Para tikuŵerenga Baibolo, tingachita kafukufuku kuti tipulikiske makora ivyo tikuŵerenga. Kweni para tikuchita kafukufuku tikwenera kuchita vinandi padera pakuti timanye waka vinandi vya mu Baibolo. Tikwenera kusanga fundo zakukhwaskana na mikhaliro ya Yehova izo zingatovwira kuti timutemwenge chomene. Kuti tichite nthena, tingajifumba kuti, ‘Kasi nkhani ya mu Baibolo iyi yikunisambizga vichi vya Yehova?’

Mwachiyelezgero, tingapenjerezga ukaboni wakulongora umo Yehova wakulongolera mikhaliro yake yikuruyikuru nga ntchitemwa, vinjeru, urunji, na nkhongono. Ndipouli, Yehova wali na mikhaliro iyi pera yayi. Waliso na mikhaliro yinandi yiwemi chomene. Kasi ni nkhu uko mungasanga fundo zinandi zakukhwaskana na mikhaliro yake?

Wonani mu Buku Lakupenjera Nkhani la Ŵakaboni ŵa Yehova, pa mutu wakuti “Yehova Chiuta,” ndipo kufuma apo wonani pa mutu uchoko wakuti “Mikhaliro ya Yehova.” Pamanyuma, chitani kafukufuku pa mukhaliro wa Yehova uwo mwasanga mu mavesi agho mwaŵazga mu Baibolo.”