NKHANI YAKUSAMBIRA 33
SUMU 130 Gowokerani Ŵanyinu
Umo Mpingo Ungayezgera Yehova pa Umo Wakuwonera Awo Ŵachita Kwananga Kukuru
“Usange munyake wananga, tili na movwiri.”—1 YOH. 2:1.
FUNDO YIKURU
Ivyo tikusambirapo pa umo nkhani ya munthu uyo wakachita kwananga kukuru mu mpingo wa Korinte yikendera.
1. Kasi Yehova wakuŵakhumbira vichi ŵanthu wose?
YEHOVA pakulenga taŵanthu wakatipa wanangwa wakusankha. Nakuti nyengo na nyengo tikugwiliskira ntchito wanangwa uwu pakusankha vinthu. Kweni chinthu chakuzirwa chomene icho waliyose wangasankha, nkhujipeleka kwa iyo na kuŵa mu mbumba ya ŵasopi ŵake. Yehova wakukhumba waliyose kuti wachite nthena. Chifukwa wuli? Chifukwa chakuti wakutemwa ŵanthu kweniso wakuŵakhumbira viwemi. Wakukhumba kuti ŵaŵe paubwezi uwemi na iyo na kukhala kwamuyirayira.—Doto. 30:19, 20; Gal. 6:7, 8.
2. Kasi Yehova wakukhumba kuti ŵakwananga ŵambura kung’anamuka mtima ŵachite vichi? (1 Yohane 2:1)
2 Ndipouli, Yehova wakuchichizga waliyose yayi kuti wamuteŵetere. Wapeleka mwaŵi ku waliyose kuti wasankhe yekha icho wachitenge. Kweni wuli usange Mkhristu wakubatizika waswa dango la Chiuta na kuchita kwananga kukuru? Usange wakung’anamuka mtima yayi, wakwenera kufumiskikamo mu mpingo. (1 Kor. 5:13) Nangauli vingaŵa nthena, kweni nipera Yehova wakukhazga kuti wakwananga uyo wawelerenge kwa iyo. Nakuti ichi ndicho ntchifukwa chakuzirwa chomene icho wakapelekera sembe yakuwombora, kuti chiŵe chamachitiko kugowokera ŵakwananga awo ŵang’anamuka mtima. (Ŵazgani 1 Yohane 2:1.) Chiuta withu wachitemwa wakuŵapempha awo ŵachita kwananga kuti ŵang’anamuke mtima.—Zek. 1:3; Rom. 2:4; Yak. 4:8.
3. Kasi tidumbiskanenge vichi mu nkhani iyi?
3 Yehova wakukhumba nase timuyezge pa nkhani ya umo tikwenera kuwonera kwananga kweniso ŵanthu awo ŵachita kwananga kukuru. Mu nkhani iyi tidumbiskanenge umo tingachitira nthena. Apo mukuŵazga nkhani iyi, wonani (1) umo nkhani ya munthu uyo wakachita kwananga kukuru mu mpingo wa Korinte yikendera, (2) ulongozgi uwo mpositole Paulosi wakapeleka wakwananga wakati wang’anamuka mtima, kweniso (3) ivyo nkhani ya mu Baibolo iyi yikuvumbura vyakukhwaskana na umo Yehova wakujipulikira na ŵanthu awo ŵachita kwananga kukuru.
UMO NKHANI YA MUNTHU UYO WAKACHITA KWANANGA KUKURU YIKENDERA
4. Kasi mu mpingo wa Korinte mukachitika vichi? (1 Ŵakorinte 5:1, 2)
4 Ŵazgani 1 Ŵakorinte 5:1, 2. Paulendo wake wachitatu wa umishonale, Paulosi wakapulika nkhani yakukhozga soni iyo yikachitika mu mpingo uphya wa Korinte. Mubali munyake mu mpingo uwu wakagonananga na amama ŵake ŵamusangapo. Nkharo iyi yikaŵa yachilendo chomene ndipo “nanga mphakati pa mitundu” yikachitikanga yayi. Kweni mpingo ukalekeleranga waka vyanthena ivi ndipo ukawonangapo suzgo viŵi yayi. Panji ŵanyake ŵakaghanaghananga kuti kuchita nthena kukalongoranga umo Chiuta waliri walusungu kweniso kuti wakuŵapulikiska ŵanthu ŵakwananga. Kweni Yehova wakulekelera kwananga yayi pakati pa ŵanthu ŵake. Munthu uyu pakuchita nkharo yawakawaka iyi, wakananganga lumbiri luwemi lwa mpingo. Kweniso Ŵakhristu ŵanyake awo wakachezganga nawo ŵakatenge ŵatolerengeko nkharo yake yiheni iyi. Kasi Paulosi wakaphalira mpingo kuchitachi na munthu uyu?
5. Kasi Paulosi wakaphalira mpingo kuchitachi, ndipo wakang’anamurangachi? (1 Ŵakorinte 5:13) (Wonaniso chithuzi.)
5 Ŵazgani 1 Ŵakorinte 5:13. Mwakulongozgeka na mzimu utuŵa, Paulosi wakalemba kalata yakuti wakwananga uyu wafumiskike mu mpingo. Kasi ŵanthu mu mpingo ŵakeneranga kuchita nayo wuli? Paulosi wakaŵaphalira kuti ‘ŵaleke kwenderana’ nayo. Kasi wakang’anamurangachi apa? Paulosi wakalongosora kuti dango ili likasazgangapo na ‘kurya nayo wuwo yayi munthu wanthena.’ (1 Kor. 5:11) Kurya chakurya na munthu wanthena kungapeleka mwaŵi wakwamba kuchezga nayo. Ntheura ntchakuwonekerathu kuti apa Paulosi wakang’anamuranga kuti mpingo uleke kuchezgerana nayo munthu uyu panji kuti kwenderana nayo. Kuchita nthena kukavikiliranga mpingo kuti uleke kunangika na nkharo yake yawakawaka. (1 Kor. 5:5-7) Kweniso kugega kuchezga nayo, kukate kupangiskenge kuti wamanye kuti wachita chinthu chiheni chomene ndiposo wamukhuŵazga chomene Yehova. Ivi vikatenge viwovwirengeso kuti wakhozgeke soni na kuchiskika kung’anamuka mtima.
Mwakulongozgeka na mzimu utuŵa, Paulosi wakalemba kalata kuphalira mpingo kuti umufumiskemo wakwananga wambura kung’anamuka mtima (Wonani ndime 5)
6. Kasi mpingo ukachita wuli wati wapokera kalata ya Paulosi, ndipo mwanalume uyu wakachita wuli?
6 Paulosi wati watumizga kalata yake ku Ŵakhristu ŵa ku Korinte, wakamba kughanaghanira umo mpingo uchitirenge. Kweni pamanyuma Tito wakiza na nkhani yiwemi iyo yikamukondweska. Mpingo ukalondezga ulongozgi uwo Paulosi wakalemba mu kalata yake ndipo ukamufumiskamo munthu uyu. (2 Kor. 7:6, 7) Kweni myezi yikati yajumphapo kufuma apo Paulosi wakatumizgira kalata yake, wakwananga uyu wakang’anamuka mtima. Wakasintha nkharo yake na kwamba kulondezga fundo zaurunji za Yehova. (2 Kor. 7:8-11) Kasi Paulosi wakawuphaliraso vichi mpingo uwu?
UMO MPINGO UKENERANGA KUCHITIRA NA WAKWANANGA UYO WAKANG’ANAMUKA MTIMA
7. Kasi pakaŵa uwemi wuli wakwananga uyu wati wafumiskika mu mpingo? (2 Ŵakorinte 2:5-8)
7 Ŵazgani 2 Ŵakorinte 2:5-8. Paulosi wakayowoya kuti ‘ntchenyo iyo yapelekeka na ŵanthu ŵanandi yikaŵa yakukwana kwa munthu wanthena.’ Mukayowoyero kanyake tingati ntchenyo yikafiska chilato chake. Chilato wuli? Kumovwira kuti wang’anamuke mtima.—Heb. 12:11.
8. Kasi pamanyuma Paulosi wakaphalira mpingo uwu kuchita vichi?
8 Ntheura Paulosi wakaphalira mpingo kuti: “Mumugowokere na mtima wose na kumusanguluska” munthu uyu, ndipo “mumulongore kuti mukumutemwa.” Wonani kuti Paulosi wakakhumbanga kuti mpingo uchite vinandi padera pa kumuzomerezga waka munthu uyu kuti wawelereso mu mpingo. Paulosi wakakhumbanga kuti ŵamulongore munthu uyu kwizira mu mazgu na vyakuchita, kuti ŵamugowokera nadi ndipo ŵakumutemwa. Para ŵachita nthena ndipo ŵangalongora kuti ŵamupokelera na mawoko ghaŵiri pakuweleraso mu mpingo.
9. Chifukwa wuli panji chikaŵa chakusuzga ku ŵanji kuti ŵamugowokere munthu wakung’anamuka mtima uyu?
9 Kasi ku ŵanyake mu mpingo chikaŵa chakusuzga kuti ŵamupokelere wakwananga uyu pamanyuma pakuti wang’anamuka mtima? Nkhani iyi yikuyowoyapo yayi, kweni panji vikachitika. Nakuti ivyo munthu uyu wakachita vikiziska masuzgo mu mpingo wose ndiposo panji vikakhozga soni ŵanthu ŵanyake. Ŵanyake panji ŵakawonanga kuti mburunji yayi kuti munthu uyu wapokelereke mu mpingo, chifukwa iwo ŵakaŵikangapo mtima chomene kulutilira kuŵa na makhaliro ghawemi. (Yaniskani na Luka 15:28-30.) Kweni chifukwa wuli chikaŵa chakuzirwa kuti mpingo umulongore chitemwa chanadi munthu uyu?
10-11. Kasi chikate chichitikenge ntchivichi usange ŵalara ŵakanenge kumugowokera wakwananga wakung’anamuka mtima uyu?
10 Ghanaghanirani ivyo vikate vichitikenge usange ŵalara ŵakanenge kumuwezgera mu mpingo munthu uyu, panji mpingo utondekenge kumulongora chitemwa chanadi wati wawezgekeramo. Wakatenge wamilikenge na “chitima chikuru.” Chinyakeso ntchakuti wakatenge wajiwonenge kuti walijeso chilindizga chilichose. Kweniso wakatenge wagongowenge kulutilira kuwezgerapo ubwezi wake na Chiuta.
11 Nakuti chiheni chomene icho chikatenge chichitikenge ntchakuti, usange ŵabali na ŵadumbu ŵanyake mu mpingo ŵakanenge kumugowokera munthu uyu, nawoso ŵakatenge ŵatimbanizgenge ubwezi wawo na Yehova. Chifukwa wuli? Chifukwa nthena ŵakalongora kuti ŵakuyezga Yehova yayi pa nkhani ya kugowokera, kweni ŵakuyezga Satana uyo ngwankhaza kweniso wambura lusungu. Nakuti ŵakate ŵazomerezgenge Dyabulosi kuti waŵagwiliskire ntchito kugongoweska munthu uyu kuteŵetera Yehova.—2 Kor. 2:10, 11; Efe. 4:27.
12. Kasi mpingo ukatenge umuyezgenge wuli Yehova?
12 Ipo kasi mpingo wa Korinte ukatenge ulongorenge wuli kuti ukuyezga Yehova, Satana yayi? Pakuyezga umo Yehova wakuchitira na ŵakwananga awo ŵang’anamuka mtima. Wonani ivyo ŵalembi ŵanyake ŵa Baibolo ŵakayowoya vyakukhwaskana na Yehova. Davide wakati Yehova ni “muwemi, wakunozgeka kugowokera.” (Sal. 86:5) Mika wakalemba kuti: “Ni Chiuta nju uyo wali nga ndimwe, uyo wakugowokera ubendezi na kujumphapo waka pa kwananga?” (Mika 7:18) Ndipo Yesaya wakayowoya kuti: “Wakwananga waleke nthowa yake, muheni maghanoghano ghake. Wawelere kwa Yehova, ndipo wamuchitirenge lusungu, kwa Chiuta withu, chifukwa wamugowokerenge chomene.”—Yes. 55:7.
13. Chifukwa wuli chikaŵa chakwenelera kumuwezgeramo wakwananga wakung’anamuka mtima uyu mu mpingo? (Wonani bokosi lakuti “ Kasi Pakajumpha Nyengo Yitali Wuli Kuti Mwanalume wa ku Korinte Wawezgekeremo mu Mpingo?”)
13 Kuti uyezge Yehova, mpingo wa Korinte ukeneranga kumupokelera munthu wakung’anamuka mtima uyu na kumulongora chitemwa chanadi. Paulosi wakati usange ŵamugowokerenge munthu uyu, ŵalongorenge kuti ‘mbakupulikira nadi mu vinthu vyose.’ (2 Kor. 2:9) Mbunenesko kuti pakajumpha waka myezi kufuma apo wakafumiskikamo mu mpingo, kweni ntchenyo iyo wakapika yikamovwira kuti wang’anamuke mtima. Ntheura pakaŵavya chifukwa chakuchedwera kumuwezgeramo mu mpingo.
UMO TINGAYEZGERA YEHOVA PA NKHANI YA URUNJI NA LUSUNGU
14-15. Kasi tasambirako vichi ku nkhani ya munthu uyo wakachita kwananga kukuru mu mpingo wa Korinte? (2 Petrosi 3:9) (Wonaniso chithuzi.)
14 Nkhani ya munthu uyo wakachita kwananga mu mpingo wa Korinte yikalembeka na kusungika kuti ‘yitisambizge.’ (Rom. 15:4) Nkhani iyi yikutisambizga kuti Yehova wakulekelera yayi ŵanthu awo ŵachita kwananga kukuru ndipo ŵakung’anamuka mtima yayi kuti ŵalutilire kuŵa mu mpingo. Ŵanyake ŵangaghanaghana kuti pakuti Yehova ngwalusungu, mbwenu wangazomerezga kuti munthu wambura kung’anamuka mtima walutilire kuŵa mu mpingo, kweni umu ndimo Yehova wakulongolera lusungu yayi. Yehova ngwalusungu, kweni ngwakulekelera yayi; ndipo wakusintha yayi fundo zake pa nkhani ya chiwemi na chiheni. (Yuda 4) Nadi, usange wangachita nthena lungaŵa lusungu yayi chifukwa mpingo wose ungaŵa pangozi.—Zinth. 13:20; 1 Kor. 15:33.
15 Ndipouli, tikumanya kuti Yehova wakukhumba yayi kuti munyake wazakaparanyike. Iyo ngwakukhumbisiska kuponoska ŵanthu. Wakulongora lusungu ŵanthu awo ŵasintha mitima yawo ndipo ŵakukhumba kuwezgerapo ubwezi wawo na iyo. (Ezek. 33:11; ŵazgani 2 Petrosi 3:9.) Lekani apo mwanalume wa mu mpingo wa Korinte wakang’anamuka mtima na kuleka nthowa yake yiheni, Yehova wakagwiliskira ntchito Paulosi kulongosolera mpingo kuti mwanalume uyu wakwenera kugowokereka na kupokelereka mu mpingo.
Pakuyezga Yehova pa nkhani ya chitemwa na lusungu, mpingo ukupokelera na mawoko ghaŵiri wakwananga uyo wawezgekeramo (Wonani ndime 14-15)
16. Kasi mukujipulika wuli na umo nkhani iyi yikendera?
16 Nkhani iyo yikachitika mu mpingo wa Korinte yatovwira kuwona kuti Yehova ngwachitemwa, ngwaurunji, kweniso wakweruzga mwakunyoloka. (Sal. 33:5) Kumanya ivi kukutichiska kuti timulumbenge chomene Chiuta. Nakuti unenesko ngwakuti tose tili ŵakwananga, ndipo tikukhumbikwira chigowokero kufuma kwa iyo. Ntheura waliyose wali na chifukwa chakupulikikwa cha kuwongera Yehova pakutipa sembe yakuwombora, iyo yikovwira kuti tigowokerekenge zakwananga zithu. Ntchakupembuzga chomene kumanya kuti Yehova wakuŵatemwa nadi ŵanthu ŵake ndipo wakuŵakhumbira viwemi.
17. Kasi tizamudumbiskana vichi mu nkhani zakulondezgapo?
17 Wuli pakuyowoya za awo ŵachita kwananga kukuru mazuŵa ghano? Kasi ŵalara ŵangamuyezga wuli Yehova pa nkhani yakovwira wakwananga kuti wawelere kwa Yehova? Kasi mpingo ukwenera kuchita wuli para ŵalara ŵadumura kuti munthu wafumiskike mu mpingo panji waweleremo? Mafumbo agha tizamudumbiskana mu nkhani zakulondezgapo.
SUMU 109 Temwani Ŵanji Kufumira mu Mtima
