“NKHABATIZIKA apo nkhaŵa na vyaka 15. Pakati pajumpha myezi 6, nkhamba upayiniya wakanyengo ndipo pakati pajumpha chaka chimoza, nkhamba upayiniya wanyengozose. Nati namalizga masambiro gha ku sekondare, nkhapempha kuti nkhateŵetere ku malo uko kukukhumbikwira ŵapharazgi ŵanandi ŵa Ufumu. Nkhakhumbanga kukateŵetera ku malo ghanyake ghakutali na kwithu kweniso kuti nileke kukhala na abuya awo ŵakaŵa Ŵakaboni ŵa Yehova yayi. Kweni nkhakhuŵara chomene mulaŵiliri wa dera wati waniphalira kuti niteŵeterenge mu tawuni iyo nkhababikira. Nkhakhumba yayi kuti mulaŵiliri wa dera wamanye kuti nakhuŵara. Nkhati waka sindii na kufumapo kuti nkhaghanaghanire ivyo mulaŵiliri wa dera waniphalira. Pamasinda, nkhaphalira munyane uyo nkhateŵeteranga nayo kuti: ‘Ine nkhuchita nga ni Yona mwee. Kweni paumaliro Yona wakasintha, ndipo wakaluta ku Nineve. Ntheura nane niteŵeterenge uko natumika.’”

“Pasono nachita upayiniya mu tawuni yakwithu kwa vyaka vinayi, ndipo nawona kuti nkhachita makora kupulikira ulongozgi uwo mulaŵiliri wa dera wakaniphalira. Suzgo likaŵa na ine chifukwa nkhaŵa na maghanoghano ghaheni. Kweni sono nkhukondwa chomene na uteŵeti. Nakuti pa mwezi nkhusambizga Baibolo ŵanthu ŵakukwana 24. Nkhuwonga chomene Yehova chifukwa cha ivyo wanichitira kweniso kuti pasono nkhusambizga abuya Baibolo awo pakwamba ŵakanisuskanga chomene.”

Msambiri munyake wa Baibolo ku Fiji wakeneranga kusankha pakati pa kuluta ku ungano wa chigaŵa wa Ŵakaboni ŵa Yehova na kuluta pamoza na mfumu wake ku chiphikiro cha kukumbukira zuŵa lakubabika la mubali wawo. Mfumu wake wakamuzomerezga kuti walute ku ungano. Iyo wakaphalira mfumu wake kuti wamuŵasanga para wawerako ku ungano. Wati wawerako ku ungano, msambiri wa Baibolo uyu wakawona kuti ntchiwemi yayi kuluta ku chiphikiro ichi na kuŵika umoyo wake wauzimu pangozi. Ntheura wakalutako nadi yayi.

Mfumu wake wakati wafika ku chiphikiro, wakaphalira ŵabali ŵake kuti muwoli wake waŵasangenge para wawerako ku “ungano wa Ŵakaboni ŵa Yehova.” Ŵabali ŵake ŵakamuzgora kuti: “Wizengeko yayi, Ŵakaboni ŵa Yehova ŵakukondwelerako yayi mazuŵa ghakubabika!” *

Mfumu wake wakakondwa chomene kuti muwoli wake wakachita ivyo wakugomezga kweniso kuyana na njuŵi yake. Ivyo mwanakazi uyu wakachita vikamupa mwaŵi wakupharazgira mfumu wake na ŵanji. Kasi chikachitika ntchivichi paumaliro? Mfumu wake wakazomera kusambira Baibolo kweniso wakamba kuwungana pamoza na muwoli wake.