1. Chifukwa wuli Yesu wakalomba Yehova kuti wavikilire ŵalondezgi ŵake?

 PA USIKU wakuti namachero wafwenge, Yesu wakalomba lurombo lwapadera kwa Adada ŵake ŵakuchanya. Wakalomba Yehova kuti wavikilirenge ŵalondezgi ŵake. (Yoh. 17:15, 20) Mbunenesko kuti Yehova nyengo zose wakulaŵiska ŵanthu ŵake, icho chikung’anamura kuti wakuŵapwelelera na kuŵavikilira. Ndipouli, Yesu wakamanya kuti ŵalondezgi ŵake ŵazamususkika chomene na Satana. Wakamanyaso kuti ŵazamukhumbikwira wovwiri wa Yehova kuti ŵazizipizge para Dyabulosi waŵawukira.

2. Kuyana na Salimo 33:18-20, chifukwa wuli tikwenera yayi kopa masuzgo?

² Charu cha kuwusika na Satana ichi, chikwambiska masuzgo ghanandi ku Ŵakhristu mazuŵa ghano. Tikusangana na masuzgo ghanandi agho ghangatigongoweska kweniso agho ghakuyezga kugomezgeka kwithu kwa Yehova. Kweni nga umo tiwonerenge mu nkhani iyi, tikwenera kopa yayi. Yehova wakutilaŵiska, icho chikung’anamura kuti wakuwona masuzgo agho tikusangana nagho kweniso ngwakunozgeka kutovwira. Tiyeni tiwone viyelezgero viŵiri vya mu Baibolo ivyo vikulongora kuti Yehova ‘wakulaŵiska awo ŵakumopa.’—Ŵazgani Salimo 33:18-20.

3. Kasi mphawuli apo tingajiwona nga tili tekha?

³ Nangauli tili mu mbumba yikuru yauzimu, kweni nyengo zinyake tingachita phukwa panji kuti kujiwona nga tili tekha. Mwachiyelezgero, ŵawukirano ŵangajiwona nga ŵali ŵekha panji kuti palije uyo wangaŵawovwira para ŵakulongosolera ŵanyawo ku sukulu ivyo ŵakugomezga panji para ŵasamira mu mpingo unyake. Taŵanyake ŵa ise tingaŵa na chitima panji kusuzgika maghanoghano chifukwa cha kughanaghana kuti tilimbanenge nagho tekha masuzgo kwambura wovwiri uliwose. Nyengo zinyake tingatondeka na kuphalirako ŵanthu umo tikujipulikira chifukwa cha kughanaghana kuti ŵangatipulikiska yayi. Ndipo nyengo zinyake, tingawona nga palije uyo wakupwelerako  za ise. Kwali pali chifukwa wuli icho chapangiska kuti tambe kujiwona nga tili tekha, kweni manyani kuti kuchita nthena kungapangiska kuti tambe kwenjerwa na kuwona kuti palije uyo wangatovwira. Yehova wakukhumba yayi kuti tijipulikenge nthena. Chifukwa wuli tikuyowoya nthena?

4. Chifukwa wuli ntchimi Eliya yikayowoya kuti: “Nakhalapo nekha”?

⁴ Ghanaghanirani waka ivyo vikachitikira munthu wakugomezgeka Eliya. Yezebeli wakaŵa kuti walapa kuti wamukomenge, ntheura kwa mazuŵa 40, Eliya wakachimbiranga kuponoska umoyo wake. (1 Mathe. 19:1-9) Paumaliro apo wakaŵa mu mphanji kwayekha wakaphalira Yehova kuti: “Nakhalapo nekha [ntchimi].” (1 Mathe. 19:10) Kweni unenesko ukaŵa wakuti mukaŵaso ntchimi zinyake mu charu. Mwachiyelezgero, Obadiya wakaponoska ntchimi 100 kuti zileke kukomeka na Yezebeli. (1 Mathe. 18:7, 13) Ipo chifukwa wuli pera Eliya wakajiwonanga kuti wali yekha? Kasi wakaghanaghananga kuti ntchimi izo Obadiya wakaziponoska zose zikaŵa kuti zafwa? Panji kasi wakajiwonanga kuti wali yekha chifukwa chakuti pakaŵavya uyo wakamba kuteŵetera Yehova pamoza na iyo nangauli Yehova wakaŵa kuti wajilongora pakweru pa Phiri la Karimeli kuti ni Chiuta waunenesko? Panji kasi wakawonanga kuti palije uyo wakumanya ivyo wakujumphamo kweniso palije uyo wakupwelerako za iyo? Baibolo likulongosora vinandi yayi pa umo Eliya wakajipulikiranga. Kweni icho tikumanya ntchakuti Yehova wakapulikiska chifukwa icho Eliya wakajiwoneranga kuti wali yekha ndipo wakamanyanga umo wangamovwilira.

5. Kasi Yehova wakamovwira wuli Eliya kumanya kuti wakaŵa yekha yayi?

⁵ Yehova wakamovwira Eliya munthowa zakupambanapambana. Wakamuchiska Eliya kuti wayowoye. Kaŵiri kose wakamufumba Eliya kuti: “Kasi ukuchitachi kuno?” (1 Mathe. 19:9, 13) Ndipo nyengo yose iyi Yehova wakategherezganga para Eliya wakuyowoya umo wakajipulikiranga. Yehova wakamuzgora Eliya, ndipo wakamulongora kuti wali yekha yayi, iyo walipo ndipo ngwankhongono chomene. Kweniso Yehova wakamusimikizgira Eliya kuti pachali Ŵaisrayeli ŵanandi awo ŵakaŵa kuti ŵachali kumusopa. (1 Mathe. 19:11, 12, 18) Tikukayika yayi kuti Eliya wakajipulika makora wati wamuphalira Yehova vyose ivyo vikaŵa  mu mtima wake kweniso Yehova wati wamuzgora. Yehova wakamupa Eliya mauteŵeti ghakuzirwa ghakupambanapambana. Wakamuphalira kuti waphakazge Hazayeli kuŵa themba la Siriya, Yehu kuŵa themba la Israyeli, na Elisha kuŵa ntchimi. (1 Mathe. 19:15, 16) Pakumupa Eliya mauteŵeti ghose agha, Yehova wakamovwiranga kuti waghanaghanirenge chomene vinthu viwemi. Chiuta wakamupaso Elisha kuŵa muteŵeti wake. Kasi Yehova wangamovwirani wuli para mukujiwona nga muli mwekha?

6. Kasi mungalomba vichi para mukujipulika kuti muli mwekha? (Salimo 62:8)

⁶ Yehova wakukhumba kuti mulombenge kwa iyo. Wakumanya masuzgo agho muli nagho, ndipo wakumulayizgani kuti wapulikenge malurombo ghinu nyengo yiliyose para mwalomba. (1 Tes. 5:17) Wakukondwa chomene para wakutegherezga ŵasopi ŵake. (Zinth. 15:8) Kasi mungalomba vichi para mukujipulika kuti muli mwekha? Muphalirani Yehova umo mukujipulikira nga umo wakachitira Eliya. (Ŵazgani Salimo 62:8.) Muphalirani ivyo mukwenjerwa navyo na umo mukujipulikira. Mupemphani Yehova kuti wamovwirani kuzizipizga. Mwachiyelezgero, usange mukujipulika kuti muli mwekha panji muli na wofi kupharazgira ŵanyinu ku sukulu, mulombani Yehova kuti wamupani chikanga icho mukukhumbikwira kuti mukwaniske kuyowoya. Mungamulombaso vinjeru kuti mulongosore mwaluso chigomezgo chinu. (Luka 21:14, 15) Usange mukusuzgika maghanoghano ndipo mukugongowa, pemphani Yehova kuti wamovwirani kuti muyowoyeskane na Mkhristu wakukhwima mwauzimu nkhani iyo mukwenjerwa nayo. Mungamupemphaso kuti wawovwire munthu uyo mumuphalirenge masuzgo ghinu kuti wamupulikiskani makora. Mukhutulirani Yehova vyose ivyo mukwenjerwa navyo, ndipo lindilirani kuti muwone umo wazgolerenge malurombo ghinu. Kweniso muzomerenge usange ŵanyinu ŵakukhumba kumovwirani, usange muchitenge nthena mujipulikenge kuti muli mwekha yayi.

7. Kasi mwasambirako vichi kwa Mauricio?

⁷ Yehova wali kutipa ntchito yakuzirwa chomene. Manyani kuti iyo wakuwona na kuwonga vyose ivyo tikuchita mu mpingo kweniso mu upharazgi. (Sal. 110:3) Kasi kutangwanika chomene na milimo iyo mukuchita mu mpingo kweniso mu upharazgi kungamovwirani wuli kuti muleke kujipulika kuti muli mwekha? Wonani ivyo vikachitikira mubali munyake wachiwukirano zina lake Mauricio. * Nyengo yichoko Mauricio wati wabatizika waka, mubwezi wake wapamtima wakamba kuleka unenesko pachokopachoko. Mauricio wakuti: “Kumuwona kuti wakumuleka Yehova kukapangiska kuti chikanga chane chichepe. Nkhakayikanga usange nikwaniskenge malayizgo ghane ghakumuteŵetera Yehova na kulutilira kukhala mu mbumba yake. Nkhajipulikanga kuti nili nekha ndipo palije uyo wangapulikiska umo nkhajipulikiranga.” Kasi ntchivichi chikamovwira Mauricio? Iyo wakuti: “Nkhasazgirako uteŵeti wane ndipo ivi vikanovwira kuti nileke kujighanaghanira chomene nekha kweniso umo nkhujipulikira. Nkhamba kuŵa wakukondwa ndipo phukwa likamba kumara para nanjira  na ŵanji mu uteŵeti.” Nanga tingaŵa kuti tingapharazga yayi na ŵasopi ŵanyithu maso na maso, tingakhozgeka chomene para tingachitirangako nawo lumoza upharazgi wa makalata panji wa pa foni. Kasi ntchivichi chinyake chikamovwira Mauricio? Iyo wakusazgirapo kuti: “Nkhamba kutangwanika chomene na milimo ya mu mpingo. Nkhamba kunozgekera maungano kweniso nkhatangwanikanga na mulimo wakugaŵa nkhani za mu sukulu ya uteŵeti. Mauteŵeti agha ghakanovwiranga kujipulika kuti ndine wakuzirwa kwa Yehova kweniso ku ŵanji.”

8. Kasi para masuzgo ghakukata yayi tingamba kujipulika wuli?

⁸ Tikumanya kuti tisanganenge na masuzgo mu mazuŵa ghaumaliro agha. (2 Tim. 3:1) Kweni masuzgo ghanyake ghangiza mwamabuchi ndipo ghangatitindika para ghachitika. Tingasangana na suzgo lakusoŵa kwa ndalama mwamabuchi, tingasangika na nthenda yikuru, panji munthu uyo tikumutemwa wangatayika. Mu nyengo nga ni izi, tingasuzgika chomene maghanoghano ndipo tingagongowa panji kuti nkhongono zingatimalira, chomenechomene para masuzgo ghakukata yayi. Kweni kumbukani kuti, Yehova wakumanya masuzgo agho tikusangana nagho ndipo na wovwiri wake tingazizipizga suzgo lililose mwachikanga.

9. Longosorani masuzgo ghanyake agho Yobu wakakumana nagho.

⁹ Ghanaghanirani umo Yehova wakawovwilira munthu wakugomezgeka Yobu. Wakasangana na masuzgo ghakurughakuru mu kanyengo kachoko chomene. Mu zuŵa limoza pera, Yobu wakaphalirika kuti viŵeto vyake vyose vibika, ndipo ŵateŵeti ŵake na ŵana ŵake ŵakomeka. (Yobu 1:13-19) Nyengo yichoko waka apo wakaŵa kuti wachali na chitima chikuru, Yobu wakakoreka na nthenda yakuŵinya ya mapumba. (Yobu 2:7) Vinthu vikasuzga chomene mwakuti wakachemerezga kuti: “Nkhutinkha umoyo wane, nkhukhumba yayi kukhalilira wamoyo.”—Yobu 7:16.

10. Kasi Yehova wakamovwira wuli Yobu kuti wazizipizge masuzgo agho wakasangana nagho? (Wonani chithuzi cha pa chikopi.)

¹⁰ Yehova wakawonanga ivyo vikamuchitikiranga Yobu. Chifukwa chakuti Yehova wakamutemwanga Yobu, wakamovwira kuti wakwaniske kuzizipizga masuzgo agho wakasangana nagho. Yehova wakayowoya nayo Yobu, wakamukumbuska za unandi wa vinjeru vyake na chitemwa chapadera icho wali nacho pa vilengiwa vyake. Wakayowoya za vilengiwa vinandi vyakuzizwiska. (Yobu 38:1, 2; 39:9, 13, 19, 27; 40:15; 41:1, 2) Yehova wakagwiliskiraso ntchito muwukirano munyake wakugomezgeka zina lake Elihu kuti wamukhozge Yobu na kumupembuzga. Elihu wakamusimikizgira Yobu kuti nyengo zose Yehova wakupeleka njombe ku ŵasopi ŵake para ŵazizipizga. Kweniso Yehova wakachitiska Elihu kumupa Yobu ulongozgi mwachitemwa. Elihu wakamovwira Yobu kuti waleke kughanaghanira chomene vya iyomwene pakumukumbuska kuti ise tili ŵachoko chomene pakuyaniska na Yehova uyo ni Mlengi wa vyose. (Yobu 37:14) Yehova wakaphaliraso Yobu kuti wachite chinthu chinyake. Wakamuphalira kuti walombere ŵabwezi ŵake ŵatatu awo ŵakananga. (Yobu 42:8-10) Kasi Yehova wakutovwira wuli mazuŵa ghano para tasangana na masuzgo ghakuru?

11. Kasi Baibolo likutipembuzga wuli para tasangana na masuzgo?

¹¹ Yehova wakuyowoya nase mwakudunjika yayi, nga umo wakachitira na Yobu, kweni wakuyowoya nase kwizira mu Mazgu ghake, Baibolo. (Rom. 15:4) Wakutipembuzga mwakutipa chigomezgo chiwemi cha munthazi. Ghanaghanirani waka fundo zichoko waka kufuma mu Baibolo izo zingatipembuzga para takumana na masuzgo. Mu Malemba, Yehova wakutisimikizgira kuti kwali ni masuzgo panji vinthu vinyake vilivyose “vitipaturenge yayi ku chitemwa [chake].” (Rom. 8:38, 39) Iyo wakutisimikizgiraso kuti “wali pafupi na wose awo ŵakumuchema” mu lurombo. (Sal. 145:18) Yehova wakutiphalira kuti para timugomezgenge, tikwaniskenge kuzizipizga suzgo lililose kweniso tiŵenge ŵakukondwa nanga tingasuzgika.  (1 Kor. 10:13; Yak. 1:2, 12) Mazgu gha Chiuta ghakutiphaliraso kuti masuzgo agho tikusangana nagho ngakanyengo waka para tikuyaniska na vitumbiko vyamuyirayira ivyo tizamusanga. (2 Kor. 4:16-18) Yehova wali kulayizga kuti wazamuwuskapo Satana Dyabulosi uyo wakwambiska masuzgo kweniso wose awo ŵakulondezga nthowa zake ziheni. (Sal. 37:10) Kasi muli kusungako pamtima mavesi ghanyake ghakupembuzga gha mu Baibolo kuti ghazakamovwirani kuzakazizipizga masuzgo munthazi?

12. Kasi Yehova wakukhumba tichitenge vichi kuti tisangenge chomene chandulo na Mazgu ghake?

¹² Yehova wakukhumba kuti tipaturenge nyengo yakusambilira Baibolo mwakukhazikika na kughanaghanirapo chomene pa ivyo tikuŵazga. Para tikuchita ivyo tikusambira, chipulikano chithu chikukura ndipo tikuŵa paubwezi wakukhora na Adada ŵithu ŵakuchanya. Ntheura, tikuŵa na nkhongono zakuzizipizga viyezgo. Yehova wakuŵapaso mzimu wake utuŵa awo ŵakulondezga Mazgu ghake. Ndipo mzimu utuŵa uwu ungatipa “nkhongono zakuluska zakawiro” kuti tizizipizge suzgo lililose ilo tingasangana nalo.—2 Kor. 4:7-10.

13. Kasi chakurya chauzimu icho “muzga wakugomezgeka na wavinjeru” wakupeleka chikutovwira wuli kuzizipizga masuzgo?

¹³ Na wovwiri wa Yehova, “muzga wakugomezgeka na wavinjeru” wakufumiska nkhani zakupambanapambana, mavidiyo, na sumu, ivyo vingatovwira kukhozga chipulikano chithu na kuŵa maso mwauzimu. (Mat. 24:45) Tikwenera kuvigwiliskira ntchito mwakukwana vinthu vyose ivyo Yehova wakutipa. Mudumbu munyake wa ku United States, sonosono apa wakayowoya kuti wakuwonga chomene chakurya chose chauzimu icho tikupokera. Iyo wakati: “Kwa vyaka 40 ivyo nateŵetera Yehova, nayezgeka mwakuwerezgawerezga usange ndine wakugomezgeka.” Mudumbu uyu wakakumana na masuzgo ghakurughakuru, asekuru ŵake ŵakagandika na galimoto iyo dilayivara wake wakaloŵera, ŵapapi ŵake ŵakalwara chomene ndipo paumaliro ŵakafwa, kweniso nayo wakakorekapo na kansa maulendo ghaŵiri. Kasi ntchivichi chikamovwira kuzizipizga? Iyo wakalongosora kuti: “Nyengo yose iyi Yehova wanipwelelera. Chakurya chauzimu icho wakupeleka kwizira mwa muzga wakugomezgeka na wavinjeru ndicho chanovwira kuti nizizipizge. Chifukwa cha chakurya ichi, nane nkhujipulika nga umo wakajipulikira Yobu uyo wakayowoya kuti: ‘Nitayengepo chara kunyoloka kwane m’paka nifwe!’”—Yobu 27:5.

14. Kasi Yehova wakutovwira wuli kwizira mwa ŵasopi ŵanyithu kuti tizizipizge masuzgo? (1 Ŵatesalonika 4:9)

¹⁴ Yehova wasambizga ŵanthu ŵake kuti ŵatemwanenge na kupembuzgana yumoza na munyake mu nyengo zakusuzga izi. (2 Kor. 1:3, 4; ŵazgani 1 Ŵatesalonika 4:9.) Nga ni Elihu, ŵabali na ŵadumbu ŵithu nawo mbakunozgeka kutovwira  kulutilira kuŵa ŵakugomezgeka para tasangana na masuzgo. (Mil. 14:22) Mwachiyelezgero, wonani umo mudumbu munyake zina lake Diane, mpingo ukamukhozgera na kumovwira kuti walutilire kuŵa wakukhora mwauzimu panyengo iyo mfumu wake wakalwara chomene. Iyo wakuti: “Yikaŵa nyengo yakusuzga chomene. Kweni tikawona woko lankhongono la Yehova na chitemwa chake. Mpingo withu ukachitapo kanthu kuti utovwire. Ŵabali na ŵadumbu ŵakazakatiwonanga, kutimbira mafoni kweniso ŵakativumbatiranga ndipo ivi vikatovwira kuti tizizipizge. Chifukwa chakuti nkhumanya yayi kwendeska galimoto, ŵabali na ŵadumbu ŵakawoneseskanga kuti ŵazakanitore kuya ku maungano, panji mu upharazgi palipose apo nili na m’pata.” Ni mwaŵi wapadera chomene kuŵa mu mbumba yauzimu iyo njachitemwa chomene.

15. Chifukwa wuli tili na chigomezgo chose kuti tingazizipizga suzgo lililose ilo tingasangana nalo?

¹⁵ Tose tisanganengepo na suzgo linyake. Kweni nga ni umo tasambilira, tilimbanenge nagho tekha yayi masuzgo agha. Nga dada wachitemwa, Yehova nyengo zose wakuŵa nase. Iyo wali nase pafupi, ndipo ngwakunozgeka kupulika malurombo ghithu, kweniso ngwakunozgeka kutovwira. (Yes. 43:2) Tili na chigomezgo chose kuti tingazizipizga suzgo lililose ilo tingasangana nalo chifukwa chakuti Yehova watipa chilichose icho tikukhumbikwira kuti tizizipizgenge. Iyo wali kutipa mwaŵi wa lurombo, Baibolo, na chakurya chauzimu chinandi, kweniso ŵabali na ŵadumbu awo ŵakutovwira mu nyengo za masuzgo.

16. Kasi tikwenera kuchita vichi kuti Yehova walutilire kutipwelelera?

¹⁶ Tikuwonga chomene kuti tili na Adada ŵithu ŵakuchanya awo ŵakutipwelelera. ‘Mitima yithu yikusekelera mwa iwo.’ (Sal. 33:21) Tingalongora kuti tikumuwonga Yehova pa chitemwa chake icho wakutilongora, para tikugwiliskira ntchito vyose ivyo wakutipa. Nase tikwenera kuchitapo chigaŵa chithu kuti Chiuta walutilire kutipwelelera. Mu kayowoyero kanyake tingayowoyaso kuti, para tikulutilira kuchita vyose ivyo tingakwaniska kuti tipulikire Yehova na kuchita icho ntchakwenelera mu maso ghake, iyo watipwelelerenge na kutivikilira kwamuyirayira.—1 Pet. 3:12.