1. Kasi Yehova wangachita vichi kuti wafiske khumbo lake?

YEHOVA wangaŵa chilichose icho wakhumba mwakuti wafiske khumbo lake. Mwachiyelezgero, Yehova ni Msambizgi, Msanguluski, na Mupharazgi. Iyi ni milimo yake yichoko waka. (Yes. 48:17; 2 Kor. 7:6; Gal. 3:8) Ndipouli, kanandi wakugwiliskira ntchito ŵanthu kuti wafiske khumbo lake. (Mat. 24:14; 28:19, 20; 2 Kor. 1:3, 4) Yehova wangatipa vinjeru na nkhongono izo tikukhumbikwira kuti watizgore icho iyo wakhumba kuti tifiske khumbo lake. Nakuti Ŵanthu ŵanandi ŵakusanda vya Baibolo ŵakusachizga kuti ivi ndivyo zina la Yehova likung’anamura.

2. (a) Chifukwa wuli nyengo zinyake tingakayika kuti Yehova wangatigwiliskira ntchito? (b) Kasi tidumbiskanenge vichi mu nkhani iyi?

² Tose tikukhumba kuti Yehova watigwiliskire ntchito pakufiska khumbo lake, kweni ŵanyake ŵakukayika usange Yehova wangaŵagwiliskira nadi ntchito. Chifukwa wuli? Ŵakuwona kuti ŵakuchita vinandi yayi chifukwa cha uchekuru, umo vinthu viliri pa umoyo wawo, panji ŵakuwona kuti ŵalije maluso. Apo ŵanyake ŵakuwona kuti ŵakuchita kale vinandi ndipo palije chifukwa chakuti ŵasazgireko uteŵeti wawo. Mu nkhani iyi, tiwonenge umo Yehova wangatovwilira kuti tifiske khumbo lake. Tiwonengeso viyelezgero vya mu Baibolo, ivyo vikulongora umo Yehova wakaŵapira ŵateŵeti ŵake, ŵanalume na ŵanakazi wuwo, khumbo na nkhongono kuti ŵachite ivyo iyo wakukhumba. Paumaliro, tiwonenge ivyo tingachita kuti Yehova watigwiliskire ntchito.

3. Kuyana na ivyo vili pa Ŵafilipi 2:13, kasi Yehova wangatipa wuli khumbo kuti tichite ivyo iyo wakukhumba?

³ Ŵazgani Ŵafilipi 2:13. * Yehova wangatipa khumbo kuti tichite ivyo wakukhumba. Kasi wakuchita wuli? Mwachiyelezgero, tingamanya kuti mu mpingo mukukhumbikwira wovwiri unyake. Panji ŵalara ŵangaŵazga kalata yakufuma ku ofesi ya munthavi yakutimanyiska kuti ku malo ghanyake kukhumbikwa wovwiri. Ivi vingatipangiska kujifumba kuti, ‘Kasi ningachita wuli kuti novwirepo?’ Panji tapika uteŵeti uwo ukuwoneka nga ngwakusuzga ndipo tikufipa mtima usange tingawufiska. Panji tati taŵazga mavesi ghanyake mu Baibolo, tingajifumba kuti, ‘Kasi ningalondezga wuli ivyo naŵazga na kovwira navyo ŵanji?’ Yehova watichichizgenge yayi kuti tichitepo kanthu. Kweni para wawona kuti tikughanaghanira ivyo ise tingachitapo, wangatipa khumbo kuti tichite ivyo tikughanaghana.

4. Kasi Yehova wangatipa wuli nkhongono kuti tichite ivyo iyo wakukhumba?

⁴ Yehova wangatipaso nkhongono kuti tichite khumbo lake. (Yes. 40:29) Kasi wangachita wuli? Wangatipa mzimu utuŵa kuti tisazgireko luso lwithu ulo tili nalo kale. (Eks. 35:30-35) Kwizira mu gulu lake, Yehova wangatisambizga umo tingachitira milimo yinyake. Para mukumanya makora yayi umo mungachitira ntchito yinyake, pemphani wovwiri. Kweniso nyengo yiliyose lombani kwa Adada ŵinu ŵakuchanya kuti ŵamupani “nkhongono zakuluska zakawiro.” (2 Kor. 4:7; Luka 11:13) Mu Baibolo muli viyelezgero vinandi vya umo Yehova wakawovwilira ŵanalume na ŵanakazi kuti ŵaŵe na khumbo kweniso nkhongono kuti ŵachite khumbo lake. Apo tikusambira zinyake mwa nkhani izi, ghanaghanirani umo Yehova wangamovwilirani kuti namwe muchite vinthu nga umo ŵanthu aŵa ŵakachitira.

5. Kasi tikusambirapo vichi pa umo Yehova wakagwiliskira ntchito Mozesi kuti waponoske ŵanthu ŵake?

⁵ Yehova wakawovwira Mozesi kuti waponoske Ŵaisrayeli. Kweni mphawuli apo Yehova wakamugwiliskira ntchito? Kasi pakaŵa panyengo iyo Mozesi wakajiwonanga kuti ngwakwenelera chifukwa chakuti “wakasambizgika vinjeru vyose vya Ŵaeguputo”? (Mil. 7:22-25) Yayi, Yehova wakamugwiliskira ntchito Mozesi wati wamovwira kuti waŵe munthu wakujiyuyura na wakuzika. (Mil. 7:30, 34-36) Yehova wakamupa Mozesi chikanga kuti wakayowoye na themba lankhongono chomene ku Eguputo. (Eks. 9:13-19) Kasi tikusambirapo vichi pa umo Yehova wakagwiliskira ntchito Mozesi? Yehova wakugwiliskira ntchito ŵanthu awo ŵakulongora mikhaliro yake na kuthemba iyo.—Fil. 4:13.

6. Kasi tikusambirapo vichi pa umo Yehova wakagwiliskira ntchito Barazilayi kuti wawovwire Themba Davide?

⁶ Vyaka vinandi vikati vyajumphapo, Yehova wakagwiliskiraso ntchito Barazilayi kuti wawovwire Themba Davide. Apo Davide na ŵanthu ŵake ŵakachimbiranga Abisalomu, ‘njara yikaŵakoma, ŵakavuka ndipo ŵakaŵa na nyota.’ Pamoza na ŵanyake, Barazilayi, uyo wakaŵa muchekuru, wakaŵika umoyo wake pangozi kuti wawovwire Davide na ŵanthu ŵake. Barazilayi wakaghanaghanapo yayi kuti Yehova wangamugwiliskira ntchito yayi chifukwa chakuti wakaŵa muchekuru. M’malo mwake, wakapeleka ivyo wakaŵa navyo kuti wawovwire ŵateŵeti ŵa Chiuta awo ŵakakhumbikwiranga wovwiri. (2 Sam. 17:27-29) Kasi tikusambirapo vichi? Kwali tili ŵachekuru panji yayi, Yehova wangatigwiliskira ntchito kuti tovwire ŵabali na ŵadumbu ŵithu, ŵa mu charu chithu panji ŵa mu vyaru vinyake awo ŵakukhumbikwira wovwiri. (Zinth. 3:27, 28; 19:17) Nanga vingaŵa kuti  tingaŵawovwira mwakudunjika yayi, kweni tingaponya ndalama mu bokosi la vyawanangwa vyakovwira ntchito ya pa charu chose, kuti ŵabali na ŵadumbu ŵithu ŵawovwirike usange ŵakukhumba wovwiri.—2 Kor. 8:14, 15; 9:11.

7. Kasi Yehova wakamugwiliskira wuli ntchito Simiyoni, ndipo chifukwa wuli tikukhozgeka?

⁷ Mwanalume munyake wakugomezgeka Simiyoni uyo wakaŵa muchekuru wakakhalanga ku Yerusalemu. Yehova wakamulayizga kuti wafwenge yayi m’paka wawone dankha Mesiya. Layizgo ili likwenera kuti likamukhozga chomene Simiyoni, pakuti wakalindilira Mesiya nyengo yitali. Yehova wakamutumbika chifukwa cha chipulikano na kuzizipizga kwake. Zuŵa linyake, “mwakulongozgeka na nkhongono ya mzimu,” wakiza mu tempile. Wakawona Yesu apo wakaŵa bonda, ndipo Yehova wakamugwiliskira ntchito Simiyoni kuti wachime vya Yesu uyo wakazakaŵa Khristu. (Luka 2:25-35) Nangauli Simiyoni wakwenera kuti wakafwa pambere Yesu wandambe uteŵeti wake wa pa charu chapasi, kweni wakawonga chomene mwaŵi uwo wakaŵa nawo. Ndipo wakulindilira vinthu viwemi munthazi. Mu charu chiphya, mwanalume wakugomezgeka uyu wazamuwona umo Yesu wazamutumbikira mbumba zose za pa charu chapasi. (Gen. 22:18) Nase tikuwonga chomene Yehova chifukwa cha mwaŵi uwo watipa wakuti timuteŵetere.

8. Kasi Yehova wangatigwiliskira wuli ntchito nga umo wakachitira na Baranaba?

⁸ Mu nyengo ya Ŵakhristu ŵakwambilira, mwanalume munyake zina lake Yosefe wakakhumbisiska kuti Yehova wamugwiliskire ntchito. (Mil. 4:36, 37) Ŵapositole ŵakamuthya zina lakuti Baranaba, kung’anamura, “Mwana wa Chisangulusko,” panji chifukwa chakuti wakasanguluskanga ŵanyake. Mwachiyelezgero, Saulosi wati waŵa Mkhristu, ŵabali ŵanandi ŵakamopanga, chifukwa pakwamba wakatambuzganga chomene awo ŵakagomezganga mwa Yesu. Ndipouli, Baranaba wakamusanguluska na kumovwira Paulosi, ndipo Paulosi wakwenera kuti wakawonga chomene lusungu ulo wakamulongora. (Mil. 9:21, 26-28) Pamanyuma, ŵalara mu Yerusalemu ŵakawona kuti ŵabali awo ŵakakhalanga kutali, nga nkhu Antiyoke na Siriya, ŵakakhumbikwiranga kukhozgeka. Kasi ŵakatuma njani? Baranaba. Apa ŵakasankha makora nadi. Tikuŵazga kuti Baranaba “wakamba kuŵakhwimiska wose kuti ŵalutilire kugomezgeka kwa Fumu na mtima wawo wose.” (Mil. 11:22-24) Mazuŵa ghano napo, Yehova wangatovwira kuti tisanguluske Ŵakhristu ŵanyithu. Mwachiyelezgero, wangatigwiliskira ntchito kuti tipembuzge awo ŵakutemweka ŵawo ŵali kufwa. Wangatipangiskaso kuti tikawone panji timbire foni mulwari, panji uyo wakusuzgika maghanoghano kuti timukhozge. Kasi muzomerezgenge kuti Yehova wamugwiliskirani ntchito nga umo wakachitira na Baranaba?—1 Tes. 5:14.

9. Kasi tikusambirapo vichi pa umo Yehova wakawovwilira mubali munyake zina lake Vasily kuti waŵe muliska muwemi?

⁹ Yehova wakawovwira mubali munyake zina lake Vasily kuti waŵe muliska muwemi. Vasily wakimikika kuŵa mulara apo wakaŵa na vyaka 26. Wakaŵa na wofi ndipo wakajiwonanga kuti ngwambura kwenelera kovwira ŵabali na ŵadumbu mwauzimu, chomenechomene awo ŵali na masuzgo. Ndipouli, wakasambizgika makora na ŵalara awo ŵakaŵa kuti ŵateŵetera nyengo yitali. Kweniso Sukulu ya Uteŵeti wa Ufumu nayo yikamovwira. Vasily wakayezgayezga kumazga wofi. Mwachiyelezgero, wakalemba vilato vichokovichoko ivyo wakakhumbanga kufiska. Apo wakafiskanga vilato ivi, pachoko na pachoko wakamba kuleka kopa. Mubali uyu sono wakuti: “Ivyo nkhawopanga panyengo iyo, sono ndivyo vikunipa chimwemwe chomene. Nkhukondwa chomene para Yehova wanovwira kusanga lemba lakwenelera kuti novwire nalo mubali panji mudumbu mu mpingo.”  Para mungachita nga ni Vasily ndipo mukukhumbisiska kuti Yehova wamungwiliskirani ntchito, wamovwiraninge kuti muchite vinandi mu mpingo.

10. Kasi Abigelu wakachita vichi, ndipo tikusambirako vichi kwa iyo?

¹⁰ Davide na ŵanalume ŵake, ŵakachimbiranga Themba Sauli, ndipo ŵakakhumbikwiranga wovwiri. Ŵanalume awo ŵakaŵa na Davide ŵakapempha chakurya kwa Muisrayeli munyake musambazi zina lake Nabala. Ŵakawona kuti ntchakwenelera kumupempha, chifukwa ndiwo ŵakavikiliranga mskambo wa Nabala mu mapopa. Kweni Nabala wakakana kuŵapa chilichose. Davide wakakwiya chomene ndipo wakakhumbanga kukoma Nabala na mwanalume waliyose wa mu nyumba yake. (1 Sam. 25:3-13, 22) Ndipouli, muwoli wa Nabala, Abigelu, uyo wakaŵa wakutowa wakaŵa waumanyi. Wakalongora chikanga chikuru chomene, wakawa pa malundi gha Davide na kumupempha kuti waleke kuŵa na mulandu wa ndopa mwakukoma Nabala na ŵanalume ŵake. Abigelu wakayowoya mwamahara, wakaphalira Davide kuti waleke nkhani iyi mu mawoko gha Yehova. Ivyo wakayowoya na kuchita vikamukhwaska chomene Davide. Ndipo wakamanya kuti Yehova ndiyo wakatuma Abigelu. (1 Sam. 25:23-28, 32-34) Yehova wakamugwiliskira ntchito Abigelu chifukwa chakuti wakaŵa na mikhaliro yiwemi. Mwakuyana waka, ŵadumbu awo mbaluso kweniso mbamahara Yehova wangaŵagwiliskira ntchito kuti ŵakhozge mabanja ghawo na ŵanji mu mpingo.—Zinth. 24:3; Tito 2:3-5.

11. Kasi ŵana ŵanakazi ŵa Shalumu ŵakachita vichi, ndipo mbanjani awo ŵakuchita mwakuyana waka mazuŵa ghano?

¹¹ Vyaka vinandi vikati vyajumphapo, ŵana ŵanakazi ŵa Shalumu, ŵakaŵa pa gulu la ŵanthu awo Yehova wakaŵagwiliskira ntchito kuzengaso viliŵa vya Yerusalemu. (Neh. 2:20; 3:12) Nangauli adada ŵawo ŵakaŵa karonga, ŵana ŵanakazi ŵa Shalumu ŵakaŵa ŵakukhumbisiska kuchita ntchito yinonono kweniso yakuŵika umoyo pangozi. (Neh. 4:15-18) Ŵakaŵa nga mbanalume ŵakuzirwa ŵa ku Tekowa yayi, awo “ŵakakhumba chara kujiyuyura na kuchitako mulimo.” (Neh. 3:5) Ghanaghanirani waka chimwemwe icho ŵana ŵanakazi ŵa Shalumu ŵakaŵa nacho ntchito yakuzenga viliŵa yikati yamara mu mazuŵa 52 pera. (Neh. 6:15) Mazuŵa ghano napo, ŵadumbu ŵakujipeleka ŵakukondwa kuchitira Yehova uteŵeti wakupatulika, nga ngwakuzenga na kunozga nyumba zakusoperamo. Nakuti ŵadumbu ŵaluso, ŵamwamphu, na ŵakugomezgeka aŵa ndiwo tikukhumba kuti ntchito yithu yichitike.

12. Kasi Yehova wangatigwiliskira wuli ntchito nga umo wakachitira na Tabita?

¹² Yehova wakawovwira Tabita kuti ‘wachitenge milimo yiwemi na kupeleka vyawanangwa,’ chomenechomene ku vyokoro. (Mil. 9:36) Chifukwa chakuti wakaŵa wakupa na walusungu, ŵanandi ŵakamulira wati wafwa. Kweni ŵakakondwa chomene mpositole Petrosi wati wamuwuska. (Mil. 9:39-41) Kasi tikusambirako vichi kwa Tabita? Kwali tili ŵalara msinkhu panji yayi, ŵanalume panji ŵanakazi, tingachita vinthu ivyo vingawovwira ŵabali na ŵadumbu ŵithu.—Heb. 13:16.

13. Kasi mudumbu munyake zina lake Ruth Yehova wakamugwiliskira wuli ntchito, ndipo paumaliro wakayowoya vichi?

¹³ Mudumbu munyake zina lake Ruth uyo wakaŵa wasoni wakakhumbanga kuzakaŵa mishonale. Apo wakaŵa muchoko, para wakupharazga nyumba na nyumba wakagaŵiranga waka mathirakiti mwaluŵiroluŵiro. Mudumbu uyu wakati “vikanikondweskanga chomene.” Ndipouli, vikamusuzganga chomene kuti ŵanthu waŵalongosolere vya Ufumu wa Chiuta. Nangauli wakaŵa wasoni, Ruth wakamba upayiniya wanyengozose apo wakaŵa na vyaka 18. Mu 1946,  wakanjira Sukulu ya Giliyadi ndipo pamanyuma wakateŵetera ku Hawaii na ku Japan. Yehova wakamugwiliskira ntchito pa mulimo wakupharazga makani ghawemi mu vyaru ivi. Wati wapharazga pafupifupi vyaka 80, Ruth wakayowoya kuti: “Yehova wanikhozga chomene. Wanovwira kumazga soni. Nili na chigomezgo chose kuti Yehova wangagwiliskira ntchito waliyose uyo wali na chipulikano mwa iyo.”

14. Kuyana na Ŵakolose 1:29, kasi tikwenera kuchita vichi para tikukhumba kuti Yehova watigwiliskire ntchito?

¹⁴ Kwamba kale, Yehova wagwiliskira ntchito ŵateŵeti ŵake munthowa zinandi. Kasi imwe wamugwiliskireninge ntchito munthowa wuli? Vyose vikuthemba pa umo mukuchitira. (Ŵazgani Ŵakolose 1:29.) Para mukukhumbisiska kuti Yehova wamugwiliskirani ntchito, wangamuzgorani kuti muŵe mupharazgi wamwamphu, msambizgi muwemi, msanguluski, munthu waluso pa ntchito, wakukhozga ŵanyinu, panji wangamuzgorani chilichose icho wakhumba kuti wafiske khumbo lake.

15. Kuyana na 1 Timote 4:12, 15, kasi ŵabali ŵachinyamata ŵakwenera kulomba wovwiri wuli kwa Yehova?

¹⁵ Wuli pakuyowoya vya ŵabali ŵachinyamata? Pakukhumbikwa ŵabali ŵanandi ŵankhongono kuti ŵaŵe ŵateŵeti ŵakovwira mu mpingo. Mu mipingo yinandi ŵalara ndiwo mbanandi kuluska ŵateŵeti ŵakovwira. Kasi imwe ŵabali ŵachinyamata mungatemwa yayi kuchita vinandi mu mpingo? Ŵabali ŵanyake ŵakuti, “Ine nkhukhumba kuti niŵe mupharazgi waka.” Para ndimo namwe mukughanaghanira, lombani Yehova kuti wamovwirani kuti muŵe na khumbo lakuti muzakaŵe muteŵeti wakovwira kweniso kuti muchite vyose ivyo mungafiska kuti mumuteŵetere. (Muph. 12:1) Tikukhumba wovwiri winu.—Ŵazgani 1 Timote 4:12, 15.

16. Kasi tikwenera kulomba vichi kwa Yehova, ndipo chifukwa wuli?

¹⁶ Yehova wangamuzgorani chilichose icho wakhumba kuti wafiske khumbo lake. Ntheura muphalirani kuti muli na khumbo lakuti muchite ntchito yake, mulombani kuti wamupani nkhongono izo mukukhumbikwira. Kwali ndimwe ŵalara msinkhu panji yayi, gwiliskirani ntchito nyengo, nkhongono, na ivyo muli navyo kuti muchindikire Yehova. (Muph. 9:10) Mungazomerezganga yayi kuti wofi panji kujikayikira vimutondeskani kuchita vinandi pakuteŵetera Yehova. Ni mwaŵi ukuru nadi kuchita chilichose icho tingafiska kuti tichindike Dada withu wachitemwa Yehova.