Lutilirani Kuŵa na Mtende wa mu Mtima Nanga Vinthu Vingasintha
“Natuniska na kuchetamiska umoyo wane.”—SAL. 131:2.
1, 2. (a) Kasi Mkhristu wangakhwaskika wuli para vinthu vyasintha mwamabuchi pa umoyo wake? (Wonani chithuzi chakwamba.) (b) Kasi chingatovwira ntchivichi kuti tilutilire kuŵa na mtende wa mu mtima kuyana na Salimo 131?
LLOYD na Alexandra ŵakati ŵateŵetera pa Beteli vyaka vyakujumpha 25, ŵakaphalirika kuti uteŵeti wawo wasintha ŵamuteŵetera waka ku mpingo. Pakwamba ŵakakhuŵara chomene. Lloyd wakati: “Nkhawonanga kuti pa Beteli ndipo mphakaya pane ndipo nkhazgoŵera uteŵeti uwo nkhachitanga. Nkhakolerana na vifukwa ivyo pakaŵira kusintha uku, kweni masabata na myezi yakulondezgapo kanandi nkhajipulikanga kuti nasidika. Nkhasinthangasinthanga. Nyengo yinyake nkhajipulikanga makora kweni nyengo yichoko waka nkhasuzgikanga maghanoghano.”
2 Para vinthu vyasintha mwamabuchi pa umoyo withu, tingamba kufipa mtima na kwamba kusuzgika maghanoghano. (Zinth. 12:25) Chingatiŵiraso chinonono kuzomerezga kusintha uku. Kasi tingachita wuli kuti ‘tituniske na kuchetamiska’ umoyo withu para vyanthena vyachitika? (Ŵerengani Salimo 131:1-3.) Tiyeni tiwone umo ŵateŵeti ŵanyake ŵakale ŵa Yehova ŵakachitira vinthu vikati vyasintha. Tiwonengeso umo ŵateŵeti ŵanyake ŵa Yehova mazuŵa ghano ŵakuŵira na mtende wa mu mtima para vinthu vyasintha.
UMO “MTENDE WA CHIUTA” UKUTOVWILIRA
3. Kasi Yosefe wakasangana na suzgo wuli?
3 Mwachiyelezgero, ghanaghanirani za Yosefe. Awiske ŵakamutemwanga chomene kuluska ŵakuru ŵake wose. Ichi chikapangiska kuti ŵakuru ŵake ŵamuchitirenge sanji. Ntheura apo wakaŵa na vyaka pafupifupi 17, ŵakuru ŵake ŵakamuguliska kuti wakaŵe muzga. (Gen. 37:2-4, 23-28) Pafupifupi vyaka 13, Yosefe wakaŵa muzga kweniso wakaponyeka mu gadi ku Eguputo, uko kukaŵa kutali chomene na adada ŵake ŵakutemweka a Yakhobe. Kasi ntchivichi icho chikamovwira kuti waleke kutaya mtima panji kukwiya?
4. (a) Kasi Yosefe wakaghanaghaniranga chomene vichi apo wakaŵa mu gadi? (b) Kasi Yehova wakazgora wuli malurombo gha Yosefe?
4 Apo wakasuzgikanga mu gadi, Yosefe wakaghanaghaniranga chomene za umo Yehova wakamutumbikiranga. (Gen. 39:21; Sal. 105:17-19) Maloto agho Yosefe wakalota apo wakaŵa muchoko nagho ghakwenera kuti ghakamovwira kumanya kuti Yehova wakaŵa nayo. (Gen. 37:5-11) Kanandi wakwenera kuti wakamuphaliranga Yehova mu lurombo vyose ivyo vikaŵanga mu mtima wake. (Sal. 145:18) Yehova wakazgora malurombo ghose gha Yosefe. Wakamusimikizgira kuti ‘waŵenge nayo’ mu masuzgo ghake ghose.—Mil. 7:9, 10. *
5. Kasi “mtende wa Chiuta” ungatovwira wuli kuti tifiske vilato vithu vyauzimu?
5 Nanga tingakumana na suzgo likuru wuli, kweni nase mazuŵa ghano “mtende wa Chiuta” ukuvikilira maghanoghano ghithu. (Ŵerengani Ŵafilipi 4:6, 7.) Ntheura, para tikulomba Yehova pa nyengo iyo tikufipa mtima chifukwa cha masuzgo, mtende wa Chiuta utikhozgenge kuti tifiske vilato vithu vyauzimu na kutovwira kuti tileke kuthera. Tiyeni tiwone viyelezgero vinyake vya mazuŵa ghano vya ŵabali na ŵadumbu awo ŵakaŵapo na mtende wa mtima.
LOMBANI YEHOVA KUTI MUŴESO NA MTENDE WA MU MTIMA
6, 7. Kasi malurombo ghakudunjika ghangatovwira wuli kuti tiŵeso na mtende wa mu mtima? Yowoyani chiyelezgero.
6 Ryan na Juliette ŵakati ŵaphalirika kuti uteŵeti wawo nga mbapayiniya ŵapadera ŵakanyengo wamara, ŵakakhuŵara. Ryan wakati: “Nyengo yeneyiyo tikamuphalira Yehova mu lurombo. Tikamanya kuti iyi ni nyengo yiwemi yakulongolera kuti tikumugomezga. Ŵanandi mu mpingo withu ŵakaŵa ŵaphya, ntheura tikalomba Yehova kuti watovwire kuti tilongore chiyelezgero chiwemi pa nkhani ya chipulikano.”
7 Kasi Yehova wakazgora wuli lurombo lwawo? Ryan wakukumbuka kuti: “Tikati tamara waka kulomba, tikalekerathu kwenjerwa. Mtende wa Chiuta ukavikiliranga mitima yithu na maghanoghano ghithu. Tikamanya kuti Yehova walutilirenge kutigwiliskira ntchito para tilutilirenge kuŵa na maghanoghano ghawemi.”
8-10. (a) Kasi mzimu wa Yehova ungatovwira wuli kuti tileke kufipa mtima? (b) Kasi Yehova wangatovwira wuli para tikuŵika mtima pa kumuteŵetera?
8 Mzimu wa Chiuta ungatovwira kuti tileke kufipa mtima kweniso ungatikumbuska malemba agho ghangatovwira kuti timanye ivyo ni vyakuzirwa chomene pa umoyo. (Ŵerengani Yohane 14:26, 27.) Tiyeni tiwone ivyo vikachitikira, Philip na Mary, ŵakutorana awo ŵakateŵetera pa Beteli vyaka pafupifupi 25. Mu myezi yinayi pera, amama ŵa Philip, amama ŵa Mary, na mubali wawo munyake, wose ŵakafwa. Ndipo ŵakamba kupwelelera adada ŵa Mary, awo ŵakaŵa na nthenda ya ku wongo.
9 Philip wakukumbuka kuti: “Nkhaghanaghananga kuti nkhazizipizganga makora suzgo ilo nkhakumana nalo, kweni chinthu chinyake chikasoŵekanga. Nkhaŵazga lemba la Ŵakolose 1:11 ilo likaŵa mu nkhani yinyake ya mu Gongwe la Mulinda. Nkhazizipizganga nadi kweni mwakukwana yayi. Nkheneranga ‘kuzizipizga mu vinthu vyose ndiposo kuzikira na kuŵa na chimwemwe.’ Vesi ili likanikumbuska kuti wamunthu ukuŵa na chimwemwe chifukwa cha umo vinthu viliri pa umoyo yayi, kweni chifukwa cha wovwiri wa mzimu wa Chiuta.”
10 Chifukwa chakuti Philip na Mary ŵakaŵika mtima pa kuteŵetera Yehova, Chiuta wakaŵatumbika mu nthowa zinandi. Nyengo yichoko waka ŵakati ŵafuma pa Beteli, ŵakasanga masambiro gha Baibolo agho ghakakulanga mwauzimu, ndipo ŵakakhumbanga kuti ŵasambirenge kujumpha pa kamoza pa sabata. Pakukumbuka ivi Mary wakati: “Masambiro agha ghakapangiska kuti tiŵe ŵakukondwa, ndipo iyi yikaŵa nthowa iyo Yehova wakatiphaliliranga kuti vyose viŵenge makora.”
CHITANI VINTHU IVYO YEHOVA WANGAMUTUMBIKIRANIPO
Kasi tingamuyezga wuli Yosefe para vinthu vyasintha pa umoyo withu? (Wonani ndime 11-13)
11, 12. (a) Kasi ntchivichi icho Yosefe wakachita icho Yehova wakamutumbikirapo? (b) Kasi Yosefe wakatumbikika wuli chifukwa cha kuzizipizga?
11 Para vinthu vyasintha mwamabuchi, tingamba kwenjerwa na vyamunthazi ndipo ivi vingatimbanizga umoyo withu. Ivi mphanyi vikachitikira Yosefe. M’malo mwake, wakachita vinthu mwamahara chomene, wakachita vinthu ivyo Yehova wangamutumbikirapo. Nangauli wakaŵa mu gadi, Yosefe wakalimbikiranga chomene ntchito yiliyose iyo wakapikanga na mulinda mulara wa gadi, nga umo wakachitiranga apo wakateŵeteranga Potifara.—Gen. 39:21-23.
12 Zuŵa linyake mulinda mulara wakapa Yosefe ntchito yakuti wasungilirenge ŵanalume ŵaŵiri awo ŵakateŵeterapo pa maudindo ghakuru mu nyumba yachifumu ya Farawo. Chifukwa chakuti Yosefe wakaŵalongora lusungu, ŵanalume aŵa ŵakafwatuka kumuphalira masuzgo ghawo kweniso maloto agho ŵakalota usiku. (Gen. 40:5-8) Yosefe wakamanyanga yayi ivyo vichitikenge, kweni ivyo wakadumbiskana na ŵanalume aŵa vikapangiska kuti paumaliro vinthu vimuŵire makora. Nangauli wakeneranga kukhalaso vyaka viŵiri mu jele, kweni paumaliro wakafumiskika, ndipo zuŵa lenelilo wakasankhika kuŵa wachiŵiri kwa Farawo.—Gen. 41:1, 14-16, 39-41.
13. Kasi tingachita vichi icho Yehova wangatitumbikirapo nanga vinthu vingaŵa kuti vili makora yayi pa umoyo withu?
13 Nga ni Yosefe, nase tingasangana na suzgo lakuti palije icho tingachitapo. Kweni para tazikira na kuchita ivyo tingafiska, Yehova watitumbikenge. (Sal. 37:5) Mbunenesko kuti nyengo zinyake ‘tingahangayika’ na masuzgo kweni nga umo mpositole Paulosi wakayowoyera “tikusoŵerathu chakuchita yayi.” (2 Kor. 4:8) Mazgu gha Paulosi agha ghangaŵa ghaunenesko kwa ise, chomenechomene para tikuŵikapo mtima pa uteŵeti.
LUTILIRANI KUŴIKA MTIMA PA UTEŴETI WINU
14-16. Kasi mupharazgi Filipu wakalutilira wuli kuŵika mtima pa uteŵeti wake nangauli vinthu vikasintha pa umoyo wake?
14 Mupharazgi Filipu ndiyo ntchiyelezgero chiwemi cha munthu uyo wakaŵika mtima pa uteŵeti wake nangauli vinthu vikasintha pa umoyo wake. Mu Yerusalemu, mukawuka nthambuzgo ndipo Stefano wakakomeka. * Pa nyengo iyi, Filipu wakakondwanga na uteŵeti wake uphya. (Mil. 6:1-6) Kweni ŵalondezgi ŵa Khristu ŵakati ŵambininika, Filipu wakakhalapo waka chete yayi. Wakaluta kukapharazga ku Samariya, msumba uwo makani ghawemi ghakaŵa kuti ghandapharazgikeko.—Mat. 10:5; Mil. 8:1, 5.
15 Filipu wakaŵa wakunozgeka kuluta kulikose uko mzimu wa Chiuta wamulongozgera, ntheura Yehova wakamugwiliskira ntchito kuti wambe kupharazga ku vigaŵa ivyo vikaŵa kuti vindapharazgikeko. Chifukwa chakuti wakaŵa wambura sankho Ŵasamariya ŵakwenera kuti ŵakakhozgeka, pakuti Ŵayuda ŵakaŵawonanga kuti mbapasi. Lekani ntchakuzizika yayi kuti mzinda ukamutegherezganga na mtima wose.—Mil. 8:6-8.
16 Mzimu wa Chiuta ukalongozgeraso Filipu ku Ashidodi na Kesareya, misumba yiŵiri iyo kukaŵa Ŵamitundu ŵanandi. (Mil. 8:39, 40) Pakati pajumpha vyaka 20 kufuma apo wakambira kupharazga ku Samariya, vinthu vikasinthaso kwa Filipu. Pakuti sono wakaŵa na mbumba, wakakhala mu chigaŵa icho wakapharazgangako. Nangauli vinthu vikasintha pa umoyo wake, kweni Filipu wakalutilira kuŵika mtima pa uteŵeti wake, ndipo Yehova wakamutumbika chomene pamoza na mbumba yake.—Mil. 21:8, 9.
17, 18. Kasi kuŵikapo mtima pa uteŵeti kungatovwira wuli kuti tiŵe ŵakukondwa para vinthu vyasintha?
17 Ŵateŵeti ŵanandi ŵanyengozose ŵakuyowoya kuti para ŵakuŵikapo mtima pa uteŵeti wawo ŵakuŵa ŵakukondwa nanga vinthu vingasintha. Osborne na Polite, ŵakutorana ŵanyake ku South Africa, ŵakati ŵafumapo pa Beteli ŵakaghanaghananga kuti ntchito ŵamuyisanga mwaluŵiro chomene. Osborne wakuti: “Tikayisanga mwaluŵiro yayi ntchito nga umo tikaghanaghaniranga.” Muwoli wake, Polite, wakayowoya kuti: “Myezi yitatu tikaŵa kuti tindayisange ntchito, ndipo tikaŵavya ndalama. Likaŵa suzgo likuru chomene.”
18 Kasi ntchivichi chikawovwira mbumba iyi pa nyengo ya masuzgo? Osborne wakuti: “Kupharazga pamoza na mpingo kukatovwira chomene kuti tiŵe na maghanoghano ghakwenelera. M’malo mwa kukhala waka na kudandawura tikawona kuti ntchiwemi kuti titangwanikenge na mulimo wa kupharazga, ndipo ivi vikatovwira kuti tiŵe ŵakukondwa chomene. Tikapenjerezga ntchito kulikose, ndipo paumaliro tikayisanga.”
LINDILIRANI YEHOVA MWAKUZIKIRA
19-21. (a) Kasi ntchivichi chingatovwira kulutilira kuŵa na mtende wa mu mtima? (b) Kasi tingasanga vyandulo wuli para tazomerezga kusintha uko kwaŵapo?
19 Nga umo viyelezgero ivi vyalongolera, para tikuyezgayezga na kulindilira Yehova para vinthu vyasintha, tilutilirenge kuŵa na mtende wa mu mtima. (Ŵerengani Mika 7:7.) Para nyengo yajumphapo, tingamanya kuti ubwezi withu na Yehova wakhora chomene chifukwa cha kukolerana na kusintha uko kwaŵapo mu umoyo withu. Pakuwona ivyo vikamuchitikira, Polite, uyo tamuyowoya pachanya apa, wakati: “Kusintha kwa uteŵeti kwanisambizga kuti nigomezgenge chomene Yehova nanga vinthu vingasuzga chomene. Ubwezi wane na Chiuta wakhora chomene.”
20 Mary uyo tamuzunura kukwambilira wachali kupwelelera awiske awo mbachekuru uku wakuchita upayiniya. Iyo wakuti: “Nasambira kuti para nkhwenjerwa, nkhwenera kuleka dankha na kulomba ndipo pamanyuma nkhuŵa wakukondwa. Sambiro likuru ilo nasambira nkhuleka vyose mu mawoko gha Yehova, ndipo ichi ntchakuzirwa chomene sono na munthazi.”
21 Lloyd na Alexandra, awo tanguŵazunura kukwambilira, ŵakuzomerezga kuti chipulikano chawo chikayezgeka munthowa iyo ŵakakhazganga yayi chifukwa cha kusintha kwa vinthu pa umoyo wawo. Kweni ŵakati: “Para chipulikano chayezgeka vikuvumbura usange chipulikano chithu ntchanadi kweniso ntchakukhora, ndipo chingatovwira na kutipembuzga mu nyengo ya masuzgo. Sono ndipo tili ŵanthu ŵawemi chomene.”
Para vinthu vyasintha mwamabuchi tingasanga vitumbiko mwamabuchi (Wonani ndime 19-21)
22. Para tikuyezgayezga kuchita ivyo tingafiska para vinthu vyasintha, kasi tikwenera kumanya vichi?
22 Para vinthu pa umoyo vyasintha mwamabuchi, kwali uteŵeti wasintha, para tamba kulwaralwara, panji tamba kupwelelera mbumba, manyani kuti Yehova wakumupwelelerani ndipo wamovwiraninge pa nyengo yakwenelera. (Heb. 4:16; 1 Pet. 5:6, 7) Pasono chitani ivyo mungafiska pa suzgo linu. Sendelerani kwa Adada ŵinu ŵakuchanya mu lurombo, ndipo sambirani kuŵagomezga chomene iwo. Para mwachita nthena, namwe mulutilirenge kuŵa na mtende wa mu mtima nanga vinthu vingasintha pa umoyo winu.
^ ndime 4 Nyengo yinyake wakati wafuma mu gadi, Yosefe wakati Yehova wakamuluwiska vyakuŵinya vyakumasinda pakumupa mwana mwanalume. Yosefe wakathya mwana wakwamba uyu zina lakuti Manase, chifukwa wakati, “Chiuta waniluwiska suzgo lane lose.”—Gen. 41:51, mazgu ghamusi.
^ ndime 14 Wonani nkhani ya mutu wakuti “Kasi Mukumanya?” mu magazini iyi.
