NKHANI YAKUSAMBIRA 36
Yeghani Ivyo Ni Vyakukhumbikwa Pera na Kutaya Vyambura Kukhumbikwa
“Nase tiyeni tiwuskeko uzito uliwose . . . , ndipo tizizipizge pakuchimbira pa chiphalizgano icho chaŵikika panthazi pithu.”—HEB. 12:1.
SUMU 33 Katundu Wako Umuthwikiske Yehova
IVYO VILI MU NKHANI IYI a
1. Kuyana na Ŵahebere 12:1, kasi tikwenera kuchita vichi kuti tichimbire pa chiphalizgano cha umoyo m’paka paumaliro?
PAKUŴA Ŵakhristu, Baibolo likuyaniska umoyo withu na chiphalizgano. Uyo wachimbirenge m’paka paumaliro ndiyo wazamupokera umoyo wamuyirayira. (2 Tim. 4:7, 8) Tikwenera kuchita vyose ivyo tingafiska kuti tilutilire kuchimbira, chifukwa sono tili pafupi chomene na mzere waumaliro. Mpositole Paulosi, uyo wakachimbira chiphalizgano cha umoyo m’paka paumaliro, wakayowoyapo vinthu ivyo vingatovwira kuti nase tiluske pa chiphalizgano ichi. Wakayowoya kuti “tiwuskeko uzito uliwose . . . ndipo tizizipizge pakuchimbira pa chiphalizgano icho chaŵikika panthazi pithu.”—Ŵazgani Ŵahebere 12:1.
2. Kasi ‘kuwuskako uzito uliwose’ chikung’anamurachi?
2 Kasi apo Paulosi wakalembanga kuti “tiwuskeko uzito uliwose,” wakang’anamuranga kuti palije kalikose ako Mkhristu wakwenera kunyamura? Yayi. M’malo mwake wakang’anamuranga kuti tikwenera kutaya vyekha ivyo ni vyambura kukhumbikwa. Vinthu ivi vingatichedweska pakuchimbira na kutipangiska kuti tivuke mwaluŵiro. Kuti tizizipizge pakuchimbira, tikwenera kumanya mwaluŵiro chilichose icho chingatiphyora waka ndipo tichiwuskeko mwaluŵiro. Panyengo yimozamoza, tikwenera yayi kutaya katundu uyo ngwakukhumbikwira kuti tinyamure. Chifukwa kuchita nthena kungapangiska kuti tileke kuŵa ŵakwenelera kulutilira kuchimbira pa chiphalizgano. (2 Tim. 2:5) Kasi ni katundu wuli uyo tikwenera kunyamura?
3. (a) Kuyana na Ŵagalatiya 6:5, kasi tikwenera kunyamura vichi? (b) Kasi mu nkhani iyi tiwonenge vichi, ndipo chifukwa wuli?
3 Ŵazgani Ŵagalatiya 6:5. Paulosi wakayowoya chinthu chinyake icho tikwenera kunyamura. Wakalemba kuti “waliyose wayeghenge katundu wake.” Apa Paulosi wakang’anamuranga chilichose icho Chiuta wakukhumba kuti muteŵeti wake wachitenge panji kuti kunyamura, ndipo waliyose wakwenera kunyamura yekha. Mu nkhani iyi, tidumbiskanenge za “katundu” uyo tikwenera kunyamura, kweniso umo tingamunyamulira. Tiwonengeso katundu wambura kukhumbikwa uyo panji tili kunyamura, kweniso umo tingamutayira. Kunyamura katundu withu na kutaya katundu wambura kukhumbikwa, kungatovwira kuti tichimbire chiphalizgano cha umoyo m’paka paumaliro.
KATUNDU UYO TIKWENERA KUNYAMURA
Kunyamura katundu withu kukusazgapo kufiska chilapo chithu cha kujipeleka kwa Yehova, kufiska udindo uwo tili nawo mu mbumba, na kuzomerezga ivyo vyachitika chifukwa cha umo tikasankhira vinthu (Wonani ndime 4-9)
4. Chifukwa wuli ntchakusuzga chomene yayi kufiska ivyo talapa kwa Yehova kuti timuteŵeterenge? (Wonaniso chithuzi.)
4 Chilapo chithu cha kujipeleka kwa Yehova. Apo tikajipeleka kwa Yehova, tikachita chilapo chakuti timusopenge na kuchita khumbo lake. Tikwenera kufiska chilapo ichi. Ni udindo ukuru kufiska vyose ivyo tikalayizga, kweni ntchakusuzga chomene yayi. Vili nthena chifukwa Yehova wali kutilenga kuti tichitenge khumbo lake. (Chivu. 4:11) Wali kutilenga mu nthowa yakuti tiŵenge na khumbo la kumumanya na kumusopa, kweniso wali kutilenga mu chikozgo chake. Ntheura ivi vikupangiska kuti tisendelere kwa iyo na kuchita khumbo lake mwakukondwa. (Sal. 40:8) Chinyake ntchakuti, para tikuchita khumbo la Chiuta na kulondezga Mwana wake, ‘tikupumuzgika.’—Mat. 11:28-30.
(Wonani ndime 4-5)
5. Kasi ntchivichi chingamovwirani kuti mufiske chilapo chinu? (1 Yohane 5:3)
5 Kasi munganyamura wuli katundu uyu? Pali vinthu viŵiri ivyo vingamovwirani. Chakwamba, lutilirani kukuzga chitemwa chinu pa Yehova. Mungachita nthena para mukughanaghanirapo chomene pa viwemi ivyo Yehova wamuchitirani kweniso vitumbiko ivyo wamusungirani munthazi. Para chitemwa chinu pa Chiuta chikukura, chiŵenge chipusu kumupulikira. (Ŵazgani 1 Yohane 5:3.) Chachiŵiri, yezgani Yesu. Iyo wakafiska kuchita khumbo la Chiuta chifukwa wakalombanga wovwiri kwa Yehova na kulutilira kuŵika mtima pa njombe iyo yikaŵa panthazi pake. (Heb. 5:7; 12:2) Nga ni Yesu, namwe mulombenge kwa Yehova kuti wamupani nkhongono na kulutilira kughanaghanirapo pa chigomezgo cha umoyo wamuyirayira. Apo chitemwa chinu pa Chiuta chikukura na kuyezga Mwana wake, mufiskenge ivyo muli kumulayizga.
6. Chifukwa wuli tikwenera kufiska udindo withu mu mbumba? (Wonaniso chithuzi.)
6 Mulimo withu mu mbumba. Pa chiphalizgano chithu cha umoyo, tikwenera kutemwa chomene Yehova na Yesu kuluska umo tikutemwera ŵabali ŵithu ŵakuthupi. (Mat. 10:37) Kweni ichi chikung’anamura kuti tizelezgenge udindo withu wamumbumba yayi, nga kuti ndiwo ukutitondeska kuteŵetera makora Chiuta na Khristu. M’malo mwake, kuti tikondweske Chiuta na Khristu tikwenera kufiska udindo withu wamumbumba. (1 Tim. 5:4, 8) Tiŵenge ŵakukondwa chomene para tichitenge nthena. Nakuti Yehova wakumanya kuti mbumba yiŵe yakukondwa ni para mfumu na muwoli ŵakutemwana na kuchindikana, kweniso para ŵapapi ŵakutemwa ŵana ŵawo na kuŵasambizga, ndiposo para ŵana nawo ŵakupulikira ŵapapi ŵawo.—Efe. 5:33; 6:1, 4.
(Wonani ndime 6-7)
7. Kasi mungachita wuli kuti mufiske udindo winu mu mbumba?
7 Kasi munganyamura wuli katundu uyu? Kwali muli na udindo wuli mu mbumba, gomezgani vinjeru vya mu Baibolo m’malo mwa kulondezga waka umo mukujipulikira, mitheto yinu, panji ivyo awo ŵakuti ni nkhwantha pa nkhani za nthengwa ŵangayowoya. (Zinth. 24:3, 4) Paturani nyengo ya kusambilira mabuku ghithu ghakulongosora Baibolo. Mu mabuku agha muli masachizgo ghakovwira chomene gha umo tingalondezgera fundo za mu Baibolo. Mwachiyelezgero, pa chigaŵa chakuti “Vyakovwira Mabanja” pali nkhani ziwemi chomene izo zikulongosora masuzgo agho ŵakutorana, ŵapapi, kweniso ŵawukirano ŵakukumana nagho mazuŵa ghano. b Ŵikanipo mtima kulondezga fundo za mu Baibolo nangauli ŵanji mu mbumba yinu ŵakuzilondezga yayi. Para muchitenge nthena, mbumba yinu yisangenge chandulo chomene kweniso Yehova wamutumbikaninge.—1 Pet. 3:1, 2.
8. Kasi ivyo tikusankha vingatikhwaska wuli?
8 Udindo withu wa kusankha. Yehova wali kutipa wanangwa wa kusankha, ndipo wakukhumba kuti tikondwenge chifukwa cha kusankha vinthu mwamahara. Ndipouli, wakutivikilira yayi ku masuzgo agho ghangiza chifukwa cha kusankha uheni vinthu. (Gal. 6:7, 8). Ntheura tikumanya kuti ukuŵa udindo withu kuchitapo kanthu para tamba kukumana na masuzgo chifukwa cha kusankha uheni vinthu, kuyowoya viheni, panji para tachita chinthu chinyake chiheni. Kuyana na ivyo tili kuchita nyengo zinyake njuŵi yingatisuzga. Ndipouli, kumanya kuti ni udindo withu kuchitapo kanthu pa ivyo tasankha panji kuchita, kungatichiska kuti tiphare zakwananga zithu, tisinthe, na kuleka kuzakachitaso. Kuchita nthena, kungatovwira kuti tilutilire kuchimbira pa chiphalizgano cha umoyo.
(Wonani ndime 8-9)
9. Kasi mungachita wuli para mukasankha uheni vinthu? (Wonaniso chithuzi.)
9 Kasi tinganyamura wuli katundu uyu? Usange mukuwona kuti munganozga yayi vinthu ivyo mukasankha uheni, zomerezgani waka umo vinthu viliri kwa imwe. Manyani kuti mungasintha yayi vinthu ivyo muli kuchita kale. Lekani kumalira nyengo na nkhongono zinu pa kujikhungulufya waka, panji kujiyimba mulandu, panji kuyimba mulandu ŵanyake chifukwa cha vinthu viheni ivyo mukasankha makora yayi. M’malo mwake zomerezgani kuti mukasankha uheni vinthu, ndipo chitani chilichose icho mungafiska kuti vinthu viŵeko makora. Usange mukujiyimba mulandu chifukwa cha viheni ivyo mukachita, muphalirani Yehova mu lurombo, zomerani ivyo muli kwananga, ndipo mupemphani kuti wamugowokerani. (Sal. 25:11; 51:3, 4) Ŵaphepiskani awo muli kuŵabudira, ndipo para ntchakwenelera pemphani wovwiri ku ŵalara. (Yak. 5:14, 15) Sambiranipo kanthu pa ivyo mukabudiska, ndipo lekani kuchitaso. Para muchitenge nthena, Yehova wamugowokeraninge nadi, ndipo wamupaninge wovwiri uwo mukukhumbikwira.—Sal. 103:8-13.
KATUNDU UYO TIKWENERA KUTAYA
10. Chifukwa wuli kukhazga vinthu ivyo tingafiska yayi nkhwakuphyora? (Ŵagalatiya 6:4)
10 Kulimbana na vinthu ivyo tingafiska yayi. Para tikujiyaniska na ŵanji tingamba kukhumba vinthu ivyo tingafiska yayi ndipo tingajiphyora waka. (Ŵazgani Ŵagalatiya 6:4.) Ndipo para tikulutilira kuchita nthena, tingamba kuŵachitira bina panji kuphalizgana nawo. (Gal. 5:26) Apo tikuyezgayezga kuti nase tifiske vinthu ivyo ŵanyithu ŵafiska, tingachichizgika kulimbana na vinthu ivyo ni vya msinkhu withu yayi panji ivyo mukhaliro ukutizomerezga yayi kuchita. Nakuti usange “mtima ukulwara usange icho wakhazganga chindize,” kuli wuli usange tikukhazga chinthu icho tingafiska yayi! (Zinth. 13:12) Kuchita nthena kungatimalira waka nkhongono zithu na kutichedweska apo tikuchimbira chiphalizgano cha kuluta ku umoyo.—Zinth. 24:10.
11. Kasi ntchivichi chingamovwirani kuti muleke kukhazga vinandi kuluska ivyo mungafiska?
11 Kasi mungataya wuli katundu uyu? Lekani kulimbana na vinandi padera pa ivyo Yehova wakukhumba kuti mufiske. Iyo wakukhazga kuti muchite vinandi kuluska ivyo mungafiska yayi. (2 Kor. 8:12) Manyani kuti Yehova wakumuyaniskani na ŵanji yayi pa ivyo mukuchita. (Mat. 25:20-23) Iyo wakuzirwiska chomene uteŵeti winu uwo mukuchita na mtima wose, kugomezgeka kwinu, na kuzizipizga kwinu. Ntheura jiyuyurani na kuzomerezga kuti vinthu vinyake ivyo mukukhumba kuchita, mungachita yayi pasono chifukwa cha uchekuru, ulwari panji umo vinthu viliri pa umoyo winu. Nga ni Barazilayi, kuchita soni yayi kukana mauteŵeti ghanyake agho mungafiska yayi chifukwa cha msinkhu winu panji ulwari. (2 Sam. 19:35, 36) Nga ni Mozesi, zomerani kuti ŵanji ŵamovwirani kweniso gaŵiraniko ŵanji milimo usange ntchakwenelera. (Eks. 18:21, 22) Mzimu wa kujiyuyura uwu umovwiraninge kuti muleke kukhazga vinandi kuluska ivyo mungafiska, ivyo paumaliro vingamutondeskani kuti muchimbire makora pa chiphalizgano chakuya ku umoyo.
12. Kasi para ŵanji ŵasankha uheni vinthu ndikuti ndise tapangiska? Longosorani.
12 Kujiyimba mulandu chifukwa cha ivyo ŵanji ŵasankha uheni. Tingaŵasankhira yayi vyakuchita ŵanyithu, nesi kuŵavikilira nyengo zose ku masuzgo agho ghangiza chifukwa chakuti ŵakasankha uheni vinthu. Mwachiyelezgero, mwana munyamata panji msungwana wangasankha kuleka kuteŵetera Yehova. Para mwana wasankha nthena ŵapapi ŵakuŵa na chitima chomene. Ndipouli, ŵapapi awo ŵakujiyimba mulandu chifukwa chakuti mwana wawo wasankha uheni yekha, ŵakujiphyora chomene. Ŵakuyegha katundu uyo Yehova wakukhazga kuti ndiwo yayi ŵakwenera kuyeya.—Rom. 14:12.
13. Kasi mupapi wangachita wuli para mwana wasankha uheni vinthu?
13 Kasi mungataya wuli katundu uyu? Manyani kuti waliyose Yehova wali kumupa wanangwa wakusankha. Ntheura waliyose wakusankha yekha vinthu. Ivi vikusazgapo kusankha kumuteŵetera panji yayi. Yehova wakumanya kuti ndimwe mupapi wambura kufikapo ndipo icho wakukhumba ntchakuti muchitenge waka vyose ivyo mungafiska pakusambizga ŵana ŵinu. Para mwana winu wasankha uheni vinthu, mulandu ngwake ngwinu yayi. (Zinth. 20:11) Ndipouli, nyengo zinyake mungasuzgika maghanoghano chifukwa cha vinthu ivyo mukatondeka kuchita makora pakuŵa mupapi. Usange ni nthena, muphalirani Yehova umo mukujipulikira na kupempha kuti wamugowokerani. Iyo wakumanya kuti mungasintha yayi vinthu ivyo vili kunangika kale. Kweniso wakukhazga kuti ni udindo winu yayi kuvikilira mwana winu para wakuvuna ivyo wakamija. Kweni manyani kuti para mwana winu wangachitapo kanthu kuti wawelere kwa Yehova, iyo ngwakunozgeka kumupokelera.—Luka 15:18-20.
14. Chifukwa wuli kujiyimba mulandu mwakujumphizga ni katundu uyo tikwenera kutaya?
14 Kulutilira kujiyimba mulandu. Para tachita kwananga, ntchakwenelera kujiyimba mulandu pa ivyo tachita. Ndipouli, Yehova wakukhumba yayi kuti tijiyimbenge mulandu mwakujumphizga. Uyu ni katundu uyo tikwenera kutaya. Kasi tingamanya wuli usange tikujiyimba mulandu mwakujumphizga? Usange tikaphara zakwananga zithu, kupera, na kuchita vyose ivyo tingafiska kuti tileke kuziwelezgaso, tingaŵa na chigomezgo chose kuti Yehova wali kutigowokera. (Mil. 3:19) Usange tachita vyose ivi, Yehova wakukhumba yayi kuti tilutilire kujiyimba mulandu. Wakumanya kuti tingapwetekeka usange tingajiyimba mulandu kwanyengo yitali. (Sal. 31:10) Para taphyoka chomene na chitima, tingaleka kuchimbira pa chiphalizgano chakuya ku umoyo.—2 Kor. 2:7.
Para mwapera na mtima wose, Yehova wakulutilira yayi kughanaghanira ivyo mukabuda, ndipo namwe mukwenera kuvighanaghanira yayi (Wonani ndime 15)
15. Kasi ntchivichi chingamovwirani kuti muleke kujiyimba mulandu mwakujumphizga? (1 Yohane 3:19, 20) (Wonaniso chithuzi.)
15 Kasi mungataya wuli katundu uyu? Para mukulutilira kujiyimba mulandu, kumbukani kuti Chiuta ‘wakugowokera zanadi.’ (Sal. 130:4) Para wagowokera awo ŵapera zanadi, iyo wakulayiza kuti: “Nizamukumbukaso chara kwananga kwawo.” (Yer. 31:34) Ichi chikung’anamura kuti Yehova wakulutilira yayi kughanaghanira vya zakwananga izo wali kumugowokerani kale. Ntheura usange mukusangana na masuzgo chifukwa cha ivyo mukachita, lekani kughanaghana kuti mbukaboni wakuti Chiuta wandamugowokerani. Ndipo lekani kujikwiyira usange ivyo mukachita vili kupangiska kuti mutaye mwaŵi wa uteŵeti unyake mu gulu la Yehova. Yehova wakukhalira waka kughanaghanira ivyo mukabuda yayi, ntheura namwe lekani kuchita nthena.—Ŵazgani 1 Yohane 3:19, 20.
CHIMBIRANI KUTI MUWINE
16. Pakuŵa munthu uyo wali pa chiphalizgano, kasi mukwenera kumanya vichi?
16 Apo tikuchimbira pa chiphalizgano chithu cha umoyo, tikwenera ‘kuchimbira mu nthowa yakuti tizakapokere njombe.’ (1 Kor. 9:24) Tingachita nthena para tingamanya katundu uyo tikwenera kunyamura na uyo tikwenera kutaya. Mu nkhani iyi, tadumbiskanapo viyelezgero vichoko waka vya katundu uyo tikwenera kunyamura na uyo tikwenera kutaya. Kweni paliso vinyake. Yesu wakayowoya kuti ‘mitima yithu yingatangwanika [panji kuvuka] na vinthu nga nkhurya mwakujumphizga, kumwa chomene ndiposo vyenjezgo vya umoyo.’ (Luka 21:34) Malemba agha na ghanyake ghangamovwirani kumanya ivyo mukwenera kusintha apo mukuchimbira chiphalizgano cha kuya ku umoyo.
17. Chifukwa wuli tingaŵa na chigomezgo chose kuti tiluskenge pa chiphalizgano chakuya ku umoyo?
17 Tili na chigomezgo chose kuti tiluskenge pa chiphalizgano chakuya ku umoyo chifukwa Yehova ndiyo wakutipa nkhongono izo tikukhumbikwira. (Yes. 40:29-31) Ntheura kugowozgako yayi sipidi. Yezgani mpositole Paulosi, uyo wakalimbikira chomene kuchimbira kuti wapokere njombe iyo yikaŵa panthazi pake. (Fil. 3:13, 14) Palije uyo wangamuchimbilirani pa chiphalizgano ichi, kweni na wovwiri wa Yehova mungamalizga chiphalizgano ichi. Yehova wangamovwirani kunyamura katundu wakwenelera na kutaya wambura kukhumbikwa. (Sal. 68:19) Chifukwa chakuti Yehova wali ku chigaŵa chinu, mukwaniskenge kuzizipizga apo mukuchimbira chiphalizgano ndipo paumaliro muwinenge.
SUMU 65 Limbikirani!
a Nkhani iyi yitovwirenge kumanya umo tingachimbilira chiphalizgano cha kuluta ku umoyo. Apo tikuchimbira, tikwenera kuyegha katundu munyake. Katundu uyu wakusazgapo chilapo icho tikachita cha kujipeleka kwa Yehova, mulimo withu mu mbumba, kweniso udindo wakusankha vinthu. Kweni tikwenera kutaya chilichose icho chingatipangiska kuti titondeke kuchimbira makora pa chiphalizgano ichi. Kasi ivi vikusazgapo vichi? Nkhani iyi yikuzgora fumbo ili.
b Mungasanga nkhani izi pa chigaŵa chakuti “Vyakovwira Mabanja” pa jw.org. Nkhani zinyake zakovwira mabanja izo zikusangika pa chigaŵa ichi ni: “Umo Mungachindikira Munyinu” na yakuti “Kasi Mungachita Wuli Kuti Muwongenge?”; zakovwira ŵapapi, “Sambizgani Ŵana Ŵinu Umo Ŵangagwiliskira Ntchito Foni ya Intaneti Mwamahara,” kweniso “Zimene Mungachite Kuti Muzimasukirana ndi Mwana Wanu.” Zakovwira ŵawukirano; “Kodi Mungatani Kuti Musamangotengera Zochita za Anzanu?” na yakuti, “Kodi Mungatani Ngati Mumasowa Wocheza Naye?”
