1, 2. Kasi ntchivichi icho Yehova wakayowoyerathu?

ŴAKABONI ŴA YEHOVA ni gulu lapadera chomene pa charu chose. Mbunenesko kuti Ŵakaboni ŵa Yehova nawo mbakwananga ndipo nyengo zinyake ŵakubudiska. Ndipouli, gulu ili likulongozgeka na mzimu utuŵa wa Chiuta, lekani likulutilira kukura na kwenda myaa! Tiyeni tiwone vinthu vichoko waka ivyo Yehova wakutichitira nangauli ndise ŵakwananga.

² Apo mazuŵa ghaumaliro ghakambiranga mu 1914, gulu la Yehova likaŵa na ŵanthu ŵachoko chomene pa charu chapasi. Kweni Yehova watumbika chomene mulimo wakupharazga. Kwambira mu 1914, ŵanthu mamiliyoni ghanandi ŵasambira unenesko na kuzgoka Ŵakaboni ŵa Yehova. Yehova wakayowoyerathu kuti gulu lake lizamukura chomene. Iyo wakati: “Muchoko chomene wazamuŵa chikwi, ndipo muchoko wazamuzgoka mtundu wankhongono. Ine Yehova, nizamuchifiska luŵiro mu nyengo yake.” (Yes. 60:22) Uchimi uwu ukufiskika nadi mu mazuŵa ghano ghaumaliro. Nakuti pasono Ŵakaboni ŵa Yehova mbanandi chomene.

3. Kasi ŵateŵeti ŵa Yehova walongora wuli kuti ŵali na chitemwa?

 ³ Yehova wawovwiraso ŵanthu ŵake kuti ŵaŵe na chitemwa, uwo ni mukhaliro wake ukuru. (1 Yoh. 4:8) Yesu wakalongora makora chomene chitemwa cha Yehova, ndipo wakaphalira ŵalondezgi ŵake kuti: “Nkhumupani dango liphya, lakuti mutemwanenge, . . . Usange mukutemwana, wose ŵamanyenge kuti ndimwe ŵasambiri ŵane.” (Yoh. 13:34, 35) Ŵateŵeti ŵa Yehova ŵakalongora nadi kuti ŵakutemwa ŵanyawo pa nyengo iyo pa charu chose pakaŵa nkhondo. Mwachiyelezgero, ŵanthu 55 miliyoni ŵakakomeka pa Nkhondo Yachiŵiri ya Charu Chose. Ndipouli, Ŵakaboni ŵa Yehova ŵakanjilirapo yayi pa nkhondo ya pa charu chose iyi. (Ŵazgani Mika 4:1, 3.) Lekani ŵalutilira kuŵa ŵambura “mulandu wa ndopa za ŵanthu wose.”—Mil. 20:26.

4. Chifukwa wuli ntchakukondweska kuti gulu la Yehova likulutilira kukura?

⁴ Gulu la Yehova likulutilira kukura mu charu chiheni ichi. Baibolo likuti Satana uyo ni “chiuta wa nyengo iyi,” ndiyo wakulamulira charu. (2 Kor. 4:4) Satana ndiyo wakulongozga vyakuchitika vya ndyali kweniso wakulongozga pa nkhani yakuthandazga mauthenga ghakupuluska. Kweni wangatondeska yayi mulimo wakupharazga makani ghawemi. Pakuti Satana wakumanya kuti wali na kanyengo kafupi, wakuyezgayezga chomene kuti wapatuske ŵateŵeti ŵa Chiuta ku chisopa chaunenesko. Iyo wakugwiliskira ntchito nthowa zakupambanapambana kuti waŵapatuske.—Chivu. 12:12.

5. Chifukwa wuli nyengo zinyake ŵanyithu ŵangatikhuŵazga? (Wonani chithuzi chakwamba.)

⁵ Ŵakhristu ŵaunenesko ŵakusambizgika kuti ŵatemwenge Yehova kweniso ŵanyawo. Nakuti ndivyo Yesu wakasambizga ŵasambiri ŵake. Munthu munyake wakakhumbanga kumanya za ilo ni dango likuru chomene. Yesu wakamuphalira kuti: “‘Utemwenge Yehova Chiuta wako na mtima wako wose na umoyo wako wose na maghanoghano ghako ghose.’ Ili ndilo ni dango likuru chomene na lakwamba. Lachiŵiri, lakuyanako nalo ni ili: ‘Utemwenge mzengezgani wako nga umo ukujitemwera wamwene.’” (Mat. 22:35-39) Ndipouli, Baibolo likulongosora kuti tose tili kuhara zakwananga kufuma kwa Adamu. (Ŵazgani Ŵaroma 5:12, 19.) Ntheura nyengo zinyake ŵanyithu mu mpingo ŵangayowoya panji kuchita vinthu ivyo vingatikhuŵazga. Ivi vingatitondeska kutemwa Yehova na Ŵakhristu ŵanyithu. Para ndimo vyaŵira, kasi tikwenera kuchita wuli? Kale napo, ŵateŵeti ŵanyake ŵakugomezgeka ŵa Yehova ŵakayowoya panji kuchita vinthu vinyake ivyo vikakhuŵazga ŵanji. Baibolo likutovwira kumanya vinandi pa nkhani iyi.

6. Kasi Eli wakatondeka wuli kulanga ŵana ŵake?

⁶ Mwachiyelezgero, Eli wakaŵa Mulara wa ŵasembe ndipo wakaŵa na ŵana ŵaŵiri awo ŵakalondezganga yayi malango gha Yehova. Baibolo likuti: “Ŵana ŵa Eli ŵakaŵa ŵaheni. Yehova ŵakaŵa nayo na ntchito yayi.” (1 Sam. 2:12) Nangauli awiskewo ŵakadangiliranga pakusopa kwaunenesko, kweni ŵana aŵa ŵakachitanga zakwananga zikuru chomene. Eli wakamanya ivyo ŵana ŵake ŵakachitanga, kweni wakaŵalekeleranga waka. Ntheura Chiuta wakakhawuliska nyumba ya Eli. (1 Sam. 3:10-14) Pamanyuma, ŵazukuru ŵake wose ŵakaŵavya mwaŵi wakuti ŵangateŵetera nga Mbalara ŵa ŵasembe. Kasi imwe muŵengepo mu nyengo ya Eli, mukate muchitenge wuli kuwona kuti Eli wakulekelera maubudi gha ŵana ŵake? Kasi mukate mukhuŵarenge na kuleka waka kuteŵetera Yehova?

7. Kasi Davide wakachita zakwananga wuli zikuru, ndipo Chiuta wakachita nayo wuli?

⁷ Yehova wakatemwanga chomene Davide ndipo wakati Davide ni “munthu wakukolerana na mtima wake.” (1 Sam. 13:13, 14; Mil. 13:22)  Kweni pamanyuma Davide wachita uleŵi na Batisheba ndipo wakamupa nthumbo. Ivi vikachitika apo Uriya mfumu wa Batisheba wakaŵa ku nkhondo. Davide wakati wamanya kuti Batisheba wali na nthumbo, wakachemeska Uriya kufuma ku nkhondo. Iyo wakhumbanga kuti pa nyengo iyi Uriya wagone na Batisheba ndipo paumaliro viŵe nga kuti ndiyo wamupa nthumbo. Uriya wakakana kukagona ku nyumba yake, ntheura Davide wakapanga pulani yakuti Uriya wakakomeke ku nkhondo. Paumaliro, Yehova wakalanga Davide na nyumba yake yose kwazanimuwone. (2 Sam. 12:9-12) Pakati pajumpha nyengo, Yehova wakachitira lusungu Davide chifukwa Davide wakendanga “na mtima wakufikapo” pa maso pa Yehova. (1 Mathe. 9:4) Kasi imwe muŵengepo pa nyengo iyo, mukate muchitenge wuli? Kasi mukate mukhuŵarenge chifukwa cha mphuvya za Davide?

8. (a) Kasi Petrosi wakatondeka wuli kugomezgeka? (b) Chifukwa wuli Yehova wakalutilira kumugwiliskira ntchito?

⁸ Munthu munyake uyo wakachita vinthu vyakukhuŵazga, ni Petrosi. Yesu wakasankha Petrosi kuŵa mpositole wake. Ndipouli, Petrosi wakachita vinthu ivyo pamasinda wakadandawura navyo. Mwachiyelezgero, apo Yesu wakakolekanga, ŵapositole ŵake ŵakamusida na kuchimbira. Kweni pambere ivi vindachitike, Petrosi wakayowoya kuti nanga ŵanyake wose ŵangakhuŵara na kuchimbira, kweni iyo wakati wakhuŵarenge chara nesi kuchimbira. (Mrk. 14:27-31, 50) Ndipouli, apo Yesu wakakoleka na ŵalwani ŵake, ŵapositole ŵake wose, na Petrosi wuwo ŵakamusida na kuchimbira. Nakuti pamanyuma, Petrosi wakakana katatu kuti wakumumanya yayi Yesu. (Mrk. 14:53, 54, 66-72) Kweni Petrosi wakajinyumwa, ndipo Yehova wakalutilira kumugwiliskira ntchito. Kasi imwe muŵengepo pa nyengo iyo, mphanyi mukakhuŵara na ivyo Petrosi wakachita na kuleka waka kuŵa wakugomezgeka kwa Yehova?

9. Chifukwa wuli tikwenera kulekera Yehova para ŵanji ŵakuchita vinthu vyakukhuŵazga?

⁹ Ŵanthu awo tadumbiskana, ni viyelezgero vichoko waka vya awo ŵakachita vinthu ivyo vikakhuŵazga ŵanyawo. Nakuti tingakwaniska yayi kuyowoya viyelezgero vyose chifukwa  nanga ni sono vichali kuchitika. Kweni fumbo ndakuti, kasi muchitenge wuli? Kasi mukhuŵarenge chifukwa cha maubudi gha ŵanji na kumutaya waka Yehova na gulu lake? Mukwenera kuzomerezga Yehova kuti ndiyo wachitepo kanthu chifukwa iyo nyengo zose wakweruzga mwakwenelera. Nyengo zinyake ŵanthu awo ŵakuchita ubudi ukuru ŵakukana lusungu lwa Yehova ndipo ŵakupera yayi. Para ndimo vyaŵira, kasi mugomezgenge Yehova kuti waŵeruzgenge ŵanthu ŵanthena, nanga nkhuŵafumiska mu mpingo para ŵakusintha yayi?

10. Kasi Yesu wakamanyanga vichi vyakukhwaska na maubudi gha Yudasi na Petrosi?

¹⁰ Baibolo likutiphaliraso za ŵateŵeti awo ŵakalutilira kugomezgeka kwa Yehova na gulu lake nangauli ŵanthu ŵanyake ŵakachitanga vinthu vyakukhuŵazga. Mwachiyelezgero, Yesu wakalomba usiku wose kwa Adada ŵake kuti ŵamovwire kusankha ŵapositole 12. Yumoza wa ŵapositole aŵa wakaŵa Yudasi Isikariyoti, uyo paumaliro wakendera mphiska Yesu. Ndipouli, Yesu wakazomerezga yayi kuti ivyo Yudasi wakachita vimutondeske kuŵa paubwezi na Yehova. Kweniso Yesu wakataya yayi ubwezi wake na Yehova chifukwa chakuti Petrosi wakamukana. (Luka 6:12-16; 22:2-6, 31, 32) Yesu wakamanyanga kuti ni Yehova yayi uyo wakamubudira, nesi gulu lake. Iyo wakalutilizga mulimo wake nangauli ŵalondezgi ŵake ŵanyake ŵakamukhuŵazga. Yehova wakawuska Yesu ku ŵakufwa na kumupa njombe yakuŵa Fumu ya Ufumu wake wakuchanya.—Mat. 28:7, 18-20.

11. Kasi Baibolo likayowoyerathu vichi vya ŵateŵeti ŵa Yehova?

¹¹ Yesu wakagomezganga chomene Yehova na ŵanthu ŵake ndipo wachali kuŵagomezga. Para tikuwona ivyo Yehova wakufiska kwizira mu ŵateŵeti ŵake mazuŵa ghano, tikukhozgeka chomene. Palije ŵanyake awo ŵakupharazga makani ghawemi pa charu chose chapasi, kweni Ŵakaboni ŵa Yehova pera. Vili nthena chifukwa Yehova wakutilongozga na mzimu wake uwo ukutovwira kuti tiŵe ŵakukolerana. Lemba la Yesaya 65:14 likuyowoya za paradiso wauzimu uyo wali pakati pa ŵanthu ŵa Chiuta. Lemba ili likuti: “Wonani! Ŵateŵeti ŵane ŵachemerezgenge mwachimwemwe chifukwa cha kukondwa mu mtima.”

12. Kasi tikwenera kughawona wuli maubudi gha ŵanji?

¹² Ŵateŵeti ŵa Yehova ŵakukondwa chomene na ivyo ŵakuchita chifukwa ŵakumanya kuti Yehova ndiyo wakuŵalongozga. Kweni ŵanthu ŵanandi mu charu cha Satana ichi ŵakulutilira kutengera, chomenechomene apo vinthu vikulutilira kuhenipirahenipira. Ntheura ntchambura mahara kweniso nkhupuvya kukuru chomene kuyimba mulandu Yehova na gulu lake chifukwa cha maubudi agho ŵateŵeti ŵanyake ŵachoko waka ŵakuchita. Tikwenera kulutilira kugomezgeka kwa Yehova na gulu lake. Kweniso tikwenera kumanya umo tingachitira na maubudi gha ŵanji.

13, 14. (a) Chifukwa wuli tikwenera kukhuŵara luŵiro yayi na maubudi gha ŵanji? (b) Kasi ni layizgo wuli ilo tikwenera kukumbuka nyengo zose?

¹³ Kasi tingachita wuli usange Mkhristu munyithu wayowoya panji kuchita chinthu chinyake icho chatikhuŵazga? Baibolo likuyowoya ivyo tikwenera kuchita. Likuti: “Ungakwiyanga luŵiro chara, chifukwa vindere ndivyo vikukaŵa yayi kukwiya.” (Muph. 7:9) Kuluwa yayi kuti tose tili ŵakwananga, nakuti pajumpha vyaka 6,000 kufuma apo ŵapapi ŵithu ŵakwamba ŵakatayira umoyo waurunji mu Edeni. Tikubudiska kanandi waka chifukwa ndise ŵakwananga. Ntheura tileke kukhazga kuti nyengo zose ŵanyithu ŵachitenge viwemi pera. Tingatayanga yayi chimwemwe icho tikusanga mu gulu la Yehova chifukwa cha maubudi ghawo. Vinthu  vinganangikirathu usange tingakhuŵara na kuleka gulu la Yehova chifukwa chakudodoliska maubudi gha ŵanyithu. Para takhuŵara na kuleka gulu la Yehova, titayenge mwaŵi wakuteŵetera Yehova kweniso umoyo wamuyirayira mu charu chiphya.

¹⁴ Usange tikukhumba kulutilira kuŵa ŵakukondwa na kuŵa na chigomezgo chakukhora, nyengo zose tikumbukenge layizgo la Yehova lakuti: “Wonani! Nkhulenga machanya ghaphya na charu chapasi chiphya. Vinthu vyakale vikumbukikengeso chara, ndipo vinjirengeso yayi mu mtima.” (Yes. 65:17; 2 Pet. 3:13) Lekani kuzomerezga maubudi gha ŵanji kumutondeskani kuzakasanga vitumbiko ivi.

15. Kasi Yesu wakati tikwenera kuchitachi para ŵanyithu ŵatibudira?

¹⁵ Pakuti tindanjire mu charu chiphya, ipo nyengo zose tikwenera kulondezga fundo za Chiuta kuti timanye umo tingachitira para ŵanyithu ŵatikhuŵazga. Mwachiyelezgero, tikwenera kukumbuka fundo iyo Yesu wakayowoya yakuti: “Pakuti usange mukugowokera ŵanthu maubudi ghawo, Awiskemwe ŵakuchanya nawo ŵamugowokeraninge. Kweni usange mukugowokera chara ŵanthu maubudi ghawo, Awiskemwe nawo ŵamugowokeraninge chara maubudi ghinu.” Nyengo yinyake Petrosi wakafumba Yesu kuti wamanye usange wakwenera kugowokera mubali wake “kankhondi na kaŵiri” pera. Yesu wakamuzgora kuti: “Nkhukuphalira kuti, m’paka kankhondi na kaŵiri chara, kweni m’paka 77.” Apa Yesu wakang’anamuranga kuti nyengo zose tikwenera kugowokera ŵanyithu na mtima wose, ndipo ndicho chikwenera kuŵa chilato chithu.—Mat. 6:14, 15; 18:21, 22.

16. Kasi Yosefe wakalongora chiyelezgero wuli chiwemi?

¹⁶ Munthu munyake uyo wakalongora chiyelezgero chiwemi chomene pa nkhani yakugowokera, ni Yosefe. Yosefe wakaŵa mwana wakwamba pa ŵana ŵaŵiri awo Rakelo wakababira Yakhobe. Ŵakuru ŵake ŵakamupangiranga sanji chifukwa wakatemwekanga chomene na dada wawo, Yakhobe. Lekani ŵakamuguliska ku wuzga ku Eguputo. Pakati pajumpha vyaka vinandi, Yosefe vikamba kumwendera makora ndipo wakaŵa wachiŵiri kwa Farawo, fumu ya Eguputo. Njara yikati yawa ku Kenani, ŵakuru ŵa Yosefe ŵakiza ku Eguputo kuti ŵazakagure chakurya, kweni ŵakamumanya yayi Yosefe. Pa nyengo iyi Yosefe wakhumbenge mphanyi wakawezgera nkhaza izo ŵakuru ŵake ŵakamuchitira. M’malo mwake, wakaŵayezga kuti wawone usange ŵali kusintha mtima wawo wankhaza. Wakati wamanya kuti ŵabali ŵake ŵali kusintha nkharo yawo, Yosefe wakajivumbura kwa iwo ndipo wakaŵaphalira kuti: “Mungopanga yayi. Nilutilirenge kumupani chakurya pamoza na ŵana ŵinu.” Baibolo likuyowoyaso kuti: “Ntheura wakaŵasanguluska na kuŵakhozga.”—Gen. 50:21.

17. Kasi sono imwe muchitenge wuli na maubudi gha ŵanji?

¹⁷ Kuluwa yayi kuti tose ndise ŵakwananga, ntheura tilutilirenge kubudirana. Baibolo likuti para tamanya kuti takhuŵazga mubali withu, tikwenera kuphemana nayo mwaluŵiro. (Ŵazgani Mateyu 5:23, 24.) Tikukondwa chomene para ŵanyithu ŵakutisungira vyakusingo yayi, ipo nase tileke kuŵasungira vyakusingo. Lemba la Ŵakolose 3:13 likutichiska kuti: “Lutilirani kuzizipizgirana na kugowokerana na mtima wose usange munthu wali na chifukwa chakudandawulira na munyake. Nga umo Yehova wakamugowokelerani na mtima wose, ndimo namweso muchitirenge.” Baibolo likuyowoyaso kuti: “Chitemwa chikusunga vyakusingo yayi.” (1 Kor. 13:5) Para tikulutilira kugowokera ŵanyithu, nase Yehova watigowokerenge. Ntheura nyengo zose, tikwenera kuyezga Dada withu walusungu pa nkhani yakugowokera maubudi gha ŵanji.—Ŵazgani Salimo 103:12-14.