1. Kasi Yehova wakutichiska kuchitachi?

YEHOVA wakukondwa kulongora chitemwa chakugomezgeka. (Hos. 6:6, mazgu ghamusi) Ndipo wakukhumba kuti ŵateŵeti ŵake nawo ndimo ŵachitirenge. Kwizira mwa ntchimi Mika, Chiuta wakutichiska kuti ‘tiŵe ŵakugomezgeka,’ ndipo fundo iyi yingasazgapo kuŵa na chitemwa chakugomezgeka. (Mika 6:8, mazgu ghamusi) Kweni chakwamba, tikwenera dankha kumanya ivyo chitemwa chakugomezgeka chikung’anamura.

2. Kasi chitemwa chakugomezgeka ni vichi?

² Kasi chitemwa chakugomezgeka ni vichi? Mu Baibolo la Malemba Ghakupatulika mu Mang’anamuliro gha Charu Chiphya, mazgu ghakuti “chitemwa chakugomezgeka” ghakusangika mu malo 230. Ndipo kuyana na ivyo vili pa Mang’anamuro gha Mazgu gha mu Baibolo,” chitemwa chakugomezgeka chikung’anamura kuŵa na ‘chitemwa chakufumira pasi pa mtima. Ndipo kanandi lizgu ili likuyowoya za umo Chiuta wakutemwera ŵanthu, kweniso za chitemwa icho ŵanthu ŵakulongorana.’ Kweni Yehova ndiyo ntchiyelezgero chiwemi chomene pa nkhani ya chitemwa chakugomezgeka. Mu nkhani iyi tidumbiskanenge umo Yehova wakulongolera chitemwa chakugomezgeka ku ŵanthu. Ndipo mu nkhani yakulondezgapo tizamudumbiskana umo ise ŵateŵeti ŵa Yehova tingamuyezgera Yehova pa nkhani iyi.

3. Kasi Yehova wakajivumbura wuli kwa Mozesi?

³ Pati pajumpha nyengo yichoko waka kufuma apo Ŵaisrayeli ŵakafumira mu Eguputo, Yehova wakajivumbura kwa Mozesi, mwakumuphalira zina lake na mikhaliro yake. Iyo wakati: “Yehova, Yehova, Chiuta walusungu na wachiwuravi, wakukalipa luŵiro chara, wakuzara na chitemwa chakugomezgeka, na unenesko. Wakulongora lusungu ku vikwi, wakugowokera ubudi, uheni, na kwananga.” (Eks. 34:6, mazgu ghamusi, 7) Mu mazgu ghakukondweska agha ghakuyowoya  za mikhaliro yake, Yehova wakamuphalira chinthu chakuzirwa chomene Mozesi chakukhwaskana na chitemwa chake chakugomezgeka. Kasi chikaŵa chivichi?

4-5. (a) Kasi Yehova wakajilongosora wuli? (b) Kasi tidumbiskanenge mafumbo wuli?

⁴ Yehova wakujilongosora kuti wali waka na chitemwa chakugomezgeka yayi, kweni kuti ‘ngwakuzara na chitemwa chakugomezgeka.’ Mu Baibolo mazgu agha ghakuzunulika mu malo 6. (Maŵa. 14:18, mazgu ghamusi; Neh. 9:17, mazgu ghamusi; Sal. 86:15; 103:8, mazgu ghamusi; Joye. 2:13, mazgu ghamusi; Yona 4:2, mazgu ghamusi) Palipose apo Baibolo likuyowoya za mazgu agha, likuyowoya za Yehova pera, ŵanthu yayi. Ichi ntchakukondweska chomene kuti Yehova iyomwene kanandi wakujilongosora nthena mu Baibolo. Ntheura tingawona kuti chitemwa chakugomezgeka ni mukhaliro wakuzirwa chomene kwa iyo. * Lekani Themba Davide likati: ‘A Yehova, chitemwa chinu chakugomezgeka chikufika kuchanya. Chitemwa chinu chakugomezgeka ntchakuzirwa nadi, A Chiuta! Ŵana ŵa ŵanthu ŵakubisama, mu mfwiri wa mapapindo ghinu.’ (Sal. 36:5, 7, mazgu ghamusi) Kasi nase tikuwonga chitemwa chakugomezgeka cha Chiuta nga ni Davide?

⁵ Kuti tipulikiske ivyo chitemwa chakugomezgeka chikung’anamura, tiyeni tidumbiskane mafumbo ghaŵiri agha: Kasi mbanjani awo Yehova wakuŵalongora chitemwa chakugomezgeka? Kasi tikovwirika wuli para Yehova wakutilongora chitemwa chakugomezgeka?

6. Kasi mbanjani awo Yehova wakuŵalongora chitemwa chakugomezgeka?

⁶ Kasi mbanjani awo Yehova wakuŵalongora chitemwa chakugomezgeka? Baibolo likuyowoya kuti taŵanthu tingatemwa vinthu vinandi nga ni “ulimi,” “vinyo na mafuta,” “kusambizgika,” “kumanya,” kweniso “vinjeru.” Apa tazunurapo vichoko waka. (2 Mid. 26:10; Zinth. 12:1; 21:17; 29:3) Nangauli vili nthena, chitemwa chakugomezgeka chikulongoreka mu vinthu yayi, kweni ku ŵanthu pera. Ndipouli, Yehova wakulongora chitemwa chakugomezgeka kwa waliyose yayi. Kweni wakulongora ku ŵanthu ŵekha awo ŵali paubwezi wapadera na iyo. Chiuta withu ngwakugomezgeka ku ŵabwezi ŵake. Iyo waŵalayizga vinthu viwemi, ndipo wazamulekapo yayi kuŵatemwa.

7. Kasi Yehova walongora wuli kuti wakutemwa ŵanthu wose?

⁷ Yehova walongoraso kuti wakutemwa ŵanthu wose. Yesu wakaphalira Nikodemo kuti: “Pakuti Chiuta wakachitemwa chomene charu [panji kuti ŵanthu], lekani wakapeleka Mwana wake wapadera, kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.”​—Yoh. 3:1, 16; Mat. 5:44, 45.

8-9. (a) Chifukwa wuli Yehova wakulongora chitemwa chakugomezgeka ku ŵateŵeti ŵake? (b) Kasi tidumbiskanenge vichi sono?

 ⁸ Nga umo talongosolera kale, Yehova wakulongora chitemwa chake chakugomezgeka ku ŵateŵeti ŵake chifukwa ndiwo ŵanthu ŵekha awo mbabwezi ŵake. Tikumanya fundo iyi chifukwa cha ivyo likayowoya Themba Davide na ntchimi Daniyeli. Mwachiyelezgero, Davide wakati: ‘Lutilirani kulongora chitemwa chinu chakugomezgeka ku awo ŵakumumanyani.’ ‘Chitemwa chakugomezgeka cha Yehova ntchamuyirayira swii ku wose awo ŵakumopa.’ Ndipo Daniyeli wakati: ‘A Yehova Chiuta waunenesko, uyo wakusunga phangano na kulongora chitemwa chakugomezgeka kwa awo ŵakumutemwa na kusungilira malango ghake.” (Sal. 36:10, mazgu ghamusi; 103:17, mazgu ghamusi; Dan. 9:4, mazgu ghamusi) Kuyana na mazgu agha, Yehova wakulongora chitemwa chake chakugomezgeka ku ŵateŵeti ŵake chifukwa ŵakumumanya, ŵakumopa, ŵakumutemwa, kweniso ŵakusungilira malango ghake. Yehova wakulongora chitemwa chakugomezgeka ku ŵanthu ŵekha awo ŵakumusopa mwaunenesko.

⁹ Pambere tindambe kuteŵetera Yehova, tikaŵa kuti tikulongoreka chitemwa icho Chiuta wakulongora ku ŵanthu wose. (Sal. 104:14) Kweni pasono pakuŵa ŵateŵeti ŵake, iyo wakutilongora chitemwa chakugomezgeka. Nakuti Yehova wakusimikizgira muteŵeti wake waliyose kuti: “Chitemwa chane chiwuskikengeko chara kwa iwe.” (Yes. 54:10) Enya nga umo vikaŵira na Davide, “Yehova wachitenge vinthu na wakugomezgeka wake mu nthowa yapadera.” (Sal. 4:3) Kasi kumanya fundo iyi kukutipangiska kuchitachi? Wamasalimo wakati: “Yose uyo ngwavinjeru wasungilirenge vinthu ivi ndipo waghanaghanirenge milimo yalusungu ya Yehova.” (Sal. 107:43) Apo tikughanaghanira fundo iyi, tiyeni tidumbiskane nthowa zitatu izo Yehova wakulongolera chitemwa chake chakugomezgeka kweniso umo ŵateŵeti ŵa Yehova wakusangira chandulo na chitemwa ichi.

10. Kasi tikupindura wuli para tamanya kuti chitemwa chakugomezgeka cha Chiuta chikukhalilira muyirayira? (Salimo 31:7, mazgu ghamusi)

¹⁰ Chitemwa chakugomezgeka cha Chiuta chikukhalilira muyirayira. Mukhaliro wakuzirwa uwu ukusangika mu malo 26 mu buku la Salimo 136. Mu vesi lakwamba la chaputara ichi tikuŵazga kuti: ‘Wongani Yehova, chifukwa ni muwemi, chitemwa chake chakugomezgeka chikukhalilira muyirayira.’  (Sal. 136:1, mazgu ghamusi) Kwambira mu vesi 2 kukafika mu vesi 26 tikuŵazga mwakuwerezgawerezga mazgu ghakuti “lusungu lwake lukukhalilira muyirayira,” panji kuti chitemwa chake chakugomezgeka chikukhalilira muyirayira. Apo tikuŵazga mavesi ghanyake gha Salimo ili, tikuzizikika na umo Yehova wakulongolera lusungu lwake panji kuti chitemwa chake chakugomezgeka mu nthowa zinandi kwambura kuleka. Mazgu ghakuti “lusungu lwake lukukhalilira muyirayira” panji kuti chitemwa chake chakugomezgeka, ghakutisimikizgira kuti chitemwa cha Chiuta pa ŵanthu ŵake chikusintha yayi. Tikukhozgeka chomene kumanya kuti chitemwa cha Yehova pa ŵateŵeti ŵake chikumara luŵiro yayi. Iyo wakudemelera ku awo ŵakumuteŵetera ndipo wakuŵaleka yayi nanga ŵangasangana na masuzgo. Chandulo icho tikusanga: Para tamanya kuti Yehova wakuŵa nase vikutovwira kuti tiŵe ŵakukondwa kweniso kuti tiŵe na nkhongono zakuzizipizgira masuzgo na kulutilira kwenda pa nthowa yakuya ku umoyo.​—Ŵazgani Salimo 31:7, mazgu ghamusi.

11. Mwakuyana na Salimo 86:5 na mazgu ghamusi, ntchivichi chikumutuma Yehova kuti wagowokere munthu?

¹¹ Chitemwa chakugomezgeka icho Chiuta wali nacho chikumutuma kuti watigowokerenge maubudi ghithu. Para Yehova wawona kuti munthu wananga, ndipo munthu uyu walapa nadi na kuleka viheni ivyo wachitanga, chitemwa ndicho chikumupangiska kuti wamugowokere. Wamasalimo Davide wakayowoya za Yehova kuti: “Wakuchita nase kuyana na kwananga kwithu chara, panji kutiwezgera kuyana na maubudi ghithu.” (Sal. 103:8-11) Davide wakamanyanga makora umo njuŵi yikusuzgira chifukwa cha viheni ivyo munthu wachita. Kweniso wakamanyanga kuti Yehova ‘ngwakunozgeka kugowokera.’ Kasi ntchivichi chikumupangiska Yehova kuti wagowokere munthu? Zgoro tikulisanga pa Salimo 86:5 na mazgu ghamusi. (Ŵazgani.) Nadi, nga umo Davide wakayowoyera mu lurombo, Yehova wakugowokera chifukwa ngwakuzura na lusungu panji kuti chitemwa chakugomezgeka kwa wose awo ŵakupempha kuti waŵagowokere.

12-13. Kasi ntchivichi chingatovwira para tikujiyimba mulandu chifukwa cha zakwananga izo tikachita kumasinda?

¹² Para tananga, ntchakwenelera kweniso ntchiwemi chomene kujipa mulandu pa ivyo tachita. Ivi vingatovwira kuti tipemphe wovwiri na kusintha. Ndipouli, ŵateŵeti ŵanyake ŵa Chiuta ŵachali kujiyimba mulandu chifukwa cha zakwananga izo ŵakachita kumasinda. Mtima wawo ukuŵa kuti uchali kuŵasuska kuti Yehova wangaŵagowokera  yayi nanga ŵangapera na kuleka kuchita viheni. Para namwe mukujipulika nthena, kumanya kuti Chiuta ngwakukhumbisiska kulongora chitemwa chake chakugomezgeka ku ŵateŵeti ŵake, kungamovwirani kuti muleke kuŵa na maghanoghano ghakubudika agha.

¹³ Chandulo icho tikusanga: Nangauli ndise ŵakwananga kweni tingateŵetera Yehova mwakukondwa kweniso na njuŵi yituŵa. Vili nthena chifukwa “ndopa za Mwana wake Yesu zikutitozga ku kwananga kose.” (1 Yoh. 1:7) Para mwabudiska chinthu chinyake kugongowa yayi, kumbukani kuti Yehova ngwakukhumbisiska kugowokera wakwananga uyo wapera. Wonani umo Davide wakayaniskira lusungu panji kuti chitemwa chakugomezgeka na kugowokera. Iyo wakalemba kuti: “Pakuti umo mtambo uli kutumphukira pachanya pa charu chapasi, ndimoso uliri ukuru wa lusungu lwake [panji kuti chitemwa chake chakugomezgeka] ku awo ŵakumopa. Umo uliri utali kufuma kumafumiro gha dazi kuya kumanjiliro gha dazi, ndimo waŵikira maubudi ghithu kutali na ise.” (Sal. 103:11, 12) Enya, Yehova ‘ngwakugowokera chomene’ ndipo ngwakukhumbisiska kuchita nthena.​—Yes. 55:7.

14. Kasi Davide wakalongosora kuti chitemwa chakugomezgeka cha Yehova chikutivikilira wuli?

¹⁴ Chitemwa chakugomezgeka cha Chiuta chikutivikilira. Davide wakalomba kwa Yehova kuti: ‘Ndimwe malo ghane ghakubisamamo. Munivikilirenge ku suzgo. Munizingilizgenge na kapomezi ka chimwemwe chifukwa nawombokwa. . . . Kweni uyo wakuthemba Yehova wakuzingilizgika na chitemwa chake chakugomezgeka.’ (Sal. 32:7, 10, mazgu ghamusi) Mu nyengo yakale, misumba yikaŵanga na mpanda. Ivi vikawovwiranga awo ŵakukhala mu misumba iyi kuti ŵaŵe ŵakuvikilirika ku ŵalwani ŵawo. Mwakuyana waka, Yehova wakutizingilizga na chitemwa chake chakugomezgeka, ndipo wakutipa chakurya chauzimu icho chikutivikilira ku vinthu vyakofya ivyo vingananga ubwezi withu na iyo. Kweniso chitemwa chakugomezgeka cha Yehova chikupangiska kuti tisendelere kwa iyo.—Yer. 31:3.

15. Chifukwa wuli chitemwa chakugomezgeka cha Yehova chili nga malo ghakubisamamo?

¹⁵ Davide wakayowoyaso chiyelezgero chinyake pakulongosora chivikiliro icho Chiuta wakupeleka ku ŵateŵeti ŵake. Wakalemba kuti: “Chiuta ntchigongwe chane chakukhora, Chiuta uyo wakunilongora chitemwa chakugomezgeka.” Davide wakayowoyaso za Yehova kuti: “Iyo ntchisungusungu chane [panji kuti chitemwa chakugomezgeka] na linga lane lakukhora, chiphokwero chane chakukhora na muthaski wane, chiskango chane kweniso uyo nabisamako, ndiyo wakuthereska ŵanthu pasi pane.” (Sal. 59:17, mazgu ghamusi; 144:2) Chifukwa wuli Davide wakayaniska lusungu panji kuti chitemwa chakugomezgeka na chigongwe kweniso linga lakukhora? Chifukwa ntchakuti kwali tikukhala nkhu pa charu chapasi, chikuru tili ŵateŵeti ŵake, Yehova watipenge vyose ivyo tikukhumbikwira kuti tivikilire ubwezi withu wapadera na iyo. Tikusangaso ukaboni uwu mu Salimo 91. Uyo wakalemba salimo ili wakati: “Kwa Yehova nitenge: ‘Ndimwe chiphokwero chane na linga lane lakukhora.’” (Sal. 91:1-3, 9, 14) Mozesi nayo wakayowoya mazgu ghakuyana waka agha ghakuti chiphokwero. (Sal. 90:1, mazgu ghamusi) Kweniso wati wakhala pachoko waka kufwa, wakayowoyaso mazgu ghanyake ghakukhozga. Iyo wakalemba kuti: “Chiuta ni malo ghakubisamamo kwamba kale chomene, mawoko ghake ghamuyirayira ghali kusi kwa iwe.” (Doto. 33:27) Kasi mazgu ghakuti “mawoko ghake ghamuyirayira ghali kusi kwa iwe” ghakutiphalira vichi za Yehova?

16. Kasi kumanya fundo yakuti nyengo zose tikwenera kuthemba Yehova kukutovwira wuli? (Salimo 136:23)

¹⁶ Para tikuthemba Yehova kuŵa Chiphokwero chithu, tikuŵa ŵakuvikilirika. Ndipouli nyengo zinyake tingakumana na masuzgo agho ghangatinyekezgera pasi, ndipo chingaŵa chakusuzga kuti tiwuke. Pa nyengo nga iyi, kasi Yehova watovwirenge wuli? (Ŵazgani Salimo 136:23.) Iyo watikolenge pa woko na kutiwuska makoramakora kuti tiyimilireso. (Sal. 28:9; 94:18) Chandulo icho tikusanga: Kumanya fundo yakuti nyengo zose tikwenera kuthemba Chiuta, kukutovwira mu nthowa  ziŵiri. Yakwamba, tikumanya kuti nyengo zose Yehova wativikilirenge kulikose uko tingaŵa. Yachiŵiri, Adada ŵithu ŵakuchanya ŵakutipwelelera chomene.

17. Kasi tingasimikizga vichi pa nkhani ya chitemwa chakugomezgeka cha Chiuta? (Salimo 33:18-22 na mazgu ghamusi)

¹⁷ Nga umo tawonera, para tasangana na suzgo tingaŵa na chigomezgo chose kuti Yehova watipenge wovwiri uwo tikukhumbikwira kuti tilutilire kugomezgeka. (2 Kor. 4:7-9) Ntchimi Yeremiya yikalemba kuti: “Tindamalirethu chifukwa cha chitemwa chakugomezgeka cha Yehova, pakuti lusungu lwake lukumara chara.” (Chit. 3:22, mazgu ghamusi) Tili na chigomezgo chose kuti Yehova walutilirege kutilongora chitemwa chakugomezgeka chifukwa Baibolo likutiphalira kuti: ‘Jiso la Yehova likulaŵiska awo ŵakumopa, awo ŵakulindilira chitemwa chake chakugomezgeka.’​—Ŵazgani Salimo 33:18-22 na mazgu ghamusi.

18-19. (a) Kasi tikwenera kukumbuka vichi? (b) Kasi tizamudumbiskana vichi mu nkhani yakulondezgapo?

¹⁸ Kasi tikwenera kukumbuka vichi? Apo tikaŵa kuti tindambe kuteŵetera Yehova, Chiuta wakatilongoranga chitemwa icho wakulongora ku ŵanthu wose, kweni sono pakuŵa ŵateŵeti ŵake, wakutilongora chitemwa chakugomezgeka. Chifukwa cha chitemwa ichi, Yehova wakutivumbatira mu mawoko ghake ghachivikiliro. Nyengo zose waŵenge nase pafupi na kufiska ivyo wali kutilayizga. Wakukhumba kuti ise vinthu vitenderenge makora. (Sal. 46:1, 2, 7) Ntheura kwali tingakumana na chiyezgo cha mtundu wuli, Yehova watipenge nkhongono izo tikukhumbikwira kuti tilutilire kuŵa ŵakugomezgeka.

¹⁹ Tawona umo Yehova wakulongolera chitemwa chakugomezgeka ku ŵateŵeti ŵake. Ndipo nayo wakukhumba kuti ise tilongorenge chitemwa ichi ku ŵanyithu. Kasi tingachita wuli nthena? Mu nkhani yakulondezgapo tizamudumbiskana umo tingachitira.