1. Kasi chikung’anamurachi kuŵa na “njara yauzimu,” ndipo vikukolerana wuli na kuŵa wakukondwa?

 CHIMWEMWE chanadi ni maghanoghano ghakujipulika waka kuŵa wakukondwa yayi, agho ghakwiza na kuluta. Kweni munthu wangaŵa nacho chimwemwe chanadi kwa umoyo wake wose. Kasi wangachisanga wuli? Yesu wakalongosora pa Upharazgi wake wa pa Phiri kuti: “Mbakukondwa awo ŵakumanya kuti ŵali na njara yauzimu.” (Mat. 5:3) Yesu wakamanya kuti ŵanthu ŵali kulengeka na khumbo likuru la kumumanya Mlengi wawo Yehova na kumusopa. Ndipo para munthu wali na khumbo ili, ndikuti wali na “njara yauzimu.” Pakuti Yehova ni “Chiuta wakukondwa,” awo ŵakumusopa nawo ŵangaŵaso ŵakukondwa.—1 Tim. 1:11.

2-3. (a) Kasi Yesu wakati mbanjani ŵanyake awo ŵangaŵa ŵakukondwa? (b) Kasi tidumbiskanenge vichi mu nkhani iyi, ndipo chifukwa wuli ntchakukhumbikwa kuchita nthena?

² Kasi para tilije masuzgo ghalighose ndipo pekha tingaŵa ŵakukondwa? Yayi. Pa upharazgi wake, Yesu wakayowoya fundo yinyake yakuzizwiska chomene. Iyo wakayowoya kuti nanga ni “awo ŵakutengera” panji chifukwa cha kujiyimba mulandu pa zakwananga zawo, panji chifukwa chakuti ŵali na masuzgo ghakuru, nawo ŵangaŵa ŵakukondwa. Wakayowoyaso kuti “awo ŵakutambuzgika chifukwa cha urunji,” panji awo ‘ŵakutombozgeka’ chifukwa cha kuŵa ŵalondezgi ŵa Khristu, nawoso ŵangaŵa ŵakukondwa. (Mat. 5:4, 10, 11) Kweni kasi ŵangaŵa wuli ŵakukondwa zanadi uku ŵakusangana na masuzgo ghose agha?

³ Apa Yesu wakasambizganga kuti munthu wakuŵa wakukondwa zanadi chifukwa chakuti walije masuzgo yayi pa umoyo wake, kweni chifukwa cha kukhorweska njara yake yauzimu na kuŵa paubwezi na  Chiuta. (Yak. 4:8) Kweni kasi tingachita wuli? Mu nkhani iyi, tidumbiskanenge vinthu vitatu ivyo tikwenera kuchita kuti tiŵe ŵakukondwa zanadi.

4. Kasi ntchinthu wuli chakwamba icho tikwenera kuchita kuti tiŵe ŵakukondwa zanadi? (Salimo 1:1-3)

⁴ CHINTHU CHAKWAMBA: Kuti tiŵe ŵakukondwa zanadi, tikwenera kurya chakurya chauzimu. Ŵanthu na vinyama wuwo, wose ŵakukhumbikwira chakurya chakuthupi kuti ŵaŵe na umoyo. Kweni mbanthu pera awo ŵangarya chakurya chauzimu. Ndipo tikukhumbikwira nadi chakurya ichi. Lekani Yesu wakati: “Munthu wakhalenge wamoyo na chingwa pera chara, kweni na lizgu lililose ilo likufuma mu mulomo wa Yehova.” (Mat. 4:4) Ntheura, tingazomerezganga yayi kuti zuŵa lijumphepo kwambura kurya chakurya chauzimu panji kuti kwambura kuŵerenga Mazgu gha Chiuta, Baibolo. Wamasalimo wakati: ‘Wakukondwa ni munthu uyo wakukondwa na dango la Yehova kweniso uyo wakuliŵazga muhanya na usiku.’—Ŵazgani Salimo 1:1-3.

5-6. (a) Kasi tingasambira vichi mu Baibolo? (b) Kasi kuŵazga Baibolo kungatovwira wuli?

⁵ Kwizira mu Baibolo, mwachitemwa Yehova watipa fundo zakuzirwa izo zingatovwira kuti tiŵe ŵakukondwa. Tingasambira vyakukhwaskana na khumbo lake ilo wali nalo kwa ise. Tingasambiraso umo tingaŵira paubwezi na iyo kweniso ivyo tingachita kuti watigowokere zakwananga zithu. Kweniso tingasambiraso vya chigomezgo chiwemi cha ivyo watilayizga munthazi. (Yer. 29:11) Unenesko uwo tingasambira mu Baibolo, ungatovwira kuti tiŵe ŵakukondwa zanadi.

⁶ Tikumanya kuti Baibolo lili na ulongozgi uwo ungatovwira pa umoyo withu wa zuŵa na zuŵa. Para tingalondezga ulongozgi uwu, tingaŵa ŵakukondwa zanadi. Ntheura para nyengo yiliyose nkhongono zamumalirani chifukwa cha masuzgo,  malirani nyengo yinu yinandi pa kuŵazga Mazgu gha Yehova na kughanaghanirapo. Yesu wakati: “Ŵakukondwa ni awo ŵakupulika mazgu gha Chiuta na kughasungilira!”—Luka 11:28.

7. Kasi ntchivichi chingamovwirani kuti mupindurenge na nyengo iyo mukumalira pa kuŵerenga Mazgu gha Chiuta?

⁷ Para mukuŵazga Mazgu gha Chiuta, muŵenge na nyengo yakukwana mwakuti mukondwenge na ivyo mukuŵerenga. Kuti tipulikiske, kasi vyanthena ivi vili kumuchitikiranipo? Tiyelezgere kuti munthu wamuphikirani chakurya icho mukutemwa. Kweni chifukwa chakuti mukuchimbilira, panji mukughanaghana vinyake, mbwe mukurya waka mwaluŵiroluŵiro kwambura kusumba kuti mupulike umo chikunowera. Mwati mwamalizga kurya, mukuwona kuti mwangurya mwakuchimbilira, ndipo mukuwona kuti mphanyi mwangurya mwakuzikira kuti musangwe nacho chakurya. Vyanthena ivi vingayana waka na para mukuŵerenga Baibolo. Nyengo zinyake mungaŵazga waka mwaluŵiroluŵiro mwakuti mungatondeka kupulikiska na kusangwa na ivyo mukusambira mu Baibolo. Kweni ŵani na nyengo yakukwana yakusambilira Mazgu gha Chiuta, ndipo para mukuŵerenga, muŵenge nga mukuwona ivyo vikachitikanga, kughanaghanira za ŵanthu awo mukuŵazga umo ŵakajipulikiranga, kweniso na kughanaghanira nkhani yose iyo mwaŵerenga. Para muchitenge nthena, muŵenge ŵakukondwa zanadi.

8. Kasi “muzga wakugomezgeka na wavinjeru” wakufiska wuli udindo wake? (Wonaniso mazgu ghamusi.)

⁸ Yesu wakimika “muzga wakugomezgeka na wavinjeru” kuti wapelekenge chakurya chauzimu panyengo yakwenelera ndipo tikuryeskeka makora nadi mwauzimu. * (Mat. 24:45) Chakurya chauzimu chose icho muzga wakugomezgeka wakupeleka, chomene chikufuma mu Baibolo. (1 Tes. 2:13) Ntheura chakurya chauzimu ichi chikutovwira kumanya maghanoghano gha Yehova agho wakutivumbulira mu Baibolo. Lekani tikuŵazga magazini gha Gongwe la Mulinda na Wukani! na nkhani zinyake pa jw.org. Tikunozgekera maungano gha mukati mwa sabata na gha kuumaliro kwa sabata. Ndipo mwezi uliwose tikuwonelera pulogiramu ya JW Broadcasting^® usange yilipo. Para nyengo zose tikuwoneseska kuti tikuŵazga na kusambira Baibolo, mbwenu tichitengeso chinthu chachiŵiri icho chingatovwira kuti tiŵe ŵakukondwa zanadi.

9. Kasi ntchinthu wuli chachiŵiri icho chingatovwira kuti tiŵe ŵakukondwa zanadi?

⁹ CHINTHU CHACHIŴIRI: Kuti tiŵe ŵakukondwa zanadi, tikwenera kupulikira fundo za Yehova. Wamasalimo wakalemba kuti: “Ngwakukondwa waliyose uyo wakopa Yehova, uyo wakwenda mu nthowa zake.” (Sal. 128:1) Kopa Yehova, chikung’anamura kumuchindika na kugega kuchita chilichose icho chingamukwiyiska. (Zinth. 16:6) Ntheura tikulutilira kuchita chilichose icho tingafiska kuti tilondezgenge fundo za Yehova pa nkhani ya icho ntchiwemi na chiheni, nga umo Baibolo likuyowoyera. (2 Kor. 7:1) Tiŵenge ŵakukondwa zanadi para tikuchita vinthu ivyo Yehova wakutemwa, na kutinkha vinthu ivyo wakutinkha.—Sal. 37:27; 97:10; Rom. 12:9.

10. Kuyana na Ŵaroma 12:2, kasi tili na udindo wuli?

¹⁰ Ŵazgani Ŵaroma 12:2. Munthu wangamanya kuti Yehova ndiyo wali na mazaza ghakutiphalira icho ntchiwemi na icho ntchiheni. Kweni wakweneraso kusankha yekha usange walondezgenge fundo za Chiuta. Mwachiyelezgero, munthu wangamanya kuti boma ndilo lili na mazaza ghakuŵika malire gha sipidi iyo galimoto yiliyose yikwenera kwendera pa msewu. Kweni nyengo zinyake wangakhumba yayi kupulikira dango ili. Ntheura wangamba kwendera sipidi yikuru chomene kuluska iyo boma lili kuŵika. Nase kwizira mu vyakuchita vithu, tikulongora kuti tikugomezga na mtima wose kuti kulondezga fundo za Yehova ndicho chinthu chiwemi chomene pa umoyo withu. (Zinth. 12:28) Davide ndimo wakajipulikiranga. Lekani pakuyowoya za Yehova wakati: “Mukunimanyiska nthowa ya umoyo. Nkhuŵa  na chimwemwe chikuru pamaso pinu. Mu woko linu lamalyero muli kukondwa muyirayira.”—Sal. 16:11.

11-12. (a) Para tasuzgika panji kugongowa, kasi tikwenera kuŵa maso na vichi? (b) Kasi mazgu gha pa Ŵafilipi 4:8 ghangatovwira wuli pa nkhani ya kusankha vyakusanguluska?

¹¹ Para tasuzgika panji kugongowa, nyengo zinyake tingaghanaghana vya kuchita chinthu chinyake icho chingatovwira kuti tileke kwenjerwa chomene vya masuzgo ghithu. Ntchakupulikikwa kuchita nthena. Kweni tikwenera kuŵa maso kuti tileke kuchita chinthu chilichose icho Yehova wakutinkha.—Efe. 5:10-12, 15-17.

¹² Mu kalata yake yakuluta ku Ŵafilipi, mpositole Paulosi wakachiska Ŵakhristu kuti ŵalutilire kughanaghanira vinthu ivyo ni “vyaurunji, . . . vituŵa, . . . vyakutemweka, . . . [na vya] nkharo yiliyose yiwemi.” (Ŵazgani Ŵafilipi 4:8.) Nangauli Paulosi pakulemba ulongozgi uwu, chomene wakawulemberanga pa nkhani ya vyakusanguluska yayi, kweni ivyo wakalemba vingatovwira pa vyakusanguluska ivyo tingasankha. Yezgani kuchita ichi: Palipose apo pali lizgu lakuti “vinthu” mu vesi ili, ŵikanipo lizgu lakuti “sumu,” “mafilimu,” “mabuku,” panji “magemu gha mavidiyo.” Para mungachita nthena vingamovwirani kumanya vyakusanguluska ivyo vingaŵa vyakuzomerezgeka kwa Chiuta na ivyo vingaŵa vyambura kuzomerezgeka. Tikwenera kulondezga fundo zapachanya za Yehova. (Sal. 119:1-3) Para tichitenge nthena, tiŵenge na njuŵi yituŵa ndipo tingachitaso chinthu chakulondezgapo icho chingatovwira kuŵa ŵakukondwa zanadi.—Mil. 23:1.

13. Kasi ntchinthu wuli chachitatu icho chingatovwira kuŵa ŵakukondwa zanadi? (Yohane 4:23, 24)

¹³ CHINTHU CHACHITATU: Muwoneseskenge kuti kusopa Yehova kuŵenge pakwamba mu umoyo winu. Pakuŵa Mlengi withu, Yehova ngwakwenelera nadi kumusopa. (Chivu. 4:11; 14:6, 7) Ntheura chinthu chakuzirwa chomene pa umoyo withu, nkhumusopa munthowa iyo wakukhumba kuti timusoperenge, uko nkhumusopa “mu mzimu na mu unenesko.” (Ŵazgani Yohane 4:23, 24.) Mzimu utuŵa wa Chiuta ndiwo ukwenera kutilongozga apo tikumusopa mwakuti kusopa kwithu kukoleranenge na unenesko uwo ukusangika mu Mazgu ghake. Tikwenera kudangizga kusopa Yehova, nanga ni para tikukhala mu charu icho mulimo withu ngwakukanizgika panji muli bani. Pasono nthena, ŵabali na ŵadumbu ŵithu ŵakujumpha 100 ŵali kujalirika chifukwa chakuti Mbakaboni ŵa Yehova. * Nangauli vili nthena, ŵakukondwa kuchita chilichose icho ŵangakwaniska kuti ŵalombe, kusambira, na kuphalira ŵanji vyakukhwaskana na Chiuta withu na Ufumu wake. Para ŵanthu ŵakutisuska panji kutitambuzga, tikuŵa ŵakukondwa kumanya kuti Yehova wakutovwira kuzizipizga, ndiposo kuti wazamutitumbika.—Yak. 1:12; 1 Pet. 4:14.

14. Kasi ntchivichi chikachitikira mubali munyake wachiwukirano ku Tajikistan, ndipo chifukwa wuli?

¹⁴ Ivyo vili kuchitikirapo ŵabali na ŵadumbu pa umoyo wawo, vikutisimikizgira kuti vinthu vitatu ivyo tadumbiskana apa, vikovwira nadi kuti munthu waŵe wakukondwa zanadi nanga wangakumana na masuzgo wuli. Wonani ivyo vikachitikira Jovidon Bobojonov wa ku Tajikistan, wa vyaka 19, uyo wakakana kunjira usilikari. Pa Okutobala 4, 2019, ŵakamukora kunyumba kwake na kumujalira mu jele kwa myezi, ndipo ŵakachitanga nayo vinthu nga ntchigeŵenga. Vinthu vyambura urunji ivyo vikamuchitikira apa, vikapharazgika pa mawayilesi, TV, na mu manyuzipepara mu vyaru vinandi. Ŵakapharazga kuti watimbika na chilato chakuti ŵamuchichizge kuti wapange chilapo chakuti wanjira usilikari kweniso kuti wavware yunifomu ya usilikari. Kufuma apo, khoti likagamura kuti wali na mulandu ndipo likamutumizga ku msasa wakuyuzgirako ŵanthu m’paka apo pulezidenti wa charu icho wakamugowokera na kulangura kuti ŵamufumiske. Nyengo yose  iyo wakaŵira ku msasa wakuyuzgirako ŵanthu, Jovidon wakalutilira kuŵa wakugomezgeka ndipo wakaŵa wakukondwa. Kasi ntchivichi chikamovwira? Iyo wakalutilira kukhorweska njara yake yauzimu.

15. Kasi Jovidon wakachitoranga nkhu chakurya chauzimu apo wakaŵa mu jele?

¹⁵ Apo wakaŵa ku jele, Jovidon wakalutilira kurya chakurya chauzimu nangauli wakaŵavya Baibolo panji buku lililose lakulongosora Baibolo. Ipo fumbo ndakuti, vikenda wuli pera kuti waryenge chakurya chauzimu? Ŵabali na ŵadumbu awo ŵakamupanga chakurya chakuthupi ŵakalembanga lemba la zuŵa pa majumbo agho ŵakamunyamulirangamo vyakurya. Ntheura wakaŵa na mwaŵi wakuŵazga Baibolo na kughanaghanirapo zuŵa lililose. Wati wafumiskika mu jele, wakayowoya ulongozgi uwu ku awo ŵandasanganepo na masuzgo ghakuru. Wakati: “Ntchakuzirwa chomene kuti mugwiliskirenge ntchito wanangwa winu wakusopa mwakukwana, pakukhozga ubwezi winu na Yehova mwa kuŵazga Mazgu ghake na mabuku ghithu ghakulongosora Baibolo.”

16. Kasi Jovidon wakaghanaghaniranga vichi?

¹⁶ Mubali withu wakalondezganga fundo za Yehova. M’malo mwa kughanaghanira makhumbiro ghaheni na kuchitako nkharo zawakawaka, iyo wakaghanaghaniranga za Yehova kweniso ivyo wakutemwa. Jovidon wakakondwanga na chilengiwa chakutowa cha Yehova. Mulenji uliwose para wawuka, wakapulikanga kulira kwa tuyuni. Nausiku  wakalaŵiskanga mwezi na nyenyezi. Iyo wakati: “Vyawanangwa vyakufuma kwa Yehova ivi vikanovwira kuŵa wakukondwa kweniso kukhozgeka.” Para tikuwongera chakurya chauzimu kweniso vinthu vyakuthupi ivyo Yehova wakutipa, tikuŵa na chimwemwe cha mu mtima, ndipo chimwemwe ichi chingatovwira kuti tizizipizge masuzgo.

17. Kasi mazgu gha pa 1 Petrosi 1:6, 7 ghangawovwira wuli munthu uyo wangaŵa mu suzgo ya nga iyo Jovidon wakasangana nayo?

¹⁷ Jovidon wakaŵikangaso kusopa Yehova pa malo ghakwamba. Iyo wakamanyanga kuti ntchakuzirwa chomene kulutilira kuŵa wakugomezgeka kwa Chiuta waunenesko. Yesu wakati: “Yehova Chiuta wako ndiyo ukwenera kumusopa, ndipo ndiyo pera uyo ukwenera kumuchitira uteŵeti wakupatulika.” (Luka 4:8) Ŵasilikari pamoza na ŵalongozgi ŵawo, ŵakakhumbanga kuti Jovidon waleke chisopa chake. Kweni iyo wakalombanga chomene zuŵa lililose muhanya na usiku, kumuŵeyelera Yehova kuti wamovwire kuleka kuthera, na kulutilira kuŵa wakugomezgeka. Nangauli Jovidon ŵakamuchitira vinthu vyambura urunji kweni wakathera yayi. Ntheura pasono ngwakukondwa chifukwa wali na chinthu chakuzirwa chomene icho wakaŵavya pambere wandakoleke, kutimbika na kuŵikika mu jele. Sono wali na chipulikano chankhongono chomene, chifukwa chipulikano chake chili kuyezgeka.—Ŵazgani 1 Petrosi 1:6, 7.

18. Kasi tingachita wuli kuti tilutilire kuŵa ŵakukondwa zanadi?

¹⁸ Yehova wakumanya ivyo tikukhumbikwira kuti tiŵe ŵakukondwa zanadi. Para mulondezgenge vinthu vitatu ivyo vingamovwirani kuti muŵe ŵakukondwa zanadi, mulutilirenge kuŵa ŵakukondwa nanga mungasangana na masuzgo wuli. Ndipo namwe muyowoyenge kuti: “Ŵakukondwa mbanthu awo Chiuta wawo ni Yehova!”—Sal. 144:15.