Mu nkhani iyi tikasambira kuti pali nkhani yimoza yakuzirwa chomene iyo yikukhwaska ŵanthu na ŵangelo. Nkhani yake njakukhwaskana na kutuŵiska zina la pachanya nkhanira la Yehova. Nkhani yakuti Yehova ndiyo ngwakwenelera kuwusa panji yayi, yikukhwaska chomene kutuŵiskika kwa zina lake. Mwakuyana waka, nkhani yakuti munthu wangalutilira kugomezgeka kwa Chiuta panji yayi, nayo yikukolerana chomene na kutuŵiskika kwa zina la Yehova.

Chifukwa wuli sono tikudidimizga chomene kuti nkhani yakukhwaskana na zina la Yehova kweniso kulituŵiska njakuzirwa chomene? Tiyeni tiwone vifukwa vitatu.

Chakwamba, Satana wakabinkhiska zina la Yehova panji kuti lumbiri lwake mu munda wa Edeni. Fumbo laukhuluku ilo Satana wakafumba Eva likalongoranga nga kuti Yehova wakunora ŵanthu vinthu viwemi kweniso wakuŵaŵikira malango ghakufyenya. Kufuma apo, Satana wakasuska ivyo Yehova wakayowoya, ndipo tingati wakanenanga Chiuta kuti ni mutesi. Apa wakamunangira zina Yehova. Ntheura wakazgoka “Dyabulosi,” kung’anamura “wakusesa.” (Yoh. 8:44) Chifukwa chakuti Eva wakagomezga mautesi gha Satana, wakaleka kupulikira Chiuta ndipo wakagalukira muwuso wake. (Gen. 3:1-6) M’paka mwahuno Satana wachali kuthandazga mautesi ghakukhwaskana na Chiuta na kubinkhiska zina lake. Awo ŵakugomezga mautesi agha kanandi ŵakumupulikira yayi Yehova. Ntheura ku ŵanthu ŵa Chiuta, kuyowoyera viheni zina lituŵa la Yehova ntchinthu chiheni chomene. Chifukwa ivi ndivyo vili kwambiska masuzgo na viheni vyose ivyo vikuchitika pano pa charu chapasi.

Chachiŵiri, kuti vilengiwa vyake vyose visange chandulo, Yehova waŵikapo mtima kuti watuŵiske zina lake, mwa kumazga mautesi ghose ghakukhwaskana na zina lake. Kuchita nthena nkhwakuzirwa chomene kwa Yehova. Lekani wali kuyowoya kuti: “Nizamulituŵiska nadi zina lane likuru.” (Ezek. 36:23) Yesu nayo wakalongora makora chomene icho chikwenera kuŵa pakwamba mu malurombo gha ŵateŵeti wose ŵakugomezgeka ŵa Yehova, apo wakayowoya kuti: “Zina linu lituŵiskike.” (Mat. 6:9) Baibolo likuyowoya mwakuwerezgawerezga kuti tikwenera kupeleka uchindami ku zina la Yehova. Wonani viyelezgero vichoko waka ivi: “Pelekani kwa Yehova uchindami wakwenelera zina lake.” (1 Mid. 16:29; Sal. 96:8) “Yimbirani malumbo zina lake lauchindami.” (Sal. 66:2) “Nipelekenge uchindami ku zina linu muyirayira.” (Sal. 86:12) Nyengo yimoza apo Yehova wakayowoya yekha kufuma kuchanya, ni apo Yesu wakaŵa mu tempile ku Yerusalemu apo wakati: “Adada, chindikani zina linu.” Yehova wakazgora kuti: “Nalichindika ndipo nilichindikengeso.”—Yoh. 12:28. a

Chachitatu, nyengo zose khumbo la Yehova likukolerana na zina lake, panji kuti lumbiri lwake. Ghanaghanirani fundo iyi: Kasi ŵanthu na ŵangelo ŵazamuliwonanga wuli zina la Yehova pamanyuma pa Muwuso wa Khristu wa Vyaka 1,000, kweniso pamanyuma pa chiyezgo chaumaliro? Kasi vilengiwa vyamahara ivi vizamuŵaso vyakugaŵikana pa nkhani yikuru iyi ya kutuŵiskika kwa zina la Yehova? Kuti tizgore makora mafumbo agha, tiyeni tighanaghanireso  nkhani ziŵiri zira izo zikukolerana na kutuŵiskika kwa zina la Yehova—nkhani yakuti munthu wangalutilira yayi kugomezgeka kwa Chiuta para wangayezgeka kweniso nkhani ya uyo wangawusa makora. Pa nyengo iyo chizamuŵaso chakukhumbikwa yayi kuti ŵanthu ŵalongore kugomezgeka kwawo. Vili nthena, chifukwa ŵanthu ŵazamuŵa ŵakufikapo kweniso ŵazamuŵa kuti ŵayezgeka kale mwakukwana. Ŵazamuŵa kuti ŵapokera umoyo wamuyirayira. Kweniso chizamuŵaso chakukhumbikwa yayi kwa ise kuti tisimikizge dankha usange muwuso wa Yehova nguwemi panji yayi. Panyengo iyo, tose kuchanya na pa charu chapasi tizamuŵa ŵakukolerana na kuzomerezga kuti Yehova ndiyo ngwakwenelera kuwusa. Kweni wuli pakuyowoya za zina la Yehova?

Panyengo iyi zina la Yehova lizamuŵa kuti latuŵiskika ku mautesi ghose gha Satana. Ndipouli, zina la Yehova lizamulutilira kuŵa chinthu chakuzirwa chomene ku ŵateŵeti ŵake wose kuchanya na charu chapasi. Chifukwa wuli? Chifukwa ŵazamuwona kuti Yehova wakulutilira kuchita vinthu vyakuzizwiska. Ghanaghanirani fundo iyi: Chifukwa chakuti Yesu mwakujiyuyura wazamuwezgera Ufumu kwa Yehova, Chiuta wazamuzgoka “vinthu vyose kwa waliyose.” (1 Kor. 15:28) Para ivi vyazakachitika, ŵanthu pa charu chose ŵazamuŵa na “wanangwa wauchindami wa ŵana ŵa Chiuta.” (Rom. 8:21) Paumaliro Yehova wazamufiska chilato chake chakuti ŵana ŵake wose ŵakuchanya na ŵa pa charu chapasi ŵaŵe mbumba yikuru yimoza yakukolerana.—Efe. 1:10.

Kasi ivi vizamukhwaska wuli mbumba ya Yehova kuchanya na pa charu chapasi? Vizamuchitiska kuti tilutilire kuŵa na khumbo likuru la kulumba zina lakutowa la Yehova. Mwakovwirika na mzimu utuŵa, wamasalimo Davide wakalemba kuti: “Yehova Chiuta walumbike . . . Zina lake lauchindami lilumbike muyirayira.” (Sal. 72:18, 19) Kwamuyirayira, tizamulutilira kusanga vifukwa viphya kweniso viwemi vyakulumbira Yehova.

Nakuti zina la Yehova likwimira chilichose chakukhwaskana na iyo. Chikuru chomene, zina la Yehova, likutikumbuska za chitemwa chake. (1 Yoh. 4:8) Nyengo zose tikumbukenge kuti Yehova wakatilenga chifukwa cha chitemwa, wakapeleka sembe yakuwombora chifukwa cha chitemwa, kweniso wakuwusa mwaurunji chifukwa cha chitemwa. Chakuluska vyose, tizamulutilira kuwona umo Yehova wakutitemwera. Kwamuyirayira, tizamuchiskika kuti tisendelere chomene kwa Adada ŵithu ŵa kuchanya na kwimba sumu zakulumba zina lawo lapachanya nkhanira.—Sal. 73:28.