1, 2. (a) Ni ntchito wuli iyo yikaŵa yakuzirwa chomene kwa Yesu, ndipo chifukwa wuli wakawonanga kuti njakuzirwa? (b) Pakuŵa “ŵantchito ŵanyake na Chiuta,” kasi tikwenera kuchita wuli kuti tichite makora uteŵeti withu?

YESU KHRISTU wakaŵa kalipentara kweniso mupharazgi. (Mrk. 6:3; Rom. 15:8) Iyo wakasambira makora kuchita vyose. Pakuŵa kalipentara, wakasambira umo wangagwiliskira ntchito viteŵetero vyaukalipentara kuti wapange vinthu viwemi kufuma ku mathabwa. Kweniso iyo pakuŵa msambizgi wa makani ghawemi, wakaghamanyanga makora Malemba, ndipo wakagwiliskiranga ntchito mwaluso ivyo wakamanyanga kuti wawovwire ŵanthu bweka kuti ŵapulikiske unenesko wa mu Mazgu gha Chiuta. (Mat. 7:28; Luka 24:32, 45) Apo wakaŵa na vyaka 30, Yesu wakaleka ukalipentara chifukwa wakamanya kuti upharazgi ni mulimo wakuzirwa chomene. Iyo wakayowoya kuti chifukwa chimoza icho Chiuta wakamutumira pa charu chapasi chikaŵa chakuti wapharazge makani ghawemi gha Ufumu wa Chiuta. (Mat. 20:28; Luka 3:23; 4:43) Upharazgi ukaŵa mulimo wakuzirwa chomene mu umoyo wa Yesu, ndipo wakakhumbanga kuti ŵanji ŵachitire nayo lumoza mulimo uwu.—Mat. 9:35-38.

² Nangauli ndise makalipentara yayi, kweni ndise ŵapharazgi ŵa makani ghawemi. Mulimo uwu ngwakuzirwa chomene  chifukwa tikuchitira lumoza na Chiuta. Lekani tikuchemeka “ŵantchito ŵanyake na Chiuta.” (1 Kor. 3:9; 2 Kor. 6:4) Nase tikuzomerezga kuti “Mazgu [gha Yehova] ghose mbunenesko.” (Sal. 119:159, 160) Lekani tikwenera kuwoneseska kuti tikuchita “mwakwenelera na mazgu gha unenesko” mu upharazgi. (Ŵerengani 2 Timote 2:15.) Tikwenera kuyezgayezga kuti tigwiliskirenge ntchito Baibolo mwaluso chifukwa ndilo ntchiteŵetero chikuru icho tikugwiliskira ntchito pakusambizga ŵanthu za Yehova, Yesu, na Ufumu. Kuti tichite makora uteŵeti withu, gulu la Yehova latipaso viteŵetero vinyake ivyo tikwenera kuvimanya makora. Viteŵetero ivi ni Ivyo Tikusambizgira Ŵanthu Baibolo.

3. Kasi tikwenera kuŵa na chilato wuli apo tikupharazgira ŵanthu mu nyengo yichoko iyo yakhalako? Kasi lemba la Milimo 13:48 likutovwira wuli?

³ Chifukwa wuli viteŵetero ivi vikuchemeka kuti Ivyo Tikusambizgira Ŵanthu Baibolo m’malo mwa ivyo tikupharazgira? Chifukwa “kupharazga” chikung’anamura kuphalira munthu uthenga, apo “kusambizga” chikung’anamura kulongosolera munthu uthenga kuti waupulikiske na kuchita ivyo wasambira. Nyengo yichoko iyo yakhalako kuti tipharazgire ŵanthu, chilato chithu chikwenera kuŵa kwambiska masambiro gha Baibolo na kusambizga ŵanthu unenesko. Ntheura tikwenera kupenjerezga wose awo ŵali na “maghanoghano ghakwenelera umoyo wamuyirayira” na kuŵawovwira kuti ŵaŵe ŵateŵeti ŵa Yehova.—Ŵerengani Milimo 13:44-48.

4. Kasi tingaŵamanya wuli awo ŵali na “maghanoghano ghakwenelera umoyo wamuyirayira,” ndipo tingaŵasanga wuli?

⁴ Kasi tingaŵamanya wuli awo ŵali na “maghanoghano ghakwenelera umoyo wamuyirayira”? Nga umo vikaŵira na Ŵakhristu ŵakwambilira, nthowa yekha iyo tingasangira ŵanthu aŵa nkhupharazga. Tikwenera kuchita nga umo Yesu wakayowoyera. Iyo wakati: “Mu msumba uliwose panji muzi uwo mwanjiramo, penjanimo uyo ngwakwenelera.” (Mat. 10:11) Tikukhazga kuti ŵanthu ŵambura kuwonga, ŵakujikuzga, na ŵambura kutemwa vinthu vyauzimu, ŵapulikenge yayi uthenga uwemi. Tikupenja ŵanthu ŵa mitima yiwemi, ŵakujiyuyura, kweniso awo ŵali na njara yauzimu. Tingayaniska kupenja uku na ivyo Yesu, nga kalipentara, wakachitanga pakupenja khuni lakwenelera kuti wapangire mipando, mathebulu, vijaro, majoko, na vinyake. Para wasanga khuni liwemi, wakatoranga viteŵetero vyake, kugwiliskira ntchito luso lwake, na kupanga chinthu. Nase tikwenera kuchita mwakuyana waka apo tikuyezgayezga kupenja ŵasambiri ŵa mitima yiwemi.—Mat. 28:19, 20.

5. Kasi tikwenera kumanya vichi vya viteŵetero Ivyo Tikusambizgira Ŵanthu Baibolo? Yowoyani chiyelezgero. (Wonani chithuzi chakwamba.)

⁵ Mu bokosi la viteŵetero, chiteŵetero chilichose chikuŵa na ntchito yake. Ghanaghanirani viteŵetero ivyo Yesu wakagwiliskiranga ntchito pakuŵa kalipentara. * Wakakhumbikwiranga viteŵetero kuti wadumure, kudolora, kuŵaja, kukhoma, na kujoyina mathabwa. Mwakuyana waka, chilichose icho tikusambizgira ŵanthu Baibolo chili na ntchito yake. Sono tiyeni tiwone umo tingagwiliskira ntchito viteŵetero vyakuzirwa ivyo tili navyo.

6, 7. (a) Kasi muli kugwiliskirapo ntchito makadi? (b) Kasi kapepara kakuchemera ŵanthu ku maungano gha mpingo kakugwira ntchito wuli ziŵiri?

⁶ Makadi. Nangauli makadi agha ngachokoghachoko kweni ghakovwira chomene ŵanthu kumanya vya ise ndipo ghakuŵalongozgera ku webusayiti yithu. Para ŵajura webusayiti yithu, ŵangamanya vinandi vya ise kweniso ŵangapempha sambiro la Baibolo. Kufika sono, ŵanthu ŵakujumpha 400,000 ŵali kupempha sambiro la Baibolo pa jw.org, ndipo ŵanandi ŵakupempha zuŵa lililose. Ntheura ntchiwemi chomene kuŵa na makadi ghachoko waka kuti apo mukugwira ntchito zinu za zuŵa na zuŵa mupharazgirenge ŵanthu para mwaŵi wasangika.

 ⁷ Tumapepara Twakuchemera Ŵanthu ku Vyakuchitika Vyapadera. Kapepara kakuchemera ŵanthu ku maungano gha mpingo kakugwira ntchito ziŵiri. Kakuti: “Tikumupemphani kuti musambirenge Baibolo na ise Ŵakaboni ŵa Yehova.” Pamanyuma kakuyowoya “ivyo vikuchitika pa maungano ghithu” “panji para mukusambira Baibolo na Kaboni wa Yehova.” Kapepara aka kakumanyiska ŵanthu vya ise kweniso kakupempha ŵanji awo “ŵali na njara yauzimu” kuti tisambirenge nawo Baibolo. (Mat. 5:3) Ŵanthu mbakupokelereka kwiza ku maungano ghithu kwali tikusambira nawo Baibolo panji yayi. Para ŵiza, ŵazamuwona na kupulika ivyo Baibolo lingaŵasambizga.

8. Chifukwa wuli ntchakuzirwa kuti ŵanthu ŵizenge ku maungano ghithu nanga kangaŵa kamoza? Yowoyani chiyelezgero.

⁸ Ntchakuzirwa chomene kuti tilutilire kuchemera ŵanthu ku maungano ghithu nanga ŵangizako kamoza pera. Chifukwa wuli? Ŵazamuwona mphambano yikuru iyo yilipo pakati pa chisopa chaunenesko na Babuloni Mukuru. (Yes. 65:13) Vyaka vichoko waka ivyo vyajumpha, mbumba yinyake ku United States yikawona mphambano iyi. Ray na Linda ŵakapangana kuti ŵambe kuluta ku tchalitchi. Ŵakagomezganga mwa Chiuta ndipo ŵakakhumbanga kumumanya makora, ntheura ŵakamba kuluta ku tchalitchi lililose mu tawuni yakwawo. Ndipo ŵakalutapo ku matchalitchi ghanandi. Mbumba iyi yikapangana kuti yiwonenge dankha vinthu viŵiri pambere yindanjire tchalitchi lililose. Chakwamba yiwonenge dankha ivyo yingasambirako ku tchalitchi ilo, ndipo chachiŵiri, yiwonenge usange kavwaliro ka ŵanthu ŵa mu tchalitchi ilo kakulongora kuti ŵakusopa nadi Chiuta. Pati pajumpha vyaka vinandi ŵakaŵa kuti ŵenda mu tchalitchi lililose mu tawuni yakwawo, kweni ŵakakhuŵara chomene. Palije icho ŵakasambirapo, ndipo ŵanthu ku matchalitchi agha ŵakavwaranga mwambura kwenelera. Ŵati ŵafuma mu tchalitchi laumaliro ilo ŵakalutako kuyana na ndondomeko yawo, Linda wakaluta ku ntchito ndipo Ray wakaluta ku nyumba. Apo wakalutanga kunyumba, Ray wakawona Nyumba ya Ufumu ndipo wakaghanaghana kuti, ‘Wuli nkhanjiremo waka na kuwona ivyo ŵakuchita?’ Wakakondwa chomene wakati wanjira. Waliyose mu Nyumba ya Ufumu wakawonekanga walusungu ndiposo waubwezi, ndipo wose ŵakavwara mwantchindi. Ray wakakhala pa mpando wapanthazi ndipo wakavitemwa ivyo wakasambira. Ivi vikutikumbuska ivyo mpositole Paulosi wakalongosora vyakukhwaskana na munthu uyo wati wiza ku maungano wakati: “Chiuta wali nadi pakati pinu.” (1 Kor. 14:23-25) Ray wakamba kuluta ku maungano pa zuŵa la Sabata lililose, ndipo pamanyuma wakamba kwiza pa maungano gha mukati mwa sabata. Linda nayo wakamba kwiza ku maungano. Nangauli ŵakaŵa na vyaka vya m’ma 70, kweni ŵakazomera kusambira Baibolo na kubatizika.

9, 10. (a) Kasi muli kugwiliskirapo ntchito mathirakiti pakwambiska chidumbirano? (b) Longosorani umo mungagwiliskira ntchito thirakiti lakuti Kasi Ufumu wa Chiuta ni Vichi?

⁹ Mathirakiti. Tili na mathirakiti 8 agho ngapusu pakughagwiliskira ntchito kweniso kwambiskira chidumbirano. Mathirakiti agha ghakamba kufumiskika mu 2013, ndipo pali kupulintika mathirakiti 5 biliyoni. Uwemi wa mathirakiti agha ngwakuti para wamanya umo ungagwiliskira ntchito limoza, ndikuti wamanya ghose, chifukwa ghali kulembeka mu nthowa yakuyana. Kasi mungambiska wuli chidumbirano na thirakiti?

¹⁰ Para mwasankha kugwiliskira ntchito thirakiti lakuti Kasi Ufumu wa Chiuta ni Vichi? Mulongorani munthu fumbo ilo lili pa peji lakwamba lakuti: “Kasi muli kujifumbapo kuti Ufumu wa Chiuta ni vichi? Kasi mungati . . . ?” Pamanyuma mufumbani zgoro ilo wangasankha pa mazgoro ghatatu gha pa thirakiti ili. Kwambura kumususka zgoro ilo wasankha, julani mukati pa “Ivyo Baibolo Likusambizga,” ndipo mulongorani lemba la Daniyeli 2:44 na Yesaya 9:6. Para ntchamachitiko, mungalutilira kudumbiskana. Paumaliro  mulongorani fumbo ilo lili kuumaliro pasi pa kamutu kakuti “Fumbo Lakuti Mughanaghanirepo”: “Kasi vinthu vizamuŵa wuli para Ufumu wa Chiuta wamba kuwusa?” Mungazakadumbiskana fumbo ili paulendo wakuwelerako. Para mwazakakumanaso, kumbukani kuti thirakiti ili likumulongozgerani mu kaburosha ka Chiuta Wakutiphalira Uthenga Uwemi!, mutu 7, ilo ndimoza mwa mabuku agho tikwambiskira masambiro gha Baibolo.

11. Kasi magazini ghithu ghakupangika na chilato wuli, ndipo tikwenera kumanya vichi?

¹¹ Magazini. Gongwe la Mulinda na Wukani! ni magazini agho ghakufumiskika na kung’anamulika chomene pa charu chose. Chifukwa chakuti ŵanthu ŵa mu vyaru vinandi ŵakughaŵazga, mutu wa pa chikopi ukuŵa wakukondweska ŵanthu kulikose. Tikwenera kughagwiliskira ntchito magazini agha pakovwira nagho ŵanthu kumanya icho ntchakuzirwa chomene pa umoyo mazuŵa ghano. Kuti tipeleke ku ŵanthu ŵakwenelera, tikwenera kumanya magazini yiliyose kuti yalembekera anjani.

12. (a) Kasi Wukani! yili kupangikira anjani, ndipo na chilato wuli? (b) Ni vinthu wuli viwemi ivyo vikachitika mwasonosono apo mukagaŵiranga Wukani!?

¹² Wukani! yili kupangikira ŵanthu awo ŵakumanya vichoko panji ŵakumanya yayi vya Baibolo. Ŵangaŵa kuti ŵakumanya yayi visambizgo vya Ŵakhristu, ŵakugomezga yayi visopa, panji ŵakumanya yayi kuti Baibolo ndakovwira. Chilato chikuru cha Wukani! nkhukhorweska awo ŵakuŵazga kuti ŵamanye kuti Chiuta waliko. (Rom. 1:20; Heb. 11:6) Nkhovwiraso awo ŵakuŵazga kuŵa na chipulikano kuti Baibolo ni “mazgu gha Chiuta” nadi. (1 Tes. 2:13) Mitu ya pa chikopi ya magazini gha Wukani! gha 2018 njakuti: “Umo Mungaŵira Ŵakukondwa,” “Vinthu 12 Ivyo Vingawovwira Banja Kuti Liŵe Lakukondwa,” na “Wovwiri ku Awo Ŵali na Chitima.”

13. (a) Kasi Gongwe la Mulinda lakugaŵira likupangikira anjani? (b) Ni vinthu wuli viwemi ivyo vikachitika mwasonosono apo mukagaŵiranga Gongwe la Mulinda?

¹³ Gongwe la Mulinda, lakugaŵira, chilato chake nkhulongosora fundo za Baibolo ku ŵanthu awo ŵakumanyako kale vya Chiuta na Baibolo. Nangauli ŵakumanyako vinyake vya Baibolo, kweni ŵakupulikiska yayi ivyo likusambizga. (Rom. 10:2; 1 Tim. 2:3, 4) Mitu ya pa chikopi ya magazini gha Gongwe la Mulinda gha 2018 njakuti: “Kasi Baibolo Lichali Lakovwira Mazuŵa Ghano?,” “Kasi Ntchivichi Chichitikenge Munthazi?,” na “Kasi Chiuta Wakumupwelelerani Imwe Pamwekha?”

14. (a) Ni mavidiyo wuli ghanayi agho ghali pa Ivyo Tikusambizgira Ŵanthu? (b) Ni vinthu wuli viwemi ivyo vikachitika apo mukalongoranga mavidiyo agha?

¹⁴ Mavidiyo. Mu nyengo ya Yesu, kalipentara wakagwiliskiranga ntchito viteŵetero vyambura kugwiliskira ntchito magesi. Kweni mazuŵa ghano, makalipentara ghali na viteŵetero vinyake ivyo vikugwiliskira ntchito magesi nga ni masowo, vyakudololera mathabwa, vyakunyililiskira mathabwa, vyakukhomera, na vinyake. Padera pa vyakusindikizgika, tiliso na mavidiyo ghawemi chomene agho tikulongora ŵanthu. Ghanayi mwa mavidiyo agha, ghali pa gulu la ivyo tikusambizgira ŵanthu. Mavidiyo agha ni: Chifukwa Wuli Mukwenera Kusambira Baibolo?, Kasi Ŵakaboni ŵa Yehova Ŵakuchita Wuli Pakusambizga Ŵanthu Baibolo?, Kasi pa Nyumba ya Ufumu Pakuchitika Vichi?, na Kasi Ŵakaboni ŵa Yehova Mbanjani? Pa ulendo wakwamba, ntchiwemi chomene kulongora munthu mavidiyo agho ngafupi kuchepera maminiti ghaŵiri. Mavidiyo agho ngatali, tingaghagwiliskira ntchito pa maulendo ghakuwelerako panji kulongora ŵanthu awo ŵali na nyengo yinandi. Mavidiyo agha ghangakhukiska ŵanthu kuti ŵambe kusambira Baibolo na kwiza ku maungano ghithu.

15. Longosorani uwemi uwo ukuŵapo para tikulongora ŵanthu mavidiyo gha chiyowoyero chawo.

¹⁵ Mudumbu munyake wakakumana na mwanakazi munyake wakufuma ku Micronesia uyo wakayowoyanga  Chiyapese. Mudumbu uyu wakamulongora vidiyo ya mutu wakuti Chifukwa Wuli Mukwenera Kusambira Baibolo? mu chiyowoyero chake. Apo vidiyo iyi yikambanga, mwanakazi uyu wakati: “Ichi ntchiyowoyero chane. Nkhugomezga yayi! Umo wakuyowoyera, wakulongora kuti ngwakufumira ku chigaŵa chakwithu. Wakuyowoya chiyowoyero chane!” Pamanyuma wakati wamuŵazga na kuwonelera vyose vya mu chiyowoyero chake ivyo vili pa jw.org. (Yaniskani na Milimo 2:8, 11.) Wonaniso ivyo vikachitikira mudumbu munyake wa ku United States. Iyo wakatumizgira mwana wa mudumbu wake nthowa panji kuti linki ya umo wangasangira vidiyo iyi mu chiyowoyero chake. Mwana uyu wakaŵa ku charu chinyake. Wakayiwonelera ndipo wakamutumizgira uthenga kuti: “Chigaŵa chakuti pali nkhongono yinyake yiheni iyo yikuwusa charu ndicho chikanikhwaska chomene. Nili kupempha kuti nisambirenge Baibolo.” Mwana uyu wakukhala mu charu icho ntchito yithu njakukanizgika.

16. Longosorani chilato cha maburosha agha: (a) Tegherezgani kwa Chiuta na Kuŵa Ŵamoyo Kwamuyirayira. (b) Chiuta Wakutiphalira Uthenga Uwemi! (c) Mbanjani Ŵakuchita Khumbo la Yehova Mazuŵa Ghano?

¹⁶ Maburosha. Kasi mungamusambizga wuli unenesko munthu uyo wakumanya viŵi yayi kuŵazga panji palije buku lakulongosora Baibolo la mu chiyowoyero chake? Tili na burosha lakuti Tegherezgani kwa Chiuta na Kuŵa Ŵamoyo Kwamuyirayira. * Burosha linyake liwemi chomene kwambiskira masambiro nda Chiuta Wakutiphalira Uthenga Uwemi! Mungamulongora munthu mitu 14 iyo yili kuumaliro wa burosha ili na kumuphalira kuti wasankhepo uwo wamukondweska chomene. Mbwenu yambani kusambira nayo mutu uwu. Kasi muli kuyezgapo sachizgo ili paulendo wakuwelerako? Burosha lachitatu lakusambizgira ŵanthu nda Mbanjani Ŵakuchita Khumbo la Yehova Mazuŵa Ghano? Lili kupangika kuti limanyiske ŵasambiri za gulu la Yehova. Kuti mumanye umo mungaligwiliskira ntchito pakusambira Baibolo wonani kabuku ka maungano ka Uteŵeti na Umoyo Wachikhristu ka Malichi 2017.

17. (a) Kasi chilato cha mabuku ghakusambilira ntchakuti wuli? (b) Kasi awo ŵabatizika waka ŵakwenera kulutilira kuchita vichi, ndipo chifukwa wuli?

¹⁷ Mabuku. Para munthu mwamba kusambira nayo burosha ili, nyengo yiliyose mungasintha na kwamba kusambira nayo buku la Kasi Baibolo Likutisambizga Vichi? Buku ili lingamovwira kuti wasambire vinandi vyakukhwaskana na Baibolo. Para mwamara buku ili ndipo msambiri wakukura mwauzimu, mungalutilira kusambira buku la Kasi Mungachita Wuli Kuti Mukhalilire mu Chitemwa cha Chiuta? Buku ili lingamovwira msambiri kuti wachitenge ivyo wakusambira zuŵa lililose. Kumbukani kuti nanga munthu wangabatizika, wakwenera kulutilira kusambira m’paka wamalizge mabuku ghaŵiri agha. Ichi chimovwirenge kuti waŵe na chipulikano chakukhora.—Ŵerengani Ŵakolose 2:6, 7.

18. (a) Kasi lemba la 1 Timote 4:16 likutichiska vichi ise pakuŵa ŵasambizgi ŵa unenesko, ndipo pali chandulo wuli? (b) Kasi tikwenera kuŵa na chilato wuli para tikugwiliskira ntchito Ivyo Tikusambizgira Ŵanthu Baibolo?

¹⁸ Pakuti ndise Ŵakaboni ŵa Yehova, tili na “uthenga wa unenesko wa makani ghawemi” uwo ungawovwira ŵanthu kuti ŵazakasange umoyo wamuyirayira. (Kol. 1:5; ŵerengani 1 Timote 4:16.) Kuti tichite makora mulimo uwu, tili na Ivyo Tikusambizgira Ŵanthu Baibolo umo muli chilichose chakukhumbikwira. (Wonani “ Ivyo Tikusambizgira Ŵanthu Baibolo.”) Ntheura tiyeni tigwiliskirenge ntchito mwaluso vinthu ivi. Mupharazgi waliyose wangasankha buku ilo wangagaŵira munthu wakunweka na nyengo iyo wangachitira nthena. Kweni chilato chithu nkhugaŵira waka ŵanthu mabuku yayi, panji kupeleka kwa munthu wambura kunweka. Chilato chithu nkhuzgora ŵanthu ŵamitima yiwemi, ŵakujiyuyura, kweniso awo ŵali na njara yauzimu kuŵa ŵasambiri. Ŵanthu awo ŵali na “maghanoghano ghakwenelera umoyo wamuyirayira.”—Mil. 13:48; Mat. 28:19, 20.