1. Kasi ntchivichi icho chawovwira kuti milimo ya Yehova yendenge makora kufuma waka pakwamba?

YEHOVA na Yesu ŵalutilira kukolerana kufuma waka apo ŵakambira kulenga vinthu. Yehova wakalenga dankha Yesu pambere wandalenge vinthu vinyake vyose. Pamanyuma, Yesu wakamba kugwira ntchito na Yehova ndipo wakaŵa “pafupi nayo nga ni misiri.” (Zinth. 8:30) Kale, ŵanthu awo ŵakateŵeteranga Yehova nawo ŵakaŵa ŵakukolerana. Mwachiyelezgero, Nowa na mbumba yake ŵakakolerana pakuzenga chingalaŵa. Pamanyuma, Ŵaisrayeli ŵakakolerananga pakujintha chihema, kuchizgura para ŵakusama, na kuchinyamura. Pa tempile, Ŵaisrayeli ŵakakolerananga pakwimba sumu kuti ŵalumbe Yehova. Ŵanthu ŵa Yehova ŵakakwaniska kuchita milimo yose iyi chifukwa ŵakaŵa ŵakukolerana.​—Gen. 6:14-16, 22; Maŵa. 4:4-32; 1 Mid. 25:1-8.

2. (a) Chifukwa wuli Paulosi wakayaniska Ŵakhristu ŵakwambilira na thupi? (b) Kasi tidumbiskanenge mafumbo wuli mu nkhani iyi?

² Ŵakhristu ŵakwambilira nawo ŵakaŵa ŵakukolerana.  Paulosi wakalongosora kuti nangauli ŵakaŵa na maluso ndiposo milimo yakupambanapambana, kweni wose ŵakaŵa ŵakukolerana. Wose ŵakalondezganga Mulongozgi wawo, Yesu Khristu. Ntheura, Paulosi wakaŵayaniska na thupi ilo lili na viŵaro vinandi, kweni vyose vikukolerana pakugwira ntchito. (Ŵazgani 1 Ŵakorinte 12:4-6, 12.) Kasi ise mazuŵa ghano, tingachita wuli kuti tilutilire kukolerana pakupharazga? Kasi tingachita wuli kuti tilutilire kukolerana mu mpingo na mu mbumba zithu?

3. Kasi Yohane wakawona vichi mu mboniwoni?

³ Mpositole Yohane wakawona ŵangelo 7 mu mboniwoni awo ŵakalizganga mbata. Mungelo wachinkhondi wati walizga mbata yake, Yohane wakawona “nyenyezi iyo yikambotokera pa charu chapasi kufuma kuchanya.” Nyenyezi iyi yikaŵa na kiyi uyo yikajulira chizongwe. Mu chizongwe mukafuma josi linandi ndipo mu josi ili mukafuma zombe. Zombe likakanizgika kunanga makuni panji vyakumera, kweni likazomerezgeka kulanga “ŵanthu ŵekha awo ŵalije chidindo cha Chiuta pa visko vyawo.” (Chivu. 9:1-4) Yohane wakamanyanga kuti zombe lingananga vinthu vinandi nga umo likachitira ku Eguputo mu nyengo ya Mozesi. (Eks. 10:12-15) Zombe ilo Yohane wakawona mu mboniwoni likwimira Ŵakhristu ŵakuphakazgika awo ŵakupharazga uthenga wakuti chisopa chautesi chiparanyikenge. Ŵa mberere zinyake nawoso ŵakuchita mulimo wakupharazga. Ŵakhristu ŵakuphakazgika na ŵa mberere zinyake ŵakupharazga mwakukolerana. Mulimo wakupharazga wawovwira ŵanthu ŵanandi kuti ŵafume mu chisopa chautesi na kufwatuka mu mawoko gha Satana.

4. Kasi tili na mulimo wuli, ndipo tingawufiska wuli?

⁴ Tili na mulimo wakupharazga “makani ghawemi” pa charu chose pambere umaliro undize. Uwu ni mulimo ukuru chomene. (Mat. 24:14; 28:19, 20) Tikuchema ŵanthu awo ŵali na “nyota” kuti ŵamwe “maji gha umoyo kwawanangwa.” (Chivu. 22:17) Kweni ntchito iyi tingayifiska pekha para tikukolerana.​—Efe. 4:16.

5, 6. Kasi ni milimo wuli iyo tikuchitira pamoza?

⁵ Tingapharazgira ŵanthu ŵanandi makani ghawemi gha Ufumu para tikukolerana. Ulongozgi uwo tikupokera ku mpingo nga uwo tikupokera para tili pa ungano wakunozgekera uteŵeti ukutovwira kuti tipharazgenge makora. Para tamara ungano wa uteŵeti, tikuluta kukapharazgira ŵanthu makani ghawemi gha Ufumu. Ŵanthu tikuŵagaŵira mabuku ghakulongosora Baibolo, ndipo kufika pasono taŵagaŵira kale ghanandi. Nyengo zinyake tikuŵa na upharazgi wapadera. Para tikupharazga ndikuti tikukolerana na Ŵakhristu ŵanyithu pa charu chose chapasi awo nawo ŵakuchita mulimo uwu. Kweniso tikukolerana na ŵangelo awo ŵakutovwira pakupharazga makani ghawemi.​—Chivu. 14:6.

⁶ Tose tikukondwa para tikuŵazga Buku Lapachaka na kuwona umo mulimo wakupharazga ukwendera pa charu chose. Tikukondwaso kuti tikukolerana pa charu chose para tikuchemera ŵanthu ku maungano gha chigaŵa. Pa maungano agha, tose tikupokera uthenga wakuyana. Tikuŵa na nkhani, maseŵero, na viyezgelero ivyo vikutovwira kuti timuteŵetere makora Yehova. Tikuŵaso ŵakukolerana na ŵabali na ŵadumbu  ŵithu pa charu chose chapasi para tikusangika pa Chikumbusko cha nyifwa ya Yesu. (1 Kor. 11:23-26) Chaka chilichose pa Nisani 14, para zuŵa lanjira waka, tose tikuwungana kuti tilongore kuti tikuwonga ivyo Yehova wali kutichitira kweniso kulongora kuti tikupulikira dango la Yesu. Kweniso pambere Chikumbusko chindachitike, pa charu chose tikukolerana pa upharazgi wapadera wakuchemera ŵanthu ku Chikumbusko.

7. Chifukwa wuli tikwenera kukolerana pa ntchito yakupharazga?

⁷ Zombe limoza palekha lingachita kanthu yayi. Mwakuyana waka, nase patekha tingakwaniska yayi kupharazgira ŵanthu wose. Kweni chifukwa chakuti ndise ŵakukolerana, tikukwaniska kuphalira ŵanthu ŵanandi vya Yehova na kovwira ŵanyake kuti ŵambe kulumba Yehova na kumuchindika.

8, 9. (a) Kasi Paulosi wakayowoya chiyelezgero wuli kuti wawovwire Ŵakhristu kuŵa ŵakukolerana? (b) Kasi tingachita wuli kuti tilutilire kukolerana mu mpingo?

⁸ Paulosi wakalongosolera Ŵakhristu ŵa ku Efeso umo mpingo ukwendera, ndipo wakati wose mu mpingo ŵakwenera kukura “mu vinthu vyose.” (Ŵazgani Ŵaefeso 4:15, 16.) Paulosi wakayaniska mpingo na thupi kuti walongosore umo Mkhristu waliyose wangachitira kuti mpingo wose uŵe wakukolerana na kulutilira kulondezga Yesu, uyo ni Mulongozgi wa Mpingo. Iyo wakati viŵaro vyose vya thupi “vikukumana makora pamoza.” Kasi waliyose wangachita vichi kuti mpingo uŵe wakukolerana?

⁹ Yesu wali kwimika ŵalara kuti ŵalongozgenge mpingo, ndipo wakukhumba kuti ise tiŵachindikenge na kulondezga ulongozgi uwo ŵakutipa. (Heb. 13:7, 17) Nyengo zinyake chikuŵa chipusu yayi kupokera ulongozgi. Para vyaŵa nthena, tikwenera kulomba Yehova kuti watovwire. Mzimu wake utuŵa ungatovwira kuti tipulikire ulongozgi uliwose uwo ŵalara ŵangatipa. Kasi chingachitika ntchivichi para tikujiyuyura na kukolerana na ŵalara? Mpingo withu uŵenge wakukolerana ndipo tilutilirenge kutemwana.

10. Kasi ŵateŵeti ŵakovwira ŵakuchita milimo wuli kuti mpingo ulutilire kukolerana? (Wonani chithuzi chakwamba.)

¹⁰ Ŵateŵeti ŵakovwira nawo ŵakovwira kuti mpingo ulutilire kuŵa wakukolerana. Iwo ŵakovwira ŵalara, ndipo tikuwonga chomene ivyo ŵakuchita. Mwachiyelezgero, ŵateŵeti ŵakovwira ŵakuwoneseska kuti tili na mabuku ghakukwana ghakupharazgira, ŵakupokelera ŵalendo awo ŵakwiza pa maungano ghithu, na kupwelelera Nyumba ya Ufumu. Para tikukolerana na ŵabali aŵa, mpingo wose ukuŵa wakukolerana ndipo tikuteŵetera Yehova mu ndondomeko yiwemi.​—Yaniskani na Milimo 6:3-6.

11. Kasi ŵawukirano ŵakovwira wuli kuti mpingo ulutilire kukolerana?

¹¹ Ŵalara ŵanyake ŵateŵetera mu mpingo kwa vyaka vinandi. Kweni sono ŵanyake ŵakutondeka kuchita vinandi chifukwa cha uchekuru. Ŵabali awo mbawukirano ŵakwenera kovwirapo. Para ŵawukirano ŵasambizgika ŵangachita milimo yinandi mu mpingo. Kweniso ŵateŵeti ŵakovwira awo ŵakulimbikira milimo yawo, ŵangazakaŵa ŵalara munthazi. (1 Tim. 3:1, 10) Ŵalara ŵanyake awo mbawukirano ŵakuchita makora chomene mwauzimu. Ŵanyake ŵakuteŵetera nga mbalaŵiliri ŵa dera ndipo ŵakovwira ŵabali na ŵadumbu mu mipingo yinandi. Tikuŵawonga chomene ŵabali ŵawukirano awo ŵakujipeleka kuteŵetera ŵabali na ŵadumbu mu mpingo.​—Ŵazgani Salimo 110:3; Mupharazgi 12:1.

12, 13. Kasi tingachita wuli kuti tose mu mbumba tiŵe ŵakukolerana?

¹² Kasi tingachita wuli kuti tose mu mbumba tiŵe ŵakukolerana? Sabata yiliyose mbumba yithu yikwenera kuŵa na nyengo yakusopera. Usange ŵapapi na ŵana ŵakusambilira lumoza vya Yehova, ŵakulutilira kutemwana. Pa nyengo iyi, ŵangayezgelera umo ŵangapharazgira, ndipo kuchita nthena kukovwira kuti waliyose wapharazgenge mwaluso. Nyengo Yakusopera ya Mbumba yikovwiraso kuti waliyose mu mbumba watemwenge Yehova, ndipo mbumba yose yikuŵa yakukolerana chomene.

¹³ Yehova wakukhumba kuti mfumu na muwoli ŵakoleranenge. Usange wose ŵakutemwa Yehova na kumuteŵetera lumoza, ŵaŵenge ŵakukondwa ndipo ŵalutilirenge kukolerana. Kweniso ŵakwenera kutemwana nga ni umo ŵakatemwerananga Abrahamu na Sara, Yisake na Rabeka, ndiposo Elikana na Hana. (Gen. 26:8; 1 Sam. 1:5, 8; 1 Pet. 3:5, 6) Para mfumu na muwoli ŵakutemwana, ŵakuŵa ŵakukolerana na kuŵa paubwezi wakukhora na Yehova.​—Ŵazgani Mupharazgi 4:12.

14. Usange mfumu panji muwoli winu ni kaboni yayi, kasi mungachita vichi kuti mbumba yinu yilutilire kuŵa yakukhora?

¹⁴ Baibolo likukana kutorana na munthu uyo wakusopa Yehova yayi. (2 Kor. 6:14) Ndipouli, pali ŵabali na ŵadumbu ŵanyake awo ŵali kutorana na munthu uyo ni Kaboni wa Yehova yayi. Ŵanyake ŵakasambira unenesko uku ŵali pa nthengwa kale ndipo munyawo wa mu nthengwa wandasambire. Ŵanyake apo ŵakatorananga, wose ŵakaŵa Ŵakaboni ŵa Yehova kweni munyawo ndiyo wali kuchita kuleka mpingo. Para vyaŵa nthena, Ŵakhristu ŵakuchita chilichose icho ŵangakwaniska kulondezga ulongozgi wa mu Baibolo kuti ŵasungilire mbumba yawo kuŵa yakukhora. Nyengo zinyake chikuŵa chipusu yayi kuchita nthena. Mwachiyelezgero, Mary na mfumu wake David ŵakateŵeteranga Yehova lumoza. Pamanyuma, David wakaleka kuwungana. Kweni Mary wakalutilira kuchindika mfumu wake na kulondezga malango gha mu Baibolo. Wakasambizga ŵana ŵake 6 vya Yehova, ndipo wakalutilira kuwungana na mpingo kweniso kusangika pa maungano ghakuru. Ŵana ŵakati ŵakura na kuwukapo pa nyumba, Mary wakalutilira kuwungana nangauli wakalutanga yekha ku maungano. Kweni pamanyuma, David wakamba kuŵerenga magazini agho Mary wakamulekeranga. Mukuluta kwa nyengo, wakambaso kuluta ku maungano ghanyake. Nyengo zose muzukuru wake wa vyaka 6 wakamusungiranga mpando. Para David wandalute ku maungano, muzukuru wake wakamuphaliranga kuti, “Nangumusoŵani ku maungano muhanya uno asekuru.” Pakati pajumpha vyaka 25, David wakawelera kwa Yehova. Pasono, David na muwoli wake mbakukondwa kuti ŵakuteŵeteraso lumoza Yehova.

15. Kasi awo ŵakatorana ni kale ŵangawovwira wuli awo ŵatorana mwasonosono?

¹⁵ Mazuŵa ghano, Satana wakuwukira chomene mbumba. Lekani ntchiwemi kuti mfumu na muwoli awo ŵakuteŵetera Yehova ŵakwenera kukolerana chomene. Kwali mwakhala mu nthengwa kwautali wuli, nyengo zose mughanaghanirenge ivyo mungayowoya panji kuchita kuti mukhozge nthengwa yinu. Usange imwe mwakhala mu nthengwa kwa vyaka vinandi, mungaŵa chakuwonerapo chiwemi kwa awo ŵatorana sonosono. Pa kusopa kwinu kwa mbumba, nyengo  zinyake mungachemerako awo ŵatorana sonosono. Ichi chingaŵawovwira kumanya kuti nyengo zose ŵakwenera kutemwana na kukolerana, kwali ŵakhalenge nyengo yitali wuli mu nthengwa.​—Tito 2:3-7.

16, 17. Kasi awo ŵakuteŵetera Yehova mwakukolerana ŵakulindizga vichi?

¹⁶ Ŵaisrayeli ŵakakolerananga para ŵakuluta ku Yerusalemu kuti ŵakaŵepo pa viphikiro ivyo vikachitikiranga pa tempile. Iwo ŵakanozgekeranga na kunyamura chilichose icho chikakhumbikwiranga pa ulendo wawo. Ŵakenderanga lumoza na kovwirana. Para ŵali pa tempile, ŵakalumbanga na kusopa Yehova mwakukolerana. (Luka 2:41-44) Nase apo tikunozgekera umoyo wa mu charu chiphya, tikwenera kuchita chilichose kuti tilutilire kukolerana. Kasi imwe mukughanaghana kuti mungachita vichi kuti mulutilire kukolerana na ŵanyinu?

¹⁷ Ŵanthu ŵanandi mu charu ichi ŵakukolerana yayi ndipo nyengo zinyake ŵakutimbana. Kweni ise tikuwonga chomene Yehova kuti watovwira kuŵa pa mtende kweniso kuti timanye unenesko. Pa charu chose chapasi, ŵanthu ŵa Yehova ŵakusopa mwakukolerana. Nakuti mu mazuŵa gha kuumaliro agha, ŵanthu ŵa Yehova mbakukolerana chomene kuluska kumanyuma kose. Nga umo uchimi wa Yesaya na Mika ukuyowoyera, tose tikukwelera ku “phiri la Yehova” mwakukolerana. (Yes. 2:2-4; ŵazgani Mika 4:2-4.) Mu charu chiphya tizamukondwa chomene chifukwa ŵanthu wose pa charu chapasi ŵazamuŵa ŵakukolerana pakusopa Yehova.