1, 2. Kasi Yonatani wakalongora wuli kuti ngwakugomezgeka?

YONATANI wakwenera kuti wakazizwa chomene na chikanga icho Davide wakalongora apo wakaŵa muwukirano. Davide wakakoma Goliyati uyo wakaŵa chinkhara cha nkhondo, ndipo wakanyamura mutu wa Goliyati na kwiza nawo kwa Themba Sauli. (1 Sam. 17:57) Yonatani wakakhorwa kuti Chiuta wali na Davide, ndipo kufuma pa nyengo iyi “Yonatani na Davide ŵakamba kutemwana chomene.” Nakuti “Yonatani wakachita phangano na Davide, chifukwa wakamutemwa nga umo wakujitemwera yekha.” (1 Sam. 18:1-3) Kufuma pa nyengo iyi m’paka apo wakafwira, Yonatani wakaŵa wakugomezgeka kwa Davide.

² Nangauli Yonatani wakamanyanga kuti Yehova wasankha Davide kuti waŵe themba la Israyeli pamanyuma pa Sauli, kweni iyo wakalutilira kuŵa wakugomezgeka kwa Davide. Kweniso Yonatani wakafipanga mtima apo Sauli wakakhumbanga kukoma Davide. Nyengo yinyake Yonatani wakaluta ku Horeshi kuti wakakhozge Davide na  kumovwira kuti wasange “nkhongono mwa Yehova.” Yonatani wakati: “Ungawopanga chara . . . Iwe uŵenge themba pa Israyeli, ine niŵenge wachiŵiri kwa iwe.”​—1 Sam. 23:16, 17.

3. Kasi ntchivichi icho chikaŵa chakuzirwa chomene kwa Yonatani, ndipo tikumanya wuli? (Wonani chithuzi chakwamba.)

³ Tose tikutemwa na kulumba munthu uyo ngwakugomezgeka. Kweni kasi Yonatani tikumulumba chifukwa chakuti wakaŵa wakugomezgeka kwa Davide? Yayi, tikumulumba chifukwa wakaŵa wakugomezgeka chomene kwa Chiuta, nakuti ndicho chikaŵa chakuzirwa chomene kwa iyo. Lekani Yonatani wakaŵaso wakugomezgeka kwa Davide na kuleka kumuchitira sanji. Yonatani wakakhozga Davide kuti wagomezgenge chomene Yehova. Ŵanalume aŵa ŵakalutilira kugomezgana kweniso kuŵa ŵakugomezgeka kwa Yehova. Ŵakalutilira kusunga phangano lawo lakuti: “Yehova waŵe pakati pa iwe na ine kweniso pakati pa mphapu yako na mphapu yane muyirayira.”​—1 Sam. 20:42.

4. (a) Kasi ntchivichi icho chingatovwira kuti tiŵe ŵakukondwa? (b) Kasi mu nkhani iyi tisambirenge vichi?

⁴ Nase tikwenera kuŵa ŵakugomezgeka ku ŵamumbumba yithu, ŵabwezi ŵithu, na ku ŵabali na ŵadumbu mu mpingo. (1 Tes. 2:10, 11) Kweni chakuzirwa chomene nkhuŵa ŵakugomezgeka kwa Yehova uyo wali kutipa umoyo. (Chivu. 4:11) Para tikugomezgeka kwa Yehova, tikuŵa ŵakukondwa kweniso ŵakukhorwa. Tose tikwenera kuŵa ŵakugomezgeka kwa Yehova nanga mpha nyengo ya masuzgo. Mu nkhani iyi, tisambirenge umo nkhani ya Yonatani yingatovwilira kuŵa ŵakugomezgeka kwa Yehova mu vigaŵa vinayi ivi: (1) usange tikuwona kuti awo ŵakutilongozga ŵakuchita makora yayi vinthu, (2) kasi tikwenera kugomezgeka kwa njani? (3) para tikuwona kuti awo ŵakutilongozga ŵandatipulikiske (4) para tikuwona kuti vikutisuzga kusungilira phangano.

5. Chifukwa wuli chikaŵa chinonono kwa Ŵaisrayeli kuŵa ŵakugomezgeka kwa Yehova apo Sauli wakawusanga?

⁵ Yonatani na Ŵaisrayeli ŵakasangana na suzgo pa nkhani yakugomezgeka. Themba Sauli, wiske wa Yonatani, wakagalukira Yehova, ndipo Yehova wakamukana. (1 Sam. 15:17-23) Ndipouli Yehova wakamufumiskapo nyengo yeneyiyo yayi pa uthemba. Ntheura chikaŵa chinonono kuti Ŵaisrayeli ŵaŵe ŵakugomezgeka kwa Yehova chifukwa fumu yawo, iyo ‘yikakhalanga pa chitengo’ cha Yehova, yikachitanga vinthu viheni chomene.​—1 Mid. 29:23.

6. Kasi tikumanya wuli kuti Yonatani wakalutilira kugomezgeka kwa Yehova?

⁶ Yonatani wakalutilira kuŵa wakugomezgeka kwa Yehova. Tiyeni tiwone ivyo Yonatani wakachita awiske ŵati ŵaleka kupulikira Yehova. (1 Sam. 13:13, 14) Pa nyengo iyi, Ŵafilisiti ŵakiza kuzakachita nkhondo na Ŵaisrayeli. Ŵafilisiti ŵakaŵa na magileta 30,000 gha nkhondo, kweni Sauli wakaŵa waka na ŵasilikari 600. Ndipo ku chigaŵa cha Ŵaisrayeli, Sauli na Yonatani pera ndiwo ŵakaŵa na vilwero vya nkhondo. Kweni Yonatani wakachita wofi yayi. Iyo wakakumbukira mazgu gha Samuyeli ghakuti: “Yehova wasidenge chara ŵanthu ŵake chifukwa cha zina lake likuru.” (1 Sam. 12:22) Pamanyuma, Yonatani wakaphalira msilikari munyake kuti: “Palije chakutondeska Yehova kuponoska na ŵanthu ŵanandi panji ŵachoko.” Ntheura Yonatani na msilikari munyake uyu, ŵakawukira gulu la Ŵafilisiti ndipo ŵakakomapo ŵasilikari 20. Yonatani wakagomezganga chomene Yehova, ndipo Yehova wakamovwira nadi. Yehova wakachitiska chindindindi icho chikatenthemeska Ŵafilisiti na kwamba kukomana ŵekhaŵekha. Umu ndimo Ŵaisrayeli ŵakathereskera Ŵafilisiti.​—1 Sam. 13:5, 15, 22; 14:1, 2, 6, 14, 15, 20.

7. Kasi Yonatani wakaŵawonanga wuli awiske?

 ⁷ Yonatani wakalutilira kupulikira awiske apo mphakwenelera nangauli iwo ŵakaleka kupulikira Yehova. Mwachiyelezgero, iyo pamoza na awiske ŵakarwanga nkhondo kuti ŵavikilire ŵanthu ŵa Chiuta.​—1 Sam. 31:1, 2.

8, 9. Chifukwa wuli tikwenera kuchindika ŵamazaza?

⁸ Nga ni Yonatani, nase tingalongora kuti tili ŵakugomezgeka kwa Yehova para tikupulikira malango gha boma chikuru ghakuleka kususkana na fundo za Yehova. Yehova wazomerezga maboma agha panji kuti “ŵamazaza” kuti ŵatilamulire, ndipo wakukhumba kuti tiŵachindikenge. (Ŵazgani Ŵaroma 13:1, 2.) Lekani tikwenera kuchindika ŵamazaza nangauli ŵangaŵa kuti mbambura kugomezgeka. Nakuti tikwenera kuchindika wose awo Yehova waŵapa mazaza.​—1 Kor. 11:3; Heb. 13:17.

⁹ Mudumbu Oliga wa ku South America, wakalongora kuti ngwakugomezgeka kwa Yehova chifukwa wakalutilira kuchindika mfumu wake nangauli mfumu wake wakamuchitiranga nkhaza. ^[1] Nyengo zinyake mfumu wake wakamudundukiranga panji kumuyowoyera mazgu ghakuŵinya chifukwa Oliga ni Kaboni wa Yehova. Mwanalume wakati wamazgenge nthengwa na kutora ŵana. Kweni Mudumbu Oliga wakawezgera “uheni pa uheni yayi.” Iyo wakalutilira kuchindika mfumu wake, ndipo wakamuphikiranga, kumuchapira, kweniso wakawovwiranga ŵabali ŵa mfumu wake. (Rom. 12:17) Nyengo zinyake wakalutanga na mfumu wake kukawona ŵabali na ŵabwezi ŵa mwanalume. Awiskevyara ŵakati ŵafwa, Oliga wakaluta ku nyifwa pamoza na ŵana. Apo ŵakaŵa ku nyifwa, Oliga wakalindilira mfumu wake pawaro pa tchalitchi m’paka apo mapemphero gha nyifwa ghakamalira. Pakati pajumpha vyaka vinandi, mtima wa mfumu wake ukasintha chifukwa Oliga wakamuchindikanga. Pasono mwanalume ndiyo wakuchiska Oliga kuti walutenge ku maungano, ndipo nyengo zinyake wakukamulinda pa galimoto. Kweniso mazuŵa ghanyake mwanalume nayo wakuwungana.​—1 Pet. 3:1.

10. Chifukwa wuli Yonatani wakagomezgeka kwa Davide?

¹⁰ Apo Sauli wakakhumbanga kukoma Davide,  Yonatani wakasuzgika chomene maghanoghano. Iyo wakakhumbanga kuŵa wakugomezgeka kwa adada ŵake kweniso kwa Davide. Yonatani wakamanyanga kuti Chiuta waleka kovwira awiske, kweni wali na Davide. Ntheura wakasankha kugomezgeka kwa Davide. Yonatani wakachenjezga Davide kuti wakabisame, kweniso wakayowoya viwemi vya Davide kwa Sauli.​—Ŵazgani 1 Samuyeli 19:1-6.

11, 12. Kasi ntchivichi icho chingatovwira kuŵa ŵakugomezgeka kwa Chiuta?

¹¹ Mudumbu Alice wa ku Australia wakeneranga kusankha pakati pa kugomezgeka ku ŵamumbumba yake na Yehova. Wati wamba kusambira Baibolo na Ŵakaboni ŵa Yehova, wakaphalirangako ŵamumbumba yake ivyo wakasambiranga. Zuŵa linyake wakaŵaphalira kuti wachitengekoso yayi khirisimasi na kuŵalongosolera chifukwa chake. Pakwamba ŵamumbumba yake ŵakakhuŵara waka, kweni pamanyuma ŵakamukwiyira chomene. Ŵakawonanga nga kuti Alice waleka kuŵachindika. Amama ŵake ŵakati ŵakukhumbaso yayi kumuwona. Alice wakati: “Nkhakhuŵara ndipo vikaniŵinya chomene mu mtima chifukwa nkhaŵatemwanga chomene ŵamumbumba yakwithu. Ndipouli, nkhasankha kugomezgeka kwa Yehova na Yesu, ndipo nkhabatizika pa ungano wakulondezgapo.”​—Mat. 10:37.

¹² Tikwenera kugomezgeka kwa Yehova kuluska chilichose, kwali ni timu ya bola, sukulu, panji charu chithu. Machiyelezgero, Henry wakatemwanga chomene maseŵera gha tchesi, ndipo wakakhumbanga kuti zuŵa linyake sukulu yake yizakaluske maseŵera agha. Ku umaliro wa sabata yiliyose wakatangwanikanga chomene na maseŵera agha. Ntheura wakaŵavya nyengo yakupharazgira na kuwungana. Henry wakagomezgekanga chomene ku maseŵera gha tchesi kuluska Chiuta. Kweni wakati wawona kuti ili ni suzgo, wakaleka kuseŵera na timu ya ku sukulu.​—Mat. 6:33.

13. Kasi ntchivichi icho chingatovwira para tasangana na masuzgo gha mu mbumba?

¹³ Nyengo zinyake chikuŵa chakusuzga kuti pa nyengo yimoza munthu waŵe wakugomezgeka ku ŵapapi na kwa munyake wa mu nthengwa. Mwachiyelezgero, Keni wakati: “Amama ŵakati ŵachekura, kanandi nkhakhumbanga kukaŵawona ndipo nyengo zinyake nkhakhumbanga kuti ŵakhalenge nase. Kweni muwoli wane na amama ŵakapulikananga yayi. Ntheura chikaŵa chakusuzga kuti nikondweske wose pa nyengo yimoza.” Keni wakati waghanaghanira ivyo Baibolo likuyowoya, wakawona kuti ntchiwemi kukondweska dankha muwoli wake na kuŵa wakugomezgeka kwa iyo. Ntheura muwoli wake wakakondwa. Pamanyuma, Keni wakalongosolera muwoli wake kuti wakwenera kuchitira lusungu anyinavyara. Kweniso wakadumbiskana na anyina kuti ŵachindikenge mkamwana wawo.​—Ŵazgani Genizesi 2:24; 1 Ŵakorinte 13:4, 5.

14. Kasi ni vinthu wuli viheni ivyo Sauli wakachitira Yonatani?

¹⁴ Tikwenera kugomezgeka kwa Yehova nanga ni para ŵabali awo ŵakutilongozga ŵatichitira mwambura kwenelera. Sauli wakasankhika na Yehova, kweni wakachitiranga nkhaza mwana wake Yonatani. Sauli wakapulikiskanga yayi chifukwa icho Yonatani wakatemweranga Davide. Ntheura apo Yonatani wakakhumbanga kovwira Davide, Sauli wakamukwiyira chomene ndipo wakamukhozga soni pamaso pa ŵanthu. Nangauli vikaŵa nthena, Yonatani wakalutilira kuchindika awiske. Kweniso wakalutilira kugomezgeka kwa Yehova na kwa Davide uyo wakasankhika kuŵa themba lakulondezgapo la Israyeli.​—1 Sam. 20:30-41.

15. Kasi tikwenera kuchita wuli para mubali watikhuŵazga?

¹⁵ Mazuŵa ghano, ŵabali awo ŵakulongozga mu mpingo ŵakuwoneseska kuti ŵaleke kutikhuŵazga.  Ndipouli ŵabali ŵithu aŵa nawo mbakwananga nga ndise, lekani nyengo zinyake ŵangapulikiska yayi chifukwa icho tachitira chinthu chinyake. (1 Sam. 1:13-17) Ntheura para ŵandatipulikiske panji ŵatikhuŵazga, ise tikwenera kulutilira kugomezgeka kwa Yehova.

16. Kasi mpha vyakuchitika wuli vinyake apo tikwenera kulongora kuti ndise ŵakugomezgeka kwa Chiuta?

¹⁶ Sauli wakakhumbanga kuti Yonatani ndiyo wazakaŵe themba m’malo mwa Davide. (1 Sam. 20:31) Kweni Yonatani wakatemwanga Yehova ndipo wakaŵa wakugomezgeka. Ntheura m’malo mwa kuwunukira uthemba, Yonatani wakasankha kuŵa paubwezi na Davide na kusungilira phangano ilo wakachita na Davide. Nakuti uyo wakutemwa Yehova na kugomezgeka kwa iyo, “wakusintha yayi pa ivyo walayizga, nanga ni para vimuŵikenge paheni.” (Sal. 15:4) Pakuti ndise ŵakugomezgeka kwa Yehova tikuchita ivyo talayizga. Mwachiyelezgero, para tachita phangano la bizinesi na munyithu, tikwenera kufiska ivyo tapangana nanga ni para vinthu vyatisuzga. Kweniso para tasangana na masuzgo mu nthengwa, tikwenera kulutilira kugomezgeka kwa muwoli panji mfumu withu chifukwa tikutemwa Yehova.​—Ŵazgani Malaki 2:13-16.

17. Kasi nkhani iyi yamovwirani wuli?

¹⁷ Tikukhumba kuŵa nga ni Yonatani, uyo wakaŵa wakugomezgeka kwa Yehova kweniso wambura umbunu. Tiyeni tilutilire kugomezgeka ku ŵabali na ŵadumbu ŵithu nanga ni para ŵatikhuŵazga. Kwali tisangane na suzgo wuli, tikwenera kulutilira kugomezgeka kwa Yehova. Para tichitenge nthena tikondweskenge mtima wa Yehova, ndipo nase tiŵenge ŵakukondwa. (Zinth. 27:11) Nyengo zose Yehova waŵenge nase ndipo walutilirenge kutipwelelera. Mu nkhani yakulondezgapo, tizamusambira vya ŵanthu ŵanyake ŵakugomezgeka na ŵambura kugomezgeka awo ŵakaŵako mu nyengo ya Davide.