NKHANI YAKUSAMBIRA 42
SUMU 103 Ŵaliska Ŵapelekeka Kuŵa Vyawanangwa
Longorani Kuti Mukuwonga Ŵanalume Awo Ŵapelekeka Kuŵa Vyawanangwa
“Apo wakakwelera kuchanya . . . , wakapeleka vyawanangwa mu ŵanthu.”—EFE. 4:8.
FUNDO YIKURU
Umo ŵateŵeti ŵakovwira, ŵalara, na ŵalaŵiliri ŵadera ŵakutovwilira, kweniso umo tingalongolera kuti tikuwonga ivyo ŵanalume ŵakugomezgeka aŵa ŵakuchita.
1. Kasi ni vinthu wuli vinyake ivyo Yesu wali kutichitira?
PALIJE munthu uyo wali kuchitapo vinandi pa kovwira ŵanji kuluska Yesu. Apo wakaŵa pa charu chapasi, wakachitanga minthondwe kuti wawovwire ŵanji. (Luka 9:12-17) Wakatipa chawanangwa chapadera chomene apo wakapeleka umoyo wake chifukwa cha ise. (Yoh. 15:13) Kufuma apo wakawuskikira, Yesu wakulutilira kutovwira. Nga umo wakalayizgira, wali kupempha Yehova kuti watipe mzimu utuŵa kuti utisambizge na kutisanguluska. (Yoh. 14:16, 17, mazgu ghamusi; 16:13) Kwizira pa maungano gha mpingo, Yesu wakulutilira kutipa vyose ivyo tikukhumbikwira kuti tizgore ŵanthu kuŵa ŵasambiri pa charu chose chapasi.—Mat. 28:18-20.
2. Kuyana na Ŵaefeso 4:7, 8, kasi mbanjani awo ni “vyawanangwa mu ŵanthu”?
2 Wonani chawanangwa chinyake icho Yesu wali kutipa. Mpositole Paulosi wakalemba kuti Yesu wati wakwelera kuchanya, “wakapeleka vyawanangwa mu ŵanthu.” (Ŵazgani Ŵaefeso 4:7, 8.) Paulosi wakalongosora kuti Yesu wali kupeleka vyawanangwa ivi kuti viwovwire mpingo munthowa zakupambanapambana. (Efe. 1:22, 23; 4:11-13) Mazuŵa ghano, “vyawanangwa mu ŵanthu” ivi vikusazgapo ŵateŵeti ŵakovwira, ŵalara ŵa mpingo, na ŵalaŵiliri ŵadera. a Mbunenesko kuti ŵanalume aŵa mbambura kufikapo, ntheura nawo ŵakubudiska. (Yak. 3:2) Ndipouli, Fumu yithu Yesu Khristu yikuŵagwiliskira ntchito kuti yitovwire; iwo ni vyawanangwa ivyo wali kutipa.
3. Kasi tose tingachita wuli kuti tovwire ŵabali awo ni “vyawanangwa mu ŵanthu”? Yowoyani chiyelezgero.
3 Yesu wali kuŵapa ŵanalume aŵa mulimo wakuzirwa wa kukhozga mpingo. (Efe. 4:12) Kweni tose tingaŵawovwira kuti ŵafiske mulimo wakuzirwa uwu. Kuti tipulikiske makora fundo iyi, tiyelezgere na mulimo wa kuzenga Nyumba ya Ufumu. Ŵanyake ŵakuzenga ndipo ŵanyake ŵakovwirapo waka mwa kupeleka chakurya, thirasipoti, panji kwizira munthowa zinyake. Mwakuyana waka, tose tingawovwira ŵateŵeti ŵakovwira, ŵalara ŵa mpingo, na ŵalaŵiliri ŵadera kwizira mu ivyo tikuyowoya na kuchita. Tiyeni tiwone umo tikusangira chandulo chifukwa cha kulimbikira kwawo kweniso umo tingalongolera kuwonga iwo na Yesu, uyo wakatipa “vyawanangwa mu ŵanthu” ivi.
ŴATEŴETI ŴAKOVWIRA ŴAKUCHITA “MAUTEŴETI GHAKOVWIRA” CHOMENE
4. Kasi ni ‘mauteŵeti wuli ghanyake ghakovwira’ agho ŵakachitanga ŵateŵeti ŵakovwira mu nyengo ya Ŵakhristu ŵakwambilira?
4 Mu nyengo ya Ŵakhristu ŵakwambilira, ŵabali ŵanyake ŵakimikika kuŵa ŵateŵeti ŵakovwira. (1 Tim. 3:8) Vikuwoneka kuti ndiwo ŵakachitanga “mauteŵeti ghakovwira” agho Paulosi wakalemba. (1 Kor. 12:28) Ntheura vikuwoneka kuti ŵateŵeti ŵakovwira ŵakachitanga milimo yinandi yakuzirwa mwakuti ŵalara ŵaŵikenge mtima wose pa kusambizga na kuliska. Mwachiyelezgero, ŵateŵeti ŵakovwira aŵa ŵakawovwiranga pa kupanga makope gha Malemba panji kugura ivyo vikakhumbikwanga pa mulimo wakupanga makope.
5. Kasi ni mauteŵeti wuli ghanyake ghakovwira agho ŵateŵeti ŵakovwira ŵakuchita mazuŵa ghano?
5 Ghanaghanirani milimo yakuzirwa iyo ŵateŵeti ŵakovwira ŵakuchita mu mpingo winu. (1 Pet. 4:10) Ŵanyake ŵakupika milimo ya kupwelelera maakaunti gha mpingo panji vigaŵa vyakupharazgako, kuchemeska vyakupharazgira na kugaŵira ŵapharazgi, kupwelelera vyakukuzgira mazgu, kuchita ulinda, panji kovwirapo pa kunozga Nyumba ya Ufumu. Milimo yose iyi njakukhumbikwa kuti mpingo wendenge makora. (1 Kor. 14:40) Mwakusazgirapo, ŵateŵeti ŵanyake ŵakovwira ŵakupika vigaŵa pa Ungano wa Uteŵeti na Umoyo Wachikhristu kweniso kudumba nkhani zachisanisani. Muteŵeti wakovwira wangimikika kuti wawovwire mulaŵiliri wa kagulu. Nyengo zinyake, ŵateŵeti ŵakovwira ŵakwenelera ŵangapempheka kuti ŵalute lumoza na ŵalara ku maulendo ghauliska.
6. Kasi ni vifukwa wuli vinyake ivyo tikuŵawongera ŵateŵeti ŵakovwira awo ŵakulimbikira milimo yawo?
6 Kasi mpingo ukupindura wuli na milimo ya ŵateŵeti ŵakovwira? Beberly, b mudumbu wa ku Bolivia wakuti: “Nkhuwonga chomene kuti tili na ŵateŵeti ŵakovwira ndipo nkhukondwa chomene na maungano. Chifukwa cha milimo yawo, nkhufwatuka kwimba, nkhuzgorapo, nkhutegherezga nkhani, na kusambirako ku mavidiyo na vithuzi. Ŵakuwoneseska kuti pa maungano tili ŵakuvikilirika kweniso ŵakovwira awo ŵajoyina waka maungano pa vidiyokonferesi. Paumaliro wa maungano, ŵakovwirapo pa mulimo wa kutozga, ŵakupendesera ndalama za mu bokosi, na kuwoneseska kuti tili na mabuku ghose agho tikukhumbikwira. Nkhuŵawonga chomene!” Leslie, uyo wakukhala ku Colombia ndipo mfumu wake wakuteŵetera nga mulara, wakuti: “Mfumu wane wakuthemba chomene ŵateŵeti ŵakovwira pakuchita milimo yakupambanapambana. Kwambura iwo, mphanyi wakuŵa wakutangwanika chomene, ntheura nkhuwonga chomene mwamphu wawo kweniso kuŵa ŵakukhumbisiska kovwira.” Mwambura kukayika, tose tikuwonga chomene milimo iyo ŵateŵeti ŵakovwira ŵakuchita.—1 Tim. 3:13.
7. Kasi tingalongora wuli tikuŵawonga ŵateŵeti ŵakovwira? (Wonaniso chithuzi.)
7 Nangauli tingajipulika kuti tikuwonga ŵateŵeti ŵakovwira, kweni Baibolo likutichiska kuti: “Longorani kuti muli ŵakuwonga.” (Kol. 3:15) Krzysztof, mulara wa ku Finland, wakulongora kuwonga kwake munthowa iyi, iyo wakuti: “Nkhuŵatumira kadi panji meseji iyo nkhuŵikamo lemba na kuzunura mwakudunjika umo muteŵeti wakovwira wanikhozgera panji chifukwa icho nkhuwongera mulimo wake uwo wakuchita.” Pascal na Jael, awo ŵakukhala ku New Caledonia, ŵakuŵalombera mwakudunjika ŵateŵeti ŵakovwira. Pascal wakulongosora kuti, “Mwasonosono apa, maŵeyelero, na malurombo ghithu ghakuwonga, chomene ghaŵa ghakukhwaskana na ŵabali ŵakwimikika aŵa mu mpingo withu.” Yehova wakupulika malurombo ghanthena ndipo mpingo wose ukusanga chandulo.—2 Kor. 1:11.
ŴALARA ŴA MPINGO “ŴAKUFUKAFUKA CHOMENE PAKATI PINU”
8. Chifukwa wuli Paulosi wakayowoya kuti ŵalara ŵa mu nyengo yakale ŵakaŵa “ŵakufukafuka chomene”? (1 Ŵatesalonika 5:12, 13)
8 Ŵalara ŵa mu nyengo ya Ŵakhristu ŵakwambilira ŵakafukafukanga chomene kovwira mpingo. (Ŵazgani 1 Ŵatesalonika 5:12, 13; 1 Tim. 5:17) ‘Ŵakalongozganga’ mpingo, pa kuchitiska maungano na kupanga vyakusankha nga wupu wa ŵalara. ‘Ŵakachenjezganga’ ŵabali na ŵadumbu, pa kuŵapa ulongozgi mwakudunjika kweni mwachitemwa mwakuti ŵavikilire mpingo. (1 Tes. 2:11, 12; 2 Tim. 4:2) Kweniso ŵanalume aŵa ŵakaŵikangapo mtima kusangira vyakukhumbikwa mbumba zawo kweniso kukhozga chipulikano chawo.—1 Tim. 3:2, 4; Tito 1:6-9.
9. Kasi ni milimo wuli yinyake iyo ŵalara ŵakuchita mazuŵa ghano?
9 Ŵalara mbakutangwanika chomene mazuŵa ghano. Iwo mbapharazgi. (2 Tim. 4:5) Ndipo ŵakuŵikapo mtima chomene kudangilira ntchito iyi, kunozga ndondomeko ya kupharazga mu chigaŵa cha mpingo wawo, na kutisambizga umo tingapharazgira kweniso umo tingasambizgira mwaluso. Ŵakuteŵeteraso nga mberuzgi ŵalusungu kweniso ŵambura kutemwera. Para Mkhristu wachita zakwananga zikuru, ŵalara ŵakumovwira kuti wanozgeso ubwezi wake na Yehova. Pa nyengo yimozamoza, ŵakuchita vinthu mwakupwelelera chomene kuti mpingo ulutilire kuŵa wakutowa. (1 Kor. 5:12, 13; Gal. 6:1) Kweni chomene ŵalara ŵakumanyikwa kuti mbaliska. (1 Pet. 5:1-3) Ŵakudumba nkhani za mu Malemba izo ŵakunozgekera makora, ŵakuŵikapo mtima kuti waliyose mu mpingo ŵamumanye makora, kweniso ŵakuchita maulendo ghauliska. Padera pa milimo yinyake, ŵalara ŵanyake ŵakovwiraso pa mulimo wa kuzenga na kunozgaso Nyumba za Ufumu, kunozga maungano gha chigaŵa, kweniso ŵakovwira mu Makomiti Ghakudumbiskana na Chipatala na Magulu Ghakwendera Ŵalwari. Nadi, ŵalara ŵakuŵikapo mtima chomene kutovwira!
10. Kasi ni vifukwa wuli vinyake ivyo tikuŵawongera ŵalara awo ŵakulimbikira milimo yawo?
10 Yehova wakayowoyerathu kuti ŵaliska ŵazamutipwelelera makora chomene ndipo ‘tizamuwopaso yayi panji kutenthema.’ (Yer. 23:4) Johanna, mudumbu wa ku Finland, wakawona nadi kuti mazgu agha ngaunenesko apo amama ŵake ŵakalwara chomene. Iyo wakuti: “Nangauli vikunisuzga kuphalirako ŵanji umo nkhujipulikira, mulara munyake uyo nkhamumanyanga makora yayi wakanitegherezga mwakuzikira apo nkhamuphaliranga ivyo nkhwenjerwa navyo, wakalomba nane, na kunisimikizgira kuti Yehova wakunitemwa. Nkhukumbuka yayi ivyo wakayowoya, kweni nkhukumbuka kuti nkhenjerwangaso yayi. Nkhugomezga nadi kuti Yehova wakamutuma kuti wanovwire panyengo yakwenelera.” Kasi ŵalara ŵa mu mpingo winu ŵamovwirani wuli?
11. Kasi mungalongora wuli kuti mukuŵawonga ŵalara? (Wonaniso chithuzi.)
11 Yehova wakukhumba kuti tiŵawongenge ŵalara kufumira pasi pa mtima “chifukwa cha mulimo wawo.” (1 Tes. 5:12, 13) Henrietta, uyo nayo wakukhala ku Finland, wakuti: “Ŵalara mbakukhumbisiska kovwira ŵanji, kweni ivi vikung’anamura kuti ŵali na nyengo yinandi kweniso nkhongono kuluska ŵanji yayi, panji kuti iwo ŵalije masuzgo pa umoyo wawo. Nyengo zinyake nkhuŵaphalira waka kuti: ‘Mukumanya? Ndimwe mulara muwemi chomene. Usange mwamanyanga yayi, nakhumbanga nimuphalirani mwahuno kuti mumanye.’” Mudumbu wa ku Türkiye c zina lake Sera wakuti: “Ŵalara ŵakukhumbikwira kukhozgeka kuti ŵalutilire kuchita mulimo wawo. Ntheura tingaŵalembera kadi, kuŵachemerako ku chakurya, panji kulutira nawo lumoza mu uteŵeti.” Kasi walipo mulara uyo mukumuwonga chomene chifukwa cha kulimbikira kwake mu mpingo winu? Sangani nthowa izo mungalongolera kuti mukumuwonga.—1 Kor. 16:18.
Mungaŵakhozga ŵabali ŵakwimikika kuti ŵalutilire kuchita mulimo wawo (Wonani ndime 7, 11, 15)
ŴALAŴILIRI ŴADERA ŴAKUTIKHOZGA
12. Kasi ni ndondomeko wuli iyo yikawovwira kuti mipingo yikhozgeke mu nyengo yakale? (1 Ŵatesalonika 2:7, 8)
12 Khristu Yesu wali kupelekaso ŵanalume ŵanyake kuŵa “vyawanangwa” kuti ŵateŵeterenge mpingo munthowa yinyakeso. Pasi pa ulongozgi wake, ŵalara mu Yerusalemu ŵakatuma Paulosi, Baranaba, na ŵanyake nga mbalaŵiliri ŵakwendakwenda. (Mil. 11:22) Chifukwa wuli? Chifukwa chakuyana waka na icho ŵateŵeti ŵakovwira na ŵalara ŵakwimikikira, icho nkhukhozga mipingo. (Mil. 15:40, 41) Ŵanalume aŵa ŵakajinora vinandi mwakuti ŵachite mulimo uwu, nyengo zinyake ŵakaŵikanga pangozi umoyo wawo kuti ŵasambizge na kukhozga ŵanji.—Ŵazgani 1 Ŵatesalonika 2:7, 8.
13. Kasi ni milimo wuli yinyake iyo ŵalaŵiliri ŵadera ŵakuchita?
13 Ŵalaŵiliri ŵadera ŵakwendakwenda chomene. Ŵanyake ŵakwenda mitunda yitali chomene kuti ŵakafike ku mipingo yinyake. Sabata yiliyose, mulaŵiliri wadera wakudumba nkhani zakupambanapambana, kuchita maulendo ghauliska, na kuchitiska ungano wa ŵapayiniya, ungano wa ŵalara, kweniso kunozgekereska uteŵeti. Wakunozgekera nkhani kweniso wakunozga vinthu vinyake pa maungano gha dera kweniso gha chigaŵa. Wakusambizga sukulu za ŵapayiniya, kunozga ungano wapadera kuti wakumane na ŵapayiniya ŵa mu dera lake, kweniso wakuchita milimo yinyake yakuzirwa iyo ofesi ya munthavi yikumupa ndipo nyengo zinyake milimo iyi yikukhumbikwa kuchitika mwaluŵiro.
14. Kasi ni vifukwa wuli vinyake ivyo tikuŵawongera ŵalaŵiliri ŵadera awo ŵakulimbikira milimo yawo?
14 Kasi mipingo yikusanga chandulo wuli na mulimo wakuzirwa uwo ŵalaŵiliri ŵadera ŵakuchita? Mubali munyake wa ku Türkiye wakayowoyapo vyakukhwaskana na ŵalaŵiliri ŵakwendakwenda, wakati: “Nyengo zose para ŵiza, nkhuchiskika kuti nimalirenge nyengo yinandi pakovwira ŵabali na ŵadumbu. Nakumanapo na ŵalaŵiliri ŵadera ŵanandi; kweni palije uyo wakawoneka kuti ngwambura kufikirika panji kunipangiskapo kuwona kuti ngwakutangwanika chomene.” Johanna, uyo tamuzunura kale, wakenderapo lumoza na mulaŵiliri wadera mu uteŵeti, kweni ŵakasangapo munthu waliyose yayi panyumba. Iyo wakuti: “Nangauli vikaŵa nthena, kweni nizamuliluwapo yayi zuŵa ili. Ŵana ŵakwithu wose ŵakaŵa kuti ŵafumapo waka panyumba, ndipo nkhaŵasoŵanga chomene. Mulaŵiliri wadera mwachitemwa wakanikhozga na kunovwira kuwona kuti pasono nyengo zinyake vingachitika yayi kuti tikhalenge lumoza na ŵamumbumba yithu na ŵabwezi ŵithu, kweni mu charu chiphya tizamuŵa na mwaŵi wakuŵira lumoza umoyo wose.” Nakuti taŵanandi ŵa ise tikukumbuka nyengo izo ŵalaŵiliri ŵadera ŵakatovwilirapo ndipo tikuŵawonga chomene.—Mil. 20:37–21:1.
15. (a) Kuyana na 3 Yohane 5-8, kasi tingalongora wuli kuti tikuŵawonga ŵalaŵiliri ŵadera? (Wonaniso chithuzi.) (b) Chifukwa wuli tikwenera kulongora kuti tikuŵaghanaghanira ŵawoli ŵa ŵanalume ŵakwimikika aŵa, ndipo tingachita wuli nthena? (Wonani bokosi lakuti “ Kumbukani Ŵawoli Ŵawo.”)
15 Mpositole Yohane wakachiska Gayo kuti waŵapokelere ŵabali awo ŵakiza kuzakakhozga mipingo, ndipo wakamuphalira kuti ‘para ŵanthu aŵa ŵakuluta, waŵawovwire munthowa iyo Chiuta wangakondwa nayo.’ (Ŵazgani 3 Yohane 5-8.) Nthowa yimoza iyo tingachitira nthena, nkhumuchemerako mulaŵiliri wadera ku chakurya. Nthowa yinyakeso, nkhukhozgera mulimo wakupharazga pa nyengo iyo wakuchezgera mpingo. Leslie, uyo tamuzunura kale, wakuŵawonga munthowa zinyake. Iyo wakuti: “Nkhuŵalombera kwa Yehova kuti waŵape ivyo ŵakukhumbikwira. Ine na mfumu wane tikuŵalemberaso makalata, kuŵaphalira umo tikukhozgekera para iwo ŵatiyendera.” Kumbukani kuti ŵalaŵiliri ŵadera nawo ŵakukumana na masuzgo. Nyengo zinyake, ŵakulwara, ŵakwenjerwa, kweniso nanga nkhugongowa. Ndipouli mazgu ghinu ghalusungu panji chawanangwa lungaŵa zgoro lwa lurombo lwawo!—Zinth. 12:25.
TIKUKHUMBIKWIRA “VYAWANANGWA MU ŴANTHU”
16. Kuyana na Zintharika 3:27, kasi ni mafumbo wuli agho ŵabali ŵangajifumba?
16 Pa charu chose, tikukhumbikwira ŵabali ŵanandi kuti ŵateŵeterenge nga ni “vyawanangwa mu ŵanthu.” Usange ndimwe mubali wakubatizika, kasi ‘muli na nkhongono kovwirapo’ munthowa iyi? (Ŵazgani Zintharika 3:27.) Kasi mukunwekera kuteŵetera nga muteŵeti wakovwira? Usange ndimwe kale muteŵeti wakovwira, kasi mungajiŵikira chilato cha kuteŵetera ŵabali na ŵadumbu nga mulara? d Kasi mungasintha vinthu vinyake pa umoyo winu kuti mupemphe kunjira Sukulu ya Ŵapharazgi ŵa Ufumu? Sukulu iyi yizamumovwirani kuti muŵe ŵakwenelera kuti Yesu wamugwiliskirani ntchito mwakukwana. Para mukujiwona ŵambura kwenelera, lombani Yehova. Mulombani kuti wamovwirani na mzimu wake utuŵa kuti mufiske kuchita uteŵeti uliwose uwo mungapika.—Luka 11:13; Mil. 20:28.
17. Kasi “vyawanangwa mu ŵanthu” vikutisimikizgira vichi vyakukhwaskana na Themba lithu Khristu Yesu?
17 Ŵabali awo Yesu wali kuŵimika kuŵa “vyawanangwa mu ŵanthu,” mbukaboni wakuti iyo wakutilongozga nadi mu mazuŵa ghaumaliro agha. (Mat. 28:20) Tikuwonga chomene kuti tili na Themba ilo nda chitemwa, lakunozgeka kutovwira, kweniso ilo likumanya ivyo tikukhumbikwira ndipo likutipa ŵabali awo ŵakutovwira. Ntheura tikwenera kupenjerezga mipata yakulongolera kuti tikuŵawonga ŵanalume ŵakulimbikira aŵa. Kweniso kuluwa yayi kuwonga Yehova, uyo ni Mwenecho wa “chawanangwa chilichose chiwemi na chawanangwa chilichose chakufikapo.”—Yak. 1:17.
SUMU 99 Ŵabali Vikwi na Vikwi
a Ŵalara awo ŵakuteŵetera mu Wupu Wakulongozga, awo ŵakovwira Wupu Wakulongozga, ŵa mu Komiti ya Munthavi, kweniso kusazgapo wose ŵa mu mauteŵeti ghakupambanapambana, nawo ni “vyawanangwa mu ŵanthu.”
b Mazina ghanyake ghasinthika.
c Kale chikamanyikwanga kuti Turkey.
d Kuti mumanye vinandi pa umo mungachitira kuti muŵe ŵakwenelera kuteŵetera nga muteŵeti wakovwira panji mulara, wonani nkhani yakuti “Kasi Ŵabali Mukunwekera Kuŵa Muteŵeti Wakovwira?” na “Kasi Ŵabali Mukunwekera Kuteŵetera Nga Mulara?” mu Gongwe la Mulinda la Novembala 2024.
