NKHANI YAKUSAMBIRA 33
Mukondwenge Chifukwa cha Ivyo Mukumuchitira Yehova
“Ntchiwemi kusangwa na ivyo maso ghawona kuluska kuhangayika waka na makhumbiro.”—MUPH. 6:9.
SUMU 111 Vifukwa Vyakuŵira na Chimwemwe
IVYO VILI MU NKHANI IYI *
1. Kasi ŵanandi ŵakuchita vichi kuti ŵateŵetere Yehova mwakukwana?
APO umaliro wa charu ichi ukusendelera chomene, tili na ntchito yinandi yakuti tichite. (Mat. 24:14; Luka 10:2; 1 Pet. 5:2) Tose tikukhumba kumuteŵetera mwakukwana Yehova. Ndipo ŵanandi ŵakusazgirako mauteŵeti ghawo. Ŵanandi ŵakukhumba kuchitako upayiniya. Ŵanyakeso ŵakukhumba kukateŵetera ku Beteli, panji kuchitako mulimo wakuzenga. Kweniso ŵabali ŵanandi ŵali na chilato chakuti ŵaŵe ŵateŵeti ŵakovwira panji ŵabali ŵalara. (1 Tim. 3:1, 8) Yehova wakukondwa chomene para wakuwona ŵateŵeti ŵake ŵakukhumbisiska kumuteŵetera.—Sal. 110:3; Yes. 6:8.
2. Kasi nyengo zinyake tingajipulika wuli para tikutondeka kufiska vilato vithu vyauzimu?
2 Kweni nyengo zinyake tingakhuŵara panji kugongowa para tikuwona kuti vilato vithu vikufiskika yayi nangauli tayezgayezga kwa nyengo yitali. Nyengo zinyakeso tingagongowa chifukwa chakuti tingachita yayi mauteŵeti ghanyake chifukwa cha uchekuru panji masuzgo ghanyake. (Zinth. 13:12) Umu ndimo vinthu viliri na Melissa. * Iyo wakukhumba chomene kukateŵetera pa Beteli panji kusambirako Sukulu ya Ŵapharazgi ŵa Ufumu, kweni sono vingachitika yayi. Iyo wakuti: “Pasono vyaka vyane vili kujumpha. Nilijeso mwaŵi uwu. Nyengo zinyake ivi vikunigongoweska.”
3. Kasi ŵanyake ŵangakhumbikwira kuchita dankha vichi kuti ŵaŵe ŵakwenelera mauteŵeti ghanyake?
3 Ŵanyake nangauli ŵangaŵa kuti mbachinyamata kweniso ŵambura kulwaralwara, kweni ŵakukhumbikwira dankha kuti ŵaŵe na mikhaliro yinyake iyo yingaŵawovwira kuti ŵaŵe ŵakwenelera kupika mauteŵeti ghanyake. Mwachiyelezgero, ŵangaŵa kuti mbamahara, ŵakughanaghana mwaluŵiro pakuchita vinthu, kweniso ŵakujipeleka kuchita milimo. Kweni ŵangakhumbikwira kusambira kuzikira pakuchita vinthu, kuchita milimo mu ndondomeko, kweniso kuŵa ŵantchindi. Para mukuŵikapo mtima kuti muŵe na mikhaliro yiwemi, mbwenu mupikenge mauteŵeti ghakusazgikira. Wonani ivyo vikachitikira Nick. Apo wakaŵa na vyaka 20 wakakhuŵara chomene chifukwa chakuti wakaŵikika yayi kuŵa muteŵeti wakovwira. Iyo wakuti: “Nkhawonanga kuti namunthu ine nkhwenera kuti nili na suzgo linyake.” Kweni Nick wakawelera nyuma yayi. Wakalimbikiranga milimo iyo wakapikanga mu mpingo kweniso kupharazga. Sono wakuteŵetera mu Komiti ya Munthavi.
4. Kasi mu nkhani iyi tidumbiskanenge vichi?
4 Kasi imwe mwagongowa chifukwa chakuti mundafiske chilato chinu chinyake pakuteŵetera Yehova? Usange ni nthena, muphalirani Yehova umo mukujipulikira. (Sal. 37:5-7) Kweniso mungafumbaso ŵabali ŵakukhwima mwauzimu kuti ŵamuphaliraniko masachizgo agho ghangamovwirani kuti muchitenge makora pakuteŵetera Chiuta. Ndipo para ŵamuphalirani, ŵikanipo mtima kulondezga masachizgo ghawo. Para muchitenge nthena, vimovwiraninge kuti mufiske vilato vinu pakuteŵetera Chiuta. Kweni nga umo vikaŵira na Melissa, uyo tamuzunura kukwambilira, nyengo zinyake uteŵeti uwo mukukhumba ngwakuti mungawuchita yayi panyengo yasono chifukwa cha umo vinthu viliri kwa imwe. Kasi mungachita wuli kuti mulutilire kuŵa ŵakukondwa? Kuti tizgore fumbo ili, mu nkhani iyi tidumbiskanenge (1) ivyo vingatipa chimwemwe, (2) umo tingachitira kuti tilutilire kuŵa ŵachimwemwe, na (3) vilato ivyo tingajiŵikira kuti tisazgireko chimwemwe chithu.
IVYO VINGATIPA CHIMWEMWE
5. Kasi tikwenera kuŵika mtima pa vichi kuti tiŵe ŵachimwemwe? (Mupharazgi 6:9)
5 Lemba la Mupharazgi 6:9, likutovwira kumanya ivyo tingachita kuti tiŵe ŵachimwemwe. (Ŵazgani.) Munthu uyo wakusangwa “na ivyo maso ghawona” wakukhorwa na ivyo wali navyo, kuyana na umo vinthu viliri kwa iyo. Kweni munthu uyo wakuhangayika waka na makhumbiro ghake, wakukhalira waka kudokera vinthu ivyo wangakwaniskaso yayi kuvisanga. Kasi tikusambirapo vichi apa? Kuti tiŵe ŵakukondwa, tikwenera kuŵika mtima pa vinthu ivyo tili navyo kweniso pa vinthu ivyo tingakwaniska nadi kuvisanga.
6. Kasi tisambirenge ntharika wuli, ndipo tiwonenge vichi chomene?
6 Kweni kasi vingachitika nadi kuti munthu wakhorwe na ivyo wali navyo? Ŵanandi ŵakuwona kuti ivi vingachitika yayi, chifukwa nyengo na nyengo, taŵanthu tikubowozga vinthu vinyake vyasono. Kweni vingachitika. Tingaŵa ŵakukondwa nadi na vinthu ivyo tili navyo pasono. Kasi tingachita wuli nthena? Kuti tisange zgoro, tiyeni tiwone ntharika ya matalente iyo Yesu wakayowoya, iyo yili pa Mateyu 25:14-30. Mu ntharika iyi, chomene tiwonenge umo tingachitira kuti tiŵe ŵakukondwa na ivyo tili navyo kweniso umo tingachitira kuti chimwemwe chithu chilutilire kukura.
UMO TINGACHITIRA KUTI TILUTILIRE KUŴA ŴACHIMWEMWE
7. Longosorani mwakudumura ntharika ya Yesu ya matalente.
7 Mu ntharika iyi, mwanalume munyake wakaŵa pafupi kuluta ku charu chinyake. Kweni pambere wandanyamuke, wakachema ŵazga ŵake na kuŵapa matalente kuti waliyose wachitire malonda. * Munthu uyu wakapeleka matalente kwa muzga waliyose kuyana na maluso ghake. Muzga wakwamba wakamupa matalente ghankhondi, munyake ghaŵiri, ndipo waumaliro wakamupa talente limoza. Ŵazga ŵaŵiri ŵakwambilira ŵakalimbikira kuchita malonda na kusangirapo matalente ghanyake. Kweni muzga wachitatu palije icho wakachitapo na ndalama iyo ŵakamupa, ndipo ntchito yikamumalira.
8. Chifukwa wuli muzga wakwamba wakwenera kuti wakakondwa?
8 Muzga wakwamba wakwenera kuti wakakondwa chomene fumu yake yati yamupa matalente ghankhondi. Izi zikaŵa ndalama zinandi chomene, ndipo vikalongora kuti fumu yake yikamugomezganga chomene! Kweni wuli pakuyowoya vya muzga wachiŵiri? Panyake mphanyi wakagongowa chifukwa wakapokera ndalama zichoko pakuyaniska na muzga munyake yura. Kweni kasi wakachita wuli?
Kasi tingasambirako vichi kwa muzga wachiŵiri uyo wakuyowoyeka mu ntharika ya Yesu? (1) Abwana ŵake ŵakamupa matalente ghaŵiri. (2) Wakalimbikira kuti wasangirepo ndalama zinyake pa izo abwana ŵake ŵakamupa. (3) Pa ndalama izo abwana ŵake ŵakamupa wakasangirapo kaŵiri (Wonani ndime 9-11)
9. Kasi ni vichi ivyo Yesu wakayowoyapo yayi vya muzga wachiŵiri? (Mateyu 25:22, 23)
9 Ŵazgani Mateyu 25:22, 23. Yesu wakayowoyapo yayi kuti muzga wachiŵiri wakakhuŵara chifukwa chakuti wakapika matalente ghaŵiri pera. Kweniso Yesu wakayowoyapo yayi kuti muzga uyu wakadandawura kuti: ‘Chifukwa wuli ine fumu yane yanipa ndalama zichoko? Asi nane nkhulimbikira nga ni muzga munyane uyo ŵamupa matalente ghankhondi! Pakuti fumu yane yikuniwona kuti ine nili wakutondeka, lekani nkhawundire waka pasi ndalama zawo izi na kwamba kuchita vyane.’
10. Kasi muzga wachiŵiri wakachita wuli na matalente agho wakapika?
10 Muzga wachiŵiri nayo wakachita nga ni muzga wakwamba, wakawona kuti mulimo uwo wakapika ukaŵa wakuzirwa, ndipo wakalimbikira chomene kuchitira malonda fumu yake. Ntheura wakasangiraposo matalente ghanyake ghaŵiri. Muzga uyu wakapika njombe na fumu yake chifukwa cha kulimbikira kwake. Fumu yake yikakondwa chomene ndipo yikamupaso milimo yinyake yakusazgikira.
11. Kasi tingachita wuli kuti tisazgireko chimwemwe chithu?
11 Mwakuyana waka, nase tingaŵa ŵakukondwa usange tikulimbikira mulimo uliwose uwo tikuchita pakuteŵetera Yehova. ‘Mutangwanikenge chomene’ na ntchito yakupharazga kweniso milimo ya mpingo. (Mil. 18:5; Heb. 10:24, 25) Munozgekerenge makora maungano kuti mukazgore fundo zakukhozga. Nkhani yiliyose iyo mwapika mu sukulu pa maungano ghamukati mwasabata muyiwonenge kuti njakuzirwa. Usange ŵamupemphani kuti muchiteko mulimo unyake, chitani pa nyengo yake kweniso mwakugomezgeka. Lekani kudelera ntchito yiliyose iyo ŵamupani na kuyichita mwadango waka panji mwakuchimbilira. Ŵikanipo mtima kusazgirako luso lwinu pa ntchito iyo muli kupika. (Zinth. 22:29) Para mukulimbikira chomene kuteŵetera Yehova, muŵenge nayo paubwezi wakukhora, ndipo muŵenge ŵakukondwa chomene. (Gal. 6:4) Kweniso chizamuŵa chipusu kuti namwe mukondwenge na awo ŵapika uteŵeti uwo namwe mwawukhumbanga chomene.—Rom. 12:15; Gal. 5:26.
12. Kasi ntchivichi chikawovwira Melissa na Nick kuti ŵaŵe ŵakukondwa?
12 Mwamukumbuka Melissa uyo tamuzunura mu ndime 2, uyo wakukhumba chomene nga nayo wangaluta ku Beteli panji kunjira Sukulu ya Ŵapharazgi ŵa Ufumu? Nangauli wandafiske vilato vyake ivi, kweni iyo wakuti: “Nkhuŵikapo mtima chomene kuchita upayiniya, kweniso kusambira nthowa zinyake zakupharazgira. Ivi vyapangiska kuti niŵe wachimwemwe chomene.” Wuli pakuyowoya vya Nick? Kasi wakachita wuli nangauli wakakhuŵara chifukwa chakuti wakaŵikika yayi kuŵa muteŵeti wakovwira? Iyo wakuti: “Nkhaŵika mtima pa ivyo ningachitako, nga nkhupharazga kweniso kuzgora mazgoro ghakukhozga pa maungano. Kweniso nkhapempha uteŵeti wa ku Beteli, ndipo ŵakanichema chaka chakulondezgapo.”
13. Kasi chichitikenge ntchivichi usange mukulimbikira kufiska mulimo uwo mukuchita pasono? (Mupharazgi 2:24)
13 Usange mukulimbikira chomene mulimo uwo mukuchita pasono, kunthazi mungaŵa na mwaŵi wakupika mauteŵeti ghakusazgikira, nga umo vikachitikira kwa Nick. Kweni nanga vingachitika yayi nga umo viliri kwa Melissa, napo mungaŵaso ŵachimwemwe chomene ndipo mungaŵa ŵakukhorwa na ivyo mukuchitira Yehova. (Ŵazgani Mupharazgi 2:24.) Kweniso tikukayika yayi kuti muŵenge ŵakukondwa chomene chifukwa cha kumanya kuti ivyo mukuchita vikukondweska Fumu yithu, Yesu Khristu.
VILATO IVYO TINGAJIŴIKIRA KUTI TISAZGIREKO CHIMWEMWE CHITHU
14. Kasi nyengo zose tikwenera kukumbuka vichi apo tikughanaghanira za vilato vithu vya kuteŵetera Yehova?
14 Kasi kuŵika mtima pa uteŵeti uwo tikuchita pasono, chikung’anamura kuti tileke kupenjaso nthowa zinyake kuti tisazgireko uteŵeti withu kwa Yehova? Yayi. Tingasazgirako uteŵeti withu mwakujiŵikira vilato ivyo vingatovwira kuti tisazgirengeko maluso ghithu pa kupharazga, kusambizga kweniso kuyezgayezga kovwira ŵabali na ŵadumbu ŵithu. Tingafiska vilato ivi, usange tikuŵikapo mtima kuchita vinthu mwamahara na kovwira ŵanji m’malo mwakujighanaghanira waka tekha.—Zinth. 11:2; Mil. 20:35.
15. Kasi ni vilato uli vinyake ivyo vingapangiska kuti musazgireko chimwemwe chinu?
15 Kasi mungajiŵikira vilato wuli? Pemphani Yehova kuti wamovwirani kumanya vilato ivyo mungajiŵikira. (Zinth. 16:3; Yak. 1:5) Kasi mungajiŵikira chimoza mwa vilato ivyo tadumbiskana mu ndime yakwamba, nga nkhuchitako upayiniya wakanyengo, upayiniya wanyengo zose, kukateŵetera pa Beteli, panji kuchitako mulimo wa kuzenga? Panji nyengo zinyake mungasambira chiyowoyero chinyake na chilato chakuti mupharazgirenge ŵanthu ŵa chiyowoyero chinyake, panji kupharazga mu chigaŵa icho ŵanthu ŵakuyowoya chiyowoyero chinyake. Kuti mumanye vinandi pa nkhani ya vilato ivi, wonani mutu 10 mu buku la Ŵakunozgeka Kuchita Khumbo la Yehova kweniso panji mungadumbiskana na ŵalara ŵa mu mpingo winu. * Apo mukuyezgayezga kuti mufiske chilato icho mwajiŵikira, ŵanji ŵawonenge kuti mukuluta panthazi mwauzimu, ndipo namwe chimwemwe chinu chisazgikirenge.
16. Kasi mungachita wuli usange mukuwona kuti mungafiska yayi kuŵa na vilato ivyo tadumbiskana?
16 Kweni wuli usange pasono mungakwaniska yayi kuchitako chimoza mwa vilato ivyo tadumbiskana mu nkhani yino? Mungajiŵikira chilato chinyake icho mungafiska. Ghanaghaniranipo vinthu vyakulondezgapo ivi.
Kasi ntchilato wuli chimoza icho mungajiŵikira? (Wonani ndime 17) *
17. Kuyana na 1 Timote 4:13, 15, kasi mubali wangachita wuli kuti waŵe na luso pakusambizga?
17 Ŵazgani 1 Timote 4:13, 15. Usange ndimwe mubali wakubatizika, mungasazgirako luso lwa kuyowoya kweniso kusambizga. Chifukwa wuli? Chifukwa para mukuyezgayezga kuti muŵerengenge makora, kuyowoya makora, na kusambizga makora, awo ŵakumutegherezgani ŵapindurenge. Yezgani kujiŵikira chilato cha kuŵazga kabuku ka Jipelekani pa Kuŵazga na Kusambizga na kulondezga ivyo mutu uliwose ukuyowoya. Mutu uliwose muwusambirenge pawekhapawekha, na kuyezgelera panyumba ivyo mwasambira. Ndipo para mukudumba nkhani, yezgani kulondezga ivyo mwasambira. Fumbani masachizgo kwa mubali uyo wakupeleka ulongozgi wapadera, * panji ku ŵalara ŵanyake awo “ŵakulimbikira kuyowoya na kusambizga mazgu gha Chiuta.” (1 Tim. 5:17) Chilato chinu chingaŵanga waka kulondezga ivyo kaburosha kakuyowoya yayi, kweni kovwira ŵategherezgi ŵinu kuŵa na chipulikano chakukhora kweniso kuchita ivyo ŵakusambira. Para muchitenge nthena, muŵenge ŵakukondwa chomene kweniso ŵategherezgi ŵinu nawo ŵakondwenge.
Kasi ntchilato wuli chimoza icho mungajiŵikira? (Wonani ndime 18) *
18. Kasi ntchivichi chingatovwira kuti tipharazgenge mwaluso?
18 Tose tili na mulimo wa kupharazga na kupanga ŵasambiri. (Mat. 28:19, 20; Rom. 10:14) Kasi mungasazgirako maluso ghinu pa mulimo wakuzirwa uwu? Ŵani na chilato apo mukusambira kabuku ka Jipelekani pa Kuŵazga na Kusambizga kuti mulondezgenge ivyo mwasambira. Mungasambiraso maluso ghanyake mu kabuku ka Uteŵeti na Umoyo Wachikhristu kweniso mavidiyo agho ghakuŵa mu chigaŵa cha pharazgani mwaluso pa maungano ghamukati mwasabata. Yezgani kulondezga masachizgo ghakupambanapambana na kuwona agho ghakukora makora chomene kwa imwe. Para mulondezgenge masachizgo agha, namwe mujiwonerenge mwekha chimwemwe icho munthu wakuŵa nacho para wakupharazga kweniso kusambizga mwaluso.—2 Tim. 4:5.
Kasi ntchilato wuli chimoza icho mungajiŵikira? (Wonani ndime 19) *
19. Kasi mungachita wuli kuti muŵe na mikhaliro yiwemi Yachikhristu?
19 Apo mukughanaghanira za chilato icho mungajiŵikira, mungaluwanga yayi chilato chakuzirwa chomene, icho nkhuŵa na mikhaliro yiwemi iyo yikukondweska Chiuta. (Gal. 5:22, 23; Kol. 3:12; 2 Pet. 1:5-8) Kasi mungachita wuli kuti mufiske chilato ichi? Tiyelezgere kuti mukukhumba kuŵa na chipulikano chakukhora. Mungachita makora kuŵerenga nkhani mu mabuku ghithu, izo zili na masachizgo ghakovwira kuti muŵe na chipulikano chakukhora. Mungapinduraso chomene usange mungawonelera mavidiyo agho ghakuŵa pa JW Broadcasting® agho ghakulongora umo ŵabali na ŵadumbu ŵakupambanapambana ŵakulongolera chipulikano chakukhora apo ŵakulimbana na masuzgo ghakupambanapambana. Ndipo pamanyuma ghanaghanirani nthowa izo mungayezgera chipulikano chawo pa umoyo winu.
20. Kasi tingachita wuli kuti tikondwenge chomene na kuleka kujiwona kuti ndise ŵakutondeka?
20 Tikukayika yayi kuti waliyose wa ise wakukhumba kumuchitira vinandi Yehova kuluska ivyo tikumuchitira pasono. Mu charu chiphya cha Chiuta icho chikwiza, tizamumuteŵetera mwakukwana Yehova. Kweni pasono, tiŵenge ŵakukondwa chomene usange tikuchita vyose ivyo tingafiska pakuteŵetera Yehova, ndipo vitovwirenge kuti tileke kujiwona kuti ndise ŵakutondeka. Kweni chakuzirwa chomene ntchakuti tichindikenge Yehova, ‘Chiuta withu wakukondwa.’ (1 Tim. 1:11) Ntheura tiyeni tikondwenge na ivyo tikukwaniska kuchita pasono.
SUMU 82 “Ungweru Winu Uŵale”
^ ndime 5 Tikumutemwa chomene Yehova, ndipo tikuchita chilichose icho tingakwaniska kuti timuteŵetere. Lekani taŵanandi ŵa ise tikukhumba chomene kuchita vinandi pa mulimo wakupharazga, panji mu mpingo. Kweni wuli usange vilato vithu vikufiskika yayi nangauli tayezgayezga kuchita vyose ivyo tingakwaniska? Kasi tingachita wuli kuti tilutilire kuchita vinandi pakuteŵetera Yehova na kulutilira kuŵa ŵakukondwa? Zgoro tikulisanga mu ntharika ya Yesu ya matalente.
^ ndime 2 Mazina ghanyake ghasinthika.
^ ndime 7 MAZGU GHALONGOSOREKA: Talente limoza likayananga na malipiro agho munthu wangapokera usange wangagwira ntchito vyaka 20 panyengo yira.
^ ndime 15 Ŵabali ŵakubatizika tikuŵachiska kuti ŵaŵe na chilato cha kuŵa muteŵeti wakovwira panji mulara. Kuti mumanye vinandi pa nkhani ya mikhaliro iyo muteŵeti wakovwira panji mulara wakwenera kuŵa nayo, wonani mutu 5 na 6 mu buku la Ŵakunozgeka Kuchita Khumbo la Yehova.
^ ndime 17 MAZGU GHALONGOSOREKA: Mubali uyo wakupeleka ulongozgi wapadera, ni mubali uyo wakusankhika kuti wapelekenge ulongozgi kumphepete, ku ŵalara panji ŵateŵeti ŵakovwira pa nkhani yiliyose iyo ŵangadumba mu mpingo.
^ ndime 64 MAZGU GHAKULONGOSORA CHITHUZI: Kuti wafiske chilato chake chakuŵa na luso pakusambizga, mubali wakuchita kafukufuku mu mabuku ghithu.
^ ndime 66 MAZGU GHAKULONGOSORA CHITHUZI: Pamanyuma pakuti wajiŵikira chilato chakuti wapharazgenge palipose apo mwaŵi wasangika, mudumbu wakugaŵira kadi kwa mwanakazi uyo wakupelekera vyakurya mu resitiranti..
^ ndime 68 MAZGU GHAKULONGOSORA CHITHUZI: Chifukwa chakuti mudumbu ngwakukhumbisiska kuŵa na mikhaliro yiwemi Yachikhristu, wakupeleka chawanangwa kwa mudumbu munyake, ndipo mudumbu munyake uyo wakuzizwa chifukwa ndivyo wakhazganga yayi.
