mu Baibolo.—1 Kor. 7:12-14, 16.
9. Chifukwa wuli tikwenera kulutilira kovwira ŵabali ŵithu?
9 Lutilirani kovwira ŵabali ŵinu. Yehova ntchiyelezgero chiwemi. Mwakuwerezgawerezga wakuŵapa mwaŵi ŵanthu kuti ŵapulike makani ghawemi kuti ŵazakasange umoyo. (Yer. 44:4) Mpositole Paulosi wakaphalira Timote kuti walutilire kovwira ŵanji. Chifukwa wuli? Chifukwa para wachita nthena wajiponoskenge yekha na awo ŵakupulika. (1 Tim. 4:16) Tikuŵatemwa ŵabali ŵithu, ntheura tikukhumba kuti ŵamanye unenesko uwo uli mu Mazgu gha Chiuta. Pati pajumpha nyengo, mazgu na vyakuchita vya Pauline vikawovwira mbumba yake kumanya unenesko. Sono wakukondwa kuteŵetera Yehova pamoza na mfumu wake. Wose ŵaŵiri mbapayiniya, ndipo Wayne ni mulara mu mpingo.
10. Chifukwa wuli tikwenera kuzikira?
10 Zikirani. Para tamba kupulikira Chiuta, tikusintha umoyo withu na vigomezgo vithu, ndipo chingaŵa chakusuzga kuti ŵabali ŵithu ŵatipulikiske. Kanandi chinthu chakwamba icho ŵakuwona ntchakuti tikuchitako yayi maholide gha visopa na vya ndyali. Ŵabali ŵithu ŵanyake ŵangamba kutikwiyira. (Mat. 10:35, 36) Kweni tileke kughanaghana kuti ŵangasintha yayi. Usange taleka kovwira ŵabali ŵithu kuti ŵamanye ivyo tikugomezga, vingaŵa nga tikuŵeruzga kuti mbambura kwenelera umoyo wamuyirayira. Mulimo wakweruzga ngwithu yayi, Yehova wali kupeleka kwa Yesu. (Yoh. 5:22) Para tiŵenge ŵakuzikira, ŵabali ŵithu ŵazamutegherezga uthenga withu.—Wonani bokosi lakuti “ Gwiliskirani Ntchito Webusayiti Yithu Pakusambizga.”
11-13. Kasi tikusambirako vichi kwa Alice na umo wakachitira na ŵapapi ŵake?
11 Muŵe ŵalusungu kweni ŵambura kusunkhunyika. (Zinth. 15:2) Wonani ivyo wakachita Alice. Wakasambira unenesko apo wakaŵa kutali na ŵapapi ŵake awo ŵakaŵavya chigomezgo mwa Chiuta ndipo ŵakachitanga ndyali. Wakamanya kuti wakwenera kuŵaphalira mwaluŵiro ŵapapi ŵake vinthu viwemi ivyo wakasambiranga. Alice wakati: “Para mukulindizga kuti muzamuŵaphalira munthazi ŵamumbumba yinu ivyo mwamba kugomezga muzamuŵa nga mwaŵachiluska ndipo ŵazamukhuŵara chomene.” Wakaŵalemberanga makalata ŵapapi ŵake, kufumba maghanoghano ghawo pa nkhani zakupambanapambana za mu Baibolo izo wakawona kuti ŵangakondwa nazo, nga ni nkhani ya chitemwa. (1 Kor. 13:1-13) Wakaŵawonga ŵapapi ŵake chifukwa cha kumulera na kumupwelelera, ndipo wakaŵatumira vyawanangwa. Para wiza kuzakawona ŵapapi ŵake, wakaŵawovwiranga amama ŵake ntchito zapanyumba. Pakwamba ŵapapi ŵake ŵakakondwa yayi Alice wati waŵaphalira ivyo wamba kugomezga.
12 Apo Alice wakaŵa pa nyumba ya ŵapapi ŵake, wakaleka yayi kuŵazga Baibolo zuŵa lililose. Iyo wakati: “Ichi chikawovwira amama kumanya kuti Baibolo likaŵa lakuzirwa chomene kwa ine.” Nyengo yikati yajumphapo, adada ŵa Alice ŵakaghanaghana vya kusambira Baibolo kuti ŵamanye chifukwa icho mwana wawo wakasinthira vigomezgo vyake vyakale. Kweniso ŵakakhumbanga kuti Baibolo ŵalisange kafukwa. Alice wakati: “Nkhaŵapa Baibolo na kuŵalemberamo manosi.” Kasi chikachitika ntchivichi? M’malo mwakuti ŵasangemo kafukwa mu Baibolo, adada ŵa Alice ŵakakondwa chomene na ivyo ŵakaŵazga mu Baibolo.
13 Tikwenera kuŵa ŵalusungu na ŵambura kusunkhunyika, nanga tingasangana na masuzgo ghanandi. (1 Kor. 4:12b) Mwachiyelezgero, Alice wakeneranga kuzizipizga apo amama ŵake ŵakamususkanga. Iyo wakati: “Nati nabatizika amama ŵakaniphalira kuti ndine ‘mwana wambura kupulikira.’” Kasi Alice wakachita wuli? Iyo wakatiso: “Nkhaleka yayi kuyowoya vya chigomezgo chane icho nkhasambira, kweni nkhaŵalongosolera mwantchindi chifukwa icho nkhasankhira kuŵa Kaboni wa Yehova ndipo nkhaŵaphalira kuti nisinthenge yayi ivyo nkhasankha. Nkhaŵasimikizgira amama kuti nkhuŵatemwa chomene. Tose tikalira, paumaliro nkhaŵaphikira chakurya icho ŵakatemwanga. Kufuma waka apa, amama ŵakamba kuzomerezga kuti Baibolo likanovwiranga kuti niŵe munthu muwemi.”
14. Chifukwa wuli tikwenera yayi kuzomerezga ŵabali withu kutitondeska kuteŵetera Yehova?
14 Pangatora nyengo kuti ŵabali ŵithu ŵapulikiske chifukwa icho tikuwonera kuti ntchakuzirwa chomene kuteŵetera Yehova. Mwachiyelezgero, apo Alice wakasankha kwamba upayiniya m’malo mwa kupulikira ivyo ŵapapi ŵake ŵakakhumbanga kuti wachite pa umoyo wake, amama ŵake ŵakalira. Kweni Alice wakasintha yayi maghanoghano ghake. Alice wakati: “Para mwazomerezga kusintha ivyo mwasankha chifukwa cha ŵabali ŵinu, mbwenu ŵazamumupangiskani kuti musintheso pa vinthu vinyake. Kweni para mungaŵa ŵalusungu na ŵakukhora, mbwenu ŵanyake mu banja linu ŵangamutegherezgani.” Ivi ndivyo vikachitika kwa Alice. Ŵapapi ŵake sono ŵakuchita upayiniya, ndipo adada ŵake ni mubali mulara.
KASI TOSE MU MPINGO TINGAWOVWIRAPO WULI?
Kasi mpingo ungawovwira wuli mbumba izo ŵanyake Mbakaboni yayi? (Wonani ndime 15-16) *
15. Kuyana na Mateyu 5:14-16 na 1 Petrosi 2:12, kasi milimo yithu yiwemi yingawovwira wuli ŵabali ŵithu?
15 Yehova wakuguzira ŵanthu kwa iyo kwizira mu ‘milimo yiwemi’ ya ŵateŵeti ŵake. (Ŵazgani Mateyu 5:14-16; 1 Petrosi 2:12.) Usange mfumu panji muwoli winu ni Kaboni wa Yehova yayi, kasi wali kukumanapo na ŵabali na ŵadumbu mu mpingo winu? Pauline, uyo tamuzunura kukwambilira, wakachemera ŵabali na ŵadumbu kunyumba kwake kuti mfumu wake waŵamanye. Wayne wakukumbuka umo mubali yumoza wakamovwilira kuti wamanye unenesko wenecho wakukhwaskana na Ŵakaboni ŵa Yehova. Iyo wakuti: “Mubali uyu wakapempha holide ya zuŵa limoza ku ntchito kuti wazakawonelere nane lumoza bola. Apa ndipo nkhamanya kuti mubali uyu wakutemwaso kuchita vinthu vinyake padera pa kusopa.”
16. Chifukwa wuli ŵabali ŵithu tikwenera kuŵachemerako ku maungano ghithu?
16 Nthowa yimoza yiwemi chomene iyo tingawovwilira ŵabali ŵithu, nkhuŵachemerako ku maungano ghithu. (1 Kor. 14:24, 25) Wayne wakawungana kakwamba na Ŵakaboni ŵa Yehova panyengo ya Chikumbusko. Iyi yikaŵa nyengo yiwemi chifukwa wakaŵa kuti waŵeruka ku ntchito kweniso ungano uwu ukatora nyengo yichoko waka. Iyo wakati: “Nkhapulikiska yayi ivyo vikayowoyeka mu nkhani ya Chikumbusko. Kweni nkhukumbukira waka ivyo ŵanthu ŵakanichitira. Ŵakanipokelera makora chomene ndipo waliyose wakakorangako chasa. Nkhawona kuti mbanthu ŵawemi chomene.” Mbumba yinyake yikamulongora lusungu chomene Pauline, yikamovwiranga iyo na mwana wake pa maungano na mu uteŵeti. Ntheura apo Wayne wakakhumbanga kumanya vinandi vya chigomezgo icho Pauline wakasambira, wakapempha mubali wa mu mbumba iyo yikawovwiranga Pauline kuti wasambirenge nayo Baibolo.
17. Chifukwa wuli tikwenera yayi kujiyimba mulandu? Ndipo chifukwa wuli tikwenera yayi kuleka kuŵawovwira ŵabali ŵithu?
17 Tikugomezga kuti ŵabali ŵithu wose nawo ŵangamba kuteŵetera Yehova. Nangauli tikuyezgayezga kovwira ŵabali ŵithu kuti ŵaŵe ŵateŵeti ŵa Chiuta, kweni nyengo zinyake ŵangawukana unenesko. Usange ndimo viliri, tikwenera kujiyimba mulandu yayi chifukwa cha ivyo ŵasankha. Nakuti tingachichizga waliyose yayi kuti wazomere vigomezgo vithu. Kweni para ŵabali ŵithu ŵakuwona kuti tikukondwa chifukwa cha kuteŵetera Yehova, nawo ŵangakopeka. Ntheura muŵalomberenge. Muyowoyenge nawo mwamahara. Kuleka yayi kuŵawovwira. (Mil. 20:20) Gomezgani kuti Yehova wamutumbikaninge pakuyezgayezga kwinu. Para ŵabali ŵinu ŵangapulika ivyo mukuŵapharazgira, ŵazamuponoskeka.
SUMU 57 Kupharazgira Ŵanthu ŵa Mitundu Yose
^ ndime 5 Tikukhumba kuti ŵabali ŵithu ŵamanye Yehova, kweni ŵakwenera kusankha ŵekha kumuteŵetera panji yayi. Mu nkhani iyi tiwonenge umo tingachitira kuti ŵabali ŵithu awo Mbakaboni yayi ŵategherezge uthenga withu.
^ ndime 1 Mazina ghanyake mu nkhani iyi ghasinthika. Mu nkhani iyi mazgu ghakuti “ŵabali” ghakuyowoya za ŵabali ŵithu ŵakuthupi awo ŵandambe kuteŵetera Yehova.
^ ndime 53 MAZGU GHAKULONGOSORA CHITHUZI: Mubali muwukirano wakovwira adada ŵake awo Mbakaboni yayi kunozga galimoto. Pa nyengo yakwenelera wakuŵalongora vidiyo pa jw.org®.
^ ndime 55 MAZGU GHAKULONGOSORA CHITHUZI: Mudumbu wakutegherezga mfumu wake uyo ni Kaboni yayi apo wakulongosora umo wendera ku ntchito; pamanyuma wakusangwa pamoza na banja lake.
^ ndime 57 MAZGU GHAKULONGOSORA CHITHUZI: Mudumbu wachemera ŵabali na ŵadumbu ŵa mu mpingo wake ku nyumba yake kuti ŵamanyane mfumu wake uyo ni Kaboni yayi; pamanyuma, wiza ku Chikumbusko pamoza na muwoli wake.
