1. Kasi kung’anamuka mtima kukusazgapo vichi?

 PARA tachita chinthu chinyake chiheni, ntchakuzirwa chomene kuti ting’anamuke mtima. Mu Baibolo, munthu uyo wang’anamuka mtima ni uyo wasintha nkharo yake, na kuŵikapo mtima kuleka kuzakachitaso ivyo wakananga.—Wonani Mang’anamuro gha Mazgu gha mu Baibolo, “Kung’anamuka mtima.”

2. Chifukwa wuli tose tikukhumbikwira kusambira vyakukhwaskana na kung’anamuka mtima? (Nehemiya 8:​9-11)

² Munthu waliyose wakwenera kusambira vyakukhwaskana na kung’anamuka mtima. Chifukwa wuli? Chifukwa ntchakuti tose zuŵa lililose tikunanga. Pakuŵa ŵana ŵa Adamu na Eva, waliyose wali kuhara kwananga na nyifwa. (Rom. 3:23; 5:12) Palije uyo ngwakufikapo. Nanga ni ŵanthu ŵachipulikano, nga mpositole Paulosi, nawo ŵakasuzgikanga na kwananga. (Rom. 7:​21-24) Kasi ichi chikung’anamura kuti nyengo yose tichitenge chitima chifukwa cha zakwananga zithu? Yayi, Yehova ngwalusungu, ndipo wakukhumba kuti tiŵenge ŵakukondwa. Ghanaghanirani vya Ŵayuda ŵa mu nyengo ya Nehemiya. (Ŵazgani Nehemiya 8:​9-11.) Yehova wakakhumbanga yayi kuti ŵaŵenge na chitima mwakujumphizga chifukwa cha zakwananga zawo zakumanyuma, kweni wakakhumbanga kuti ŵakondwenge apo ŵakumusopa. Yehova wakumanya kuti munthu wakuŵa wakukondwa para wang’anamuka mtima. Lekani wakutisambizga vyakukhwaskana na nkhani iyi. Usange talapa zakwananga zithu, tiŵenge na chigomezgo chose kuti Dada withu walusungu watigowokerenge.

3. Kasi tiwonenge vichi mu nkhani iyi?

³ Tiyeni sono tisambire vinandi vyakukhwaskana na kung’anamuka mtima. Mu nkhani iyi, tidumbiskanenge vinthu vitatu vyakukhwaskana na kung’anamuka mtima. Chakwamba, tiwonenge ivyo Yehova wakasambizga Ŵaisrayeli pa nkhani ya kung’anamuka mtima. Kufuma apo, tiwonenge umo Yehova wawovwilira ŵanthu kuti ŵang’anamuke mtima. Paumaliro, tiwonenge ivyo Yesu Khristu wakasambizga ŵalondezgi ŵake vyakukhwaskana na kung’anamuka mtima.

 IVYO YEHOVA WAKASAMBIZGA ŴAISRAYELI PA NKHANI YA KUNG’ANAMUKA MTIMA

4. Kasi Yehova wakaŵasambizga vichi Ŵaisrayeli pa nkhani ya kung’anamuka mtima?

⁴ Apo Yehova wakasora Ŵaisrayeli kuŵa mtundu wake wapadera, wakachita nawo phangano, ndipo ŵakalayizga kuti ŵalondezgenge phangano ili. Yehova wakaŵaphalira kuti usange ŵasungilirenge malango ghake waŵatumbikenge kweniso kuŵavikilira. Ndipo pakuyowoya vya malango agha, Yehova wakaŵasimikizgira kuti: “Dango ilo nkhumupani muhanya uno ndinonono chara kwa imwe, ndipo lili kutali chomene yayi na imwe.” (Doto. 30:​11, 16) Kweni usange ŵaswa malango ghake panji usange ŵasankha kusopa ŵachiuta ŵanyake, Chiuta wakaŵavikiliranga yayi kweniso ŵakasangananga na masuzgo. Nangauli vikaŵa nthena, kweni chikung’anamura kuti wakaŵasidirangathu yayi. Ntheura mwaŵi ukaŵangapo wakuti ‘ŵangawelera kwa Yehova Chiuta wawo na kupulikira mazgu ghake.’ (Doto. 30:​1-3, 17-20) Tingayowoyaso kuti, ŵakaŵanga na mwaŵi wakuti ŵangang’anamuka mtima. Ndipo usange ŵachita nthena Yehova wakaŵangaso nawo paubwezi na kuŵatumbika.

5. Kasi Yehova wakalongora wuli kuzikira ku ŵanthu ŵake? (2 Mathemba 17:​13, 14)

⁵ Kweni ŵanthu ŵakusoleka na Yehova aŵa, ŵakamugalukiranga mwakuwerezgawerezga. Padera pa kusopa vikozgo, ŵakachitangaso vinthu vinyake vyaunyankhasi chomene. Ntheura ŵakasangananga na masuzgo. Kweni Yehova wakaŵajowora yayi ŵanthu ŵake aŵa. Ndipo mwakuwerezgawerezga wakaŵatumiranga zintchimi kuti ziŵachiske ŵang’anamuke mtima na kuwelera kwa iyo.—Ŵazgani 2 Mathemba 17:​13, 14.

6. Kasi Yehova wakagwiliskira wuli ntchito zintchimi kuti wasambizge ŵanthu ŵake kuzirwa kwa kung’anamuka mtima? (Wonaniso chithuzi.)

⁶ Kanandi Yehova wakagwiliskiranga ntchito ntchimi zake kuchenjezga ŵanthu ŵake. Mwachiyelezgero, kwizira mwa Yeremiya Chiuta wakati: “Welera, iwe Israyeli wakugaluka . . . Nikulaŵiskenge na chisko chaukali yayi, pakuti ndine wakugomezgeka . . . Nisungenge chakusingo kwamuyirayira yayi. Kweni uzomere waka mulandu wako, pakuti wagalukira Yehova Chiuta wako.” (Yer. 3:​12, 13) Ndipo kwizira mwa Joyeli, Yehova wakati: “Welerani kwa ine na mtima winu wose.” (Joye. 2:​12, 13) Ndipo wakachitiska Yesaya kuyowoya  kuti: “Gezani, muŵe ŵakutowa. Wuskanipo milimo yinu yiheni pamaso pane, lekani kuchita viheni.” (Yes. 1:​16-19) Kwizira mwa Ezekiyeli, Yehova wakati: “Kasi ine nkhukondwa na nyifwa ya munthu muheni? . . . Asi nkhukhumba kuti munthu muheni wawereko ku nthowa zake kuti waŵe wamoyo? Ine nkhukondwa yayi na nyifwa ya munthu waliyose. Ntheura weraniko, na kuŵa ŵamoyo.” (Ezek. 18:​23, 32) Yehova wakukondwa chomene para wakuwona ŵanthu ŵakung’anamuka mtima, chifukwa chakuti wakukhumba ŵakhale kwamuyirayira. Yehova wakulindilira dankha kuti ŵanthu ŵang’anamuke mtima paŵekha yayi, pambere iyo wandambe kuŵawovwira. Tiyeni tiwone viyelezgero vinyake pa nkhani iyi.

7. Pakugwiliskira ntchito nkhani ya ntchimi Hoseya na muwoli wake, kasi Yehova wakaŵasambizga vichi ŵanthu ŵake?

⁷ Wonani umo Yehova wakasambizgira ŵanthu ŵake kwizira mu chakuchitika chanadi, chiyelezgero cha Gomeri, muwoli wa ntchimi Hoseya. Wati wachita uleŵi, wakamuleka Hoseya na kuluta ku ŵanalume ŵanyake. Kasi Yehova wakachita wuli? Yehova uyo wakusanda mitima, wakamuphalira Hoseya kuti: “Lutaso, ukatemwe mwanakazi uyo wakutemweka na mwanalume munyake ndipo wakuchita uleŵi. Ukamutemwe nga umo Yehova wakutemwera Ŵaisrayeli nangauli ŵakuzgokera ku ŵachiuta ŵanyake.” (Hos. 3:1; Zinth. 16:2) Wonani kuti mwanakazi wa Hoseya wakaŵa wachali wakuchita kwananga kukuru. Kweni, Yehova wakaphalira Hoseya kuti wamugowokere na kukamutoraso kuŵa muwoli wake. a Mwakuyana waka, Yehova wakaŵajowora yayi ŵanthu ŵake. Nangauli ŵakachitanga vinthu viheni chomene, wakalutilira kuŵatemwa kweniso kuŵawovwira kuti ŵang’anamuke mtima na kusintha nthowa zawo. Chiyelezgero ichi chikulongora kuti Yehova ‘uyo wakusanda mitima,’ wakumanya chilichose chakukhwaskana na waliyose payekha, ndipo wayezgeskenge kovwira uyo wakuchita viheni kuti wang’anamuke mtima. (Zinth. 17:3) Tiyeni tiwone umo wakuchitira nthena.

UMO YEHOVA WAKOVWILIRA ŴANTHU KUTI ŴANG’ANAMUKE MTIMA

8. Kasi Yehova wakamovwira wuli Kayini kuti wang’anamuke mtima? (Genizesi 4:​3-7) (Wonaniso chithuzi.)

⁸ Kayini wakaŵa mwana wakwamba wa Adamu na Eva. Nayo wakahara kwananga kufuma ku ŵapapi ŵake. Nakuti Baibolo likuyowoya vya iyo kuti: “Milimo yake yikaŵa yiheni.” (1 Yoh. 3:12) Panji lekani apo Kayini wakapeleka sembe, Yehova “wakakondwa yayi na Kayini na sembe yake.” M’malo mwakuti wasinthe, “Kayini wakagolera na ukali ndipo chisko chake chikawa.” Kasi kufuma apo Yehova wakachita vichi? Wakayowoya nayo Kayini. (Ŵazgani Genizesi 4:​3-7.) Wonani kuti Yehova wakayowoya nayo mwalusungu Kayini, wakamupa chigomezgo kweniso kumuchenjezga uheni wakuchita kwananga. Chachitima ntchakuti Kayini wakakana kupulikira. Wakakana wovwiri uwo Yehova wakamupa kuti wang’anamuke mtima. Kayini wati wakana, kasi ndikuti Yehova wakalekera penepapa kovwira ŵakwananga ŵanyake kuti ŵang’anamuke mtima? Yayi.

9. Kasi Yehova wakamovwira wuli Davide kuti wang’anamuke mtima?

⁹ Yehova wakalitemwanga chomene Themba Davide. Wakafika na pakumuchema kuti “munthu uyo wakukolerana na mtima wane.” (Mil. 13:22) Kweni Davide wakachita zakwananga zikuru, kusazgapo uleŵi na kukoma munthu. Kuyana na Dango la Mozesi, Davide wakeneranga kukomeka. (Lev. 20:10; Maŵa. 35:31) Kweni chifukwa cha lusungu, Yehova wakanjilirapo. b Wakatuma ntchimi yake Natani kuti yikakumane na themba, nangauli panyengo iyi Davide wakaŵa  kuti wandalongore mzimu wakupera. Natani wakayowoya ntharika iyo yikakhwaska mtima wa Davide. Davide wakakhwaskika chomene, ndipo ivi vikamovwira kuti wang’anamuke mtima. (2 Sam. 12:​1-14) Wakalemba salimo ilo likulongora umo wakang’anamukira mtima. (Sal. 51, mazgu ghapachanya) Salimo ili lapembuzga ŵakwananga ŵanandi na kuŵachiska kuti ŵang’anamuke mtima. Tikuwonga chomene kuti Yehova wakamovwira Davide muteŵeti wake wakutemweka kuti wapere panji kuti wang’anamuke mtima.

10. Kasi mukujipulika wuli para mukuwona umo Yehova wakuchitira vinthu mwakuzikira kweniso kugowokera ŵakwananga?

¹⁰ Yehova wakutinkha kwananga kwa mtundu uliwose. (Sal. 5:​4, 5) Ndipouli, wakumanya kuti tose ndise ŵakwananga, ndipo chifukwa chakuti wakutitemwa, wakutovwira para tananga. Nyengo zose wakuyezgayezga kuti wawovwire nanga ni awo ŵachita zakwananga zikuru chomene kuti ŵapere na kuwelera kwa iyo. Ntchakukhozga chomene kumanya kuti Yehova ngwakunozgeka kutigowokera. Para tikughanaghanirapo umo Yehova wakuzikira nase kweniso kutigowokera, tikuchiskika kulutilira kugomezgeka kwa iyo kweniso kupera mwaluŵiro para tachita kwananga. Tiyeni sono tiwone ivyo Yesu wakasambizga ŵalondezgi ŵake pa nkhani ya kung’anamuka mtima.

IVYO ŴALONDEZGI ŴA YESU ŴAKASAMBIRA PA NKHANI YA KUNG’ANAMUKA MTIMA

11-12. Kasi Yesu wakagwiliskira ntchito ntharika wuli kuti wasambizge ŵategherezgi ŵake vyakukhwaskana na umo Adada ŵake ŵaliri ŵakugowoka? (Wonani chithuzi.)

¹¹ Chaka cha 29 C.E. chikati chafika, nyengo yikakwana kuti Mesiya wawoneke. Nga umo tikawonera mu nkhani iyo yajumpha, Yehova wakagwiliskira ntchito Yohane Mubatizi na Yesu Khristu kuti wasambizge ŵanthu kuzirwa kwa kung’anamuka mtima.—Mat. 3:​1, 2; 4:17.

¹² Pa nyengo yose iyo wakachitira uteŵeti wake pano pasi, Yesu wakasambizganga ŵanthu kuti Adada ŵake mbakukhumbisiska chomene kutigowokera para tachita kwananga. Yesu wakachita nthena munthowa yapadera chomene apo wakayowoya ntharika ya mwana wakuzgeŵa. Mwana uyu wakasankha kuwukapo panyumba ndipo kwakanyengo wakachita vinthu viheni chomene. Kweni nyengo yikati yajumphapo, ‘wakajinyumwa’ na kuwelera kunyumba. Kasi adada ŵake ŵakachita wuli? Yesu wakayowoya kuti apo mwana uyu “wakaŵa patali, awiske ŵakamuwona  ndipo chitima chikaŵakora. Ŵakachimbira na kumuvumbatira na kumufyofyontha.” Mwana uyu wakapempha adada ŵake kuti waŵe wantchito wawo, kweni adada ŵake ŵakaŵa ŵakunozgeka kumugowokera, lekani ŵakamuchema kuti “mwana wane” ndipo ŵakamupokeleraso. Adada ŵake ŵakati: “Wakazgeŵa ndipo wasangika.” (Luka 15:​11-32) Apo Yesu wakaŵa kuchanya, wakwenera wakawonanga umo Adada ŵake ŵakalongoleranga lusungu ŵakwananga awo ŵang’anamuka mtima. Ntharika iyi njakukhozga chomene ndipo yikulongora umo Adada ŵithu a Yehova ŵaliri ŵalusungu.

13-14. Kasi mpositole Petrosi wakasambira vichi pa nkhani ya kung’anamuka mtima, ndipo wakaŵasambizga vichi ŵanji pa nkhani iyi? (Wonaniso chithuzi.)

¹³ Mpositole Petrosi wakasambirako sambiro lakuzirwa kwa Yesu pa nkhani ya kung’anamuka mtima na kugowokera. Petrosi wakabudiskanga kanandi waka, ndipo Yesu wakamugowokeranga na mtima wose. Mwachiyelezgero, pamanyuma pakuti Petrosi wakana Fumu yake katatu kuti wakuyimanya yayi, wakasuzgika chomene maghanoghano ndipo wakajiyimbanga mulandu. (Mat. 26:​34, 35, 69-75) Kweni Yesu wati wawuskika, wakawonekera kwa Petrosi, ndipo ntchakuwonekerathu kuti wakachita nthena apo wakaŵa kwayekha. (Luka 24:​33, 34; 1 Kor. 15:​3-5) Tikukayika yayi kuti pa nyengo iyi, mwachitemwa Yesu wakamusimikizgira kuti wamugowokera mpositole wake uyu, uyo wakaŵa kuti wang’anamuka mtima.

¹⁴ Petrosi wakamanyanga makora umo munthu wakujipulikira para wang’anamuka mtima na kugowokereka, ntheura nayo wakamba kusambizga ŵanji pa nkhani iyi. Nyengo yikati yajumphapo kufuma pa chiphikiro cha Pentekoste, Petrosi wakalongosolera mzinda wa Ŵayuda ŵambura kugomezga kuti ukakoma Mesiya. Kweni mwachitemwa, wakaŵachiska kuti: “Ntheura, ng’anamukani mtima ndipo muwelere mwakuti zakwananga zinu zisisitike, kuti nyengo yakuwezgeramo nkhongono yize kufuma kwa Yehova.” (Mil. 3:​14, 15, 17, 19) Apa Petrosi wakalongora  kuti kung’anamuka mtima kukovwira wakwananga kuwelera, icho chikung’anamura kusintha kaghanaghaniro kake kakubudika kweniso vyakuchita, na kwamba kuchita vinthu ivyo vikukondweska Chiuta. Mpositole uyu wakalongoraso kuti Yehova wasisitenge zakwananga zawo, ndipo ziwonekengeso yayi. Ndipo vyaka vinandi vikati vyajumphapo, Petrosi wakasimikizgira Ŵakhristu kuti: “Yehova . . . wakuzikira chifukwa cha imwe pakuti wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (2 Pet. 3:9) Ntchakukhozga chomene kumanya kuti Yehova wangatigowokera nanga tingaŵa kuti tachita zakwananga zikuru chomene.

15-16. (a) Kasi mpositole Paulosi wakasambira vichi pa nkhani ya kugowoka uko Yehova na Yesu ŵakulongora? (1 Timote 1:​12-15) (b) Kasi mu nkhani yakulondezgapo tizamusambira vichi?

¹⁵ Saulosi wa ku Taraso wakachita vinthu vinandi viheni ndipo wakakhumbikwiranga kuti wang’anamuke mtima kuti wagowokereke. Iyo wakatambuzganga chomene ŵalondezgi ŵa Yesu Khristu. Ŵakhristu ŵanandi ŵakwenera kuti ŵakaghanaghananga kuti wangasintha yayi. Kweni Yesu wakamanya kuti Saulosi wangasintha na kung’anamuka mtima. Iyo na Adada ŵake ŵakawonamo mikhaliro yiwemi mwa Saulosi. Yesu wakati: “Munthu uyu ntchiŵiya chane chakusoleka.” (Mil. 9:15) Nakuti Yesu wakagwiliskira ntchito munthondwe kuti wawovwire Saulosi kung’anamuka mtima. (Mil. 7:58–8:3; 9:​1-9, 17-20) Wati wazgoka Mkhristu, Saulosi uyo wakamba kumanyikwa kuti mpositole Paulosi, kanandi wakayowoyanga umo wakuwongera lusungu ulo wakalongoreka. (Ŵazgani 1 Timote 1:​12-15.) Mpositole uyu wakaphalira ŵabali na ŵadumbu kuti: “Chiuta wamulongorani lusungu kuti mung’anamuke mtima.”—Rom. 2:4.

¹⁶ Apo Paulosi wakapulika vya uzaghali wachilendo chomene uwo ukachitikanga pakati pa Ŵakhristu ŵa mu mpingo wa Korinte, kasi wakachita wuli? Umo wakachitira pa nkhani iyi, vikutisambizga kuti Yehova wakulanga mwachitemwa kweniso wakulongora lusungu awo ŵang’anamuka mtima. Mu nkhani yakulondezgapo, tizamudumbiskana vinandi pa nkhani iyi.