KWAMBA pa Mande, Seputembala 1, 1919, ku Cedar Point, Ohio, U.S.A, kukachitika ungano ukuru. Ungano uwu ukaŵa wa mazuŵa 8. Mise ya zuŵa lakwamba, ŵanthu pafupifupi 1,000 ŵakawungana mu holo iyo yikakwananga ŵanthu 2,500, ndipo ŵanyake 2000 ŵakiza usiku. Pa ŵanthu awo ŵakiza usiku, ŵanyake ŵakenda pa boti, galimoto, na sitima. Pa Chiŵiri, chiŵerengero cha ŵanthu awo ŵakiza ku ungano uwu chikakura chomene, ntheura ŵakamba kuchitira pawaro m’paka apo ungano ukamalira.

Ŵanthu wakakhalanga mu mfwiri wa makuni. Kamphepo nako kakaputanga makora kufumira ku Nyanja ya Erie. Mubali munyake wakati: “Tikaŵa nga tili ku malo ghanyake ghakutowa chomene kweniso ghambura chiwawa. Nakuti tikaŵa nga tili waka mu paradiso.”

Ŵanthu wose pa ungano uwu ŵakaŵa ŵakukondwa chomene. Nyuzipepara yinyake yikati: “Ŵanthu wose ŵakalongora kuti ŵakutemwa chomene kusopa, ndipo ŵakaŵa ŵakukondwa kwa maseŵera cha!” Ŵasambiri ŵa Baibolo ŵakakondwa kuti ŵali na mwaŵi wakuwungana na ŵabali ŵawo pamanyuma pakuti ŵatambuzgika kwa vyaka vinandi. Ŵasambiri ŵa Baibolo aŵa ŵakasuzgika chifukwa cha nkhondo, uchigaluka uwo ukaŵa mu mpingo, kujalika kwa Beteli ya Brooklyn, kujalirika mu jele kwa ŵabali na ŵadumbu chifukwa cha ntchito yakupharazga. Kweniso ŵabali 8 awo ŵakalongozganga mulimo uwu pa nyengo iyo ŵakajalirika kwa vyaka 20. *

Ŵasambiri ŵa Baibolo ŵanyake ŵakagongowa na kuleka kupharazga chifukwa cha kutambuzgika. Ndipouli, ŵanyake ŵakazizipizga na kulutilira kupharazga. Munthu munyake wakufufuza nkhani wakati Ŵasambiri ŵa Baibolo ŵakakosera kuti ŵalekenge yayi kupharazga mazgu gha Chiuta m’paka umaliro wize, nangauli boma likuti ŵaleke.

Pa nyengo ya nthambuzgo iyi, Ŵasambiri ŵa Baibolo awo ŵakalutilira kugomezgeka ŵakawona kuti Fumu, Yesu Khristu, yikuŵalongozga na kuŵalombera kuti Yehova walutilire kuŵawovwira. Lekani ŵasambiri aŵa ŵakasangaso mwaŵi wakuwungana pamoza pa ungano wakukondweska uwu ku Cedar Point. Mudumbu munyake wakati ŵabali na ŵadumbu ŵanandi ŵakakondwa chomene kuti mulimo wakupharazga wambaso kwenda makora. Nakuti wose ŵakaŵa ŵakunweka kuchita mulimo wakupharazga kuluska chilichose.

Kwa sabata yathunthu, ŵanthu awo ŵakiza pa ungano  uwu ŵakazizikika na mazgu ghakuti “GA.” Mazgu agha ghakalembeka pa pulogiramu ya ungano, tumapepara twakupokelelera ŵanthu, na vikhwangwani vyose ivyo vikaŵa pa malo gha ungano. Pa Chinkhondi, ŵanthu 6000 awo ŵakawungana ŵakaŵa ŵakunweka kuti ŵamanye ivyo mazgu ghakuti “GA” ghakang’anamuranga. Pa zuŵa ili ilo likaŵaso “Zuŵa Lakukumbukira Ŵanthu Ŵapantchito,” Mubali Joseph F. Rutherford wakavumbura ng’anamuro la mazgu agha. Mubali Rutherford wakati mazgu ghakuti “GA” ghakwimira The Golden Age, iyo yikaŵa magazini yiphya yakupharazgira. *

Pakuyowoya vya Ŵakhristu wose ŵakuphakazgika, Mubali Rutherford wakati: ‘Chipulikano chikaŵawovwira kuti ŵazizipizge masuzgo na kuwona nyengo yakuwusa kwa Mesiya, iyo ni Fumu yauchindami. Kweniso ŵakuwona kuti mulimo wawo ukuru nkhuphalira ŵanthu ivyo Mesiya wazamuchita. Nakuti ni mwaŵi kuchitako mulimo uwu chifukwa Chiuta ndiyo wakuŵatuma kuti ŵapharazgenge.’

Magazini ya The Golden Age yikawovwira Ŵasambiri ŵa Baibolo kumanya fundo zaunenesko za mu Baibolo, kuŵa na chigomezgo chiwemi chamunthazi, kweniso chikanga. Magazini iyi yikaŵawovwiraso kuti ŵambe kupharazga ku nyumba na nyumba, iyo yikaŵa nthowa yiphya yakupharazgira. Ŵakati ŵafumbika kuti mbalinga awo ŵakukhumba kuchitako mulimo wakupharazga, wose ŵakimilira na kuzomera mwakukondwa kuti ŵapharazgenge. Ŵalondezgi wose ŵa Yesu ŵakimba mwakukondwa kweniso na mtima wose sumu yakuti: “Fumu yithu, tumani ungweru winu na unenesko.” Mubali Judge Milton Norris wakati: “Ŵabali na ŵadumbu ŵakabangura na charu ndikundiku.”

Ŵasambiri ŵa Baibolo pafupifupi 7,000 ŵakaŵa ŵakunozgeka kuchita mulimo wakupharazga. Pakaŵa tumabuku tuŵiri, Organization Method na To Whom the Work Is Entrusted, uto tukalongosora kuti ntchito yakupharazga yilongozgekenge na Dipatimenti Yiphya ya Uteŵeti. Kweniso pa mpingo uliwose pakwenera kuŵa Komiti ya Uteŵeti na mubali wakupeleka ulongozgi. Pakeneranga kupangika vigaŵa vyakupharazgako ndipo chigaŵa chilichose chikeneranga kuŵa na nyumba pakati pa 150 na 200. Tumabuku utu tukalongosoraso kuti pakwenera kuŵa ndondomeko yakuti zuŵa lililose la Chinayi mise, Ŵasambiri ŵa Baibolo ŵaŵenge na Ungano wa Uteŵeti. Pa ungano uwu ŵakeneranga kudumbiskana ivyo vikuŵachitikira para ŵakupharazga, na kupeleka lipoti lauteŵeti.

Mubali Herman Philbrick wakati: “Tikati tawelera ku nyumba, tose tikatangwanika na mulimo wakupharazga ku nyumba na nyumba.” Kulikose uko ŵakapharazganga, ŵakasanganga ŵanthu ŵakunweka. Mudumbu Beulah Covey wakati: “Ŵanthu wose ŵakatipokeleranga makora. Kweniso ŵanandi ŵakaŵa na chitima chifukwa chakusuzgika na nkhondo. Ntheura ŵakaŵa ŵakunweka na uthenga wakuti para Yesu wamba kulamulira masuzgo ghose ghazamumara.” Mubali Arthur Claus wakalemba kuti: “Mpingo wose ukazizwa chomene chifukwa cha unandi wa magazini agho tikagaŵira.” Pa myezi yiŵiri pera, pakagaŵika magazini pafupifupi 500,000 gha The Golden Age, ndipo ŵanthu ŵakukwana 50,000 ŵakalembeska kuti ŵapokerenge magazini iyi mwezi uliwose.

Gongwe la Mulinda la Chingelezi la Julayi 1, 1920 likaŵa na nkhani yamutu wakuti, “Makani Ghawemi Gha Ufumu.” Mubali A. H. Macmillan wakayowoya kuti nkhani iyi yikaŵa yakwamba kuti gulu la Yehova lichiske ŵabali na ŵadumbu pa charu chose kuti ŵapharazgenge vya Ufumu wa Chiuta. Nkhani iyi yikachiska Ŵakhristu ŵakuphakazgika wose kuti ŵakwenera ‘kumanyiska charu chose kuti ufumu wakuchanya waneng’enera.’ Mazuŵa ghano, ŵabali ŵa Khristu “awo ŵali kupika mulimo” wakupharazga, ŵakovwirika na ŵabali na ŵadumbu ŵanandi awo ŵakulindizga kuzakakhala pa charu chapasi mu Ufumu wa Mesiya.