1-2. (a) Chifukwa wuli Aramagedoni ni nkhani yakukondweska ku ŵanthu? (b) Kasi tidumbiskanenge mafumbo wuli mu nkhani iyi?

ŴANTHU ŵanandi para ŵapulika lizgu lakuti “Aramagedoni” ŵakughanaghana kuti ni nkhondo ya nyukiliya panji soka la chilengiwa. Kweni ivyo Baibolo likuyowoya pa nkhani ya Aramagedoni ni vyakukondweska, chifukwa yizamwiziska mtende pa charu chapasi. (Chivu. 1:3) Nkhondo iyi yizamuponoska ŵanthu. Mwawuli?

² Baibolo likulongora kuti nkhondo ya Aramagedoni yizamuwuskapo muwuso wa ŵanthu. Nkhondo iyi yizamuwuskaposo ŵanthu ŵaheni awo ŵakunanga charu kweniso yizamuponoska ŵanthu ŵarunji. (Chivu. 11:18) Kuti tipulikiske makora fundo izi, tiyeni tidumbiskane dankha mafumbo ghanayi agha: Kasi Aramagedoni ni vichi? Kasi ni vinthu wuli ivyo vizamulongozgera ku nkhondo ya Aramagedoni? Kasi tingachita wuli kuti nase tizakaponoskeke pa nkhondo ya Aramagedoni? Kasi tingachita wuli kuti tilutilire kugomezgeka apo umaliro ukusendelera?

3. (a) Kasi lizgu lakuti “Aramagedoni” likung’anamurachi? (b) Kuyana na Chivumbuzi 16:14, 16, chifukwa wuli tingati Aramagedoni ni malo ghakuyelezgera waka?

³ Ŵazgani Chivumbuzi 16:14, 16. Lizgu lakuti “Aramagedoni” likusangika kamoza mu Baibolo, ndipo lili kufuma ku lizgu Lachihebere ilo likung’anamura “Phiri la Megido.” (Chivu. 16:16; mazgu ghamusi) Megido ukaŵa msumba uwo ukaŵako mu nyengo ya Ŵaisrayeli. (Josh. 17:11) Kweni Aramagedoni ni zina la malo gheneko yayi. Ni ivyo vizamuchitika apo “mathemba gha charu chose” ghazamuwungana pamoza kuti ghalimbane na Yehova. (Chivu. 16:14) Ndipouli, mu nkhani iyi, tigwiliskirengeso ntchito lizgu lakuti “Aramagedoni” pakuyowoya  vya nkhondo iyo yizamuchitika pamanyuma pakuti mathemba gha charu chose ghawungana pamoza. Kasi tikumanya wuli kuti Aramagedoni ni malo ghakuyelezgera waka? Chakwamba, kulije phiri lakuchemeka Megido. Chachiŵiri, pa Megido mphachoko chomene mwakuti “mathemba gha charu chose” na ŵankhondo ŵawo, pamoza na vilwero vyawo ŵangakwanapo yayi. Chachitatu, nga umo tiwonerenge mu nkhani iyi, nkhondo ya Aramagedoni yizamwamba para “mathemba” gha charu ghawukira ŵanthu ŵa Chiuta, awo ŵali pa charu chose chapasi.

4. Chifukwa wuli apo Yehova wakayowoya za nkhondo yake yikuru yaumaliro wakazunura Megido?

⁴ Chifukwa wuli apo Yehova wakayowoya za nkhondo yake yikuru yaumaliro wakazunura Megido? Mu nyengo yakale, nkhondo zinandi zikachitikiranga ku Megido kweniso kufupi na Chidika cha Yezireli. Nyengo zinyake Yehova wakaŵawovwiranga ŵanthu ŵake kuti ŵaluske pa nkhondo izi. Mwachiyelezgero, “pafupi na maji gha Megido,” Chiuta wakawovwira Mweruzgi Baraki uyo wakaŵa Muisrayeli kuthereska Ŵakenani awo ŵakalongozgekanga na Sisera. Baraki na ntchimi yanakazi Debora ŵakawonga Yehova chifukwa wakaŵawovwira mwamunthondwe kuti ŵaluske pa nkhondo iyi. Ŵakimba kuti: “Nyenyezi zikarwa kufuma kuchanya, zikarwa na Sisera . . . . Dambo la Kishoni likaŵakukura.”—Ŵeru. 5:19-21.

5. Chifukwa wuli nkhondo ya Aramagedoni yikupambana na nkhondo iyo Baraki wakarwa?

⁵ Baraki na Debora ŵakamalizga sumu yawo na mazgu ghakuti: “Ntheura ŵalwani ŵinu wose ŵaparanyike, imwe Yehova, kweni awo ŵakumutemwani ŵaŵe nga ni dazi ilo likufuma mu uchindami wake.” (Ŵeru. 5:31) Pa nkhondo ya Aramagedoni, ŵalwani ŵa Chiuta ŵazamuparanyika, kweni awo ŵakutemwa Chiuta ŵazamuponoskeka. Kweni nkhondo ya Aramagedoni na nkhondo iyo wakarwa Balaki zikupambanako. Chifukwa wuli? Pa nkhondo ya Aramagedoni ŵanthu ŵa Chiuta ŵazamurwako yayi nkhondo panji kuŵa na vilwero. Iwo ‘ŵazamukhala mwakufwasa chifukwa ŵazamugomezga’ Yehova na ŵankhondo ŵake ŵakuchanya.—Yes. 30:15; Chivu. 19:11-15.

6. Kasi Yehova wangazakagwiliskira ntchito vichi pakuparanya ŵalwani ŵake pa nkhondo ya Aramagedoni?

⁶ Kasi Chiuta wazamuthereska wuli ŵalwani ŵake pa nkhondo ya Aramagedoni? Wangazakagwiliskira ntchito nthowa zinandi. Mwachiyelezgero, wangazakagwiliskira ntchito vindindindi, vula ya malibwe, na ŵaleza. (Yobu 38:22, 23; Ezek. 38:19-22) Wangazakapangiska ŵalwani ŵake kuwukirana ŵekhaŵekha. (2 Mid. 20:17, 22, 23) Kweniso wangazakatuma ŵangelo kukoma ŵanthu ŵaheni. (Yes. 37:36) Mulimose umo vingaŵira, kweni Chiuta wazamutonda. Ŵalwani ŵake wose ŵazamuparanyika. Kweni ŵarunji wose ŵazamuponoskeka.—Zinth. 3:25, 26.

7-8. (a) Kuyana na 1 Ŵatesalonika 5:1-6, kasi ni ntchemerezgo wuli iyo ŵalongozgi ŵa charu ŵazamuchemerezga? (b) Chifukwa wuli ntchemerezgo iyi uzamuŵa utesi wakofya?

⁷ Ntchemerezgo ya “Bata na mtende!” yizamuchitika pambere “zuŵa la Yehova” lindafike. (Ŵazgani 1 Ŵatesalonika 5:1-6.) Pa 1 Ŵatesalonika 5:2, mazgu ghakuti “zuŵa la Yehova” ghakuyowoya za “suzgo yikuru.” (Chivu. 7:14) Kasi tizamumanya wuli kuti suzgo yikuru yili pafupi kwamba? Baibolo likutiphalira kuti pazamuŵa ntchemerezgo iyo yindachitikepo nakale. Ndipo ntchemerezgo iyi ndiyo yizamuŵa chimanyikwiro chakuti suzgo yikuru yili pafupi kwamba.

⁸ Ntchemerezgo iyi yizamuŵa yakuti “Bata na mtende.” Chifukwa wuli ŵalongozgi ŵa charu ŵazamuchemerezga ntchemerezgo iyi? Kasi  ŵalongozgi ŵa visopa nawo ŵazamucherezgako? Enya, vingazakachitika. Ndipouli, ntchemerezgo iyi uzamuŵa waka utesi wakufuma ku viŵanda. Kweni utesi uwu uzamuŵa wakofya chifukwa ŵanthu ŵazamughanaghana kuti mbakuvikilirika, apo unenesko ngwakuti suzgo yikuru yizamuŵa kuti yili pafupi kwamba. Nadi, “pharanyiko lamabuchi lizamuŵawira nga ni vyakuŵinya ivyo vikwiza pa mwanakazi wanthumbo uyo wali pafupi kubaba.” Kweni wuli pakuyowoya za ŵateŵeti ŵakugomezgeka ŵa Yehova? Nawo ŵangazakazizwa chifukwa ŵakumanya yayi apo zuŵa la Yehova lizamwizira, kweni ŵazamuŵa ŵakunozgeka.

9. Kasi Chiuta wazamuparanya charu cha Satana ichi panyengo yimoza? Longosorani.

⁹ Yehova wazamuparanya charu cha Satana ichi panyengo yimoza yayi, nga umo wakachitira mu nyengo ya Nowa. Kweni wazamuchiparanya mu vigaŵa viŵiri. Chakwamba, wazamuparanya Babuloni Mukuru, uyo wakwimira visopa vyose vyautesi. Kufuma apo, pa nkhondo ya Aramagedoni, wazamuparanya charu chose cha Satana, kusazgapo ŵandyali, ŵankhondo, na ŵamalonda. Tiyeni sono tidumbiskane vigaŵa viŵiri ivi.

10. Kuyana na Chivumbuzi 17:1, 6 na 18:24, chifukwa wuli Yehova wazamuparanya Babuloni Mukuru?

¹⁰ ‘Kweruzgika kwa muhule mukuru.’ (Ŵazgani Chivumbuzi 17:1, 6; 18:24.) Babuloni Mukuru wapangiska ŵanthu ŵanandi kuyuyura zina la Chiuta. Wasambizga ŵanthu mautesi ghanandi ghakukhwaskana na Chiuta. Wakuchita uhule chifukwa wakukolerana na ŵalongozgi ŵa charu. Wakuyuzga ŵanthu na kuŵalyera masuku pa mutu. Ndipo wakoma ŵanthu ŵanandi, kusazgapo ŵateŵeti ŵa Chiuta. (Chivu. 19:2) Kasi Yehova wazamuparanya wuli Babuloni Mukuru?

11. Kasi “chikoko chiswesi” chikwimira vichi? Ndipo kasi Chiuta wazamuchigwiliskira wuli ntchito kuparanya Babuloni Mukuru?

¹¹ Yehova wazamugwiliskira ntchito “masengwe 10” gha “chikoko chiswesi” kuparanya “muhule mukuru.” Chikoko chikwimira wupu wa United Nations. Masengwe 10 ghakwimira  maboma ghandyali agho ghakukhozgera wupu uwu. Pa nyengo yakutemeka ya Chiuta, maboma ghandyali agha ghazamuwukira Babuloni Mukuru. ‘Ghazamumuparanya na kumuleka wali nkhule,’ ndipo ghazamupoka usambazi wake wose na kulongora pakweru uheni wake. (Chivu. 17:3, 16) Wazamuparanyika mwaluŵiro chomene, ndipo vizamuŵa nga waparanyika zuŵa limoza. Ntheura awo ŵakukhozgera Babuloni Mukuru ŵazamuzizwa chifukwa kanandi Babuloni wakajitunthanga na kuyowoya kuti: “Ndine fumukazi, ndipo ndine chokoro yayi, nakuti nizamulirapo yayi.”—Chivu. 18:7, 8.

12. Kasi Yehova wazamuzomerezga yayi mitundu kuchita vichi, ndipo chifukwa wuli?

¹² Chiuta wazamuzomerezga yayi kuti mitundu yiparanye ŵanthu ŵake. Ŵanthu ŵake ŵakukondwa kumanyikwa na zina lake, ndipo ŵapulikira dango lake lakuti ŵafumemo mu Babuloni Mukuru. (Mil. 15:16, 17; Chivu. 18:4) Kweniso ŵawovwira ŵanthu ŵanandi kufumamo mu Babuloni Mukuru. Ntheura ŵateŵeti ŵa Yehova ‘ŵazamupokako yayi masoka ghake.’ Ndipouli, chipulikano chawo chizamuyezgeka.

13. (a) Kasi Gogi ni njani? (b) Kuyana na Ezekiyeli 38:2, 8, 9, chifukwa wuli Gogi wazamuwungana pa malo ghakuyelezgera ghakuchemeka Aramagedoni?

¹³ Kuwukira kwa Gogi. (Ŵazgani Ezekiyeli 38:2, 8, 9.) Para visopa vyose vyautesi vyazakaparanyika, pa charu chapasi pazamukhala chisopa chimoza pera. Pazamuŵa waka ŵateŵeti ŵa Chiuta, ndipo ŵazamuwoneka nga mbambura kuvikilirika. Kweni Satana wazamukwiya chomene. Wazamulongora ukali wake pakutuma viŵanda kuti vipusike mitundu kuti yiwukire ŵateŵeti ŵa Yehova. (Chivu. 16:13, 14) Mitundu iyi yikuchemeka kuti “Gogi wa charu cha Magogi.” Para mitundu yazakawukira ŵanthu ŵa Yehova, penepapo ndipo nkhondo ya Aramagedoni yizamwamba.—Chivu. 16:16.

14. Kasi Gogi wazamumanya vichi?

¹⁴ Gogi wazamugomezga “woko la munthu,” awo mbankhondo ŵake. (2 Mid. 32:8) Kweni ise tizamugomezga Yehova, Chiuta withu,  ndipo mitundu yizamuwona nga mbuchindere kuchita nthena. Chifukwa wuli? Chifukwa ntchakuti Babuloni Mukuru wakaŵa wankhongono chomene, kweni ŵachiuta ŵake ŵakamuponoska yayi ku “chikoko” na ku “masengwe [ghake] 10.” (Chivu. 17:16) Ntheura Gogi wazamuwona nga wangazakatiparanya. Wazamuwukira ŵanthu ŵa Yehova “nga umo mabingu ghakubenekelera charu.” (Ezek. 38:16) Kweni mwaluŵiro Gogi wazamumanya kuti wawira mu chipingo. Nga ni Farawo pa Nyanja Yiswesi, Gogi wazamumanya kuti wakulimbana na Yehova.—Eks. 14:1-4; Ezek. 38:3, 4, 18, 21-23.

15. Kasi Khristu wazamuchita vichi pa nkhondo ya Aramagedoni?

¹⁵ Khristu na ŵankhondo ŵake ŵakuchanya ŵazamuvikilira ŵanthu ŵa Chiuta na kupalanyirathu Gogi na ŵankhondo ŵake. (Chivu. 19:11, 14, 15) Kweni wuli pakuyowoya za mulwani mukuru wa Yehova, Satana, uyo wazamupusika mitundu kuti yiwukire ŵanthu ŵa Chiuta pa nkhondo ya Aramagedoni? Yesu wazamumuponya mu chizongwe pamoza na viŵanda vyake, umo ŵazamujalirika vyaka 1,000.—Chivu. 20:1-3.

16. (a) Kasi tikulongora wuli kuti ‘tikumumanya Chiuta’? (b) Kasi ntchivichi chizamuŵachitikira ŵanthu awo ŵakumanya Yehova pa nkhondo ya Aramagedoni?

¹⁶ Kwali tikamba ni kale unenesko panji yayi, kuti tizakaponoskeke pa Aramagedoni, tikwenera kulongora kuti ‘tikumumanya Chiuta’ na “kupulikira makani ghawemi ghakuyowoya vya Fumu yithu Yesu.” (2 Tes. 1:7-9) Tikulongora kuti ‘tikumumanya Chiuta,’ para tikumanya malango ghake, ivyo wakutemwa, na ivyo wakutinkha. Tikulongoraso kuti tikumumanya para tikumutemwa na kumupulikira kweniso para tikusopa iyo pera. (1 Yoh. 2:3-5; 5:3) Para tikumumanya Chiuta, tikuŵa na mwaŵi ‘wakumanyikwa na iyo,’ ndipo ichi ndicho chizamutovwira kuti tizakaponoskeke pa Aramagedoni. (1 Kor. 8:3) Chifukwa wuli? Chifukwa ntchakuti para ‘tikumanyikwa na iyo’ ndikuti wakutitemwa.

17. Kasi “kupulikira makani ghawemi ghakuyowoya vya Fumu yithu Yesu” chikung’anamurachi?

¹⁷ “Makani ghawemi ghakuyowoya vya Fumu  yithu Yesu,” ni vyose ivyo Yesu wakasambizga, ivyo tikuvisanga mu Mazgu gha Chiuta. Tikulongora kuti tikupulikira makani ghawemi para tikughalondezga pa umoyo withu. Kweniso para tikuŵika vinthu vya Ufumu pa malo ghakwamba, kupulikira fundo za Chiuta, na kupharazga Ufumu wake. (Mat. 6:33; 24:14) Tikweneraso kovwira Ŵakhristu ŵakuphakazgika apo ŵakuchita mulimo wawo wakuzirwa.—Mat. 25:31-40.

18. Kasi Ŵakhristu ŵakuphakazgika ŵazamulongora lusungu wuli ‘ŵamberere zinyake’?

¹⁸ Sonosono apa Ŵakhristu ŵakuphakazgika ŵazamulongora lusungu ‘ŵamberere zinyake’ chifukwa ŵakaŵawovwiranga. (Yoh. 10:16) Kasi ŵazamuŵalongora wuli lusungu? Pambere Aramagedoni yindambe, wose ŵa 144,000 ŵazamuŵa kuti ŵali kuchanya pakuŵa vilengiwa vyauzimu ivyo vingafwa yayi. Ŵazamuŵa chigaŵa cha ŵankhondo ŵa kuchanya awo ŵazamuparanya Gogi na kuvikilira “mzinda ukuru” wa ŵanthu ŵa Yehova. (Chivu. 2:26, 27; 7:9, 10) Mzinda ukuru uzamuŵa wakukondwa chomene chifukwa ukawovwiranga Ŵakhristu ŵakuphakazgika apo ŵakaŵa ŵachali pa charu chapasi.

19-20. Nanga tingasangana na masuzgo wuli, kasi tingachita wuli kuti tilutilire kugomezgeka apo Aramagedoni yikusendelera?

¹⁹ Mu nyengo zaumaliro na zakusuzga izi, ŵanthu ŵanandi ŵa Yehova ŵakusangana na viyezgo. Nangauli vili nthena, kweni tingazizipizga na chimwemwe. (Yak. 1:2-4) Chimoza icho chingatovwira chomene ni lurombo lwakufumira pasi pamtima. (Luka 21:36) Kweniso tikwenera kuŵazga Mazgu gha Chiuta na kughanaghanirapo, kusazgapo mauchimi agho ghakulongosora vinthu ivyo vichitikenge sonosono. (Sal. 77:12) Para tichitenge vinthu ivi na kulimbikira kupharazga, tikhozgenge chipulikano chithu.

²⁰ Ghanaghanirani umo muzamukondwera para Babuloni Mukuru waparanyika ndiposo para nkhondo ya Aramagedoni yamara. Kweniso apo waliyose wazamuchindika zina la Chiuta na muwuso wake. (Ezek. 38:23) Nadi, Aramagedoni ni nkhani yakukondweska ku awo ŵakumumanya Chiuta, kupulikira Mwana wake, kweniso awo ŵazizipizgenge m’paka paumaliro.—Mat. 24:13.