MUNTHU wakumanya vya nyengo wati wasanda, wawona kuti kwizenge chimphepo chakofya ku chigaŵa icho chili na ŵanthu ŵanandi. Chifukwa chakuti wakufipira mtima ŵanthu, ntheura wakulimbikira kuŵachenjezga pambere chimphepo chindize.

Mwakuyana waka, Yehova wakuchenjezga ŵanthu awo ŵakukhala pa charu chapasi vya “chimphepo” chakofya chomene. Chimphepo ichi chikuluska chimphepo chilichose icho ŵangapulika kwa ŵakumanya vya nyengo. Kasi wakuŵachenjezga wuli? Ndipo chifukwa wuli tingati ŵanthu waŵapa nyengo yakukwana kuti ŵachitepo kanthu? Kuti tisange mazgoro, tiyeni tiwone umo Yehova wakachenjezgera ŵanthu mu nyengo yakale.

Mu nyengo yakale, Yehova wakachenjezga vya “vimphepho” panji kuti vyeruzgo vyakupambanapambana ivyo wakapeleka ku awo ŵakalekeranga dala kupulikira malango ghake. (Zinth. 10:25; Yer. 30:23) Nyengo yiliyose, wakaŵachenjezgerangathu ŵanthu awo ŵakhwaskikenge, ndipo wakaŵaphaliranga ivyo ŵakwenera kuchita kuti ŵamupulikire. (2 Mathe. 17:12-15; Neh. 9:29, 30) Kuti wawovwire ŵanthu kupulikiska ivyo ŵakeneranga kusintha, kanandi wakatumanga ŵateŵeti ŵake ŵakugomezgeka ŵa pa charu chapasi kuti ŵapharazge mwaluŵiro vya cheruzgo chake.—Am. 3:7.

Nowa njumoza mwa ŵanthu awo Chiuta wakaŵagwiliskira ntchito kuti ŵapharazge vyeruzgo vyake. Kwa vyaka vinandi, mwachikanga Nowa wakachenjezga ŵanthu ŵa mu nyengo yake awo ŵakaŵa ŵazaghali na ŵankhaza, vya Chigumula icho chiŵenge pa charu chose chapasi. (Gen. 6:9-13, 17) Wakaŵaphaliraso ivyo ŵakwenera kuchita kuti ŵazakapone pa Chigumula. Nowa wakapharazga chomene, lekani pamanyuma wakazakachemeka kuti ni “mupharazgi wa urunji.”—2 Pet. 2:5.

Nangauli Nowa wakafwilirapo kupharazga, kweni ŵanthu ŵakaŵikako mahara yayi ku uthenga wa Chiuta. Ŵakalongora kuti ŵakaŵavyirathu chipulikano. Ntheura ŵakafwa apo Chigumula “chikiza na kuŵayora wose.” (Mat. 24:39; Heb. 11:7) Apo Chigumula chikizanga, ŵanthu aŵa ŵakaŵavya pakugwenthera chifukwa Chiuta wakaŵachenjezgerathu.

Nyengo zinyake Yehova wakachenjezganga ŵanthu para kwakhala nyengo yichoko waka kuti wize na cheruzgo chake. Ndipouli, wakawoneseskanga kuti ŵanthu ŵapika nyengo yakukwana kuti ŵasinthe. Mwachiyelezgero, wakaŵachenjezgerathu apo wakiza na Miliri 10 pa Ŵaeguputo. Pa muliri wa nambara 7, Yehova wakatuma Mozesi na Aroni kuti ŵachenjezge Farawo na ŵantchito ŵake. Muliri uwu ukaŵa vula ya malibwe iyo yikananga vinthu vinandi chomene. Pakuti vula iyi yikaŵa kuti yambenge machero ghake, kasi tingati Yehova wakapeleka nyengo yakukwana kuti ŵanthu ŵasange pakubisama? Baibolo likuti: “Muteŵeti waliyose wa Farawo uyo wakawopa mazgu gha Yehova, mwaluŵiro wakanjizga ŵateŵeti ŵake na viŵeto vyake mu nyumba. Kweni waliyose uyo wakaŵikako mahara yayi ku mazgu gha Yehova, wakaleka ŵateŵeti ŵake na viŵeto vyake ku thondo.” (Eks. 9:18-21) Apa ntchakuwonekerathu kuti Yehova wakaŵachenjezga mwakukwana, mwakuti awo ŵakachitapo kanthu mwaluŵiro, ŵakasuzgika chomene yayi nga umo ŵakasuzgikira awo ŵakaleka kupulikira.

Farawo na ŵateŵeti ŵake ŵakachenjezgekaso vya muliri wa nambara 10. Ndipouli, ŵakapulikira yayi chenjezgo ili. (Eks. 4:22, 23) Ntheura, ŵana ŵawo ŵakwamba ŵakafwa. Ichi chikaŵa chachitima chomene. (Eks. 11:4-10; 12:29) Kasi ŵakatenge ŵapulikirenge chenjezgo ili pa nyengo yake? Enya. Mozesi wakachenjezga mwaluŵiro  Ŵaisrayeli vya muliri wa nambara 10 ndipo wakaŵaphaliraso ivyo ŵangachita kuti ŵaponoske mbumba zawo. (Eks. 12:21-28) Kasi mbalinga awo ŵakapulikira chenjezgo ili? Ŵanyake ŵakusachizga kuti ŵanthu 3 miliyoni, kusazgapo Ŵaisrayeli na “ŵanthu ŵanandi ŵamitundu yinyake” na Ŵaeguputo ŵanyake, ŵakapona cheruzgo cha Chiuta na kufuma mu Eguputo.—Eks. 12:38.

Viyelezgero vyose ivi, vikulongora kuti nyengo zose Yehova wakuŵapa ŵanthu nyengo yakukwana kuti ŵapulikire machenjezgo ghake. (Doto. 32:4) Chifukwa wuli Chiuta wakaŵachenjezganga? Mpositole Petrosi wakalongosora kuti Yehova “wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (2 Pet. 3:9) Enya, Chiuta wakuŵatemwa ŵanthu. Wakukhumba kuti ŵang’anamuke mtima na kusintha pambere wandize na cheruzgo chake.—Yes. 48:17, 18; Rom. 2:4.

Mazuŵa ghano napo, ŵanthu wose ŵakwenera kupulikira chenjezgo lakuzirwa chomene ilo likupharazgika pa charu chose chapasi. Apo wakaŵa pa charu chapasi, Yesu wakachenjezga kuti charu ichi chizamuparanyika pa “suzgo yikuru.” (Mat. 24:21) Pakuyowoya vya cheruzgo ichi, Yesu wakayowoya mwakupulikikwa makora uchimi uwo ukovwira ŵalondezgi ŵake kumanya ivyo vizamuchitika para suzgo yikuru yili pafupi. Yesu wakayowoya vya vinthu ivyo tikuviwona kuti vikuchitika mazuŵa ghano.—Mat. 24:3-12; Luka 21:10-13.

Mwakukolerana na uchimi wa Yesu, Yehova wakupempha waliyose kuti wajilambike ku muwuso wake. Wakukhumba kuti ŵanthu ŵakupulikira ŵasangwenge na umoyo uwemi sono kweniso ŵazakasange vitumbiko mu charu chiphya cha urunji. (2 Pet. 3:13) Yehova wakukhumba kuti ŵanthu ŵaŵe na chipulikano mu vinthu ivyo wali kulayizga. Wakuŵawovwira kuti ŵaŵe na chipulikano kwizira mu uthenga uwo uzamuponoska umoyo wawo. Uthenga uwu ni “makani ghawemi gha Ufumu,” agho Yesu wakati “ghazamupharazgika mu charu chose chapasi kuti uŵe ukaboni ku mitundu yose.” (Mat. 24:14) Chiuta wasora awo ŵakumusopa mu unenesko kuti ndiwo ŵachitire “ukaboni” uthenga wake, mu vyaru 240. Yehova wakukhumba ŵanthu ŵanandi ŵapulikire chenjezgo na kuzakapona cheruzgo chake cha urunji.—Zef. 1:14, 15; 2:2, 3.

Ukaboni ukulongora kuti nyengo zose Yehova wakupeleka nyengo yakukwana kuti ŵanthu ŵapulikire machenjezgo ghake. Ntheura fumbo lakuzirwa ndakukhwaskana na nyengo iyo wakupeleka yayi. M’malo mwake, fumbo lakuzirwa ndakuti: Kasi ŵanthu ŵapulikirenge chenjezgo la Chiuta apo kuchali nyengo? Ntheura ise pakuŵa ŵanthu awo ŵakupharazga chenjezgo la Chiuta, mphanyi talutilira kovwira ŵanthu ŵanandi kuti ŵazakapone umaliro wa charu ichi.