NKHANI YAKUSAMBIRA 37
Chifukwa Wuli Tikwenera Kujilambika kwa Yehova?
“Asi tikwenera kujilambika chomene kwa Dada wa umoyo withu wauzimu?”—HEB. 12:9.
SUMU 9 Yehova Ni Themba Lithu!
CHILATO CHA NKHANI IYI *
1. Chifukwa wuli tikwenera kujilambika kwa Yehova?
TIKWENERA kujilambika * kwa Yehova chifukwa ndiyo Mlengi withu. Pa chifukwa ichi, wali na mazaza kutiphalira icho tikwenera kuchita. (Chivu. 4:11) Kweni pali chifukwa chinyake icho tikwenera kujilambikira kwa Yehova. Chifukwa ichi ntchakuti iyo wakuwusa makora. Kwamba kale, ŵanthu ŵanandi ŵawusapo ŵanyawo. Kweni para tikuyaniska na Yehova umo iwo ŵakuwusira, tikuwona kuti Yehova ngwavinjeru, ngwachitemwa, ngwalusungu, kweniso ngwachiwuravi.—Eks. 34:6; Rom. 16:27; 1 Yoh. 4:8.
2. Kuyana na Ŵahebere 12:9-11, chifukwa wuli tikwenera kujilambika kwa Yehova?
2 Yehova wakukhumba kuti timupulikirenge, chifukwa cha kumopa waka yayi, kweni chifukwa chakuti tikumutemwa kweniso ni Dada withu wachitemwa. Mu kalata yake iyo wakalembera Ŵahebere, Paulosi wakalongosora kuti “tikwenera kujilambika chomene kwa Dada” withu chifukwa wakutisambizga “kuti tisange chandulo.”—Ŵazgani Ŵahebere 12:9-11.
3. (a) Kasi tikulongora wuli kuti tikujilambika kwa Yehova? (b) Kasi ni mafumbo wuli agho ghazgolekenge mu nkhani iyi?
3 Tikulongora kuti tikujilambika kwa Yehova para tikuchita chilichose icho tingafiska kuti timupulikire mu vinthu vyose, kweniso para tikuleka kugomezga pa kapulikiskiro kithu. (Zinth. 3:5) Chiŵenge chipusu kujilambika kwa Yehova para tamanya makora mikhaliro yake. Chifukwa wuli? Chifukwa ntchakuti mikhaliro yake yikuwoneka mu vyose ivyo wakuchita. (Sal. 145:9) Para tasambira vinandi vyakukhwaskana na Yehova timutemwenge chomene. Ndipo para tikumutemwa tikhumbikwirenge malango ghanandinandi yayi ghakuti ghatovwire kumanya icho ntchiwemi na icho ntchiheni. Tikuyezgayezga kuchita vinthu ivyo vikukolerana na khumbo la Yehova mwakuti tigege icho ntchiheni. (Sal. 97:10) Kweni nyengo zinyake chingaŵa chakusuzga kumupulikira. Chifukwa wuli? Ndipo kasi ŵabali ŵalara, ŵadada, na ŵamama ŵangasambirako vichi kwa Kazembe Nehemiya; Themba Davide; na Mariya, mama wa Yesu? Nkhani iyi yizgorenge mafumbo agha.
CHIFUKWA WULI CHINGAŴA CHAKUSUZGA KUJILAMBIKA KWA YEHOVA?
4-5. Kuyana na Ŵaroma 7:21-23, chifukwa wuli chingaŵa chakusuzga kujilambika kwa Yehova?
4 Chifukwa chimoza icho chikuŵira chakusuzga kujilambika kwa Yehova ntchakuti tili kuhara kwananga ndipo tili ŵambura kufikapo. Lekani ni nyengo zose yayi apo chikuŵa chipusu kupulikira Chiuta. Adamu na Eva ŵati ŵanangira Chiuta na kurya chipambi chakukanizgika, ŵakamba kujisankhira ŵekha icho ntchiwemi na icho ntchiheni. (Gen. 3:22) Mazuŵa ghano napo, ŵanthu ŵanandi ŵakupulikira yayi Yehova ndipo ŵakujisankhira ŵekha icho ntchiwemi na icho ntchiheni.
5 Ŵateŵeti ŵa Yehova nawo nyengo zinyake chikuŵa chakusuzga kuti ŵajilambike kwa iyo. Mpositole Paulosi nayo wakasangana nalo suzgo ili. (Ŵazgani Ŵaroma 7:21-23.) Nga ni Paulosi, nase tikukhumba kuchita icho ntchiwemi mu maso gha Yehova. Kweni tikwenera kulutilira kulimbana na makhumbiro ghaheni.
6-7. Ntchifukwa wuli chinyake icho chingaŵira chakusuzga kujilambika kwa Yehova? Pelekani chiyelezgero.
6 Chifukwa chinyake icho chingaŵira chakusuzga kujilambika kwa Yehova ni uko tili kulira na umo tili kulelekera. Maghanoghano gha ŵanthu ŵanandi ghakupambana chomene na khumbo la Yehova, ndipo tikwenera kufwilirapo kuti tileke kutolera maghanoghano ghawo. Wonani chiyelezgero ichi.
7 Ku malo ghanyake ŵawukirano ŵakuŵachichizga chomene kuti ŵasange ndalama zinandi. Mudumbu munyake zina lake Mary * wakasangana na suzgo ili. Pambere wandasambire vya Yehova, wakasambira yimoza mwa masukulu ghapachanya chomene mu charu cha kwake. Ŵamumbumba yakwake ŵakamuchichizganga kuti wasange ntchito ya ndalama zinandi kuti ŵanthu ŵamuchindikenge. Nayo ndivyo wakakhumbanga. Ndipouli, wakati wasambira vya Yehova na kwamba kumutemwa, wakasintha vilato vyake. Kweni chikamuŵira chakusuzga. Iyo wakuti: “Nyengo zinyake nkhuŵa na mwaŵi wakusanga ndalama zinandi, kweni nkhuwona kuti ivi vinganitondeska kuteŵetera Yehova. Chifukwa cha umo nili kulelekera, vichali kunisuzga kukana. Nkhulomba kwa Yehova kuti wanovwire kuti nileke kunjira ntchito yiliyose iyo yinganitondeska kumuteŵetera.”—Mat. 6:24.
8. Kasi sono tidumbiskanenge vichi?
8 Tikusanga vyandulo para tikujilambika kwa Yehova. Kweni awo ŵali na udindo nga ŵabali ŵalara, ŵadada, na ŵamama para ŵakujilambika kwa Chiuta ŵangawovwira ŵanyawo. Tiyeni sono tidumbiskane viyelezgero vya mu Baibolo ivyo vingatovwira umo tingagwiliskira ntchito mazaza ghithu kuti tikondweske Yehova.
IVYO ŴALARA ŴANGASAMBIRAKO KWA NEHEMIYA
Ŵalara ŵakugwira ntchito pa Nyumba ya Ufumu, nga umo Nehemiya wakawovwilira ŵabali ŵake pakuzengaso viliŵa vya Yerusalemu (Wonani ndime 9-11) *
9. Kasi ni masuzgo wuli agho Nehemiya wakakumana nagho?
9 Yehova wali kuŵapa ŵalara mulimo wakuzirwa chomene wakupwelelera ŵanthu ŵake. (1 Pet. 5:2) Ŵalara ŵangasambirako kwa Nehemiya umo wakachitiranga vinthu na ŵanthu ŵa Yehova. Pakuŵa kazembe wa Yuda, Nehemiya wakaŵa na mazaza ghakuru. (Neh. 1:11; 2:7, 8; 5:14) Ghanaghanirani waka masuzgo agho Nehemiya wakasangana nagho. Wakasanga kuti ŵanthu ŵalikazuzga tempile kweniso ŵakaŵawovwiranga yayi Ŵalevi kuyana na Dango. Ŵayuda ŵakaswa dango la Sabata, ndipo ŵanyake ŵakajitolera ŵanakazi ŵamitundu yinyake. Kazembe Nehemiya wakeneranga kuchitapo kanthu pa suzgo ili.—Neh. 13:4-30.
10. Kasi Nehemiya wakachita nagho wuli masuzgo agho wakasangana nagho?
10 Nehemiya wakachita nagho makora mazaza ghake, wakaŵachichizga yayi ŵanthu kuti ŵalondezge maghanoghano ghake. Kweni wakalomba wovwiri kwa Yehova, ndipo wakaŵasambizga ŵanthu Dango la Yehova. (Neh. 1:4-10; 13:1-3) Kweniso Nehemiya wakalongora kuti ngwakujiyuyura pakugwira ntchito lumoza na ŵabali ŵake, wakaŵawovwira kuzengaso viliŵa vya Yerusalemu.—Neh. 4:15.
11. Kuyana na 1 Ŵatesalonika 2:7, 8, kasi ŵalara ŵakwenera kuchita wuli na ŵabali na ŵadumbu mu mpingo?
11 Ŵabali ŵalara ŵangasangana na masuzgo ghakuyana na agho Nehemiya wakasangana nagho yayi, kweni ŵangamuyezga munthowa zinandi. Mwachiyelezgero, ŵakulimbikira kovwira ŵabali na ŵadumbu. Kweniso ŵakujinotha yayi chifukwa chakuti ŵali na mazaza. M’malo mwake, ŵakuchita nawo vinthu mwachitemwa ŵabali na ŵadumbu mu mpingo. (Ŵazgani 1 Ŵatesalonika 2:7, 8.) Ŵakuyowoya nawo mwalusungu chifukwa chakuti mbakujiyuyura kweniso mbachitemwa. Andrew, uyo waŵa mulara kwa vyaka vinandi, wakuti: “Nkhuwona kuti ŵabali na ŵadumbu ŵakufwatuka para mulara ngwalusungu kweniso ngwachitemwa. Mikhaliro iyi yikovwira mpingo kukolerana na ŵabali ŵalara.” Tony uyo nayo waŵa mulara vyaka vinandi, wakuti: “Nkhuyezgayezga kulondezga ulongozgi wa pa Ŵafilipi 2:3, ndipo nyengo zose nkhuyezgayezga kuwona ŵanji kuti ŵakuniluska. Ichi chikunovwira kuti nileke kuchichizga ŵanji kuti ŵanipulikirenge.”
12. Chifukwa wuli ntchakuzirwa kuti ŵalara ŵaŵe ŵakujiyuyura?
12 Ŵalara ŵakwenera kuŵa ŵakujiyuyura nga ni Yehova. Nangauli Yehova ni Fumu ya chilengiwa chose, “wakukotama” kuti wawuske “wakuyuyuka mu fuvu.” (Sal. 18:35; 113:6, 7) Kweni Yehova wakutinkha ŵakujikuzga.—Zinth. 16:5.
13. Chifukwa wuli mulara wakwenera “kukora lulimi lwake”?
13 Mulara uyo wakujilambika kwa Yehova wakwenera “kukora lulimi lwake.” Para wangatondeka kuchita nthena, wangayowoya mwakulasa para munyake wakuleka kumuchindika. (Yak. 1:26; Gal. 5:14, 15) Andrew, uyo tamuzunura kale mu nkhani iyi, wakuti: “Nyengo zinyake nkhakhumbanga kuyowoya mwakulasa kwa mubali panji mudumbu uyo nkhawonanga kuti wakuniyuyura. Ndipouli, chifukwa cha kughanaghanirapo viyelezgero vya ŵanalume ŵakugomezgeka awo ŵakuzunulika mu Baibolo, vyanovwira kumanya kuti ntchakuzirwa chomene kuŵa wakujiyuyura na wakuzika.” Ŵalara ŵakulongora kuti mbakujilambika kwa Yehova, para ŵakuyowoya mwachitemwa kweniso mwalusungu na ŵalara ŵanyawo kweniso ŵabali na ŵadumbu mu mpingo.—Kol. 4:6.
IVYO ŴADADA ŴANGASAMBIRAKO KWA THEMBA DAVIDE
14. Kasi Yehova wali kuŵapa mulimo wuli ŵadada, ndipo wakukhumba ŵachitenge wuli?
14 Yehova wali kuŵika dada kuŵa mutu wambumba, ndipo Chiuta wakukhumba kuti wasambizgenge na kulanga ŵana ŵake. (1 Kor. 11:3; Efe. 6:4) Kweni mazaza gha dada ghali na mphaka, ndipo wazamuzgora kwa Yehova umo wakuchitira na mbumba yake. Vili nthena chifukwa Yehova ndiyo wali kwambiska mbumba. (Efe. 3:14, 15) Dada wakulongora kuti wakujilambika kwa Yehova para wakugwiliskira ntchito mazaza ghake munthowa iyo yikukondweska Chiuta. Ndipo wangasambirako vinandi kwa Themba Davide.
Pakulomba, dada wakwenera kulongora kuti ngwakujiyuyura (Wonani ndime 15-16) *
15. Chifukwa wuli Themba Davide ntchiyelezgero chiwemi ku ŵadada?
15 Yehova wakasankha Davide kuŵa na mazaza pa mbumba yake kweniso mtundu wose wa Israyeli. Pakuŵa themba, Davide wakaŵa na mazaza ghakuru. Nyengo zinyake, wakagwiliskiranga uheni mazaza ghake ndipo wakachita zakwananga zikuru. (2 Sam. 11:14, 15) Kweni wakalongora kuti ngwakujilambika kwa Yehova. Wakalongora wuli? Wakazomera kuti Yehova wamulange. Wakaŵeyelera Yehova mu lurombo na kumuphalira umo wakajipulikiranga. Ndipo wakayezgayezga kupulikira ulongozgi wa Yehova. (Sal. 51:1-4) Kweniso wakalongora kuti ngwakujiyuyura chifukwa wakazomeranga ulongozgi uliwose uwemi wakufuma ku ŵanalume kweniso ŵanakazi. (1 Sam. 19:11, 12; 25:32, 33) Davide wakasambirapo pa maubudi agho wakachita ndipo umoyo wake wose ukaŵa pakuteŵetera Yehova.
16. Kasi ŵadada ŵangasambirako vichi kwa Davide?
16 Kasi ŵadada ŵangasambirako vichi kwa Themba Davide? Mungagwiliskiranga ntchito uheni yayi mazaza agho Yehova wali kumupani. Zomerani para mwabudiska, na kuzomera ulongozgi wa mu Baibolo wakufuma ku ŵanji. Para muchitenge nthena, mbumba yinu yimuchindikaninge chifukwa muli ŵakujiyuyura. Para mukulomba na mbumba yinu, muphalirani Yehova umo mukujipulikira, kuti ŵamumbumba yinu ŵamanye umo mukumugomezgera. Kuluska vyose, longorani kuti ntchakuzirwa chomene kuteŵetera Yehova. (Doto. 6:6-9) Ivyo muchitenge ndivyo vingawovwira chomene mbumba yinu.
IVYO ŴAMAMA ŴANGASAMBIRAKO KWA MARIYA
17. Kasi ni mulimo wuli uwo Yehova wali kupeleka ku ŵamama?
17 Yehova wali kupelekaso mulimo wakuzirwa kwa mama waliyose mu mbumba, ndipo nayo wali kupika mazaza pa ŵana ŵake. (Zinth. 6:20) Nakuti kanandi ivyo mama wakuchita na kuyowoya vikukhwaska chomene umoyo wa ŵana ŵake. (Zinth. 22:6) Wonani ivyo ŵamama ŵangasambirako kwa Mariya, mama wa Yesu.
18-19. Kasi ŵamama ŵangasambirako vichi kwa Mariya?
18 Mariya wakaghamanyanga makora Malemba. Wakamuchindikanga chomene Yehova ndipo wakaŵa paubwezi wakukhora na iyo. Wakaŵa wakunozgeka kuchita ivyo Yehova wakakhumbanga, nangauli wakamanyanga kuti para wachita nthena vinthu visinthenge mu umoyo wake.—Luka 1:35-38, 46-55.
Para mama wavuka ndipo wakwenera kuyezgayezga chomene kulongora chitemwa ku ŵamumbumba yake (Wonani ndime 19) *
19 Ŵamama mungamuyezga Mariya munthowa zinandi. Kasi mungamuyezga wuli? Chakwamba, para mukulutilira kuŵa paubwezi wakukhora na Yehova, ndipo mungakhozga ubwezi winu para mukuŵazga Baibolo pamwekha na kulomba nyengo zose. Chachiŵiri, para mukusintha umoyo winu kuti mukondweske Yehova. Mwachiyelezgero, nyengo zinyake mukaleleka na ŵapapi awo ŵakaŵa na mtima wakunjoŵe ndipo ŵakayowoyanga mazgu ghakulasa ku ŵana ŵawo. Ntheura namwe mungaghanaghana kuti ndimo ŵapapi ŵakulelera ŵana. Nanga mungaŵa kuti mwasambira ivyo Yehova wakukhumba kuti muchitenge ku ŵana ŵinu, mungatondeka kuzikira nawo, chomenechomene para muli na vyakulema ndipo ŵakutondeka kumupulikirani. (Efe. 4:31) Pa nyengo ya nthena iyi, ndipo mukwenera kulomba chomene kwa Yehova. Mama munyake zina lake Lydia wakuti: “Nyengo zinyake, nkhulomba pafupipafupi kuti nileke kukalipa para mwana wane watondeka kunipulikira. Nkhulekezga dankha kuyowoya na kulomba cha mu mtima kuti Yehova wanovwire. Lurombo lukunovwira kuti nizikire.”—Sal. 37:5.
20. Kasi ni suzgo wuli ilo ŵamama ŵanyake ŵakusangana nalo, ndipo ŵangalimazga wuli?
20 Suzgo linyake ilo ŵamama ŵanyake ŵangaŵa nalo ndakuti ŵangatondeka kulongora chitemwa ku ŵana ŵawo. (Tito 2:3, 4) Ŵamama ŵanyake ŵali kulelekera mu mbumba izo ŵapapi ŵakuŵa paubwezi yayi na ŵana ŵawo. Para namwe ndimo mukalelekera, mukwenera yayi kuchita nga umo ŵapapi ŵinu ŵakachitiranga. Mama uyo ngwakujilambika kwa Yehova wakwenera kusambira umo wangalongolera chitemwa ku ŵana ŵake. Nangauli chingaŵa chakusuzga kuti wasinthe kaghanaghaniro kake na kachitiro ka vinthu, kweni wangasintha ndipo vingawovwira kuti iyo na banja lake ŵaŵe ŵakukondwa.
LUTILIRANI KUJILAMBIKA KWA YEHOVA
21-22. Kuyana na Yesaya 65:13, 14, kasi pakuŵa uwemi wuli para tikujilambika kwa Yehova?
21 Themba Davide likamanya uwemi wa kujilambika kwa Yehova. Likalemba kuti: “Malanguro gha Yehova ngaurunji, ghakukondweska mtima, malango gha Yehova ngakutowa, ghakungweluska maso. Muteŵeti winu wakuchenjezgeka navyo. Para munthu wakuvisunga, wakusanga njombe yikuru.” (Sal. 19:8, 11) Mazuŵa ghano, tikuwona mphambano pakati pa ŵanthu awo ŵakujilambika kwa Yehova na awo ŵakukana ulongozgi wake. Awo ŵakujilambika kwa Yehova ‘ŵakuchemerezga mwachimwemwe chifukwa cha kukondwa mu mtima.’—Ŵazgani Yesaya 65:13, 14.
22 Para ŵabali ŵalara, ŵadada, na ŵamama ŵakujilambika kwa Yehova, ŵakuŵa na umoyo uwemi, mabanja ghawo ghakuŵa ghakukondwa, ndipo mpingo wose ukuŵa wakukolerana. Chakuzirwa chomene kuluska vyose ntchakuti ŵakukondweska mtima wa Yehova. (Zinth. 27:11) Ili ni thumbiko likuru chomene kuluska ghose.
SUMU 123 Kujilambika ku Ndondomeko ya Chiuta
^ ndime 5 Nkhani iyi yikulongosora chifukwa icho tikwenera kujilambikira kwa Yehova. Yikulongosoraso umo ŵabali ŵalara, ŵadada, na ŵamama ŵangachitira na mazaza agho ŵali kupika na Yehova, kweniso ivyo ŵangasambirako kwa Kazembe Nehemiya; Themba Davide; na Mariya, mama wa Yesu.
^ ndime 1 MAZGU GHALONGOSOREKA: Lizgu lakuti kujilambika lili na ng’anamuro liheni kwa awo ŵakuchita kuchichizgika kupulikira munthu munyake. Ndipouli, ŵanthu ŵa Chiuta ŵali kusankha kumupulikira, ntheura ŵakuwona kuti ntchiheni yayi kujilambika kwa iyo.
^ ndime 7 Mazina ghanyake ghasinthika mu nkhani iyi.
^ ndime 62 MAZGU GHAKULONGOSORA CHITHUZI: Mulara wakugwira ntchito lumoza na mwana wake kunozga Nyumba ya Ufumu, nga umo Nehemiya wakawovwilira ŵabali ŵake pakuzengaso viliŵa vya Yerusalemu.
^ ndime 64 MAZGU GHAKULONGOSORA CHITHUZI: Dada wakulomba kwa Yehova pamoza na mbumba yake.
^ ndime 66 MAZGU GHAKULONGOSORA CHITHUZI: Msepuka watondeka kumalizga ntchito za pa nyumba panji homuweki chifukwa cha kuseŵera magemu gha pa kompyuta nyengo yitali. Amama ŵake nangauli ŵavuka kweni ŵakumusambizga mwakuzikira kwambura kuyowoya mazgu ghakulasa.
