NKHANI YAKUSAMBIRA 34
Ndimwe Munthu Wakuzirwa mu Mpingo wa Yehova
“Thupi ndimoza kweni lili na viŵaro vinandi, ndipo viŵaro vyose vya thupi nangauli ni vinandi, ni thupi limoza, ntheura ndimo waliri Khristu.”—1 KOR. 12:12.
SUMU 101 Kuchita Vinthu mu Umoza
CHILATO CHA NKHANI IYI *
1. Kasi tili na mwaŵi wuli?
Tili na mwaŵi wapadera chomene kuŵa mu mpingo wa Yehova. Tili mu paradiso wauzimu uyo muli ŵanthu awo mbamtende na ŵakukondwa. Kasi imwe muli na mulimo wuli mu mpingo?
2. Kasi ntchiyelezgero wuli icho mpositole Paulosi wakayowoya mu makalata ghake ghanandi?
2 Tingamanya mulimo withu mu mpingo para tingasanda chiyelezgero icho mpositole Paulosi wakayowoya mu makalata ghake ghanandi agho wakalemba mwakulongozgeka na mzimu. Mu makalata ghake, Paulosi wakayaniska mpingo na thupi la munthu. Kweniso wakayaniska munthu waliyose mu mpingo na viŵaro vya thupi.—Rom. 12:4-8; 1 Kor. 12:12-27; Efe. 4:16.
3. Kasi ni vinthu wuli vitatu ivyo tisambirenge mu nkhani iyi?
3 Mu nkhani iyi, tiwonenge vinthu vitatu vyakuzirwa ivyo tikusambirako ku chiyelezgero icho mpositole Paulosi wakayowoya. Chakwamba, tiwonenge kuti waliyose wali na chigaŵa * mu mpingo wa Yehova. Chachiŵiri, tiwonenge ivyo tingachita para vikutisuzga kumanya chigaŵa chithu mu mpingo. Ndipo chachitatu, tiwonenge chifukwa icho tikwenera kutangwanikira chomene na mulimo uwo Yehova watipa mu mpingo.
WALIYOSE WALI NA CHIGAŴA CHAKUTI WACHITE MU MPINGO
4. Kasi lemba la Ŵaroma 12:4, 5 likutisambizga vichi?
4 Chinthu chakwamba icho tikusambirako ku chiyelezgero cha mpositole Paulosi ntchakuti waliyose wali na chigaŵa chakuzirwa mu mpingo wa Yehova. Paulosi wakamba chiyelezgero chake na mazgu ghakuti: “Nga umo thupi liliri na viŵaro vinandi, kweni viŵaro vyose vili na ntchito yakuyana yayi, ntheura nase, nangauli tili ŵanandi, tili thupi limoza mwa Khristu, ndipo waliyose payekha ntchiŵaro chakukhumba munyake.” (Rom. 12:4, 5) Kasi apa Paulosi wakang’anamurangachi? Wakang’anamuranga kuti nangauli tili na milimo yakuyana yayi mu mpingo, kweni tose tili ŵakuzirwa.
Tili na milimo yakupambana mu mpingo, kweni waliyose wa ise ngwakuzirwa (Wonani ndime 5-12) *
5. Kasi Yehova watipa “vyawanangwa” wuli mu mpingo?
5 Nyengo zinyake mungaghanaghana kuti awo ŵakulongozga ndiwo ŵali na chigaŵa mu mpingo. (1 Tes. 5:12; Heb. 13:17) Mbunenesko nadi kuti kwizira mwa Khristu, Yehova wali kupeleka “vyawanangwa mu ŵanthu” mu mpingo. (Efe. 4:8) Ŵabali awo ŵali mu Wupu Wakulongozga, awo ŵakovwira Wupu Wakulongozga, awo ŵali mu Komiti ya Munthavi, ŵalaŵiliri ŵa dera, awo ŵakusambizga sukulu za Baibolo, ŵalara mu mpingo, na ŵateŵeti ŵakovwira ŵali mu gulu la “vyawanangwa mu ŵanthu.” Ŵabali wose aŵa ŵakwimikika na mzimu utuŵa kuti ŵapwelelere mberere zakuzirwa za Yehova na kukhozga mpingo.—1 Pet. 5:2, 3.
6. Kuyana na 1 Ŵatesalonika 2:6-8, kasi ŵabali ŵakwimikika na mzimu ŵakufwilirapo kuchita vichi?
6 Ŵabali ŵakwimikika na mzimu utuŵa kuti ŵachite milimo yakupambanapambana. Nga umo viŵaro vyakupambanapambana vya thupi nga ni mawoko na minwe, vikugwilira ntchito kuti thupi lose lisange chandulo, ŵabali awo ŵakwimikika na mzimu utuŵa nawo ŵakulimbikira chomene kugwira ntchito kuti mpingo wose usange chandulo. Ŵakujipenjera uchindami yayi. M’malo mwake, ŵakufwilirapo kuzenga na kukhozga ŵabali na ŵadumbu. (Ŵazgani 1 Ŵatesalonika 2:6-8.) Tikumuwonga chomene Yehova chifukwa cha kutipa ŵabali ŵakwenelera aŵa ŵambura kujighanaghanira ŵekha.
7. Kasi ŵanandi awo ŵali mu uteŵeti wanyengozose ŵakusangwa na vitumbiko wuli?
7 Ŵanji mu mpingo ŵangimikika kuŵa ŵamishonale, ŵapayiniya ŵapadera, panji ŵapayiniya ŵanyengozose. Nakuti ŵabali na ŵadumbu ŵanandi pa charu chose, ŵali kusankha mulimo wa kupharazga na kuzgora ŵanthu kuŵa ŵasambiri kuŵa ntchito yawo. Chifukwa chakuti ŵali kuchita nthena, ŵawovwira ŵanthu ŵanandi kuŵa ŵasambiri ŵa Khristu Yesu. Nangauli ŵanandi mwa ŵapharazgi aŵa ŵali na vinthu vichoko vyakuthupi, kweni Yehova waŵatumbika chomene. (Mrk. 10:29, 30) Tikuŵatemwa chomene ŵabali na ŵadumbu aŵa, ndipo tikuwonga chomene kuti tili nawo mu mpingo.
8. Chifukwa wuli mupharazgi waliyose ngwakuzirwa kwa Yehova?
8 Kasi ŵabali ŵakwimikika na ŵateŵeti ŵanyengozose ndiwo pera ŵali na chigaŵa mu mpingo? Yayi. Mupharazgi waliyose ngwakuzirwa kwa Chiuta ndiposo mu mpingo. (Rom. 10:15; 1 Kor. 3:6-9) Vili nthena chifukwa chakuti umoza mwa milimo yakuzirwa chomene mu mpingo ngwa kuzgora ŵanthu kuŵa ŵasambiri ŵa Fumu Yesu Khristu. (Mat. 28:19, 20; 1 Tim. 2:4) Wose awo ŵakupharazga, kwali mbakubatizika panji yayi, ŵakufwilirapo kuŵika pakwamba mulimo uwu.—Mat. 24:14.
9. Chifukwa wuli tikuzirwiska ŵadumbu ŵithu mu mpingo?
9 Yehova wakulongora kuti wakuzirwiska ŵadumbu lekani waŵapa mulimo wakuzirwa mu mpingo. Wakuzirwiska ŵawoli, ŵamama, vyokoro, na ŵadumbu ŵambura kutengwa chifukwa ŵakumuteŵetera mwakugomezgeka. Baibolo likuyowoya ŵanakazi ŵanandi awo ŵakakondweskanga Chiuta. Iwo ni viyelezgero viwemi pa nkhani ya vinjeru, chipulikano, mwamphu, chikanga, kupa, na kuchita milimo yiwemi. (Luka 8:2, 3; Mil. 16:14, 15; Rom. 16:3, 6; Fil. 4:3; Heb. 11:11, 31, 35) Tikumuwonga chomene Yehova chifukwa cha kutipa ŵanakazi aŵa mu mpingo, awo ŵali na mikhaliro yiwemi.
10. Chifukwa wuli tikuŵazirwiska ŵachekuru ŵithu?
10 Tiliso ŵakutumbikika pakuŵa na ŵabali na ŵadumbu ŵanandi awo mbachekuru. Mipingo yinyake yili na ŵabali na ŵadumbu ŵachekuru awo ŵateŵetera Yehova mwakugomezgeka umoyo wawo wose. Ŵachekuru ŵanyake ŵasambira unenesko mwasonosono. Mulimose umo vingaŵira, ŵabali na ŵadumbu ŵithu aŵa ŵakusuzgika muthupi chifukwa cha uchekuru. Masuzgo agha, ghakuŵatondeska kuti ŵachitenge vinandi mu mpingo na mulimo wakupharazga. Kweni ŵabali na ŵadumbu ŵachekuru aŵa ŵakuchita ivyo ŵangafiska mu uteŵeti, ndipo ŵakugwiliskira ntchito nkhongono zawo zose kukhozga na kusambizga ŵanji. Nakuti tikusanga chandulo na ivyo ŵasangana navyo pa umoyo wawo. Mbakuzirwa chomene kwa Yehova na kwa ise wuwo.—Zinth. 16:31.
11-12. Kasi mukukhozgeka wuli na ŵawukirano mu mpingo winu?
11 Ghanaghaniraniso za ŵawukirano. Ŵakusangana na masuzgo ghanandi apo ŵakukura mu charu chakuwusika na Satana Dyabulosi ichi, ndiposo chakuzura na visambizgo vyakupuluska. (1 Yoh. 5:19) Kweni tose tikukhozgeka para tikuwona ŵawukirano ŵithu ŵakuzgorapo pa maungano, kupharazga, na kuvikilira chigomezgo chawo mwachikanga. Nadi, imwe ŵawukirano muli na chigaŵa chakuzirwa chomene mu mpingo wa Yehova.—Sal. 8:2.
12 Ndipouli, ŵabali na ŵadumbu ŵithu ŵanyake vikuŵasuzga kugomezga kuti mbakuzirwa mu mpingo. Kasi ntchivichi chingatovwira kuti tose tijipulikenge kuti tili ŵakuzirwa mu mpingo? Tiyeni tiwone.
MANYANI KUTI NDIMWE ŴAKUZIRWA MU MPINGO
13-14. Chifukwa wuli ŵanyake ŵangajiwona kuti mbambura kuzirwa mu mpingo?
13 Wonani chinthu chachiŵiri icho tikusambirako ku chiyelezgero icho mpositole Paulosi wakayowoya. Chiyelezgero ichi chikutipangiska kuti tighanaghanirepo suzgo ilo taŵanandi tili nalo mazuŵa ghano. Suzgo ili likupangiska kuti vitisuzgenge kugomezga kuti tili ŵakuzirwa mu mpingo. Paulosi wakalemba kuti: “Usange lundi lingati: ‘Pakuti ndine woko yayi, ipo nili chigaŵa cha thupi yayi,’ lingaleka yayi kuŵa chigaŵa cha thupi pa chifukwa ichi. Ndipo usange khutu lingati: ‘Pakuti ndine jiso yayi, ipo nili chigaŵa cha thupi yayi,’ lingaleka yayi kuŵa chigaŵa cha thupi pa chifukwa ichi.” (1 Kor. 12:15, 16) Kasi fundo ya Paulosi yikaŵa yakuti wuli apa?
14 Para tikujiyaniska na ŵanji mu mpingo, tambenge kujiwona kuti tili ŵambura kuzirwa. Ŵanyake mu mpingo ŵangaŵa ŵaluso pakusambizga, kulongozga vinthu, panji kupembuzga na kukhozga ŵanji. Panji mukuwona kuti imwe ndimo muliri yayi. Ichi chikulongora kuti ndimwe ŵakujiyuyura. (Fil. 2:3) Kweni mukwenera kuŵaso maso. Para nyengo zose mukujiyaniska na ŵanji awo ŵali na maluso ghapadera, mukhuŵarenge. Mungajipulika nga muli ŵambura kuzirwa mu mpingo. Kasi ntchivichi chingamovwirani kuti mumazge maghanoghano agha?
15. Kuyana na 1 Ŵakorinte 12:4-11, kasi tikwenera kumanya vichi pa nkhani ya vyawanangwa ivyo tili navyo?
15 Ghanaghanirani fundo iyi: Ŵakhristu ŵanyake ŵakwambilira Yehova wakaŵapa vyawanangwa vya kuchita vinthu vyakuzizwiska na mzimu utuŵa, kweni Mbakhristu wose yayi ŵakapokera vyawanangwa ivi. (Ŵazgani 1 Ŵakorinte 12:4-11.) Yehova wakaŵapa vyawanangwa na maluso ghanyake, kweni Mkhristu waliyose wakaŵa wakuzirwa. Mazuŵa ghano tilije vyawanangwa vyakuchita vinthu vyakuzizwiska na mzimu utuŵa. Kweni fundo yake yingatovwira. Tose tingaŵa na maluso ghakuyana yayi, kweni tose tili ŵakuzirwa kwa Yehova.
16. Kasi tikwenera kulondezga ulongozgi wuli wakufuma kwa Paulosi?
16 M’malo mwa kujiyaniska na Ŵakhristu ŵanyithu, tikwenera kulondezga ulongozgi wa mpositole Paulosi wakuti: “Waliyose wapime mulimo wake, apo ndipo waŵenge na chifukwa chakukondwera pa iyo yekha, kwambura kujiyaniska na munthu munyake.”—Gal. 6:4.
17. Kasi tipindurenge wuli usange tikulondezga ulongozgi wa Paulosi?
17 Usange tingalondezga ulongozgi wa Paulosi na kusanda ivyo tikuchita, nase tambenge kuwona kuti tili na vyawanangwa na maluso ghapadera. Mwachiyelezgero, mulara wangaŵavya luso lwa kusambizga pa pulatifomu, kweni wangaŵa waluso pa mulimo wa kuzgora ŵanthu kuŵa ŵasambiri. Kweniso panji wangaŵavya luso lwa kulongozga tunthu nga umo ŵaliri ŵalara ŵanyake, kweni wangaŵa walusungu na wachitemwa, ndipo ŵabali na ŵadumbu ŵakufwatuka kumupempha ulongozgi wa mu Baibolo. Panjiso wangaŵa kuti wakupokelera makora ŵalendo. (Heb. 13:2, 16) Ntheura para tingamanya kuti nase tili na vyawanangwa, tiwonenge kuti tili na chigaŵa icho tikuchita mu mpingo. Ndipo ivi viwovwirenge kuti tileke kuchitira sanji ŵabali ŵithu awo ŵali na maluso ghakupambana na ghithu.
18. Kasi tingachita wuli kuti tisazgireko luso lwithu?
18 Kwali tili na chigaŵa wuli mu mpingo, kweni tose tikwenera kusazgirako luso lwithu pa uteŵeti uwo tikuchita. Kuti tisazgireko luso lwithu, Yehova wakutisambizga kwizira mu gulu lake. Mwachiyelezgero, pa maungano gha mukati mwa masabata, tikusambizgika umo tingapharazgira mwaluso mu uteŵeti. Kasi mukuyezga kulondezga ivyo mukusambizgika pa maungano agha?
19. Kasi mungachita wuli kuti namwe munjireko Sukulu ya Ŵapharazgi ŵa Ufumu?
19 Sukulu ya Ŵapharazgi ŵa Ufumu nayo njakovwira chomene kuti tisazgireko luso lwithu. Awo ŵanganjira sukulu iyi mbabali na ŵadumbu awo mbapayiniya ŵanyengozose kweniso ŵabali na ŵadumbu ŵanyake awo ŵali mu uteŵeti wanyengozose, ndipo ŵali na vyaka vyapakati pa 23 na 65. Nyengo zinyake mungawona nga mungafiska yayi kunjira sukulu iyi. Kweni m’malo mwa kundandalika vifukwa ivyo vingamutondeskani kunjira sukulu iyi, ŵani na vifukwa ivyo mukukhumbira kunjira sukulu iyi. Pamanyuma pangani pulani iyo yingamovwirani kufiska ivyo vikukhumbikwa kuti munjire sukulu iyi. Na wovwiri wa Yehova kweniso kulimbikira kwinu, mungachita vinthu ivyo mukawonanga kuti mungafiska yayi.
GWILISKIRANI NTCHITO VYAWANANGWA VINU KUZENGA MPINGO
20. Kasi tikusambirapo vichi pa Ŵaroma 12:6-8?
20 Chinthu chachitatu icho tikusambirako ku chiyelezgero icho mpositole Paulosi wakayowoya chili pa Ŵaroma 12:6-8. (Ŵazgani.) Pa lemba ili napo Paulosi wakalongora kuti munthu waliyose mu mpingo wali na chawanangwa chakupambana na munyake. Kweni pa lemba ili wakadidimizga kuti chawanangwa icho tili nacho tikwenera kukhozgera mpingo na kuwuzenga.
21-22. Kasi tingasambirako vichi kwa Robert na Felice?
21 Wonani ivyo vikachitikira mubali munyake uyo timuchemenge kuti Robert. Wati wateŵetera ku charu chinyake, wakaphalirika kuti wakateŵetere pa Beteli mu charu chakwake. Nangauli ŵabali ŵakamusimikizgira kuti wandabude chilichose, kweni iyo wakati: “Kwa myezi yinandi nkhaŵa wambura kukondwa chifukwa nkhaghanaghananga kuti ndine wakutondeka. Ndipo nyengo zinyake nkhaghanaghananga vya kuleka waka kuteŵetera pa Beteli.” Kasi wakachita wuli kuti wambeso kukondwa? Mulara munyake wakamukumbuska kuti Yehova wakutisambizga pa uteŵeti uliwose uwo tachitapo kumanyuma mwakuti tichite makora uteŵeti uwo tikuchita sono. Robert wakamanya kuti wakwenera kuleka kughanaghanira vyakumanyuma na kwamba kughanaghanira ivyo wangachita sono.
22 Mubali Felice Episcopo wakaŵa na suzgo lakuyana waka. Iyo na muwoli wake ŵakamalizga Sukulu ya Giliyadi mu 1956 ndipo ŵakapika mulimo wa kwendera dera ku Bolivia. Mu 1964 ŵakaŵa na mwana. Felice wakati: “Chikaŵa chakusuzga chomene kuleka mulimo withu uwo tikawutemwanga. Nkhaŵa wambura kukondwa kwa chaka chose. Kweni na wovwiri wa Yehova nkhasintha maghanoghano ghane, ndipo nkhamba kughanaghanira vya udindo wane uphya pakuŵa mupapi.” Kasi namwe mukujipulika nga ni Robert panji Felice? Kasi namwe muli ŵambura kukondwa chifukwa chakuti pasono mukuchita yayi mauteŵeti agho mukachitanga kumanyuma? Usange ni nthena, muŵenge ŵakukondwa usange mungasintha maghanoghano ghinu na kwamba kughanaghanira ivyo mungachita sono kuti muteŵetere Yehova na ŵabali ŵinu. Tangwanikani na kugwiliskira ntchito vyawanangwa na maluso ghinu kovwilira ŵanji. Para mwachita nthena, muŵenge ŵakukondwa apo mukuzenga mpingo.
23. Kasi tikwenera kughanaghanira vichi, ndipo tizamuwona vichi mu nkhani yakulondezgapo?
23 Yehova wakuwona kuti waliyose ngwakuzirwa. Iyo wakukhumba kuti tose tiŵe mu mbumba yake. Usange tikughanaghanira ivyo tingachita kuti tikhozge ŵabali na ŵadumbu na kufwilirapo chomene kufiska udindo uwu, tilekenge kujiwona kuti tili ŵambura kuzirwa mu mpingo. Kweni wuli pa nkhani ya umo tikuwonera ŵanji mu mpingo? Kasi tingalongora wuli kuti tikuŵatemwa na kuŵachindika? Tizamuwona mu nkhani yakulondezgapo.
SUMU 24 Zaninge ku Phiri la Yehova
^ ndime 5 Tose tikukhumba kuti tijipulikenge kuti tili ŵakuzirwa kwa Yehova. Kweni nyengo zinyake tingamba kujiwona nga tili ŵakuzirwa viŵi yayi. Nkhani iyi yitovwirenge kumanya kuti waliyose ngwakuzirwa mu mpingo.
^ ndime 3 MAZGU GHALONGOSOREKA: Mazgu ghakuti chigaŵa icho tili nacho mu mpingo wa Yehova ghakung’anamura mulimo uwo tikuchita pakuzenga na kukhozga mpingo. Ndipo kuŵa na chigaŵa mu mpingo vikuthemba pa mtundu, fuko, usambazi, ukavu, mutheto, panji masambiro yayi.
^ ndime 62 MAZGU GHAKULONGOSORA CHITHUZI: Vithuzi vitatu ivi vikulongora ivyo vikuchitika pambere maungano ghandambe, para ghali mukati, na para ghamara. Chithuzi chakwamba: Mulara wakutawuzga mulendo uyo wiza pa maungano ghithu, mubali wachinyamata wakupwelelera vyakukuzgira mazgu, ndipo mudumbu wakuchezga na mudumbu muchekuru. Chithuzi chachiŵiri: Ŵabali na ŵadumbu ŵakukhumba kuzgorapo pa Sambiro la Gongwe la Mulinda. Chithuzi chachitatu: Ŵakutorana ŵakutozga Nyumba ya Ufumu. Mama wakovwira mwana wake kuŵika vyakupeleka mu bokosi. Mubali wachinyamata wakupwelelera mabuku, ndipo mubali wakukhozga mudumbu muchekuru.
