NKHANI YAKUSAMBIRA 32
Ŵawukirano Lutilirani Kukura Mwauzimu Pamanyuma pa Kubatizika
“Tiyeni tikurenge mu vinthu vyose mu chitemwa.”—EFE. 4:15.
SUMU 56 Torani Unenesko Kuŵa Winu na Winu
IVYO VILI MU NKHANI IYI *
1. Kasi ni vinthu wuli viwemi ivyo ŵawukirano ŵanandi ŵali kufiska kale?
CHAKA chilichose, ŵawukirano masauzandi ghanandi ŵakubatizika. Kasi namwe muli kubatizika? Usange ni nthena, manyani kuti ŵabali na ŵadumbu ŵinu ŵauzimu mbakukondwa ndipo Yehova nayo ngwakukondwa. (Zinth. 27:11) Ghanaghanirani waka kwakanyengo unandi wa vinthu viwemi ivyo mwafiska kuchita. Mwachiyelezgero, mwalimbikira chomene kusambira Baibolo, ndipo panji mwachita nthena kwa vyaka vinandi. Ivyo mwasambira vyamukhorweskani kuti Baibolo ni Mazgu gha Chiuta. Kweniso chakuzirwa chomene ntchakuti muli kumumanya Mulembi wa Baibolo na kwamba kumutemwa. Chitemwa chinu pa Yehova chakura chomene mwakuti pasono ndimwe muteŵeti wake wakubatizika. Manyani kuti muli kusankha makora chomene.
2. Kasi tidumbiskanenge vichi mu nkhani iyi?
2 Tikukayika yayi kuti chipulikano chinu chikayezgeka munthowa zakupambanapambana panyengo iyo mukakhumbanga kubatizika. Kweni apo mukukura, mukumanenge na viyezgo vinyake. Satana wayezgeyezgenge kumutondeskani kutemwa Yehova kweniso kumuteŵetera. (Efe. 4:14) Mungazomerezganga yayi kuti ivi vimuchitikirani. Kasi ntchivichi chingamovwirani kuti mulutilire kuŵa ŵakugomezgeka kwa Yehova na kufiska layizgo linu la kumuteŵetera? Mukwenera kulutilira ‘kulimbikira’ kuti muŵe ŵakukhwima mwauzimu. (Heb. 6:1) Kweni kasi mungachita wuli nthena?
KASI MUNGACHITA WULI KUTI MUŴE ŴAKUKHWIMA MWAUZIMU?
3. Kasi Mkhristu waliyose wakwenera kuchita wuli para wabatizika?
3 Para tabatizika, tose tikukhumbikwira kulondezga ulongozgi uwo mpositole Paulosi wakapeleka ku Ŵakhristu ŵa ku Efeso. Wakaŵachiska kuti waliyose waŵe Mkhristu “mulara.” (Efe. 4:13) Fundo iyi yikung’anamura kuti ŵakeneranga ‘kulutilira kukura mwauzimu.’ Paulosi wakayaniska kukura kwithu mwauzimu na umo mwana wakukulira. Para mwana wababika ŵapapi ŵakumutemwa ndiposo ŵakunotha nayo. Kweni kuti wakulutilira kuŵa bonda muyirayira yayi. Para nyengo yajumphapo wakuleka “kuchita vinthu nga ni mwana.” (1 Kor. 13:11) Ndimo viliriso ku Ŵakhristu. Para tabatizika, tikwenera kulutilira kukura. Tiyeni tiwone masachizgo ghanyake agho ghangatovwira kuchita nthena.
4. Kasi ntchivichi chingamovwirani kuti mukure mwauzimu? Longosorani. (Ŵafilipi 1:9)
4 Mutemwenge chomene Yehova. Tikumanya kuti mukumutemwa kale chomene Yehova. Kweni chitemwa chinu chingasazgikira. Kasi chingasazgikira wuli? Mpositole Paulosi wakazunurapo nthowa yimoza pa Ŵafilipi 1:9. (Ŵazgani.) Paulosi wakalomba kuti chitemwa cha Ŵakhristu ŵa ku Filipi “chilutilire kukura chomene.” Ntheura nase tingakuzga chitemwa chithu. Tingachita nthena mwa “kumanya makora vinthu kweniso kuviŵanika chomene.” Para tamumanya makora chomene Yehova, ndipo timutemwengeso chomene kweniso kuwongera mikhaliro yake na umo wakuchitira vinthu. Khumbo lithu lakuti timukondweskenge nyengo zose likurenge chomene ndipo tikhumbenge yayi kumukhuŵazga. Tichitenge vyose ivyo tingafiska kuti timanye ivyo wakukhumba kwa ise kweniso umo ise tingachitira ivyo wakukhumba.
5-6. Kasi tingachita wuli kuti chitemwa chithu pa Yehova chilutilire kukura? Longosorani.
5 Tingakuzga chitemwa chithu pa Yehova para tingamumanya makora Mwana wake, uyo nayo wakuyezga chomene mikhaliro ya Adada ŵake. (Heb. 1:3) Nthowa yiwemi chomene iyo tingamumanyira makora Yesu nkhusambira mabuku ghanayi gha Makani Ghawemi. Usange mundambe kuŵerenga Baibolo zuŵa lililose, mwalekerachi kwambapo sono? Apo mukuŵerenga nkhani zakukhwaskana na Yesu, ŵikani chomene maghanoghano ghinu pa mikhaliro yake. Yesu wakaŵa wakufikirika panji kuti wakufwatuka na ŵanthu wose ndipo panyengo yinyake, mwachitemwa wakatora ŵana na kuŵapakata. (Mrk. 10:13-16) Kweniso wakaŵa walusungu na waubwezi, ndipo ŵasambiri ŵake ŵakafwatukanga kumuphalira maghanoghano ghawo. (Mat. 16:22) Yesu nayo apa wakayezganga Adada ŵake ŵakuchanya. Yehova nayo ngwakufikirika chomene. Tingamufika kwizira mu lurombo. Para tikulomba tingamuphalira chilichose icho chili mu mtima withu kweniso umo tikujipulikira. Tili na chigomezgo chose kuti watisurengeko waka yayi. Iyo wakutitemwa kweniso wakutipwelelera.—1 Pet. 5:7.
6 Yesu wakaŵalengeranga chitima ŵanthu. Mpositole Mateyu wakalemba kuti: “Wakati wawona mizinda, wakayilengera chitima, chifukwa ŵakaŵa ŵakufyopoka na kujowoleka nga ni mberere zambura muliska.” (Mat. 9:36) Kasi Yehova nayo ndimo wakujipulikira? Yesu wakati: “Adada awo ŵali kuchanya ŵakukhumba chara kuti yumoza wa ŵachoko aŵa watayike.” (Mat. 18:14) Mazgu agha ngakukhozga chomene. Para tamumanya makora Yesu, chitemwa chithu pa Yehova chikukura.
7. Kasi kuchezga na Ŵakhristu ŵakukhwima mwauzimu kungamovwirani wuli?
7 Mungasambiraso kumutemwa chomene Yehova na kukura mwauzimu para mukuchezga na ŵabali na ŵadumbu ŵakukhwima mwauzimu mu mpingo winu. Namwe mungajiwonera mwekha kuti mbakukondwa chomene. Iwo ŵakudandaurapo yayi kuti ŵali kusankha kuteŵetera Yehova. Ŵafumbani kuti ŵamuphaliraniko vinthu vinyake ivyo ŵakumanapo navyo pakuchita uteŵeti wawo. Usange mukukhumba kusankha chinthu chinyake chakuzirwa, ŵafumbani kuti ŵamovwiraniko mahara. Kumbukani kuti “vinthu vikwenda makora para pali ŵakupeleka fundo ŵanandi.”—Zinth. 11:14.
Kasi mungachita wuli kuti mukazgore makora para ŵanji ku sukulu ŵakuti vinthu vikachita kusintha? (Wonani ndime 8-9)
8. Kasi mungachita wuli usange mukukayikira ivyo Baibolo likuyowoya?
8 Lekani kukayikira. Nga umo tayowoyera kale mu ndime 2, Satana wayezgeyezgenge kumutondeskani kuti mukure mwauzimu. Nthowa yimoza iyo wangachitira nthena nkhumupangiskani kuti mukayikirenge visambizgo vinyake vya mu Baibolo. Mwachiyelezgero, ŵanyake ŵangamuphalirani kuti ni Chiuta yayi uyo wakatilenga kweni tikachita kusintha kufuma ku vinyama. Apo mukaŵa mwana panji mukaghanaghaniranga chomene yayi fundo iyi, kweni panji sono ndivyo mukusambira ku sukulu. Ivyo ŵasambizgi ŵinu ŵangayowoya vyakukhwaskana na kusintha kwa vinthu vingawoneka nga ndivyo vikupulikikwa. Ndipouli, iwo ŵangaŵa kuti ŵandayezgepo kusanga ukaboni wakuti kuli Mlengi. Kumbukani fundo ya pa Zintharika 18:17 yakuti: “Uyo wamba kuyowoya pa mulandu wakuwoneka murunji, m’paka munthu munyake wize na kumufumba mafumbo.” Ntheura m’malo mwakuzomerezga waka ivyo mukusambira ku sukulu kuti ndiwo mbunenesko, mungachita makora kuti musandenge unenesko uwo ukusangika mu Mazgu gha Chiuta, Baibolo. Muchitenge kafukufuku mu mabuku ghithu. Kweniso mungafumba ŵabali na ŵadumbu awo pakwamba nawo ŵakagomezganga kuti vinthu vikachita kusintha. Ŵafumbani icho chikaŵakhorweska kuti kuli Mlengi uyo wakutitemwa. Ntchezgo zanthena zingamovwirani kusanga ukaboni wakuti kuli Mlengi.
9. Kasi mwasambirako vichi kwa Melissa?
9 Mudumbu munyake zina lake Melissa wakasanga chomene chandulo wati wachita kafukufuku pa nkhani ya chilengiwa. * Iyo wakuti: “Ku sukulu, para ŵasambizgi ŵakulongosora nkhani yakuti vinthu vikasintha waka, vikuwoneka nga ni vyaunenesko. Pakwamba, nkhawopanga kuchita kafukufuku chifukwa nkhatenge panyake nisangenge kuti chisambizgo ichi ntchaunenesko. Kweni nkhaghanaghanirapo fundo yakuti Yehova wakukhumba yayi kuti timuteŵeterenge mwachibulumutira waka. Ntheura nkhamba kuchita kafukufuku. Nkhaŵazga buku la mutu wakuti Is There a Creator Who Cares About You? na burosha la mutu wakuti Kasi Vyamoyo Vikachita Kulengeka? kweniso la mutu wakuti Umoyo Ukaŵako Wuli?—Mafumbo 5 Agho Tikwenera Kujifumba. Ivi ndivyo nkhakhumbikwiranga nadi. Mu mtima nkhati waka mphanyi nkhaghaŵazga mwaluŵiro.”
10-11. Kasi ntchivichi chingamovwirani kuti mulutilire kuŵa ŵakutowa mwauzimu? (1 Ŵatesalonika 4:3, 4)
10 Kanani nkharo ziheni. Para munthu ngwachinyamata khumbiro lakugonana likuŵa lankhongono chomene ndipo nyengo zinyake ŵanji ŵangamunyengelerani kuti muchite uzaghali. Nakuti ivi ndivyo Satana wakukhumba kuti muchite. Kasi ntchivichi chingamovwirani kuti mutonde chiyezgo ichi panji kuti mulutilire kuŵa ŵakutowa mwauzimu? (Ŵazgani 1 Ŵatesalonika 4:3, 4.) Para mukulomba pamwekha kwa Yehova, muphalirani maghanoghano ghinu. Muphalirani umo mukujipulikira nadi, ndipo mulombani kuti wamupani nkhongono. (Mat. 6:13) Manyani kuti Yehova wakukhumba kumovwirani, kumweruzgani yayi. (Sal. 103:13, 14) Baibolo nalo lingamovwirani chomene. Melissa, uyo tamuzunura kale, vikamusuzganga kuti waleke kughanaghanira vyawakawaka. Iyo wakuti: “Kuŵerenga Baibolo zuŵa lililose kukanovwira kuti nileke kuthera. Kukanikumbuskanga kuti ndine wa Yehova ndipo nkhukhumba kumuteŵetera.”—Sal. 119:9.
11 Lekani kulimbana na kumazga masuzgo pamwekha. Dumbiskanani na ŵapapi ŵinu za masuzgo agho mukusangana nagho. Mbunenesko kuti ntchipusu yayi kuyowoya nkhani zanthena na ŵapapi ŵinu, kweni ntchakuzirwa chomene kuchita nthena. Melissa wakuti: “Nkhalomba kuti niŵe na chikanga, ndipo kufuma apo nkhadumbiskana na adada za suzgo lane. Tati tadumbiskana nkhajipulika makora chomene. Nkhamanya kuti Yehova wakukondwa nane.”
12. Kasi ntchivichi chingamovwirani kuti musankhenge vinthu mwamahara?
12 Mulongozgekenge na fundo za mu Baibolo. Apo mukukura, pachoko na pachoko ŵapapi ŵinu ŵamuzomerezganinge kuti musankhenge mwekha vinthu. Kweni manyani kuti pachali vinthu vinandi ivyo mukuvimanya yayi. Kasi mungachita wuli kuti muleke kuchita vinthu ivyo vingatimbanizga ubwezi winu na Yehova? (Zinth. 22:3) Mudumbu munyake zina lake Kari wakuyowoya ivyo vikamovwira kusankha makora vinthu. Wakamanya kuti Mkhristu wakukhwima mwauzimu wakukhumbikwira malango pa chilichose yayi para wakuchita vinthu. Iyo wakuti: “Nkhakhumbikwiranga kuzipulikiska makora fundo za mu Baibolo m’malo mwakulondezga waka malango.” Para mukuŵerenga Baibolo, jifumbani kuti: ‘Kasi mavesi agha ghakuniphalira vichi pa nkhani ya umo Yehova wakuwonera vinthu? Kasi muli fundo izo zinganovwira kuti nichitenge vinthu mwakwenelera? Usange ni nthena, kasi nisangenge chandulo wuli para nkhuzilondezga?’ (Sal. 19:7; Yes. 48:17, 18) Para mukuŵerenga Baibolo na kughanaghanirapo pa fundo zake, vimusuzganinge yayi kusankha vinthu mwamahara kuti mukondweske Yehova. Ndipo apo mukulutilira kukura, muwonenge kuti mukukhumbikwira dango pa chinthu chilichose icho mukuchita yayi chifukwa mukumanya umo Yehova wakuwonera vinthu.
Kasi mbanthu wuli awo mudumbu wachiwukirano wakasankha kuŵa ŵabwezi ŵake? (Wonani ndime 13)
13. Kasi ŵabwezi ŵawemi ŵangamovwirani wuli? (Zintharika 13:20)
13 Sankhani ŵabwezi awo ŵakutemwa Yehova. Nga umo tayowoyerapo kale, ŵabwezi awo mungasankha, ŵangamovwirani kuti mukure mwauzimu. (Ŵazgani Zintharika 13:20.) Mudumbu munyake zina lake Sara wakaleka kuŵa wakukondwa. Kweni pakaŵa chinthu chinyake icho chikamovwira kuti wambireso kukondwa. Sara wakuti: “Nkhasanga ŵabwezi ŵawemi nkhanira panyengo iyo ŵakakhumbikwiranga chomene. Mudumbu wachiwukirano munyake na ine tikakumananga sabata yiliyose kuti tinozgekere Gongwe la Mulinda. Mubwezi wane munyake wakanovwira kuti nambe kuzgorapo pa maungano. Chifukwa cha wovwiri wa ŵabwezi ŵane, nkhamba kuwona kuti sambiro lanekha na lurombo ni vinthu vyakuzirwa chomene. Nkhamba kuŵa paubwezi wakukhora chomene na Yehova, ndipo nkhambiraso kuŵa wakukondwa.”
14. Kasi Julien wakasanga wuli ŵabwezi ŵawemi?
14 Kasi mungasanga wuli ŵabwezi awo ŵangamovwirani? Julien, uyo pasono ni mulara mu mpingo wakuti: “Apo nkhaŵa mwana muchoko, nkhasanga ŵabwezi ŵawemi panyengo iyo nkhapharazgiranga lumoza na ŵanji. Ŵabwezi ŵane aŵa ŵakaŵa ŵamwamphu, ndipo ŵakanovwira kwamba kuwona kuti upharazgi ngwakunozga chomene. Nkhamba kuŵa na chilato chakwamba uteŵeti wanyengozose. Nkhamanyaso kuti nkhatondekanga kuŵa na ŵabwezi ŵanandi chifukwa chakuti nkhapenjanga ŵabwezi awo mba nthanga yane pera. Pamanyuma, nkhasangaso ŵabwezi ŵanyake ŵawemi pa Beteli. Chiyelezgero chawo chiwemi chikanovwira kuti nisankhenge vyakusanguluska viwemi, ivyo vikapangiska kuti nisendelere kwa Yehova.”
15. Kasi Paulosi wakamuchenjezga vichi Timote pa nkhani ya ŵabwezi? (2 Timote 2:20-22)
15 Wuli usange mwamanya kuti munthu munyake mu mpingo ni muwemi yayi kuchezga nayo? Paulosi wakamanya kuti ŵanthu ŵanyake mu nyengo ya Ŵakhristu ŵakwambilira ŵakachitanga vinthu nga Mbakhristu yayi, ntheura wakachenjezga Timote kuti waŵe nawo kutali ŵanthu aŵa. (Ŵazgani 2 Timote 2:20-22.) Ubwezi withu na Yehova ngwakuzirwa chomene. Tingazomerezganga yayi kuti munthu waliyose watimbanizge ubwezi withu na Yehova uwo tawufukafukira kuti uŵepo.—Sal. 26:4.
KASI KUŴA NA VILATO KUNGAMOVWIRANI WULI KUTI MUKURE MWAUZIMU?
16. Kasi ni vilato wuli ivyo mungajiŵikira?
16 Jiŵikirani vilato viwemi. Sankhani vilato ivyo vingakhozga chipulikano chinu na kumovwirani kuti mukure mwauzimu. (Efe. 3:16) Mwachiyelezgero, mungasankha kuti musambirenge Baibolo pamwekha mwakukhazikika. (Sal. 1:2, 3) Panji mungajiŵikiraso chilato chakuti mulombenge pafupipafupi kweniso kuti mulombenge kufumira pasi pamtima. Panyake mungakhumbikwira kusambira kuŵa ŵakujikora chomene pa nkhani ya vyakusanguluska ivyo mukusankha kweniso unandi wa nyengo iyo mukumalirapo. (Efe. 5:15, 16) Para Yehova wakuwona kuti mukulimbikira kuti mukure mwauzimu, wakondwenge namwe.
Kasi mudumbu wachiwukirano wakajiŵikira chilato wuli? (Wonani ndime 17)
17. Kasi ntchivichi chichitikenge para mukovwira ŵanthu?
17 Muŵenge Mkhristu wakukhwima chomene mwauzimu para mukovwira ŵanji. Yesu wakayowoya kuti: “Uyo wakupeleka wakukondwa chomene kuluska uyo wakupokera.” (Mil. 20:35) Mukondwenge chomene para mugwiliskirenge ntchito nyengo yinu kweniso nkhongono zinu kovwilira ŵanji. Mwachiyelezgero, pakuŵa ŵachiwukirano, mungajiŵikira chilato chakuti movwirenge ŵachekuru na awo ŵakusuzgikira muthupi mu mpingo winu. Mungaŵawovwira kugwira ntchito zinyake panji kuŵawovwira umo ŵangagwiliskira ntchito vinthu vya tekinoloje. Usange ndimwe mubali, mungajiŵikira chilato chakuti muŵe muteŵeti wakovwira, kuti muteŵeterenge ŵabali na ŵadumbu ŵinu. (Fil. 2:4) Mungalongoraso kuti mukutemwa ŵanthu wose para mukuŵapharazgira makani ghawemi gha Ufumu. (Mat. 9:36, 37) Usange ntchamachitiko, jiŵikirani chilato chakuti namwe muchiteko uteŵeti wanyengozose.
18. Kasi kuchitako uteŵeti wanyengozose kungamovwirani wuli kukura mwauzimu?
18 Uteŵeti wanyengozose ungamovwirani chomene kuti mukure mwauzimu. Usange ndimwe mupayiniya wanyengozose, muli na mwaŵi wakuti mungakanjira Sukulu ya Ŵapharazgi ŵa Ufumu. Mungaŵaso na mwaŵi wakuteŵetera pa Beteli panji kovwira pa milimo ya vyakuzenga. Mudumbu munyake wachiwukirano zina lake Kaitlyn wakuti: “Chifukwa chakuti nkhamaliranga nyengo yinandi mu upharazgi pamoza na ŵabali na ŵadumbu ŵakukhwima mwauzimu, vikanovwira chomene kuti nikure mwauzimu pamanyuma pakuti nabatizika. Chiyelezgero chawo chiwemi chikanichiska kuti nisambirenge chomene Baibolo na kusazgirako luso lwane lwakusambizga.”
19. Kasi mutumbikikenge wuli para mulutilirenge kukura mwauzimu?
19 Apo mukulutilira kukura mwauzimu, Yehova wamutumbikaninge chomene. Musakazenge pawaka yayi nkhongono zinu zauwukirano pa vinthu vyambura kuzirwa. (1 Yoh. 2:17) Kweniso mugegenge masuzgo agho ghakwiza chifukwa cha kusankha uheni vinthu. Ndipo vinthu vimwenderaninge makora chomene kweniso muŵenge ŵakukondwa. (Zinth. 16:3) Chiyelezgero chinu chiwemi, chikhozgenge ŵasopi ŵanyinu, ŵawukirano na ŵalara wuwo. (1 Tim. 4:12) Ndipo chakuzirwa chomene ntchakuti, muŵenge na mtende ndiposo ŵakukhorwa chifukwa chakukondweska Yehova, kweniso chifukwa chakuŵa pa ubwezi uwemi na iyo.—Zinth. 23:15, 16.
SUMU 88 Nimanyiskani Mendero Ghinu
^ Muteŵeti wa Yehova waliyose wakukondwa para ŵawukirano ŵabatizika. Kweni para ŵawukirano ŵabatizika, ŵakwenera kulutilira kukura mwauzimu. Nkhani iyi yovwirenge waliyose wa ise kuwona nthowa izo ŵawukirano awo ŵabatizika waka sono ŵangachita kuti ŵalutilire kukura mwauzimu.
^ Mazina ghanyake ghasinthika.
