1. Kasi Ŵakhristu ŵakwenera kuchita vichi kuti ŵamalizge chiphalizgano cha umoyo?

ŴAKHRISTU ŵali pa chiphalizgano cha umoyo. Kwali tamba waka kuchimbira panji tachimbira vyaka vinandi, tikwenera kulutilira kuchimbira m’paka tikajumphe pa mzere waumaliro. Ulongozgi uwo mpositole Paulosi wakapeleka ku Ŵakhristu ŵa ku Filipi ungatovwira kuti nase timalizge chiphalizgano. Ŵakhristu ŵanyake ku Filipi, ŵakaŵa kuti ŵateŵetera Yehova vyaka vinandi apo ŵakapokeranga kalata ya Paulosi. Ŵakaŵa kuti ŵakuteŵetera kale Yehova mwakugomezgeka, kweni Paulosi wakaŵakumbuska kuti ŵakwenera kulutilira kuzizipizga pakuchimbira. Wakakhumbanga ŵalutilire kumuyezga iyo, kuti ‘pakuchimbira ŵaŵenge na chilato.’—Fil. 3:14.

2. Chifukwa wuli ulongozgi uwo Paulosi wakapeleka ku Ŵafilipi ukaŵa wa panyengo yake?

² Ulongozgi wa Paulosi ukaŵa wa panyengo yake. Mpingo wa ku Filipi ukakumana na masuzgo ghanandi kufuma waka apo ukambira. Vyose ivi vikamba kufuma waka apo Paulosi wakapulikira mboniwoni iyo yikamuphalira kuti ‘ŵambukire ku Makedoniya.’ Paulosi na Sila ŵakafika ku Filipi mu 50 C.E. (Mil. 16:9) Ŵati ŵafika, ŵakasangana na mwanakazi munyake zina lake Lidiya, uyo “wakapulikizganga, ndipo Yehova wakajura mtima wake” kuti wapulikiske uthenga uwemi. (Mil. 16:14) Nyengo yichoko waka yikati yajumphapo, wakabatizika pamoza na ŵamunyumba yake. Nangauli vikaŵa nthena, Dyabulosi wakakhalapo waka chete yayi. Ŵanalume ŵa mu msumba ŵakatolera Paulosi na Sila ku ŵeruzgi ŵa msumba na kuŵapusikizgira kuti ŵakwambiska masuzgo. Ntheura, Paulosi na Sila ŵakatimbika, ŵakajalirika, ndipo pamanyuma ŵakaŵaphalira kuti ŵafumemo mu  msumba. (Mil. 16:16-40) Kasi ŵakathera? Yayi. Kasi ŵabali na ŵadumbu ŵa mu mpingo uphya ŵakachita wuli? Nawo ŵakazizipizga. Tikukayika yayi kuti ŵakakhozgeka chomene na ivyo Paulosi na Sila ŵakachita.

3. Kasi Paulosi wakamanya vichi, ndipo tizgorenge mafumbo wuli mu nkhani iyi?

³ Paulosi wakaŵikapo mtima kuti wazizipizgenge. (2 Kor. 4:16) Wakamanyanga kuti wakwenera kuŵa na chilato kuti wamalizge chiphalizgano. Kasi tikusambirako vichi kwa Paulosi? Kasi viyelezgero vya ŵanthu ŵakugomezgeka mazuŵa ghano vikulongora wuli kuti nase tingazizipizga para tasangana na masuzgo? Kasi malayizgo gha Yehova ghangatovwira wuli kuti tileke kugongowa?

4. Kasi Paulosi wakalongora wuli kuti ngwakulimbikira nangauli wakajalirika?

⁴ Ghanaghanirani umo vinthu vikaŵira kwa Paulosi apo wakalemberanga kalata Ŵafilipi. Wakaŵa pa jele la panyumba ku Romu. Wakaŵavya wanangwa wakuti wakapharazgenge. Ndipouli, wakatangwanikanga kupharazgira awo ŵakizanga kuzakamuwona na kulembera makalata mipingo yakutali. Mazuŵa ghano napo, Ŵakhristu ŵanandi awo ŵakutondeka kufumapo panyumba chifukwa cha masuzgo ghanyake, ŵakusangirapo mwaŵi kupharazgira ŵanthu awo ŵakwiza kuzakaŵawona. Ŵakulemberangaso makalata ŵanthu awo ntchakusuzga kukumana nawo.

5. Kuyana na Ŵafilipi 3:12-14, kasi ntchivichi chikawovwira Paulosi kuti wafiske chilato chake?

⁵ Paulosi wakazomerezga yayi kuti ivyo wakachita kumasinda, vimutimbanizge kuteŵetera Yehova. Lekani wakayowoya kuti “nkhuluwa vinthu vyakumasinda na kulimbikira kuti nisange vinthu vyakunthazi,” kung’anamura kuti wakeneranga kumalizga chiphalizgano. (Ŵazgani Ŵafilipi 3:12-14.) Kasi ni vinthu wuli ivyo vikatenge vimutimbanizgenge Paulosi? Chakwamba, wakaŵa wakumanyikwa chomene ku Ŵayuda chifukwa cha ivyo wakachita pambere wandaŵe Mkhristu. Kweni iyo wakawonanga vinthu ivi kuti “ni vyambura ntchito.” (Fil. 3:3-8) Chachiŵiri, nangauli pakwamba wakatambuzganga Ŵakhristu kweni wakazomerezga yayi kuti ivi vimutimbanizge kuteŵetera makora Yehova. Chachitatu, wakaghanaghanangapo yayi kuti wachita kale vinandi pakuteŵetera Yehova. Upharazgi ukamwenderanga makora chomene Paulosi nangauli wakajalirika, kutimbika, kudinyika na malibwe, ngalaŵa yikamubwangasukirapo, kweniso wakasoŵerwanga chakurya na vyakuvwara. (2 Kor. 11:23-27) Nangauli wakakumana na vyose ivi, kweniso kuti vinthu vikamwenderanga makora mu upharazgi, kweni Paulosi wakamanya kuti wakwenera kulutilira kuteŵetera Yehova. Nase tikwenera kuchita mwakuyana waka.

6. Kasi ni ‘vinthu wuli vinyake vyakumasinda’ ivyo tikwenera kuviluwa?

⁶ Tingamuyezga Paulosi para tingaluwa “vinthu vyakumasinda.” Ŵanyake ŵakusuzgika maghanoghano chifukwa cha zakwananga izo ŵakachitanga kumasinda. Para vili nthena, munganozga ndondomeko yakuti musambirenge pamwekha na kughanaghanirapo ivyo sembe ya Khristu yili kumuchitirani. Para musambirenge pamwekha, kughanaghanirapo, na kulomba, mbwenu mulekenge kusuzgika maghanoghano. Mulekenge kujipa mulandu na zakwananga izo Yehova wali kumugowokerani kale. Wonaniso ivyo tingasambirako kwa Paulosi. Ŵanyake ŵangaŵa kuti ŵali kuleka ntchito yapachanya kuti ŵateŵetere makora Yehova. Usange ni nthena, tingaluwa vinthu vyakumasinda para tingaleka kudokeraso vinthu ivyo tili kuvileka. (Maŵa. 11:4-6; Muph. 7:10) ‘Vinthu vinyake vyakumasinda’ vingaŵa ivyo tachita mu gulu la Yehova panji viyezgo  ivyo tatonda. Para tawona umo Yehova watitumbikira na umo watovwilira vyaka vinandi, tikuŵa nayo paubwezi wakukhora. Ndipouli, tikwenera yayi kughanaghana kuti ivyo tachita pakuteŵetera Yehova ni vyakukwana.—1 Kor. 15:58.

7. Kuyana na 1 Ŵakorinte 9:24-27, kasi tikwenera kuchita vichi kuti timalizge chiphalizgano cha umoyo?

⁷ Paulosi wakapulikiska mazgu gha Yesu ghakuti: “Limbikirani chomene.” (Luka 13:23, 24) Nga ni Khristu, Paulosi wakamanya kuti wakwenera kulimbikira chomene m’paka paumaliro. Lekani wakayelezgera umoyo wa Ŵakhristu na chiphalizgano. (Ŵazgani 1 Ŵakorinte 9:24-27.) Munthu uyo wali pa chiphalizgano wakuŵika maghanoghano pa mzere waumaliro, wakuŵika maghanoghano pa chinthu chinyakeso yayi. Tiyelezgere kuti munthu wakuchita maseŵero ghakuchimbira mu tawuni mbwenu wakwamba kusuŵilira kuwona vinthu vinyake uku wali pa chiphalizgano. Kasi mukughanaghana kuti munthu wanthena wangawina? Yayi. Pa chiphalizgano cha umoyo, nase tikwenera yayi kuchita vinthu ivyo vingatitimbanizga. Usange nyengo zose tikukumbuka chilato chithu na kulimbikira chomene nga umo wakachitira Paulosi, tizamupokera njombe.

8. Kasi tiwonenge vinthu wuli vitatu?

⁸ Sono tiyeni tiwone vinthu vitatu ivyo vingatigongoweska. Vinthu ivi ni: Usange ivyo takhazganga vindachitike, uchekuru, na masuzgo ghambura kukata. Tingasambirako ku ŵanyithu awo ŵali kusanganapo na masuzgo ghanthena agha.—Fil. 3:17.

9. Kasi nyengo zinyake tingachita wuli usange ivyo takhazganga vindachitike?

⁹ Usange ivyo takhazganga vindachitike. Tose tikulindilira vinthu viwemi ivyo Yehova wali kutilayizga. Lekani apo ntchimi ya Yehova, Habakuku, yikakhumbanga chomene kuti Yehova wawuskepo viheni vyose ivyo vikachitikanga mu Yuda, Yehova wakayiphalira kuti yikwenera ‘kulindilira nipera.’ (Hab. 2:3) Kweni nyengo zinyake para tikuwona kuti malayizgo gha Yehova ghakufiskika yayi, tingamba kugongowa. (Zinth. 13:12) Ivi ndivyo vikachitikira ŵabali ŵanyake mu 1914.  Panyengo iyi, Ŵakhristu ŵanandi ŵakuphakazgika ŵakakhazganga kuti ŵalutenge kuchanya. Kweni ivi vikati vyatondeka, kasi Ŵakhristu ŵakugomezgeka ŵakachita wuli?

10. Kasi mbumba yinyake yikachita wuli ivyo yikakhazganga vikati vyatondeka?

¹⁰ Wonani umo Ŵakhristu ŵaŵiri ŵakugomezgeka ŵakachitira ŵati ŵawona kuti ivyo ŵakakhazganga vindachitike. Mubali Royal Spatz wakabatizika mu 1908 apo wakaŵa na vyaka 20. Wakaŵa na chigomezgo chose kuti wakaŵa pafupi kuluta kuchanya. Mwakuti mu 1911 wakaphalira chibwezi chake Pearl, kuti: “Ukumanya kale ivyo vichitikenge mu 1914. Tingachita makora kuti titorane mwaluŵiro.” Kasi mbumba iyi yikaleka kuteŵetera Yehova chifukwa chakuti yikaluta yayi kuchanya mu 1914? Yayi, chifukwa chilato chawo chikaŵa chakuti ŵachite khumbo la Chiuta mwakugomezgeka, kupokera njombe yayi. Ŵakaŵikapo mtima kuzizipizga pakuchimbira chiphalizgano. Nakuti nadi, Royal na Pearl ŵakalutilira kugomezgeka m’paka apo ŵakamalizgira uteŵeti wawo wa pa charu chapasi. Tikukayika yayi kuti mukulindilira mwakunweka apo Yehova wazamuchindikira zina lake na kufiska ivyo wali kulayizga. Panyengo iyi ndipo wazamulongora kuti ndiyo ngwakwenelera kuwusa. Manyani kuti vinthu ivi vizamuchitika nadi mu nyengo yakwenelera iyo Yehova wali kuŵika. Apo tikulindilira nyengo iyo, tiyeni titangwanikenge chomene kuteŵetera Yehova. Tingaweleranga nyuma yayi usange ivyo takhazganga vindachitike.

11-12. Chifukwa wuli tingalutilira kuteŵetera Yehova mwakugomezgeka nanga tingachekura? Pelekani chiyelezgero.

¹¹ Uchekuru. Munthu uyo wakuchimbira pa chiphalizgano wakukhumbikwira nkhongono zinandi zakuthupi kuti wamalizge chiphalizgano. Kweni ise tikukhumbikwira nkhongono zakuthupi yayi kuti tilutilire kukura mwauzimu. Lekani ŵanandi awo nkhongono zamuthupi zili kuchepa, mbakukhumbisiska nipera kumuteŵetera Yehova mwakukwana. (2 Kor. 4:16) Mwachiyelezgero, apo Mubali Arthur Secord wakaŵa na vyaka 88 wakaŵa kuti wateŵetera kale pa Beteli vyaka 55. Panyengo iyi wakaŵa wakulwaralwara. Zuŵa linyake nesi uyo wakamupweleleranga wakiza pa bedi ilo mubali uyu wakagona. Wakalaŵiska mubali uyu na kumuphalira kuti: “Mubali Secord, mwachita vinandi chomene pakuteŵetera Yehova.” Kweni mubali uyu wakaghanaghaniranga chomene ivyo wakachita kumanyuma yayi. Wakamulaŵiska nesi uyu kumaso na kumwemwetera, ndipo wakati: “Ukuyowoya unenesko. Kweni kuti waka chakuzirwa ni ivyo tili kuchita yayi, chakuzirwa nkhulutilira kugomezgeka kwa Yehova.”

¹² Panji mwateŵetera Yehova vyaka vinandi ndipo sono mukutondeka kuchita vinandi nga umo mukachitiranga, chifukwa cha ulwari.  Para ni nthena, kugongowa yayi. Manyani kuti Yehova wakuluwa yayi viwemi vyose ivyo muli kuchita pakumuteŵetera. (Heb. 6:10) Kumbukani kuti tikulongora kuti tikutemwa Yehova chifukwa chakuti tachita vinthu vinandi mu gulu lake yayi. Kweni tikulongora kuti tikutemwa Yehova, para tili na maghanoghano ghakwenelera na kuchita vyose ivyo tingafiska. (Kol. 3:23) Yehova wakumanya ivyo tingafiska ndipo wakukhazga vinandi yayi kwa ise.—Mrk. 12:43, 44.

13. Kasi ivyo vikachitikira Anatoly na Lidiya vingatovwira wuli kuti tilutilire kuteŵetera Yehova, nangauli tili kuzizipizgapo kale masuzgo ghanandi?

¹³ Masuzgo ghambura kukata. Ŵateŵeti ŵa Yehova ŵanyake ŵakumana na masuzgo na kutambuzgika vyaka vinandi. Mwachiyelezgero, Anatoly Melnik * wakaŵa na vyaka 12 apo adada ŵake ŵakajalirikanga mu jele na kutumizgika ku Siberia. Pakaŵa mtunda wa makilomita 7,000 kufuma ku Moldova uko ŵakakhalanga kukafika ku Siberia. Chaka chimoza chikati chajumphapo, Anatoly, amama ŵake, asekuru na abuya ŵake, nawo ŵakatumizgika ku Siberia. Nyengo yikati yajumphapo, ŵakamba kuluta ku maungano mu muzi unyake, kweni ŵakendanga mtunda wa makilomita 30 nangauli kukazizimanga chomene. Pamanyuma, Mubali Melnik wakakhala vyaka vitatu mu jele kutali na muwoli wake, Lidiya, na kamwana kawo kasungwana ka chaka chimoza. Nangauli ŵakasuzgika vyaka vinandi, Anatoly na mbumba yake ŵakalutilira kuteŵetera Yehova mwakugomezgeka. Sono Anatoly wali na vyaka 82, ndipo wakuteŵetera mu Komiti ya Munthavi ku Central Asia. Nga ni Anatoly na Lidiya, mphanyi nase talutilira kuchita vyose ivyo tingafiska pakuteŵetera Yehova, na kulutilira kuzizipizga nga umo tikachitiranga kale.—Gal. 6:9.

14. Kasi Paulosi wakeneranga kuchita vichi kuti wafiske chilato chake?

¹⁴ Paulosi wakasimikizga kuti wamalizgenge chiphalizgano na kufiska chilato chake. Pakuŵa Mkhristu wakuphakazgika, wakalindiliranga kuti wapokere “njombe ya ntchemo yakuchanya iyo Chiuta wakupeleka.” Kweni kuti wafiske chilato chake wakamanya kuti wakwenera kulutilira ‘kuchimbira.’ (Fil. 3:14) Paulosi wakayowoya chiyelezgero cha kuchimbira pa chiphalizgano kuti wawovwire Ŵakhristu ŵa ku Filipi kuti ŵalutilire kuŵikapo mtima kufiska chilato chawo.

15. Kasi Paulosi wakayowoya za wenekaya wuli kuti wachiske Ŵakhristu ŵa ku Filipi kulutilira kulimbikira?

 ¹⁵ Paulosi wakaŵakumbuska Ŵakhristu ŵa ku Filipi za wenekaya wawo wa kuchanya. (Fil. 3:20) Chifukwa wuli ŵakeneranga kukumbuka? Panyengo iyi ŵanthu ŵakakhumbanga chomene kuŵa ŵenekaya ŵa Romu. * Ndipouli, Ŵakhristu ŵakuphakazgika ŵakaŵa na chikaya chawo chiwemi chomene icho ŵakalindiliranga. Wenekaya wa Romu ukaŵa wakuzirwa viŵi yayi pakuyaniska na wenekaya wakuchanya. Lekani Paulosi wakachiska Ŵafilipi kuti ŵalutilire ‘kukhala mwakwenelera makani ghawemi gha Khristu.’ (Fil. 1:27) Ŵakhristu ŵakuphakazgika mazuŵa ghano, ŵakulongora chiyelezgero chiwemi chifukwa ŵakulimbikira kuti ŵafiske chilato chawo cha kuzakapokera umoyo wamuyirayira kuchanya.

16. Kwali tizamukhala pa charu chapasi panji kuchanya, kasi tikwenera kulutilira kuchita vichi kuyana na Ŵafilipi 4:6, 7?

¹⁶ Kwali tizamupokera umoyo wamuyirayira pa charu chapasi panji kuchanya, tikwenera kulutilira kuchimbira kuti tifiske chilato chithu. Nanga tingasangana na masuzgo wuli, tingalaŵiskanga kumasinda chara panji kuzomerezga chilichose kutitimbanizga kuteŵetera Yehova. (Fil. 3:16) Panyake talindilira nyengo yitali malayizgo gha Yehova, panji tili ŵachekuru ndipo tikulwaralwara. Panji tasuzgika na kutambuzgika vyaka vinandi. Mulimose umo vingaŵira, ‘muleke kwenjerwa na chinthu chilichose.’ M’malo mwake, madandawuro ghinu ghamanyikwe kwa Chiuta ndipo wamupaninge mtende uwo ukuluska maghanoghano ghose.—Ŵazgani Ŵafilipi 4:6, 7.

17. Kasi tizamusambira vichi mu nkhani yakulondezgapo?

¹⁷ Munthu uyo wali pa chiphalizgano wakulimbikira chomene para wali pafupi kufika paumaliro. Mphanyi nase taŵikapo mtima kuti timalizge chiphalizgano cha umoyo. Tikwenera kuchita vyose ivyo tingafiska na nkhongono zithu na kulutilira kuŵikapo mtima kuti tizakawone malayizgo gha Yehova ghakufiskika. Kasi tingachita wuli kuti tilutilire kuzizipizga pa chiphalizgano? Nkhani yakulondezgapo yizamutovwira kumanya ivyo tikwenera kuŵika pakwamba na ‘kusanda ivyo ni vinthu vyakuzirwa chomene.’—Fil. 1:9, 10.