NKHANI YAKUSAMBIRA 32
Yendani Mwakujiyuyura na Chiuta Winu
‘Yenda mwakujiyuyura na Chiuta wako!’—MIKA 6:8.
SUMU 31 Yendaninge na Chiuta!
CHILATO CHA NKHANI IYI *
1. Kasi Davide wakayowoya vichi vyakukhwaskana na Yehova?
KASI tingati Yehova ngwakujiyuyura? Enya, ngwakujiyuyura. Davide wakalemba kuti: “Mukunipa chiskango chinu cha chiponosko, ndipo kujiyuyura kwinu kwanikuzga.” (2 Sam. 22:36; Sal. 18:35) Apo Davide wakalembanga mazgu agha, panji wakakumbukiranga nyengo iyo Samuyeli wakiza ku nyumba ya Adada ŵake kuzakaphakazga themba lamunthazi la Israyeli. Davide wakaŵa muchoko chomene pa ŵana ŵanalume 8 ŵa Yese, kweni Yehova wakasankha iyo kuti wanjire m’malo mwa Themba Sauli.—1 Sam. 16:1, 10-13.
2. Kasi tisambirenge vichi mu nkhani iyi?
2 Vikulongora kuti Davide wakakolerana nagho mazgu gha uyo wakalemba Salimo 113 ghakukhwaskana na Yehova, ghakuti: “Wakukotama kuti walaŵiske mtambo na charu chapasi, wakuwuska wakuyuyuka mu fuvu. Na kunyamuska mukavu . . . mwakuti wamukhalike pamoza na ŵakuchindikika.” (Sal. 113:6-8) Mu nkhani iyi, chakwamba tisambirenge fundo zakuzirwa zakukhwaskana na kujiyuyura mwa kuwona umo Yehova wakulongolera mukhaliro uwu. Pamanyuma tiwonenge ivyo tingasambirako kwa Themba Sauli, ntchimi Daniyeli, na Yesu pa nkhani ya kujiyuyura.
IVYO TINGASAMBIRAKO KWA YEHOVA
3. Kasi Yehova wakuchita nase wuli vinthu, ndipo ivi vikulongora vichi?
3 Yehova wakulongora kuti ngwakujiyuyura para tikuwona umo wakuchitira vinthu na ŵanthu ŵambura kufikapo. Iyo wakuzomera kusopa kwithu kweniso wakutiwona kuti ndise ŵabwezi ŵake. (Sal. 25:14) Kuti ubwezi uwu uŵepo, Yehova ndiyo wakadankha kuchitapo kanthu, wakapeleka mwana wake kuŵa sembe ya zakwananga zithu. Yehova ngwachiwuravi chomene.
4. Kasi Yehova wali kutipa vichi, ndipo chifukwa wuli?
4 Wonani nthowa yinyake iyo Yehova wakulongolera kuti ngwakujiyuyura. Pakuŵa Mlengi, Yehova mphanyi wakatilenga munthowa yakuti tileke kuŵa na mahara gha kusankha icho tichitenge pa umoyo withu. Kweni ndimo wakatilengera yayi. Wakatilenga mu chikozgo chake na kutipa wanangwa wakusankha. Wakukhumba kuti taŵanthu timuteŵeterenge chifukwa chakuti tikumutemwa kweniso chifukwa cha kumanya kuti para timupulikirenge tisangenge chandulo. (Doto. 10:12; Yes. 48:17, 18) Tikuwonga chomene kuti Yehova ngwakujiyuyura.
Yesu wali kuchanya. Pafupi na iyo pimilira ŵanyake awo ŵamuwusa nayo. Iyo pamoza na awo ŵamuwusa nayo ŵakulaŵiska gulu la ŵangelo. Ŵanyake mwa ŵangelo aŵa ŵakuluta pa charu chapasi kuti ŵakachite milimo yawo. Yehova ndiyo wali kuŵapako mazaza wose awo ŵalongoreka pa chithuzi ichi (Wonani ndime 5)
5. Kasi Yehova wakutisambizga wuli kuti tiŵe ŵakujiyuyura? (Wonani chithuzi cha pa chikopi.)
5 Yehova wakutisambizga kuti nase tiŵe ŵakujiyuyura na umo wakuchitira nase vinthu. Yehova ni Munthu wamahara chomene mu chilengiwa chose. Nangauli vili nthena, kweni ngwakunozgeka kuzomera masachizgo gha ŵanji. Mwachiyelezgero, Yehova wakazomerezga Mwana wake kuti wamovwire pakulenga vinthu vyose. (Zinth. 8:27-30; Kol. 1:15, 16) Nangauli Yehova ngwankhongonozose, kweni wakuŵapako ŵanji mazaza. Mwachiyelezgero, wali kusankha Yesu kuŵa Themba la Ufumu, ndipo wazamuŵapa mazaza ŵa 144,000 awo ŵazamuwusa lumoza na Yesu. (Luka 12:32) Yehova wakamusambizga Yesu kuŵa Themba na Wasembe Mukuru. (Heb. 5:8, 9) Kweniso wakusambizga awo ŵamuwusa na Yesu kuti ŵafiske milimo yawo, kweni wakuchita kuŵagada yayi para ŵakuchita milimo yawo. M’malo mwake, wakuŵagomezga kuti ŵachitenge khumbo lake.—Chivu. 5:10.
Tikuyezga Yehova para tikusambizga ŵanji na kuŵapako milimo (Wonani ndime 6-7) *
6-7. Kasi tingasambirako vichi kwa Adada ŵithu ŵakuchanya pa nkhani ya kugaŵirako ŵanji milimo?
6 Usange Adada ŵithu ŵakuchanya, awo ŵakukhumba wovwiri yayi kufuma kwa waliyose, ŵakugaŵirako ŵanji mazaza, kuli wuli ise? Nase ndimo tikwenera kuchitira. Mwachiyelezgero, kasi ndimwe mutu wa mbumba panji mulara mu mpingo? Yezgani Yehova pakugaŵirako ŵanji milimo, ndipo kuŵagada yayi apo ŵakuchita milimo iyo. Para mukuyezga Yehova, milimo yendenge kweniso ŵanyinu ŵasambirenge ntchito na kuleka kujikayikira. (Yes. 41:10) Kasi awo ŵali na mazaza ŵangasambirako vichi kwa Yehova?
7 Baibolo likulongora kuti Yehova wakunweka kupulika maghanoghano gha ŵangelo. (1 Mathe. 22:19-22) Ŵapapi, kasi mungamuyezga wuli Yehova? Para ntchakwenelera, fumbani ŵana ŵinu umo ntchito yinyake yikwenera kuchitikira. Para ŵapeleka masachizgo ghawemi, londezgani.
8. Kasi Yehova wakachita wuli vinthu mwakuzikira na Abrahamu na Sara?
8 Nthowa yinyake iyo Yehova wakulongolera kuti ngwakujiyuyura, nkhuzikira. Mwachiyelezgero, Yehova wakuzikira para awo ŵakumuteŵetera ŵakumufumba mwantchindi pa ivyo wasankha kuchita. Wakamutegherezga Abrahamu apo wakayowoyanga maghanoghano ghake pa nkhani ya kuparanya Sodomu na Gomora. (Gen. 18:22-33) Kweniso kumbukirani umo Yehova wakachitira na Sara, muwoli wa Abrahamu. Wakakwiya yayi apo Sara wakaseka kuti waŵenge na nthumbo mu uchekuru wake. (Gen. 18:10-14) Kweni wakachita nayo vinthu mwantchindi.
9. Kasi ŵapapi na ŵalara ŵangasambirako vichi kwa Yehova?
9 Kasi imwe ŵapapi na ŵabali ŵalara mungasambirako vichi kwa Yehova? Kasi mukuchita wuli para ŵana ŵinu panji ŵanthu ŵanyake mu mpingo ŵandakolerane navyo ivyo mwasankha? Kasi mukujibakira? Panji kasi mukutegherezga kuti mupulikiske maghanoghano ghawo? Mbumba kweniso mipingo yikupindura chomene para awo ŵali na mazaza ŵakuyezga Yehova. Kufika apa tadumbiskana ivyo tikusambirako kwa Yehova pa nkhani ya kujiyuyura. Sono tiyeni tiwone ivyo tikusambirako ku ŵanthu ŵanyake awo ŵakuyowoyeka mu Baibolo pa nkhani ya kujiyuyura.
IVYO TINGASAMBIRAKO KU ŴANTHU ŴANYAKE MU BAIBOLO
10. Kasi Yehova wakutisambizgaso wuli?
10 Yehova pakuŵa ‘Msambizgi withu Mukuru,’ watipa viyelezgero mu Baibolo vya ŵanthu ŵanyake mwakuti watisambizge. (Yes. 30:20, 21) Tikusambira para tikughanaghanira nkhani za mu Baibolo za ŵanthu awo ŵakalongora mikhaliro ya Chiuta, nga nkhujiyuyura. Kweniso tikusambira para tikughanaghanira ivyo vikachitikira awo ŵakatondeka kulongora mikhaliro yiwemi iyi.—Sal. 37:37; 1 Kor. 10:11.
11. Kasi chiyelezgero chiheni cha Sauli chikutisambizga vichi?
11 Ghanaghanirani ivyo vikachitikira Themba Sauli. Pakwamba wakaŵa wakujiyuyura chomene. Apo wakaŵa muwukirano, wakamanyanga kuti vyose wangachita makora yayi ndipo wakakananga kuti waŵe Fumu. (1 Sam. 9:21; 10:20-22) Kweni pamanyuma, Sauli wakamba kujikuzga. Wakamba kujikuzga pati pajumpha nyengo yichoko waka wati waŵa themba. Nyengo yinyake wakatondeka kuzikira apo wakalindiliranga ntchimi Samuyeli. M’malo mwa kujiyuyura na kugomezga Yehova kuti ndiyo wawovwirenge ŵanthu ŵake, Sauli wakapeleka sembe yakotcha nangauli wakaŵa wambura kwenelera. Ivi vikapangiska kuti ubwezi wake na Yehova unangike ndipo Yehova wakamukana kuŵa themba. (1 Sam. 13:8-14) Tingalongora kuti ndise ŵavinjeru para tingasambirako ku chiyelezgero ichi, na kugega kujikuzga.
12. Kasi Daniyeli wakalongora wuli kuti ngwakujiyuyura?
12 Mwakupambana na Sauli, wonani chiyelezgero chiwemi cha ntchimi Daniyeli. Umoyo wake wose, Daniyeli wakaŵa wakujiyuyura ndipo nyengo zose wakapemphanga Yehova kuti wamulongozge. Mwachiyelezgero, apo Yehova wakamovwira kupatawura maloto gha Nebukadinezara, Daniyeli wakajichemelera yayi kuti wapatawura yekha. M’malo mwake, wakajiyuyura na kupeleka uchindami wose kwa Yehova. (Dan. 2:26-28) Kasi tikusambirapo vichi apa? Para ŵabali ŵakutilumba kuti tikudumba makora nkhani panji vinthu vyatiyendera makora mu uteŵeti, tikwenera kukumbuka kuti uchindami wose ukwenera kuluta kwa Yehova. Tikwenera kumanya kuti patekha tingachita yayi ivi kwambura wovwiri wa Yehova. (Fil. 4:13) Para tikuchita nthena, ndikuti tikuyezgaso Yesu. Munthowa wuli?
13. Kuyana na Yohane 5:19, 30, kasi tikusambirako vichi kwa Yesu pa nkhani ya kujiyuyura?
13 Nangauli Yesu wakaŵa Mwana wakufikapo wa Chiuta kweni wakagomezganga Yehova. (Ŵazgani Yohane 5:19, 30.) Wakayezgapo yayi kuti wapoke mazaza gha Adada ŵake ŵakuchanya. Lemba la Ŵafilipi 2:6 likutiphalira kuti Yesu “wakaghanaghanapo yayi kuti wapoke mazaza gha Chiuta kuti wayane nayo.” Pakuŵa Mwana wakujilambika, Yesu wakamanyanga kuti mazaza ghake ghali na mphaka ndipo wakachindikanga mazaza gha Awiske.
Yesu wakamanyanga kuti mazaza ghake ghali na mphaka (Wonani ndime 14)
14. Kasi Yesu wakachita wuli wati wapempheka vinthu ivyo wakaŵavya mazaza kupeleka?
14 Wonani umo Yesu wakazgolera apo msambiri Yakobe na Yohane pamoza na anyinawo ŵakamupempha vinthu ivyo iyo wakaŵavya mazaza gha kupeleka. Nyengo yeneyiyo Yesu wakaŵaphalira kuti Adada ŵake ŵakuchanya ndiwo ŵakusankha uyo wakwenera kukhala ku woko lake la malyero na lamazere mu Ufumu. (Mat. 20:20-23) Yesu wakalongora kuti mazaza ghake ghali na mphaka. Wakaŵa wakujiyuyura nadi. Wakachitapo yayi vinthu ivyo Yehova wandamuzomerezge kuchita. (Yoh. 12:49) Kasi tingamuyezga wuli Yesu?
Kasi tingamuyezga wuli Yesu pa nkhani ya kujiyuyura? (Wonani ndime 15-16) *
15-16. Kasi tingalondezga wuli ulongozgi wa pa 1 Ŵakorinte 4:6?
15 Tikuyezga Yesu pa nkhani ya kujiyuyura para tikulondezga ulongozgi wa pa 1 Ŵakorinte 4:6. Lemba ili likutiphalira kuti: “Mungajumphanga yayi vinthu ivyo vili kulembeka.” Ntheura para ŵanyithu ŵatipempha ulongozgi pa nkhani yinyake, tingaŵachichizganga yayi kuti ŵendere maghanoghano ghithu panji kuŵaphalira maghanoghano ghithu pambere tindaghanaghanirepo dankha. M’malo mwake, ulongozgi withu ukwenera kufuma mu Baibolo na mabuku ghithu ghakulongosora Baibolo. Para tichitenge nthena tilongorenge kuti tikumanya vyose yayi. Kweniso tilongorenge kuti tili ŵakujiyuyura chifukwa tikumanya kuti nyengo zose ulongozgi wa Yehova ndiwo nguwemi kuluska withu.—Chivu. 15:3, 4.
16 Padera pa kuchindika Yehova, tiliso na vifukwa vinyake viwemi vyakuŵira ŵakujiyuyura. Kasi kujiyuyura kungatovwira wuli kuti tiŵe ŵachimwemwe kweniso kuti tikoleranenge na ŵanyithu? Fumbo ili ndilo tidumbiskanenge sono.
CHIFUKWA WULI NTCHIWEMI KUŴA ŴAKUJIYUYURA?
17. Chifukwa wuli ŵanthu ŵakujiyuyura ŵakuŵa ŵakukondwa?
17 Para tili ŵakujiyuyura, tiŵenge ŵakukondwa. Chifukwa wuli? Para tikumanya kuti pali vinyake ivyo tikutondeka, tiwongenge chomene wovwiri uliwose uwo ŵanyithu ŵangatipa. Mwachiyelezgero, ghanaghanirani ivyo vikachitika apo Yesu wakachizga ŵanthu 10 ŵavyoni. Yumoza pera ndiyo wakawelera kuzakawonga Yesu chifukwa cha kumuchizga ku nthenda yakofya iyi, iyo payekha wakatenge wajichizgenge yayi. Munthu wakujiyuyura uyu wakawonga wovwiri uwo wakapika, ndipo wakachindika Chiuta.—Luka 17:11-19.
18. Kuyana na Ŵaroma 12:10, kasi kujiyuyura kukutovwira wuli kuti tikoleranenge na ŵanyithu?
18 Ŵanthu awo mbakujiyuyura ŵakukolerana na ŵanji ndipo ŵakuŵa na mabwezi. Chifukwa wuli? Ŵakumanya kuti ŵanthu ŵanyake nawo ŵali na mikhaliro yiwemi ndipo ŵakuŵagomezga. Ŵanthu ŵakujiyuyura ŵakukondwa para ŵanji ŵachita makora mulimo uwo ŵangupika ndipo mwaluŵiro ŵakuŵalumba na kuŵachindika.—Ŵazgani Ŵaroma 12:10.
19. Chifukwa wuli tikwenera kugega kujikuzga?
19 Mwakupambana na ŵanthu ŵakujiyuyura, ŵanthu ŵakujikuzga vikuŵasuzga kuti ŵalumbe ŵanyawo, ŵakuwona kuti iwo pera ndiwo ŵakwenera kulumbika. Ŵakujiyaniska na ŵanyawo ndipo ŵakwambiska mzimu wa kuphalizgana. M’malo mwa kusambizga ŵanyawo na kuŵapako milimo, iwo ŵakuti, “Para ukukhumba kuti chinthu chichitike mwakwenelera, chita wekha.” Kanandi munthu wakujikuzga wakujiwona kuti ngwakuzirwa kuluska ŵanyake ndipo wakuŵa na sanji. (Gal. 5:26) Ŵanthu ŵanthena kanandi ubwezi ukukhora yayi na ŵanyawo. Usange tawona kuti tili na suzgo ili, tikwenera kulomba Yehova kuti watovwire ‘kusintha maghanoghano ghithu’ mwakuti nkharo iyi yileke kujintha misisi mwa ise.—Rom. 12:2.
20. Chifukwa wuli tikwenera kuŵa ŵakujiyuyura?
20 Tikuwonga chomene kuti Yehova ngwakujiyuyura. Tikuwona kuti ngwakujiyuyura na umo wakuchitira vinthu na ŵateŵeti ŵake, ndipo tikukhumba kumuyezga. Kweniso tikukhumba kuyezga viyelezgero vya ŵanthu ŵakujiyuyura ŵa mu Baibolo awo ŵakenda na Chiuta. Tiyeni nyengo zose tipeleke ntchindi na uchindami kwa Yehova. (Chivu. 4:11) Para tichitenge nthena, nase tiŵenge paubwezi na Yehova muyirayira chifukwa wakutemwa ŵanthu ŵakujiyuyura.
SUMU 123 Kujilambika ku Ndondomeko ya Chiuta
^ ndime 5 Munthu wakujiyuyura wakuŵa walusungu na wachiwuravi. Mphake kuyowoya kuti Yehova ngwakujiyuyura. Mu nkhani iyi, tiwonenge umo tingamuyezgera Yehova pa nkhani ya kujiyuyura. Tiwonengeso ivyo tingasambirako kwa Themba Sauli, ntchimi Daniyeli, na Yesu pa nkhani ya kujiyuyura.
^ ndime 58 MAZGU GHAKULONGOSORA CHITHUZI: Mubali mulara wakusambizga mubali wachinyamata mulimo wakupwelelera vigaŵa vya mpingo. Pamanyuma, mulara uyu wakumulekera mubali uyu kuti wachite payekha mulimo.
^ ndime 62 MAZGU GHAKULONGOSORA CHITHUZI: Mudumbu wakufumba mulara usange ntchakwenelera kuluta ku ukwati uwo wamuchitikira mu tchalitchi. Mulara uyu wakumulongora mudumbu ulongozgi wa mu Baibolo m’malo mwa kumuphalira maghanoghano ghake.
