KASI pali uteŵeti uwo mukukhumba kuwuchita mu mpingo kweni mungawuchita yayi pasono? Panyake ni uteŵeti uwo wakuchita munthu munyake. Panji ni uteŵeti uwo mukachitanga kumasinda. Kweni panyake chifukwa cha uchekuru, ulwari, ukavu, panji udindo wa kupwelelera mbumba mukutondeka kuchita vinandi. Panyakeso muli kuleka uteŵeti uwo mukawuchita nyengo yitali chifukwa cha kusintha kwa vinthu mu gulu. Mulimose umo vingaŵira, nyengo zinyake mungajipulika kuti mukukwaniska yayi kuchita ivyo mukukhumba pakuteŵetera Yehova. Para vyaŵa nthena, ntchakupulikikwa kuti nyengo zinyake mungakhuŵara. Kweni kasi ntchivichi chingamovwirani kuti muleke kugongowa, kukwiya panji kukhuŵara? Kasi mungachita wuli kuti mulutilire kuŵa ŵakukondwa?

Tingalutilira kuŵa ŵakukondwa para tasangana na masuzgo usange tingasambirako kwa Yohane Mubatizi. Yohane wakachitanga uteŵeti wapadera, kweni wakamanyanga yayi kuti vinthu visinthenge mwamabuchi. Wakamanyanga yayi kuti wazamukhala mu jele nyengo yitali kuluska nyengo iyo wachitirenge uteŵeti wake. Kweni Yohane wakalutilira kuŵa wakukondwa umoyo wake wose. Kasi ntchivichi chikamovwira? Kasi nase tingachita wuli kuti tilutilire kuŵa ŵakukondwa nanga tingasangana na masuzgo?

Mu 29 C.E., Yohane wakamba uteŵeti uwo Yehova wakamupa wakumanyiska ŵanthu kuti kwizenge Mesiya, ndipo wakaŵaphaliranga kuti: “Ng’anamukani mtima, chifukwa Ufumu wakuchanya waneng’enera.” (Mat. 3:2; Luka 1:12-17) Ŵanandi ŵakawupokelera uthenga uwu. Mwakuti kukizanga ŵanthu ŵanandi kufuma kutali kuti ŵazakategherezge uthenga wake, ndipo ŵanandi ŵakasintha na kubatizika. Yohane wakachenjezgaso ŵalongozgi ŵavisopa awo ŵakajiwonanga nga mbarunji kuti ŵazamweruzgika para ŵalekenge kusintha. (Mat. 3:5-12) Chinthu chinyake chakuzirwa chomene icho Yohane wakachita pa uteŵeti wake ni apo wakabatiza Yesu kuumaliro kwa 29 C.E. Kufuma pa nyengo iyo, Yohane wakaphaliranga ŵanthu kuti ŵalondezgenge Yesu, Mesiya wakulayizgika.—Yoh. 1:32-37.

Pakuwona mulimo uwo Yohane wakachitanga, Yesu wakati: “Pakati pa awo ŵali kubabika na ŵanakazi, wandawukepo munthu mukuru  kuluska Yohane Mubatizi.” (Mat. 11:11) Tikukayika yayi kuti Yohane wakakondwanga na vitumbiko ivyo wakapokera. Nga ni Yohane, ŵanandi mazuŵa ghano ŵakukondwa na vitumbiko vyakufuma kwa Chiuta. Chiyelezgero pa nkhani iyi ni Mubali Terry. Iyo na muwoli wake Sandra, ŵachita uteŵeti wanyengozose vyaka vyakujumpha 50. Terry wakuti: “Naŵa na mwaŵi wakuchitako mauteŵeti ghakupambanapambana. Nachitapo upayiniya, uteŵeti wa pa Beteli, upayiniya wapadera, ulaŵiliri wa dera, ulaŵiliri wa chigaŵa ndipo sono ndineso mupayiniya wapadera.” Tikuŵa ŵakukondwa chomene para tapika uteŵeti mu gulu la Yehova, kweni pakukhumbikwa kulimbikira kuti tilutilire kuŵa ŵakukondwa para vinthu vyasintha pa umoyo withu.

Yohane Mubatizi wakalutilira kuŵa wakukondwa chifukwa wakawona kuti ni mwaŵi kuteŵetera Yehova. Wonani chiyelezgero ichi. Yesu wati wabatizika, uteŵeti wa Yohane ukamba kuchepa ndipo uteŵeti wa Yesu ukamba kusazgikira. Ŵasambiri ŵa Yohane ŵakamba kufipa mtima, ndipo ŵakamuphalira kuti: “Wonani, wakubatiza ndipo ŵanthu wose ŵakuluta kwa iyo.” (Yoh. 3:26) Yohane wakazgora kuti: “Waliyose uyo wali na mwali ni mweneko nthengwa. Kweni mubwezi wa mweneko wa nthengwa, para wakwima na kumupulika, wakuŵa na chimwemwe chikuru chifukwa cha mazgu gha mweneko wa nthengwa. Ntheura chimwemwe chane chafiskika.” (Yoh. 3:29) Yohane wakaphalizgananga na Yesu yayi; nesi kughanaghana kuti uteŵeti uwo wakachitanga wamba kuwoneka wambura ntchito chifukwa cha kwiza kwa Yesu. Kweni Yohane wakalutilira kuŵa wakukondwa chifukwa chakuti wakaŵa “mubwezi wa mweneko wa nthengwa.”

Chifukwa chakuti Yohane wakalutilira kuwona vinthu mwakwenelera, vikamovwira kuti walutilire kukondwa nangauli uteŵeti wake ukaŵa wakusuzga. Mwachiyelezgero, Yohane wakaŵa Munaziri, ntheura wakamwanga yayi vinyo. (Luka 1:15) Apo wakayowoyanga za umoyo wa Yohane, Yesu wakati: “Yohane wakiza ndipo wakaryanga chara nesi kumwa.” Kweni Yesu na ŵasambiri ŵake ŵakaziŵizganga chilichose yayi. (Mat. 11:18, 19) Yohane wakachitapo munthondwe uliwose yayi, kweni wakamanyanga kuti ŵasambiri ŵa Yesu kusazgapo awo ŵakaŵa ŵasambiri ŵake pakwamba, ŵapikenge nkhongono na kuchita minthondwe. (Mat. 10:1; Yoh. 10:41) M’malo mwa kughanaghanira vyose ivi, iyo wakatangwanikanga waka na mulimo uwo Yehova wakamupa.

Usange nase tikuwona uteŵeti uwo tikuchita kuŵa wakuzirwa mbwenu tilutilirenge kuŵa ŵakukondwa. Terry uyo tangumuzunura pakwamba wakuti: “Nkhalimbikiranga chomene uteŵeti uliwose uwo nkhapikanga.” Para wakughanaghanira ivyo wachita mu uteŵeti wanyengozose, iyo wakuti: “Nkhudandawurapo yayi. Nkhukumbukira waka vinthu viwemi vyekhavyekha.”

Tingaŵa ŵakukondwa chomene para tikuchita uteŵeti usange tikumanya kuzirwa kwake. Ni mwaŵi ukuru chomene kuŵa “ŵantchito ŵanyake na Chiuta.” (1 Kor. 3:9) Nga umo vikuŵira, para chinthu ntchakale kweni tikuchipwelelera, chikulutilira kuwoneka makora. Mwakuyana waka, para nase tikughanaghanira mwaŵi uwo taŵa nawo pakuteŵetera Chiuta tilutilirenge kuŵa ŵakukondwa. Tijiyaniskenge na ŵanji yayi. Tiwonenge kuti uteŵeti withu ngwapasi yayi.—Gal. 6:4.

Yohane wakwenera kuti wakamanyanga kuti wachitenge uteŵeti wake nyengo yichoko waka, kweni wakamanyanga yayi kuti umarenge pawuli. (Yoh. 3:30) Mu 30 C.E., myezi 6 kufuma apo Yesu wakabatizikira, Themba Herode likajalira Yohane mu jele. Kweni wakalutilira kusambizga unenesko. (Mrk. 6:17-20) Kasi wakatenge wachitenge wuli kuti walutilire kuŵa wakukondwa nangauli wakaŵa mu masuzgo? Wakaghanaghaniranga ivyo ni vyakuzirwa chomene.

Apo Yohane wakaŵa mu jele, wakapulika umo mulimo wa Yesu ukalutiranga panthazi. (Mat. 11:2; Luka 7:18) Yohane wakakhorwa kuti Yesu ni Mesiya, kweni wakamanyanga yayi umo Yesu wafiskirenge vyose ivyo Malemba ghakayowoya kuti Mesiya wazamufiska. Panji wakajifumbanga kuti: ‘Pakuti Mesiya wakeneranga  kupika uthemba, kasi ndikuti Yesu wambenge kuwusa sonosono? Kasi wanifumiskenge mu jele?’ Yohane wakakhumbanga chomene kumanya ivyo Yesu wachitenge, lekani wakatuma ŵasambiri ŵake kuti ŵakafumbe Yesu kuti: “Kasi Uyo Wakwiza ndimwe, panji tilindilire munyake?” (Luka 7:19) Ŵakati ŵawerako, Yohane wakwenera kuti wakategherezganga chomene apo ŵakamulongosoleranga kuti Yesu wakuchizga ŵanthu mwamunthondwe. Ndipo Yesu wakati ŵakamuphalire Yohane kuti: “Ŵachibulumutira ŵakuwona, ŵakupendera ŵakwenda, ŵavyoni ŵakutozgeka, ŵakumangwa makutu ŵakupulika, ŵakufwa ŵakuwuskika, ndipo makani ghawemi ghakupharazgika ku ŵakavu.”—Luka 7:20-22.

Yohane wakwenera kuti wakakhozgeka chomene na ivyo wakapulika. Ivi vikalongora kuti Yesu wakafiskanga ivyo mauchimi ghakayowoya vya Mesiya. Nangauli Yesu wakamufumiska yayi Yohane mu jele, kweni Yohane wakamanya kuti ivyo wakachita vikawa pa waka yayi. Wakaŵa wakukondwa nangauli wakaŵa mu suzgo.

Nga ni Yohane, para tikuŵika mtima pa kuteŵetera Yehova tilutilirenge kuŵa ŵakukondwa na ŵakuzikira. (Kol. 1:9-11) Tingazizipizga para tikuŵazga Baibolo na kughanaghanirapo, ndipo ivi vitovwirenge kumanya kuti mulimo withu pakuteŵetera Yehova ngwawaka yayi. (1 Kor. 15:58) Sandra wakuti: “Kuŵazga chaputara cha mu Baibolo zuŵa lililose kwanovwira kuti nisendelere kwa Yehova. Vikunovwira kuti nighanaghanirenge chomene vya iyo m’malo mwa vyane.” Para nase tikughanaghanira chomene mulimo uwo ŵabali na ŵadumbu ŵakuchita pakuteŵetera Yehova, vitovwirenge kuti tileke kujighanaghanira tekha. Kweni tighanaghanirenge chomene ivyo Yehova wakufiska. Sandra wakutiso: “Pulogiramu ya mwezi na mwezi ya JW Broadcasting^® yikutovwira kuti tiŵenge pafupi na gulu la Yehova kweniso kuti tilutilire kuŵa ŵakukondwa para tikuchita uteŵeti withu.”

Nyengo yichoko iyo Yohane Mubatizi wakachitiranga uteŵeti wake, wakapharazga mu “mzimu na nkhongono za Eliya,” ndipo nga ni Eliya, Yohane nayo “wakaŵa munthu nga ndise.” (Luka 1:17; Yak. 5:17) Para tingayezga Yohane, nase tilutilirenge kukondwa apo tikuteŵetera Yehova nanga tingakumana na masuzgo wuli.