1, 2. (a) Chifukwa wuli ubatizo ngwakuzirwa chomene? (b) Kasi mukwenera kumanya vichi pambere mundabatizike, ndipo chifukwa wuli?

KASI ndimwe mwana uyo wakukhumba kubatizika? Usange ni nthena, manyani kuti para mwabatizika, muŵenge na mwaŵi ukuru chomene wakuteŵetera Yehova. Mu nkhani iyo yajumpha, tikawona kuti ubatizo ngwakuzirwa chomene. Ubatizo ukulongora kuti mwajipeleka kwa Yehova kuti mumuteŵeterenge umoyo winu wose na kuŵika khumbo lake pakwamba. Kweni mungabatizika pekha para mwawona kuti ndimwe ŵakwenelera, mwakhumba mwekha, ndiposo mwamanya ng’anamuro lakujipeleka kwa Chiuta.

² Kasi mungachita wuli usange mukumanya makora yayi kuti ndimwe ŵakunozgeka kubatizika? Wuli usange imwe mukukhumba kubatizika kweni ŵapapi ŵinu ŵakuti mulindilire dankha chifukwa chakuti ŵakukhumba kuti mukhwimeko dankha mwauzimu? Mulimose umo vingaŵira, lekani kugongowa. Wonani kuti uwu ni mwaŵi wakuti mukure mwauzimu kuti muzakaŵe ŵakwenelera kubatizika kunthazi. Apo mukukumbuka fundo iyi, ghanaghanirani  fundo zitatu izi: (1) ivyo mukugomezga, (2) vyakuchita vinu, na (3) kuwonga Yehova.

3, 4. Kasi ŵana ŵangasambirako vichi kwa Timote?

³ Jifumbani kuti: Chifukwa wuli nkhugomezga kuti Chiuta waliko? Chifukwa wuli nkhugomezga kuti Baibolo ni Mazgu gha Chiuta? Chifukwa wuli nkhuwona kuti ntchiwemi kulondezga malango gha Chiuta kuluska kutolera waka mafashoni gha mu charu? Mafumbo agha ghaleke kumugongoweskani. Kweni ghamovwireni kulondezga mazgu gha Paulosi ghakuti: “Mumanye khumbo la Chiuta, ilo ndiwemi, lakuzomerezgeka na lakufikapo.” (Rom. 12:2) Pakuti Ŵakhristu ŵa ku Roma ŵakalimanyanga kale khumbo la Chiuta, kasi ŵakeneranga kumanyaso vichi?

⁴ Ghanaghanirani za Timote. Iyo wakaghamanyanga makora Malemba. Anyina na abuya ŵake ndiwo ŵakamusambizga “kufuma pa ubonda.” Ndipouli, Paulosi wakachiska Timote kuti: “Lutilira kulondezga vinthu ivyo ukasambira ndipo ukakhorwa na kuvigomezga.” (2 Tim. 3:14, 15) Buku linyake likuti mazgu ghakuti ‘kukhorwa’ ghakung’anamura “kugomezga kuti chinthu chinyake ntchaunenesko.” Timote wakatora unenesko kuŵa wake. Iyo wakagomezganga ivyo wakasambira kuti ni vyaunenesko. Wakavigomezganga chifukwa chakuti wakaphalirika na anyina panji abuya ŵake yayi, kweni chifukwa chakuti payekha wakaghanaghanirangapo ndipo wakakhorwa.​—Ŵazgani Ŵaroma 12:1.

5, 6. Chifukwa wuli mwaŵana mukwenera kusambira kugwiliskira ntchito “nkhongono yinu ya kughanaghana”?

⁵ Kasi mungasambirako vichi kwa Timote? Panyake mwasambira unenesko kwa nyengo yitali kweni muchali mundabatizike. Usange ni nthena, jisandani kuti muwone chifukwa icho mukugomezgera ivyo mukusambira. Kujisanda kumovwiraninge kuti mulutilire kugomezga ivyo mukusambira, kweniso kuti muleke kuyegheka waka na ŵanyinu, mautesi gha charu, nesi makhumbiro ghinu.

⁶ Apo muchali ŵachoko, mukwenera kusambira kugwiliskira ntchito “nkhongono yinu ya kughanaghana.” Ntheura muzamuŵa ŵakunozgeka kuzgora makora ŵanyinu para ŵamufumbani mafumbo nga ghakuti: ‘Kasi mukumanya wuli kuti Chiuta waliko? Chifukwa wuli Chiuta wachitemwa wakuzomerezga kuti vinthu viheni vichitikenge? Kasi pali ukaboni wuli wakuti Chiuta walije jando panji kuti chiyambi?’ Para ndimwe ŵakunozgeka, mafumbo agha ghalopweskenge chipulikano chinu yayi, kweni ghamovwiraninge kuti mulimbikire chomene kusambira pamwekha.

7-9. Chigaŵa chakuti “Kasi Baibolo Likusambizgachi?” chingamovwirani wuli?

⁷ Para mukusambira Baibolo pa mwekha, mukhozgenge chipulikano chinu, muzgorenge makora mafumbo para ŵanyinu ŵamufumbani, kweniso mujikayikirenge yayi. (Mil. 17:11) Yehova wapeleka vinthu vinandi chomene ivyo vingamovwirani. Ŵanandi ŵasanga chandulo na mabuku ghithu agho ghakulongosora vya Mlengi na ivyo wali kulenga. Kweniso, ŵana ŵanandi ŵakukondwa chomene na chigaŵa chakuti, “Kasi Baibolo Likusambizgachi?” Chigaŵa ichi na vigaŵa vinyake vikovwira pakusambira Baibolo, ndipo mungavisanga pa webusayiti ya jw.org. Chigaŵa chilichose chili kunozgeka kuti chimovwirani kulutilira kugomezga ivyo mukusambira mu Baibolo.

⁸ Pakuti mukumanya ivyo Baibolo likusambizga, chimuŵiraninge chipusu kuzgora ghanyake mwa mafumbo agho ghakusangika pa chigaŵa ichi. Kweni chifukwa wuli mukukhorwa kuti mazgoro ghinu ngaunenesko? Chigaŵa ichi chingamovwirani kughanaghanirapo  pa malemba ghanandi gha mu Baibolo na kulemba maghanoghano ghinu. Chingamovwiraniso kunozgekera makora umo mungalongosolera ŵanyinu ivyo mukugomezga. Chigaŵa chakuti, “Kasi Baibolo Likusambizgachi?” chikovwira chomene ŵana kukhozga chipulikano chawo. Usange mukufika pa webusayiti ya jw.org, gwiliskirani ntchito chigaŵa ichi pa sambiro la mwaŵene.

⁹ Para mukulutilira kugomezga ivyo mukusambira, muŵenge na khumbo lakuti mubatizike. Mudumbu munyake wakati: “Pambere nindaghanaghanire kuti nibatizike, nkhasambira Baibolo ndipo nkhawona kuti nasanga chisopa chaunenesko. Zuŵa lililose, chipulikano chane chikakuranga.”

10. Kasi munthu uyo wakukhumba kubatizika wangalongora wuli kuti wali na chipulikano?

¹⁰ Baibolo likuti: ‘Chipulikano, usange chilije milimo, ntchakufwa.’ (Yak. 2:17) Ivyo munthu wakuchita ndivyo vikulongora kuti wakugomezga ivyo wakusambira. Kasi vyakuchita ivi ni vichi? Baibolo likuzgora kuti ni “makhaliro ghatuŵa na kuchita milimo iyo yikulongora kuti mukusopa Chiuta mwakujipeleka.”​—Ŵazgani 2 Petrosi 3:11.

11. Kasi mungalongora wuli “makhaliro ghatuŵa”?

¹¹ Mungalongora “makhaliro ghatuŵa” usange muli na nkharo yiwemi. Kasi imwe, muli na nkharo wuli? Ghanaghanirani ivyo mwachita mu myezi 6 iyo yajumpha. Kasi mwalongora wuli kuti ‘nkhongono zinu zakamanyiro’ zili kusambizgika kupambaniska pakati pa chiwemi na chiheni? (Heb. 5:14) Kasi mungakumbuka apo mukakumana na chiyezgo icho mukatonda? Kasi nkharo panji vyakuchita vinu ku sukulu vikulongora kuti mukugomezga ivyo mukusambira? Kasi mukuvumbura ivyo mukugomezga, panji mukubisa chifukwa chakopa kuti ŵanyinu ku sukulu ŵangamusekani? (1 Pet. 4:3, 4) Manyani kuti tose ndise ŵakwananga. Nanga ni awo ŵateŵetera Yehova kwa nyengo yitali, nyengo zinyake nawo ŵakopa kuvumbura chipulikano chawo. Ndipouli, munthu uyo wali kujipeleka kwa Yehova, wakunotha kumanyikwa na zina la Chiuta ndipo wakulongora kwizira mu vyakuchita vyake.

12. Kasi ni milimo wuli yinyake “iyo yikulongora kuti mukusopa Chiuta mwakujipeleka,” ndipo mukuyiwona wuli?

¹² Kasi ni milimo wuli “iyo yikulongora kuti mukusopa Chiuta mwakujipeleka”? Yinyake mwa milimo iyi ni iyo mukuchita pa mpingo winu, nga nkhuwungana na kupharazga. Kweniso vinyake ni iyo tikuchita kwa tekha nga nkhulomba na kusambira patekha. Munthu uyo wajipeleka kwa Yehova wakuwona milimo iyi kuŵa mphingo yayi. M’malo mwake, wakuchita nga ni Davide, uyo wakati: “Nkhukondwa kuchita khumbo linu, a Chiuta wane, dango linu lili mukati mwane.”​—Sal. 40:8.

13, 14. Kasi ni malo wuli agho ghangamovwirani kuchita milimo yakusopa Chiuta mwakujipeleka, ndipo ŵanyake ghaŵawovwira wuli?

¹³ Buku lachiŵiri la Zimene Achinyamata Amafunsa, pa peji 308 na 309 lili na malo ghakuti mulembapo ivyo mukukhumba kufiska. Pa mapeji agha pali mafumbo na malo ghakuti mulembepo mazgoro ghinu. Mafumbo ghanyake ni agha: “Para mukulomba, kasi mukuzunura mwakudunjika ivyo mukukhumba? Kasi ivyo mukulomba, vikulongora kuti mukumutemwa nadi Yehova? Kasi ni vichi vinyake ivyo mukuchita para mukusambira pamwekha? Kasi mukuluta mu upharazgi nanga ni para ŵapapi ŵinu ŵatondeka kuluta?” Mungalembaposo ivyo mukukhumba kuchita pa nkhani ya lurombo, kusambira pamwekha, na kupharazga.

¹⁴ Malo ghakulembapo agha ghawovwira ŵana ŵanandi awo ŵakukhumba kubatizika. Msungwana munyake zina lake Tilida, wakati: “Nkhalemba ivyo nkhakhumbanga kufiska pa umoyo wane, ndipo pachoko na pachoko  nkhafiska ivyo nkhakhumbanga. Pakati pajumpha chaka chimoza nkhaŵa wakwenelera kubatizika.” Patrick, uyo ni msepuka, wakati: “Nkhamanyanga ivyo nkhakhumbanga kuchita. Kweni kuvilemba kukanovwira kuti nilimbikire chomene kuvichita.”

15. Chifukwa wuli munthu wakwenera kujipeleka yekha kwa Yehova?

¹⁵ Fumbo linyake lakuti mughanaghanirepo ndakuti: “Kasi mungalutilira kuteŵetera Yehova nanga ni para ŵapapi na ŵabwezi ŵinu ŵaleka?” Kumbukani kuti para mwajipeleka na kubatizika, muteŵeterenge Yehova pa imwe mwekha. Palije uyo wangateŵetera Yehova mu malo mwa imwe, nanga ŵangaŵa ŵapapi ŵinu. Para muli na makhaliro ghatuŵa ndipo mukuchita milimo yakusopa Chiuta mwakujipeleka, ndikuti mwatora unenesko kuŵa winu. Kweniso vikulongora kuti mukukura mwauzimu ndipo mungaŵa ŵakwenelera kubatizika.

16, 17. (a) Kasi ni njani uyo ngwakwenelera kubatizika? (b) Yowoyani chiyelezgero icho chingamovwirani kuwonga Yehova nyengo zose chifukwa cha sembe ya Yesu.

¹⁶ Munthu munyake uyo wakamanyanga Dango la Mozesi, wakafumba Yesu kuti: “Kasi dango likuru chomene mu Malango ni ndi?” Yesu wakamuzgora kuti: “Utemwenge Yehova Chiuta wako na mtima wako wose na umoyo wako wose na maghanoghano ghako ghose.” (Mat. 22:35-37) Apa Yesu wakalongora kuti munthu uyo wakutemwa Yehova na wake mtima wose, wakwenera kuŵa na nkharo yiwemi na kubatizika. Chinthu chinyake icho chingamovwirani kulutilira kutemwa Yehova, nkhughanaghanira chawanangwa icho Yehova wali kutipa. Chawanangwa ichi ni sembe yakuwombora ya Mwana wake. (Ŵazgani 2 Ŵakorinte 5:14, 15; 1 Yohane 4:9, 19.) Kughanaghanira sembe ya Yesu na ivyo yikumuchitirani, kumovwiraninge kuti mulutilire kuwonga Yehova.

¹⁷ Kasi sembe yakuwombora mukuyiwona wuli? Yelezgerani kuti mwangubira mu maji na kwamba kukhapira, kweni munthu munyake wamuponoskani. Kasi imwe mungawera waka ku nyumba kwambura kumuwonga munthu uyu? Yayi. Kweni mujiwonenge kuti muli na ngongoli kwa munthu uyo wamuponoskani. Nyengo zose mumuwongenge chifukwa wamuponoskani. Mwakuyana waka, nase tili na ngongoli yikuru kwa Yehova na Yesu. Kwambura sembe yakuwombora, mphanyi waliyose wali kubira kwamuyirayira mu zakwananga na nyifwa. Kweni chifukwa chakuti Yehova wakutitemwa chomene, lekani tili na mwaŵi wakuzakakhala kwamuyirayira mu paradiso pa charu chapasi.

18, 19. (a) Chifukwa wuli mukwenera kopa yayi kujipeleka kwa Yehova? (b) Kasi kuteŵetera Yehova kwamovwirani wuli?

 ¹⁸ Kasi mukuwonga ivyo Yehova wakumuchitirani? Usange mukuwonga, ipo mukwenera kujipeleka kwa Yehova na kubatizika. Kumbukani kuti munthu uyo wajipeleka kwa Yehova wakulayizga kuti wachitenge khumbo la Yehova umoyo wake wose, visuzge viti wuli. Mungawopanga yayi kujipeleka kwa Yehova. Manyani kuti Yehova wakumukhumbirani viwemi, ndipo “wakuŵapa njombe awo ŵakumupenja na mtima wose.” (Heb. 11:6) Para mwajipeleka kwa Yehova na kubatizika, muŵenge ŵakukondwa. Muwukirano munyake wa vyaka 24 uyo wakabatizika wachali muchoko, wakati: “Nilindilirenge kuti nikure dankha, nate nimanyenge nadi vinthu vinandi. Kweni nkhasankha kujipeleka kwa Yehova na kubatizika apo nkhaŵa mwana, ndipo navikilirika kuti nileke kuyeyeka na vinthu vya charu.”

¹⁹ Yehova wakumukhumbirani viwemi, kweni Satana wakumukhumbirani viheni. Awo ŵakulondezga Satana ŵakondwenge kwamuyirayira yayi, chifukwa palije chiwemi icho Satana wangachitira ŵanthu. Nakuti Satana wakulindilira waka kuzakaparanyika. Ntheura palije chiwemi icho mungakhazga kufuma kwa Satana. Chinthu chikuru icho Satana wakukhumba ntchakuti muzakaparanyikire nayo lumoza.​—Chivu. 20:10.

20. Kasi mwaŵana, mungachita wuli kuti mujipeleke kwa Yehova na kubatizika? (Wonani bokosi lakuti, “ Nkhani Izo Zingamovwirani Kukura Mwauzimu.”)

²⁰ Tawona kuti chinthu chiwemi chomene icho mukwenera kuchita ndicho kujipeleka kwa Yehova. Kasi mwanozgeka kujipeleka? Para mwanozgeka lekani kuchedwa kubatizika. Kweni usange mukuwona kuti pasono mundanozgeke, londezgani masachizgo agho tasambira mu nkhani iyi kuti mukure mwauzimu. Paulosi wakalembera Ŵakhristu ŵa ku Filipi kuti: “Mulimose umo talutira panthazi, tiyeni tilutilire kwenda mwakwenelera munthowa yeneyiyi.” (Fil. 3:16) Para mungalondezga ulongozgi uwu, patolenge nyengo yayi kuti mujipeleke kwa Yehova na kubatizika.