1-2. Kuyana na Salimo 34:8, kasi tingachita wuli kuti timanye nadi kuti Yehova ni muwemi?

GHANAGHANIRANI kuti munthu munyake wakumupani chakurya icho imwe mundachichetepo. Nyengo zinyake mungamanya kuti chakurya icho ntchiwemi panji yayi mwakuchilaŵiska waka mu maso, kumanya ivyo ŵasazgako, sungu lake, panji kufumba ŵanji vya chakurya icho. Ndipouli, nthowa yekha iyo mungamanyira usange chakurya icho ntchiwemi panji yayi, ni para mungachicheta mwekha.

² Tingamanya kuti Yehova ni muwemi para tingaŵazga Baibolo na mabuku ghithu, kweniso para tingapulika ivyo ŵanyithu ŵakuyowoya vyakukhwaskana na vinthu viwemi ivyo Yehova waŵachitira. Kweni tingamanya makora kuti Yehova ni muwemi nadi, para ‘tingacheta’ tekha uwemi wake. (Ŵazgani Salimo 34:8.) Pasi apa pali chiyelezgero cha umo tingachitira. Tiyelezgere kuti tikukhumba uteŵeti unyake wanyengozose, kweni kuti tifiske chilato ichi tikwenera kusintha vinthu vinyake pa umoyo withu. Panji tili kuŵazgapo kanandi waka layizgo la Yesu lakuti para tikuŵika vinthu vya Ufumu pa malo ghakwamba, Yehova watipenge vinthu ivyo tikukhumbikwira nadi, kweni ise patekha tindawonepo kuti Yehova wakuchita ivi kwa ise. (Mat. 6:33) Kweni pakuti tikugomezga layizgo la Yesu, tikuyezga kusintha bajeti yithu kuti tileke kunanga ndalama zinandi, kusintha ndondomeko yithu yakugwilira ntchito kweniso tikuchita vyose ivyo tingafiska pa mulimo wakupharazga. Apo tikuchita ivi, tikujiwonera tekha kuti Yehova wakutipa nadi ivyo tikukhumbikwira. ‘Tikucheta’ kuti Yehova ni muwemi nadi.

3. Kuyana na Salimo 16:1, 2, mbanjani awo Yehova wakuŵachitira uwemi?

³ Yehova ni “muwemi ku wose,” nanga nkhu ŵanthu awo ŵakumumanya yayi. (Sal. 145:9; Mat. 5:45) Kweni chomene awo ŵakumutemwa na kumuteŵetera na mtima wose ŵakupokera  vitumbiko vinandi kufuma kwa iyo. (Ŵazgani Salimo 16:1, 2.) Tiyeni sono tidumbiskane vinyake mwa vinthu viwemi ivyo Yehova watichitira.

4. Kasi Yehova wakulongora wuli uwemi wake ku awo ŵamba kumutemwa?

⁴ Nyengo zose para tikulondezga ivyo Yehova wakutisambizga, tikuwona umo vikutovwilira pa umoyo withu. Mwachiyelezgero, tikati tamba kusambira vya iyo na kwamba kumutemwa, wakatovwira kuti tileke kughanaghana na kuchita vinthu ivyo wakutinkha. (Kol. 1:21) Ndipo tikati tajipeleka kwa iyo na kubatizika, tikawonaso uwemi wake chifukwa wakatipa njuŵi yituŵa na kuŵa nayo paubwezi.​—1 Pet. 3:21.

5. Kasi mukuwuwona wuli uwemi wa Yehova para muli mu uteŵeti?

⁵ Tikulutilira kuwona uwemi wa Yehova para tikupharazga. Kasi imwe muli ŵasoni? Ŵanthu ŵa Yehova ŵanandi ndimo ŵaliri. Panji apo mukaŵa kuti mundambe kuteŵetera Yehova, mukaghanaghanangako yayi kuti zuŵa linyake mungazakagogoda pa nyumba ya munthu wakuti mukuleka kumanyana nayo na kumupharazgira vya mu Baibolo. Kweni sono ndivyo mukuchita nyengo na nyengo. Ndipo Yehova wamovwirani kuti mukondwenge nawo upharazgi! Wamovwiraniso mu nthowa zinyake zakupambanapambana. Wamovwirani kuti muŵenge ŵakuzika para ŵanji ŵamuchitirani msinjiro mu upharazgi. Wakumovwiraniso kukumbukira lemba lakwenelera ilo mungadumbiskana na munthu wakunweka. Kweniso wali kumupani nkhongono kuti mulutilire kupharazga nanga ni para ŵanthu mu chigaŵa chinu ŵakutegherezga yayi.​—Yer. 20:7-9.

6. Kasi ivyo Yehova wakutisambizga, vikulongora wuli kuti ni muwemi?

⁶ Yehova walongoraso uwemi wake, pakutisambizga umo tingapharazgira. (Yoh. 6:45) Pa maungano ghithu ghamukati mwasabata, tikuwonelera viyelezgero viwemi vya umo tingapharazgira, ndipo tikuchiskika kuti tilondezgenge para tikupharazga. Pakwamba tingawopa kulondezga masachizgo ghaphya ghakupharazgira, kweni para tingaghayezga, tingawona kuti ngakovwira chomene mu chigaŵa chithu. Pa maungano gha mpingo kweniso maungano gha chigaŵa tikuchiskikaso kuti tiyezgenge nthowa zakupambanapambana pa kupharazga nanga ni izo tindachitepo nakale. Nangauli tingachita wofi kupharazga mu nthowa ziphya, kweni para tachita nthena, Yehova wangatitumbika. Sono tiwonengeko vinyake mwa vitumbiko ivyo tingasanga usange tikuyezga nthowa ziphya pakupharazga, na chilato chakuti timupe viwemi chomene Yehova, kwambura kupwelerako kanthu pa umo vinthu viliri pa umoyo withu. Kufuma apo tidumbiskanenge umo tingachitira kuti tisazgireko uteŵeti withu.

7. Kasi titumbikikenge wuli para tikuyezgayezga kusazgirako uteŵeti withu?

⁷ Tikuŵa paubwezi uwemi chomene na Yehova. Wonani ivyo vikachitikira mubali munyake zina lake Samuel, * uyo wakuteŵetera lumoza na muwoli wake ku Colombia. Ŵakutorana aŵa ŵakakondwanga chomene kuchita upayiniya pa mpingo wakwawo, kweni ŵakakhumbanga kusazgirako uteŵeti wawo mwakovwira mpingo uwo ukakhumbikwiranga wovwiri. Kuti ŵafiske chilato chawo ichi, ŵakeneranga kusida vinthu vinyake ivyo ŵakavitemwanga. Samuel wakuti: “Tikalondezga fundo ya pa Mateyu 6:33, ndipo tikaleka kugura vinthu vyambura kukhumbikwa chomene. Kweni chithu chakusuzga chomene chikaŵa kuleka nyumba iyo tikakhalangamo. Yikatikondweskanga chomene umo ŵakayizengera kweniso tikalipiranga yayi.” Kweni ŵati ŵasamira mu mpingo unyake, ŵakazizwa kuti ŵakakhumbikwiranga ndalama zinandi yayi pa umoyo pakuyaniska na uko ŵakaŵa pakwamba. Samuel wakuti: “Tawona umo Yehova wakutilongozgera na kuzgora malurombo ghithu. Tikuwona kuti Yehova wakukondwa nase. Ndipo tawona chitemwa chake munthowa zapadera chomene.” Kasi namwe mungasazgirako uteŵeti winu? Usange ni  nthena, manyani kuti musendelerenge chomene kwa Yehova, ndipo wamupaninge ivyo mukukhumbikwira.​—Sal. 18:25.

8. Kasi mungasambirako vichi ku ivyo wakayowoya Ivan na Viktoria?

⁸ Tikuŵa ŵakukondwa para tikuteŵetera Yehova. Wonani ivyo wakuyowoya Ivan na Viktoria, banja ilo likuchita upayiniya ku Kyrgyzstan. Ŵakakhalanga umoyo wambura kukhumba vinandi mwakuti ŵajipelekenge pa uteŵeti uliwose, kusazgapo wakuzenga. Ivan wakuti: “Tikalimbikiranga chomene kuchita uteŵeti uliwose. Nangauli paumaliro wa zuŵa lililose tikavukanga chomene, kweni tikaŵanga na mtende wa mu mtima kweniso tikaŵanga ŵakukhorwa, pakumanya kuti nkhongono zithu tamalira pa mulimo wa Ufumu. Tikaŵangaso ŵakukondwa chomene chifukwa tikaŵangaso na ŵabwezi ŵanandi ŵaphya, kweniso kukumbuka vinthu viwemi ivyo tikachitira lumoza na ŵabwezi aŵa.”—Mrk. 10:29, 30.

9. Kasi mudumbu munyake uyo wali na masuzgo ghakupambanapambana wachita wuli kuti wasazgireko uteŵeti wake, ndipo paŵa uwemi wuli?

⁹ Tikuŵa ŵakukondwa para tikuteŵetera Yehova, nanga ni para tikusangana na masuzgo. Mwachiyelezgero, Mirreh wa ku West Africa, uyo ni muchekuru kweniso chokoro, wakaŵa dokotala. Wati wapumura pa ntchito wakamba upayiniya. Mirreh wali na nthenda yakuŵinya chomene iyo yikumupangiska kuti wendenge mwakusuzgikira, ndipo wakufiska waka kupharazga ora limoza para wakupharazga ku nyumba na nyumba. Kweni wakufiska kupharazga maora ghanandi para wakuchita upharazgi wa ku malo uko kukusangika ŵanthu ŵanandi. Ndipo wali na maulendo ghakuwelerako ghanandi kweniso masambiro gha Baibolo, ndipo ghanyake wakuchitira pa telefoni. Kasi ntchivichi chikamupangiskanga Mirreh kuti wachitenge vinandi pakuteŵetera Yehova? Iyo wakuti: “Nkhumutemwa chomene Yehova na Khristu Yesu. Ndipo nyengo na nyengo nkhumulomba Yehova kuti wanovwire kuchita vinandi mu uteŵeti.”​—Mat. 22:36, 37.

10. Kuyana na 1 Petrosi 5:10, kasi ŵanthu ŵakujipeleka ŵakupokera vichi kufuma kwa Yehova?

¹⁰ Tikupokera masambiro ghakusazgikira kwa Yehova. Kenny, uyo wakuchita upayiniya ku Mauritius, wakawona kuti fundo iyi njaunenesko. Wati wasambira unenesko, wakaleka masambiro gha ku yunivesite na kubatizika, ndipo wakamba kuchita uteŵeti wanyengo zose. Iyo wakuti, “Nkhuyezgayezga kuŵa nga ni ntchimi Yesaya, iyo yikati: ‘Ndine pano. Nitumani!’” (Yes. 6:8) Kenny wachitako milimo yakupambanapambana ya kuzenga, kweniso kovwirapo pa mulimo wa kung’anamura mabuku kuya mu chiyowoyero chawo. Iyo wakuti: “Nkhapokera masambiro agho ghakanovwira kuŵa na maluso agho ghakakhumbikwanga kuti nifiske uteŵeti wane.” Kweni wakasambira vinandi padera pa maluso gha umo wangafiskira uteŵeti wake. Wakayowoyaso kuti: “Nkhasambiraso vinthu ivyo vikaŵa vinonono kwa ine, kweniso nkhasambira mikhaliro iyo nkheneranga kuŵa nayo kuti niŵe paubwezi wakukhora chomene na Yehova.” (Ŵazgani 1 Petrosi 5:10.) Panji namwe mungasintha vinthu vinyake pa umoyo winu mwakuti Yehova wamusambizgani munthowa zakupambanapambana.

11. Kasi ŵadumbu ŵanyake ku South Korea ŵali kuchita wuli kuti ŵapharazgenge, ndipo chachitika ntchivichi? (Wonani chithuzi cha pa chikopi.)

¹¹ Nanga Mbakaboni awo ŵakamba ni kale unenesko, nawo ŵakukhumbikwira kusambizgika nthowa ziphya zakupharazgira. Mu nyengo ya muliri wa COVID-19 iyi, ŵabali ŵalara ŵa mpingo unyake ku South Korea, ŵakalemba kuti: “Ŵanyake awo pakwamba ŵakawonanga kuti ŵangafiska yayi kupharazga chifukwa cha ulwari, sono ŵakupharazga kwizira mu nthowa ziphya za tekinoloje panji kuti kwizira pa vidiyokonferensi. Ŵadumbu ŵatatu awo ŵali na vyaka vya m’ma 80 ŵali kusambira umo ŵangapharazgira na nthowa ziphya izi, ndipo ŵakupharazga pafupifupi zuŵa lililose.” (Sal. 92:14, 15) Kasi namwe mungatemwa kusazgirako uteŵeti winu kuti mulutilire kucheta  uwemi wa Yehova? Wonani vinyake mwa ivyo mungachita kuti mufiske chilato ichi.

12. Kasi Yehova walayizga vichi ku awo ŵakumugomezga?

¹² Gomezgani Yehova. Iyo wakulayizga kuti watipungulirenge vitumbiko vinandi chomene para tamugomezga na kuchita vyose ivyo tingafiska kuti timuteŵetere. (Mal. 3:10) Mudumbu munyake wa ku Colombia zina lake Fabiola wali kujiwonera yekha umo Yehova wafiskira layizgo ili kwa iyo. Wati wabatizika waka, iyo wakakhumbanga kuchita upayiniya wanyengozose. Kweni mfumu wake pamoza na ŵana ŵawo ŵatatu, ŵakathembanga iyo pa nkhani ya kusanga vyakukhumbikwira pa umoyo. Ntheura apo nyengo yikakwana yakuti wapumure pa ntchito, wakalomba chomene kwa Yehova kuti wamovwire. Iyo wakuti: “Kanandi ndalama za penshoni zikuchedwa chomene kuti zifume, kweni ine nkhamba kupokera ndalama zane pati pajumpha waka mwezi umoza. Ichi chikaŵa chakuzizika chomene!” Pati pajumpha waka myezi yiŵiri wakambapo kuchita upayiniya. Sono wali na vyaka vya m’ma 70, ndipo wachita upayiniya kwa vyaka vyakujumpha 20. Kufuma apo wakambira upayiniya, wawovwira ŵanthu 8 kufika pa kubatizika. Iyo wakuti: “Nangauli nyengo zinyake nkhuŵavya nkhongono, kweni Yehova wakunovwira zuŵa lililose kuti nilutilire kuchita upayiniya.”

13-14. Kasi ni nkhani wuli izo zingatovwira kuti tigomezgenge Yehova na kusazgirako uteŵeti withu?

¹³ Sambiraniko ku awo ŵakagomezga Yehova. Mu Baibolo muli nkhani zinandi za ŵanthu awo ŵakajipeleka chomene pakuteŵetera Yehova. Pali nkhani zinandi izo zikulongora kuti ŵateŵeti  ŵanyake ŵa Yehova ŵakatumbikika pamanyuma pakuti ŵalongora kuti ŵakuthemba nadi Yehova. Mwachiyelezgero, Abrahamu wakatumbikika pamanyuma pakuti wafumapo panyumba, “nangauli [pakwamba] wakamanyanga yayi uko wakalutanga.” (Heb. 11:8) Yakhobe nayo wakapokera thumbiko lapadera wati walimbana dankha na mungelo kwa nyengo yitali. (Gen. 32:24-30) Apo Ŵaisrayeli ŵakaŵa pafupi kunjira mu Charu cha Layizgano, ŵakambuka Mlonga wa Yorodani, ŵasembe ŵati ŵanjira dankha mu maji gha mu mlonga uwu.​—Josh. 3:14-16.

¹⁴ Mungasangaso chandulo chomene na nkhani za ŵateŵeti ŵa Yehova ŵa mazuŵa ghano awo ŵakathemba Yehova na kusazgirako uteŵeti wawo. Mwachiyelezgero, mubali munyake zina lake Payton na muwoli wake Diana, ŵakukondwa chomene para ŵakuŵazga nkhani za ŵabali na ŵadumbu awo ŵakasazgirako uteŵeti wawo, nga ni nkhani izo zikusangika pa mutu wakuti “Ŵakajipeleka na Mtima Wose.” * Payton wakuti: “Para tikuŵazga ivyo vikaŵachitikira, vikuŵa nga tikuwona munthu wakusangwa na chakurya chakunowa. Apo tikaŵazganga chomene nkhani izi tikakhumbanga chomene nga nase ‘tingacheta na kuwona kuti Yehova ni muwemi.’” Pamanyuma, Payton na Diana ŵakasamira uko kukakhumbikwanga ŵapharazgi ŵanandi. Kasi muli kuŵazgapo nkhani izi? Ndipo kasi muli kuwonelerapo vidiyo ya mutu wakuti Kupharazga ku Chigaŵa Chakutali—Australia na Kulalikira M’dera Lakutali M’dziko la Ireland agho ghakusangika pa jw.org? Vinthu ivi vingamovwirani kumanya nthowa zinyake izo mungachita kuti musazgireko uteŵeti winu.

15. Kasi kuchezga na ŵabwezi ŵawemi kungatovwira wuli?

¹⁵ Musankhenge mabwezi ghawemi. Kanandi chikuŵa chipusu kucheta chakurya icho tindalyepo nakale, para awo tikuchezga nawo ndicho ŵakutemwa. Mwakuyana waka, para tikutemwa kuchezga na awo ŵakuchita vinandi pakuteŵetera Yehova, nase tipenjenge nthowa za umo tingachitira kuti tisazgireko uteŵeti withu. Ŵakutorana ŵanyake, Kent na Veronica ŵakawona kuti uwu mbunenesko nadi. Kent wakuti: “Ŵabwezi ŵithu na mbumba yakwithu ŵakatichiska kuti tichiteko mauteŵeti ghakupambanapambana. Chifukwa cha kuchezga chomene na ŵanthu awo ŵakudangizga vya Ufumu, nase vikatovwira kuŵa na chikanga kuti tiyezgeko nthowa ziphya zakuchitira uteŵeti.” Kent na Veronica ŵakuchita upayiniya wapadera ku Serbia.

16. Nga umo ntharika ya Yesu iyo yili pa Luka 12:16-21 yikulongolera, chifukwa wuli tikwenera kuŵa ŵakukhumbisiska kujinora vinthu vinyake?

¹⁶ Mujinorenge vinthu vinyake chifukwa cha kuteŵetera Yehova. Tikukhumbikwira kusida vinthu vyose yayi ivyo tikusangwa navyo kuti titeŵetere Yehova. (Muph. 5:19, 20) Ndipouli, para tikutondeka kuchita vinandi pakuteŵetera Yehova chifukwa cha kutemwa vinthu vyakuthupi, mbwe nase tiyanenge waka na munthu wa mu ntharika ya Yesu uyo wakajiwunjikira vinthu vyakukondweska na kusulako Chiuta. (Ŵazgani Luka 12:16-21.) Mubali munyake zina lake Christian, uyo wakukhala ku France, wakuti: “Nkhamaliranga nyengo yichoko na nkhongono zichoko pakuteŵetera Yehova kweniso kovwira mbumba yane.” Iyo na muwoli wake ŵakasankha kuti ŵambe kuchita upayiniya. Kweni kuti ŵafiske chilato ichi, ŵakeneranga kuleka ntchito zawo. Kuti ŵasangenge vyakukhumbikwa pa umoyo, ŵakamba bizinesi yipusu, kweniso ŵakasambira kukhorwa na vichoko ivyo ŵakasanganga. Kasi mbakukondwa chifukwa chakuti ŵakasida vinthu vinyake mwakuti ŵambe upayiniya? Christian wakuti: “Tikukondwa chomene na uteŵeti withu, kweniso para tikuwona ŵanthu awo tikusambira nawo Baibolo kweniso awo tikuwelerako ŵakumanya vyakukhwaskana na Yehova.”

17. Kasi ntchivichi icho nyengo zinyake chingatitondeska kuyezga nthowa ziphya zakupharazgira?

 ¹⁷ Muŵenge ŵakukhumbisiska kuyezga nthowa ziphya zakupharazgira. (Mil. 17:16, 17; 20:20, 21) Shirley, uyo ni mupayiniya ku United States, wali kusintha umo wakuchitira uteŵeti wake mu nyengo ya COVID-19 iyi. Pakwamba wakaziwulikanga kuti wayezge upharazgi wa pa foni. Kweni wati wasambira pa nyengo ya sabata yapadera, wakamba kupharazga chomene kwizira pa foni. Iyo wakuti: “Pakwamba nkhachitanga wofi, kweni pasono nkhukondwa chomene na upharazgi uwu. Tikupharazgira ŵanthu ŵanandi kuluska apo tikapharazganga ku nyumba na nyumba!”

18. Kasi ntchivichi chingatovwira para tasangana na suzgo apo tikuyezgayezga kusazgirako uteŵeti withu?

¹⁸ Mujiŵikirenge chilato na kuyezgayezga kuchifiska. Para takumana na suzgo linyake, tikulomba kwa Chiuta kuti watovwire kweniso kughanaghana mwakupwelelera kuti tisange nthowa yiwemi ya kumazgira suzgo ilo. (Zinth. 3:21) Sonia, uyo wakuchita upayiniya wanyengozose mu kagulu ka chiyowoyero cha Chiromany ku Europe, wakuti: “Nkhutemwa kulemba vilato vyane pa pepara na kuŵika pa malo ghakuwonekera. Nili kudinda misewu yiŵiri pa pepara iyo yikuluta ku malo ghakupambana ndipo nili kuŵika pa thebulu lane. Ndipo para nkhukhumbikwira kuti nisankhe pa nkhani yinyake, nkhulaŵiska pa misewu iyi na kughanaghanirapo usange ivyo nasankha vinovwirenge kufiska vilato ivyo nili kujiŵikira.” Sonia wakuyezgayezga kuti wawonenge vinthu mwakwenelera para wasangana na suzgo. Iyo wakuti: “Nyengo yiliyose para vinthu vyasintha pa umoyo wane nkhwenera kusankha usange vinthu ivyo viŵenge chiliŵa chakunijandizga kufiska chilato chane, panji buliji lakunovwira kufiska chilato chane, vyose vikuthemba pa umo ningawonera vinthu.”

19. Kasi tingalongora wuli kuti tikumuwonga Yehova chifukwa cha vinthu viwemi ivyo wali kutipa?

¹⁹ Yehova wakutitumbika mu nthowa zinandi. Tingalongora kuti tikumuwonga para tikuchita vyose ivyo tingafiska kuti wapike uchindami. (Heb. 13:15) Ivi vingasazgapo kuyezga nthowa ziphya kuti tisazgireko uteŵeti withu, ndipo para tachita nthena vingawovwira kuti Yehova wasazgireko thumbiko lithu. Zuŵa lililose, tiyeni tipenje nthowa za umo ‘tingachetera na kuwona kuti Yehova ni muwemi.’ Para tichitenge nthena tiŵenge nga ni Yesu uyo wakayowoya kuti: “Chakurya chane ntchakuti nichite khumbo la uyo wakanituma na kufiska mulimo wake.”​—Yoh. 4:34.