Dango la Mozesi likaŵa na malango ghanandi pa nkhani yakujitozga. Nyengo zinyake munthu wakufipirwa wakeneranga kupeleka sembe, kugeza panji wasembe kumumijira ndopa kuti waŵeso wakutowa.—Lev. 11–15; Maŵa. 19.

Ŵasambizgi ŵa Chiyuda awo ŵakachemekanga kuti ŵarabi, ŵakasazgirako tumalango twawo ku ivyo Dango la Mozesi likayowoyanga. Buku linyake likuyowoya kuti ‘ŵarabi ŵakasazgirapo malango ghanyake ghanandi pa nkhani ya ivyo vingapangiska munthu kuŵa wakufipirwa na umo wangafipiskiraso ŵanyake. Iwo ŵakaŵikaso malango pa nkhani ya viŵiya ivyo munthu wakwenera kugwiliskira ntchito pakugeza mu mawoko. Kweniso ŵakaŵa na tumitheto twawo uto munthu wakeneranga kulondezga kuti waŵeso wakutowa.’

Zuŵa linyake, Ŵafarisi na ŵalembi ŵakafumba Yesu kuti: “Chifukwa wuli ŵasambiri ŵako ŵakulondezga yayi maluso gha ŵasekuru, kweni ŵakurya vyakurya na mawoko ghakufipirwa?” (Mrk. 7:5) Apa Ŵafarisi na ŵalembi ŵakakhumbanga kuti ŵasambiri ŵa Yesu ŵagezenge waka mu mawoko yayi. Iwo ŵakaŵika dango lakuti pambere munthu waliyose wandambe kurya, munyake wachite kumuthilira maji ndipo munthu wakeneranga kugeza m’paka mu kasukusuku. Ntheura iwo ŵakakhumbanga kuti ŵasambiri ŵa Yesu ŵalondezgenge tumaluso twawo pa nkhani iyi. Buku ilo lazunulika mu ndime yachiŵiri likayowoyaso kuti: “Ŵafarisi na ŵalembi ŵakagazgananga pa nkhani ya viŵiya ivyo ŵakwenera kugwiliskira ntchito pakuthilira munthu maji mu mawoko, maji agho ghangaŵa ghakwenera kugwiliskira ntchito, uyo wakwenera kuthilira munyake, kweniso kuti munthu wakwenera kugeza mawoko m’paka mpha.”

Kasi Yesu wakachita wuli na malango ghanthena agha agho Ŵafarisi na ŵalembi ŵakapanga ŵekha? Iyo wakaŵaphalira kuti: “Yesaya wakaneneska pakuchima vya imwe, nga umo kuli kulembekera kuti, ‘Ŵanthu aŵa ŵakunichindika na milomo yawo, kweni mitima yawo yili kutali na ine [Yehova]. Ŵakunisopa pawaka, chifukwa ŵakusambizga malango gha ŵanthu m’malo mwa visambizgo vya Chiuta.’ Mukuzerezga dango la Chiuta na kukoleska maluso gha ŵanthu.”—Mrk. 7:6-8.