1. Chifukwa wuli Ŵababuloni ŵakakondweskeka nayo ntchimi Daniyeli?

 NTCHIMI DANIYELI wakaŵa muwukirano apo Ŵababuloni ŵakamutoleranga ku wuzga, kutali na kukwawo ku Yerusalemu. Kweni nangauli wakaŵa muwukirano, ŵalara ŵa Ŵababuloni ŵakawona kanthu kanyake mwa Daniyeli. Ŵakawona ‘ivyo munthu wakuwona kuwaro’—kuti Daniyeli wakaŵa ‘wambura kalema kweniso wakuwoneka makora,’ ndiposo kuti wakafuma mu mbumba yakumanyikwa. (1 Sam. 16:7) Pa vifukwa ivi, Ŵababuloni ŵakamusambizga kuti wateŵeterenge mu nyumba yachifumu.—Dan. 1:3, 4, 6.

2. Kasi Yehova wakamuwonanga wuli Daniyeli? (Ezekiyeli 14:14)

² Yehova wakamutemwanga Daniyeli chifukwa cha kuŵa wakutowa yayi panji chifukwa cha kufuma mu mbumba yakumanyikwa, kweni chifukwa cha ivyo muwukirano uyu wakasankha. Nakuti Daniyeli wakwenera kuti wakaŵa na vyaka pafupipafupi 20 panji kujumphirapo apo Yehova wakamuzunura pamoza na Nowa na Yobu, ŵanalume awo ŵakagomezgeka kwa Chiuta kwa vyaka vinandi. (Gen. 5:32; 6:9, 10; Yobu 42:16, 17; ŵazgani Ezekiyeli 14:14.) Ndipo Yehova wakalutilira kumutemwa Daniyeli nyengo yose iyo wakaŵira na umoyo wake pa charu chapasi.—Dan. 10:11, 19.

3. Kasi tiwonenge vichi mu nkhani iyi?

³ Mu nkhani iyi, tiwonenge mikhaliro yiŵiri ya Daniyeli iyo yikapangiska kuti waŵe wakuzirwa kwa Yehova. Chakwamba, tilongosorenge mukhaliro uliwose pawekha na kuwona panyengo izo wakalongora mukhaliro uwo. Kufuma apo, tiwonenge ivyo vikawovwira Daniyeli kuti waŵe na mikhaliro iyi. Paumaliro, tidumbiskanenge umo tingamuyezgera. Nangauli nkhani iyi yalembekera ŵawukirano, kweni tose tingasambirako kwa Daniyeli.

4. Kasi Daniyeli wakalongora wuli chikanga? Yowoyani chiyelezgero.

⁴ Nyengo zinyake ŵanthu awo mbachikanga ŵangachita wofi,  kweni ŵakuzomerezga yayi kuti wofi uŵatondeske kuchita icho ntchakunyoloka. Daniyeli wakaŵa muwukirano wachikanga chomene. Wonani nyengo ziŵiri apo wakalongora mukhaliro uwu. Nyengo yakwamba apo wakalongora chikanga pakwenera kuti pakaŵa apo Themba Nebukadinezara likalota loto lakofya lakukhwaskana na chikozgo. Ndipo pakaŵa kuti pajumpha vyaka viŵiri kufuma apo Ŵababuloni ŵakaparanyira Yerusalemu. Themba ili likati likomenge ŵanalume wose ŵavinjeru, kusazgapo Daniyeli, usange ŵatondekenge kuyowoya ivyo lalota kweniso kupatawulira ng’anamuro lake. (Dan. 2:3-5) Daniyeli wakeneranga kuchitapo kanthu mwaluŵiro, chifukwa watondekenge mphanyi ŵanthu ŵanandi ŵakakomeka. Iyo “wakanjira na kupempha themba kuti limupe nyengo kuti waliphalire ng’anamuro la loto lake.” (Dan. 2:16) Ivyo wakachita apa vikulongora kuti Daniyeli wakaŵa na chikanga kweniso chipulikano. Chifukwa wuli tikuyowoya nthena? Chifukwa palije mu Baibolo apo pakuyowoya kuti Daniyeli wakaŵa kuti wapatawulirapo kale maloto. Wakapempha ŵanyake—awo mazina ghawo Ghachibabuloni ghakaŵa Shadireki, Misheki, na Abedinego—“kuti ŵalombe Chiuta wakuchanya kuti waŵachitire lusungu na kuŵavumbulira chisisi ichi.” (Dan. 2:18) Yehova wakazgora malurombo ghawo. Na wovwiri wa Chiuta, Daniyeli wakapatawulira loto la Nebukadinezara. Ntheura Daniyeli na ŵabwezi ŵake aŵa ŵakakomeka yayi.

5. Kasi mphanyengo wuli yinyake apo Daniyeli wakakhumbikwirangaso kulongora chikanga?

⁵ Nyengo yikati yajumphapo kufuma apo Daniyeli wakapatawulira loto lakukhwaskana na chikozgo chikuru, chinthu chinyake chikachitika icho chikakhumbikwirangaso kuti walongore chikanga. Nebukadinezara wakalotaso loto lakofya. Loto ili likaŵa lakukhwaskana na chikhuni chikuru. Mwachikanga Daniyeli wakalongosora kwa themba ng’anamuro la loto lake, kusazgapo na uthenga wakuti lifunthenge na kuwuskikapo pa uthemba kwakanyengo. (Dan. 4:25) Chikaŵa chipusu kuti themba liwone Daniyeli kuti ngwakuwukira chifukwa cha uthenga uwu na kumukoma Daniyeli. Kweni Daniyeli wakalongora chikanga na kuliphalira themba.

6. Kasi ntchivichi icho chikwenera kuti chikawovwira Daniyeli kuŵa wachikanga?

⁶ Kasi ntchivichi icho chikwenera kuti chikawovwira Daniyeli kuŵa wachikanga umoyo wake wose? Apo wakaŵa mwana, Daniyeli wakwenera kuti wakasambirako ku chiyelezgero chiwemi cha anyina na awiske icho ŵakalongoranga. Tikukayika yayi kuti iwo ŵakapulikira ulongozgi uwo Yehova wakapeleka ku ŵapapi Ŵachiisrayeli, ndipo ŵakamusambizga Dango la Chiuta mwana wawo.  (Doto. 6:6-9) Daniyeli wakamanyanga waka Malango 10 pera yayi, kweni wakamanyangaso vinandi vyakukhwaskana na Dango. Mwachiyelezgero, wakamanyanga vyakurya ivyo Ŵaisrayeli ŵakwenera kurya na ivyo ŵakwenera kurya yayi. b (Lev. 11:4-8; Dan. 1:8, 11-13) Daniyeli wakamanyangaso mdauko wa ŵanthu ŵa Chiuta ndipo wakamanyanga ivyo vikaŵachitikiranga para ŵatondeka kupulikira fundo za Yehova. (Dan. 9:10, 11) Ivyo vikachitikira Daniyeli pa umoyo wake vikamupangiska kugomezga kuti Yehova na ŵangelo ŵake ŵankhongono ŵakamovwiranga.—Dan. 2:19-24; 10:12, 18, 19.

7. Kasi ntchivichi chinyake icho chikawovwira Daniyeli kuŵa na chikanga? (Wonaniso chithuzi.)

⁷ Daniyeli wakasambiranga ivyo ntchimi za Chiuta zikalemba, kusazgapo mauchimi gha Yeremiya. Chifukwa cha ivyo wakasambiranga, Daniyeli pamanyuma wakamanya kuti Ŵayuda ŵakaŵa pafupi kufwatulika nangauli ŵakaŵa kuti ŵakhala nyengo yitali ku Babuloni. (Dan. 9:2) Daniyeli wakawona kuti uchimi wa mu Baibolo ukafiskika, ndipo ivi vikwenera kuti vikamovwira kuti wagomezgenge chomene mwa Yehova. Mazuŵa ghano napo, awo ŵakumugomezga chomene Chiuta nawo ŵangaŵa na chikanga chomene. (Yaniskani na Ŵaroma 8:31, 32, 37-39.) Chakuzirwa chomene ntchakuti Daniyeli wakalombanga kwa Adada ŵake ŵakuchanya kanandi waka. (Dan. 6:10) Wakazomera zakwananga zake kwa Yehova na kumuphalira umo wakajipulikiranga. Kweniso Daniyeli wakalombanga wovwiri. (Dan. 9:4, 5, 19) Daniyeli wakaŵa munthu nga ndise, ntheura chikanga wakachita kubabika nacho yayi. Kweni wakaŵa na chikanga chifukwa cha kusambira Mazgu gha Chiuta na kulomba, kweniso kugomezga chomene Yehova.

8. Kasi tingachita wuli kuti tiŵe na chikanga?

⁸ Kasi tikwenera kuchita vichi kuti tiŵe na chikanga? Ŵapapi ŵithu ŵangatichiska kuti tiŵe ŵachikanga, kweni tingachita kuhara yayi mukhaliro uwu nanga iwo ŵangaŵa kuti ŵali na chikanga. Kuŵa na chikanga vikuyana waka na kusambira luso liphya. Nthowa yimoza iyo mungasambilira luso, nkhulaŵisiska chomene ivyo msambizgi wakuchita ndipo pamanyuma kumuyezga. Mwakuyana waka, tingaŵa ŵachikanga para tikulaŵisiska chomene umo ŵanji ŵakulongolera mukhaliro uwu na kuŵayezga. Ntheura kasi tasambirako vichi kwa Daniyeli? Nga ni Daniyeli, nase tikwenera kughamanya makora Mazgu gha Chiuta. Tikwenera kuŵa paubwezi wakukhora na Yehova, ndipo tingachita nthena para tikuyowoyeskana nayo mu lurombo kanandi waka na kumuphalira umo tikujipulikira. Kweniso tikwenera kumugomezga Yehova, pakuŵa ŵakukhorwa kuti nyengo zose watovwirenge. Para tachita nthena, tiŵenge ŵachikanga usange chipulikano chithu chayezgeka.

9. Kasi tikupindura wuli para tikuŵa ŵachikanga?

⁹ Tikupindura mu nthowa zinandi para tikuŵa ŵachikanga. Wonani ivyo vikachitikira Ben. Wakaluta ku sukulu yinyake ku Germany uko waliyose wakagomezganga kuti vyamoyo vikachita kusintha kufuma ku vinyake kweniso ŵakawonanga kuti nkhani ya mu Baibolo yakukhwaskana na chilengiwa njautesi. Zuŵa linyake Ben wakapika mwaŵi mu kilasi kuti wayowoyepo, ndipo wakalongosora chifukwa icho wakugomezgera kuti vyamoyo vikachita kulengeka. Mwachikanga wakaphalira waliyose mu kilasi ivyo wakagomezganga. Kasi pakaŵa vyakufumapo wuli? Ben wakuti: “Asambizgi ŵane ŵakategherezga mwakupwelelera chomene, ndipo ŵakapanga makope gha fundo izo nkhalongosora na kupeleka ku mwana wa sukulu waliyose mu kilasi.” Kasi awo Ben wakasambiranga nawo mu kilasi ŵakachita wuli? Ben wakuti: “Ŵanandi ŵa iwo ŵakategherezga ivyo nkhayowoyanga, ndipo ŵakati nkhaŵanothiska.” Ivyo vikachitikira Ben vikulongora kuti, kanandi  ŵanthu awo ŵakulongora chikanga ŵakuchindikika na ŵanji. Kweniso ŵangawovwira kuti ŵanthu ŵamitima yiwemi ŵamumanye Yehova. Ntheura tili na vifukwa vyakupulikikwa vyakuŵira ŵachikanga.

10. Kasi kugomezgeka ni vichi?

¹⁰ Mu Baibolo lizgu la Chihebere ilo lili kung’anamulika kuti “kugomezgeka,” panji “chitemwa chakugomezgeka” kanandi likuyowoya vya chitemwa icho Chiuta wali nacho pa ŵateŵeti ŵake. Lizgu ili likugwiliskirikaso ntchito pakulongosora za chitemwa icho ŵateŵeti ŵa Chiuta ŵakulongorana. (2 Sam. 9:6, 7) Para nyengo yikujumphapo tingaŵa ŵakukhora chomene pa nkhani ya kugomezgeka. Tiyeni tiwone umo Daniyeli wakaŵira wakukhora pa nkhani ya kugomezgeka.

11. Kasi apo Daniyeli wakaŵa muchekuru wakakumana na chiyezgo wuli icho chikayezga kugomezgeka kwake? (Wonani chithuzi cha pa chikopi.)

¹¹ Daniyeli wakayezgeka kanandi waka pa nkhani ya kugomezgeka. Kweni apo wakayezgeka chomene ni apo wakaŵa na vyaka vya m’ma 90. Panyengo iyi, msumba wa Babuloni ukaŵa mu mawoko gha Ŵamedi na Peresiya ndipo Themba Dariyasi ndilo likawusanga. Ŵalaraŵalara awo ŵakateŵeteranga Themba Dariyasi ŵakamutinkhanga chomene Daniyeli ndipo ŵakamuchindikanga yayi Chiuta wake. Ntheura ŵakapanga pulani yakuti Daniyeli wakomeke. Ŵakapangiska themba kuti lisayine dango ilo lipangiskenge Daniyeli kulongora usange wagomezgekenge kwa Chiuta panji kwa themba. Icho Daniyeli wakeneranga kuchita kuti walongore kugomezgeka kwa themba kweniso kuti wayane na waliyose panji kugega chilango, ntchakuti wakeneranga kuleka kulomba kwa Yehova kwa mazuŵa 30. Kweni Daniyeli wakakana kuleka kugomezgeka kwa Yehova. Ntheura wakaponyeka mu chikhululu cha nkhalamu. Kweni Yehova wakamutumbika Daniyeli chifukwa cha kugomezgeka pa kumuponoska ku milomo ya nkhalamu. (Dan. 6:12-15, 20-22) Kasi nase tingachita wuli kuti tiŵe ŵakugomezgeka nthena kwa Yehova nga umo Daniyeli wakaŵira?

12. Kasi Daniyeli wakachita wuli kuti waŵe wakugomezgeka chomene kwa Yehova?

¹² Nga umo tayowoyera kale, kuti tiŵe ŵakugomezgeka tikwenera kumutemwa chomene Yehova. Daniyeli wakalutilira kugomezgeka kwa Yehova chifukwa chakuti wakaŵatemwanga chomene Adada ŵake ŵakuchanya. Tikukayika yayi kuti Daniyeli wakaŵa na chitemwa chikuru pa Yehova chifukwa wakaŵanga na nyengo yakughanaghanira  mikhaliro ya Yehova kweniso umo Yehova wakayilongoleranga. (Dan. 9:4) Kweniso Daniyeli wakaghanaghanirangapo pa viwemi vyose ivyo Yehova wakaŵa kuti wachitira iyo na ŵanthu ŵake, ndipo wakawonganga chomene.—Dan. 2:20-23; 9:15, 16.

13. (a) Kasi ŵawukirano ŵithu ŵakukumana na viyezgo wuli? Pelekani chiyelezgero. (Wonaniso chithuzi.) (b) Kuyana na vidiyo, kasi mungazgora wuli para ŵanji ŵakumufumbani usange Ŵakaboni ŵa Yehova ŵakukhozgera awo ŵasankha kugonana na ŵanalume panji ŵanakazi ŵanyawo?

¹³ Nga ni Daniyeli, ŵawukirano ŵithu nawo ŵazingilizgika na ŵanthu awo ŵakumuchindika yayi Yehova na fundo zake. Ŵanthu ŵanthena ŵangamutinkha munthu waliyose uyo wakuti wakumutemwa Chiuta. Ŵanyake ŵangamba kuŵasuzga ŵawukirano ŵithu na chilato chakuti ŵaleke kuŵa ŵakugomezgeka kwa Yehova. Mwachiyelezgero, wonani ivyo vikachitikira muwukirano munyake Graeme, uyo wakukhala ku Australia. Wakakumana na chiyezgo chakusuzga apo wakaŵa ku sekondare. Msambizgi wakafumba ŵana mu kilasi umo ŵangachitira usange mubwezi wawo wangaŵaphalira kuti wakugonana na ŵanalume panji ŵanakazi ŵanyake. Msambizgi uyu wakatiso wose awo ŵakukolerana navyo kuti ntchiwemi waka kuti mubwezi wawo wachitenge nthena, ŵimilire ku chigaŵa chinyake cha kilasi; awo ŵakuti yayi, ŵimilire ku chigaŵa chinyake. Graeme wakuti: “Wose mu kilasi ŵakimilira ku chigaŵa chakukhozgera mubwezi wa nkharo yawakawaka iyi, kupaturako ine na Kaboni munyane munyake.” Kufuma apo vinthu vikafika paheni chomene, ndipo Graeme wakakhumbikwiranga kulongora usange ngwakugomezgeka nadi kwa Yehova. Iyo wakuti: “Kufuma waka apa kwa maora ghose agho tikaŵira mu kilasi pa zuŵa ili, ŵana ŵa sukulu ŵanyake kusazgapo na msambizgi wuwo ŵakatinenanga na kutituka. Nkhachita vyose ivyo ningafiska kuti nivikilire chipulikano chane mwakuzika kweniso mwamahara, kweni ŵakategherezga yayi.” Kasi Graeme wakajipulika wuli? Iyo wakuti: “Vikanikwenyerezga chomene apo ŵanyane mu kilasi ŵakaninenanga, kweni nkhaŵa wakukondwa mu mtima chifukwa nkhagomezgeka kwa Yehova na kuvikilira vigomezgo vyane.” c

14. Kasi ni nthowa wuli yimoza iyo tingaŵira ŵakugomezgeka kwa Yehova visuzge viti wuli?

¹⁴ Nga Daniyeli, nase tingaŵa ŵakugomezgeka kwa Yehova nyengo zose, usange tikumutemwa kufumira pasi pamtima. Tingamba kumutemwa chomene Yehova para tikusambira mikhaliro yake. Mwachiyelezgero, tingasambira vinthu ivyo wali kulenga. (Rom. 1:20) Para namwe mukukhumba kuti mumutemwenge na kumuchindika chomene Yehova, mungaŵazga nkhani zifupi za mutu wakuti “Kasi Vikachita Kulengeka?” panji wonelerani mavidiyo. Mungaŵazgaso burosha la mutu wakuti Kasi Vyamoyo Vikachita Kulengeka? kweniso la mutu wakuti Umoyo Ukaŵako Wuli?—Mafumbo 5 Agho Tikwenera Kujifumba. Wonani ivyo wakayowoya muwukirano munyake wa ku Denmark zina lake Esther vyakukhwaskana na mabuku agha. Iyo wakati: “Ghakulongosora mwakupulikikwa makora. Maburosha agha ghakuchita kukuphalira ivyo ukwenera kugomezga yayi, m’malo mwake ghakuyowoya waka izo ni fundo ndipo iwe wamweneko ukupanga wekha chakusankha.” Ben, uyo tamuzunura kale wakuti: “Maburosha agha ghakakhozga chomene chipulikano chane. Ghakanikhorweska kuti Chiuta ndiyo wakalenga nadi vyamoyo.” Pamanyuma pakusambira maburosha agha, namwe muzamukolerana na fundo ya mu Baibolo yakuti: “Ndimwe ŵakwenelera Yehova Chiuta withu, kupokera uchindami, ntchindi na nkhongono, chifukwa mukalenga vinthu vyose.”—Chivu. 4:11. d

15. Kasi ni nthowa wuli yinyake iyo tingakhozgera ubwezi withu na Yehova?

¹⁵ Nthowa yinyake iyo tingachita kuti timutemwenge chomene Yehova kufumira pasi pamtima, nkhusanda mwakupwelelera umoyo wa Mwana wake, Yesu. Mudumbu munyake muwukirano zina lake Samira, uyo wakukhala ku Germany, ndimo  wakachitira. Iyo wakuti: “Nkhamumanya makora Yehova chifukwa cha Yesu.” Apo wakaŵa mwana, Samira vikamusuzganga kumanya umo Yehova wakujipulikira pa nkhani yinyake. Kweni wakamanya chifukwa cha kuyaniska na umo Yesu wakachitiranga vinthu. Iyo wakuti: “Nkhamutemwanga chomene Yesu chifukwa chakuti wakaŵa waubwezi kweniso wakatemwanga ŵana.” Apo wakasambiranga vinandi vya Yesu, ndipo wakaŵangaso paubwezi wakukhora chomene na Yehova. Chifukwa wuli? Iyo wakuti: “Pachoko na pachoko nkhamanya kuti Yesu wakuyezga Awiske mwakufikapo. Pali vinandi ivyo ŵakuyana. Nkhamanya kuti ichi ntchimoza mwa vifukwa ivyo Yehova wakatumira Yesu pano pa charu chapasi, kuti chiŵe chamachitiko kuti ŵanthu ŵamumanye makora Yehova.” (Yoh. 14:9) Usange mukukhumba kukhozga ubwezi winu na Yehova, mwalekerachi kuti mupature nyengo yakusambilira vyose ivyo mungafiska vyakukhwaskana na Yesu? Para muchitenge nthena, mumutemwenge chomene Yehova kweniso mulutilirenge kugomezgeka kwa iyo.

16. Kasi tikupindura wuli para tili ŵakugomezgeka? (Salimo 18:25; Mika 6:8)

¹⁶ Awo mbakugomezgeka kanandi ŵakuŵa na ŵabwezi awo nawo mbakugomezgeka kwa iwo. (Rute 1:14-17) Kweniso ŵanthu awo mbakugomezgeka kwa Yehova ŵali na vifukwa vyakupulikikwa vyakuŵira na mtende wa mu mtima. Chifukwa wuli? Chifukwa ntchakuti Yehova wakulayizga kuti waŵenge wakugomezgeka ku awo mbakugomezgeka kwa iyo. (Ŵazgani Salimo 18:25; Mika 6:8.) Ghanaghanirani waka kuti Mlengi wankhongonozose ngwakukhumbisiska chomene kuti tiŵe nayo paubwezi wakukhora. Ndipo para taŵa nayo paubwezi wakukhora Yehova, palije chiyezgo, wakususka, nanga ni nyifwa ivyo vingamazga ubwezi uwu. (Dan. 12:13; Luka 20:37, 38; Rom. 8:38, 39) Ntheura ntchakuzirwa chomene kuti tiyezge Daniyeli na kulutilira kuŵa ŵakugomezgeka kwa Yehova.

17-18. Kasi tingasambirakoso vichi kwa Daniyeli?

¹⁷ Mu nkhani iyi tawona waka mikhaliro yiŵiri iyo Daniyeli wakaŵa nayo. Kweni pali vinandi chomene ivyo tingasambirako kwa iyo. Mwachiyelezgero, Yehova wakamulongora Daniyeli mboniwoni zinandi kweniso kumuloteska maloto, ndipo wakamupa luso lwakupatawulira mauthenga gha uchimi. Ghanandi mwa mauchimi agha ghali kufiskika kale. Ghanyake ghakulongosora vyakuchitika ivyo vichitikenge munthazi ivyo vikhwaskenge munthu waliyose pa charu chapasi.

¹⁸ Mu nkhani yakulondezgapo, tiwonenge mauchimi ghaŵiri agho Daniyeli wakalemba. Kupulikiska mauchimi agha, kungatovwira tose, ŵawukirano na ŵalara wuwo, kusankha mwamahara pasono. Mauchimi agha ghatovwirengeso kukhozga chikanga chithu kweniso kugomezgeka kwithu, ndipo tiŵenge ŵakunozgeka kukumana na viyezgo ivyo vikwiza panthazi apa.