1. Kuyana na 1 Ŵatesalonika 5:11, kasi ni mulimo wuli uwo tose tikuchitako?

 KASI mpingo winu uli kuchitapo ntchito ya kuzenga panji kunozga Nyumba ya Ufumu? Usange ni nthena, tikukayika yayi kuti mukukumbuka umo vikaŵira kuwungana kakwamba mu Nyumba ya Ufumu yiphya. Mukamuwonga chomene Yehova. Nakuti panji mukaŵa pafupi kuthiska masozi chifukwa cha kukondwa chomene mwakuti chikamuŵirani chinonono kwimba sumu yakujulira maungano. Nyumba zithu zakuzengeka makora zikupeleka uchindami kwa Yehova. Kweni tikupelekaso uchindami ukuru kwa Yehova para nase tikuchita mulimo unyake wakuzenga. Mulimo uwu ukusazgapo vinandi padera pa kuzenga waka uko tikumanya. Ukusazgapo kuzenga ŵanthu awo ŵakwiza pa malo ghithu ghakusoperapo. Mpositole Paulosi wakaŵa na fundo iyi mu maghanoghano ghake apo wakalembanga mazgu agho ghakusangika pa 1 Ŵatesalonika 5:11, ilo ni lemba ilo pafuma mutu wa nkhani.—Ŵazgani.

2. Kasi tidumbiskanenge vichi mu nkhani iyi?

² Mpositole Paulosi ntchiyelezgero chiwemi chomene pa nkhani ya kuzenga ŵasopi ŵanyake. Iyo wakaŵachitiranga chiwuravi. Mu nkhani iyi, tiwonenge umo wakawovwilira ŵabali na ŵadumbu kuti (1) ŵazizipizgenge viyezgo, (2) ŵaŵenge pa mtende yumoza na munyake, (3) ŵakhozge chipulikano chawo mwa Yehova. Tiyeni tiwone umo tingamuyezgera pa nkhani iyi kuti nase tizenganenge na ŵabali na ŵadumbu ŵithu mazuŵa ghano.—1 Kor. 11:1.

3. Kasi Paulosi wakachitanga wuli vinthu?

³ Paulosi wakaŵatemwanga chomene ŵabali. Nayo wakakumanapo na masuzgo ghakuru, lekani wakalongoranga lusungu na chiwuravi  ku Ŵakhristu ŵanyake para nawo ŵasangana na masuzgo. Ulendo unyake Paulosi ndalama zikamumalira ndipo wakeneranga kugwira ntchito kuti wasange ivyo iyo na ŵanyake ŵakakhumbikwiranga. (Mil. 20:34) Iyo wakamanyanga ntchito yakupanga mahema. Wati wafika ku Korinte, pakwamba wakapanganga mahema lumoza na Prisila na Akwila awo nawo ntchito yawo yikaŵa yakupanga mahema. Kweni “zuŵa lililose la sabata” wakapharazganga ku Ŵayuda na Ŵagiriki. Pamanyuma kukati kwiza Sila na Timote, “Paulosi wakamba kutangwanika chomene na kupharazga mazgu.” (Mil. 18:2-5) Paulosi wakaluwa yayi chinthu chakuzirwa chomene pa umoyo wake, icho chikaŵa kuteŵetera Yehova. Pakuti Paulosi wakaŵa chiyelezgero chiwemi pa nkhani ya kupharazga kweniso kulimbikira kugwira ntchito kuti wasange vyakukhumbikwa pa umoyo, lekani wakakhozgangaso ŵabali na ŵadumbu. Wakaŵakumbuska kuti vyakukhumba vya umoyo kweniso kupenjera vyakukhumbikwa mbumba zawo kuleke kuŵapangiska kuluwa “vinthu vyakuzirwa chomene,” uko nkhusopa Yehova munthowa zakupambanapambana.—Fil. 1:10.

4. Kasi Paulosi na Timote ŵakawovwira wuli ŵasopi ŵanyawo kuzizipizga nthambuzgo?

⁴ Pati pajumpha kanyengo kachoko waka mpingo wa Tesalonika wati wapangika, ŵabali ŵa mpingo uwu awo ŵakaŵaso kuti ŵasambira waka unenesko ŵakasuskikanga chomene. Gulu lakususka linyake lati latondeka kusanga Paulosi na Sila, likaguguzira “ŵabali ŵanyake ku ŵeruzgi ŵa msumba,” ndipo likachemerezganga kuti: “Ŵanthu wose aŵa ŵakususkana na malango gha Kesare.” (Mil. 17:6, 7) Ghanaghanirani waka umo Ŵakhristu ŵaphya aŵa ŵakachitira wofi ŵati ŵamanya kuti ŵanalume ŵa mu msumba ŵaŵawukira. Chikaŵa chipusu kuti ŵawelere nyuma pakuchita uteŵeti wawo kwa Yehova, kweni Paulosi wakakhumba yayi kuti ivi vichitike. Nangauli iyo na Sila ŵakawukako, kweni ŵakawoneseska kuti mpingo uphya uwu ukupwelelereka makora. Paulosi wakakumbuska Ŵatesalonika kuti: “Tikatuma Timote, mubali withu . . . , mwakuti wamukhozgani na kumusanguluskani mu chipulikano chinu, mwakuti paŵavye yumoza wasunkhunyike na visuzgo ivi.” (1 Tes. 3:2, 3) Timote nayo wakwenera kuti wakakumanapo nagho masuzgo ghanthena agha mu tawuni yakwawo ya Lisitira. Wakawona umo Paulosi wakakhozgera ŵabali ku chigaŵa ichi. Pakuti kumanyuma wakawonapo umo Yehova wakawovwilira ŵanthu pa nyengo yanthena iyi ku Lisitira, lekani Timote wakasimikizgira ŵabali na ŵadumbu ŵaphya aŵa kuti chilichose chiŵenge makora waka kwa iwo.—Mil. 14:8, 19-22; Heb. 12:2.

5. Kasi mubali munyake zina lake Bryant wakasanga chandulo wuli na wovwiri wakufuma kwa mulara?

⁵ Kasi Paulosi wakakhozgaso wuli ŵasopi ŵanyake? Apo ŵakaweleranga ku Lisitira, Ikoniya na Antiyoke kukendera ŵabali, Paulosi na Baranaba “ŵakaŵimikira ŵalara mu mpingo uliwose.” (Mil. 14:21-23) Tikukayika yayi kuti ŵanalume ŵakwimikika aŵa ŵakakhozganga chomene mipingo, nga umo ŵakuchitira ŵalara mazuŵa ghano. Wonani ivyo wakayowoya mubali munyake zina lake Bryant, iyo wakati: “Nkhati nakwaniska vyaka 15, adada ŵakafumapo panyumba ndipo amama ŵakasezgeka. Nkhajipulika kuti najowoleka ndipo nkhagongowa chomene.” Kasi ntchivichi chikamovwira Bryant kuti wazizipizge pa nyengo yakusuzga iyi? Iyo wakati: “Mulara munyake zina lake Tony, wakadumbiskananga nane ku maungano na pa nyengo zinyake waka. Wakaniphaliranga za ŵanthu awo ŵakakumananga na masuzgo kweni ŵakaŵa ŵakukondwa. Wakaniŵazgira lemba la Salimo 27:10, ndipo kanandi wakayowoyanga vya Hezekiya, uyo wakateŵetera mwakugomezgeka nangauli adada ŵake ŵakaŵa chiyelezgero chiwemi yayi.” Kasi ivi vikamovwira wuli Bryant? Iyo wakuti: “Chifukwa cha kukhozgeka na Tony, nkhamba kuchita uteŵeti wanyengozose.” Ŵalara, muŵenge maso kuti movwire awo nga ni Bryant ŵangakhumbikwira “mazgu ghawemi” ghakuŵakhozga.—Zinth. 12:25.

6. Kasi Paulosi wakagwiliskira wuli ntchito ivyo vikachitikirapo ŵanji kumanyuma kuti wakhozge ŵabali na ŵadumbu?

 ⁶ Paulosi wakakumbuska ŵasopi ŵanyake kuti “bingu likuru la ŵakaboni” likazizipizga masuzgo ghanandi chifukwa chakuti Yehova wakaŵapanga nkhongono zinandi. (Heb. 12:1) Paulosi wakamanyanga umo vinthu ivyo vikachitikirapo ŵanthu ŵanyake kumanyuma awo ŵakakwaniska kuzizipizga masuzgo gha mtundu uliwose vingawovwilira ŵabali na ŵadumbu kuŵa na chikanga na kulutilira kudodoliska ku “msumba wa Chiuta wamoyo.” (Heb. 12:22) Fundo iyi njaunenesko na mazuŵa ghano wuwo. Ni njani wandakhozgekepo wati waŵazga nkhani ya umo Yehova wakawovwilira Gidiyoni, Baraki, Davide, Samuyeli na ŵanyake ŵanandi? (Heb. 11:32-35) Wuli pakuyowoya za ŵanthu awo ŵakulongora chipulikano chakukhora mazuŵa ghithu ghano? Ku likuru lithu la pa charu chose, kanandi tikupokera makalata kufuma ku ŵabali na ŵadumbu awo chipulikano chawo chikakhozgeka ŵati ŵaŵazga nkhani ya kulongosora umoyo wa muteŵeti munyake wakugomezgeka wa Yehova wa mu nyengo yithu yino.

7. Kasi mukusambirapo vichi pa ulongozgi wa Paulosi uwo uli pa Ŵaroma 14:19-21?

⁷ Tikuzenga ŵabali na ŵadumbu ŵithu para nyengo zose tikuyowoya na kuchita vinthu ivyo vikukhuŵilizga mtende mu mpingo. Tikuzomerezga yayi kuti kupambana pa nkhani ya umo tikuwonera vinthu kutipature. Kweniso tikungangamira pa maghanoghano ghithu pera yayi pa vinthu ivyo palije fundo ya mu Malemba iyo yasweka. Wonani chiyelezgero ichi. Mu mpingo wa ku Romu mukaŵa Ŵakhristu Ŵachiyuda na Ŵamitundu wuwo. Dango la Mozesi lati laleka kugwira ntchito, ŵateŵeti ŵa Yehova ŵakenerangaso yayi kusunga malango ghakukhwaskana na vyakurya vinyake. (Mrk. 7:19) Kufuma nyengo yira, Ŵakhristu ŵanyake Ŵachiyuda ŵakaŵa ŵakufwatuka kurya chakurya cha mtundu uliwose. Kweni ŵanyake, ŵakawonanga kuti ntchakwenelera yayi kurya vyakurya ivi. Mpingo ukagaŵikana pa nkhani iyi. Paulosi wakadidimizga kuti ntchakuzirwa kulutilira kuŵa pa mtende, ndipo wakayowoya kuti: “Ntchiwemi kuleka kurya nyama panji kumwa vinyo panji kuchita chinthu chilichose icho mubali wako wakukhuŵara nacho.” (Ŵazgani Ŵaroma 14:19-21.) Ntheura apa Paulosi wakawovwira ŵasopi ŵanyake kuwona kuti kugaŵikana uku kukaŵa kuheni chomene kwa munthu waliyose kweniso mpingo wose. Kweniso nayo wakaŵa wakunozgeka kusintha vinthu vinyake kuti waleke kukhuŵazga ŵanji. (1 Kor. 9:19-22) Nase tingazenga ŵanji na kulutilira kuŵa pa mtende para tikugega kwambiska mphindano pa vinthu ivyo munthu wakwenera kwendera njuŵi yake.

8. Kasi Paulosi wakachita wuli apo nkhani yinyake yakuzirwa yikate yitimbanizgenge mtende mu mpingo?

⁸ Paulosi wakalongora chiyelezgero chiwemi pa nkhani ya kulutilira kuŵa pa mtende nanga ŵanthu ŵangapambana maghanoghano pa nkhani zakuzirwa. Mwachiyelezgero, ŵanyake mu mpingo wa Ŵakhristu ŵakwambilira ŵakayowoyanga kuti ŵamitundu awo ŵakazgoka Ŵakhristu ŵakwenera kukotoleka kuti Ŵayuda ŵanyake ŵaleke kuŵanena. (Gal. 6:12) Paulosi wakasuska mwankhongono kachitiro kanthena, kweni m’malo mwakuchichizga ŵanthu kuti ŵalondezgenge ivyo iyo wakukhumba, mwakujiyuyura wakapempha wovwiri ku ŵapositole na ŵalara ku Yerusalemu. (Mil. 15:1, 2) Ivi vikawovwira kuti Ŵakhristu ŵalutilire kuŵa ŵakukondwa kweniso ŵamtende mu mpingo.—Mil. 15:30, 31.

9. Kasi tingamuyezga wuli Paulosi?

⁹ Para pali kupambana maghanoghano kukuru, tingalongora kuti tikukhuŵilizga mtende para tingapenja wovwiri ku awo Yehova waŵimika kuti ŵapwelelerenge mpingo. Kanandi ulongozgi wa mu Baibolo ukusangika mu mabuku na mavidiyo  ghithu panji mu makalata agho gulu lingatilembera. Usange tikuŵikapo mtima kulondezga ulongozgi uwu m’malo mwa kungangamira pa umo ise tikuwonera vinthu, tiwovwirenge kuti mu mpingo muŵe mtende.

10. Kasi Paulosi wakachitaso vichi kuti wakhuŵilizge mtende mu mpingo?

¹⁰ Paulosi wakakhuŵilizganga mtende mwakuyowoya mikhaliro yiwemi iyo ŵabali na ŵadumbu ŵakaŵa nayo, m’malo mwakuyowoya ivyo ŵakabudiskanga. Mwachiyelezgero, kuumaliro kwa kalata yake yakuluta ku Ŵaroma, Paulosi wakazunura mazina gha ŵanthu ŵanandi ndipo kanandi wakayowoyangaso viwemi vyakukhwaskana na ŵanthu aŵa. Tingamuyezga Paulosi para nyengo zose tikuyowoya mikhaliro yiwemi iyo ŵabali na ŵadumbu ŵithu ŵali nayo. Para tichitenge nthena, tovwirenge ŵabali na ŵadumbu ŵithu kuti ŵaŵenge paubwezi wakukhora, ivyo vingawovwiraso kuti mpingo uzengeke mu chitemwa.

11. Kasi tingawezgerapo wuli mtende para tapambana maghanoghano?

¹¹ Nyengo zinyake, nanga ŵangaŵa Ŵakhristu ŵakukhwima mwauzimu ŵangasuskana panji kupambana maghanoghano pa chithu chinyake. Ivi vikachitikirapo Paulosi na mubwezi wake Baranaba. Ŵanalume aŵa ŵakasuskana chomene pa nkhani ya kutoraso Mariko paulendo wawo wakulondezgapo wa umishonale. Apa “ŵakakwiyiskana chomene,” mwakuti ŵakapatukana. (Mil. 15:37-39) Kweni Paulosi, Baranaba na Mariko ŵakawezgerapo mtende pakati pawo, kulongora kuti ŵakazirwiskanga mtende na umoza mu mpingo. Lekani pamanyuma Paulosi wakazakayowoya viwemi vyakukhwaskana na Baranaba na Mariko. (1 Kor. 9:6; Kol. 4:10) Nase tikwenera kumazga mphindano izo tingaŵa nazo na ŵanji mu mpingo na kulutilira kuŵika mahara pa mikhaliro yiwemi iyo ŵali nayo. Usange tichitenge nthena, tikhuŵilizgenge mtende na umoza mu mpingo.—Efe. 4:3.

12. Kasi ni masuzgo wuli ghanyake agho ŵabali na ŵadumbu ŵithu ŵakusangana nagho?

¹² Tikuzenga ŵabali na ŵadumbu ŵithu para tikukhozga chipulikano chawo mwa Yehova. Ŵanyake ŵakusekeka na ŵabali ŵawo awo Mbakaboni yayi panji ŵanyawo ŵa ku ntchito panji ku sukulu. Ŵanyake ŵakulwara nthenda zikuru panji kusuzgika maghanoghano. Ŵanyake ŵali kubatizika nikale chomene ndipo ŵalindilira umaliro wa charu chiheni ichi kwanyengo yitali. Vinthu ivi vingayezga chipulikano cha Ŵakhristu mazuŵa ghano. Ŵanyake mu mpingo wa Ŵakhristu ŵakwambilira ŵakakumanangaso na masuzgo ghakuyanako waka na agha. Kasi Paulosi wakachita wuli kuti wakhozge ŵabali na ŵadumbu ŵake?

13. Kasi Paulosi wakaŵawovwira wuli awo ŵakasuskikanga chifukwa cha ivyo ŵakugomezga?

¹³ Paulosi wakagwiliskiranga ntchito Malemba kuzenga chipulikano cha ŵabali na ŵadumbu ŵake. Mwachiyelezgero, Ŵakhristu Ŵachiyuda panji ŵakasoŵanga chakuyowoya para ŵabali ŵawo awo ŵakaŵa ŵambura kugomezga, ŵakayowoyanga kuti Chiyuda ntchapadera chomene ndipo chikuluska Chikhristu. Lekani tikukayika yayi kuti kalata ya Paulosi yakuya ku Ŵahebere yikaŵakhozga chomene Ŵakhristu aŵa. (Heb. 1:5, 6; 2:2, 3; 9:24, 25) Fundo zankhongono izo Paulosi wakalemba zikaŵawovwira kumanya ivyo ŵangaŵazgora awo ŵakaŵasuskanga. Mazuŵa ghano tingawovwira ŵasopi ŵanyithu awo ŵakususkika kuti nawo ŵagwiliskirenge ntchito mabuku ghithu ghakulongosora Baibolo kuti ŵalongosore makora vigomezgo vyawo. Ndipo para ŵawukirano ŵithu ŵanthu ŵakuŵaseka chifukwa cha kugomezga kuti vinthu vikachita kulengeka, tingaŵawovwira kusanga fundo zakovwira mu maburosha gha mutu wakuti Kasi Vyamoyo Vikachita Kulengeka? na Umoyo Ukaŵako Wuli?—Mafumbo 5 Agho Tikwenera Kujifumba kuti  ŵakalongosore makora chifukwa icho ŵakugomezgera kuti umoyo ukachita kulengeka.

14. Kasi Paulosi wakachitanga vichi nangauli wakatangwanikanga na mulimo wakupharazga na kusambizga?

¹⁴ Paulosi wakachiska ŵabali na ŵadumbu kuti ŵalongorenge chitemwa kwizira mu “milimo yiwemi.” (Heb. 10:24) Wakawovwira ŵabali na ŵadumbu kwizira mu ivyo wakayowoyanga pera yayi kweniso kwizira mu ivyo wakachitanga. Mwachiyelezgero, apo Ŵakhristu ŵanyake ku Yudeya ŵakasangana na suzgo la njara, Paulosi wakaŵayegherako vinthu vinyake ivyo ŵakakhumbikwiranga. (Mil. 11:27-30) Nakuti, nangauli Paulosi wakatangwanikanga na kupharazga na kusambizga, nyengo zose wakasanganga nthowa zakuti wawovwilire awo ŵakasoŵerwanga vinthu vinyake vyakuthupi. (Gal. 2:10) Chifukwa chakuchita nthena, wakakhozganga ŵasopi ŵanyake kuŵa na chigomezgo kuti Yehova waŵawovwirenge. Mazuŵa ghano, para tikupeleka nyengo, nkhongono na kugwiliskira ntchito maluso ghithu kuti tovwire awo ŵakhwaskika na masoka ghachilengiwa, nase tikuzenga chipulikano cha ŵabali na ŵadumbu ŵithu. Ndimo vikuŵiraso para nyengo zose tikupeleka vyakupeleka vithu ku ntchito ya pa charu chose. Munthowa izi na zinyake, tikovwira ŵabali na ŵadumbu ŵithu kugomezga kuti Yehova waŵatayenge yayi.

15-16. Kasi tikwenera kuchita wuli na awo chipulikano chawo chawelera nyuma?

¹⁵ Paulosi wakalutilira kovwira awo chipulikano chawo chikalopwa. Wakaŵalongora lusungu ndipo wakayowoyeskananga nawo munthowa yakukhozga. (Heb. 6:9; 10:39) Mwachiyelezgero, mu makalata ghake ghose ghakuluta ku Ŵahebere, wakagwiliskiranga ntchito mazgu ghakuti “ise” kulongora kuti nayo wakeneranga kuwulondezga ulongozgi uwo wakapelekanga. (Heb. 2:1, 3) Nga Paulosi, nase tikuleka yayi kuŵawovwira awo chipulikano chawo chalopwa. M’malo mwake tikuŵazenga mwakuŵalongora kuti tikuŵaghanaghanira. Apo tikuchita nthena, tikulongora kuti tikuŵatemwa. Kweniso umo mazgu ghithu ghakufumira  para tikuyowoya nawo vingapangiska kuti uthenga uwo tikuŵaphalira uŵe wakuzenga nadi.

¹⁶ Paulosi wakaŵasimikizgira ŵabali na ŵadumbu kuti Yehova wakamanyanga milimo yawo yiwemi. (Heb. 10:32-34) Nase tingachita mwakuyana waka para tikovwira musopi munyithu uyo chipulikano chake chawelera nyuma. Tingamufumba kuti watilongosolereko umo wakambira unenesko panji kumuchiska kuti wakumbukire nyengo izo Yehova wakamovwirapo. Ndipo tingasangirapo mwaŵi wakumuphalira kuti Yehova wandaluwe yayi milimo yake yachitemwa iyo wakachitanga kumanyuma ndipo Yehova wazamumutayapo yayi. (Heb. 6:10; 13:5, 6) Kuchezga nawo munthowa iyi kungaŵachiska ŵabali na ŵadumbu kuti ŵalutilire kuteŵetera Yehova.

17. Kasi ni maluso wuli agho tikwenera kulutilira kusazgirako?

¹⁷ Misiri wakusazgirako luso lwake lwakuzenga para pajumpha nyengo. Mwakuyana waka, nase tingasazgirako luso lwakuzengana yumoza na munyake. Tingawovwira ŵanyithu kusanga nkhongono kuti ŵazizipizge viyezgo para tikuŵaphalirako umo ŵanthu awo ŵakakumanapo na masuzgo kumanyuma ŵakazizipizgira. Tingakhuŵilizga mtende para tikuyowoya viwemi ivyo ŵanji ŵakuchita, tikusungilira mtende para piza nthimbanizgo, kweniso tikuwezgerapo mtende para tapambana maghanoghano. Ndipo tingalutilira kuzenga chipulikano cha ŵabali na ŵadumbu ŵithu para tikuŵaphalirako fundo zakuzirwa za mu Baibolo, tikuŵawovwira para ŵasangana na masuzgo, kweniso para tikukhozga waliyose uyo wawelera nyuma mwauzimu.

18. Kasi imwe mwaŵikapo mtima kuchitachi?

¹⁸ Awo ŵakuchitako mulimo wa vyakuzengazenga ŵakuŵa ŵakukondwa kweniso ŵakukhorwa. Nase tingaŵa ŵakukondwa na ŵakukhorwa para tikuzenga ŵanyithu mwauzimu mu mpingo. Mwakupambanako na nyumba iyo yazengeka iyo pamanyuma yikunangika, viwemi ivyo vingaŵapo chifukwa cha mulimo withu wakuzengana mwauzimu vingakhalilira muyirayira. Ntheura mphanyi taŵikapo mtima ‘kulutilira kukhwimiskana na kuzengana.’—1 Tes. 5:11.