1. Mbanjani ŵakawovwira kupanga mpingo ku Filipi?

APO mpositole Paulosi, Sila, Luka, na Timote ŵakafika ku Filipi, ŵakasanga ŵanthu ŵanandi awo ŵakaŵa ŵakunweka na makani ghawemi. Ŵabali ŵanayi aŵa, ŵakawovwira kupanga mpingo uphya, ndipo ŵasambiri wose aŵa ŵakwenera kuti ŵakamba kuwungana ku nyumba ya mudumbu Lidiya uyo wakatemwanga kupokelera ŵalendo.—Mil. 16:40.

2. Kasi mpingo uphya uwu ukasangana na masuzgo wuli?

² Nyengo yichoko waka yikati yajumphapo, mpingo uphya uwu ukamba kusangana na masuzgo. Satana wakapangiska ŵanthu awo ŵakatinkhanga unenesko kuti ŵatimbanizge ntchito yakupharazga iyo Paulosi na ŵanyake ŵakachitanga. Paulosi na Sila ŵakakakika, ŵakadupulika na ndodo, na kuponyeka mu jele. Ŵati ŵafumiskika mu jele, ŵakaluta kukakhozga ŵasambiri ŵaphya. Kufuma apo, Paulosi, Sila, na Timote ŵakafumamo mu msumba uwu, kweni Luka ŵakamuleka kwenekuko. Kasi ŵabali na ŵadumbu ŵaphya aŵa vikaŵamalira wuli? Yehova wakaŵawovwira na mzimu wake, ndipo ŵakalutilira kumuteŵetera. (Fil. 2:12) Ntheura Paulosi wakakondwanga nawo chomene.

3. Kuyana na Ŵafilipi 1:9-11, kasi Paulosi wakalomba vichi?

³ Pati pajumpha vyaka pafupifupi 10, Paulosi wakalembera kalata mpingo wa Filipi. Apo mukuŵerenga kalata iyi, muwonenge kuti Paulosi wakaŵatemwanga chomene ŵabali aŵa. Wakalemba kuti: “Nkhukhumba chomene kumuwonani mose chifukwa nkhumutemwani nga umo Khristu Yesu  nayo wakumutemwerani.” (Fil. 1:8) Wakaŵaphalira kuti wakaŵalomberanga. Wakapempha Yehova kuti waŵawovwire kuti chitemwa chawo chilutilire kukura, ŵasande ivyo ni vinthu vyakuzirwa chomene, ŵaŵe ŵambura kafukwa, ŵaleke kukhuŵazga ŵanji, ndipo ŵalutilire kupambika vipambi vyaurunji. Nase mazgu gha Paulosi agha ghangatovwira mazuŵa ghano. Tiyeni tiŵazge mazgu agho Paulosi wakalembera Ŵafilipi. (Ŵazgani Ŵafilipi 1:9-11.) Pamanyuma tiwonenge fundo izo wakazunura na kudumbiskana umo tingazilondezgera.

4. (a) Kuyana na 1 Yohane 4:9, 10, kasi Yehova wakalongora wuli kuti wakutitemwa? (b) Kasi tikwenera kumutemwa Chiuta kufika mpha?

⁴ Yehova wakalongora chitemwa chake chikuru pakutuma Mwana wake kuti wazakatifwire chifukwa cha zakwananga zithu. (Ŵazgani 1 Yohane 4:9, 10.) Chitemwa cha Chiuta chikutituma kuti nase timutemwenge. (Rom. 5:8) Kasi tikwenera kumutemwa Chiuta kufika mpha? Yesu wakazgora fumbo ili apo wakaphalira Mufarisi kuti: “Utemwenge Yehova Chiuta wako na mtima wako wose na umoyo wako wose na maghanoghano ghako ghose.” (Mat. 22:36, 37) Tikwenera kutemwa Chiuta na mtima withu wose. Chitemwa chithu pa iyo chikwenera kukura zuŵa na zuŵa. Paulosi wakaphalira Ŵafilipi kuti ‘chitemwa chawo chikwenera kulutilira kukura chomene.’ Kasi tingachita wuli kuti timutemwenge chomene Chiuta?

5. Kasi tingachita wuli kuti chitemwa chithu chikure?

⁵ Tikwenera kumumanya makora Chiuta kuti timutemwe. Baibolo likuti: “Uyo walije chitemwa wandamumanye Chiuta, chifukwa Chiuta ntchitemwa.” (1 Yoh. 4:8) Mpositole Paulosi wakalongosora kuti usange ‘timumanyenge makora’ Chiuta tilutilirenge kumutemwa. (Fil. 1:9) Tikati tamba kusambira Baibolo, tikamba kumutemwa Chiuta nangauli tikamanyanga vinandi yayi vya iyo. Apo tikasambiranga vinandi vya iyo, tikamba kumutemwa chomene. Lekani ntchakuzirwa kuti tisambirenge Baibolo nyengo zose na kughanaghanirapo ivyo taŵazga.—Fil. 2:16.

6. Kasi lemba la 1 Yohane 4:11, 20, 21 likutisambizga vichi pa nkhani ya chitemwa?

⁶ Chitemwa chikuru cha Chiuta chitovwirenge kuti nase titemwenge ŵabali ŵithu. (Ŵazgani 1 Yohane 4:11, 20, 21.) Nyengo zinyake tingaghanaghana kuti ntchipusu waka kutemwa ŵabali na ŵadumbu ŵithu. Tingaghanaghana nthena chifukwa tikusopa Yehova, ndipo tikuyezgayezga kulondezga mikhaliro yake. Kweniso tikuyezga Yesu, uyo wakutitemwa chomene mwakuti wakapeleka umoyo wake chifukwa cha ise. Kweni nyengo zinyake chingaŵa chakusuzga kuti tilondezge dango lakuti titemwanenge yumoza na munyake. Wonani ivyo vikachitika mu mpingo wa ku Filipi.

7. Kasi tikusambirapo vichi pa ulongozgi uwo Paulosi wakapeleka kwa Yuwodiya na Sintike?

⁷ Yuwodiya na Sintike ŵakaŵa ŵadumbu ŵakulimbikira awo ŵakateŵeteranga lumoza na mpositole Paulosi. Kweni panyake ŵakapambana maghanoghano ndipo ŵakaŵaso paubwezi yayi. Mu kalata iyo wakalembera mpingo uwo ŵadumbu aŵa ŵakateŵeteranga, Paulosi wakazunura Yuwodiya na Sintike na kuŵapa ulongozgi kuti ŵaphemaneso. (Fil. 4:2, 3) Paulosi wakawona kuti ntchakwenelera kuphaliraso mpingo wose kuti: “Lutilirani kuchita vinthu vyose kwambura kudinginyika na kukwesana.” (Fil. 2:14) Tikukayika yayi kuti ulongozgi wa Paulosi wakudunjika uwu ukawovwira ŵadumbu ŵakugomezgeka  aŵa, kweniso mpingo wose kuti ŵalutilire kutemwana yumoza na munyake.

8. Kasi ntchivichi icho chingapangiska kuti chiŵe chakusuzga chomene kutemwa ŵabali, ndipo ntchivichi icho chingatovwira?

⁸ Nga umo vikaŵira na Yuwodiya na Sintike, nase tingatondeka kutemwa ŵanyithu chifukwa cha kulaŵiska waka maubudi ghawo. Tose tikubudiska. Para tikukhalira waka kulaŵiska pa maubudi gha ŵanji, chitemwa chithu pa iwo chizizimenge. Mwachiyelezgero, para mubali munyake waluwa kugwira nase ntchito ya kutozga Nyumba ya Ufumu, panji tingakhuŵara. Para tingamba kughanaghanira vyose ivyo mubali withu wakabuda kumasinda, tingakhuŵalirathu na kuleka kumutemwa mubali withu. Usange namwe muli na suzgo lakuyana waka, ntchiwemi kughanaghanirapo fundo yakuti: Yehova wakumanya ivyo ise tikubuda na ivyo mubali withu wakubuda. Ndipouli, tose Yehova wakutitemwa. Ntheura, nase tikwenera kumuyezga Yehova na kulutilira kuwona ivyo ŵabali ŵithu ŵakuchita makora. Para tikuŵikapo mtima kutemwa ŵabali ŵithu, tikuzgenge chitemwa chithu na kukolerana chomene.—Fil. 2:1, 2.

9. Kasi ni vinthu wuli vinyake “vyakuzirwa chomene” ivyo Paulosi wakazunura mu kalata iyo wakalembera Ŵafilipi?

⁹ Mzimu utuŵa ukawovwira Paulosi kuti wapeleke ulongozgi ku Ŵakhristu ŵa ku Filipi kuti ‘ŵasande ivyo ni vinthu vyakuzirwa chomene.’ Nase ndimo tikwenera kuchitira mazuŵa ghano. (Fil. 1:10) Vinyake mwa vinthu vyakuzirwa ivi ni kutuŵiskika kwa zina la Yehova, kufiskika kwa malayizgo ghake, kweniso mtende na kukolerana mu mpingo. (Mat. 6:9, 10; Yoh. 13:35) Usange vinthu ivi tikuviwona kuti ni vyakuzirwa nadi pa umoyo withu, tikulongora kuti tikumutemwa Yehova.

10. Kasi tikwenera kuchita vichi kuti Yehova watiwonenge ŵambura kafukwa?

¹⁰ Paulosi wakayowoyaso kuti tikwenera “kuŵa ŵambura kafukwa.” Ichi chikung’anamura kuti tikwenera kuŵa ŵakufikapo yayi. Ise tingaŵa ŵambura kafukwa nga umo Yehova Chiuta waliri yayi. Kweni Yehova watiwonenge ŵambura kafukwa para tikuchita vyose ivyo tingafiska pakukuzga chitemwa chithu na kusanda vinthu ivyo ni vyakuzirwa chomene. Nthowa yimoza iyo tikulongolera chitemwa chithu ni para tikuchita vyose ivyo tingafiska kuti tileke kukhuŵazga ŵanyithu.

11. Chifukwa wuli tikwenera yayi kukhuŵazga ŵanyithu?

¹¹ Ulongozgi wakuti tileke kukhuŵazga ŵanyithu ni chenjezgo kwa ise. Kasi tingakhuŵazga wuli ŵanji? Tingaŵakhuŵazga para tindasankhe makora vyakusanguluska, kavwaliro kithu, panji ntchito yithu. Nyengo zinyake ivyo tasankha vingaŵa viheni yayi pa ivyo vyekha. Kweni para vikukhuŵazga njuŵi za ŵanyithu mbwenu pali suzgo. Yesu wakayowoya kuti waliyose uyo wakhuŵazgenge yumoza wa mberere yake, chingaŵa makora kuti libwe lakusilira likakike mu singo yake ndipo wabizgike mu nyanja yakunyang’amira.—Mat. 18:6.

12. Kasi tikusambirako vichi ku ivyo ŵapayiniya ŵanyake ŵakachita?

¹² Wonani umo ŵapayiniya ŵanyake ŵakutorana ŵakalondezgera ulongozgi wa Yesu uwu. Ŵakateŵeteranga mu mpingo uwo banja linyake likaŵa kuti labatizika waka. Pambere ŵandatorane, ŵanthu aŵa ŵakakulira mu mbumba izo zikakhwimiskanga vinthu. Banja ili likagomezganga kuti Mkhristu wakwenera yayi kuwonelera filimu yiliyose. Ŵakazizwa chomene ŵati ŵamanya kuti ŵapayiniya aŵa ŵakawoneleranga filimu.  Kufuma apo, ŵapayiniya aŵa ŵakaleka dankha kuwonelera mafilimu m’paka apo banja liphya ili likakhwimira mwauzimu. (Heb. 5:14) Apa ŵapayiniya aŵa ŵakalongora kuti banja liphya ili ŵakalitemwanga mu mazgu pera yayi, kweni mu milimo.—Rom. 14:19-21; 1 Yoh. 3:18.

13. Kasi tingaŵapangiska wuli ŵanyithu kuti ŵachite kwananga?

¹³ Nthowa yinyake iyo tingakhuŵazgira ŵanyithu nkhuŵapangiska kuti ŵachite kwananga. Kasi ivi vingachitika wuli? Wonani chiyelezgero ichi. Msambiri wa Baibolo uyo wakamwanga chomene phere wakuyezgayezga kuti waleke. Wakuwona kuti wakwenera kulekerathu kumwa phere. Wakusintha vinthu vinandi pa umoyo wake na kubatizika. Nyengo yati yajumphapo, mubali wakumuchemera ku chiphikiro ndipo wakumupa phere. Wakumuphalira kuti: “Sono ndiwe Mkhristu; uli na mzimu wa Yehova. Chimoza mwa vipambi vya mzimu utuŵa nkhujikora. Usange ndiwe wakujikora, mbwenu mwapo pachoko waka.” Kasi mukughanaghana kuti chingachitika ntchivichi usange mubali uyu wangapulikira ulongozgi uheni uwu?

14. Kasi maungano ghakutovwira wuli kuti tilondezge ulongozgi uwo uli pa Ŵafilipi 1:10?

¹⁴ Maungano ghakutovwira umo tingalondezgera ulongozgi uwo uli pa Ŵafilipi 1:10 munthowa zinandi. Chakwamba, maungano ghakutikumbuska vinthu ivyo Yehova wakuwona kuti ni vyakuzirwa chomene. Chachiŵiri, pa maungano tikusambira umo tingachitira kuti tiŵe ŵambura kafukwa. Chachitatu, maungano ghakutichiska “kuti titemwanenge  na kuchita milimo yiwemi.” (Heb. 10:24, 25) Para ŵabali ŵithu ŵatichiskenge, chitemwa chithu pa Chiuta na ŵabali chikurenge chomene. Usange tikutemwa Chiuta na ŵabali ŵithu na mtima withu wose, tichitenge vyose ivyo tingafiska kuti tileke kuŵakhuŵazga.

15. Kasi ‘kuzuzgika na vipambi vyaurunji’ chikung’anamurachi?

¹⁵ Paulosi wakalombera Ŵafilipi kuti ‘ŵazuzgike na vipambi vyaurunji.’ (Fil. 1:11) Tikukayika yayi kuti vinyake mwa “vipambi vyaurunji” ivi vikaŵa chitemwa chawo pa Yehova na ŵanthu ŵake. Kweniso kuphalirako ŵanji za chipulikano chawo mwa Yesu ndiposo chilindizga chawo chiwemi. Pa Ŵafilipi 2:15 pakuyowoyaso fundo yinyake yakuti ‘muŵale nga ni miliko mu charu.’ Fundo iyi njakupulikikwa chifukwa Yesu wakaphalira ŵasambiri ŵake kuti “ndimwe ungweru wa charu.” (Mat. 5:14-16) Wakaŵaphaliraso kuti ‘ŵakazgore ŵanthu kuŵa ŵasambiri,’ ndipo wakati ŵazamuŵa ‘ŵakaboni ŵake ku vigaŵa vyakutali chomene vya charu chapasi.’ (Mat. 28:18-20; Mil. 1:8) Tikupambika “vipambi vyaurunji” para tikuchitako mwakukwana mulimo wakuzirwa uwu.

16. Kasi lemba la Ŵafilipi 1:12-14 likulongora wuli kuti tingaŵala nga ni miliko nangauli tingasangana na masuzgo? (Wonani chithuzi cha pa chikopi.)

¹⁶ Kwali vinthu viŵe wuli pa umoyo withu, tingalutilira kuŵala nga ni miliko. Nyengo zinyake, vinthu ivyo vingawoneka nga vikujandizga kupharazga makani ghawemi, vingatipa mwaŵi wakuti tipharazge. Mwachiyelezgero, mpositole Paulosi wakaŵa mu jele la panyumba apo wakalembanga kalata yakuluta ku Ŵafilipi. Nangauli wakaŵa mu jele, kweni wakaleka yayi kupharazgira ŵalinda ŵa jele na awo ŵakizanga kuzakamuwona.  Paulosi wakalimbikira kupharazga nangauli wakaŵa na masuzgo ghose agha, ndipo ivi vikawovwira ŵabali kuti ŵaŵe na chikanga ‘kuyowoya mazgu gha Chiuta kwambura wofi.’—Ŵazgani Ŵafilipi 1:12-14; 4:22.

17. Kasi ŵabali na ŵadumbu ŵanyake ŵakuchita wuli kuti ŵalutilire kupharazga nanga chingaŵa chakusuzga?

¹⁷ Ŵabali na ŵadumbu ŵithu ŵanandi ŵakulongora chikanga icho Paulosi wakalongora. Ŵakukhala mu vyaru ivyo ŵangapharazga yayi pakweru panji nyumba na nyumba, ntheura ŵakusanga nthowa zinyake kuti ŵapharazge makani ghawemi. (Mat. 10:16-20) Mu charu chinyake, mulaŵiliri wa dera wakasachizga kuti mupharazgi waliyose wapharazgirenge ŵabali ŵake, ŵazengezgani ŵake, awo wakusambira nawo sukulu, awo wakugwira nawo ntchito, na ŵabwezi ŵake. Mu vyaka viŵiri pera, chiŵelengero cha mipingo mu chigaŵa ichi chikasazgikira. Panji tikukhala mu charu icho ntchito yithu yakupharazga njakuzomerezgeka. Ndipouli, tingasambirako sambiro lakuzirwa ku ŵabali na ŵadumbu ŵithu aŵa, lakuti: Nyengo zose tipenjenge mipata iyo tingapharazgira, na kugomezga kuti Yehova watipenge nkhongono kuti tilutilire kupharazga nanga chingaŵa chakusuzga.—Fil. 2:13.

18. Kasi tikwenera kuŵikapo mtima kuchita vichi?

¹⁸ Sono ndipo tikwenera kuŵikapo mtima chomene kulondezga ulongozgi uwo tikuŵazga mu kalata ya Paulosi iyo wakalembera Ŵafilipi. Tikwenera kusanda vinthu ivyo ni vyakuzirwa chomene, kuŵa ŵambura kafukwa, kuleka kukhuŵazga ŵanji, na kupambika vipambi vyaurunji. Para tichitenge nthena, chitemwa chithu chilutilirenge kukura ndipo tipelekenge uchindami kwa Yehova, Dada withu wachitemwa.