1-2. (a) Chifukwa wuli awo ŵatorana waka sono ŵakwenera kugomezga Yehova? (Salimo 37:3, 4) (b) Kasi tiwonenge vichi mu nkhani iyi?

KASI muli pafupi kutora panji kutengwa, panji mwatorana waka mwasonosono? Usange ndimo viliri, tikukayika yayi kuti mukukhumba kuti mukondwenge na munyinu uyo mukumutemwa chomene. Mbunenesko kuti nthengwa yili na masuzgo ghake, ndipo imwe mwanjira waka mu nthengwa sono muli na vinthu vyakuzirwa vyakuti musankhe. Umo muchitirenge para mwasangana na masuzgo kweniso ivyo musankhenge kuchita, ndivyo vilongorenge usange muŵenge ŵakukondwa kwa vyaka vinandi panji yayi. Usange mukugomezga Yehova, musankhenge vinthu mwamahara, nthengwa yinu yiŵenge yakukhora, ndipo muŵenge ŵakukondwa. Kweni usange mulondezgenge yayi ulongozgi wa Chiuta pakusankha vinthu, musanganenge na masuzgo ghanandi agho ghahangayiskenge nthengwa yinu ndipo muŵenge ŵakukondwa yayi.​—Ŵazgani Salimo 37:3, 4.

² Nangauli nkhani iyi yikuyowoya chomene za awo ŵanjira sono mu nthengwa, kweni yikuyowoyaso za masuzgo agho ŵanthu wose ŵakutorana ŵakusangana nagho. Ndipo nkhani iyi, yikuyowoyaso ivyo tingasambirako ku ŵanalume na ŵanakazi ŵakugomezgeka awo ŵali kulembeka mu Baibolo. Nakuti ivyo tisambirengeko ku ŵanthu aŵa, nase tingavigwiliskira ntchito munthowa zakupambanapambana pa umoyo withu, kusazgapo na mu nthengwa wuwo. Tiwonengeso ivyo tingasambirako ku ŵakutorana ŵa mu nyengo yithu yino.

3-4. Kasi awo ŵatorana waka sonosono ŵangasangana na masuzgo wuli?

³ Ŵanthu ŵanyake ŵangachiska awo ŵatorana waka sono kuti ŵakhalenge umoyo wawo nga umo ŵanandi ŵakukhalira mazuŵa ghano. Mwachiyelezgero, ŵapapi na ŵachibali, ŵangamba kuchichizga ŵakutorana kuti ŵambe kubaba ŵana mwaluŵiro. Kweniso panji ŵabwezi na ŵamumbumba ŵangamba kuchiska awo ŵatorana waka kuti ŵazenge panji ŵagure nyumba yikuru kweniso kuti ŵaŵe na katundu munandi.

⁴ Para ŵakutorana ŵangaŵa maso yayi, ŵangasankha vinthu ivyo vingaŵanjizga mu ngongoli zinandi. Ndipo ivi vingachitiska kuti wose mfumu na muwoli ŵambe kugwira ntchito kwa maora ghanandi kuti ŵawezge ngongoli izi. Kweniso chifukwa chakuti ŵakutangwanika chomene na ntchito, ŵangamba kuŵa na nyengo yichoko yakusambilira Baibolo paŵekha, kusopa kwa mbumba kweniso kupharazga. Ndiposo ŵangamba kukhala ku maungano kuti ŵasazgireko nyengo yakugwilira ntchito na chilato chakuti ŵasange ndalama zinandi kweniso kuti panji ŵasungilire ntchito zawo. Ntheura ivi vingapangiska kuti ŵatondeke kusazgirako uteŵeti wawo.

5. Kasi mukusambirako vichi kwa Klaus na Marisa?

⁵ Kafukufuku wakulongora kuti para tikuŵika mtima withu wose kuti tisange vinthu vinandi vyakuthupi tikuŵa ŵakukondwa yayi. Wonani ivyo ŵakutorana ŵanyake, Klaus na Marisa, ŵakasambirapo pa nkhani iyi. * Ŵati ŵatorana waka, wose ŵakagwiranga ntchito kuti ŵasange ndalama na vinthu vinandi. Kweni ŵakaŵa ŵakukondwa zanadi yayi. Klaus wakuti: “Tikaŵa na vinthu vinandi vyakuthupi kujumpha ivyo tikakhumbikwiranga, kweni tikaŵavya chilato chilichose chauzimu. Kuyowoya unenesko, vinthu vikendanga makora yayi pa umoyo withu.” Panyake namwe mwajiwonera mwekha kuti kuŵika mtima pakusanga vinthu vyakuthupi kundamovwirani kuŵa ŵakukhorwa. Usange ni nthena, kugongowa yayi. Kusambirako ku ŵanthu awo ŵakachita makora pa nkhani iyi kungamovwirani. Chakwamba, tiyeni tiwone ivyo ŵafumu ŵangasambirako kwa Themba Yehoshafati.

6. Kasi Themba Yehoshafati likalondezga wuli ulongozgi wa pa Zintharika 3:5, 6, apo likakumana na suzgo likuru?

⁶ Ŵafumu, kasi nyengo zinyake mukufipa mtima na maudindo agho muli nagho? Usange ni nthena, mungasambirako kwa Themba Yehoshafati. Pakuŵa themba, Yehoshafati wakaŵa na udindo wakuvikilira ŵanthu wose. Kasi wakachita wuli kuti wafiske udindo ukuru uwu? Yehoshafati wakachita vyose ivyo wangafiska kuti wavikilire ŵanthu ŵake. Wakakhozga misumba ya Yuda na kunozgekereska wumba ukuru wa ŵasilikari ŵakujumpha 1,160,000. (2 Mid. 17:12-19) Pamanyuma, Yehoshafati wakasangana na suzgo likuru. Wumba ukuru wa ŵasilikari ŵa Ŵaamoni, Ŵamowabu na ŵanalume ŵa mu chigaŵa cha mapiri cha Seyiri,  ŵakamofya iyo, mbumba yake na ŵanthu ŵake. (2 Mid. 20:1, 2) Kasi Yehoshafati wakachita wuli? Wakapempha Yehova kuti wamovwire na kumupa nkhongono. Ivi vikakolerananga na ulongozgi wavinjeru uwo ukusangika pa Zintharika 3:5, 6. (Ŵazgani.) Lurombo lwa kujiyuyura lwa Yehoshafati ulo luli pa 2 Midauko 20:5-12, lukulongora kuti wakagomezganga chomene Yehova. Kasi Yehova wakazgora wuli lurombo lwa Yehoshafati?

7. Kasi Yehova wakazgora wuli lurombo lwa Yehoshafati?

⁷ Yehova wakayowoya na Yehoshafati kwizira mwa Mulevi munyake zina lake Yahaziyeli. Yehova wakati: “Muŵe mu malo ghinu, mwimilire waka chete, muwone chiponosko cha Yehova kwa imwe.” (2 Mid. 20:13-17) Kweni ulongozgi uwu ukaŵa wachilendo, chifukwa nkhondo ndimo ŵakutimbira yayi nthena. Ndipouli, ulongozgi uwu ukafuma kwa munthu yayi, kweni ukafuma kwa Yehova. Chifukwa chakuti Yehoshafati wakagomezganga Chiuta, wakapulikira ulongozgi uwu. Iyo na ŵanthu ŵake ŵati ŵaluta kuti ŵakakumane na ŵalwani ŵawo, Yehoshafati wakaŵika ŵasilikari ŵaluso panthazi yayi, kweni wakaŵikapo ŵakwimba awo ŵakaŵavya chilwero chilichose. Yehova wakasungilira layizgo lake kwa Yehoshafati, wakathereska ŵalwani ŵawo.​—2 Mid. 20:18-23.

8. Kasi ŵafumu ŵangasambirako vichi kwa Yehoshafati?

⁸ Ŵafumu, mungasambirako kwa Yehoshafati. Muli na udindo wakupwelelera mbumba yinu, ntheura mulimbikirenge kuyipwelelera na kuyiwovwira. Para mwasangana na masuzgo, nyengo zinyake mungawona kuti mungamazga masuzgo agho pamwekha. Kweni mungagomezganga nkhongono zinu yayi. M’malo mwake, pamwekha mulombani Yehova kuti wamovwirani. Mwakusazgirapo, mulombenge kufumira pasi pamtima pamoza na muwoli winu. Penjani ulongozgi wakufuma kwa Yehova, kwizira mu Baibolo na mabuku agho gulu la Chiuta likutipa, ndipo mulondezgenge ulongozgi uwo mwasanga. Ŵanyake ŵangakolerana yayi na ivyo mwasankha kuchita pakulondezga ulongozgi wa mu Baibolo, ndipo panji ŵangamuphalirani kuti mukughanaghana makora yayi. Ŵangamuphalirani kuti ndalama na katundu ndivyo vingavikilira chomene mbumba yinu. Kweni kumbukani umo wakachitira Yehoshafati. Iyo wakagomezga Yehova ndipo wakalongora ivi kwizira mu vyakuchita vyake. Yehova wakamutaya yayi munthu wakugomezgeka uyu, namweso wamutayaninge yayi. (Sal. 37:28; Heb. 13:5) Kasi ntchivichi chinyake icho ŵakutorana ŵangachita kuti ŵaŵenge ŵakukondwa pa umoyo wawo?

9. Kasi tingati ntchimi Yesaya na muwoli wake ŵakazirwiskanga vichi?

⁹ Ntchimi Yesaya na muwoli wake, mtima wawo wose ukaŵa pakuteŵetera Yehova. Yesaya wakaŵa ntchimi ndipo panyake muwoli wake nayo uteŵeti wake ukwenera kuti ukaŵa wakukhwaskana na vyakuchima vyenevivi, chifukwa wakuchemeka kuti “ntchimi yanakazi.” (Yes. 8:1-4) Ivi vikulongora kuti Yesaya na muwoli wake ŵakaŵikanga mtima pa kusopa Yehova. Ichi ntchiyelezgero chiwemi chomene ku awo ŵali pa nthengwa mazuŵa ghano.

10. Kasi kusambira mauchimi gha mu Baibolo kungawovwira wuli ŵakutorana kuŵikapo mtima chomene kuchitira Yehova vyose ivyo ŵangafiska?

¹⁰ Ŵakutorana mazuŵa ghano ŵangayezga Yesaya na muwoli wake mwakuchita vyose ivyo ŵangafiska pakuteŵetera Yehova. Ŵangakhozga chigomezgo chawo mwa Yehova mwakusambira mauchimi gha mu Baibolo lumoza na kuwona umo ghakufiskikira. * (Tito 1:2)  Ŵangaghanaghaniraso ivyo ŵangachita kuti ŵawovwirepo kufiska mauchimi ghanyake gha mu Baibolo. Mwachiyelezgero, ŵangawovwirapo kufiska uchimi wa Yesu wakuti, makani ghawemi gha Ufumu ghazamupharazgika mu charu chose chapasi pambere umaliro undize. (Mat. 24:14) Ntheura para ŵakutorana ŵakugomezga kuti mauchimi gha mu Baibolo ghafiskikenge nadi, ndipo ŵangaŵikapo mtima chomene kuti ŵamuchitire Yehova vyose ivyo ŵangafiska.

11. Kasi Prisila na Akwila ŵakafiska kuchita vichi, ndipo chifukwa wuli?

¹¹ Awo ŵanjira waka sono mu nthengwa, ŵangasambirako kwa Prisila na Akwila, mbumba Yachiyuda iyo yikakhalanga mu msumba wa Romu. Ŵakapulika za uthenga uwemi wakukhwaskana na Yesu ndipo ŵakazgoka Ŵakhristu. Tikukayika yayi kuti ŵakaŵa ŵakukhorwa pa umoyo wawo. Kweni umoyo wawo ukasintha mwamabuchi apo Themba Kilaudiyo likalangura kuti Ŵayuda wose ŵafumemo mu Romu. Ghanaghanirani waka ivyo ichi chikang’anamuranga kwa Akwila na Prisila. Ŵakeneranga kuleka malo agho ŵakazgoŵera, kusanga malo ghanyake ghakukhala, na kwambiraso bizinesi yawo ya kupanga mahema ku malo ghachilendo. Kweni kasi masuzgo agha ghakaŵapangiska kuti ŵaleke kuŵika pakwamba vinthu vya Ufumu? Mukwenera kuti mukumanya kale zgoro la fumbo ili. Ku Korinte uko ŵakasamira, Akwila na Prisila ŵakamba kovwira mpingo uwo ŵakawungananga ndipo ŵakateŵeteranga lumoza na mpositole Paulosi kukhozga ŵabali. Pamanyuma, ŵakasamirangaso mu misumba yinyake umo mukakhumbikwiranga ŵapharazgi ŵanandi. (Mil. 18:18-21; Rom. 16:3-5) Ŵakaŵa na umoyo wakukhorweska kweniso wa chandulo.

12. Chifukwa wuli ŵakutorana ŵakwenera kujiŵikira vilato?

¹² Ŵakutorana mazuŵa ghano ŵangayezga Prisila na Akwila para ŵakuŵika pakwamba vinthu vya Ufumu. Nyengo yiwemi chomene iyo ŵangadumbiskirana ivyo ŵakukhumba kuzakachita pa umoyo wawo, ni pambere ŵandatorane. Para ŵakutorana ŵakujiŵikira vilato vyauzimu na kuyezgayezga kuvifiska, ŵakuŵa na mwaŵi unandi wakuti Yehova wangaŵawovwira pa umoyo wawo. (Muph. 4:9, 12) Wonani ivyo wakachita Russell na muwoli  wake Elizabeth. Russell wakuti, “Panyengo iyo tikaŵa pa chibwezi, tikadumbiskiranathu vilato vithu vyauzimu.” Elizabeth wakuti, “Tikadumbiskiranathu ivi na chilato chakuti, para pizengeso chinthu chinyake icho chikhumbikwirenge kuti tisankhe, chileke kutitondeska kufiska vilato vithu ivyo tikasankha kale.” Kujiŵikira vilato kukawovwira Russell na Elizabeth kusamira ku Micronesia, kukateŵetera uko kukakhumbikwanga ŵapharazgi ŵanandi.

13. Kuyana na Salimo 28:7, kasi chichitikenge ntchivichi para tikugomezga Yehova?

¹³ Nga ni Russell na Elizabeth, ŵakutorana ŵanandi ŵali kusankha kuleka kukhumba vinandi pa umoyo mwakuti ŵamalire nyengo yawo yinandi pa mulimo wakupharazga na kusambizga. Para ŵakutorana ŵajiŵikirenge vilato vyakuti ŵateŵetere Yehova na kuyezgayezga kuvifiska, ŵasangenge vyandulo vinandi. Ŵajiwonerenge ŵekha umo Yehova wakuŵapwelelera, ndipo chigomezgo chawo mwa iyo chikurenge chomene kweniso ŵaŵenge ŵakukondwa zanadi.​—Ŵazgani Salimo 28:7.

14. Kasi mpositole Petrosi na muwoli wake ŵakalongora wuli kuti ŵakagomezganga layizgo ilo likusangika pa Mateyu 6:25, 31-34?

¹⁴ Ŵakutorana ŵangasambirakoso kwa mpositole Petrosi na muwoli wake. Pati pajumpha myezi 6 kufuma apo wakakumana na Yesu kakwamba, mpositole Petrosi wakeneranga kusankha chinthu chakuzirwa chomene. Petrosi wakachitanga ulovi kuti wapwelelere mbumba yake. Ntheura apo Yesu wakaphalira Petrosi kuti waŵe mulondezgi wake, Petrosi wakeneranga kughanaghanira mbumba yake para wakusankha chakuchita. (Luka 5:1-11) Petrosi wakasankha kulondezga Yesu na kuchita mulimo wakupharazga. Apa wakasankha mwamahara. Ndipo tili na vifukwa vyakupulikikwa vyakuyowoyera kuti muwoli wake wakakhozgera ivyo iyo wakasankha. Baibolo likulongora kuti nyengo yati yajumphapo kufuma apo Yesu wakawuskikira, nyengo zinyake Petrosi na muwoli wake ŵakenderanga lumoza. (1 Kor. 9:5) Tikukayika yayi kuti wakaŵa muwoli muwemi Wachikhristu, ndipo ivi vikawovwira kuti Petrosi waŵe na wanangwa ukuru wakuyowoya. (1 Pet. 3:1-7) Ntchakuwonekerathu kuti wose Petrosi na muwoli wake, ŵakagomezganga layizgo la Yehova lakuti waŵapenge ivyo ŵakukhumbikwira para ŵakuŵika vinthu vya Ufumu pakwamba pa umoyo wawo.​—Ŵazgani Mateyu 6:25, 31-34.

15. Kasi mukusambirako vichi kwa Tiago na Esther?

¹⁵ Usange mwakhala vyaka vichoko waka mu nthengwa, kasi mungachita wuli kuti muŵe na khumbo la kusazgirako uteŵeti? Nthowa yimoza nkhusambirako ku ivyo ŵakuchita ŵakutorana ŵanyake. Mwachiyelezgero, mungaŵazga nkhani zakuti “Ŵakajipeleka na Mtima Wose.” Nkhani zanthena izi, zikawovwira Tiago na muwoli wake Esther ŵa ku Brazil, kukateŵetera uko kukakhumbikwanga ŵapharazgi ŵanandi. Tiago wakuti: “Tati taŵazga umo Yehova wawovwilira ŵateŵeti ŵake mu nyengo yithu yino, nase tikakhumbanga kulondezga ulongozgi wa Yehova na kuwona wovwiri wake.” Nyengo yichoko waka ŵakasamira ku Paraguay, mu chigaŵa icho ŵanthu ŵakuyowoya Chiphwitikizi. Ndipo ŵateŵetera mu chigaŵa ichi kufuma mu 2014 m’paka sono. Esther wakuti: “Lemba limoza ilo tose tikulitemwa chomene nda Ŵaefeso 3:20. Kanandi waka tawona mazgu gha pa lemba ili ghakufiskika pa uteŵeti withu.” Mu kalata yakuluta ku Ŵaefeso iyi, Paulosi wakalayizga kuti Yehova wakutipa vinandi kuluska ivyo tapempha. Layizgo ili ndaunenesko nadi.

16. Kasi awo ŵatorana waka sono ŵangafumba nkhu ulongozgi usange ŵakukhumba kujiŵikira vilato pa umoyo wawo?

 ¹⁶ Awo ŵatorana waka mwasonosono ŵangasambirako ku ŵanji awo ŵali kusambira kugomezga chomene Yehova. Ŵakutorana ŵanyake ŵachita uteŵeti wanyengozose kwa vyaka vinandi chomene. Mwalekerachi kuŵafumba ulongozgi para mukughanaghanira za kujiŵikira vilato? Iyi ni nthowa yimoza iyo mungalongolera kuti mukugomezga Yehova. (Zinth. 22:17, 19) Ŵalara nawo ŵangawovwira awo ŵatorana waka sono kujiŵikira vilato vyauzimu na kuvifiska.

17. Kasi ntchivichi chikachitikira Klaus na Marisa, ndipo tikusambirako vichi ku ivyo vikaŵachitikira?

¹⁷ Ndipouli, nyengo zinyake tingakhumba kumuteŵetera Yehova mu nthowa yinyake, kweni iyo wangakhumba kuti timuteŵetere mu nthowa yinyake. Wonani ivyo vikachitikira Klaus na Marisa, awo taŵazunura kale. Ŵati ŵakhala pa nthengwa vyaka vitatu, ŵakasama kunyumba kwawo ndipo ŵakajipeleka kukawovwira pa mulimo wakuzenga pa ofesi ya munthavi ya Finland. Kweni pamanyuma ŵakaphalirika kuti mbakuzomerezgeka yayi kuteŵetera uku kujumpha myezi 6. Pakwamba ŵakakhuŵara. Kweni pati pajumpha nyengo yichoko waka, ŵakachemeka kuti ŵakasambire chiyowoyero cha Chiarabic, ndipo pasono ŵakuteŵetera mwakukondwa ku charu chinyake, ku chigaŵa uko ŵakuyowoya Chiarabic. Para Marisa wakumbuka ivyo vikachitika, wakuti: “Nkhaŵa na wofi kuchita vinthu vyakuti nindachitepo ndipo nkheneranga kugomezga chomene Yehova. Kweni nawona umo Yehova nyengo zose watovwilira munthowa izo tikakhazganga yayi. Ivi vikati vyanichitikira chigomezgo chane mwa Yehova chasazgikira chomene.” Nga umo chiyelezgero ichi chalongolera, mungaŵa na chigomezgo kuti Yehova nyengo zose wamutumbikaninge para mukumugomezga chomene.

18. Kasi ŵakutorana ŵangachita wuli kuti ŵalutilire kugomezga Yehova?

¹⁸ Nthengwa ntchawanangwa chakufuma kwa Yehova. (Mat. 19:5, 6) Ndipo wakukhumba kuti ŵakutorana ŵakondwenge na chawanangwa ichi. (Zinth. 5:18) Imwe mwatorana waka sonosono, sandani ivyo mukuchita pa umoyo winu. Kasi mukuchita vyose ivyo mungafiska kulongora kuti mukuwonga Yehova chifukwa cha vyawanangwa ivyo wamupani? Yowoyani na Yehova mu lurombo. Penjani fundo mu Mazgu ghake izo mukuwona kuti zikukolerana na umo vinthu viliri kwa imwe. Kufuma apo londezgani ulongozgi uwo Yehova wakumupani. Manyani kuti muŵenge na umoyo wakukondwa kweniso wakukhorweska para mwaŵika mtima pa kuteŵetera Yehova mu nthengwa yinu.