CHA M’MA 1935, adada a James Sinclair, na amama a Jessie Sinclair ŵakasamukira ku Bronx, tawuni iyo yili mu New York. Adada na amama ŵakafuma ku Scotland. Mu tawuni ya New York ŵakamanyana na Willie Sneddon uyo nayo wakafuma ku Scotland. Pakati pajumpha nyengo yichoko waka, ŵanthu ŵatatu aŵa ŵakamba kuchezga vya mabanja ghawo. Ivi vikachitika pambere ine nindababike.

Amama ŵakaphalira Willie kuti pambere Nkhondo Yikuru yindachitike, adada ŵawo na mulongosi wawo mulara, ŵakabira mu nyanja ya North Sea. Ivi vikachitika chifukwa chakuti boti ilo ŵakaloŵeranga somba likakhwaska bomba. Willie wakati, “Adada ŵinu ŵali ku helo.” Willie wakaŵa Kaboni wa Yehova, ndipo amama ŵakazizwa chomene na ivyo Willie wakaŵaphalira. Apa ndipo ŵakambira kupulika unenesko wa mu Baibolo.

Amama ŵakakwiya na ivyo Willie wakayowoya chifukwa ŵakamanyanga kuti adada ŵawo ŵakaŵa munthu muwemi. Kweni Willie wakayowoyaso kuti, “Kasi mukumanya kuti Yesu wakati wafwa wakaluta ku helo?” Amama ŵakakumbukira ivyo ŵakagomezganga ku tchalitchi kwawo. Ŵakasambizgikanga kuti Yesu wakati wafwa wakakhilira ku helo, ndipo wakawuskika pa zuŵa lachitatu. Amama ŵakamba kujifumba kuti, ‘Usange ŵanthu ŵaheni ndiwo ŵakuluta ku helo kuti ŵakasuzgikenge, chifukwa wuli Yesu wakaluta ku malo agha?’ Apa ndipo amama ŵakambira kunweka kuti ŵamanye unenesko. Ŵakamba kuwungana na Mpingo wa Bronx, ndipo ŵakabatizika mu 1940.

Panyengo iyo, ŵapapi ŵakaŵachiskanga yayi kuti ŵasambirenge Baibolo na ŵana ŵawo. Apo nkhaŵa kamwana, adada ŵakakhalanga nane panyumba, ndipo amama ŵakalutanga ku maungano. Pa Chisulo na pa Sabata ŵakalutanga kukapharazga. Pakati pajumpha vyaka vichoko waka, ine na adada tikamba kuluta na amama ku maungano. Amama ŵakalimbikiranga chomene kupharazgira ŵanthu makani ghawemi, ndipo ŵakaŵa na masambiro ghanandi gha Baibolo. Chifukwa chakuti ŵanthu awo ŵakasambiranga nawo Baibolo ŵakakhalanga pafupi na pafupi, nyengo zinyake amama ŵakaŵachemeranga pamoza na kusambira nawo. Para sukulu zajara, nkhalutanga nawo kukapharazga. Ichi chikanovwira kuti nisambire vinandi chomene vyakukhwaskana na Baibolo kweniso umo ningasambizgira ŵanthu.

 Chachitima ntchakuti apo nkhaŵa mwana, nkhautemwanga viŵi yayi unenesko. Nkhautoleranga waka maseŵera. Kweni apo nkhaŵa na vyaka 12, nkhaŵa mupharazgi wambura kubatizika. Kufuma pa nyengo iyo, nkhamba kulimbikira kupharazga. Apo nkhaŵa na vyaka 16, nkhajipeleka kwa Yehova na kubatizika. Nkhabatizika pa 24 Julayi, 1954, pa ungano wa chigaŵa uwo ukachitikira ku Toronto, Canada.

Mu mpingo withu mukaŵa ŵabali ŵanyake awo ŵakateŵeterapo pa Beteli na ŵanyake awo ŵakateŵeteranga pa Beteli. Ŵabali aŵa ŵakanovwira chomene. Ŵakayowoyanga nkhani mwaluso kweniso ŵakalongosoranga makora Baibolo. Ivi vikanikondweskanga chomene. Asambizgi ŵane ŵakakhumbanga kuti nizakalute ku yunivesite, kweni ine nkhakhumbanga kukateŵetera pa Beteli. Ntheura nkhatora fomu ya uteŵeti wa pa Beteli pa ungano wa chigaŵa ku Toronto. Nkhazakatoraso fomu yinyake mu 1955, pa ungano wa chigaŵa uwo ukachitikira ku Yankee Stadium, New York City. Nkhati nakwaniska vyaka 17, pakajumpha nyengo yayi, mbwe ŵakanichema kuti nkhambe kuteŵetera pa Beteli ku Brooklyn pa 19 Seputembala, 1955. Nkhati nafika pa Beteli, zuŵa lakulondezgapo nkhamba kuteŵetera mu dipatimenti yakusindikizga mabuku ku 117 Adams Street. Nyengo yichoko waka nkhamba kugwira ntchito na makina ghanyake agho ghakaŵikanga pamoza mapeji 32 kuti ghalute ku makina ghakusona mabuku.

Nkhati nateŵetera mwezi umoza ku dipatimenti yakusindikizga mabuku, ŵakanituma ku Dipatimenti ya Magazini pakuti nkhamanyanga kutayipa. Kale, ŵakalembanga maadiresi pa magazini gha Gongwe la Mulinda na Wukani! agho ŵanthu ŵachemeska. Pakati pajumpha myezi yichoko waka, nkhamba kuteŵetera ku Dipatimenti Yakutumizga Mabuku. Mubali Klaus Jensen, uyo wakalaŵiliranga dipatimenti iyi, wakanifumba usange ningatemwa kwenda na dilayivara uyo wakapelekeranga mabuku mu madowoko kuti ghatumizgike pa charu chose. Mabuku agha ghakaŵanga mu makatoni. Pakaŵangaso  masaka gha magazini agho ghakeneranga kukapelekeka ku positi ofesi kuti ghatumizgike mu mipingo yose ya mu United States. Mubali Jensen wakati ntchito iyi yinovwirenge kuti thupi liŵe lankhongono. Panyengo iyo, nkhakwananga waka makilogiramu 57. Nkhaŵa phekesi lenecho. Ntchito iyo nkhagwiranga yakupeleka mabuku mu madowoko na ku positi ofesi yikanovwira nadi kuti niŵe na nkhongono. Mubali Jensen wakaneneskanga. Wakamanyanga nadi ivyo vinganovwira.

Dipatimenti ya Magazini yikawonangaso magazini agho mipingo yikuchemeska ndipo yikatumizganga. Apa ndipo nkhamanyira unandi wa viyowoyero vya mu vyaru vyakupambanapambana ivyo vikapokeranga magazini ku Brooklyn. Nkhamanyanga yayi kuti magazini ghithu ghakupangika mu viyowoyero vinandi nthena. Nkhakondwanga chomene kumanya kuti ghakutumizgika ku vyaru vyakutali chomene. Nkhamanyanga yayi kuti kunthazi nizamuluta ku vyaru vinyake mwa ivi.

Mu 1961, ŵakaniŵika ku dipatimenti yakuwona vya ndalama (Treasury) ndipo mubali Grant Suiter ndiyo wakalaŵiliranga. Pakati pajumpha vyaka, nkhachemeka ku ofesi ya Mubali Nathan Knorr, uyo wakalaŵiliranga ntchito yakupharazga pa charu chose. Mubali Knorr wakaniphalira kuti mubali uyo wakateŵeteranga mu ofesi yake waluta ku Sukulu ya Uteŵeti wa Ufumu. Ndipo para wawera ku sukulu iyi, wazamuteŵetera ku Dipatimenti ya Uteŵeti. Wakati nichitenge uteŵeti uwo mubali uyu wakachitanga. Ndipo nkhateŵeteranga lumoza na mubali Don Adams. Don ndiyo nkhamupa fomu yane yakupempha uteŵeti wa pa Beteli pa ungano wa chigaŵa mu 1955. Ŵabali ŵanyake awo ŵakateŵeteranga mu ofesi iyi ni Robert Wallen na Charles Molohan. Tose taŵanayi tikateŵetera lumoza vyaka vyakujumpha 50. Nili wakukondwa chomene kuteŵetera lumoza na ŵabali ŵakugomezgeka kweniso ŵakukhwima mwauzimu.—Sal. 133:1.

 Kwamba mu 1970, ŵakanipa uteŵeti wakwendera maofesi gha Watch Tower Society pa charu chose. Nkhenderanga maofesi agha para pajumpha chaka chimoza panji viŵiri. Para nanyamuka, nkhakhalangako masabata ghachoko waka. Nkhachezgeranga banja la Beteli na ŵamishonale. Nkhaŵakhozganga na kuwona umo vinthu vikwendera pa Beteli. Tikakondwanga chomene kuwonana na ŵabali na ŵadumbu awo ŵakanjira makilasi ghakwambilira gha Sukulu ya Giliyadi. Ŵabali aŵa ŵakaŵa kuti ŵachali kuteŵetera Chiuta mwakugomezgeka mu vyaru ivyo ŵakatumika. Ntchakukondweska chomene ndiposo ni mwaŵi ukuru kwendera maofesi gha munthavi mu vyaru vyakujumpha 90.

Ŵabali na ŵadumbu wose awo ŵakateŵeteranga pa Beteli ku Brooklyn ŵakawungananga mu mipingo ya mu tawuni ya New York. Ine nkhaŵa mu mpingo wa mu tawuni ya Bronx. Mpingo wakwamba ukaŵa na ŵapharazgi ŵanandi chomene ndipo ukagaŵika. Ine nkhawungananga mu mpingo wakwamba, uwo ukamba kuchemeka kuti Upper Bron.

Cha m’ma 1965, banja linyake la ku Latvia ilo likasambira unenesko kumwera kwa Bronx, likasamukira mu chigaŵa cha mpingo withu. Livija, uyo wakaŵa mwana msungwana wakwamba mu banja ili, wakamba upayiniya wati wamalizga waka sekondale. Pakati pajumpha myezi yichoko waka, wakasamukira ku Massachusetts uko kukakhumbikwiranga ŵapharazgi ŵanandi ŵa Ufumu. Nkhamba kumulembera makalata, kumuphalira umo vinthu vikenderanga mu mpingo withu. Wakanizgoranga, ndipo wakaniphaliranga umo uteŵeti ukenderanga ku Boston.

Pakati pajumpha vyaka vichoko waka, Livija wakaŵa mupayiniya wapadera. Iyo wakakhumbanga kuchita vyose ivyo wangakwaniska kuti wateŵetere Yehova. Ntheura wakapempha kukateŵetera pa Beteli, ndipo mu 1971 ŵakamuchema kuti wakambe uteŵeti. Vikaŵa nga Yehova wazgora lurombo lwane. Pa 27 Okutobala 1973, tikatorana. Tikakondwa chomene kuti Mubali Knorr ndiyo wakatiyowoyera nkhani ya ukwati. Lemba la Zintharika 18:22 likuti: “Uyo wasanga muwoli muwemi wasanga chinthu chiwemi, ndipo wakutemweka na Yehova.” Ine na muwoli wane Livija tateŵetera pa Beteli vyaka 40. Ndipo tichali kuwungana na mpingo uwo uli mu chigaŵa cha Bronx.

Chikaŵa chakukondweska chomene kuteŵetera lumoza na Mubali Knorr. Wakatemwanga chomene unenesko, ndipo wakatemwanga chomene ŵamishonale chifukwa cha ntchito iyo ŵakachitanga pa charu chose. Ŵamishonale ŵanandi ŵakatumikanga mu vyaru ivyo mukaŵavya Ŵakaboni. Chitima chikanikora chomene apo Mubali Knorr wakasuzgikanga na kansa mu 1976. Nyengo yinyake apo iyo wakalwaranga, wakanipempha kuti nimuŵelengere nkhani izo ŵakakhumbanga kupurinta. Wakanipempha kuti nkhacheme Mubali Frederick Franz kuti nayo wazakategherezge para nkhuŵerenga. Pamanyuma nkhamanya kuti Mubali Knorr ndiyo wakaŵelengeranga Mubali Franz nkhani zanthena izi chifukwa Mubali Franz wakaŵa na suzgo la maso. Wakamuŵelengeranga kwa nyengo yitali.

 Mubali Knorr wakafwa mu 1977. Kweni awo ŵakamumanyanga na kumutemwa, ŵakadandaura chomene yayi chifukwa wakaŵa wakugomezgeka ndipo wakamalizga makora uteŵeti wake wa pa charu chapasi. (Chivu. 2:10) Pamanyuma, Mubali Franz ndiyo wakatora malo gha Mubali Knorr.

Pa nyengo iyo, nkhaŵa mulembi wa Milton Henschel uyo wakateŵetera lumoza na Mubali Knorr vyaka vinandi. Mubali Henschel wakaniphalira kuti ntchito yane yikuru yiŵenge ya kovwira Mubali Franz para wakukhumba wovwiri uliwose. Nyengo zose nkhamuŵelengeranga nkhani pambere ŵandapurinte. Mubali Franz wakakumbukiranga chomene vinthu ndipo wakategherezganga chomene para nkhumuŵelengera. Nkhakondwanga chomene apo nkhamovwiranga m’paka apo wakamalizgira uteŵeti wake wa pa charu chapasi mu Disembala 1992.

Vyaka 61 ivyo nateŵetera pa Beteli vyenda luŵiro chomene. Ŵapapi ŵane ŵakafwa ŵakugomezgeka kwa Yehova. Ndipo nkhulindilira kuzakaŵapokelera mu charu chambura masuzgo. (Yoh. 5:28, 29) Mu charu cha Satana ichi, palije icho ningayaniska na kuteŵetera lumoza na ŵabali na ŵadumbu ŵakugomezgeka mu gulu la Yehova pa charu chose chapasi. Ine na muwoli wane Livija, tikuyowoya kufumira pasi pa mtima kuti vyaka vyose ivyo tachita uteŵeti wanyengozose, ‘chimwemwe cha Yehova [chaŵa] nkhongono zithu.’—Neh. 8:10.

Waliyose ngwakuzirwa mu gulu la Yehova. Ndipo ntchito yakupharazga unenesko wa Ufumu yikulutilira. Tikukondwa chomene kuti vyaka vyose ivi tateŵetera na ŵabali na ŵadumbu ŵakugomezgeka. Ŵabali ŵanandi ŵakuphakazgika awo nateŵeterapo nawo ŵali kuluta kuchanya. Nkhuwonga chomene kuti nateŵetera Yehova lumoza na ŵabali ŵakugomezgeka kweniso ŵakukhwima mwauzimu.